Mea Tāua Mai le Tusi Paia O le Pese a Solomona 1:1–8:14

Le Alofa Moni ua Manumalo!

E i ai le alofa e lē mavae. E mausalī, e tumau, e manumalo. O lena alofa lē liua, na tupu i le va o Iesu Keriso ma lana “faatoanofotane,” po o le faapotopotoga faauuina e le agaga. (Faaaliga 21:2, 9; Efeso 5:21-33) Ma maeu le matagofie ona faaataina mai o lenei alofa i Le Pese a Solomona!

Na fatu e le Tupu poto o Solomona o Isaraelu i le 3,000 tausaga ua mavae, lenei “pese silisili” (1:1) o loo faamatalaina mai ai e uiga i le alofa sa i se tama leoleo mamoe, ma se teine i se atunuu e igoa o Sunema (Sulami). E ui i le tele o lona mamalu ma ana ʻoa, a e sa lē mafai e le tupu, ona faatosina mai ai le alofa o le teine Sulami, auā sa faamaoni pea o ia i lana pele le tama leoleo mamoe.

A faitauina ma le faaeteete lenei tusi solo ma talisapaia, ona avatu ai lea i auauna nofo toatasi ma ē ua faaipoipo a Ieova, le tele o mea e ʻai mo ō latou mafaufau faatatau i le mamā, agamalu, faamaoni, ma le tausisi i le alofa, e tatau ona avea ma faailoga tāua o faaipoipoga mau faa-Kerisiano. E moni lava, e mafai e i tatou uma ona maua aogā mai lenei pese e uiga i le manumalo o le alofa moni.

Le Teine Sulami i le Togalauapi a Solomona

Faamolemole faitau Le Pese a Solomona 1:1-14. I le fale ie o le tupu, na tautala ai le teine Sulami, e pei lava o loo i ai lana pele leoleo mamoe, Sa viia e Solomona lona lalelei, ma folafola atu na te teuteuina o ia i auro ma ario. A e na teena e le teine ana taumafaiga, ma faailoa atu ia te ia lona alofa moni e na o le tama leoleo mamoe lava.

◆ 1:2, 3.—Ai se ā ua talafeagai ai nei faatusatusaga i le uaina ma le uu?

O le uaina e faafiafia ai le loto ma faamalosia ai le loto ua tiga. (Salamo 104:15; Faataoto 31:6) O le suauu e liligi atu mo se malo faaaloalogia, e faamālu ai ana mea totino. (Salamo 23:5; Luka 7:38) O lea, sa faamalosia ma faamafanafanaina le teine Sulami i lona manatua o upu “faapelepele’ a le tama leoleo mamoe ma lona “suafa”. Ua faapena foʻi, ona faalaeiauina le vaega totoe o soʻo faauuina o Keriso, i lo latou manatunatu loloto i le alofa, ma le faamautinoaga a lo latou Leoleo Mamoe, o Iesu Keriso, e ui lava o loo latou i ai i le lalolagi, ma nonofo ese mai ai ia te ia.

Lesona mo i Tatou: Semanū e faaofuina e Solomona le teine Sulami i “pale auro” ma “e ema i ario,” a e na ia teena nei tofotofoga i mea faitino, ma faatumau pea lona alofa lē mavae mo le tama leoleo mamoe. (1:11-14) O le manatunatu i ona uiga, e mafai ona faamalosia ai le faaiʻuga a le vasega o e “faatoanofotane” e fulisia mea faitino faatosinaga a le lalolagi ma tumau pea i le faamaoni i la latou Faatoāfaiava faalelagi. Afai o lo tatou faamoeome e faalelalolagi ma ua tatou manatu e faaipoipo, tau lava ina ia avea le faaaʻoaʻoga a lenei teine e unaiʻa ai i tatou e faia mea faaleagaga, a e lē o mea faaletino, ma o tatou fiafiaga autū.

Faanaunauga o le Loto

Faitau le 1:15–3:5. Ua ulufale le tama leoleo mamoe i le fale ie o le tupu, ma faaleo atu lona alofa i le teine Sulami tauagafau, o lē na faasilisiliina o ia i lo isi tagata uma. Ina ua la tetea ese, na manatua ai e le teine taimi fiafia ma lana pele, ma ua ole atu ina ia foʻi vave mai ia te ia. I le po, sa ia manao i le tama leoleo mamoe.

◆2:1-3—O le ā le uiga o nei ituaiga o faamatalaga?

