La Tatou Oloa Tāua, o se Faiva Faaonaponei o le Mamalu
“Ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou.”—2 KORINITO 4:7.
1. (a) O le ā le oloa mamalu e mafai ona tatou maua, ma aiseā? (e) Ua faamatalaina faapefea e le Tusi Paia le tuuina atu o le Tulafono faa-Mose?
O LE faiva o le talaʻia o “lenei tala lelei o le Malo” i le faaiʻuga o lenei faiga o mea o se oloa matuā tāua, o se mea e sili ona tautele. Ona o Ieova o le Atua o le mamalu, o le auaunaga i le Atua o se faiva o le mamalu, o se oloa tāua la. (Mataio 24:14; 2 Korinito 3:18–4:1) E faatatau i le tuuina atu mamalu o le Tulafono faa-Mose, ua tusia ai i le Esoto 34:29, 30: “Ua oo ina alu ifo Mose nai le mauga o Sinai ma papa e lua o le tulafono i le lima o Mose, na alu ifo o ia nai le mauga, e lei iloa e Mose ua pupula le paʻu o ona fofoga, a o fetalai i laua ma [Ieova]. A ua iloa atu e Arona, ma le fanauga a Isaraelu uma lava ia Mose, faauta, o loo pupula mai le paʻu o ona fofoga; ona latou fefefe lea e faalatalata ia te ia.”
2. O le ā na faaatagia e le auaunaga a le Tulafono faa-Mose, ma aiseā ua sili atu ai ona mamalu le faiva mulimuli?
2 Ua faaopoopo mai Esoto 34 fuaiupu e 32 e oo i le 34: “E mulimuli ane foi ua faalatalata mai le fanauga uma a Isaraelu, ona fai atu ai lea o ia ia te i latou upu uma lava na fetalai mai ai Ieova ia te ia i le mauga o Sinai. Ua uma atu upu a Mose ia te i latou, ona tuuina lea e ia o le ufiufi i ona fofoga. A ulu atu Mose i luma o Ieova, ina ia la tautalatala ma ia, ona tuu ese ai lea o le ufiufi, ina seia toe ulufafo.” O le auaunaga o le Tulafono faa-Mose sa faaatagia ai le faiva o le feagaiga fou a le Puluvaga, o Iesu Keriso. O lea, afai sa mamalu le uluai faiva, e lē sili ea la ona mamalu o le faiva mulimuli, “le sauniga ua oo mai ai le Agaga”! (2 Korinito 3:7-11) E sili atu ona mamalu lea auā o loo iai le mamalu e tumau, ma o loo auai soʻo o Iesu Keriso i lea mamalu.—Roma 12:11.
3. (a) O le ā e tatau ona moni e uiga i le faiva a Molimau a Ieova, ae aiseā ua lē manino ai i le toatele o tagata? (e) O le ā na faamaonia ai sa iai Mose i luma o le silafaga mamalu a Ieova?
3 O le mea lea, ua mulimuli mai ai foi le faiva a Molimau a Ieova o se faiva mamalu. Ae peitai, e lē o manino lenei mea i le toatele o tagata o ē ua faatauasoina e lotu sese. E ui lava o loo iai le Tusi Paia i le toatele ma faitau i ai, ae lē o iai ni o latou ‘mata e vaai ai.’ (2 Peteru 1:5-9) Ina ia aveesea le ufimata mai o latou mata, e tatau ona latou liliu atu ia Ieova le Atua i le faatuatua, auā ina ua alu atu Mose i luma o le silafaga a Ieova, sa ia aveesea le ufimata na ufiufi ai ona mata mai tagata Iutaia. (2 Korinito 3:16) Sa fefefe tagata Isaraelu e vaai atu i le mamalu o le Atua i fofoga o lo latou puluvaga ma aioi atu ina ia ufitia mai i o latou mata. E pei lava o se mea e pupula pe a faaali mai i le malamalama na te aumaia se pupula i le pogisa, na faapena foi Mose, lo latou puluvaga, ona faaatagia mai ai le mamalu o Ieova, e faamaonia ai faapea sa iai o ia i luma o Ieova.
4. Ua faapefea i tagata lē talitonu i aso nei ona faataʻitaʻi i tagata Iutaia anamua, ae o le ā ua lē fefefe ai soʻo o le Mose Sili?
