O ni Tagata ua Faatumuina i le Olioli—Ai se ā?

O Kerisiano moni i aso nei o ni tagata e tumu i le olioli. I lo o mea uma lava, o loo tatou auauna i le “Atua fiafia,” o Ieova. (1 Timoteo 1:11, NW) Na te foaʻi mai pea lona agaga ia i tatou, ma o se fua o lena agaga o le olioli.—Kalatia 5:22.

O lena olioli ua nofo mau i totonu, e aogā ma e tu atu i taimi o omiga. Mo se faaaʻoaʻoga, na tiga Iesu Keriso i le satauro ma le mā, ona o le faasalaina o ia e pei o se tagata amio leaga. Peitaʻi, “na onosai i le satauro, . . ona o le olioli sa tuu i ona luma.” (Eperu 12:2) Na silafia lava e Iesu, o loo i ai ni avanoa ofoofogia, ma ni faaeaga o loo taatia mai i ona luma e tusa ai ma lana auaunaga ia Ieova. O le taulai atu i nei faaeaga i le lumanai, na fesoasoani ai ia te ia e tausia pea lona olioli i le lotolotoi o mafatiaga.

E finagalo foʻi Iesu mo ona soʻo ia olioli. Na ia fetalai: “Ua ou fai atu nei mea ia te outou, ina ia tumau ai loʻu olioli ia te outou, ia atoatoa foi lo outou olioli.” (Ioane 15:11) Ua faamaonia le moni o lenei mea, i Molimau a Ieova i aso nei. E tele lava mafuaaga ua avea ai i tatou o ni tagata ua tumu i le olioli. Ua tatou iloa le upu moni, lea ua na faasaʻolotoina i tatou, mai taofiofiga o faiga faataulaitu, ma talitonuga sese faalotu. (Ioane 8:32) O lea foʻi, ua tatou iloa ai po o fea o tatou iai i le faagasologa o taimi, ma fiafia tele ai i le vave ona oo mai o le faamoemoe i le olataga. (Luka 21:28) Ua mafai foʻi ona puipuia ai i tatou, mai le tele o faafitauli—o nisi o na mea, o faamaʻi e pisia ai ona o feusuaiga,—ua fesagai nei ma i latou o ē lē tausisi i amioga mamā ua faavae mai le Tusi Paia. Ua tatou olioli foʻi ona o aufaatasiga aupito sili ona lelei ma tagata, o loo naunau fiafia i le faia o le finagalo o Ieova. Ma i lea, ioe, ua ia i tatou se faaeaga sili, o le auai i le talaʻiina o le tala lelei o le Malo ma le faia ma soo, o i latou pei ni mamoe.—Mataio 24:14; 28:19, 20.

A e, a o moni lenei mea i Molimau a Ieova o se vaega atoa, a e faapefea oe i le avea o se tagata e toʻatasi? Ai se ā ua mafai ai ona faapea, ua ia te oe se pogai e olioli ai faatasi ma tagata uma o Ieova?

Maua le Olioli i le Galuega Faa-Evagelia

Ua iloa e nisi le faigata ona latou auai i le galuega talaʻi mai lea fale i lea fale. Atonu pe lē faigofie mo i latou ona faafeiloaʻi tagata ese, na uunaʻia le faia o ni talanoaga. Pe atonu foʻi e na ona lagona le lē lava o se tomai e aʻoaʻo ai isi. Pe e i ai sou lagona faapena i nisi taimi? Afai o lena, e mafai faapefea la ona e maua le olioli i le galuega faaevagelia?

Muamua lava, ia iai se faalogona po o se uiga mautinoa. E toatele tagata e faafiafiaina pe a faafaigaluegaina e ni tagata lauiloa po o ni taʻitaʻi faapolotiki lauiloa. A e maeu se olioli sili e tatau ona tatou maua, i le faaaogāina o i tatou e le “Tupu o le vavau” o Ieova le Atua lava ia!—1 Timoteo 1:17.

Ia manatua foʻi, o lenei galuega e lē toe faia. Seʻi tau la ina manatu! O loo faasinoina e agelu lava latou ma taʻitaʻiina Kerisiano i luga o lenei lalolagi, i a latou taumafaiga e saili i ē pei ni mamoe. (Faaaliga 14:6) Pe e lē faafiafiaina ai ea la lou loto i lenei mea?

Maua le Olioli i Faatelega o le Malo

O se tasi mafuaaga e tatau ai ona iai se vaaiga mautinoa i le galuega talaʻi, ona o āuga lelei o loo iai. Na valoia mai e le Tusi Paia: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:22) O lenei folafolaga a Ieova ua faamaonia lava i ni aso nei ua mavae atu. Mo se faaaʻoaʻoga, i le tausaga faaleauaunaga i le 1986, e 225, 868 na papatisoina, e faaalia ai lo latou tuuina atu ma le tagata atoa ia Ieova le Atua. Sa iai la se faatelega e 6.9 pasene, i le faatatauga o le fuainumera o i latou na auai i le faasalalauina atu o upu moni o le Tusi Paia i isi.

