Talisapaia mo o Tatou Uso
“Ma le faalogona mafana faaleuso lē faatagafai . . . ia matuā fealofani lotulotu ai outou mai le loto.”—1 PETERU 1:22, NW.
1. O le ā ua faamautinoa atu ai i le toatele o tagata faapea o loo faia e Molimau a Ieova le Faa-Kerisiano moni?
O LE ALOFA o le faailoga lea e faaesea ai le Faa-Kerisiano moni. I le taimi o le talisuaga mulimuli na faia e Iesu ma ona aposetolo, na ia faamamafa ai lenei mea, i lona faapea atu: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) E toatele tagata sa latou muai mautinoa faapea o loo faia e Molimau a Ieova le Faa-Kerisiano moni ina ua latou auai i se sauniga i le Maota o le Malo pe na ō atu foi i se tauaofiaga e sili ona tele. Sa latou matauina le faatinoina ai o le alofa ma e ala i lenei mea na latou iloa ai, sa latou i ai i totonu o soʻo moni o Keriso.
2. O le ā na fai mai ai le aposetolo o Paulo e tusa ai ma le alofa, le faailoga e faaesea ai le Faa-Kerisiano?
2 Ua tatou olioli uma ona o le matauina o lenei faailoga tutasi o le Faa-Kerisiano moni i totonu o tagata o Ieova i aso nei. A e ui i lea, i le pei o uluai Kerisiano, tatou te iloa ai e tatau ona tatou saili e lē aunoa i auala atili e faaalia ai le talisapaia mo o tatou uso. Na tusi Paulo i le faapotopotoga i Tesalonia: “Ia faatele foi e le Alii, ma ia faasilisili ona tele o lo outou alofa, o le tasi i le tasi.” (1 Tesalonia 3:12) E mafai faapefea ona faateleina lo tatou alofa o le tasi i le tasi?
Alofa ma le Faalogona Mafana Faaleuso
3. E faaopoopo atu i le ola i se olaga mamā, o le ā na fai mai ai le aposetolo o Peteru sa manaomia mo Kerisano?
3 I se tusi faalauaitele na tusi atu i faapotopotoga Kerisiano i Asia Itiiti, na tusi atu ai le aposetolo o Peteru: “Ina ua outou faamamā nei i o outou solu [po o ola] i lo outou usiusitai atu i le upu moni ma le faalogona mafana faaleuso [phi·la·del·phiʹa] lē faatagafai o le iʻuga, ia matuā fealofani [se ituaiga o a·ga·paʹo] lotulotu ai outou mai le loto.” (1 Peteru 1:22, NW) Ua faaalia e Peteru faapea e lē lava le na ona faamamāina o o tatou olaga. O lo tatou usiusitai i le upu moni, e aofia ai ma le poloaiga fou, e tatau ona iʻu i le faalogona mafana faaleuso lē faatagafai ma le alofa lotulotu o le tasi i le tasi.
4. O ā fesili e ao ona tatou fesili ai, ma o le ā fa a Iesu e tusa ai ma lenei mea?
4 Pe o lo tatou alofa ma lo tatou talisapaia o o tatou uso e mafuli atu ona faaalia i na o i latou tatou te fiafia i ai? Pe o tatou naunau e lima foai ia i latou nei, i le lē matauina o o latou sese, a e vave tele ona tatou matauina sese ma mea ua lē taulau ai o isi o ē tatou te lē masani ona i ai faalogona vavalalata i ai? Na fetalai Iesu: “Afai tou te alolofa [se ituaiga o a·ga·paʹo] atu i e ua alolofa mai ia te outou, se a ea se taui tou te maua ai? e le o faia ea e le au telona o lea lava mea?”—Mataio 5:46.
5. O le ā le faaeseesega ua faia e se tagata aʻoga o le Tusi Paia i le va o le upu Eleni ua faauigaina i le “alofa” ma lea ua faauigaina i le “faalogona mafana”?