Na taʻua e le Sulami ia lava, o le “fuga o le laau i Sarona” ona o ia o se teine talavou lotomaulalo, ma le tauagafau na ia faatusaina ai o ia, e na o le toatasi i totonu o fugalaau o le vao. Peitaʻi, na iloa e le tama leoleo mamoe faapea, o le teine ua pei o se “susana [lili] i totonu o laau talatala” ona o lona lālelei, onosai, ma faamoni ia Ieova. Sa pei le leoleo o se “moli i totonu o laau o le vao” i le teine Sulami, ona o ia o se tama talavou e maau atu i mea faaleagaga e faapena foʻi ona tuutoina atu ia Ieova, ma e i ai ona uiga totino e ese ai ma lona tomai. O se Kerisiano e leʻi faaipoipo o loo saili se paaga, i le olaga e tatau ona vaavaai na o se tagata talitonu faamaoni lava, e i ai uiga e pei o le Sulami po o lana leoleo mamoe pele.

◆3:5—Ai se ā ua fesootaʻi ai le tautoga ma nei manu?

O sevi ma aila o ni manu filemu, amio lelei ma o ia manu matagofie e gaoioi vavave foʻi, ma mautinoa feōaiga o ō la vae. O lea, o le mea moni, na fusia faatasi e le teine “tama fafine a Ierusalema’ i se tautoga i mea uma e matagofie ma lelei. E ala i nei mea faiola, sa ia fusia faatasi ai nei fafine ina ia taumamao mai le taumafai e faatupu lona alofa mo se tasi, na i lo lana leoleo mamoe faapelepele.

Lesona mo i Tatou: Na faatautō e le teine “tama fafine a Ierusalema,” po o fafine i le maota, o ē auauna i le tupu, ina ia latou lē ‘faagaee le alofa i totonu ia te ia seʻia faitalia o ia.’ (2:7; 3:5) E faaalia i lenei mea e lē tatau ona i ai se alofa faaleituaiga mo so o se tasi. Sa leʻi lagona foʻi e le teine ia sona manao pe tosina atu ia Solomona. O lea, maeu se poto, mo se Kerisiano e leʻi faaipoipo, ua fuafua e faaipoipo ona manatunatu ia tau lava o tagata tapuaʻi ma le faamaoni ia Ieova, e tatau ona alofa moni i ai!—1 Korinito 7:39.

Le Teine i Ierusalema

Faitau le 3:6–6:3. Na toe foʻi atu Solomona ma le matagofie tele i Ierusalema. Na feiloaʻi atu le tama leoleo mamoe ma le teine i inā, ma faamalosia o ia i faaupuga o le alofa faapelepele. I se miti, sa tuai ona ia tali atu i le tuʻituʻi mai o lana pele, ma na itagia o ia e leoleo o le faitotoa, a o ia saili atu ia te ia. Ina ua fesiligia pe ai se ā ua tulaga ese ai lana pele e toatasi, sa ia taʻu atu i “tama fafine a Ierusalema” se faamatalaga pupula o ia.

◆5:12—Na faapefea ona avea mata o le tama leoleo mamoe, e pei o se ‘lupe o taele i le suāsusu’?

Muamua lava, sa faatusaina mata o le teine Sulami, e pei o ni mata o se lupe ona o le vaivai, ma le agamalu. (1:15; 4:1) O le mea lena, na taʻua ai e le tama leoleo mamoe le teine o lana “lupe.” (5:2) A e i inei ua faatusaina ai e le teine maʻi alofa, mata o le tama leoleo mamoe, i lupe lanumoana o loo taeele i vai o le suāsusu. (5:8, 12) Ua faapena foʻi, ona faasino atu lenei faatusatusaga, i tamaʻi mata uli o le tama leoleo mamoe o loo siomia e ona iʻoi mata papae.

Lesona Mo i Tatou: Sa faatusaina le teine Sulami i se “faatoaga ua puipuia.” (4:12) E masani lava o faatoaga i Isaraelu anamua sa pei o se paka, e pei o se parataiso matagofie e i ai punā vai, ma le anoanoaʻi o laau aina, fugalaau, ma laau. E masani lava, ona puipuia i se ʻau pa ma e na o se faitotoa lava e faamauina e mafai ona ui atu ai. (Isaia 5:5) Sa pei o se faatoaga matagofie, le manaia o ona fua manaogi sasala e faafiafia ai, ma le nanamu e manavaina e le tama leoleo mamoe le amio mamā ma le lalelei o le teine Sulami. O ona faalogona sa lē avatua i so o se tagata, auā e mamā ia, e pei o se “faatoaga ua puipuia” e pa ma ua faamauina i loka, e lē talia ai ni tagata fai mea leaga a e tatalaina atu na o le tagata lava e ona faaletulafono lea faatoaga. I le uiga mamā tau amio ma le faamaoni, o lea ua faataatia ai e le teine Sulami se faaaʻogaʻoga lelei mo fafine Kerisiano o aso nei e leʻi faaipoipo.

