E Leʻi Faaipoipo a e ua Atoatoa mo le Auaunaga i le Atua
“O lē foi e tuuina atu lona tulaga muli i le faaipoipoga ua lelei lana mea e fai, a o lē e lē tuuina atu lona tulaga muli i le faaipoipoga ua sili ona lelei lana mea e fai.”—1 KORINITO 7:38, NW.
1. Ua faapefea ona faamaonia o le faaipoipoga o se faamanuiaga?
SA LEʻi faatalitalia e Ieova mo le uluai tane e nofo fua. Na i lo o lena, na foafoaina e le Atua se paaga faaipoipo mo Atamu, le tupuga o le fanau a tagata. (Kenese 2:20-24; Galuega 17:26) Maeu se faamanuiaga na iai le faaipoipoga! Na ia aumaia se faauoga, ma mafai ai ona fai se fesoasoani o le tasi i le isi, sa o se fuafuaga mamalu mo le fanauina mai o ni fanau, ma na tele foi sona sao i le faafiafiaina o tagata. Ioe, pe faia faaleaga e isi, ua mafai lava ona latou olioli i le mea e lē mafai e tupe ona faatauina—o le alofa faalefaaipoipoga!—Pese a Solomona 8:6, 7.
2, 3. (a) O le ā le vaaaiga a se tasi o lomiga faalelotu i le lē faaipoipo ma le faaipoipo? (e) E tusa ai ma le Tusi Paia, e tatau faapefea ona vaai i le faaipoipoga?
2 Ae peitai, e ese le vaaaiga a nisi i le faaipoiopga. Fai mai se tasi lomiga faalelotu: “O le nofo fua, o se tulafono mo faifeau i le Lotu i Sisifo, na tuuina atu mo faifeau e faasaina ai i latou ua faaipoipo mai le faauuina ma i latou ua i le tulaga paia ina ia sa ona faaipoipo. E aofia ai ma le tiute tauave, e tusa ai le tulaga mamā atoatoa i lalo o le tautoga. O pogai mo nei mea: ina ia mafai ai e i latou ua faauuina ona auauna i le Atua i se fuafuaga sili o le nofo fua. (1 Korinito 7:32) ma i lea, o le ola i se olaga pulea, ua latou tausia ai se tulaga taupou, lea e sili atu ona paia ma sili atu ona maualuga na i lo le tulaga faaipoipoina. I le FF (Feagaiga Fou) o le tulaga nofo fua po o le tulaga muli, o loo siitia i se tulaga e sili ona maualuga na i loo le tulaga faaipoipo.”—The Catholic Encylopedia, na tuufaatasia e Robert C. Broderick.
3 E moni ea ma tatau faapea o le faamalosia o le nofo fua ‘e sili atu ona paia ma maualuga na i lo o le faaipoipo’? E leai, e tusa ai ma le “Feagaiga Fou,” lea o loo faapea mai i le Jerusalem Bible a le Katoliko: “A o loo tautino mai e le Agaga, e o ese nisi i le faatuatua i tausaga amuli, latou te faalogo i agaga e faasese mataupu a temoni; o le pogai o lenei mea ona o le pepelo o tagata tala pepelo, o ē ua faamuina o latou lava loto fuaita ifo i le uʻamea aasa: latou te vavao i le faiavā, ma faasa isi meaʻai, o mea lava na foafoaina e le Atua ina ia talia ma le faafetai e i latou ua faatuatua, ma latou iloa le upu moni.” (1 Timoteo 4:1-3) O le mea moni lava, o le faaipoipoga o se meaalofa mai le Atua, ma o se mea lelei.—Ruta 1:9.
4. I le vaai atu i le 1 Korinito 7:38, o ā fesili ua mapuna aʻe?
4 E ui lava o le faaipoipoga o se meaalofa mai le Atua, a e na tusi la aposetolo o Paulo: “O lē foi e tuuina atu lona tulaga muli i le faaipoipoga ua lelei lana mea e fai, a o le e lē tuuina atu lona tulaga muli i le faaipoipoga ua sili ona lelei lana mea ua fai.” (1 Korinito 7:38, NW) Ai se ā na faaalia ai e Paulo, e sili ona lelei le nofo ai pea ia lē faaipoipo? Pe e tatau ea i se tagata nofo fua ona iai se lagona lē atoatoa? Ae pe e mafai ona tauia le nofo fua?