4 Na faaatagia e Mose le Perofeta sili a le Atua, o Iesu Keriso. I le pei o lē na ia uluai puna mai ai, sa lē fefe lenei Mose Sili e silasila saʻo atu i le mamalu o Ieova. Ae peitai, e oo mai i aso nei, ua faatauasoina tagata lē talitonu e le Tiapolo ma ana lotu faa-Papelonia, ina ia faataʻitaʻi i na tagata Iutaia anamua ma mumusu ai e vaai atu, pe iloatino, le mamalu o le Mose Sili, o Iesu Keriso. (2 Korinito 3:12-15) Peitai, o ona soʻo moni latou te lē fefefe e vaai atu i le atagia mai o le mamalu o Ieova a o susulu atu mai fofoga o Iesu Keriso. I le faasaolotoina mai taaʻiga faa-Papelonia, ua faalototeteleina ai i latou ina ia faailoa atu le mamalu o le Atua. “O lenei,” na tusi ai Paulo, “ona ua ia te i matou o lenei faamoemoe, matou te matuā faaalitino.”—2 Korinito 3:12.
O Ē ua Faaatagia ai le Mamalu o le Atua
5. E mafai faapefea ona tatou faaatagia atu le mamalu o le Atua ma ia pei o Mose i le tumutumu o le mauga i luma o Ieova?
5 Ua aveesea e Iesu Keriso le ufimata e ala i le faaalia ma faailoa mai Ieova le Atua ia i tatou. (Ioane 1:14, 17, 18) O lea e tatau ona tatou susulu atu, ma ia faasusulu atu ai le mamalu o le Atua e ala i “le tala lelei i le mamalu o Keriso, ua tusa o ia ma le Atua,” lea e tatau ona tatou folafola atu. O lona pupula o “le poto faamamaluina o le Atua i fofoga o Keriso.” E tatau ona tatou faaatagia atu lenei mamalu e ala i le tautala i le mamalu o Ieova ma le mamalu o lona Malo e ala i lona Alo. (2 Korinito 4:4-6, NW) I le pei o Mose i luga o le tumutumu mauga i luma o Ieova, ua faapena i Ana Molimau i luga o le lalolagi ona lē ufitia o latou loto mai le mamalu o Ieova. Latou te viiviia le mamalu ua faaatagia i fofoga o le Alo o Ieova, ma o le Tupu, o Iesu Keriso. I lea, e tatau ai ona latou faasusulu atu i isi le malamalama e faatatau i le mamalu o le Atua.
6. Ua faamatala faapefea e Paulo la tatou faiva o le mamalu i le 2 Korinito 3:18, ma i ā auala “ua liua ai” i tatou ona o lea?
6 Ua faamatalaina atu e le aposetolo o Paulo i uso molimau uma o le mamalu o Ieova lea mea i upu nei: “A o i tatou uma, o loo vaavaai i tatou i le pupula o le Alii e peiseai o i se faaata ma o tatou mata, e le ufitia, ua liua ai i tatou ua foliga i ai nai le pupula e oo i le pupula, faapei ona mai le Alii [o Ieova] le Agaga.” (2 Korinito 3:18) O le sili atu o le mamalu o lenei malamalama ua tatou maua, o le sili atu foi lea ona tatau ona tatou faasusulu atu, ma i lea ua sili ai foi ona faaliliuina i tatou. Ua toe faafouina ma toe suia mafaufau, e ui lava e lē o mafai ona vaaia ni suiga o le tino po o foliga. O le malamalama o le feau mamalu lea tatou te faasusuluina atu, ua na aumaia ni suiga eseese ia i tatou. Ua liliuina o tatou olaga ina ia pei o Keriso, a o faaavanoa atu i tatou e tauaveina le auaunaga faaeaina o le faasalalau atu o lenei malamalama mamalu i isi.—Eperu 13:15.
7. Mai le ā le puna e sau ai le mamalu moni, ma e mafai faapefea ona tatou faamatala sea mamalu?
7 O na suiga uma ua mafai ona faia ona o le agaga, po o le malosi galue o le Atua. E lē o faaatagia e taʻitaʻi lotu o Kerisinetoma le mamalu o Ieova le Atua, ae ua taumafai e faaalialia ina ia faia ai se mea e na ona faafoliga mai. O le mamalu e lē o so tatou mamalu, ma e lē manaomia ai ona tatou teuteu i ni ofu silika matagofie feilafi, le auro, ma maatāua ilaila. O le mamalu moni aʻiaʻi e maua mai le agaga o le Atua ma ua faailoa mai e ala i le avatua o le molimau mamalu e faatatau ia Ieova le Agaga.
