Ua Tatalaina se Mea Lilo Paia

“E moni, e sili lava le mea lilo paia o lenei tuutoina i le Atua.”—1 TIMOTEO 3:16, “NW”.

1. O le ā le mea lilo o loo faamatalaina i le 1 Timoteo 3:16?

PE TE fiafia i mea lilo? E te olioli ea e suesue i mea lilo? O le toatele o i tatou e faapea! O lea, ia aufaatasi ma i matou a o tatou iloiloina se tasi o mea lilo aupito sili i mea lilo uma—o se mea lilo sa taofia i le Afioga a le Atua mo le faitau afe o tausaga. O lenei mea lilo paia matuā tāua ua aafia ai o tatou ola, i le taimi nei atoa foi ma le lumanai. O le ‘mea lilo paia lea o le tuutoina i le Atua,’ na faamatalaina mo i tatou i le 1 Timoteo 3:16. Maeu le loto faafetai e ao ona ia i tatou mo Ieova, “o le na te faaalia mea ua lilo,” mo le faailoa mai ma le alofa mutimutivale ia i tatou o lenei mea lilo sa natia ma lona faamatalaina!—Tanielu 2:28, 29.

2. (a) O anafea na uluai fetalai ai Ieova e uiga i se mea lilo paia, ma o le ā na ia folafolaina mai i lea taimi? (e) O ā fesili e manaomia ona taliina?

² Sa muai fetalai le Atua e uiga i se mea lilo paia ina ua uma ona faaseseina e le gata o Eva, ma na mulimuli atu ai Atamu ia te ia i le fouvalega. Ona folafola mai lea e le Atua faapea o le “fanau,” o le a na tuʻimomomoina le ulu o le Gata. (Kenese 3:15) O ai lenei Fanau? O le ā faapefea ona ia manumalo i le Gata? Pe o le a ia taʻuamiotonuina le faamaoni o le Atua ma Lana fuafuaga agaʻi i lenei lalolagi?

3. O valoaga tauatua na saunia ai ā faamaoniga i le faailoaga ma gaoioiga a le Fanau?

³ I le gasologa o taimi, na faaalia ai e valoaga tauatua faamaoniga faatatau i le faailoaga ma gaoioiga i le lumanai a le Fanau. O le a avea o ia o se fanau a Aperaamo, o le a maua e ia le malo o Tavita, ma o le a taʻua o le Perenise o le Filemu. ‘O le a leai se mea e gata mai ai le tele o le pule a lona malo, ma le filemu o lona malo.’ (Isaia 9:6, 7; Kenese 22:15-18; Salamo 89:35-37) Ae e pei ona taʻua i le Roma 16:25 e faapea, o lena mea lilo paia sa “natia i tausaga o le vavau.”

Faaalia o le Mea Lilo

4. Na faapefea ona amata ona tatalaina le mea lilo paia i le 29 T.A.?

⁴ I le faaiʻuga, ina ua mavae meleniuma e fa, na sasao mai ai le faamalamalamaina. I le ā le auala? I le 29 T.A., na papatiso ai e Ioane Iesu le Nasareta i le vaitafe o le Ioritana, ma mai le lagi na folafola mai ai le siufofoga o le Atua: “O loʻu Atalii pele lenei, o lē ua ou faamaonia.” (Mataio 3:17, NW) Oi, o lenei ua oo mai le Fanau folafolaina! Le mea lilo paia ua amata ona tatala ai i ona tafa mamalu eseese uma, e aofia ai le mataupu o le tuutoina i le Atua.