5 I lana tusi New Testament Words, na faia ai e Polofesa William Barclay faamatalaga nei o loo mulimuli mai i le upu Eleni ua faaliliuina i le “faalogona mafana” ma lea ua faaaogāina o le “alofa”: “E i ai se mafana matagofie e uiga i nei upu [phi·liʹa, o lona uiga “faalogona mafana,” ma o le veape e fesootai ai, phi·leʹo]. O o la uiga o le vaavaai atu i se tasi ma le vaaiga faalogona mafana. . . . I lona tulaga sili ona taatele, o upu masani o le F[eagaiga] F[ou] mo le alofa o le nauna agapē ma le veape agapan. . . . O le philia sa o se upu manaia, a e sa manino lava o se upu o le mafana ma le vavalalata ma le faalogona mafana. . . . O le agapē e faasino i le mafaufau: e lē na o se faalogona ootia e faafuasei e leʻi faatalitalia i o tatou loto; o se mataupu silisili o loo tatou ola ai ma le loto i ai. O le agapē e sili ona faasino i le finagalo. O se faatoilaloina, o se manumalo, o se mea ua ausia. E leai lava se tasi e masani ona alofa i ona fili. O le alofa o se tasi i ona fili o se faatoilaloina lea o o tatou faanaunauga faalogona ootia faalenatura uma. O lenei agapē . . . o le mea moni o le malosi e faatino ai le alofa i ē e lē mafai ona alolofa i ai, o le alofa i tagata tatou te lē fiafia i ai.”
6. (a) O ā fesili e iloiloina ai e tatau ona tatou fesili ifo ai ia i tatou lava? (e) E tusa ai la ma le faamatalaga a Peteru, ai se ā e lē mafai ai ona faagata mai lo tatou lagona mafana faaleuso ia i latou e masani ona tatou tosina atu i ai?
6 I le faamolemolega e faapea ua faatagaina i le Tusi Paia le i ai o ni o tatou faalogona mafana mo nisi uso na i lo isi, pe ua tatou mafuli atu ea e fatuina se faamatalaga e taʻusaʻoina ai o tatou faalogona? (Ioane 19:26; 20:2) Pe o tatou manatu ea e mafai ona tatou faaali atu se “alofa” maalili, ma na o le mafaufau, i nisi ona e tatau ona tatou faia faapea, a e o loo tatou tuuina atu faapitoa le faalogona mafana lava faaleuso mo i latou o tatou tosina atu i ai? Afai o tatou faia faapea, tatou te lē o maua la le manatu autū o le apoapoaiga a Peteru. E leʻi lava la le faamamāina o o tatou solu e ala i lo tatou usiusitai atu i le upu moni, auā fai mai Peteru: “Ina ua outou faamamāina ai nei o outou solu e ala i lo outou usiusitai i le upu moni seia oo ina ia te outou le lagona mafana faamaoni agaʻi i o outou uso Kerisiano, ia fealofani ai outou ma le loto atoa ma lo outou malosi uma lava.”—1 Peteru 1:22, The New English Bible.
“Faalogona Mafana Faaleuso Lē Faatagafai”
7, 8. O le ā le pogai o le upu ua faaliliuina i le “lē faatagafai,” o lea, ai se ā ua faaaogā ai e Peteru lenei faaupuga?
7 Sa faaauau atili le faamatalaga a le aposetolo o Peteru. Fai mai o ia, o lo tatou faalogona mafana faaleuso e tatau ona lē faatagafai. O le upu ua faaliliuina i le “lē faatagafai” e sau mai le ituaiga tuufaafeagai o se upu Eleni sa faaaogāina mo tagata e faatinoina ata i pulelaa o ē tautatala mai ma o latou foliga e ufiufi i mata pulepule. O lenei faiga ua mafai ai ona latou faatinoina nisi o tagata eseese a o faia se tala. Ona maua lea e le upu le uiga faafaatusa o le faatagafai, faafoligaese, po o le faatagā faafoliga.
