Se Fuafuaga Fou o le Atamai Tauatua

“ONA FETALAI mai lea o le Atua ia Mose, O AʻU O LĒ OLA, O LOO OLA LAVA; ua ia fetalai mai foi, E te fai atu i le fanauga a Isaraelu, ia faapea O AʻU O LĒ OLA, o ia na auina mai aʻu ia te outou.” (Esoto 3:14) Na faamatala atu e Ieova ia Mose faapea a o leʻi tupu lenei mea e oo lava i Ana auauna sa leʻi malamalama i le uiga atoa o Lona suafa. O ia o le Atua o fuafuaga ma na te faataunuuina lava lona finagalo. A manaomia ni fesuiaʻiga, e mafai lava ona ia suia lana fua ina ia faataunuuina ai lana fuafuaga. E poto lava o ia!

Sa leʻi talisapaia e Satani lava ia le uiga o le suafa o le Atua. Atonu sa ia iloa e uiga i le laau o le ola i le faatoaga i Etena. Ana fai la sa ia taʻitaʻi atu i ai Atamu ma Eva, atonu o lena mea o le a foliga mai ua tuu ai Ieova i se tulaga faaletonu: pe tausi i lana upu faapea a agasala o lona uiga ua la oti po o le tausi o lana upu e uiga i le laau o le ola. (Kenese 2:9; 3:1-6) I so o se mea, sa matuā tuu ai lava Satani i se tulaga lē manuia.

Ua amata nei ona faaalia e le Atua se atamai na leʻi aloaʻia e ona atalii faaleagaga ma sa leʻi faaalia muamua ia i latou. (Faatusatusa le Efeso 3:10.) Sa amata ona ia faagaoioia se faasologa o ni faasilasilaga ma mea tutupu faapea o le a faaalia ai mo se taimi umi lava lona atamai sili ma lona tomai e faataunuuina ai lana fuafuaga e faavavau, lea o le a faatumuina ai lana fuafuaga e faavavau, lea o le a faatumuina ai le lalolagi i tagata fiafia, faamoni o ē o le a mafai ona ola e faavavau i le Parataiso. (Kenese 1:27, 28) Mo le tele o taimi o le a toe taofia ai e le Atua taumafaiga a Satani e aiā ai fua.

Tatalaia Mea Lilo Paia

Na vave lava ona gaoioi le Atua, ina ua faatoā uma lava le uluaʻi fouvalega. Sa ia filifilia lava le uluaʻi faamasinoga mo le ulugalii nofo sala ma tuuina atu lana faaiʻuga o le oti ona o lo laua lē usiusitaʻi. A e faapefea le ʻaina e Atamu ma Eva o le laau o le ola? “Ua fetalai ane foi Ieova le Atua, Faauta, ua avea le tagata e pei o so tatou, ua iloa ai le lelei ma le leaga; lenei, neʻi aapa atu lona lima, ma tago atu foi i le laau o le ola, e ʻai ai, ma ola e faavavau;—ma tulia ai lea o ia e Ieova le Atua ai le faatoaga o Etena.”—Kenese 3:17-23.

I le taimi nei sa faatulaga ai foʻi e Ieova le vaega a le fai Evagelia, po o lē Foafoaina le tala lelei. Na ia tulei mai le uluaʻi valoaga: “Ona fetalai atu lea o Ieova le Atua i le gata, . . . ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:14, 15) I senituri mulimui ane na faamatala mai ai e le aposetolo o Paulo: “Auā ua faatoilaloina mea uma na faia [faaletagata] i le iuvale, (e le o lona loto lea, a e peitai ona o ia na na faatoilaloina ai,) ma le faamoemoe.”—Roma 8:20.

Ioe, pe a mavae lea, o le a lē taofimauina ma le lē mafesoasoania le tagata i le oti tuufaasolo mai ia Atamu, a e sa faalauiloa mai e le Atua lana fuafuaga e laveaʻiina le fanau usiusitaʻi a Atamu. Peitaʻi o le ā na faavae ae ai le “faamoemoe”? E mafai faapefea ona ia laveaʻiina le fanau a tagata a e o loo taofia pea lana faaiʻuga o le oti ona o le agasala? O lenei mea sa avea o se atamai o le Atua sa natia; o loo aofia ai i lea le “upu lilo [paia] lea sa natia talu mai ia augātagata ma tupulaga ua mavae.” (Kolose 1:26; 1 Korinito 2:7, 8) E ui lava sa leʻi malamalama le au faatuatua anamua i lenei upu lilo, a e sa i ai lava so latou faamoemoe faapea i se taimi ona laveaʻiina ai lea o i latou e le Atua. Ioe, e oo lava i agelu sa naunau e fia aʻoaʻoina pe o le a faapefea ona faataunuu e Ieova lana fuafuaga! (1 Peteru 1:10-12) Pe e te malamalama i lenei upu lilo paia?

