Mātua—E Faapefea Ona E ʻAtiina Aʻe’ Lou Aiga?

“Ua atiina ae le fale i le poto; a e faamausaliina i le faautauta.”—FAATAOTO 24:3.

1. O le ā se tasi o mea manaomia mo se aiga malosi?

I se suʻesuʻega talu ai nei na fesiligia ai le sili atu i le 550 polofesa o ē faapitoa i le fesoasoani i aiga po o a uiga na latou matauina, sa sili ona maua i aiga malolosi. Sa laualuga i le lisi: o fesoʻotaʻiga ma le taliga logo. O le tusitala o le suʻesʻuega, o Dolores Curran, sa ia faamatala le pogai: “O le malosi na te faaolaolaina le tausiga, le foaʻi, fetufaʻi ma le ioega. A aunoa ma le taliga logo ma le fetufaʻi o i tatou lava, e lē mafai ona iloa e le tasi le isi. E avea i tatou o se aiga o ni tagata e nonofo faatasi e fetaliaʻi na i lo le amanaia o manaoga o le isi.” Ioe, o le fetafeai o fesoʻotaʻiga o le suavai ola lea o se aiga malosi.

2, 3. (a) O le ā le faafitauli ua matauina e oo lava i totonu o aiga Kerisiano? (e) O le ā ua faaalia mai i le Faataoto 24:3,4 e mafai ona fesoasoani e atiina aʻe se aiga malosi? (i) O ā fesili e manaomia ona taliina?

² O le leai o se vavalalata, e ono mafai ona i ai ni iʻuga mataʻutia. Mo se faataʻitaʻiga, na fesiligia se tasi o lala o le Watch Tower Society i Aferika i le mafuaaga ua lafoaʻia ai e nisi o talavou amioga mamā faale-Tusi Paia. “O le vaivaiga autū e fesoʻotaʻi ma le faafitauli atoa,” e tusa ai ma le tali, “o le lē taulau o mātua o na avea ma ē faalogologo lelei ma le leai o se tomai e fetufaʻi ai ma a latou fanau. O le toatele o mātua e leai sa latou faiā vavalalata ma a latou fanau.” O le mea moni, na o le tasi lea o itu o le faafitauli—e ui ina o se itu tāua. O le usiusitaʻi taʻitoatasi ma le tuʻutoina faaleatua o se talavou, e pei lava o isi, o le tulaga muamua lea. (Roma 14:12; 1 Timoteo 6:6) Manatua foʻi, i le Faataoto 24:3, 4. Ua faitauina faapea: “Ua atiina ae le fale i le poto; a e faamausaliina i le faautauta; o le poto foi e tutumu ai afeafe i oloa uma lava e tāua ma le matagofie.”

³ Peitaʻi e faapefea ona e faatatauina le atamai, faautauta, ma le poto e ausia ai le lagona ootia vavalalata, a e maise mo ē o tuputupu aʻe? E faapefea ona e alofia le fausiaina ma le lē iloa o ni pa puipui i fesoʻotaʻiga? (Faatusatusa Faataoto 14:1, 12.) I lo o mea uma, e faapefea ona e atiina aʻe se aiga e taofimau i le tapuaiga moni? Ona o le tele o mea e manaomia ai lou taimi ma le gauaʻi atu, atonu e te tau manatu po o fea e amata ai. O le uluai uiga, le atamai, e mafai ona fesoasoani ia te oe faataatia mea e tatau ona faamuamua.

Faatulaga ma le Poto Mea e Faamuamua

4. O le ā e tatau ona avea o se mea e sili ona faamuamuaina e le aiga Kerisiano?

⁴ “O le mataʻu ia Ieova, o le amataga lea o le poto,” na tusi mai ai le faisalamo. (Salamo 111:10) O lou lava mataʻu migao ina neʻi lē faafiafiaina le Atua, faatasi ai ma le faamaumauina o lana tapuaiga, e lē maalofia. Sa faamatala e se tasi tinā le auala na manuia ai o ia ma lana tane i le tausia aʻe o ō la atalii e toalua ia auauna ia Ieova: “Sa faatumuina o matou olaga i le upu moni— sa matou ō i tauaofiaga uma, sauniuni ma auai i sauniga, ma avea le auaunaga i le fanua o se vaega faifai pea o ō matou olaga.” Na faaopoopo mai lana tane: “O upu moni e lē o se vaega o lō matou olaga, a e o lō matou olaga. O isi mea uma e lio ai ona autafa.” E faapena ea ona e faatulaga le tapuaiga ia Ieova o le tumutumuga o mea i lou aiga?