5. O le ā le “tuutoina i le Atua,” ma ua faapefea ona ia faaaafia i latou o ē faia?

⁵ O le ā la tatou malamalamaga e uiga i le “tuutoina i le Atua”? I le Tusi Paia Kerisiano Eleni, o loo maua ai na o le faa 20 taimi lenei faaupuga, e sili atu na i lo le afa o lenei faaupuga i tusi e lua a Paulo ia Timoteo. O le lomiga Insight on the Scriptures ua faamatalaina ai le “tuutoina i le Atua” e avea o se “migao, tapuaiga, ma le auaunaga i le Atua, faatasi ma le faamaoni i lana pule silisili ese i le vateatea.” O le migao e sau mai le loto lena ua mafai ai ona latalata atu i le Atua, ona o le mataʻu i lona afioaga sili, i lona tulaga e faavavau, ma le lē ma taʻua o ana foafoaga sili, faatasi ma le loto faafetai tele mo meaalofa faaleagaga ma faaletino ua ia liligi mai i luga o le fanau a tagata talisapaia. E moni, o i tatou taitoatasi o lē e faia le tuutoina i le Atua ua mafai ona faapea mai, e pei ona sa faia e le faisalamo i le Salamo 104:1: “Loʻu agaga e, ia e faamanū atu ia Ieova; Ieova e, loʻu Atua, e matuā silisili lava oe, e ofu oe i le viiga ma le matagofie.”

6. (a) Ua faapefea ona eseese tagata tapuai o Ieova mai tagata i lotu Kerisinetoma? (e) O le ā na fai mai ai Paulo i le Roma 11:33, 34, ma o ā fesili ua lāgā ona o lea?

⁶ O lo tatou tuutoina i le Atua e tatau ona iai faaupuga ma faiga, ma i lenei mea ua faia e ala i gaoioiga. E tusa ai ma lenei mea, o tagata tapuai i le Atua moni, o Ieova, e matuā ese mamao lava mai tagata e nonofo i nofoa e fai faalagolago i totonu o falesa a Kerisinetoma o loo mou atu. I le toatele o tagata i le lalolagi, o le lotu—pe afai o loo iai pea sa latou lotu—o se faiga, po o se ofu ua ofuina ina ia faia ai i latou e foliga mai i fafo e paia a o latou ola i se olaga e ōgatasi ma le lalolagi iʻuvale o loo siomia i latou. Latou te lē iloa e oo lava i le po o ai le Atua. E moni, o na tagata e manaomia ona mafaufau i upu a Paulo i le Galuega 17:23, NW, ina o ia fai mai i tagata Atenai o ē na tapuai i se “Atua e Lē Iloa”: “O le mea o loo outou avatua i ai ma le lē iloa le tuutoina i le Atua, o lea ou te faailoa atu ai ia te outou.” E faatatau i lena Atua ofoofogia, na alaga ai Paulo i le Roma 11:33, 34: “Auē! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala. Auā o ai se ua iloa le finagalo o le Alii [o Ieova]? po o ai foi se ua pulega faatasi ma ia?” O lea e faapefea ona tatou iloa ala o le Atua? E ala i le aʻoaʻoina o ‘le mea lilo paia o le tuutoina i le Atua.’ Ae e faapefea ona tatou faia o lena mea?

7. Aiseā ua mafai ai ona faapea atu e “sili lava le mea lilo paia o le tuutoina i le Atua”?

⁷ I le 1 Timoteo mataupu e 3, NW, na uluai faaauivi mai ai e le aposetolo o Paulo mea ua manaomia mai auauna tofia i le aiga o le Atua, ua faamatalaina i le fuaiupu e 15 e faapea “o le faapotopotoga lea a le Atua soifua, o le pou tu foi lea ma le lagolago o le upu moni.” Ona faaopoopo mai lea o Paulo i le fuaiupu e 16: “E sili lava le mea lilo paia o le tuutoina i le Atua.” Ua sili lava lea ona na auina mai e Ieova lona Alo pele e toatasi i le lalolagi ina ia tatalaina lenei mea lilo, ina ia faataʻitaʻia ai po o le ā tonu lava le tuutoina i le Atua ma po o le ā lona matuā tāua, lona faalagolagomaga, i le tapuaiga moni. O le mea lilo paia o lenei tuutoina i le Atua ua faamalamalamaina i le auala o le soifuaga o Iesu i inei i le lalolagi. O i latou uma e alolofa ia Ieova e tatau ona atiaʻe lo latou faatuatua ma o latou olaga ia Keriso, o lē ua fai ma faaaʻoaʻoga o le tuutoina i le Atua. O lea, na faapefea la ona faamaninoina e Iesu le mea lilo paia o le tuutoina i le Atua?

