Vivii ia Ieova I Musika

E TELE auala e mafai ai e auauna a Ieova ona avatu o viiga ia te ia. E aunoa ma se faaletonu, i mea matagofie uma ma i latou uma lava e faafiafiaina lona finagalo o le ‘pepese ma fai pesega ia te ia.’ (Salamo 105:2) Ua matuā iloa lelei ma matauina faapea o musika o le tasi lea o “faailoga iloga o le faaletagata.”

Ua taʻua foʻi musika “o le meaalofa tutasi faaletagata, e fou ma faafouina ai.” O manu tusa pe aivao pe lalata, e leai so latou tomai faamusika. E moni, e usu e nisi o manu felelei pese malie, a e ua latou faia faapea o se uiga faalenatura. E lē sili atu so latou talisapaia o musika i lo o koke ua malamalama i ni nai upu atonu na aʻoaʻoina ai i latou e tautala ai. A e mafai ona tatou paʻi atu i fatu o isi i musika malie, e oo lava i upu, e mafai ona tatou fesoʻotai ma isi i manatu.

Ioe, o musika o se meaalofa mai Le Na Foafoaina le fanau tagata, ma maeu sea meaalofa! I ni iloiloga talu ai nei ua faaalia ai faapea e oo lava i pepe e leʻi fananau mai e faailoa mai ituaiga o musika latou te mananao ai—ia malie ma logo lelei le fati— ma musika latou te lē mananao ai—e malolosi ma leoleoā, e pei o se musika leotetele. Ua faailoa mai foʻi ia i tatou faapea e mafai e se pepe e leʻi fanau mai ona atiina aʻe le taleni a o ia faalogo i musika matagofie. O lea e aumai e musika le fiafia i tagata e le gata e mai le fanau mai se ia oo i le oti a e mai lava i le manava seʻi oo i le oti! Talu ai e le masani ona vaaia e tagata musika o se mea e matuā tatau mo le olaga o le tagata, ua faia ai e Le Na Faia mea uma lava le tagata ia mafai ona ia fatuina o pese ma ia olioli ai, o se tasi lea o faaaʻoaʻoga o lona atamai ma le alofa. Ua faailoa mai ia i tatou faapea o “tagata Eperu o tupuga iloga o tagata fai musika.” Ma o le mea moni e matuā uiga ese lava ona o musika i uluaʻi tausaga o le talafaasolopito o le tagata sa faatāuaina, faatasi ai ma faiga tau faatoaga m le gaosia o mea, o se tasi o tofiga o le tagata.—Kenese 4:20-22.

Aafiaga o Musika

Ae peitaʻi, aua lava neʻi tatou faagaloina le mea moni faapea o musika e mafai ona a lē atiina aʻe ai, e faavaivaia ai. O musika lelei e aofia ai leo matagofie e iloa i le fati, talafeagai lelei, ma ia fetaui leo ma upu; o lea fetaui lelei ma le mea o loo sili ona siitia i le tagata. A o musika leaga e fetaui ma faanaunauga iuvale o le tagata. O na ituaiga o musika ua taʻua: “O le tasi tasitolu lē paia o le . . . saua, faiga faaleituaiga ma le pisapisaō.”

O le mea e faanoanoa ai, ona o nisi fai musika e faapea o loo auauna ia Ieova le Atua ua le taulau i lenei itu. O se vaega toaitiiti o i latou na ua suʻe tupe i latou i fafo e tātā i faaipoipoga ma faalataina a i i le lē talisapaia o mataupu silisili i ituaiga o musika ua latou tāina. E matuā leo tetele naua a latou musika ma ua lē mafai ai ona faia talanoaga masani. E foliga mai ua matuā galo lava ia i latou o valaaulia o le faaipoipoga e leʻi na ona ō atu e faalogo i le au fai musika o faaalialia a latou taleni.