5. Ai se ā e manaomia ai le paleni i mātua Kerisiano?

⁵ O le auai o se aiga i le faiva i le fanua o le ā tosina ai outou ia vavalalata, peitaʻi o manaoga tutasi o fanau e manaomia ai le taulai atu o lou taimi totino ma le malosi faalefaalogona. O lea, e manaomia le paleni e fuafua ai po o le ā le tele o le taimi e mafai ona e faaaogāina mo le galuega talaʻi po o tiute faalefaapotopotoga a e i le taimi lava e tasi o loo e tausia le itu faaleagaga, faalefaalogona, ma le faaletino mo i latou o ‘lou lava aiga.’ E tatau ona e “aʻoaʻoina . . . ia muamua ona agalelei i [lou] lava aiga.” (1 Timoteo 5:4, 8) Ina ia fesoasoani i tamā faapitoa lava, ina ia maua le paleni i le va o avega tau le aiga ma tiute faaleauaunaga, ua uunaia i tatou e le Watchtower o Setema 15, 1959: “Ia tuʻu atu le faamamfa tatau i faanaunauga o lou lava aiga. O le mea moni e lē o faatalitalia e Ieova le Atua se tagata na te faaaogā uma lona taimi i gaoioiga faalefaapotopotoga, e fesoasoani ai i ona uso ma tuaoi ia maua le faaolataga, a e lē o vaaia lelei ai le faaolataga o lona lava aiga. O le avā ma le fanau a se tane o ona tiute tauave muamua lava ia.”

6. O le ā le mataʻutia e ao ona alofia e mātua, ma e faapefea ona faia o lenei mea?

⁶ O lenei tiute tauave e le manaomia ona tausia e ala i le tau na ona faaaluina o le tele o itula ma lau fanau a e peitaʻi e ala i le faaaogāina atoatoa o lena taimi. O le mea e faanoanoa ai, o nisi mātua ua matuā saisaitia i le tausia o mea tau i le faapotopotoga, se galuega e faamalieina ai, po o mea faaletino ma e ui lava na faatasi ma a latou fanau, a e o ō latou mafaufau o loo taataa solo. Na faatoā iloa lava le manaomia ona toe faatulaga o mea e tatau ona faamuamua ina ua mavae se faalavelave i aiga, “O le poto mai lugā e . . . agamalu, e ganagofie.” (Iakopo 3:17) O sea ituaiga o atamai faalelagi o le a fesoasoani ia te oe e vaevaeina tatau lou taimi ma aafiaga faalefaalogona ina ia usiusitaʻi ai i tulafono uma a Ieova.

Sasa ma le Aʻoaʻiga e Tupu ai le Atamai

7. E faapefea ona faatatauina ma le uigā le Faataoto 29:15?

⁷ O le maumauaʻi mo mataupu silisili, e folasia i le agalelei, ua taʻu atu ai i lau fanau o loo e manatu ia i latou. O le tuʻufau e saʻoloto e fuaina mai ai le leai o se saogalemu ma ni tamaiti faalogogata. “O le sasa ma le aoaiga e tupu ai le poto.” (Faataoto 29:15; 22:15) Ina ia i ai ni auga lelei “o le sasa ma le aoaiga” e tatau ona ō faatasi ma le alofa. O le aʻoaʻiga e tuʻuina atu e aunoa ma ni mafuaaga pe avatu i le taimi o le aasa o faalogona e mafai ona lepeti ai le agaga o se tamaitiiti. “O outou tamā, aua neʻi faaita i a outou fanau, ina neʻi faapalapala i latou.” (Kolose 3:21) O le “sasa” o le aʻoaʻiga e aofia ai faasalaga talafeagai, peitaʻi afai e te faia ni faatonuga e lē fetaui, faitio nauā, ma faamaasiasi ai le tamaitiiti, o se faaaogā sese lea o lenei “sasa” ma atonu e lepetia ai le mautinoa o le tamaitiiti e lē gata ia te ia lava ae faapea foʻi ma oe. Atonu o le a “faapalapala” ai o ia.