Tafa e Ono

8. (a) O ā tafa e ono ua faamatalaina e Paulo i le 1 Timoteo 3:16? (e) O ai “Ia” lea ua faaalia mai?

⁸ E ala i faagaeega tauatua, na tali ai e Paulo lena fesili. I inei i le 1 Timoteo 3:16, NW, sa ia faamatalaina ai tafa e ono o lenei mea lilo paia, i lona fetalai mai: “O ia [1] na faaalia mai i le tino, [2] na taʻuamiotonuina i le agaga, [3] na faaalia i agelu, [4] na talaʻiina i nuu ese, [5] sa talitonu i ai le lalolagi, [6] na talia i le lagi i le mamalu.” O ai lenei “Ia” o lē na faaalia mai? E manino lava o “Ia” o le Fanau folafolaina, o Iesu, o lē na afio mai ina ia faia le finagalo o le Atua. O ia o le ogatotonu o le mea lilo paia, ua sili ai moni lea ona o ia.

9. O le ā le faamaoniga o iai faapea i le 1 Timoteo 3:16 e lē tatau ona faitauina faapea: “Ua faaali mai le Atua i le tino tagata”?

⁹ Ua taumafai le au talitonu i le Tolutasi e faanenefu ai le malamalamaga i le mea lilo paia e ala i le faapea mai o “Ia” lea i le 1 Timoteo 3:16 o le Atua lava ia. Ua faia lenei mea ona talu ai ua faitauina faapea le Tusi Paia King James Version ma isi uluai tusi, “ua faaali mai le Atua i le tino tagata.” Ae peitai, o le ā ua fai mai ai tusitusiga Eleni aupito maufaatuatuaina? O loo tausisi atu pea ona latou faaaogā le sui nauna “Ia” na i lo o le upu “Atua.” Ua ioe nei tagata e iloiloina mau faapea o le faaofiina i ai o le upu “Atua” i lenei mau o le sese mai le siiina. O lea, ua faitauina ai ma le saʻo faaliliuga aupito lata mai e pei o le American Standard Version, The New English Bible, ma le New World Translation: “O ia [po o, o Ia lē] na faaalia mai i le tino.” E leai, sa lē o le Atua lava ia o lē na faaalia mai “i le tino.” Na i lo o lea, sa o lona Alo pele ma o le uluai foafoaga, o lē na tusi ai le aposetolo o Ioane: “Ua liutino tagata le Lokou, sa mau foi o ia ma i tatou, (na matou matamata i lona mamalu; o le mamalu lava lea o le Alo e toatasi o le Tamā,) ua tumu o ia i le alofa tunoa ma le upu moni.”—Ioane 1:14.

“Faaalia Mai i le Tino”

10. (a) Na faapefea i le tafa muamua o le mea lilo paia ona iloa tino i le papatisoga o Iesu? (e) Aiseā na avea ai Iesu o le “Atamu mulimuli”?

¹⁰ I le papatisoga o Iesu, o le uluai tafa o le mea lilo paia na faaalia mai: o Iesu “na faaalia mai i le tino” e avea o le Alo faauuina o le Atua. Na faaliliuina mai e Ieova le Atua le soifua o lona Alo mai le lagi i le manava o Maria ina ia mafai ai ona fanau mai Iesu i le tino e avea o se tagata lelei atoatoa. I lea, e pei ona faaalia i le 1 Korinito 15:45-47, na avea ai Iesu o le Atamu lona lua, po o le “mulimuli,” o se solu faaletagata lelei atoatoa ua tutusa lelei lava ma le uluai Atamu. Mo le ā le fuafuaga? Ua faasino atu e le 1 Timoteo 2:5, 6 i le “Atamu mulimuli” o le “tagata, o Keriso Iesu lea; o le na foaifuaina e ia ia te ia e fai ma togiola mo tagata uma lava.” E ala i lenei faavae moni o se taulaga lelei atoatoa faaletagata, na puluvagaina ai e Iesu le feagaiga fou agaʻi i le 144,000 o tagata o ē ua avea ma suli faatasi ma ia i lona Malo.—Faaaliga 14:1-3.

