Tatalo e Manaomia ai Galuega
1. O le ā le itu e tasi e tatau ona faafetaiaia pe a fia ia talia e le Atua a tatou tatalo?
E POTO, e tonu, ma alofa tulafono uma a Ieova. E leai lava se auala e avea ai o ni avega mamafa. (1 Ioane 5:3) E aofia ai i lena ana tulafono faatatau i tatalo, o le tasi o ia tulafono e faapea, ia tatou ola e tusa ma a tatou tatalo. O ala o ā tatou gaoioiga e tatau ona faafiafia ai Ieova le Atua. Auā a le o lea, e mafai faapefea la ona tatou faatalitalia o ia e manatu mai i a tatou olega ma faatoga?
2, 3. Ai se ā na lē tali ai Ieova i tatalo a Isaraelu, e pei ona iloa i upu a Isaia, Ieremia, ma Mika?
2 O se taualumaga lenei o tatalo ua lē amanaia e le toatele o i latou o Kerisenitoma, e pei lava ona sa lē amanaia foi e Isaraelu aposetate i aso o Isaia. O le mea lena na tuuina ma ai e Ieova lana perofeta e avea mona sui i lona faapea mai: “E ui lava ina outou faateleina tatalo, ou te le faalogo ai lava . . . Ina fafano ia outou, ina faamamā ia outou; faateʻa ese ia a outou galuega leaga outou faamasani i le amio lelei.” (Isaia 1:15-17) Ioe, afai na mananao ina Isaraelu ia maua le finagalo malie o le Atua, sa tatau la ona latou goioi i se auala e faafiafia ai o ia. E pei lava ona faapea mai: “Afai e te manao ia faafofoga mai le Atua pe a e tatalo, e ao foi la ona e faalogo ia te Ia pe a fetalai mai o Ia.”
3 O le mea moni, na toe silafia foi e Ieova le Atua le tatu ona toe faamanatu i ona tagata Isasraelu e uiga i nei upu moni. O lea ua ttou faitau ai: “O le ua liliu ese ona taliga a e le faalogologo i le tulafono, e inosia lana tatalo” e le Atua. “E mamao Ieova i e amio leaga; a e faafofoga mai o ia i le tatalo a e amiotonu.” (Faataoto 28:9; 15:29) Ona o lenei tulaga, na ōi ai Ieremia: “Ua e (Ieova) ufitia oe i le ao, ina ia le sao atu ai le tatalo.” (Auega 3:44) E moni, na faataunuuina lava le lapataiga na faagaeeina Mika e faailoa atu: “Ona latou alalaga atu ai lea ia Ieova (mo se fesoasoani), a e le faafofoga ia te i latou i ia lava ona po, auā ua leaga lava a latou mea e fai.”—Mika 3:4; Faataoto 1:28, 29.
4. O le ā ua faaalia ai e oo lava i tagata o Ieova, e i ai lava nisi latou te lē talisapaia le manaomia o galuega e ō gatasi ma a latou tatalo?
4 O lea, e tatu lava ona tatou ola e talafeagai ma ā tatou tatalo. Pe e tatau ona faamamafa lenei mea moni i aso nei? O le mea moni lava e tatau, e lē gata ona o le tulaga i Kerisenitoma, a e ona o le tulaga foi i nisi o tagata tuuina atu o Ieova. Mai le sili atu i le 3,000,000 le au talaʻi o le tala lelei i le tausaga ua mavae, na oso aʻe foi i luga i le 37,000 i latou na faateaina ona o amioga ua oo ina lē faa-Kerisiano. I sona faatusatusaga e tusa lea ma le toatasi i letoa 80 tagata. Atonu o le toatele o i latou nei sa tatalo mai lea taimi i lea taimi. A e pe na latou amioaʻi ea e tusa ma ā latou tatalo? O lona uiga e leai! E oo lava i nisi toeaina sa auauna sauatoa mo le faitau sefulu o tausaga na i ai faatasi ma i latou na aʻoaʻia i se tasi mafuaaga po o le isi foi. Pagā se faanoanoa! O le mea moni, “O lē manatu o loo tu, ina faaeteete ia neʻi paʻū,” ina neʻi lē gaoioi i se auala e lē talia ai ana tatalo e Lē Na Faia o ia.—1 Korinito 10:12.