8. Faamatala pe ai se ā ua sili ai ona uigā le “aʻoaʻiga” na i lo le otegia?

⁸ A e peitaʻi e manaomia mea nei e lua o le “sasaa ma le aoaiga.” O le aʻoaʻiga sili ona manaomia na i lo le otegia; e aofia ai le tuʻuina atu o mea moni e faatalitonuina ai le isi tagata.a O le upu Eperu mo le “aoaiga” e mafai foʻi ona faapea o le ‘finau atu.’ (Salamo 38:14) O lea la, o le aʻoaʻia moni lava o lona uiga ia naunau ma tuʻuina atu mea moni ina ia mafai e le tamaitiiti ona iloa mafuaaga mo au gaoioiga. O lomiga a le Watchtower Society ua i ia mataupu, o nisi ua tusia faapitoa lava mo talavou, e mafai ona fesoasoani ia te oe e tauaʻaoina mafuaaga tatau i lau tamaitiiti i le pogai ua sese ai se tasi o auala. Po o e faaaogā atoatoa ea na fesoasoani?

Faautaga e Tupu ai le Manatu Alofa Atu

9. O le ā le fautuaga, ma ai se ā e tāua ai?

⁹ O le faautaga o se mea e manaomia foʻi mo le tomai i fesoʻotaʻiga. O le uluaʻi upu Eperu e sau mai le upu autu o lona uiga “poto e iloa ai le va,” “ia iloa vaevaetonu.” O lenei tofa mamao e mafai ai ona iloa mea ua ufitia i le vaaiga, ma faananau ai ia malamalama, manatu alofa atu, ma alofa agalelei.—1 Peteru 3:8.

10. Sa faapefea ona avea le iloa o mea ua ufitia i le vaaiga e fai ma puipuiga mai faafitauli i taimi o le Tusi Paia?

¹⁰ O se faaaʻoaʻoga faale-Tusi Paia o faaalia ai le faitaulia o le faautaga o loo faamauina i le Iosua 22:9-34. O ituaiga o Reupena, Kato ma le afa o le ituaiga o Manase, o ē na tuʻuina atu i ai nuu o ō latou tofi i sasaʻe o le Vaitafe o Ioritana, sa latou fausia se fatafaitaulaga tele i lo latou laueleele. O isi ituaiga, na manatu o se faiga lenei faaaposetasi, sa sauniunia ai e fai se faasalaga o se mea ma foliga mai o le matuā solia ma le loto ia i o le tulafono a le Atua. (Levitiko 17:8, 9) A o leʻi faia le gaoioiga, sa latou auina atu ni sui e talanoa ma ituaiga e lua ma le afa. (Faataoto 13:10) O lenei talanoaga na faailoaina ai o le fatafaitaulaga sa leʻi fausia mo le ofoina o taulaga peitaʻi ona o le “atuatuvale.” I le nonofo ese mai isi ituaiga ona o le Vaitafe o Ioritana, sa matuā manatunatu loloto ai ituaiga e lua ma le afa e uiga i le ono vavaeesea o a latou tupulaga i le lumanaʻi mai le tapuaiga i a Ieova. O le fatafaitaulaga sa avea ma faamanatu pea lava pea, o se “molimau,” o i latou foʻi, o tagata o le Atua. Maeu se suiga atoatoa na faia e lenei faamatalaga! O se malamalamaga e ese sa faataatia i le mea e “taui atu”, na mafai ai e na ituaiga ona faautagia le tulaga moni, ma maua ai le malamalamaga.—Faataoto 14:29.

11. Sa faapefea e se tasi o mātua ona faaalia le faatuatua?

¹¹ A o tulai mai se faafitauli i lau tamaitiiti, e te taumafai ea ia maua le faautaga? Mo se faaaʻoaʻoga, o se tasi o atalii a se ulugalii Kerisiano na amata ona foi mai i le fale pe a tuua le aʻoga ua ‘ita i soo se tagata.’ “Sa musu o ia e taʻu le pogai o lona ita tele,” o le faamatalaga lea a le tamā. “O le taimi muamua na ou manatu ai faapea ona o lona tetee, peitaʻi na ou matauina le lē tautala pe a ou fesili atu i uiga i le aʻoga. Ia, sa faia sa ma talanoaga umi, ma ou iloa ai o tamaiti o le aʻoga sa taufaifai ia te ia ona o lona tino laititi e tusa ai ma ona tausaga. Ina ua uma ona ou faamautinoa ia te ia loʻu malamalama i le faigata o le tulaga o loo i ai, na ou tuʻuina atu loa ia te ia ni fautuaga aogā e fesoasoani ia te ia e feagai ai ma lea omiga.” Na vave lava ona faaleleia le tulaga o le tama.