11. O ai na faalautele atu i ai aogā o le taulaga togiola a Iesu?

¹¹ Pe o le a maua foi e isi, aogā mai le maliu faataulagaina o Iesu? E mautinoa lava ioe! Ua taʻua i le 1 Ioane 2:2 faapea o Iesu Keriso “o le togiola foi o ia mo a tatou agasala [agasala a Kerisiano faauuina e pei o Ioane], e le gata foi i a tatou, a e atoa foi ma agasala a le lalolagi uma lava.” O aogā o le taulaga togiola a Iesu o lea ua mafai ai ona faalautele atu i se mamao i tala atu o le 144,000 o Kerisiano faauuina i le lalolagi atoa o le fanau a tagata. “O le motu o tagata e toatele” o loo ola nei ma le faitau miliona o ē o le a toe faatutūina mai i le Parataiso i le lalolagi o le a latou maua le ola e faavavau e faavae i lo latou faatuatua i le taulaga togiola a Iesu. E pei ona valoia i le Faaaliga 7:9, 10, ua uma ona tāina ma faasinasinaina ofu o le motu o tagata e toatele e ala i lo latou faatuatua i le toto maligi o le Tamai Mamoe, o Iesu Keriso. Ua taʻuamiotonuina ai i latou i se faauoga ma le Atua. Ma le olioli lava, ua latou aʻoaʻoina ai tafa eseese o le mea lilo paia ma faaalia le tuutoina faaleatua e ōgatasi ma le faaaʻoaʻoga a Iesu!

O Isi Tafa

12. Sa faapefea ona “taʻuamiotonuina i le agaga” Iesu?

¹² O lenei, ae faapefea le tafa lona lua i le 1 Timoteo 3:16? O Iesu “na taʻuamiotonuina i le agaga.” Ae faapefea? E ala i le toe faatuina mai e Ieova o lona Alo tausisi i le faamaoni i le oti i le ola faaleagaga. O lenei mea na iʻu ai i le faalauiloaina mai e le Atua faapea o Iesu foi ua taʻuamiotonuina ma aogā mo isi tofiga mamalu. E pei ona taʻua i le Roma 1:4, o Iesu “na faasinotonuina mai o le Alo o le Atua o ia ma le mana, i la le agaga e paia lea, i le toe tu mai nai e ua oti.” I le faamausaliina o lenei mea, ua taʻu mai e Peteru ia i tatou i lana uluai tusi, mataupu e 3, fuaiupu e 18: “Auā o Keriso foi na tigaina o ia faatasi mo agasala, o le amiotonu o le sui o le amiolētonu, ina ia taʻitaʻiina e ia o i tatou i le Atua; na fasiotia o ia i le tino, a ua toe faaolaina mai i le Agaga.” Pe o taʻitaʻiina ai oe i le Atua e le faaaʻoaʻoga a Iesu o le tuutoina i le Atua?

13. Na faaali Iesu toe faatuina i ā agelu, ma o le ā le ituaiga o feau na ia talaʻi atu ia i latou?

¹³ I le faaauau pea i le 1 Timoteo 3:16, na sosoo ai ma le faasino mai e Paulo i le tafa lona tolu o le mea lilo paia, i lona faapea mai e uiga ia Iesu “na faaalia i agelu.” O ai atonu ua avea o nei agelu? E faatatau ia Iesu, “ua toe faaolaina mai i le Agaga,” nei, ua tusi Peteru i le 1 Peteru 3:19, 20: “Na ia maliu atu ai, ma talaʻi atu ai i agaga i le fale puipui; o e na le faalogo anamua, ina o faatalitali mai le onosai o le Atua anamua i ona po o Noa.” E tusa ai ma le Iuta 6, o na agaga sa “o agelu foi o e na le taofi i lo latou mamalu, a ua tuua e i latou le mea sa latou nonofo ai,” i le lagi. Sa latou faia ni tino faaletino ina ia mafai ai ona olioli i fesootaiga tau feusuaiga lē tonu ma fafine. Ina ua oo mai le Lolo, na faamalosia na agelu e toe foi atu i lo latou nofoaga agaga, o i inā na lafoina ai i latou i Tartarus, o se tulaga matuā sili ona maulalo. (2 Peteru 2:4) Na talaʻi le Iesu toe faatūina ia i latou. Ae pe o se feau o le faaolataga lena? E matuā leai lava! Na i lo o lea, na matuā taʻusalaina e Iesu a latou amioga leaga i le avea o ni ē e matuā tetee i le tuutoina faaleatua. So o se tagata o le Atua o lē e taalo i tulaga lē mamā tau i feusuaiga i aso nei e ao ona latou utagia le lapataiga mai le faamasinoga lena ua folafola atu i na agelu!