Faaolaina i le Togiola

I le faagasologa malie mai o senituri, na faaopoopo atu ai e Ieova ni faamatalaga i lana uluaʻi folafolaga. Na ia folafola atu ia Aperaamo faatuatua se fanau o le a manuia ai le fanau usiusitaʻi uma a tagata e auala ia te ia. (Kenese 22:15-18) Na ia faaalia e ala ia Iakopo faapea o le fanau o le a avea o se tupu mai le ituaiga o Iuta. (Kenese 49:10) O le taimi lea na talitonu ai tagata o le Atua i se toetu mai le oti, e ui lava sa leʻi atoatoa lo latou malamalamaga pe o le a faapefea ona fai o lenei mea. (Iopu 14:14, 15; Eperu 11:19) Mulimuli ane, na folafola ai e le Atua ia Tavita faapea o le Tupu o le a oo mai, po o le Mesia, o le a avea o se tasi mai le gafa o Tavita ma o le a pule e oo i le faavavau.—2 Samuelu 7:16.

Na faaopoopo e perofeta uma lava ni nai malamalamaga itiiti i le upu lilo paia, a e leʻi mafai e tagata ona vaai i le atoaga o le ata. Mulimuli ane, ua oo mai le taimi e aliaʻi mai ai le Mesia, ma e leʻi umi lava, a e faaalia manino mai loa lenei atamai ofoofogia uiga eseese o le Atua. Na faaʻautū lava ia Iesu Keriso ma le sauniuniga o lona olaga lelei atoatoa faaletagata e avea o se togiola fetaui lelei mo le fanau a tagata. I le avea o lena mea o se faavae, ua mafai ai ona faaauau pea le fuafuaga mamalu atoa a Ieova e ala i le Malo. E te malamalama i le togiola?

O loo matuā lelei ona faamatalaina mai e Paulo i le Roma mataupu e 5 ma le 6 lenei mea. I le Roma 5:12 o loo ia faamatala mai ai le tuufasolo mai o le agasala ma le oti ia i tatou. Ua faaauau pea ona ia faaalia mai pe ua faapefea i āuga o le agasala lava e tasi a Atamu lelei atoatoa ma le leiloa ai o le ola mo ana fanau, ona faapaleiina e se isi ola lelei atoatoa. O lena mea ua faamaonia lava o le soifua o le tagata “o Iesu Keriso.” (Ro 5 Fuaiupu 15-21; tagaʻi foʻi i le 1 Timoteo 2:5, 6) Ai se ā na mafai ai ona saunia e Iesu lenei togiola? Auā o ia o le Alo o le Atua, o Iesu sa “paia, e agamalu, e leai sona leaga, e taumamao ma ē agasala.” (Eperu 7:26; Luka 1:32, 33) E lē manaomia fua ona tatou taumafai e faamatala auiliili le fanau mai o Iesu. Na faamautinoa atu e le agelu o Kaperielu i le tinā o Iesu, o Maria, ma i tatou foʻi, faapea e leai se mea e faigata i le Atua. (Luka 1:37) O lea, e ui lava na fanau mai Iesu i se fafine mai le gafa o Atamu, a e o le Alo lava o le Atua—o le mea moni o se tagata lelei atoatoa. Sa sili ona tāua ma aogā lona toto po o lona ola na i lo o le toto o manu e lē mafaitaulia na sa faataulagaina e ositaulaga faa-Arona o Isaraelu i le malumalu i Ierusalema. Sa avea o ia o le “Tamai mamoe a le Atua, na te aveesea le agasala a le lalolagi.”—Ioane 1:29; 3:16.

Pe mafai ona faia e le Atua lenei fuafuaga e ala ia Iesu ma tumau pea lana amiotonu? A fai na faatuina e le Atua lona Alo i le ola i le aso tolu, o le ā la na tupu i le togiola? Na faamautinoa mai e Paulo faapea o le Atua e faamaoni. Mulimuli i ona manatu” “Ua taʻuamiotonuina fua i tatou i lona alofa tunoa [ua faasaʻolotoina], i le togiola e ala ia Iesu Keriso. Auā ua tuuina mai o ia e le Atua i luma e maliu e avea o se taulaga o le leleiga e maua ai aogā pe a faatuatua i ai. O lenei mea ina ia viia ai lona faamaoni (aua o lana faamagaloga, ua lē manatua ai e le Atua agasala muamua a tagata)—ina ia viia lana faamasinoga i le taimi nei, ma faaalia o ia lava o le amiotonu, ma na ia taʻuamiotonuina ai foʻi i latou o ē faatuatua ia Iesu.” (Roma 3:24-26, An American Translation) O lenei la, o le ā le uiga o lenei mea? I le na ona faapea ea o Iesu, o se tagata lelei atoatoa i le tino ma le toto, na maliu o se tagata ma tumau ai pea ona maliu o se tagata e faavavau. “Auā ua atu tasi lava ona faia e ia o lea mea [ua maliu o ia] ina ua avatua o ia e ia ma taulaga.” (Eperu 7:27) O lea, e tāua le togiola. Na maliu Iesu i le tino; a e i le aso tolu “ua faaolaina mai i le Agaga.”—1 Peteru 3:18.