“O Lona Mumu”

Faitau le 6:4–8:14. Na vivii Solomona i le lalelei o le teine, a e na ia teena o ia, ma na faailoa atu lona tuutoina atu i le leoleo mamoe. Ina ua lē taulau ona faatosina mai o le alofa o le teine, o na tuuina atu loa lea o ia e Solomona e alu i lona aiga. Faatasi ai ma lana “pele” e toatasi i lona itu, ua foʻi atu o ia i Sunema o le fafine taʻumatuaina, po ua faamaonia lona tumau. O le alofa i lo la va ma le leoleo mamoe, sa oo ina malosi e pei o le oti, ma o lona mumu saesae ua pei o le “mumu’ o loa.

◆6:4—O le ā le “Aai Matagofie [Tiresa]”?

O lenei faaupuga e mafai ona tuuina atu i “Tiresa’ o lona uiga “Matagofie, po o le Fiafia.” O Tiresa o se aai sa lauiloa i lona matagofie na uluaʻi avea ma laumua o le malo i matū o Isaraelu.—1 Tupu 14:17; 16:5, 6, 8, 15.

◆7:4—Na faapefea ona avea le ua o le teine “ua pei o se ʻolo o nifo o elefane”?

E mautinoa lava sa molemole e pei o nifo o le elefane, ma e paee e pei o se ʻolo. Muamua lava, sa faatusaina lona ua e pei o le “ʻolo o Tavita.” pe atonu o le ʻolo i le Maota o le Tupu i luga o le pa o Ierusalema, i le itu i sasaʻe. I luga o le ʻolo ‘o loo tautau ai talita masani a toa e afe,’ ua faapea ai atonu na teuteuina le ua o le teine Sulami, i se asoa na miloina i mea lapotopoto po o maatāua.—4:4; Neemia 3:25-27.

◆8:6, 7—Ua faapefea ona “malosi le alofa e pei o le oti”?

Ua manumalo pea le oti i tagata agasala, ma o le alofa moni e faapena ona malosi. I lona tausisi pea i le tuutoina atu atoatoa, o lea alofa e lē lolo pe faafiti, e pei o Seoli (tuugamau) i lona talia pea o tino oti. Talu ai ona ua tuu e Ieova le Atua le malosi o le alofa i totonu o tagata, o lenei la uiga e sau mai ia te ia, ma ua fetaui lelei lava lona uiga “o le mumu [o loa],” Sa leʻi mafai e oo lava i le Tupu o Solomona mauoa ona faatauina lena alofa.

Lesona mo i Tatou: O mea na faia e le Tupu o Solomona i le teine Sulami, sa pei o se tofotofoga e iloilo ai lea na ia pasi ai ma le manuia. Sa leʻi faalotolotolua o ia i le alofa ma le amio mamā, e pei o se faitotoa e faigofie ona matala i ona sooga, ma e manaomia ona pupuniina i se laupapa arasi e taofia ai mai lona matala atu i se tasi e leʻi faatagaina, po o se tasi e lē lelei atoatoa. E leai, na manumalo le teine mai faatosinaga a le tupu, na tumau e pei o se pa faasaga i faatosinaga faitino a lenei lalolagi. I le faalagolago atu i le Atua ma manatu i le faaaʻoaʻoga lelei a le teine Sulami, e mafai ai foʻi e fafine Kerisiano i aso nei, ona faamaonia ō latou tulaga taitoatasi, i le tumau i mataupu silisili tau amio mamā mo le viiga o Ieova.—8:8-10.

O le mea moni, o lenei “pese silisili,” ua avea le alofa ma ona matua, ua faamaualugaina ai lo tatou talisapaia mo le fusi i le va o Iesu ma i latou ua filifilia e avea o lana “faatoanofotane” faalelalolagi. Peitaʻi, o tama ma teine talavou uma, faapea ma avā ma tane ua tuuina atu ia Ieova, e mafai foʻi ona latou maua aogā mai le saili atu, ia faataʻitaʻi i le faamaoni o le teine Sulami ma le leoleo mamoe, i le feagai ai ma puapuaga ma tofotofoga. Ma o lenei vaega ofoofogia o le Afioga a le Atua, e tatau ona uunaʻia ai i tatou uma e tumau pea i le faamaoni ia Ieova, o le Puna o le alofa manumalo.