Papelonia—Le Ogatotonu O Tapuaiga Sese

“UA paʻū, ua paʻū Papelonia; o tupua uma foi a ona atua ua ia tuʻipalaina i le eleele.” O le ā le ituaiga o aai sa uiga i ai Papelonia lea na valoia e Isaia? O se taʻiala tāua lena i lo tatou malamalamaga faatatau i le uigaese o Papelonia le Aai Tele i ona po nei.—Isaia 21:9.

Sa matauina Papelonia anamua ona o lana tapuaiga i atua faanuupo ma atua fafine. I lana tusi Babylonian and Assyrian Religion, ua taʻua ai e Polofesa S. H. Hooke: “O Papelonia o le aai na umia ai e Matuka le tulaga sili i le va ma isi atua o ē na tapuaia i inā. . . . Sa i ai i Papelonia i le taimi o Nepukanesa II e lē itiiti ifo ma le lima sefuluvalu malumalu e ō atua na filifilia, a e lē taʻua ai isi mau malumalu e tele e leʻi tofiaina faapena. O le mea lea, ua mafai ai ona vaaia le tele o se vaega ua faia e le vasega o faifeau i le olaga o se aai tele.” Sa taʻua e faapea o le malumalu a Matuka i Papelonia e i ai ni ona falesa e 55 e faaopoopo i ai. Maeu se faamanatuina mai ai o malumalu e tele, o falelotu, ma falesa i aso nei o loo i ai ni falesa faaopoopo mo atua ua faaitiitia, o tagata paia, ma Faatusa o Maria!

Sa avea Papelonia ma ogatotonu o tapuaiga i faatusa i le au tapuai i atua. Ua taʻua e se tasi tala e faapea o ositaulaga ma ē faamaoni “sa masani ona uaʻi atu ma le naunau tele i a latou faatusa paia, na manatu i tupua o ni puluvaga i le va ma atua. Sa ufitia tupua i ofu talaloa taugata, teuteuina i ula, o taulima, ma mama; latou te tietie i luga o moega sili ona taugata ma na feaveaia i ni solo maopoopo i luga o le laueleele ma vai i savaliga, i taavale ma vaa a tagata taitoatasi.”a Maeu le tali tutusa o le tapuaiga ua tuuina atu i atua, o tagata paia, ma Faatusa o Maria i le faa-Hinitu, faa-Puta, ma faa-Katoliko i ona po nei, i le faapea foi ona faasavalia a latou faatusa i ala tetele ma vaitafe ma le sami!

E avea o se faaaʻoaʻoga atili o le tulaga tutusa i le va o Papelonia anamua ma lotu i ona po nei, seʻi manatunatu i le faamatalaga o loo mulimuli mai na aumaia mai le encyclopedia lava e tasi: “E valaauina o ia e ana tagata talitonu faamaoni i igoa sili ona pele: E lē gata o ia o le atua fafine ma o le tamaitai a e faapea foi ma le tinā alofa mutimutivale, o ia o lē faafofoga i tatalo, o ia o lē avea ma puluvaga . . . o ia o lē na aumaia le ola i le vateatea ma le fanau a tagata.” Faatusatusa lena i le tatalo o mulimuli mai, mai le El Santo Rosario (O le Losalio Paia): “Matou te avatu ia te oe le faafetai, o le Purinisese Silisiliese, ona o mea lelei matou te maua mai i aso taitasi mai lou aao foai; ia e agalelei, le Tamaitai e, ia matou tumau pea i lalo o lau puipuiga ma lau faamalumaluga nei e oo i le faavavau.”

O ai le autū o lenei faamatalaga ma le tatalo? O le a manatu loa le toatele, “O le Taupou o Maria.” Ua afa saʻo lena tali. O le tatalo o loo ofoina atu ia Maria. A e peitai, e pei ona logoina mai e Las Grandes Religiones Ilustradas ia i tatou, o le faaupuga sii muamua o se faamatalaga o Ishtar [Eseta], o le “Tamaitai o le Alofa,” o le atua fafine o le fanautama, o le alofa ma taua a Papelonia. O nisi taimi ua faaataina ai o ia i faatusa “o se tinā o loo faasusuina lana pepe tama.”b O se isi faaaʻoaʻoga lea o le faapefea i lotu i ona po nei ona lē mamao ese mai Papelonia anamua!

E mafai foi ona tatou maua se faatusatusaga i le va o Papelonia anamua ma ona manatu e uiga i le solu o le tagata ma ona tasitolu o atua, ma i aso nei, i le faatusatusaga tali tutusa o manatu foi faapena e uiga i le solu e lē mafai ona oti ma ona tasitolu o atua o lotu i ona po nei. Ua faamalosia e faamaoniga lo tatou malamalamaga e faapea o “Papelonia le Aai Tele” o se faailoga talafeagai lelei o le emepaea o le lalolagi o lotu sese a Satani.

