Fesili Mai le Au Faitau

◼ Ina o i ai Iesu i luga o le laau, sa ia alaga: “Loʻu Atua e, loʻu Atua e, se a le mea ua ea tuulafoai mai ai aʻu?” Pe sa leai sona faatuatua, ua talitonu ai sa tuua o ia e le Atua?

I le faitauina o nei upu i le Mataio 27:46 po o le Mareko 15:34, ua manatu nisi faapea ina ua fesagai Iesu ma lona maliu tiga, na faalotolotolua lona mautinoa e uiga i le Atua. Na faapea mai nisi ua na o se tali faaletagata a Iesu, o se alaga malamalama ona o le tiga o le tino faaletagata e i ai ivi aano ma le toto. O lea e i ai se mafuaaga lelei e vaavaai ai i tala atu o ia tau faaletagata faavae mai i foliga mai i fafo. Ona e leai se tasi o i tatou i aso nei e mafai ona iloa ma mautinoa mea uma na aafia i le alaga a Iesu e pei ona sa ia alaga ai, e mafai ona tatou matauina ni faanaunauga faapena se lua.

Sa silafia lelei lava e Iesu o le a “alu o ia i Ierusalema, e faatigaina foi i mea e tele . . . e fasiotia foi o ia, e faatuina foi o ia i le aso tolu.” (Mataio 16:21) I le lagi, na matauina ai e le Alo o le Atua e oo lava i tagata lē lelei atoatoa a e na oo i ai sauaga tiga seia oo i le oti sa tumau pea lo latou faamaoni. (Eperu 11:36, 38) O lea, e leai la se pogai e faapea ai o Iesu—o se tagata lelei atoatoa—o le a taofia ona o le fefe i le mea o le a la faafesagai; e le avea foi lona maliu i luga o le satauro o le a faapea ai ua tuulafoaia o ia e lona Tamā. Na muai silafia lava e Iesu, “le uiga o lona maliu o le a maliu ai,” o lona maliu lea i le satauro. (Ioane 12:32, 33) Sa ia mautinoa foi o le a toe faatuina o ia i le aso tolu. E faapefea la ona faapea mai Iesu ua tuulafoai o ia e le Atua?

Muamua, atonu pe sa ia faauigaina i se lagona tatau faapea ua aveesea e Ieova lana puipuiga mai i lona Alo ina ia mafai iai ona tofotofoina le faamaoni o Iesu seʻi oo atu i lona mutaaga, i se maliu tiga ma le faalumaina. A e peitaʻi o le tuu atu a ie le Atua o Iesu i totonu o le ita o ona fili e taʻitaʻia e Satani, sa lei faaalia ai se lafoaiina atoatoa. Na faaauau pea e Ieova ona faalia le alofa mo Iesu, e faamaonia lena i le aso tolu ina ua la toe faatuina mai lona Alo, e pei lava ona sa muai iloa e Iesu o le a tupu.—Galuega 2:31-36; 10:40; 17:31.

E faaopoopo atu i lena, o se mafuaaga faapenei lona lua o le tuleiga a Iesu a o i luga o le laau, e faapea o le faaaogaina o nei upu na mafai ai ona ia faataunuuina se faailoaga faavaloaga e uiga i le Mesia. I le uluai itula na taʻu atu ai e Iesu i le au aposetolo faapea o nei mea o le a tutupu “e pei oan tusia ia te ia.” (Mataio 26:24; Mareko 14:21) Ioe sa ia manao e faatunuuina mea na tusia, e aofia ai ma mea i le Salamo 22. o le a e iloa le faamaninoga pe a e faatusatusa le Salamo 22:7, 8—Mataio 27:39, 43; Salamo 22:15—Ioane 19:28, 29; Salamo 22:16—Mareko 15:25; ma le Ioane 20:27; Salamo 22:18—Mataio 27:35. Ua aumai i le Salamo 22 le tele o faamaoniga faavaloaga o le amataga o mea o le a oo i le Mesia ua amata i le faapea mai: “Loʻu Atua e, loʻu Atua e, se a le mea ua e tuulafoai mai ai ia te aʻu?” O lea, ina ua alaga Iesu, sa ia faaopoopo atu i le faamaoniga o faamaumauga o valoaga na ia faataunuuina.—Luka 24:44.

Sa lei talitonu le fai salamo faapea ua teena pe tuulafoai o ia e lona Atua, auā na toe faapea mai Tavita o le a ia ‘taʻu atu le suafa o le Atua ia ona uso,’ ma na ia uunaia foi isi e vivii atu ia Ieova. (Salamo 22:22, 23) E faapena foi Iesu o le na te silafia lelei le Salamo 22, sa i ai foi se mafuaaga e mautinoa ai faapea o loo faamaonia pea e lona Tamā o ia ma e alofa foi ia te ia, e ui lava i mea na faatagaina o ia, e le Atua e oo i ai seia oo atu lava i le satauro.