O Ē Uma ua Faaeaina e Tauaveina le Malamalama
8, 9. O ā faalaeiauga na tuuina mai e Paulo ia i tatou i le 2 Korinito 4:1, 2, ma o le ā le filifiliga ua manaomia i la tatou vaega?
8 I le 2 Korinito 4:1, 2, ua tatou faitau ai: “O le mea lea matou te le faavaivai ai, o i matou ua i ai lenei faiva, ina ua alofaina i matou; a ua matou lafoai mea lilo e mamā ai, e le o savavali ma le amio pepelo, e le o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.” Ua iai le alofa tunoa o le Atua i o tatou luga ina ia tofia ai i tatou i lenei faiva. O se apoapoaiga lenei e faalaeiau ai i tatou ina ia ō atu pea ma le lototetele, ma o le a tatau ona tatou faia lenei mea! Talu ai ua alofagia i tatou e ala i le malamalama mai le Afioga a le Atua, o sa tatou tiute tauave la le faasusulu atu o lea malamalama i isi.—Faatusatusa Mataio 5:14-16.
9 O mea e mamā ai tagata, e pei o le taufaasese, latou te lalafi i tua o faiga lē faamaoni ma faatogafiti. Ae leai se mafuaaga mo i tatou e mamā ai ona o la tatou feau ma le galuega e lē o taufaasese ae o loo amiotonu ma moni. O lea, ua mafai ai ona tatou faasusulu atu le mamalu atoa o le malamalama. Tatou te lē o taulimaina le Afioga a le Atua i se auala faagutugutulua. O le faia faapea o lona uiga o le taulimaina i se auala manatu faapito e maua ai ni mea mo le tagata lava ia, le mamalu, ni aogā, ma le malosi faalelalolagi ma sola ese ai mai teteega ma sauaga mai le lalolagi. O i latou o ē e lē matataʻu e ō mai ia Ieova ma mata e lē ufitia, ma pulatoʻa atu i le mamalu o le malamalama o le upu moni o le a faapena foi ona lē fefefe e fesagaʻi ma o latou tiute tauave. O le a latou faatagaina le malamalama e atagia mai ia i latou.
10. Aiseā ua lē o se sese ai o Molimau a Ieova pe afai ua punitia le tala lelei o le Malo mai le vaaiga a nisi tagata?
10 Afai e punitia e so o se tasi le tala lelei o le Malo mai la latou vaaiga, e lē o se sese la o Molimau a Ieova ae o lo latou lava sese. E lē o natia le tala lelei o le Malo. Ua lauiloa le galuega talaʻi a Molimau a Ieova i le lalolagi aoao. I lea, ua mafai ai ona latou faapea atu e pei ona sa faia e le aposetolo o Paulo: “Na le faia faalilolilo lenei mea.” E moni, e pei ona ia tusi, o le tala lelei ua “talaʻiina atu foi i tagata uma lava i le lalolagi.”—Galuega 26:26; Kolose 1:23.
11. Aiseā ua punitia ai le tala lelei mamalu i le toatele o le fanau a tagata?
11 O i latou o ē o loo natia ai le tala lelei o le Malo o le Atua o ni ē e tetee, o i latou o ē ua faatauasoina e le Tiapolo. (Faatusatusa Mataio 12:30.) Seʻi vaganā ua motusi ese mai i latou mai lotu sese ma mailei a le Tiapolo, ona iai lea o i latou i le laina mo le faaumatiaga. I lalo o le taaʻiga faatemoni, ua tuu ai e na tagata se ufiufi i o latou lava mata, auā ua faapea mai le aposetolo o Paulo i le 2 Korinito 4:3-5: “Afai foi ua ufitia la matou tala lelei, ua ufitia ia i e ua fano; ua faatauasoina manatu o i latou o e le talitonu e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, ua tusa o ia ma le Atua. Auā matou te le talaʻiina i matou, a o Keriso Iesu le Alii; o i matou nei foi o a outou auauna ona o Iesu.”