Ai se ā e Manaomia ai e Tatalo Galuega
5. Ina ia talia e Ieova a tatou tatalo, e tatau faapefea ona tatou faamaonia lo tatou faamaoni?
5 Ina ia faafofogaina e Ieova le Atua a tatou tatalo, e lē gata ina tatau ona tatou mamā i amio ma i le faaleagaga, a e tatau foi ona tatou faamaonia le faamaoni o a tatou tatalo e ala i lo tatou galulue e tusa ma mea o tatou tatalo atu ai. E lē na o le tatalo e fai ma sui o taumafaiga atamai ma le faamaoni. O le a lē faia e Ieova mo i tatou mea e tatau ona tatou faia mo i tatou lava e ala i le faatatauina ma le faamaoni fautuaga mai lana Afioga, ma mulimuli atu i le taʻitaʻiga a lona agaga paia. E tatau ona tatou naunau e faia mea uma tatou te mafaia e tusa ai ma lenei mea, ina ia i iai ia te ia se faavae e tali mai ai i a tatou tatalo. O lea, ‘e lē tatau ai ona tatou talosaga atu mo ni mea se tele na i lo o lea o tatou mafaia ona galulue ai,’ e pei ona faaupu lelei ai e se tasi.
6. Mo ā mafuaaga e lua, e ao ai ona tatou tatalo?
6 A e peitai atonu o le a lagā le fesili: ‘Ai se ā e tatalo ai pe afai e tatau ona tatou galulue mo mea o tatou tatalo ai?’ E tatau ona tatou tatalo mo mafuaaga lelei lava e lē itiiti mai e lua. Muamua, e ala i a tatou tatalo, e mafai ai ona tatou iloa faapea, o mea lelei ma mea alofa uma e mai le Atua. O Ia o Lē Foai mea lelei ma mea alofa uma e atoatoa ona lelei—o le susulu o le la, o le timu, o tau ma fuata, ma le tele o isi mea! (Mataio 5:45; Galuega 14:16, 17; Iakopo 1:17) O lona lua, pe e manuia pe leai foi a tatou taumafaiga, e faalagolago i le faamanuia a Ieova. E pei ona tatou faitau ai i le Salamo 127:1: “Afai e le atiina aʻe e Ieova le fale, e galulue fua i latou o e atiina aʻe; afai e le leoleo e Ieova le aai, e mataala fua o le na te leoleoina.” I le faia o lea lava manatu, o upu nei a le aposetolo o Paulo i le 1 Korinito 3:6, 7: “Na ou totōina, na faasusūina e Apolo; a e peitaʻi o le Atua ua faatupuina.”
O ni Faaaʻoaʻoga Anamua
7, 8. (a) O le ā se mea na tupu i le olaga o Iakopo e faaalia ai faapea, na ia talisapaia le tatau ona ō faatasi galuega ma tatalo? (e) O le ā se faaaʻoaʻoga na saunia e le Tupu o Tavita e tusa ai ma lenei mea?
7 Ua lipotia mai e le Tusi Paia le tele o itu e faaalia ai sa galulue auauna a Ieova e tusa ai ma mea na latou tatalo atu ai. Seʻi o tatou talanoaina ni nai faaaʻoaʻoga e fai ma sui. Ona o le atalii o le atalii o Aperaamo o Iakopo na ia mauaina le faamanuiaga o le ulumatua, na tupu ai le ita tele o lona uso o Esau ia te ia ma manao ai e fasioti ia te ia. (Kenese 27:41) Ina ua mavae ni tausaga se 20, ina ua toe foi mai Iakopo mai Patanarama i le nuu na fanau ai o ia ma se aiga e toatele ma le tele o lafu manu, na ia faalogo ai ua sau lona uso o Esau e faafetaiai ia te ia. I le manatuaina o le ita o Esau, na tatalo aioi atu ai Iakopo ia Ieova mo se puipuiga ona o le ita o lona uso. A e pe na pau ai lena o le mea na ia faia? O le mea moni e leai. Na ia muai aauina atu ni mea alofa e muamua atu ia te ia, ma lona manatu: “Ou te faalautele ia te ia i le mea alofa o loo o muamua atu ia te au.” Ma o le mea tonu lena na iʻu i ai, auā ina ua feiloai lenei uso, na fusi atu e Esau ia Iakopo ma sogi atu ia te ia.—Kenese, mataupu e 32, 33.
