‘Iloa Lelei i Tatou Lava’—I le Taimi o le Faamanatuga

“Afai ana iloa lelei e i tatou i tatou lava, po ua lē faamasinoina i tatou . . . ina ia lē oo ina taʻusalaina i tatou.”—1 KORINITO 11:31, 32, “NW.”

1. O le ā le mea ua mautinoa e ao ona alofia e Kerisiano moni, ma aiseā?

O LE MEA e lē manaomia e se Kerisiano o le faamasinoina lea i se tulaga lē manuia e Ieova. O le lē faafiafiaina o “le na te faamasinoina le lalolagi uma” e mafai ona taʻitaʻiina atu ai i lo tatou ‘oo ina taʻusalaina faatasi ma le lalolagi’ ma le leiloa ai o le faaolataga. O le tulaga lena e tusa lava pe tatou te faamoemoe mo le ola i le lagi ma Iesu pe o le ola lē uma i le lalolagi parataiso.—Kenese 18:25; 1 Korinito 11:32.

2, 3. I le ā le mea atonu e mafai ona faamasinoina ai i tatou i se tulaga lē manuia, ma o le ā na fai mai ai Paulo e uiga i lenei mea?

² I le 1 Korinito mataupu e 11, na faailoa mai ai e le aposetolo o Paulo se mataupu faapitoa e mafai ona taʻusalaina ai i tatou. E ui ina sa ia faasino atu lana faamatalaga i Kerisiano faauuina, ae tāua foi lana fautuaga ia i tatou uma,ae maise lava i lenei vaitau. O lo tatou iloa lelei o i tatou lava e mafai ona fesoasoani ia i tatou e maua le faamaoniga a le Atua ae lē o le taʻusalaina. I le talanoaina o le faamanatuga faaletausaga o le Talisuaga Afiafi a le Alii, na tusi ai Paulo:

³ “O lea lava po na faalataina ai le Alii o Iesu, na ia tago ai le areto, ua ia faafetai, ona tofitofi ai lea, ma fai atu, Ina tago ia, ina aai; o loʻu tino lenei ua tofitofi ma sui o outou, ia outou faia lenei mea ma faamanatuga ia te au. Ua ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i loʻu toto; ia outou faia lenei mea ma faamanatuga ia te au i aso uma tou te feinu ai. Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia.”—1 Korinito 11:23-26.a

4. O le ā o le a faia i le po o Aperila 10, 1990?

⁴ Pe a mavae le goto o le la ia Aperila 10, 1990, o le a faamanatuina ai e Molimau a Ieova le Faamanatuga o le maliu o Keriso. E masani lava, o le vaega o le a faapotopoto e na o se faapotopotoga e tasi; o lea o le a iai ni avanoa mo tagata o ē e leʻi avea ma Molimau. O le ā faapeī le sauniga? O le a iai se lauga faale-Tusi Paia. Ona mulimuli ane ai lea, pe a uma le tatalo, o le a pasi faasolo atu le areto. O le isi tatalo e faailoa atu ai le pasiina faasolo atu o le ipu. Na i lo o le faia o nei mea uma e tusa ai o se tu faalotu po o se taualumaga maumauai, o le a faatulaga ai le aofaiga o areto po o ipu ma le auala o le a pasi faasolo ai, ina ia talafeagai ma le tulaga o loo iai le faapotopotoga. O le mea autū o le faaavanoa ai lea ia i latou uma o loo auai mea mo le Faamanatuga, e ui lava o le toatele o le a na ona pasi faasolo atu ia mea e aunoa ma le tagofia. O ā la mea e pasi faasolo atu, ma o ā o latou uiga? E lē gata i lea, o le ā e ao ona tatou iloiloina muamua ina ia tatou iloa lelei ai i tatou lava?

“O le Uiga o Lenei Mea o Loʻu Tino”

5, 6. (a) O le ā na faia e Iesu i le areto? (e) O le ā le ituaiga o areto na ia faaaogā?