E le taumate foʻi o loo iloa lenei faatelega i la outou faapotopotoga po o la outou matagaluega. Ua ō atu tagata fou i a outou sauniga, ma ua faia foʻi suiga manaomia i ō latou olaga ina ia mafai ona latou auauna i le Atua. Pe e lē faasino atu ai ea e lenei mea i le mea moni faapea, o loo i ai le faamanuiaga a Ieova i le galuega talaʻi? O le faia o sou sao i lenei faatelega, e mafai ai i lea ona avea, o se puna o le olioli tele mo oe. E moni, e te lē o faia se suʻesuʻega faale-Tusi Paia ma se tasi e oo atu ai i lona tulaga e papatisoina ai. A e lē mafai foʻi ona viia i tatou lava, i le aumaia o se tasi i le upu moni pe afai o lea. ‘⁠O le Atua na te faatupuina,’ na fai mai ai Paulo. (1 Korinito 3:6-9) E tofu sao uma lava sui o le faapotopotoga e fesoasoani atu i tagata fou. Faapefea? E ala i le auai i sauniga, faia o faaopoopoga, o le agalelei e faaalia i le faafeiloaʻi atu o tagata fou, ma le pulea o i latou i se auala e faatatauina ai, pe talia gofie ai le upu moni.

Peitaʻi, e mafai ona maua le olioli e sili atu, pe a tele foʻi lou auai e lē aunoa, i le galuega talaʻi mai lea fale i lea fale, po o le faia o suʻesuʻega faale-Tusi Paia i aiga. I le tausaga ua mavae, i lona faatatauga, e 2, 726, 252 suʻesuʻega faale-Tusi Paia na faia i vaiaso taitasi. Ai se ā la e lē faia ai se taumafaiga e sili atu, ina ia auai i lenei galuega e sili ona olioli ai? Ofo i se tasi e te iloa se suʻesuʻega faale-Tusi Paia, pe atonu foʻi o se tuaoi, po o se tasi atonu na e tuu ai se lomiga. Fesili atu ia Ieova mo le fesoasoani i lou taumafai e sailia lena tagata pei se mamoe.

Foia o Toʻatuga ina ia Olioli ai

E moni, afai e lagona e se tasi le lē agavaa e uiga i le aʻoaʻoina o isi, e mafai la ona avea moni lenei mea, o se toʻatugā i le mauaina o le olioli i le faiva i le fanua. E ui i lea, ia manatua, ‘o lo tatou agavaa e manatunatu i se mea, e mai le Atua lava.’ (2 Korinito 3:5) Ma ua saunia e Ieova e ala i lana faalapotopotoga, le tele o fesoasoani aogā e fesoasoani ai ia i tatou ia agavaa ma avea o ni faifeau uigā.

Muamua lava, e toatele o loo ia i tatou, ua loa ona auauna i le Atua, ma ua tele lo latou tomai i le faiva i le fanua. E mafai la ona tatou aufaatasi ma nei faifeau tomai i a latou gaoioiga, ma aʻoaʻo mai ai ia i latou. A e lē gata foʻi i lea, e maua pea i masina taitasi fautuaga lelei mai La Tatou Faiva o le Malo. Ona i ai foʻi lea o le lomiga Reasoning From the Scriptures, o loo i ai le ʻoa o faamatalaga e faamaʻai ai o tatou tomai i le talaʻiga. Faaaogā nei mea faigaluega, na ia sauniuni maeʻaeʻa mo le faiva i le fanua. Manatunatu i auala fou ma le faaoso fiafia, e faafeiloaʻi atu ai oe i le fale. Pe manatunatu foʻi i ni auala eseese e tataʻi mai ai ē ona fale i ni talanoaga. A o agaʻi ina sili ona e uigā i le faiva, e mautinoa foʻi lava la, le faateleina o lou aasa ma le olioli i le talaʻiga.

E sili atu ona olioli i le faiva pe a mafai ona tatou talanoa atu i tagata. E ioeina lava o se faafitauli lenei mea i isi oganuu. E mafai ona e fuafua ia auai i le auaunaga i le fanua i le taimi e toatele ai tagata e maua atu i aiga, e pei o le afiafi a o leʻi popogi? E toatele lava ua iloa o le faia faapea e sili atu ona uigā. E mafai foi ona e faaaogā le avanoa muamua, ma talanoa i tagata i so o se mea e maua ai—i luga o ala tetele, nonofo i nofoa i paka, po o ē o fufulu a latou taavale. Manatua, e manaomia e tagata le upu moni, ma e aafia ai ola. O le a fesoasoani lenei mea e faagaoioi oe, e foia le matamuli. E ui lava e moni o le toatele o tagata o le a lē tali lelei mai, ae o le tali mai o isi e sili ai ona tatou olioli.