O musika lelei e tele fuafuaga aogā e maua ai. O musika malu ma le malie atonu e mafai ona faamalieina ai ma mapu ai. O le tele o mea atonu e taʻua o “musika taʻutaʻua,” e pei o musika semifonika ma na e faalogoina i fale koniseti, atonu e fetaui ma le mafaufau, pe atonu foʻi e siitia ia mafaufauga ma faalogona. Aua foʻi neʻi faagaloina pese faamatala, e masani ona faavae i matua mai le Tusi Paia, o le faia e aofia ai au faipese tetele ma faaili. O se tasi ua sili ona mataina o Handelʻs “Messiah.”

E mafai foʻi ona avea musika ma faamanuiaga i tagata matutua, i latou o nofo puipuia, ma e o mamaʻi. Sa faaaogāina musika e paʻi atu ai i tamaiti e le o lelei mafaufau pe a le taulau isi taumafaiga. Ua faailoa mai faapea o musika faapitoa ua fuafuaina e mafai ona avatu ai se vaimalū aogā i ofisa o fomaʻi ma fomaʻi fai nifo. O musika talafeagai lelei ua iloa e mafai ona fesoasoani atu i tagata faigaluega i fale gaosi mea e faia lelei ai ma sili atu ona tele galuega. E fiafia foʻi ona o le malosi o le aogā o musika na talisapaia e sili ati le 3,000 tausaga ua mavae e le Tupu o Saulo o Isaraelu.—1 Samuelu 16:14-23.

E moni, o le aogā sili e mafai ona tuuina atu i ai musika o le vivii atu ai lea ia Ieova le Atua. O na ituaiga o pesega o viiga e oo atu i tuā pe tusa ma le 3,500 tausaga i le taimi na pepese ai Isaraelu i viiga o Ieova ina ua uma ona faasaoina o i latou mai le Sami Ulaula. (Esoto 15:1-21) O le vivii atu ia Ieova i pese ma laau faaili sa matuā lauiloa i le tapuaiga i le malumalu o le Atua. O musika i le malumalu sa aofia ai e sili atu i le tasi vae sefulu o le aofaiga atoa o sa Levī. (1 Nofoaiga a Tupu 23:3, 5) O se faaili tele ma se au faipese toatele sa i ai i le faapaiaina o le malumalu o Solomona. (2 Nofoaiga a Tupu 5:12, 13) Ua matuā fetaui lelei lava la i le Tusi Paia Eperu (a e maise lava le tusi Salamo) i lea taimi ma lea taimi ona uunaia i tatou ina ia fai pesega ia Ieova le Atua.

I Tusitusiga Kerisiano Eleni, ua tatou iloa ai foʻi sa pepese Iesu ma ona soʻo i le taimi o le Talisuaga afiafi a le Alii. Sa fai pesega foʻi Paulo ma Sila a o i ai i le fale puipui i Filipi. (Mataio 26:30; Galuega 16:25) I le muamua Korinito 14:15 ua fautuaina ai faapea o pese sa avea o se vaega faifai pea o le tapuaiga faalefapotopotoga i aso o le au aposetolo. Ua sili ai la ona fetaui faatonuga a Paulo ua tatou faitau ai i le Kolose 3:16: “Ia outou aʻoaʻo ma apoapoai le tasi i le tasi i salāmo, ma pese, ma siva faaleagaga, o loo pepese atu ai ma le faafetai i le Alii [o Ieova] i o outou loto.” O le a e maua foʻi faatonuga faapena i le Efeso 5:18-20.