⁵ Ua tatou faitau ai i le mea na “maua mai le Alii” e Paulo e tusa ai o le Faamanatuga. O loo iai foi ni faamatalaga a tusitala e toatolu o Evagelia, o le tasi o lē na iai i le taimi na faatuina ai e Iesu lenei faamanatuga. (1 Korinito 11:23; Mataio 26:26-29; Mareko 14:22-25; Luka 22:19, 20) Ua faapea mai nei faamatalaga, na muai tago Iesu i le areto, tatalo, ona tofitofi lea ma tufatufa atu. O le ā lena areto? I se fesootaiga tonu, o le ā ua faaaogāina i aso nei? O le ā lona uiga po o le mea ua fai ma ona sui?

⁶ Sa iai i le taimi lea mea mai le talisuaga o le Paseka faa-Iutaia, o le tasi o le areto e lē faafefeteina, lea na taʻua e Mose o le “areto e le faafefeteina, o le areto o le tiga.” (Teuteronome 16:3; Esoto 12:8) Na faia lenei areto i le falaoa mata mai le saito e aunoa ma le faaaogāina o se fefete, masima, po o ni mea faamanogi. Ona o le lē faafefeteina (le upu Eperu, mats·tsahʹ), sa mafolafola ai ma manutinuti; sa tatau ona tofitofiina i le telē e mafai ona ʻai.—Mareko 6:41; 8:6; Galuega 27:35.

7. O le ā ua faaaogā e Molimau a Ieova mo le areto i le taimi o le Faamanatuga?

⁷ Na faaaogā e Iesu le areto e lē faafefeteina i le Talisuaga Afiafi a le Alii, o lea ua faapena foi ona faia ai e Molimau a Ieova i aso nei. O le matzoth masani faa-Iutaia (ituaiga o masi) ua aogā mo lea fuafuaga pe afai e lē faaopoopoina i ai nisi mea, e pei o le molo, aniani, po o fuamoa. (O matzoth e iai mea faapena e lē mafai ona fetaui ma le faamatalaga o le “areto o le tiga.”) Pe e mafai e toeaina o le faapotopotoga ona tofi se tasi e faia le areto e lē faafefeteina mai se paluga o le falaoa mata e faia i le saito ma le vai. Afai e lē maua le falaoa mata e faia i le saito, e mafai ona faia le areto e lē faafefeteina mai le falaoa mata o le karite, alaisa, sana, po o isi lava ituaiga o saito. E mili faamanifinifi le paluga ma tao i se apa ua faagaʻo i sina gaʻo itiiti lava.

8. Aiseā ua alagātatau ai le areto e lē faafefeteina e fai ma faatusa, ma o le ā ua faailogaina i le tagofia o lea faatusa? (Eperu 10:5-7; 1 Peteru 4:1)

⁸ Ua talafeagai lena areto auā e lē o iai se fefete, lea o loo faaaogāina e le Tusi Paia e fai ma sui o le iʻuvale po o le agasala. Na fautua mai Paulo e faatatau i se tagata amio leaga i le faapotopotoga: ‘O le fefete itiiti e faafefeteina ai le paluga atoa. Ia faamamā ese le fefete tuai, ina ia saoloto outou mai le faafefeteina. O Keriso o la tatou paseka ua faataulagaina. Ia tatou tausia le faamanatuga, e lē ma le mea faafefete o le leaga ma le amio leaga, ae ma falaoa e lē faafefeteina o le faamaoni ma le upu moni.’ (1 Korinito 5:6-8; faatusatusa Mataio 13:33; 16:6, 12.) O le areto e lē faafefeteina o le faatusa fetaui lea o le tino faaletagata o Iesu, auā sa “paia, e agamalu, e leai sona leaga, e taumamao ma ē agasala.” (Eperu 7:26) Sa iai Iesu i inā i lona tino faaletagata lelei atoatoa ina ua ia fetalai atu i le au aposetolo: “Ina tago ia ma aai i lenei [areto], o lona uiga, o loʻu tino.” (Mataio 26:26, A New Translation of the Bible, a James Moffatt) O le tagofia o le areto o lona uiga o le tagata lea ua talitonu i ai ma talia le aogā o le taulaga a Iesu e fai ma ona sui. Ae peitai, e tele isi mea o loo aafia ai.