12. Ai se ā ua avea ai tausaga iti ma vaitaimi faigata mo talavou, ma o le ā e manaomia i le vaega a mātua?

¹² Ana o oe e te faaalia ea le onosaʻi lava lea e tasi i lau tamaitiiti? O talavou, a e maise i latou e iti, e matuā aafia tele i ia ituaiga mea e pei o aʻoga, foliga faaletino, tuʻinanauga faaleituaiga, ma le fia lauiloa. “Mai tulaga uma o le tuputupu aʻe o le tagata o le tulaga talavou e sili ona faigata,” o le faamatalaga lea a le tusi Adolescence “O le tulaga talavou, ē faitio ia i latou ma e lē lava le poto masani, ua lagona e lē agavaa o i latou i se lalolagi tauvaga ma le lē kea. Na i lo le taliaina o le faamasiasi ma le lē taulau, latou te gaoioi ma ni faalogona malosi o le ita ma le popole. O ia faalogona faatupu faalavelave e mafai ona aafia ai le amio a se tamaitiiti. (Faatusatusa Failauga 7:7a) Ua na o le atiina aʻe o fesoʻotaʻiga vavalalata ma lau tamaitiiti o le a e malamalama ai i le faafitauli moni ma mafai ona faautagiaina le ala sili e fesoasoani atu ai.

13. (a) O ā nisi o a puipui i fesoʻotaʻiga? (e) Ai se ā e tatau ai i mātua ona faatatauina pea lava pea le Faataoto 20:5? Faataʻitaʻi.

¹³ O le faaupuina o ō latou popolega e faigata ona faia e le tele o talavou. O lea la, a o amata ona tautala mai lau tama, ia alofia faaupuga lē mafaufau e tutuʻi ai, e pei o le: ‘E na o le pau lena? Na ou manatu o se mea tāua.’ ‘O le faalavelave o oe o le . . .’ ‘E faapefea ona e faia lenei mea ia te aʻu?’ ‘Ia, o le ā le mea o e faatalitalia? O oe ua na o se tamaititi.’ (Faataoto 12:18) I nisi o taimi o le a manaomia ai e se talavou le iloiloina o ia lava, a e maise pe afai o lona faafitauli o le maalaeale. “O le [tane po o, le fafine] faatuatua” o le a tumau pea ona taumafai e ‘utufia mai’ na faalogona. (Faataoto 20:5) O se tasi ulugalii Kerisiano na la iloa ua lē auai le la tama teine mai gaoioiga a le aiga. Sa tau saili e mātua peitai e leʻi faaleleia. Sa la taumafai pea. “Mulimuli ane, i le tasi aso na ma nonofo faatasi ma ia i luga o le moega, ma fusi mai ia te ia ma ou toe fesili po o le a le faafitauli,” o le tala lea a le tinā. “Na taʻu mai e ia ma loimata faapea sa ia te ia le lagona o i maua ma isi ua lē o toe fiafia ia te ia, o lea na alo ese ai o ia mai ia i matou i le tele na te mafaia. O loʻu faanaunauga muamua lava o le fai atu, ‘E ese lou valea,’ peitaʻi na ou taofiofia i totonu ma faalogologo a o ia sasaʻa mai lona fatu.” Na faamautinoa i ai e ona mātua la te amanaia tele o ia ma mulimuli ane faatino le faia o ia ia lagona lona i ai i le lio o le aiga. Sa ia foʻia le faafitauli ma ua auauna fiafia nei o se fai evagelia sauatoa.

14. Ai se ā ua lē lava ai le na o le valalata o faalogona i se aiga?

¹⁴ O le atiina aʻe o se soʻotaga mafana faaleaiga e tāua, ma e oo lava i nisi o le lalolagi ua faatinoina lena mea. Peitaʻi o se isi mataupu o le atiina aʻe o se aiga e manatunatu faaleagaga e lalata atu ia Ieova ma e autasia i lana Afioga. Ina ia faatinoina lenei mea, e sili atu e manaomia na i lo le na ona valalata faalefaalogona i lau fanau.