8 O faapefea o tatou faalogona loloto i totonu o o tatou loto faatatau i nisi o uso ma tuafafine i le faapotopotoga? Pe tatou te faafeiloaia i latou i sauniga i se ʻataʻata e faamalosia, a e vave ona tilotilo ese pe alu i se isi mea? O le mea e sili ai ona leaga, pe tatou te taumafai e aloese mai le faafeiloaia o i latou? Afai e faapea, o le ā la e mafai ona fai atu e uiga i lo tatou “usiusitai atu i le upu moni” lea e tatau ona faamamāina ai o tatou solu e oo atu lava i le i ai o le faalagona mafana faamaoni agaʻi i o tatou uso a Kerisiano? I le faaaogāina o upu “lē faatagafai,” ua faapea mai Peteru o o tatou faalagona mafana mo o tatou uso, e lē tatau ona faatagā faafoliga atu. E tatau ona moni, lagona mai le loto.
“Matuā Fealofani Lotulotu . . . mai le Loto”
9, 10. O le ā na uiga i ai Peteru ina ua ia faapea mai e tatau ona tatou fealofani “lotulotu” pe ia “faalautele atu”?
9 Ua faaopoopo mai Peteru: “Ia matuā fealofani lotulotu [i le uiga moni, “faalautele atu”] ai outou mai le loto.” E lē o manaomia ai le faalautele atu o le loto e faaalia le alofa ia i latou e masani ona tatou te fiafia i ai ma ē e toe taui mai. A e ua fai mai Peteru ia i tatou ina ia alolofa “faalautele atu” o le tasi i le tasi. Pe a faaalia i totonu o Kerisiano, o le alofa a·gaʹpe e lē na o se alofa faalemafaufau pe na ona mafaufauina e pei o lea e tatau ona lagona ai mo o tatou fili. (Mataio 5:44) O se alofa lotulotu ma e manaomia ai ni taumafaiga. E aafia ai le faalautele atu o o tatou loto, ia faasalafa atu ina ia mafai ona latou opoopo mai tagata o ē e lē masani ona tatou tosina atu i ai.
10 I lana tusi Linguistic Key to the Greek New Testament, ua faaopoopo mai ai Fritz Rienecker i le upu ua faaliliuina i le “lotulotu,” po o le “faalautele atu,” i le 1 Peteru 1:22. Ua ia tusi ai e faapea: “O le manatu faavae ia pulunaunau, maelega (le faia o se mea e lē manatu māmā i ai . . . a e ia pei o faia m[a] le oono) (Hort).” O le oono, o se tasi o ona uiga, “ia fālō i le lautele e gata mai ai.” O le alofa lotulotu o le tasi i le tasi mai le loto, o lona uiga la ia tatou matuā faamalosi i se tulaga aupito sili i a tatou taumafaiga ia maua le faalagona mafana faaleuso mo a tatou aumea Kerisiano uma lava. Pe ua tumu nauā o tatou faalogona mafana faapelepeleina ua leai ai se avanoa mo nisi o o tatou uso ma tuafafine? Afai o faapena, e tatau ona tatou faasalafa atu.
“Faasalafa Atu”
11, 12. (a) O le ā le fautuaga na tuuina atu e le aposetolo o Paulo i Kerisiano i Korinito? (e) Na faapefea ona faataatia e Paulo se faaaʻoaʻoga lelei e tusa ai ma lenei mea?
11 E manino lava sa lagona e le aposetolo o Paulo le manaomia o lenei mea i le faapotopotoga i Korinito. Na ia tusi atu i Kerisiano i inā: “Outou Korinito e, ua matou matuā tautala atu ia te outou, ua faasalafa atu o matou loto. Ua lē tumu nauā outou mo se avanoa i totonu ia te i matou, peitai ua faatumuina e outou lava le avanoa i o outou lava faalogona mafana faapelepeleina. O lea, ina ia outou toe taui atu—ou te tautala atu ia te outou e faapei o fanau—ina faasalafa atu foi ia o outou.”—2 Korinito 6:11-13, NW.