14. Na faapefea ona amata ona “talaʻiina i nuu ese” e uiga ia Iesu?

¹⁴ O le tafa lona fa o le 1 Timoteo 3:16 e faapea o Iesu “na talaʻiina i nuu ese.” Ua faapefea ona faataunuuina lenei mea? I le taimi lava a o leʻi pueina o ia, na taʻu atu ai e Iesu i aposetolo: “E moni, e moni, ou te fai atu ia te outou, o lē talitonu mai ia te au, e faia lava e ia o galuega ou te faia; e fai foi e ia mea e sili i ia mea, auā ou te alu i loʻu Tamā.” (Ioane 14:12) E leʻi pine lava mulimuli ane, i le Penetekoso i le 33 T.A., na liligi ifo ai e Iesu le agaga paia i luga o ona soʻo, ma le tala lelei e faateia ai faapea “o Iesu lava lena ua toe faatuina e le Atua” na amata ona talaʻiina atu i tagata Iutaia. Mulimuli ane, na talia foi e tagata Samaria le upu a le Atua ma amata ona talia le agaga paia. (Galuega 2:32; 8:14-17) Ona oo lea i le 36 T.A., na talaʻi atu ai Peteru ia Konelio ma isi tagata o Nuu ese na faapotopoto i lona fale. I lea, o le tala lelei e uiga ia Iesu na amata ona “talaʻiina i nuu ese,” o lona uiga, i tagata e lē ni tagata Iutaia, o ē na faauuina foi e le agaga paia.

15. O le ā ua faamaonia ai faapea na iloa lelei e Kerisiano o le uluai senituri le mea lilo paia o le tuutoina faaleatua?

¹⁵ E pei ona lipotia mai i le Galuega 12:24, “ua tupu le afioga a [Ieova] ma ua faateleina.” Ua taʻua i le Galuega 17:6 faapea i Eleni i Matu na alalaga ai tagata tetee, e pei ona latou faia i inā seia oo mai i le aso nei: “O tagata nei o e ua faatupu le fouvale i le lalolagi uma, ua latou oo mai foi iinei.” I le 30 tausaga, sa mafai ai ona tusi Paulo mai Roma faapea o le tala lelei ua “talaʻiina atu foi i tagata uma lava i le lalolagi.” (Kolose 1:23) Sa aʻoaʻoina lelei e Kerisiano i lena taimi le mea lilo paia o le tuutoina i le Atua. Maeu lo latou maelega i le faatatauina o lea mea! Ma sei faapena i tatou ona aʻoaʻoina ma faatatau ai lea mea i lenei aso ua fai ma tumutumuga o le talaʻiina o le Malo!

16. O le ā le tafa lona lima o le mea lilo paia, ma o le ā le galuega na faaalia mai ai?

¹⁶ I le tali atu i lena talaʻiga i le uluai senituri, na matauina ai ma le manino le tafa lona lima o le mea lilo paia i le 1 Timoteo 3:16. I le taimi nei ua “talitonu i ai le lalolagi” ia Iesu. Sa o le iʻuga lenei o le tuutoina i le Atua o misionare maelega e pei o Keriso, e aofia ai Paulo ma Timoteo. Sa latou faaooina atu le tala lelei i Asia Itiiti ma Europa, atonu na oo atu lava i Sepania, ma i Aferika i Sasae e ala i le taʻutaʻu atu e le tagata Aitiope na papatisoina, a o auauna Peteru i Papelonia.