I le tausisi atu i nei poloaiga, mai uluaʻi taimi, ua faaaogā lelei ai e Molimau Kerisiano a Ieova i aso nei lenei meaalofa o musika i a latou tapuaiga fuafuaina. O le uluaʻi faasalalauga lava faaletausaga o le Zionʻs Watch Tower na faasalalauina i le (1879) sa vaaia ai foʻi le faasalalauga o le tusi pese, Songs of the Bride. I le 1896 na faasalalauina ai e le Sosaiete se lomiga o le Zionʻs Watch Tower na i ai tatou ma pese na fatuina e Tagata Aʻoga o le Tusi Paia. Na taʻua e le lomiga na sosoʻo ai o le mekasini: “O le usuina o le upu moni o se auala lelei lea e avatu ai i mafaufau ma loto o tagata o le Atua . . . Tatou te faafetai i le Atua ona o musika ma taleni faafatu solo ua tuuina mai i nisi o ona tagata paia.” Ina ua mavae le selau tausaga o le faasalalauna o tusi pese, o le tasi na faaalia le tomai o musika ma fatuga o solo na faasalalauina i le 1984. Ua faaulutalaina Sing Praise to Jehovah.

O Vala o Fatuga

O le tusi pese fou e faaluaina ona tele pese ua i ai na i lo o le pese tuai. E maua foʻi i se lapoʻa talafeagai e mafai ona ofi i lau taga ma i se tusi pese lapoʻa e matamata tetele ona mataʻitusi ma nota e faapitoa lava ina ia faigofie ona faitauina. O fatuga ma faaupuga e pei ni solo pupuu sa tuuina mai Molimau ai i itu e fa o le lalolagi, e aofia ai Ausetalia, Pasili, Kanata, Tenemaka, Egelani, Federal Republic o Siamani, Finilani, Falani, Iapani, ma le Iunaite Setete.

I se faatusatusa atu i tusi pese uma na faasalalauina e le Watch Tower Society, ua le o toe i ai vaega usu e fa. Na i lo o lena, ua uma ona saunia lelei fatuga sili ona malie ma faigofie ona ta. Ua faaopoopoina foʻi i ai ma nota o kitara.

E lua fatuga fou na fatu i upu manaomia ona sa iloa fati sa faaaogāina muamua e leʻi fatuina e Molimau. Na faapefea ona tupu lena mea? Atonu sa falogo le na fatuina i sina fati e le iloa tele. Ona oo mulimuli ane lea i lona mafaufau, atonu e mafai ona faafoliga o ia na fatuina.

Faaleleia o Manatu Logo Malie

A o susulu ane pea le malamalama i le upu moni a le Atua sa oo ina tupu pea e tusa ai ma le Faataoto 4:18, ma sa iloa ai e tatau ona suia pese sa i ai i tusi pese muamua. E moni lena e tusa ai ma le Pese 215. I le 1974 na tatou iloa ai o le vaa o Noa na faaatagia ai la tatou parataiso faaleagaga ae le o le Malo. (Tagai i le Watchtower, 1974, itulau 634.) O lea o le laina i le tusi pese tuai “Sola loa i le vaa o le faaolataga, Le Malo ua i ai nei o le Atua!” sa suia i le “Gaoioi loa! Ma tuuina atu atoa; Auauna i le Malo ua i inei o le Atua.”

Faatasi ai ma isi toe teuteuga ona o le naunau ia saʻo lelei isi nei o mea: I le faiga fou o mea, o le a lē toe i ai ni “mea leaga” e fefe ai, na i lo o le a lē toe i ai ni “temoni” e fefe ai, auā e lē fefefe tagata o Ieova i temoni. (Pese 129) E tusa ai ma upu a Iesu i le Mataio 6:22, ua apoapoai ai tatou e le Pese 26 ‘ina ia lelei la tatou vaai’ na i lo o le ‘taotasi o le vaai.’

I le tele o tulaga sa tuuina atu ai se fati faapitoa i se vaega o ni upu fou e foliga mai e sili atu ona uigā ma aogā. Pese 60, “Le Malo o le Atua o le Afe Tausaga,” o loo faaaogāina le fati o le Pese 86 i le tusi pese tuai. O fatuga o le Pese 2, “Usiusitai i le Atua I lo o Tagata” o le faalauteleina o upu i le Pese 69 i le pese tuai. E foliga mai o lenei matua sa manaomia ai se itulau atoa na i lo le afa itulau.