12 E mafai faapefea ona faasalafa atu o tatou loto ina ia aofia uma ai o tatou uso ma tuafafine? Na faataatia e Paulo se faaaʻoaʻoga lelei e tusa ai ma lenei mea. Sa iloga lava lona sailia o mea aupito sili i ona uso, ma sa ia manatua i latou e lē i mea ua latou lē taulau ai, a e i o latou uiga lelei. Ua faataʻitaʻia mai e le mataupu faaiʻu o lana tusi i Kerisiano i Roma lenei mea. Seʻi o tatou iloiloina le Roma mataupu e 16 ma vaai pe ua faapefea ona faaatagia ai le uiga mautinoa o Paulo agaʻi i ona uso ma tuafafine.
Talisapaia Mafana
13. Na faapefea ona faaalia e Paulo lona talisapaia mo Fipe, ma ai se ā?
13 Na tusia e Paulo lana tusi i tagata Roma mai Korinito pe ā ma le tausaga e 56 T.A., i le taimi o lana malaga faamisionare lona tolu. Ua foliga mai na ia tuuina atu le tusi i le tausiga a se fafine Kerisiano e igoa ia Fipe, o se tagata o le faapotopotoga e latalata ane o Kenikerea, o lē sa malaga atu i Roma. (Faitau Roma 16 fuaiupu 1, 2.) Matau le auala mafana na ia taʻuleleia atu ai o ia i le au uso i Roma. I se tasi po o se isi auala na ia puipuia ai le toatele o Kerisiano, e aofia ai ma Paulo, atonu pe o taimi o a latou femalagaiga e ala i i le taulaga pisi o vaa o Kenikerea. Ona o se tagata agasala e lē lelei atoatoa, e pei lava o isi tagata ola uma, e lē taumatea sa i ai foi ni vaivaiga o Fipe. A e na i lo o le lapataia o le faapotopotoga i Roma e uiga i ni sese o Fipe, sa faatonu atu e Paulo ina ia “talia o ia e outou i le Alii, faapei ona tatau i le au paia.” Maeu se uiga lelei ma le mautinoa!
14. O ā mea agalelei na fai mai ai Paulo e uiga ia Pisila ma Akula?
14 Mai le Roma 16 fuaiupu e 3 e oo i le 15, o loo aauina atu ai e Paulo ni alofaaga i le sili atu i le 20 Kerisiano i le taʻua o o latou igoa ma le toatele lava o isi sa taʻua taitoatasi pe taʻua toatele foi. (Faitau Roma 16 fuaiupu e 3, 4.) Pe e mafai ona e logona le faalogona mafana faaleuso na lagona e Paulo mo Pisila ma Akula? Sa tuuina atu e lenei ulugalii i laua i se tulaga lamatia mo Paulo. O lea na ia ofoalofa atu ai ia te i laua nei o ē na galulue faatasi ma ia ma le loto faafetai ma auina atu ia i laua se upu faafetai e fai ma sui o faapotopotoga o Nuu Ese. Maeu le faalaeiauina na ia Akula ma Pisila ona o nei alofaaga mai le loto!
15. Na faapefea ona faaalia e Paulo lona lima foai ma le loto maulalo ina ua ofoalofa atu ia Aneroniko ma Iunia?
15 Sa oo ina avea Paulo ma Kerisiano tuutoina i le pe ā ma le tausaga pe lua foi talu ona maliu Keriso. I le taimi na tusia ai lana tusi i tagata Roma, a e ua faaaogāina o ia e Keriso e avea ma aposetolo lauiloa i nuu mo le tele o tausaga. (Galuega 9:15; Roma 1:1, 11:13) Peitai, seʻi matau lona lima foai ma le loto maulalo. (Faitau le fuaiupu e 7.) Sa ia ofoalofa atu ia Aneroniko ma Iunia e pei o tagata “ua logoleleia i laua e aposetolo [o ē na aauina atu]” ma na ioeina faapea ua leva ona la auauna ia Keriso i lo o ia. E leai lava se faailoga o se matauʻa ona o mea iti i inā!