Le Autū o le Olaga Faa-Kerisiano
5. O le ā e tatau ona avea ma autū o le olaga faa-Kerisiano?
5 O le auauna ia Ieova e tatau ona avea ma autū o lo tatou olaga faa-Kerisiano, e tusa lava pe nofo toatasi pe faaipoipo foi. O le tuuina atu ma le olioli o le auaunaga paia i le Atua, e aumaia ai le faaamaoniga o lo tatou pipii atu ia te ia o le Pule Aoao o le Vateatea. O le usiusitai ma le loto atoa, ma auai ma le maelega i le faiva faa-Kerisiano, o auala na e faaalia ai lena pipii atu. (1 Ioane 5:2, 3; 1 Korinito 9:16) E mafai la ona faataunuuina le faiva ma isi gaoioiga usiusitaʻi e talafeagai ma le finagalo tauatua, pe afai e nofo fua le tagata.
6. Pe ua tatou faaipoipo pe o nofo fua, a e o se faiva maelega ua mafai ai ona tatou faia le ā?
6 O loo tauaveina nei e ē folafola le tala lelei le galuega talaʻi o le Malo mo le viiga o Ieova. Ma e tusa lava pe ua tatou faaipoipo pe o nofo fua, a e o le maelega i le faiva ua tatou mafai ai lava ona maua avanoa e taulaʻi atu ai pea i nisi o a tatou mea totino ma agavaa i le auaunaga i le Atua. A e peitai e ao ona tatou atiina aʻe ma pulea o tatou tulaga, ina ia ʻaua ai lava neʻi o tatou tuua le faiva i se tulaga maulalo na i lo o le faaautū iai o ō tatou olaga. E tatau ona tatou ‘muai saili le Malo.’ (Mataio 6:33) E iai le olioli i le uaʻi atu i mea tauatua na i lo na mea totino.
Atoatoa mo le Faiva
7. O le ā se faaaʻoaʻoga ua iai e faaalia ai e mafai e se Kerisiano e leʻi faaipoipo ona atoatoa mo le faiva?
7 E mafai oan atoatoa Kerisiano mo le faiva, e tusa lava pe nofo fua pe faaipoipo. O lea, o le tulaga lē faaipoipo o se faavae e lē manaomia ona faia ai se suiga. (Faatusatusa 1 Korinito 7:24, 27.) E lē o iai i le Afioga a le Atua le vaaiga a nisi ituaiga faapea, e lē mafai e le tane ona ausia ona tofiaga atoatoa seiloaga ua faaipoipo. Na maliu Iesu Keriso e leʻi faaipoipo, ma ua na o le faatoanofotane faaleagaga lava i le lagi o le faletua, ua tofia e Ieova mo Iesu ia faia. (Faaaliga 21:2, 9) O lea, e ui lava e leʻi faaipoipo le Alo o le Atua, e pei o se tagata, a e sa avea lava o se faaaʻoaʻoga aupito sili mo se tagata ia atoatoa mo le faiva.
8. E pei ona faaalia e Paulo, o le lē faaipoipo ua faaavanoa atu ai mo le ā?
8 O le mea moni lava, o le lē faaipoipo, e maua ai le tele o le saolotoga totino ma taimi mo le faiva. I lona fautua ina o le nofo fua, na faapea mai ai Paulo: “Ou te loto ina ia aua neʻi popole outou. Ua popole le taataanoa i mea a le Alii, pe faapefea ona ia maua le faamaoniga a le Alii . . . E lē gata i lea, o le fafine e leʻi faaipoipo, ma le taupou, ua popole i mea a le Alii.” (1 Korinito 7:32-34, NW) E faatatau lenei mea i Kerisiano e leʻi faaipoipo, e faapea foi ma i latou na faaipoipo muamua, a e suia nei o latou tulaga, ua toe foi atu ai i latou i se tulaga ua nofo fua.—Mataio 19:9; Roma 7:2, 3.