Faamalosia le Poto

15. O le ā le ituaiga o poto e faitaulia, ma ai se a?

¹⁵ “O le poto foi e tutumu ai afeafe i oloa uma lava e tāua ma le matagofie.” (Faataoto 24:4) O nei oa tautele e le ni oa faaletino a e aofia ai le saogalemu faaleagaga, le alofa faataulagaina o oe lava, mataʻu faaleatua, ma le faatuatua e faavae i luga o le poto i le Atua. O nei mea e fausia aʻe ai se olaga tamaoaiga faaleaiga. (Faataoto 2:5; 15:16, 17; 1 Peteru 1:7) O lenei poto o le a avatua i fanau le malosi i totonu ina ia mafai ai ona latou teea faufauga a Satani, e oo lava i togafiti poto, auā ua faapea mai le Faataoto 24:5: “O le tagata poto ua malosi ia; ma le tagata atamai e tupu lona malosi.” Peitaʻi e tatau ona e aʻoaʻo soʻoina lea poto i o latou loto.—Teuteronome 6:6,7; 1 Ioane 2:14.

16.(a) O le ā e manaomia ina ia faagoto ai le poto o le Atua i le fatu o lau tamaitiiti? (e) O le ā e manaomia mo le fanau ina ia maua ai ni aogā moni?

¹⁶ O se tasi o fesoasoani sili mo le aʻoaʻo soʻoina o le Afioga a le Atua i a outou fanau o le faia e lē aunoa o se suʻesuʻega faaleaiga e faalaeiau ai i latou ia avea le upu moni mo i latou lava. “Ua faataʻatia e le suʻesuʻega faaleaiga le vaaiga tonu, ian ia talia gofie ai e le mafaufau o lau tamaitiiti faatonuga,” o le faamatalga lea a se tasi o mātua na manuia ana taumafaiga e toʻafa lana fanau. Na ia faaopoopo mai: “A amata ona e faasaʻoina tamaiti, o le taimi lava lea e maua ai sau ‘aofai ita.’ Pitoaʻi afai e mafai ona e talanoaina le mataupu i e taimi e lē o i ai se ita, e pei o le taimi o le suʻesuʻega faaleaiga, e sili ona i ai avanoa e faagotoina ai manatu o loo e manao e faia.” Peitaʻi ina ia aogā moni mo le fanau, e manaomia ona e faataʻitaʻi i le aposetolo o Paulo, o lē na tusi mai: “Ou te naunau tele i le fia feiloaʻi ma outou, ina ia ou avatu ia te outou se mea alofa i la le Agaga, e faatumauina ai outou.” (Roma 1:11) E sili ona talisapaia se meaalofa pe afai o se mea e mafai ona faaaogāina e lē ua mauaina ma o se mea e aoga moni ia te ia. O le a saili mai i le mataupu se mea e paʻia ai le olaga o le tamaitiiti.

17. (a) O le ā e mafai ona fesoasoani ia faia se suʻesuʻega faaleaiga e faatosina ma ia uigā? (e) E i ai ni au fautuaga faaopoopo?

¹⁷ E tatau foʻi i mātua ona faamautinoa ua iloa e i latou uma o le aiga le taimi o le suʻesuʻega, faapea ma le mataupu o le a talanoaina. O nisi e faaaogā fesoasoani vaaia, e pei o faafanua ma ata, e pupula ai le mataupu. O isi mātua e saunia taumafa māmā a o leʻi amataina po o le maʻea foʻi o le suʻesuʻega. A maʻea lea suʻesuʻega atonu latou te talanoaina faafitauli o le aso po o le vaiaso foʻi. (Tagaʻi i le pusa o i lalo mo fautuaga faaopoopo.) A e sili i mea uma, ia faia lenei suʻesuʻega faale-Tusi Paia pea lava pea! O le tele o mātua latou te faia le tele o taumafaiga e saunia ai mea taumafa ma fale mo a latou fanau, a e sili atu le tāua o le sauniunia o “le suāsusu e le suia o le upu, ina ia . . . tutupu ai [a outou fanau i le faaolataga].”—1 Peteru 2:2; Ioane 17:3.