Le Feagaiga Fou ma le Foafoaga Fou

O lea ua tatou iloa nei le vaega sili o le upu lilo paia. O le faamaoni o Iesu seʻia oo i le oti ua taʻuagavaaina ai o ia e avea o le Ositaulaga Sili ma le Tupu a Ieova. O lona totomasaa na aogā ai lea feagaiga fou. O lenei feagaiga fou, o le aumaia lea o aumea faalelagi o ē o le a pule faatasi ma Iesu e avea o ni tupu ma ositaulaga. (Faaaliga 5:9, 10; 20:4, 6) Ua latou faavaeina se nuu fou, “ni tagata ua faafouina” ma o lena mea e mautinoa lava!—Kalatia 6:15, 16, NW.

Manatua: Ua filifilia e le Atua mai le fanau a tagata e ala ia Keriso Iesu se vaega e fai ma sui, o tane ma fafine. E mafai ona ia faalauiloa aloaʻia atu ai i latou ua taʻuamiotonuina ma taʻua ai o atalii faaleagaga. I le vaitaimi atofaina a le Atua pe a mavae lo latou oti, ona ia toe faatutuina lea o i latou i le lagi ma tuuina atu ia i latou le ola pea, e pei lava ona ia tauia ai Iesu. (1 Peteru 1:3, 4) Maeu se mautinoa ua ia te ia e uiga i lana ‘foafoaga fou’ ma lo latou faamaoni ia te ia! Maeu se tali mo lē na tuuaʻi seseina i latou i luma o Ieova! (Faaaliga 12:10) E ui lava ua ola pea faatasi ma Iesu Keriso, a e o le a lē mafai lava ona lafoaia lo latou faamaoni ia Ieova. A e lē o na pau lena.

Le Lalolagi Parataiso

O le silasila lava i ai Keriso Iesu ma ana tupu ma ositaulaga lagolago faalelagi, faapea ua faataunuuina atoatoa le fuafuaga a Ieova mo le tagata ma le lalolagi i le vaitaimi o lana Pulega Faa-Meleniuma. I le faatatauina o aogā o le togiola, o le a toe faatutuina mai ai e Iesu, ē ua oti ma o le a aumaia ai le tulaga faaletagata lelei atoatoa i latou o ē faatuatua faatasi ai ma i latou o ē na faasaoolaina mai le iʻuga o lenei faiga leaga o mea. I le taimi lava e tasi, o le a faia ai le lalolagi e avea o se parataiso. O i latou uma lava la o le a teena le taumafaiga mulimuli a Satani e faaumatia i latou o le a tuuina atu i ai le ola lelei atoatoa faaletagata e faavavau. A e o le a faaumatia e faavavau Satani ma lana vaega amioleaga uma. Ona maua ai lea o le filemu ma le autasi i mea uma lava na foafoaina, ua latou vivii atu atoatoa i le silisili ese o Ieova ma lana pulega e faavae i le alofa. O le a faaalia e agelu ma tagata le alofa faamaoni mo Lē Na Foafoaina i latou ma lo latou Atua.—Faaaliga, mataupu e 20.

Nei la, ua tatou malamalama lelei ai i le upu lilo paia. Ua tatou iloa nei foʻi le atamai o Ieova ia faaalia e oo lava i ana fuafuaga faalefoafoaga i laau ma le lalolagi o manu. Ua ia i tatou se mafuaaga lelei e alaga ai: “Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga;. . . Auā ua fua mai ia te ia, ma ua faia e ia, e iu atu foi ia te ia mea uma; ia ia te ia le viiga e faavavau lava. Amene.”—Roma 11:33-36

[Ata i le itulau 7]

O auga o le agaala e tasi a Atamu lelei atoatoa ma le leiloa ai o lona ola e mafai ona faapaleniina. Faapefea? E ala i se isi ola lelei atoatoa faaletagata, le ola lea o Iesu.