Le Uaina ua Iai Lona Uiga

9. O le ā le isi faatusa na fetalai ai Iesu e tatau ona faaaogā?

⁹ Na faaaogā e Iesu se isi faatusa: “Ona tago foi lea o ia i le ipu, ma ina ua uma ona faafetai atu i le Atua ona ia tuuina atu lea ia te i latou ua fetalai atu, ‘O outou uma, ia outou inu lenei; o le uiga o lenei mea o loʻu toto, le toto o le feagaiga fou, e faamaligiina mo le toatele, ina ia maua le faamagaloga o a latou agasala.’” (Mataio 26:27, 28, Moffatt) O le ā sa iai i totonu o lena ipu mo le lautele na ia pasi faasolo atu, ma o le ā lona uiga mo i tatou a o tatou tauivi e iloa lelei i tatou lava?

10. Na faapefea ona ofi atu le uaina i totonu o le Paseka faa-Iutaia?

¹⁰ Ina ua muai otooto mai e Mose tausamiga o le Paseka, na ia lē taʻua ai ni mea inu. Ua talitonu le toatele o tagata suesue faapea o le uaina sa tuuina atu i le Paseka i vaitaimi mulimuli ane lava, pe ā ma le senituri lona lua T.L.M.b E ui i lea, o le faaaogāina o le uaina i lenei talisuaga sa taatele i le uluai senituri, ma sa leʻi teena e Iesu lea mea. Sa ia faaaogāina le uaina o le Paseka ina ua faatuina le Faamanatuga.

11. O le ā le ituaiga o uaina ua alagātatau mo le faaaogāina i le taimi o le Talisuaga Afiafi a le Alii?

¹¹ Ona o le Paseka faa-Iutaia na faia i tua lava ina ua uma le seleselega o vine, o lea sa tatau ona faaaogā ai e Iesu, e lē o se sua ua lē faamafuina, ae o le uaina mūmū lea e faigofie ona fai ma sui o lona toto. (Faatusatusa Faaaliga 14:20.) Sa leʻi manaomia ona faaopoopo atu ni mea i le toto o Iesu, o lea ua talafeagai ai le uaina lē filogia, na i lo uaina ua faamalosia i le brandy (e pei o le port, sherry, po o le muscatel) po o le tuuina i ai o ni mea faamanogi po o isi laau (vermouth, Dubonnet, po o le tele o uaina ua taʻua o aperitifs). Ae peitai, e lē manaomia ona popole i tatou i le faagasologa o le faiga o le uaina, pe na ave i ai se suka i le taimi o le faamafu ina ia talafeagai lelei ai le tofo po o le tele o le alakaholo o iai po o ua faaopoopo i ai sina teiō laitiiti ina ia puipuia ai mai le faaleagaina.c E tele faapotopotoga ua latou faaaogā le uaina mūmū e faatau mai faleoloa (e pei o le Chianti, Burgundy, Beaujolais, po o le claret) pe ua na o se uaina mūmū e faia i le fale. O le uaina ma le areto ua na o ni faatusa, po o ni faailoga; o lea, o ni mea e lē faaaogāina e mafai ona ave i le fale ma faaaogā mulimuli ane e pei lava o isi meaʻai po o mea inu.

12. O le ā le uiga faafaatusa o le uaina na faamatalaina e Iesu?

¹² O le mea moni faapea sa fetalai Iesu e uiga i lona toto i le po o le Paseka, ua mafai ona faamanatu mai ai i mafaufau le toto o le tamai mamoe i tuā i Aikupito. Ae matau pe na faapefea ona faia moni e Iesu se faatusatusaga e ese, i le fetalai mai: “O lenei ipu o le feagaiga fou lea e ala i loʻu toto, ua faamaligiina mo outou.” (Luka 22:20) Muamua atu sa faia ai e le Atua se feagaiga ma le nuu o Isaraelu faaletino, ma sa faavaeina i le toto o manu na fai ai taulaga. Sa iai se fesootaiga tonu i le va o le toto o na taulaga ma le toto o Iesu. O na mea uma sa aofia ai i le faavaeina e le Atua o se feagaiga ma se nuu o ona tagata. (Esoto 24:3-8; Eperu 9:17-20) O se tasi o vala o le feagaiga o le Tulafono sa faapea, na iai ia Isaraelu faaletino se faamoemoe o le faia aʻe ai o se nuu o tupu ma ositaulaga. (Esoto 19:5, 6) Ae peitai, ina ua lē taulau ona tausia e Isaraelu le feagaiga a Ieova, ona ia fetalai atu lea faapea o le a na suia “le feagaiga na muamua” i le “feagaiga fou.” (Eperu 9:1, 15; Ieremia 31:31-34) O le ipu la o le uaina na pasi faasolo atu e Iesu i ona aposetolo faamaoni sa fai ma sui o lenei feagaiga fou.

