O le Soifuaga o Iesu ma Lana Faiva

Loto Maulalo i le Paseka Mulimuli

I LALO o faatonuga mai ia Iesu, sa ō atu ai Peteru ma Ioane i Ierusalema e faia ni sauniuniga mo le Paseka. Mulimuli ane i le itula afiafi ae taunuu ane loa Iesu ma e foliga mai o loo ō mai faatasi ma isi aposetolo e toasefulu. Ua goto le la i le tafatafailagi a o faaifoifo Iesu ma lana au malaga mai le Mauga o Olive ma sopoia atu le Vanu o Ketarono. O le toe silasila mulimuli atu lea a Iesu i le ao i le aai seia oo i lona toetu mai.

E leʻi pine ae taunuu loa Iesu ma lana au malaga i le aai ma ō atu i le fale lea o le a latou faamanatuina ai le Paseka. Na latou feaei atu i sitepu o le fale e agaʻi i se potu tele lava i luga, o i inā na latou maua atu ai sauniuniga uma na faia mo lo latou faamanatuina faapitoa o le Paseka. Sa faatalitali ma le naunautai atu Iesu i lenei sauniga, e pei ona ia fetalai: “Ua tele lava loʻu manao e muai ʻai lenei paseka ma outou, a o lei oo i loʻu tiga.”

E tusa ai ma le tu masani, e fa ipu uaina e taumafaina e i latou e auai i le Paseka. Ina ua uma ona talia le ipu e foliga mai o le ipu lona tolu, ona fai lea e Iesu le faafetai ma faapea atu: “Ia outou tago i lenei ipu, ma ia tufatufa ane ia te outou; auā ou te fai atu ia te outou, ou te le inu lava i le fua o le vine, seia oo mai le malo o le Atua.”

I se taimi a o faagasolo le taumafataga, na tulaʻi ai Iesu, faataatia ese lona ofu tele, tago i le solo, ma faatumu le pesini i vai. O le mea masani, o le tagata talimalo e tatau ona vaai pe ua mulumuluina vae o le malo. Ae talu ai e leai se tagata talimalo o iai i lenei sauniga, o lea ua faia ai e Iesu lenei auaunaga totino. Sa mafai e so o se tasi o le au aposetolo ona puʻea le avanoa e faia ai lenei mea; peitai, e foliga mai o loo iai pea ni feteenaiga ia i latou, o lea ua lē faia ai e se tasi. Nei la ua masiasi i latou a o amata e Iesu ona mulumulu o latou vae.

Ina ua oo mai Iesu ia Peteru, sa tetee atu o ia: “E te le mulumulu lava oʻu vae e oo i le faavavau.”

“Afai ou te le mulumulu ia te oe, e leai sou tofi faatasi ma aʻu,” ua fetalai atu ai Iesu.

“Le Alii e,” ua tali atu Peteru, “aua lava na o oʻu vae, a o oʻu lima foi, atoa ma loʻu ulu.”

“O le ua taele,” ua tali atu ai Iesu, “ia tau o ona vae, a e mamā uma ai, e le aoga ona mulumulu uma. Ua mamā foi outou, a e le o outou uma lava.” Ua ia fetalai atu lenei mea auā ua ia silafia o loo fuafua Iuta le Sekara e faalata o ia.

Ina ua uma ona mulumulu e Iesu vae o le au aposetolo uma e 12, e aofia ai ma vae o lē o le a faalataina o ia, o Iuta, ona ia faamaulu ai lea o lona ofu tele ma toe taoto atu i le laulau. Ona ia fesili atu lea: “Ua outou iloa ea le mea ua ou faia ia te outou? Tou te taʻua mai aʻu, o le aʻoaʻo ma le Alii; ua lelei foi la outou e fai mai na, auā o aʻu lava lea. O lenei, afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluai o outou vae. Auā ua ou avatu le faaaʻoaʻo ia te outou, e pei ona ou faia ia te outou, ia faapea lava e outou ona fai. E moni, e moni, ou te fai atu ia te outou, e le sili le auauna i lona alii; e le sili foi le ua auina i le e ana le feau. Afai ua outou iloa ia mea, amuia outou pe a outou faia.”

Maeu se lesona matagofie i le auauna ma le loto maulalo! Sa lē tatau i le au aposetolo ona saili i le tulaga muamua po o le tulaga sili, i le manatu faapea ua sili ona tāua i latou e ao ai i isi ona auauna atu pea ia i latou. E manaomia ona latou mulimuli i le faaaʻoaʻoga na faataatia e Iesu. E lē o se gaoioiga masani lenei o le mulumuluina o vae. E leai, ae o se gaoioiga o le loto malie e auauna e aunoa ma le faailoga tagata, e tusa lava po o le ā le faatauvaa ma le lē lelei atonu e iai le galuega. Mataio 26:20, 21; Mareko 14:17, 18; Luka 22:14-18; 7:44; Ioane 13:1-17.

◆ O le ā ua tutasi e uiga i le silafaga a Iesu ia Ierusalema a o ia ulu atu e faamanatu le Paseka?

◆ I le taimi o le Paseka, e manino mai o le ā le ipu na tuu faasolo atu e Iesu i aposetolo e 12 ina ua uma ona fai atu se faamanuiaga po o le faafetai?

◆ O le ā le auaunaga totino sa masani ona saunia mo malo a o iai Iesu i le lalolagi, ma aiseā na lē saunia ai i le taimi o le Paseka na faamanatuina e Iesu ma le au aposetolo?

◆ O le ā le fuafuaga a Iesu i le faia o le auaunaga faatauvaa o le mulumuluina o vae o ona aposetolo?