16. (a) O ā faaupuga alofa na tautala i ai Paulo e uiga i isi Kerisiano sa nonofo i Roma? (e) Ai se ā tatou te mautinoa ai faapea o nei alofaaga o ni faaaʻoaʻoga o le “faalogona mafana faaleuso lē faatagafai”?
16 E itiiti pe leai foi so tatou iloa e uiga i na uluai Kerisiano e pei o Epaineto, Amepelia, ma Sataku. (Faitau Roma 16 fuaiupu e 5, 8, 9.) Peitai, i le na o le auala lava na ofoalofa atu ai Paulo ia te i latou uma nei e toatolu, ua mafai ai ona tatou mautinoa faapea sa o i latou o ni tagata faamaoni. Na matuā avea i latou lava ma pele ia Paulo o lea na ia taʻua ai i latou taitoatasi “o le pele a aʻu.” Sa i ai foi ni upu agalelei a Paulo ia Apele ma Rufo, sa faasino atu taitoatasi ia i laua o lē “ua taʻuleleia o ia o ia Keriso,” ma lē “na filifilia e le Alii.” (Faitau Roma 16 fuaiupu e 10, 13.) Maeu ni upu faamalō e taui atu ai i nei Kerisiano e toalua! Ma i le iloa o le tautala saʻo o Paulo, ua tatou mautinoa ai ua lē na o ni faaupuga faaaloalo ona o le aganuu. (Faatusatusa 2 Korinito 10:18.) I le ma lea foi, sa leʻi faagaloina e Paulo ona alofa atu i le tinā o Rufo.
17. Na faapefea ona faaalia e Paulo lona talisapaia loloto mo ona tuafafine?
17 Ua aumaia ai tatou e lena mea i le talisapaia e Paulo o ona tuafafine. E faaopoopo atu i le tinā o Rufo, na taʻua ai e Paulo e lē itiiti ifo i le toaono o isi fafine Kerisiano. Ua uma ona tatou iloa le auala na ia tautala ai ma le agalelei ia Fipe ma Pisila. Peitai, seʻi matau po o le ā le lagona mafana lava faaleuso na ia ofoalofa atu ai ia Maria, Tufaina, Tufosa ma Peseti. (Faitau Roma 16 fuaiupu e 6, 12.) E mafai e se tasi ona lagona le tosina atu o lona loto i nei tuafafine galulue malolosi o ē ‘na galulue tele’ mo o latou uso. Maeu se atiina aʻe ai i le vaai atu i le talisapaia loloto e Paulo mo ona uso ma tuafafine, e ui i o latou lē lelei atoatoa!
E Lē Masalosalo i Pogai o Gaoioiga a o Tatou Uso
18. E mafai faapefea ona tatou taumafai e faaaʻoaʻo ia Paulo, peitai o le ā atonu e manaomia ona fai?
18 Ai se ā e lē faaaʻoaʻo ai ia Paulo ma taumafai e saili se mea lelei e fai atu ai e uiga i uso ma tuafafine uma i le faapotopotoga? Mo nisi, o le a matuā leai lava se faigata. A e mo isi, atonu e manaomia ai sina sailiiliga itiiti. Ai se ā ea e lē taumafai ai e faaalu sina taimi ma i latou ina ia mafai ai ona e iloa e sili ona lelei i latou? E mautinoa o le a e mauaina ai ni uiga e alofagia ia i latou, ma o ai na te iloa, atonu o le a oo ina sili atu ona latou talisapaia oe na i lo o aso ua mavae?
19. Ai se ā e lē tatau ai ona tatou masalosalo i pogai o gaoioiga a o tatou uso, ma e faapefea ona faataatia e Ieova se faaaʻoaʻoga lelei mo i tatou o le alofa?