O Papelonia—Le Fili Faamaualuga o le Tapuaiga Moni

Sa avea foi Papelonia ma fili faamaualuga o tagata o Ieova anamua, o Isaraelu, ma o sē sa inoino i la latou tapuaiga moni. Sa faaumatia e Papelonia le malumalu i Ierusalema i le 607 T.L.M., na aveesea uma ipu tāua o le tapuaiga ia Ieova, ma faaaogā i se auala eleelea nei ipu i le faigaai a Pelesara.—Tanielu 5:3, 4.

Ua faapea foi, ia Papelonia le Aai Tele i ona po nei ona avea ma sē tetee pea i le tapuaiga moni. I le tele o taimi na faasauāina ai Molimau a Ieova, e faatupuina e taʻitaʻi lotu, e masani lava e auala i a latou auaufaatasiga ma pule faapolotiki.

O se tasi faaaʻoaʻoga manino o teteega e faagaeeina e taʻitaʻi lotu e oo atu i tuā lava i le 1917, ma faapea ona toe faia ai lea faiga mai lea taimi i lea taimi. I lena tausaga na lomia ai e le Tagata Aʻoga Faavaomalo o le Tusi Paia, e pei ona sa lauiloa ai Molimau i na vaitaimi, le tusi The Finished Mystery. O ni nai itulau o lenei tusi sa faamatalaina e taʻitaʻi lotu i Kanata ma le Iunaite Setete e faapea o ni faamatalaga e foua ai, o ē o ō latou atunuu sa aafia i fetauaiga i le Taua I a le Lalolagi. Sa faavavevave ona latou logoina a latou manamea faapouliuli faapolotiki e uiga i lenei lomiga. O le iuga? E tusa ai ma le polofesa o Martin Marty, i lana tusi Modern American Religion—The Irony of It All: “Sa faasagatau taʻitaʻi lotu i le au faa-Russell [Molimau] ma alalaga fiafia ina ua faalogo faapea e lua sefulu tausaga o le faasalaga [ona o le tala faapea e fouvale] sa tuuina atu i taʻitaʻi o Molimau a Ieova ua faasalaina.”

A e peitai o le ā le tali atu a taʻitaʻi lotu i ni nai masina mulimuli ane ai ina ua faasaolotoina na taʻitaʻi mai moliaga? “Sa leai ni alaga fiafia mai suli o lotu masani ai.” Sa tutū toatasi Molimau mo mataupu silisili o le Tusi Paia “e oo atu i le tulaga sa latou avea ai la latou tapuaiga ma mea inosia o le malo tele.” Sa lē loto malilie Molimau ma e leʻi taitai lava loto malilie e avea ma aumea soona loto maulalo atili a taʻitaʻi faapolotiki, e oo lava i lalo o pulega faa-Nasi i Siamani po o lalo o pule faa-Fascist i Italia, Sepania ma Potukale.

Taʻuleagaina ma Faamaina Papelonia

Maeu la le talafeagai, ina ua taʻua e le Faaaliga e faapea o Papelonia le Aai Tele ua “onā i le toto o le au paia ma le toto o e na molimau ia Iesu” ma ‘ua iloa foi ia te ia le toto o perofeta ma le au paia, ma i latou uma ua fasiotia i le lalolagi.’ O le nofosala o lotu a le lalolagi i le toto ona o le auai ma le tiotio po o le manatu e leai se afaina o taua ma le sauaina o Kerisiano moni e mafai ona faamaonia i le faagasologa mai o senituri.—Faaaliga 17:6; 18:24.

Ua olioli Papelonia le Aai Tele, o le emepaea o le lalolagi o lotu sese, i le mau mea taugata ma le pule i le faagasologa mai o tala faasolopito. A e peitai na lapataia Ioane e se agelu e faapea o le a oo mai le aso a le fafine talitane sili. Ua taʻu mai e le tala ia i tatou: “Ua matuā alaga foi o ia ma le leo tele, ua faapea ane, Ua paū, ua paū Papelonia le Aai Tele, ua avea foi o ia ma mea e nofo ai temoni, ma mea e puipui ai agaga leaga uma, o le mea foi e puipui ai manu felelei uma e leaga ma le inosia.”—Faaaliga 18:2.

O afea o le a paʻū ai Papelonia? Pe ua uma lona paʻū? I le ā le auala e pagatia ai o ia i se paʻū? Ma e aafia faapefea ai oe i lena mea? O nei fesili ma isi e fesootai i ai o le a taliina i le isi lomiga e sosoo mai o Le Olomatamata.

[Faaopoopoga i lalo]

[Ata i le itulau 8, 9]

E i ai aa o Papelonia le Aai Tele i lotu faa-Papelonia anamua