9. Ua faapefea ona faaalia i le faaʻoaʻoga a Iesu faapea, o le lē faaipoipo e lē faapea ai ua lē atoatoa ai se tagata mo le faiva faa-Kerisiano?
9 O le mauaina o le taʻumatuaina i le faaletino, le mafaufau, ma le faaleagaga, e aumaia ai le atoatoa lelei mo le auaunaga a le Atua. Sa leʻi tau manaomia e Iesu sana paaga faaipoipo inaia atoatoa ai mo le vaega e avea ai o le Faifeau Sili a le Atua, ma ave foi o lē o le a saunia ia le togiola. (Mataio 20:28) I le avea o sē e leʻi faaipoipo, sa saoloto ai Iesu e taulaʻi atu lona malosi atoa i lana faiva. Sa matuā eseese lava lona tulaga lē faaipoipo mai tulaga masani a Iutaia, lea sa faamamafa ai le faaipoipo ma faia ni fanau. A e peitai, sa matuā agavaa lava Iesu e faaʻiuina lava galuega na tuuina mai e le Atua. (Luka 3:32; Ioane 17:3, 4) O lea, o le lē faaipoipo e lē faapea ua lē atoatoa ai se tagata mo le faiva faa-Kerisiano.
E “Fevaeveaʻiina” Tagata ua Faaipoipo
10. Ona o le noataga o le “tino e tasi,” o le ā na fai mai ai Paulo e uiga ia i latou ua faaipoipo, pe a faatusatusa atu ia i latou e leʻi faaipoipo?
10 I le faatusatusa atu i tagata nofo fua, e tatau lava ona tausisi Kerisiano ua faaipoipo i le faiva ma le iloa lelei o lo latou noataga i le “tino e tasi.” (Mataio 19:5, 6) Ona o lena noataga ma le tele o ona tiute tauave, na fai mai ai Paulo faapea, o tagata faaipoipo e “fevaevaeaiina.” Na ia tusi mai faapea: “Ou te loto ina ia aua neʻi popole outou. Ua popole le taataanoa i mea a le Alii, pe faapefea ona ia maua le faamaoniga a le Alii. A o le ua fai avā, e popole ia i mea a le lalolagi, pe faapefea ona maua le faamaoniga a le avā, ma ua vaevaeina o ia. E lē gata i lea, o le fafine e leʻi faaipoipo ma le taupou, ua popole i mea a le Alii, ina ia paia o ia i lona tino ma lona agaga. A o le nofotane, e popole o ia i mea a le lalolagi, pe faafepea ona maua le faamaoniga a lana tane. A e peitai, o laʻu lenei upu e fai atu ia te outou e aoga ai ia te outou, e lē ina ia ou lafo se matasele ia te outou, a e peitai ina ia uunaia outou ia fai le mea e tatau ma ina ia auauna pea i le Alii ma le lē fetosoaiina.”—1 Korinito 7:32-35, NW.
11. O le ā sa faaalia e Paulo i le 1 Korinito 7:32-35?
11 E manino lava, ona o le olaga lē fetosoaiina, na fautuaina ai e Paulo le nofo fua. Atonu pe sa avea foi o ia o se tane ua oti lana avā, o lē na filifili e toe faaipoipo. (1 Korinito 9:5) A e ui ileam sa ia iloa lav ae iai ni popolega e fesootai mal e olag faaipoipo i lenei lalolagi. Sa ia faailoa mai le saolotoga e mafai ona olioli ai Kerisiano lē faaipoipo, pe a faatusatusa atu i fiafiaga o tagata talitonu ua faaipoipo e fevaeveaiina i mea faaletino ma le faaleagaga. E lē pule le tagata faaipoipo i lona lava tino auā ua tino e tasi i laua ma lana paaga, ma i lea e pule ai foi lana paaga. (1 Korinito 7:3-5) I le iloa o lenei mea, na faapea mai ai ma le saʻo Paulo, o lona uiga ia vavae ese atoatoa ma taofia mo le faaaogāina tuusao lava e Ieova le Atua, i le tino atoa ma le agaga.