8 Ua faataatia foi e Tavita se isi faaaʻoaʻoga o le galue e tusa ma mea o tatou tatalo i ai. Ina ua foua e lona atalii o Apisaloma lona nofoalii, na alu atu ai Aitofele le faufautua a Tavita faatasi ma Apisaloma. O lea, na faatoga atu ai ma le faamaoni Tavita ia Ieova, ina ia faaleaogāina le fautua a Aitofele. Pe sa na ona tatalo ea Tavita mo lena iʻuga? E leai, sa ia faatonu lana faufautua faamaoni o Usai ina ia faatasi atu ia Apisaloma, ina ia mafai ai ona ia faaleaogāina le fautua a Aitofele. Ma o le auala lena na galueiina ai mea. Na gaoioi Apisaloma i le fuatuga leaga na tuuina atu e Usai, ma teena ai le fautuaga a Aitofele.—2 Samuelu 15:31-37; 17:14; 18:6-8.
9. Na faaalia faapefea e Neemia lona talisapaia o le mataupu silisili faapea, e manaomia e tatalo galuega?
9 O lea, o le isi faaaʻoaʻoga atonu na taʻua ina ia fai ma apoapoaiga mo i tatou o Neemia. Sa ia te ia se fuafuaga tele e tatau ona faia—o le toe fausia lea o pa o Ierusalema. A e peitai e telefili sa tetee atu ia te ia. Sa lē gata foi la ina tatalo Neemia, a e sa galue foi, e pei ona tatou faitau ai: “Ua matou tatalo atu i lo matou Atua, ma matou tofia nisi e leoleo ia te i latou i le ao atoa ma le po.” Mai ai lava i lena taimi, o le ʻafa o tane talavou a Neemia na tutū e nofo sauni e puipuia le isi ʻafa, o i latou ia o loo fausia le pā.—Neemia 4:9, 16.
Le Faaaʻoaʻoga a Iesu
10, 11. O ā faaaʻoaʻoga na saunia e Iesu e faaalia ai, sa ia gaoioi ma le tusa e faatatau i ana tatalo?
10 Na faataatia e Iesu se faaaʻoaʻoga lelei mo i tatou e uiga i le galue i mea o tatou tatalo ai. Na ia aʻoaʻo mai i tatou ia tatalo: “Ia paia lou suafa.” (Mataio 6:9) A e na faia foi e Iesu mea uma na te mafaia ina ia faapaiaina ai e lana au faalogologo le suafa o lona Tamā. Sa faapena foi ona leʻi faatapulaaina e Iesu o ia i le na ona tatalo: “Loʻu Tamā e, ia e tuuina atu le mamalu i lou suafa.” (Ioane 12:28) E leai, sa ia faia mea uma na ia mafaia e faamamaluina ai le suafa o lona Tamā, ma ia aumaia ai foi isi ia latou faia faapea.—Luka 5:23-26; 17:12-15; Ioane 17:4.
11 Ina ua silafia e Iesu le tele o le manaoga faaleagaga o tagata, ona fetalai atu lea o ia i ona soʻo: “E tele le saito e seleseleina, a o le au faigaluega e toaitiiti ia; o lea ia outou aioi atu ai i le Alii (o Ieova le Atua) e ana le saito e seleseleina, ina ia aauina mai e iani e galulue i lana saito e seleseleina.” (Mataio 9:37, 38) Pe na faagata ai i inā taumafaiga a Iesu? E leai lava! Ina ua mave lena, ona ia vave aauina atu taitoalua lea o ona aposetolo e toa 12 i se malaga faataamilo mo le talaʻiga po o le ‘seleselega.’ Mulimuli ane, ona aauina atu lea e Iesu le toa 70 o ē folafola le tala lelei ina ia faia lea lava galuega.—Mataio 10:1-10; Luka 10:1-9.
Faatatauina o le Mataupu Silisili
12. O ā fua o i ai i a tatou galuega e tusa ai ma ā tatou tatalo i le Atua, ina ia foai mai a tatou meaʻai mo aso taitasi?