19 E lē tatau ona tatou masalosalo i pogai o gaoioiga a o tatou uso. Latou te alolofa uma lava ia Ieova; auā ana lē faapena, po ua lē tuuina atu o latou olaga ia te ia. Ma o le ā o puipuia i latou mai le toe foi atu i le lalolagi, ma mulimuli atu i ona ala faigofie ona uia? O lo latou alofa mo Ieova, lana amiotonu, ma lona Malo i lalo o Keriso. (Mataio 6:33) A e peitai, i auala eseese, o loo latou tau uma ai se taua fitā ina ia tutumau ai i le faamaoni. O loo alofagia i latou e Ieova ona o lenei mea. (Faataoto 27:11) O loo ia talia i latou e avea o ana auauna e ui lava i o latou sese ma mea ua lē taulau ai. Ona o lea le tulaga, o ai i tatou tatou te mumusu ai e faaaofia i latou i o tatou faalogona mafana faapelepeleina?—Roma 12:9, 10; 14:4.
20. (a) E tusa ai ma le tusi a Paulo i tagata i Roma, ua na o ai e tatau ona tatou masalosalo i ai, ma o le taʻitaʻiga a ai e mafai ona tatou mulimuli i ai ma le saogalemu e tusa ai ma lenei mea? (e) Ana lē o lea, e ao faapefea ona tatou manatu i o tatou uso uma?
20 E pau lava i latou na lapataia ai i tatou e Paulo ina ia tatou masalosalo i ai, o i latou ia “e faatupu fevaevaeaiga, ma mea e tausuai ai,” ma i latou e gaoioi “e le tusa ma le mataupu ua aʻoaʻoina ai outou.” Fai mai Paulo ia tatou mataala ia i latou na ma aloese ai. (Roma 16:17) Ua uma ona taumafai toeaina o le faapotopotoga e fesoasoani ia i latou nei. (Iuta 22, 23) O lea e mafai ona tatou faalagolago i toeaina e logoina mai i tatou pe afai e manaomia ona aloese mai tagata faapena. Ana lē o lea, e tatau ona tatou manatu i o tatou uso uma ua onomea i ai le faalogona mafana faaleuso lē faatagafai, ma e tatau ona tatou aʻoaʻoina ina ia tatou alolofa lotulotu atu ia i latou mai le loto.
21, 22. (a) O le ā o taatia mai i o tatou luma? (e) O ā tulaga atonu o le a mapuna aʻe, o lea o le ā le mea e sili ona fetaui le taimi nei ina ia faia? (i) O le ā o le a iloiloina i le isi mataupu o sosoo mai?
21 O loo faasagatau mai Satani, o ana temoni, ma lana faiga aoao faalelalolagi o mea ia i tatou. O loo i o tatou luma Amaketo. O le a faapaina e le osofaiga a Koku o Makoku. (Esekielu, mataupu 38, 39) I le taimi lena, o le a sili atu ona tatou manaomia ai o tatou uso na i lo muamua. Atonu o le a tatou iloa e manaomia se fesoasoani mai ia i latou lava ia o ē tatou te lē matuā talisapaia. Pe o i latou lava nei o le a latou matuā manaomia la tatou fesoasoani. O le taimi lenei e faasalafaina atu ai ma faateleina lo tatou talisapaia mo o tatou uso uma.
22 O le mea moni, o le talisapaia o o tatou uso e aofia ai le faaaloalo tatau mo toeaina o le faapotopotoga. E tusa ai ma lenei, e tatau lava foi i toeaina ona avea ma faaaʻoaʻoga lelei i le faaalia o le talisapaia e lē gata mo uso uma lava a e faapea foi ma o latou uso toeaina. O lenei vala o le mataupu o le a talanoaina i le mataupu o sosoo mai.
Manatu mo le Autaluga
□ O le ā le faailoga e faaesea ai le Faa-Kerisiano moni?
□ Ai se ā e manaomia uma ai le alofa ma le faalogona mafana faaleuso?
□ E mafai faapefea ona tatou fealofani “lotulotu,” pe ia “faalautele atu”?
□ I le Roma mataupu e 16, na faapefea ona faaalia e Paulo lona talisapaia mo ona uso ma tuafafine?
□ Ai se ā e lē tatau ai ona tatou masalosalo i pogai mo gaoioiga a o tatou uso?
[Ata i le itulau 25]
Taumafai ia iloa uiga alofagia ia i latou e lē masani ona e tosina atu i ai