12. I le leai o se toʻalua, o le ā e mafai ona faia e le tagata e le’i faaipoipo?
12 O le agaga o le Kerisiano nofo fua, po o ona manatu e mafaufau i ai, e uunaʻia ai o ia i le auaunaga tiotio ma le lē fevaeveaiina o le Malo o le Atua. I le leai o se tane po o se avā e faapea mai e pule i lona tino, ua mafai ai e lē o nofo fua ona mulimuli i le agaga, po o mafaufauga, o lona mafaufau ma le loto. E mafai lava ona tuuina atu faapitoa o ia i le auaunaga ia Ieova, i le uai atu iai o le tino ma le mafaufua. O lea e sili ai ona lelei mo se tane po o se fafine e leʻi faaipoipo, ona vaavaai i na o mea e faafiafia ai le Alii faatasi ma le sili ona tele o lona saolotoga totino. E lē mafai ona tatou faafitia ma le tonu le mea na fai mai ai Paulo, auā na silafia e Ieova, e tatau ona faaamauina mo le faatonuina ai o i tatou.
E lē Atoatoa la le Tagata ua Faaipoipo?
13, 14. O le ā le auala sese ua na faamatagatagaina le noataga o le “tino e tasi” ma faia ai ia lē atoatoa le tagata faaipoipo mo le faiva faa-Kerisiano?
13 Faatasi ai ma le manatu sese lea faapea, e mafai ona tele atu mea latou te faia i le auaunaga i le Atua, atonu ua tuu sese ai e nisi Kerisiano faaipoipo a latou faaipoipoga i se tulaga lē tāua pe lē mautinoa i le olaga. Mo se faataʻitaʻiga, atonu o le a amata ona gaoioi fia tutoatasi le avā mai lana tane i ni auala ua aumaia ai ni iʻuga eseese. Atonu foi ua noanoatia le tane ia i gaoioiga tau le faapotopotoga. I lalo o na tulaga, atonu o le a la faaʻiua ai faapea o loo lelei tele i laua i le auaunaga ia Ieova. A e o le mea moni, atonu ua la uia se auala e matagataga ai le noataga lea o le “tino e tasi.” Afai o le afaapena, o le a lē faafiafiaina ai la Ieova.
14 O le mea moni, o le matagataga o le noataga o le “tino e tasi,” e mafai ai ona lē atoatoa se tagata faaipoipo mo le faiva faa-Kerisiano. E lē faaopoopo atu e le faaipoipoga le atoatoa i le faiva, a e na te toese ai le uai atu totino lea e mafai ona tuuina atu i le faiva. (Faatusatusa le Luka 14:16, 17, 20.) A e peitai, afai e tatau i tagata faaipoipo ona faafiafia le Atua ma ia atoatoa i le avea o ni ana faifeau, e ao la ona ola e tusa ma a latou avega tau faaipoipoga.
Lē Faaipoipo ona o le Malo
15. (a) O le ā le uiga e tatau i Kerisiano e leʻi faaipoipo ona atiina aʻe? (e) O le ā le manatu faavae e uiga i le faaipoipo ma le nofo fua, na faia e Paulo i le 1 Korinito 7:36, 37?
15 E ui lava e tatau ona ola aʻe auauna faaipoipo a Ioeav e tusa ma a latou avega tauave tau faaipoipoga, e tatau ai foi la i Keisiano nofo fua ona atiina aʻe le loto malie e tusa ai ma lo latou atoatoa ona o le lē faaipoipo. E pei ona fai mai Paulo: “O laʻu lenei upu i tagata taataanoa ma fafine ua oti a latou tane, e lelei ona latou nonofo pea pei o aʻu nei [e leʻi faaipoipo] Ua noatia ea oe i le avā? aua e te saili i se avā.” (1 Korinito 7:8, 27) I le avea o se tagata nofo fua, faatasi ai ma le fesoasoani a Ieova, ia atiina aʻe le tulaga ua e faataatia, ua faaavanoa atu e le Atua. So o e suiga o tulaga o mea, ua lē tatau ai ona faia iai se faaiʻuga mautinoa faapea, ua na o se mataupu lava faaleaganuu po o se uiga o le lē mautonu ona o omiga mai aumea. Na i lo lea, e tatau ona mapuna aʻe mai se manaoga faale-Tusi Paia, auā na faapea mai Paulo: “Afai e manatu se tasi ua faaleono lana amio i lona tulaga muli, afai ua mavae le malaulau o lona talavou, ma ua faia faapea, ia fai e ia le mea e loto iai; e lē agasala o ia. Ia faaipoipo i laua. A o lē ua mau lona loto e lē manomia ona faia, a ua ia te ia foi le pule i lona lava loto ma ua faia lenei filifiliga i lona lava loto, ia taofi i lona tulaga muli, o le a lelei lea mo ia.”—1 Korinito 7:36, 37, NW.