ʻOa Faaleagaga

O le tusi pese fou ua talafeagai lelei lona matua Sing Praise to Jehovah, e faavae i le Salamo 96:1,4. E tele pese ua faasino tonu ia Ieova ma viia ai ona uiga. Matau na o ni nai upu: “O Ieova, o le Atua Silisili!” (ua lisiiina mai ia ni uiga e 20 o Ieova po o taʻu); “O Ieova e Manatu Tele Mai o Ia”; “O Ieova, O Lē Faasaoina”; “Ua Faaalia e le Foafoaga le Mamalu o Ieova”; ma “O Ieova, ‘o le Atua o Faamafanafanaga Uma.’”

Ua taʻu mai ia i tatou ‘ia aʻoaʻo ma feapoapoai i salāmo, ma viiga o le Atua ma pese faaleagaga,’ ma ua faia tonu lava faapena e lenei tusi pese. (Kolose 3:16) E mafai ona e vaaia lenei mea mai matua e pei o le: “Ia Tumau, Ia le Faagaeetia!”; “Ia Faaauau e pei o ni Tane”; “Ia Faia e Sili atu—E pei ona sa Faia e le Au Naseri”; “Agaʻi i Luma Outou Faifeau o le Malo!”; “Ia Gauaʻi ma le Faamaoni i le Faiga Faatiokarate”; ma “Ia Mataala, Tumau, Ia Malosi.”

Ina ia fesoasoani ia i tatou e utagia faatonuga a Paulo, “Ia outou olioli i le Alii aua le aunoa.” (Filipi 4:4) Ua ia i tatou: “O le Pese e Olioli ai”; “Ia Olioli ona o le Faamoemoe o le Malo!”; “Ia Fiafia i le Aso Atoa”; “Usu le Pese o Fiafiaga o le Malo”; “Auai ma le Olioli i le Seleselega”; ma “Olioliga ma Fua o le Auaunaga o le Malo.”

O faamanuiaga o le Malo sa maua foʻi sa latou vaega e uaʻi atu ai mai le tusi pese tuai. “O le Malo o le Atua o le Afe o Tausaga”; “Folafolaga a le Atua o le Parataiso”; “Ola e Lē Uma—Mulimuli Ane!”; “Faatasi ma Keriso i le Parataiso.”

Sa olioli faapitoa lava o tatou talavou i nei pese fou e pei o: “Talavou! Faaaʻoaʻo lo Latou Faatuatua”; “O Talavou se Nofoaga i Fuafuaga a le Atua”; ma “O Fanau—O se Meaalofa Tāua Mai le Atua.” O pese e faaalia ai le talisapaia o galuega lelei a o tatou tuafafine o: “O Fafine o se ʻAu Tau Tele.”

E faapefea ona tatou faaalia le talisapaia o nei pese lelei? I se tasi vasega, o le faaaogāina ma le uigā o lo tatou faaeaga ma le tiute tauave e usuina ia pese o se vaega o la tatou tapuaiga e le aunoa i o tatou Maota o Malo. E tatau ona tatou taumafai ia taunuu i a tatou sauniga a o leʻi oo i le taimi, ma nonofo ai seʻi oo i le faaiʻuga, ina ia auai i le usuina o nei pese. Seʻi o tatou pepese ma o tatou loto atoa, matala lelei le fofoga, ma ia mafana ma aasa. E mafai foʻi ona faaalia lo tatou talisapaia i le usuina ia tatou faatasiga. E mafai ona tatou maua lipine o musika mai tusi pese e tāina pe a tatou mananao e olioli i ni musika e faamalosia ai. O lea, e mafai ona atiina aʻe i tatou faaleagaga i taimi uma lava tatou te olioli ai i nei musika matagofie.

O le mea e silisili ona tāua i mea uma lava, o lo tatou faaalia o le talisapaia o nei pese matagofie i le ola ai e le aunoa i o latou faalogona, e tusa ai ma a tatou amio i aso uma ma o tatou tiute tauave i le faiva.