13, 14. (a) O le ā le uiga o le iai i totonu o le feagaiga fou? (e) O le ā ua faailogaina e le tagofia e se tagata o faatusa?

¹³ O Kerisiano ua aveina atu i totonu o lenei feagaiga fou ua faia aʻe ai se nuu faaleagaga o tupu ma ositaulaga. (Kalatia 6:16) Na tusi le aposetolo o Peteru: “O le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou taʻutaʻu atu ona lelei na ia valaau ia te outou nai le pouliuli e oo i lona lava malamalama e matuā ofo ai.” (1 Peteru 2:9) Ua manino nei le faaolataga latou te maua—le ola i le lagi e avea o pule lagolago faatasi ma Iesu. Ua faamautinoa mai e le Faaaliga 20:6 lenei mea: “Amuia mona ua paia le ua i ai se tofi i le uluai toe tu; . . . e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.”

¹⁴ O le mea moni, ina ua uma ona faasino atu e Iesu le au aposetolo ina ia tagofia le areto ma le uaina faafaatusa, ona ia taʻu atu lea ia i latou faapea o le a latou ‘aai ma feinu i lana laoai i lona malo, ma nonofo i nofoālii e faamasino i ituaiga e sefululua o Isaraelu.’ (Luka 22:28-30) Ona o lea, o le tagofia o faatusa o le Faamanatuga e sili atu lona uiga na i lo o le na ona talitonu i le taulaga a Iesu. E tatau i Kerisiano uma ona talia le togiola ma faatino le faatuatua ina ia maua e ia le ola e faavavau i so o se mea. (Mataio 20:28; Ioane 6:51) Ae o le tagofia o faatusa ua faailogaina ai faapea ua iai se tasi i le feagaiga fou, ua filifilia ina ia faatasi ma Iesu i lona Malo.

Manaomia ona Iloa Lelei i le Taimi o le Faamanatuga

15. Na faapefea ona faailoa atu e Iesu se faamoemoe fou mo auauna a le Atua?

¹⁵ E pei ona faamatalaina e le mataupu ua mavae atu, e muamua i lo o taimi o Iesu, sa leai se faamoemoe o auauna faamaoni a le Atua e ō atu i le lagi. Sa latou tulimataʻi atu i luma i le mauaina o le ola e faavavau i luga o le lalolagi, le uluai nofoaga o le fanau a tagata. O Iesu Keriso o ia lea na uluai toe faatuina o se agaga, ma na avea o ia o le uluai tagata mai le fanau a tagata na aveina aʻe i le lagi. (Efeso 1:20-22; 1 Peteru 3:18, 22) Na faamautinoa mai e Paulo lenei mea, i le tusi mai: “Ua tatou saʻoloto e ulu atu i le mea e sili ona paia ona o le toto o Iesu, i le ala fou e ola ai.” (Eperu 10:19, 20) O ai na mulimuli atu ai, ina ua uma ona tatalaina e Iesu lea ala?

16. O le ā ua taofia e le lumanai mo i latou o ē tagofia le areto ma le uaina?

¹⁶ I le po na faatuina ai e Iesu le Talisuaga Afiafi a le Alii, na ia taʻu atu ai i ona aposetolo faamaoni faapea sa ia sauniunia se nofoaga mo i latou i le lagi. (Ioane 14:2, 3) Ae peitai, ia manatua na fetalai atu foi Iesu faapea o ē e tagofia le areto ma le uaina o le a iai i lona Malo ma nonofo i nofoalii e faamasino. Pe e gata ai lea i le na o le au aposetolo? E leai, auā mulimuli ane na aʻoaʻoina ai e le aposetolo o Ioane faapea o isi foi Kerisiano o le a manumalo ma ‘nonofo ma Iesu i lona nofoalii,’ ma o le a avea faatasi i latou ‘o se malo ma ositaulaga e pule i luga o le lalolagi.’ (Faaaliga 3:21; 5:10) Na aʻoaʻoina ai foi e Ioane le faitau aofai atoa o Kerisiano o ē ua “faatauina nai le lalolagi”—e 144,000. (Faaaliga 14:1-3) Ona ua na o se vaega itiiti lenei, o se “lafu mamoe itiiti” pe a faatusatusa atu ia i latou uma o ē ua tapuai i le Atua i le faagasologa mai o tausaga, o lea e manaomia ai se malamalama lelei faapitoa i le taimi o le Faamanatuga.—Luka 12:32.