16. (a) O le ā lona uiga o le faaupuga “ua mavae le malaulau o lona talavou”? (e) O le ā e tatau i le Kerisiano o loo tumau i le lē faaipoipo ona ia mautinoa iai?
16 O lea la, na faaalia e Paulo faapea, e lē sese le faaipoipo, pe afai sa lē lelei le amio a se tasi agaʻi i lona tulaga muli, e ui lava sa mautinoa le leʻi faasino atu e le aposetolo i se agasala mamafa. E pei ona sa ia muai fai mai, “E lelei ona fai avā, a e leaga ona mu.” (1 Korinito 7:9) O le mea moni, sa ia faasino i faaipoipoga i lalo o na tulaga pe afai o se tagata “ua mavae le malaulau o lona talavou,” ua i tala atu o le uluai taimi na oo ai ina malosi faalogona tau i feusuaiga. Afai o se tagata taʻumatuaina “ua ia te ia foi le pule i lona lava loto” ma ua mautū lana filifiliga i lona loto e faaavanoa o ia mo le tulaga nofo fua, ua sili ona lelei le mea ua ia faia. O le taulau ma le manuia i tulaga nofo fua, e lē o lona uiga faapea o le taumafai pea e teena se uunaʻiga malosi mo le faaipoipoga ma le olaga faaleaiga. Na i lo o lena, o le Kerisiano ua filifili e tumau pea i le lē faaipoipo, e tatau lava ona mautinoa lelei i lona loto faapea, o le nofo fua ua fetaui lelei lava lea ma lona tulaga, ma e tatau ona loto malie e tuu atu so o se taumafaiga manaomia ina ia faatumauina ai le mamā o lena tulaga. O le Kerisiano e faia faapena, o le a itiiti lava ni mea e fesootaʻi ai ma tele ai le saolotoga e auauna ai i le Alii.
17. Ai se ā ua tumau ai pea ona lē faaipoipo nisi, e tusa ai ma upu a Iesu?
17 Afai e atiina aʻe e Kerisiano e leʻi faaipoipo le manatu o Iesu Keriso, o le a mafai i lena ona fesoasoani ai ia i latou e faatumauina ai pea le tulaga nofo fua. E ui lava sa leʻi faaipoipo Iesu i se aganauu sa faamamafa ai le faaipoipo, a e sa faaalu tele lona taimi ma ana meaalofa i lana faiva e lē faaluaina. E pei lava o Iesu, e mafai foi e se Kerisiano e leʻi faaipoipo ona olioli i le meaalofa o le nofo fua, ua foaiina atu e le Atua ia i latou ua faaavanoaina mo lea tulaga. Na fetalai Iesu e faatatau i lenei mea: “E le mafai foi na talia lena upu e tagata uma, ua na o e ua foaiina atu i ai; auā o iai eunuka o e faapea ina (ua) fanau mai, o iai foi eunuka o e ua faaaeunukaina e tagata; o iai foi eunuka o e ua faaeunukaina i latou e i latou, ona o le malo o le lagi. Ai se na te mafaia ona talia, ina talia lea e ia.”—Mataio 19:11, 12.