12. I le faaeseese atu ia i latou ua faatauasoina manatu, ua tali atu faapefea tagata o Ieova i upu i le 2 Korinito 4:6?
12 O i latou ua faatauasoina manatu e lē mananao e talitonu. O lo latou lē talitonu ua tatalaina ai o latou mafaufau i le faaleagaina e temoni. (1 Timoteo 4:1) E lē o mafai ona latou iloa le mamalu o Ieova po o lona faaatagia mai i fofoga o Iesu, le Mose Sili. Ua puea e tagata o Ieova le malamalama mamalu mai le Tusi Paia ma faasusulu atu i isi. O lea o auauna uma a le Atua o ni ē e tauavea le malamalama, ma ua poloaiina e le Atua le malamalama ina ia faasusulu atu. E tatau i le malamalama ona atagia mai i tagata o le Atua ma faasusulu atu i luga o isi o ē o loo i le pouliuli ma i le lamatiaga o le faaumatiaga. O le mea tonu lenei e pei ona taʻua ai e le 2 Korinito 4:6: “Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.” I le manatu e uiga i lenei mea, ua usiusitai ai Molimau a Ieova i le poloaiga tauatua ma faasusulu atu ai lo latou malamalama i isi i le mamalu o le Atua.
Le Oloa Tāua Mamalu i Ipu Mataʻetaʻe
13. O le tuuina ifo o le auaunaga faamanuiaina o le avea o ni ē tauave le malamalama i luga o meafaiola faaletino ua iʻu ai i le ā?
13 I lenei faaeaga sili lē mataʻua o le auaunaga, o se mea ua matuā sili ona tāua faapea ua faamaonia le aogā o le iai o le malamalama i ē tauaveina le malamalama, e ala i le tausia pea o lo latou faamaoni i le Atua. Ina ia faatinoina lenei faaeaga ofoofogia o le auaunaga, ua lē faaaogāina ai e le Atua agelu paia, o ē o loo faanaunau e vaavaai mai i nei mea, ae ua ia tuuina ifo lenei auaunaga faamanuiaina i luga o meafaiola faaletino. (1 Peteru 1:12) O le mea lenei ua ia faia ina ia mataʻutia ai lona lava mana i totonu o vaivaiga faaletagata. E pei ona taʻua i le 2 Korinito 4:7: “A ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou.”
14. (a) O le ā “lenei oa i ipu omea”? (e) Aiseā ua avea ai Mose ma Iesu Keriso o ni faaaʻoaʻoga poto mo i tatou e tusa ai ma le oloa?
14 O ipu i taimi anamua sa masani ona faaaogāina e tuu ai mea tāua. O le ā lenei oa tāua mamalu ua maua e Molimau a Ieova i totonu o ipu omea mataʻetaʻe—o i latou lava, o ni meafaiola vāivāi na faia mai i le efuefu o le eleele? O lenei oloa tāua ua lē na o se malamalama ua faasusulu atu i o latou loto. O le faiva o lena malamalama, o lea faiva, po o le auaunaga, e tatau ona faatinoina i o latou tino faalelalolagi. O le faiva, o le auina atu lea o le malamalama na faasusulu atu e le Atua i o latou loto. O lenei faiva o se oloa tāua lelei ma ua faapea foi ona avea o se faaeaga tautele o le auaunaga o loo auai ai i aso nei e lē gata i le vaega totoe faauuina o le “lafu mamoe itiiti” ae faapea foi ma le “motu o tagata e toatele” o “isi mamoe” a le Leoleo Mamoe Lelei, o Iesu Keriso. (Luka 12:32; Ioane 10:14-16; Faaaliga 7:9) O Mose ma lē ua ia faaatagia, o Iesu Keriso, o ni faaaʻoaʻoga poto ia mo i tatou, e taulaʻi atu ai o tatou loto i lenei oloa tāua o le auaunaga tauatua, “auā o le mea ua i ai lo outou oa, e i ai atoa foi ma o outou loto.”—Mataio 6:19-21; Eperu 11:26.
15, 16. (a) Ua faapefea ona faaalia o le malosi e sili atu na i lo le mea e masani ai e sau mai le Atua ae lē sau mai ia i tatou lava? (e) Aiseā o le a lē taulau ai teteega uma mai le lalolagi ina ia taeiina ipu omea a le Atua?