17. Aiseā ua talitonuina ai Iesu i le lalolagi atoa i aso nei?

¹⁷ Ae faapefea i o tatou aso? Talu mai le 1919 ua faaalia ai e le vaega totoe faauuina le tuutoina e fai ma faaaʻoaʻo. Sa fausia nei tagata faauuina i se faavae mautu o le faatuatua na faataatia e Iesu. Ae maise lava talu mai le 1935, sa latou agaʻi atu ai i le aoaoina o le motu o tagata e toatele, o ē na olioli i le faamoemoe o le faasaoina atu i le “puapuaga tele” ma olioli ai i le ola e faavavau i le parataiso i le lalolagi. (Faaaliga 7:9, 14) I lea, o le tala lelei o loo taulaʻi atu ia Iesu o lē ua talitonuina i le lalolagi atoa i aso nei. I le tuutoina i le Atua, e sili atu i le 3,700,000 Molimau a Ieova o loo talaʻia nei ma olaola i le kelope atoa!

18. Na faapefea ona “talia i le lagi i le mamalu” Iesu?

¹⁸ E toe tasi lava le tafa o lena mea lilo paia o loo iai, o lona ono: O Iesu “na talia i le lagi i le mamalu.” I le 40 aso talu ina ua faaolaina mai i le agaga, sa faaliliuina ai Iesu i ni tino faaletino, ma faaali atu i ona soʻo ma taʻu atu ia i latou “mea a le malo o le Atua.” Ona afio aʻe lea o ia i le lagi. (Galuega 1:3, 6-9) I lea, na taliina ai lana tatalo o loo faamauina i le Ioane 17:1-5: “Loʻu Tamā e, . . . Tuu mai ia le viiga i lou Atalii, ina ia tuu atu foi e lou Atalii le viiga ia te oe. . . . Ua ou tuu atu le viiga ia te oe i le lalolagi; . . . O lenei foi, loʻu Tamā e, ia e tuu mai ia te au le manuia faatasi ma oe, o le manuia lava sa ia te i taua ma oe, a o lei faia le lalolagi.”

19. O le ā sa tatau ona auai i le toe foi atu o Iesu i le lagi?

¹⁹ Maeu se olioli tele sa tatau ona auai ina ua toe foi atu Iesu i le lagi! I se taimi ua mavae, ina ua faavaeina e Ieova le lalolagi, na “alalaga fiafia atalii uma o le Atua.” (Iopu 38:7) O lea, atonu sa sili atu foi ona olioli ʻau o agelu faalelagi i le toe taliaina faatasi ma i latou o le Siamupini faamaoni o le pule silisili ese a Ieova!

20. Aiseā ua maua ai e Iesu lea suafa sili, ma o le ā na ia faia a o iai i le lalolagi?

²⁰ I le Eperu 1:3, 4, NW, ua fai mai ai Paulo e uiga i le manumalo o Iesu: “Ina ua uma ona faamamāina e ia lava a tatou agasala, ona nofo ai lea o ia i le itu taumatau o lē Silisili ese o i lugā. Ua faapea ona sili o ia i agelu, ua faapea foi ona maua e ia le suafa e sili i ō latou.” Na maua e Keriso lena suafa ona o lona manumalo i le amiolētonu. O lenei Alo o le Atua na ia faapupula moni le ala o le tuutoina i le Atua i inei i luga o le lalolagi. Sa ia faataatia foi se faaaʻoaʻo mo tagata uma o ē o le a maua le ola e faavavau. Ona o le faaeaina o Iesu i le itu taumatau o le Atua i le lagi, na faaalia ai le mea lilo paia o lenei tuutoina i le Atua i ona tafa uma.

O le ā Lau Tali?

◻ O le ā le “tuutoina i le Atua”?

◻ Na faapefea ona “faaalia mai i le tino” Iesu ma mulimuli ane “taʻuamiotonuina i le agaga”?

◻ I ā agelu na faaali i ai Iesu, ma faatasi ai ma le ā le feau?

◻ Na faapefea ona “talaʻiina i nuu ese” le Keriso ma “talitonu i ai le lalolagi”?

◻ O anafea na “talia [ai] i le lagi i le mamalu” Iesu, ma ina ua uma ona faia le ā e uiga i le tuutoina tauatua?