18. O le ā ua taofia ai “eunuka” ona o le Malo, mai le faaipoipo?
18 Sa leʻi faapea mai Iesu e sili le tagata nofo fua i lo le tagata faaipoipo. Sa na leʻi uunaʻia le nofo fua ina ia ona maua ai o se olaga e leai ni popolega, ma e mautinoa lava foi sa ia leʻi fautuaina lea tulaga ina ia alu atu ai le tagata e leʻi faaipoipo ma faasalalau atu ona manatu i isi o le isi ituaiga. E leai, a e o i latou ua faia i latou lava ma “eunuka” ona e mo le lelei o le Malo, o ni tagata ua saʻo la latou mea ua fai, o ē ua faavanoa i latou mo lenei tulaga i o latou loto. O le ā ua taofia ai i latou mai le faia o ni faaipoipoga? E lē ona o ni lē taulau faaletino, a e ona o le pulea o le faanaunauga, ina ia tuuina atu atoatoa ai i latou i le tele e mafai ai i le auaunaga a le Atua. Ua matuā tāua faapitoa lava lenei auaunaga i le tami nei, talu mai le faavaeina o le Malo i le lagi i le 1914, ma ua tatau nei ona talaʻiina “lenei tala lelei o le malo” i le lalolagi aoao, e fai ma molimau a o leʻi oo mai le iʻuga o lenei faiga o mea pogisa ua lata tele mai.——Mataio 24:14.
Faamālo atu i Kerisiano e Leʻi Faaipoipo
19. E faatatau ia i latou ua tumau i le nofo fua ona o le Malo, o le ā e tatau i Kerisiano uma ona fai?
19 E tatau i Kerisiano uma ona faamālo ma faalototele atu ia i latou ua tumau i le lē faaipoipo ona o le Malo. i lo o mea uma lava o le avea ma sē nofo fua o lona uiga “ina ia auauna pea i le Alii ma le lē fetosoaiina.” (1 Korinito 7:35,NW) O le a sili ona lelei mo mātua ona aʻoaʻo a latou fanau i le mea o fai ma ai le Tusi Paia, e uiga i le tulaga lē faaipoipo ma ona aogā mo le auaunaga a Ieova. E mafai e i tatou uma lava ona faalaeiau i uso talitonu e leʻi faaipoipo, ma ia lē tatau lava ona faavaivaia a latou faaiʻuga e tumau ai pea ona le faaipoipo ona o le Malo.
20 Afai la o oe o se Kerisiano e leʻi faaipoipo, o le ā e ao ona e faia.?
20 E mafai e Kerisiano e leʻi faaipoipo ona olioli i le avea o ni faifeau atoatoa a le Atua. I nei taimi o suiga iloga, ua latou matā fai fia a ilava e auaau i le gauega faanatinati o le taalaʻiina o le Malo. O le mea leal, afai o e nono fua, ia e olioli ona ua faaaogāina oe e Ieova, avea o se faifeau Kerisiano atoato e leʻi faaipoipo, ‘Galue ma le mataʻu ma le gatete mo lou faaolagataga, a e pupula atu e pei o se mea e faamalamalama aʻi i le lalolagi, a o taofi mau atu i le upu o le ola.’ (Filipi 2:12-16) Ia uai atu i fiafiaga o le Malo, a o tumau pea ona e aufaatasi atu ma le au uso faaavaomalo o Molimau a Ieova, ma faaaiʻuina le faiva faa-Kerisiano. O le fai faapea i le avea o se tagata nofo fua, o se auala tauia lea o le olaga, e pei ona o le a tatou vaai nei i ai.
O ā Au Tali?
◻ O le ā e tatau ona avea o le autū o le olaga faa-Kerisiano?
◻ Ai se ā e mafai ai e auauna a Ieova e leʻi faaipoipo, ona atoatoa mo le faiva faa-Kerisiano?
◻ O le ā le auala e mafai ai ona lē atoatoa le tagata ua faaipoipo?
◻ O le ā le uiga o le avea ma “eunuka” ona o le Malo?
◻ Ai se ā e tatau ai ona tatou faalaeiau i Kerisiano e leʻi faaipoipo?
[Ata i le itulau 10]
E ui lava sa leʻi faaipoipo a e sa atoatoa le aposetolo o Paulo
[Ata i le itulau 12]
Sa avea Iesu o le faaaʻoaʻo aupito sili o se tagata ua atoatoa i le faiva
[Ata i le itulau 15]
Pe e te faamalō atu ia i latou ua tumau i le lē faaipoipo ona o le Malo?