17, 18. (a) Na paʻūū atu nisi Kerisiano i Korinito i le ā le mea masani? (e) Aiseā na matuiā tele ai le aai ma le inu tetele? (Eperu 10:28-31)

¹⁷ Na lagā e Paulo lenei mea i lana tusi i tagata Korinito i le taimi a o soifua pea nisi aposetolo, ma ina ua valaauina e le Atua Kerisiano e avea ma “tagata paia.” Na faapea mai Paulo sa iai se faiga leaga na tupu aʻe ia i latou i inā o ē sa tatau ona tagofia faatusa. O nisi na muai aai o lea na latou aai tetele ai pe onanā foi, ua tau tulemomoe, ma ua lē ala ai o latou mafaufau. O le iʻuga, ua lē mafai ai ona latou ‘faautauta i le tino,’ le tino faaletino o Iesu lea na fai ai ma sui le areto. Pe sa matuiā tele lena mea? Ioe! E ala i le tagofia ma le faaletatau, ua oo ai ina latou ‘nofo sala i le tino ma le toto o le Alii.’ Ana fai sa mataala i le faalemafaufau ma le faaleagaga i latou, ‘semanū e mafai ona latou iloa lelei i latou lava ma o le a lē faasalaina ai i latou.’—1 Korinito 1:2; 11:20-22, 27-31.

¹⁸ O le ā na manaomia ona iloa lelei e na Kerisiano ma e faapefea? Muamua lava, sa tatau ona latou talisapaia i o latou loto ma mafaufau lo latou valaauina ina ia iai i totonu o suli e 144,000 o le olaga faalelagi. Na faapefea ona latou iloa lelei lenei mea, ma pe e ao ea i le toatele i aso nei ona talitonu faapea o i latou o se vaega o lenei vasega toaitiiti ua filifilia e le Atua talu mai aso o le au aposetolo?

19. O le ā le tulaga faaalia na iai i le Faamanatuga o le 1989?

¹⁹ O le mea moni, e na o se vaega toaitiiti o Kerisiano moni i aso nei ua latou iloa lelei lenei mea e uiga ia i latou lava. I le faamanatuga o le Talisuaga Afiafi a le Alii i le 1989, e sili atu i le 9,479,000 na faapotopoto i faapotopotoga a Molimau a Ieova i le lalolagi aoao. E tusa ma le 8,700 na taʻutino mai ua iai le faamoemoe o le ‘faasaoina mo le malo faalelagi.’ (2 Timoteo 4:18) O le vao o tagata e toatele—ioe, le faitau miliona o isi Kerisiano faamaoni ua faamanuiaina o ē na faapotopoto faatasi—na iloa lelei faapea o lo latou faamoemoe moni o le ola e faavavau i le lalolagi.

20. Na faapefea ona faailoa atu ia i latou o le 144,000 faapea ua valaauina i latou? (1 Ioane 2:27)

²⁰ I le Penetekoso i le 33 T.A., na amata ai ona filifilia e le Atua le 144,000 mo le ola faalelagi. Ona sa fou lenei faamoemoe, sa lē maua e auauna a le Atua o ē na muamua maliliu a o leʻi oo mai i le taimi o Iesu, na faapefea la e i latou na filifilia ona iloa pe faamautinoa atu foi i ai e uiga i lenei faamoemoe? Ua latou iloa lelei lenei mea e ala i le mauaina o le molimau i lea mea na tuuina mai e le agaga paia o le Atua. E lē o le uiga o lena mea faapea ua latou vaai moni i le agaga (e lē o se peresona) po o le iai o se vaaiga faalemafaufau ua fesootai ai le agaga ma i latou, latou te lē faalogo foi i ni leo mai le nofoaga o agaga. Ua faamatala e Paulo: “O loo molimau mai lea lava Agaga i o tatou agaga, o fanau i tatou a le Atua. . . . o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.”—Roma 8:16, 17.

