Pe Tosina Oe i le Lelei o le Atua?

E IAI sau uo vavalalata? Afai e iai, pe sa e toe manatunatu ea i le pogai na tosina ai oe i lena tagata? Pe ona o ona foliga ea? Pe ona o le mea moni faapea e tutusa mea na lua naunau i ai? Pe ona o uiga e sili ona loloto, e pei o le agalelei po o le atamai? Afai o le lelei, o le uiga lena na faamautu ai le lua faigauo, ua lua maua moni la se faiā faaʻoaina. I aso nei, ua seāseā ona maua ai le lelei moni ona, i le vaega aupito sili, o tagata “ua aunoa ma se naunau i le lelei.”—2 Timoteo 3:3, NW.

Mo se Kerisiano, o le faiā e aupito sili ona tāua i le olaga e lē o se faiā ma se tasi tagata ae o le faiā ma le Atua. O lea pe a e manatunatu i lenei faiā, pe sa e manatunatu ea: ‘Po o lē fea o uiga o le Atua ua sili ona tosina atu ai aʻu i le Atua?’

Uiga Autū o le Atua

O le mea moni, ua faamatalaina e le Tusi Paia le tele o uiga matilatila o le Atua. E masani lava o uiga e fa na o loo faatāuaina, o lona alofa, lana faamasinoga tonu, lona atamai, ma lona malosi uma lava. (Teuteronome 32:4; Iopu 12:13; Salamo 147:5; 1 Ioane 4:8) Afai e tatau ona tatou filifili mai i nei uiga matilatila e fa, atonu o le a tatou faapea atu o le alofa o le Atua na sili ona tosina ai i tatou. Ae peitai, o le fesootai vavalalata ma lona alofa, o lona uiga sili lea o lona lelei. Na sologa lelei ona tusia e tusitala o le Tusi Paia e uiga i lenei mea, ma o lea lelei e mafai ona tataʻiina ai tagata i se faiā soifua maloloina, fiafia ma Lē na Foafoaina i latou.

Mo se faaaʻoaʻoga, i le faaiʻuiʻuga o le senituri lona ono T.L.M., na alaga ai le perofeta o Sakaria e uiga ia Ieova: “Auā ua tele naua lona lelei, e tele naua lona matagofie.” (Sakaria 9:17) I le tele o tausaga a o leʻi iai Sakaria, sa faapena foi ona viiviia ai e Isaia le Atua ina ua ia tusi: “Ou te vivii i le alofa o Ieova, . . . ma lona agalelei tele lava i le aiga o Isaraelu.”—Isaia 63:7.

I le tolu o senituri muamua atu, na tusi ai le Tupu o Tavita i se uiga e matuā faagaeetia ai e uiga i le lelei o le Atua. Na tusi Tavita mai mea na oo ia te ia, i lona olioli i lenei lelei i lona olaga atoa. Sa matuā sili ona lelei le Atua ia Tavita,ae maise lava ina ua mavae ana agasala matuiā e fesootai atu ma Patesepa ma lana tane o Uria, ina ua faaalia e le Atua ia te ia le alofa mutimutivale. (2 Samuelu 12:9, 13) I le Salamo 31:19, na faalauiloa ai ma le talisapaia e Tavita faapea: “Ua tele lava lou agalelei ua teua e oe mo e ua matatau ia te oe.”

Pe tāua ia te oe le lelei o le Atua i le tele e pei ona sa faia e na tagata tapuai anamua? Afai o lea, o le a e tofo la i le “manuia foi mai le Atua, o loo silisili lava i mea uma e manatu i ai,” faapea foi ma le uunaia loloto e faia le finagalo o le Atua i taimi uma lava. (Filipi 4:7) Seʻi tatou iloiloina nei mo ni nai minute po o le ā e aofia ai i le lelei o le Atua ma maeu le ofoofogia o lona lautele atu. O le a mautinoa lava le faalolotoina ai e lenei mea o lo tatou talisapaia mo lo tatou Tamā alofa faalelagi.