18. O le ā o le a fesoasaoni e ‘atiina aʻe’ i lou aiga?

¹⁸ O le atiina a’e o se aiga malosi faaleagaga e manaomia ai le tomai ma le taimi. Ia maumaututu e atiina a’e tomai o fesoʻotaʻiga ina ia tausia ai le valalata faalefaalogona i lau fanau. Aua le faatagaina se mea e taofia oe mai le tuʻuina atu o taimi manaomia e faamalosia ai lou aiga e ala i le atamai, faautauta, ma le poto. Tatalo mo lea, faatasi ma lau fanau, i le iloa e na o Ieova lava na /te faapaleina au taumafaiga ‘atiina aʻe’ faatasi ma le manuia.—Salamo 127:1.

[Faaopoopoga i lalo]

E te Manatua?

◻ E faapefea ona faamalosia se aiga e le atamai, ma o le ā mafai ona fesoasoani i le fanau e atiina aʻe?

◻ Ai se ā e fesoasoani ai le faautaga e fausia fesoʻotaʻiga lelei faaleaiga?

◻ Ai se ā e manaomia ai le poto i le Atua?

◻ E mafai faapefea ona faia le suʻesuʻega faaleaiga ia faatosina ma ia uigā?

[Pusa i le itulau 24]

O SE SUʻESUʻEGA FAALEAIGA UIGĀ?

E faapefea ona faia se suʻesuʻega?

Faia i se nofoaga toafilemu, a e i le faaaloalo. Alofia le tau a ina fai, ma le soʻona sasalu. Fai ni fesili faaopoopo ma faaaogā faataʻitaʻiga e faagaeʻe ai mafaufauga ma faaaofia ai tagata uma. Faafaigofie pe a tatau ai. E lelei pe a lē faaaogāina taimi o suʻesuʻega e otegiaina ai tamaiti. Atonu o so o se aʻoaʻiga manaomia e tatau ona faia i le tagata na o ia.

O le ā e tatau ona suʻesuʻeina?

Filifili e tusa ia ma manaoga o le aiga. Ia fetuʻutuʻunaʻi. Atonu o le sauniuniga o lesona faalevaiaso o Le Olomatamata. O ni mataupu patino atonu e manaomia ona talanoaina e pei o faafitauli e fesagaʻi ma talavou i le aʻoga, tuʻugatala, isi gaoioiga e pei o, taaloga, ma faanaunauga tau amio lē mamā. Faaaogā mataupu po o lomiga e feagai ma nei mea. Vaevae le taimi o le suʻesuʻega ina ia aofia ai mataupu eseese.

O afea e tatau ona faia ai ma mo le ā le umi?

O le ulu o le aiga e mafai ona filifilia e tusa ma faasologa o tagata o le aiga pe a mavae le talanoaga a e maise lava le manatunatu i mea e taea e tagata taitoatasi. Manaomia ona amanaia le tāua o tausaga ma le umi o le uaʻi atu o le fanau. Atonu e manao e faia ni talanoaga pupuʻu i le tele o taimi o le vaiaso pe afai e laiti tamaiti. O nisi e faia talanoaga faapea i le laulau o taumafataga pe a faatoā maʻea le taumafataga. o le manatu tāua e lē o le umi peitaʻi o le uigā o taimi e faaaluina ma le aiga.

E faapefea ona e mautinoa e pāʻia le fatu o le tamaitiiti?

Faalaeiau i le tamaitiiti etali i ana lava upu. Faaaogā ma le poto fesili e uiga i lau vaaiga, e iloa ia po o le a moin le faalogona o le tamaitiiti e faatatau i le mataupu. E mafai ona e fesili. “E faapei faalogona o tamaiti i le aʻoga e uiga i lenei mataupu? E te lagona e tatau lo latou taofi i ai?’ Po o, “E faapefea ona e faamatala i se uō i le vasega le mafuaaga tatou te lē faia ai le faitaaga? E te lagona ea le moni o lenei mea mo lou lelei? Ai se a?” Faaeteete ia aua e te soʻona gaoioi i tali e aumaia faatatau i fesili e uiga i lau vaaiga ua tuʻuina atu, ina ia saʻoloto ai le tamaitiiti e faaalia mai o ia lava ma le faamaoni. Faaavanoa le taimi e tautala mai ai tagata taʻitoʻatasi, ina ia mautinoa o latou malamalama saʻo i manatu tāua.