12 E manino lava, o loo faatalitalia i tatou e Ieova le Atua ina ia tatou tausisi e gaoioi ia talafeagai ma a tatou tatalo, ma i lea o le a faaamaonia ai lo tatou faamaoni. Na taʻu mai e Iesu ia i tatou ina ia tatou tatalo: “Ia e foai mai ia te matou i le aso nei a matou mea e ʻai e tatau ma le aso.” (Mataio 6:11) O lea, ma le saʻo lava, o ona soʻo uma lava e ole atu i le Atua mo lena mea. A e pe tatou te faatalitalia e ala lo tatou Tamā faalelagi e tali mai i lena tatalo e aunoa ma lo tatou faia o se gaoioiga? E leai lava. O le mea lena ua tatou faitau ai faapea: “Ua tuʻinanau le loto o le paie”—atonu pe e oo lava i le tatalo—“a e leai se mea (na te) maua.” (Faataoto 13:4: Na faia foi e le aposetolo o Paulo lea lava manatu i le 2 Tesalonia 3:10, i lona faapea mai: “Pe afai e le fia galue se tasi, aua neʻi ʻai foi o ia.” O le tatalo atu mo a tatou meaʻai i aso taitasi e tatau ona ō faatasi ma se manao e galue. E fiafia lava ona ua faapea mai ma le poto Paulo, o i latou e lē “fia galue” e lē tatau ona aai. O nisi o ē o loo fia galulue atonu e leai ni galuega, pe mamaʻi, po ua matutua tele foi e lē mafai ona fai galuega. Latou te mananao e fai galuega, a e ua lē ausia e ō latou tulaga. O lea, e mafai ai ona latou tatalo mo ā latou meaʻai i aso uma ma faamoemoe o le a maua mai.
13. Ina ia tali mai Ieova i a tatou tatalo mo lona agaga paia, o le ā e tatau ona tatou faia?
13 Na fautua mai Iesu ia i tatou ina ia ole atu i lona Tamā faalelagi mo Lona agaga paia. E pei ona faamutinoa mai e Iesu faapea, o loo sili ona naunau le Atua e foaiina mai ia i tatou le agaga paia na i lo le avatuina e mātua faalelalolagi o mea lelei mo a latou fanau. (Luka 11:13) A e pe e mafai ona tatou faatalitalia ea Ieova le Atua e tuuina mai faavavega lona agaga paia i ai tatou, e aunoa ma ni a tatou taumafaiga? E leai lava! E tatau ona tatou fai mea uma tatou te mafaia, ina ia maua ai lona agaga paia. E faaopoopo atu i le tatalo mo le agaga paia, e manaomia foi ona fafagaina ma le maelega i tatou i le Afioga a le Atua. Ai se ā? Auā e lē foaiina atu e Ieova le Atua lona agaga paia e ese mai lana Afioga, ma e lē tatau foi ona tatou faamoemoe e maua le agaga paia, pe a tatou lafoai le auala faale-lalolagi a Ieova o loo ia faaaogāina i aso nei, le “auauna faamaoni ma le mafaufau,” o loo fai ai ma sui o le Vaega Pule o Molimau a Ieova. A aunoa ma le fesoasoani mai lenei “auauna,” o le a lē mafai lava ona tatou malamalama i le tāua atoatoa o mea o tatou faitauina, pe iloa foi ona faatatauina mea o tatou aʻoaʻoina.—Mataio 24:45-47
14, 15. (a) Ina ia tali mai Ieova i a tatou tatalo mo lona atamai, e tatau faapefea ona tatou lagolagosua? (e) Ua faapefea ona fua mai e le faaaʻoaʻoga a le Tupu o Solomona lenei mea?