Peitaʻi, o le tasi o fesoasoani aupito sili i le mauaina o lo tatou olioli o le tatalo. Fesili ia Ieova mo lona agaga e faamalosia ma faalototeleina oe. Na faapea mai Paulo: “Ou te mafaia mea uma lava i le faamalosi mai o Keriso ia te au.” (Filipi 4:13) E mafai ona ia i tatou lena foʻi lagona, pe a tatou aʻoaʻo ia faalagolago atoa ia Ieova.

Tumau o ni Tagata Olioli

E toatele lava tagata latou te lē talisapaia la tatou galuega. Na silafia lava e Iesu o lea le tulaga o le a iai. O lea, ina ua ia aauina atu ona soʻo e talaʻi, na ia faatonu atu iai latou: “Ai se le talia outou, pe le faalogo i a outou upu, a outou o atu mai lea fale po o lea aai, ia outou tūtū atu le eleele nai o outou vae. . . . Faauta, ou te aau atu ia te outou e pei o mamoe i le va o luko; o lenei, ia outou atamamai pei o gata, a ia fifilemu e pei o lupe.” Na fetalai foʻi Iesu: “A o outou lauulu lava ua faitaulia uma ia. O lea aua tou te matatau ai.”—Mataio 10:11-16, 30, 31.

Ua fesoasoani nei upu ia i tatou e tumau ai ma le olioli. Ua latou fesoasoani ia i tatou e iloa ai faapea, e ui lava ua tatou feiloaʻi ma tagata o ē lē talisapaia a tatou taumafaiga ona o i latou, o loo tatou faalauiloa atu pea lava le suafa o Ieova; ma o loo tatou viia pea o ia. (Salamo 100:4, 5) E mālie lava, ona o nisi taimi, o tagata e ona fale o ē mumusu e tatala mai le faitotoa, e faalogoina lava lo latou faapea atu i isi: “Se o Molimau a Ieova.” Ioe, e aunoa ma lo tatou fai atu o se upu, ua faalauiloaina lava le suafa o Ieova, ma ua maua e tagata le avanoa e talia ai pe teena ai le upu moni. (Mataio 25:31, 32) O lea, e oo lava i oganuu e lē tali mai, a e mafai lava ona tumau ma le olioli.

E lē gata foʻi i lea, a e tatou te le mailoa lava pe atonu o afea e suia ai uiga o tagata. O se tasi aso, o se fafine sa na teena se tuafafine Kerisiano i lona fale mo ni nai taimi, na fesili atu i le tuafafine pe e i ai ni ana lomiga fou. Sa ofo le tuafafine ma faapea mai, o lena fafine sa na leʻi taliaina lava ni lomiga faale-Tusi Paia muamua. Na faamatala e le fafine faapea o lona toalua, e faigaluega faatasi ma se tamaloa e suʻesuʻe ma Molimau a Ieova. Na ia avatu la ia te ia ma lana tane, se tasi o lomiga a le Watch Tower Society. Ona o le fia iloa la, na faitau ai e le fafine ma na ia iloa ai o le feau lea o le upu moni. Ona ia filifili ai loa lea, ma o lena na ia faapea ai, a toe asiasi mai loa se Molimau

o le a ia talia loa. Na amata se suʻesuʻega faale-Tusi Paia, ma mulimuli ane avea le fafine o se molimau tuuina atu a Ieova!

O lea ua ia i tatou se faaeaga ofoofogia—se faaeaga e olioli ai—o le faalauiloa atu o le na o lea le feau o le faamoemoe i le lalolagi. Ma o le galuega talaʻi o se tofiga lea ua tuuina mai e le Atua ia i tatou i nei aso e gata ai. (Mataio 24:14) O le ā le umi o lea i ai a o leʻi oo i le iuga o le faiga o mea leaga a Satani? Ua tatou iloa lava e lē faatuai mai le iʻuga. (Faatusatusa le Sapakuka 2:3.) I le taimi nei, o loo totoe pea le taimi mo isi e aʻoaʻo ai le upu moni. Seʻi o tatou faaaogā le taimi o totoe nei, ma ia maelega e auai i la tatou galuega talaʻi. Ma ia iai tatou se uiga mautinoa, ma ia galulue malosi, ina ia faasaoina i ‘tatou atoa ma i latou o faalogologo mai ia i tatou.’ (1 Timoteo 4:16) I le faia faapea, o le a tumau ai ona avea i tatou o tagata e faatumuina i le olioli i le auai i le faatelega o le Malo.

[Ata i le itulau 30]

O la tatou galuega faaevagelia o le puna o le olioli moni—e tusa lava pe lē tali mai tagata le feau o le Malo