O le Soifuaga o Iesu ma Lana Faiva

Iesu—O se Ogatotonu o Fefinauaiga

I SINA taimi pupuu lava ina ua uma ona malolo o ia i le fale o Simona, ona amata loa lea e Iesu lona lua o ana malaga talaʻi faataamilo i Kalilaia. I lana malaga faataamilo talu ai i le oganuu, sa ō atu faatasi ai o ia ma ona uluaʻi soʻo, o Peteru, Aneterea, Iakopo ma Ioane. A e ua ō atu faatasi nei o ia ma aposetolo e toʻa 12, atoa foʻi ma fafine. E aofia ai ia i latou nei a Maria le Makatala, Susana, ma Ioana, lē o lana tane o se alii ofisa a le Tupu o Herota.

A o faateleina laasaga o le faiva a Iesu, ua faapena foʻi ona fateleina o fefinauaiga e uiga i lana galuega. Ua aumaia ia Iesu se tagata e tauaso toe gugū ua ulutinoina e se temoni. Ina ua faamaloloina o ia e Iesu, o lea ua saʻoloto o ia mai le pulea e temoni ma ua mafai nei foʻi ona tautala ma vaai, ua matuā maofa lava le motu o tagata. Ua latou faapea ane: “E le o le atalii ea lenei o Tavita?”

Ua faapotopotoga atu le toatele o le motu o tagata i le fale o loo i ai Iesu ma ua lē mafai ai e ia ma ona soʻo ona aai. E le gata ia i latou ua manatu ia te ia atonu po o le “Atalii o Tavita” ua folafolaina, o loo i ai foʻi le au tusiupu ma Faresasio o ē na ō mai mamao lava mai Ierusalema ina ia taʻuleagaina o ia. Ina ua faalogo le aiga o Iesu i nei tala feaveaʻi solo e uiga ia te ia, ona latou ō mai lea ina ia taofi ia te ai. Mo le ā le mafuaaga?

Ona o uso foʻi o Iesu e leʻi oo ina latou talitonu faapea o ia o le Alo o le Atua. E lē gata i lea, o le vavaō ma le vevesi solo na tupu aʻe ona o ia ua matuā suia atoatoa ai le tagata o Iesu lea na latou iloa a o tupu aʻe i Nasareta. O le mea lea na latou talitonu ai ua i ai se mea matuiā ua tupu i le mafaufau o Iesu. Ua latou faia se faaiʻuga faapea, “ua valea o ia,” ma ua latou mananao ai e puʻe ia te ia ma ave ese.

Peitaʻi e manino lava le mea na tupu faapea sa faamalolo e Iesu le tagata na ulutinoina e temoni. Ua iloa lelei lava e le au tusiupu ma le au Faresaio e lē mafai ona latou faafitia le moni o lenei mea, faapea foʻi ma isi vavega a Iesu. O lea ina ia taʻuleagaina Iesu ua latou fai atu i tagata: “Ana le se anoa Pelesepulo le alii o temoni, e tulia e lena tagata o temoni.”

Ua silafia e Iesu o latou manatunatuga, ona ia valaau atu lea i le au tusiupu ma le au Faresaio ina ia ō mai ia te ia ona ia fetalai atu lea: “O malo uma ua fevaevaeai e faaumatia ia; o aai uma foi po o aiga e fevaevaeai e le tumau ia. Afai foi e tulia e Satani ia Satani, ona fevaevaeaʻi lea o ia ia te ia; pe faapefea foi ona tumau o lona malo?”

Pagā ni manatu e lē mafaafitia! Talu ai ona ua faapea mai le au Faresaio o tagata foʻi mai o latou ituaiga ua mafai ona tulia temoni, ona fesili atu foʻi lea o Iesu: “Afai foi o Pelesepulo ou te tulia ai e aʻu o temoni po o ai ua tulia ai temoni e a outou fanau?” I se isi faaupuga, o la latou moliaga faasaga ia Iesu e faatatau ona faatatauina lelei lava ia i latou e pei o ia foʻi. Ona lapataʻi atu lea o Iesu: “A e afai o le Agaga o le Atua ou te tulia ai e aʻu o temoni, ua oo mai lava ia te outou le malo o le Atua.”

Ina ia faataʻitaʻi faapea o lona tulia o temoni e faaalia ai lona mana i luga aʻe o Satani, ua faapea atu Iesu: “E mafai faapefea se tasi ona ulu atu i le fale o le tagata malosi, ma vete ana mea? seia muai fusifusia le tagata malosi, i le vete ai lona fale. O se le ʻau ia te au, e ʻau ese lea ia te au; o se le faaputu faatasi ma aʻu, e faataapeape lea.” E manino lava le faasagatau o Faresaio ia Iesu, ua faaalia ai i latou o sui o Satani. Ua latou faataapeapeina Isaraelu mai ia Iesu.

Mulimuli ane, ona lapataʻi atu lea o Iesu i nei tagata tetee pei o Satani faapea “o le upu leaga i le Agaga, e le faamagaloina lea.” Ua ia faamatala atu: “Ai sē fai upu i le Atalii o le tagata, e faamagaloina lea; a o lē fai upu i le Agaga Paia, e le faamagaloina lea i le olaga nei po o lē atali.” Ua faia e na tusiupu ma Faresaio lena agasala lē mafaamagaloina i lo latou tuuina atu o le viiga ia Satani a e matuā manino lava o se vavega na faagaoioia e le agaga paia o le Atua. Mataio 12:22-32; Mareko 3:19-30; Ioane 7:5.

◆ Ua faapefea ona eseese le malaga faataamilo lona lua a Iesu mai le uluaʻi malaga?

◆ Ai se ā ua taumafai ai aiga o Iesu e taofi ia te ia?

◆ Ua faapefea ona taumafai le au Faresaio e taʻuleagaina vavega na faia e Iesu, ma ua faapefea ona lē faamaonia i latou e Iesu?

◆ O le ā ua taʻu sala ai na Faresaio, ma ai se ā?