14 O le mataupu silisili faapea e manaomia e tatalo ni galuega, e faatatauina foi i upu nei a le soʻo o Iakopo, le ʻafa uso o Iesu: “A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia.” (Iakopo 1:5; Mataio 13:55) A e pe faavavega ona tuuina mai e le Atua lenei poto ia i tatou? E leai. Muamua lava, e tatau ona ia i tatou manatu saʻo, e pei ona tatou faitau ai: “Na te aʻoaʻo mai foi i e agamalu i lona ala.” (Salamo 25:9) Ma e faapefea ona aʻoaʻo e le Atua “e agamalu”? E ala i lana Afioga. Ua toe tatau ai foi la ona tatou faia se taumafaiga, ina ia malamalama i ai ma ia faatatauina, e pei ona faaailoa mai i le Faataoto 2:1-6: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afa e te sailiili ia te ia, e pei ona sailiili i le ario, . . . ona e lagona ai lea o le mataʻu ia Ieova, ma e maua ai le poto i le Atua. Auā o Ieova na te foai mai le poto.”
15 Ina ua tatalo le Tupu o Solomona mo le atamai ma na faavavega ona tali mai i ai le Atua i lana tatalo, pe sa faatatauina foi lava la i le mataupu silisili e uiga i le manaomia e tatalo o ni galuega? Ioe, sa faapena, auā sa manaomia ona tusia e le tupu o Isaraelu o Solomona lana lava tusi o le Tulafono, faitau i ai e lē auanoa, ma faatatauina i le olaga. A e ina ua lē taulau ona utagia e Solomona ana faatonuga e pei ona ia faatele o ana avā ma solofanua, o lea, sa leʻi toe ō gatasi ai ana galuega ma ana tatalo. Ma o le iʻuga, na avea ai Solomona ma aposetate ma na oti ai e pei o se “tagata valea.”—Salamo 14:1; Teuteronome 17:16-20; 1 Tupu 10:26; 11:3, 4, 11.
16. O le ā le faataʻitaʻiga ua faaalia ai, e tatau ona ō faatasi a tatou tatalo ma galuega ina ia foia ni vaivaiga faaletino?
16 O le mataupu silisili faapea o galuega e tatau ona ō faatasi m atatlo, e faatatau foi i letaimi tatou te talosaga atu ai i le Atua mo lana fesoasoani, ina ia foia se uiga manatu faapito ua mauaa i totonu o i tatou. O lea, na taʻua e se tuafafine paeonia lona lolo atu e matamata i ata televise ia e taʻua o soap operas e amata mai lava i le 11:00 o le taeao e oo i le 3:30 o le afiafi i aso uma lava. I lona aʻoaʻoina mai i se lauga i se tauaofiaga itumalo e uiga i le matuā afaina tele o nei polokalama lē mamā tau amio, na ia tuuina atu ai loa le mataupu i le Atua i le tatalo. A e na umi sina taimi o taumafai o ia e foia lea masani. Ai se ā? Auā e pei ona sa ia fai mai: ‘Ou te tatalo ina ia foia lea masani a e toe matamata foi i le polokalama. O lea na ou manatu ai loa e sili pe a ou auai i le auaunaga i le fanua i le aso atoa ina ia lē tofotofoina ai aʻu. Mulimuli ane, na oo ai lava ina ou manatu e tapē le TV i le taeao ma faapena ai lava i le aso atoa,’ Ioe, i le faaopoopo atu i le tatalo ina ia foia lona vaivaiga, sa tatau ona ia galue foi ina ia manumalo ai.
Tatalo ma La Tatou Molimau Atu
17-19 (a) O ā mea moni e faaalia ai o loo gaoioi Molimau a Ieova e tusa ai ma ā latou tatalo? (e) O le ā se faaaʻoaʻoga a se tagata ua faia ai lea lava manatu?
17 O le mataupu silisili faapea o tatalo, e manaomia ai ni galuega e sili atu ona moni na i lo o le gauega talaʻi o le Malo. O lea, o Molimau a Ieova uma lava e lē gata ina latou tatlo mo se faatelega o le au faigaluega mole seleselega, a e latou te faatinoina foi lena galuega. Ma o le iʻuga, ua latou vaaia ai ni faatelega mataʻina i lea atunuu ma lea atunuu. Ia matau na o le tasi se faataʻitaʻiga lenei: I i le 1930 sa na o le tasi le molimau a Ieova na talaʻi i Chile. I aso nei, o lena Molimau e toatasi ua lē gata ina avea ma toaafe a e ua 30,000. (Isaia 60:22) Pe o lenei ea mea sa na o se iʻuga o ni tatalo? E leai, na faia foi ni galuega. Ioe, i le na o le 1986 lava ia, na tuuina atu ai e Molimau a Ieova i Chile le sili atu i le 6, 492,000 itula i le galuega talaʻi!