21. (a) Ua faapefea ona iloa e ē faauuina faapea ua ia i latou le faamoemoe faalelagi? (1 Korinito 10:15-17) (e) O le ā le ituaiga o tagata e iai ē faauuina, ma ua faapefea ona latou molimau atu ma le loto maulalo i lo latou faamoemoe?

²¹ O lenei molimau, po o le iloaina, ua toe fafaguina ai o latou mafaufau ma le faamoemoe. O loo avea pea i latou o ni tagata, o loo olioli i mea lelei o le foafoaga faalelalolagi a Ieova, peitai o le taʻitaʻiga sili o o latou olaga ma manatu o loo taulaʻi atu i le avea o ni suli faatasi ma Keriso. Latou te leʻi oo atu i lenei tulimataʻiga e ala i ni faalogona ootia. O i latou o ni tagata lava e masani ai, e paleni i o latou manatu ma amio. Ae peitai, ona o le faapaiaina e le agaga o le Atua, ua latou mautinoa ai e uiga i lo latou valaauina, e lē o iai pea ni o latou masalosaloga e uiga i ai. Ua latou iloa faapea o lo latou faaolataga o le a i le lagi pe afai e faamaoni i latou. (2 Tesalonia 2:13; 2 Timoteo 2:10-12) I le malamalama i le uiga o le taulaga a Iesu mo i latou ma i le iloa lelei faapea o i latou o Kerisiano fanauagagaina, latou te tagofia ma le loto maulalo faatusa o le Faamanatuga.

22. O le ā o le a iloa lelei e le toatele o i latou o le a auai i le Talisuaga Afiafi a le Alii?

²² O le toatele o i latou o le a tauaofia ma le usiusitai ia Aperila 10 e lē o iai lena faamoemoe, auā ua lē faauuina i latou e le Atua i le agaga, e valaauina ai i latou i le ola faalelagi. E pei ona tatou matauina, na amata ona filifilia e le Atua le 144,000 i tuā i aso o le au aposetolo. Ae ona o le faaiʻuina o lena valaau, e tatau ai ona faatalitalia faapea o isi o ē e ō mai e tapuai atu ia te ia o le a iai le faamoemoe lea na taofia e Mose, Tavita, Ioane le Papatiso, ma isi o tagata faamaoni o ē na maliliu a o leʻi tatalaina e Iesu le auala i le ola i le lagi. I lea, o le faitau miliona o Kerisiano faamaoni ma le maelega i aso nei latou te lē tagofia faatusa o le Faamanatuga. Ua iloa lelei e na Kerisiano i latou lava i luma o le Atua i le uiga faapea ua latou iloa lo latou faamoemoe moni. Ua latou maua aogā mai le toto ma le tino o Iesu e ala i le faamagaloina o a latou agasala ma le mauaina ai o le ola e lē uma i le lalolagi.—1 Peteru 1:19; 2:24; Faaaliga 7:9, 15.

23. Aiseā o le a avea ai le Faamanatuga o se sauniga olioli? (Faatusatusa 2 Nofoaiga a Tupu 30:21.)

²³ O lea, seʻi o tatou tulimataʻi atu i luma i le faamanatuga fiafia ia Aperila 10. O le a avea lea o se taimi mo le faaaogāina o le faautauta ae o se taimi foi mo le olioli. O le olioli mo le faitau aofai toaitiiti ua iai le faamoemoe faalelagi o ē o le a tagofia ma le tonu ma le usiusitai le areto ma le uaina. (Faaaliga 19:7) O le olioli foi mo le faitau miliona o Kerisiano fiafia o ē o le a latou matauina ma aʻoaʻoina ai i lena po, ma o ē e faamoemoe o le a manatua e faavavau i luga o le lalolagi lena faamanatuga uigā.—Ioane 3:29.

[Faaopoopoga i lalo]

O le ā Lau Tali?

◻ Aiseā e pasi faasolo atu ai le areto e lē faafefeteina i le taimi o le Faamanatuga, ma o le ā ua ia faaatagia?

◻ O le ā le ipu lea e pasi faasolo atu i le taimi o le Talisuaga Afiafi a le Alii, ma o le ā ua fai ma ona sui?

◻ Aiseā e manaomia ai le faautauta e tusa ai ma le faamanatuina o le Faamanatuga?

◻ Aiseā ua e tulimataʻia ai le Faamanatuga o loo sau?