18 E faapena foi ona moni pe a faasaina le galuega talaʻi! E lē gata ina tatalo Molimau mo se faatelega a e ō atu foi faalilolilo ma talaʻi pea. O le mea lea, e ui lava i teteega mai malo, a e o loo i ai pea faatelega i nei atunuu. O lea, i le 33 o atunuu o loo fesagai ai Molimau a Ieova ma na teteega mai malo, i le tausaga faaleauaunaga i le 1986, na latou tuuina atu ai le sili atu i le 32, 600,000 itula i la latou galuega talaʻi, ma olioli ai i se faatelega e 4.6 pasene!
19 E moni, o le mataupu silisili i tatalo ma galuega e mafai foi ona faatatauina i tagata taitoatasi. Atonu tatou te tatalo atu ia Ieova ina ia maua se suʻesuʻega faale-Tusi Paia, a e lē faia mea uma tatou te mafaia ina ia maua ai. O le mea lena na tupu i se tasi paeonia. I le na o le tasi lava lana suʻesuʻega faale-Tusi Paia, na ia tatalo ai ina ia toe maua foi nisi. Pe sa gata ai i inā ana taumafaiga? E leai, a e sa ia matauina ma le faaeteete lana faiva ma na ia iloa ai e faapea, i ana toe asiga sa na leʻi lagā ai lava le mataupu e uiga i le faia o se suʻesuʻega faale-Tusi Paia. I lona agaʻi atu ai la i lenei faasologa, na vave lava ona ia maua ai nisi suʻesuʻega faale-Tusi Paia. I lona agaʻi atu ai la i lenei faasologa, na vave lava ona ia maua ai nisi suʻesuʻega faale-Tusi Paia se lua.
20. E mafai faapefea ona aotele le mataupu e uiga i le manaomia e tatalo o galuega?
20 E tele lava nisi faaaʻoaʻoga e mafai ona avatu e faamaonia ai le manaomia e tatalo o ni galuega. O se faataʻitaʻiga, e i ia ni tatalo tau i ni faiā totino i totonu o aiga po o le faapotopotoga. A e o faaaʻoaʻoga na muai taʻua ua lava ma totoe e faamanino atoa ai e manaomia moni e tatalo galuega. E tāua tele lenei mea, auā tatou te lē faatalitalia Ieova le Atua e tali lelei mai i a tatou olega, pe a tatou teena o ia i a tatou amioga. E faaopoopo foi i ai ma le tatau ona tatou faia o mea uma tatou te mafai ia talafeagai ma a tatou tatalo, pe afai tatou te faatalitalia Ieova e faia mo i tatou mea ua tatou lē mafaia ona fai. E moni, e tonu ma poto tulafono a Ieova. E uigā, e mo lo tatou lava lelei, o lea ia gaoioi ai e talafeagai ma i latou.
E te Manatua?
◻ O le ā le mea manaomia e faatatau i le tatalo na lē amanaia e le toatele i Isaraelu anamua?
◻ Ae se ā ua le o se manaoga faia fua e le Atua i lona manaomia o lo tatou galulue faatasi ma tatalo mo mea o tatou manaomia?
◻ O ā faaaʻoaʻoga anamua e faaalia ai na galulue auauna a Ieova e tusa ma mea na latou tatalo atu ai?
◻ O le ā e tatau ona tatou faia, pe afai ia talia e le Atua a tatou tatalo atu, mo lona agaga paia ma le atamai?
◻ Ua faapefea ona faatatauina le mataupu silisili, e manaomia e tatalo galuega, i la tatou faiva i le fanua?
[Ata i le itulau 17]
Na uunaia e Iesu ona soʻo e tatalo mo nisi au faigaluega e galulue i le seleselega. A e na ia aauina atu foi i latou i le galuega talaʻi po o le ‘seleselega’
[Ata i le itulau 18]
Pe e te tatalo mo se fesoasoani ina ia pulea lau vaaiga i le televise? Ona e faatatauina loa lea o le mataupu silisili o tatalo e manaomia ai galuega i le tapē o lau TV