15 Ua faapefea la ona faaalia le mana e sili atu na i lo le mea e masani ai, e mai le Atua ae lē mai ia i tatou lava? I lenei auala: O na ipu omea mataʻetaʻe, ua pei o i tatou o ē o loo iai lenei auaunaga ma le tofiga faaoaina, o ē ua lē tatau ma onomea ma e lē taitai mafai ona tatou maua sea mamalu o i tatou lava. E lē gata i lea, o le avea o i tatou o ni Molimau a Ieova ua lolo atu i ituaiga uma o omiga mai fili ina ia taumafai e taei i tatou ma faia i tatou ina ia pasae aʻe ina ia tatou lē aogā ai mo le tauaveina o le tofiga mai le Atua. O lea, e tatau ona avea o le mana o Lē Sili na Faia le Tofiga lea e fesoasoani ia i tatou e tumau ai mai le valetaulimaina sili ua faia e lenei lalolagi, ma ia taofi mau i le tofiga ma ia faamaonia le taʻuaogāina i le taofimau i lana auaunaga. Ona lē taulau ai lea e teteega uma mai le lalolagi ona taeiina ipu omea a le Atua ma faoa i latou mai la latou oloa tautele, auā ua tusia i le 2 Korinito 4:8-12:
16 “Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano; o loo tauave i le tino e le aunoa le fasiotia o le Alii o Iesu, ina ia faaalia foi le soifua o Iesu i o matou tino. Auā o i matou nei o loo ola ua tuuina atu pea lava i le oti ona o Iesu, ina ia faaalia foi le soifua o Iesu i o matou tino augavale. O lenei, ua galue le oti i totonu ia te i matou, a o le ola [e ala i le talaʻiga o le tala lelei o le Malo] i totonu ia te outou.”
Ua Faatāuaina e le Motu o Tagata e Toatele “Lenei Oa”
17. Ua faapefea ona faatāuaina e le motu o tagata e toatele “lenei oa” o le faiva o le mamalu?
17 “Ua galue le oti i totonu ia te i matou, a o le ola i totonu ia te outou.” Ua faatatau atu lenei faamatalaga i Kerisiano ua faauuina e le agaga. Peitai, ua lelei ai mo i tatou ona mafaufau i le faiā a le vaega totoe faauuina a le Atua ma le motu o tagata e toatele o isi mamoe. Ua iloa e le vaega faauuina e tatau ona mulimuli ane faaiʻuina la latou galuega faalelalolagi i le maliu e pei ona faia e Iesu, ae o loo iai a latou aumea latou te auai faatasi i le oloa tāua mamalu o le auaunaga, ina ia fesoasoani ia i latou e ala i le faia o le galuega atoa o le talaʻiina o le tala lelei o le Malo. I le pei o le vaega totoe faauuina, ua talisapaia ai e le motu o tagata e toatele o isi mamoe i aso nei faapea e na o le pau lava le oloa tāua o le a faasaoina i le taua aasa o Amaketo ma faaauau atu ai ma le lē faavaivai ma le lē faaumatia i totonu o le lalolagi fou, o le oloa tāua lenei o le faiva faamanuiaina, le auaunaga ia Ieova le Atua ma lana Tupu faamamaluina, o Iesu Keriso. O le a taofimauina e le motu o tagata e toatele lea mea, e ala i le ‘tuuina atu o le auaunaga paia i le Atua i lona malumalu i le ao ma le po.’—Faaaliga 7:15.
18. (a) O le ā ua lē o toe umi ona tupu lea i le mamalu sese o lenei lalolagi? (e) O le ā le “mamalu” na musu ai Iesu, ma e ala i le faia o le ā na ia maua ai le mamalu e sili atu?
18 Ua lē o toe umi lava, ona faaiʻu loa lea e le Atua mamalu sese o lenei faiga leaga o mea o iai—o se “mamalu” sa faaauau ona iai talu ona avatu e Satani le Tiapolo Iesu i luga o le mauga maualuga ma faaali atu ia te ia malo uma o le lalolagi ma “lo latou mamalu.” (Luka 4:5, 6) Sa musu Iesu e talia le ofo o le mamalu mai se puna e pei o lena, ae sa ia tausisi pea i le auala o gaoioiga i le lalolagi lea ua faamaonia e le Atua. Mo le faia faapea, o le a faapaleina ai o ia i le mamalu e sili atu e oo lava i le mamalu faapea o ia, o le Alo pele e toatasi o le Atua, sa olioli ai i le lagi a o leʻi maua lona tofiga faalelalolagi e pei ona faaauivi mai e Ieova.—Ioane 5:36; 17:5; Filipi 2:9-11.
19. O le ā le faaeaga faamamaluina o le auaunaga lea ua latalata i lona faataunuuga atoatoa, ma o le ā la tatou filifiliga e tusa ai o lenei mea?
19 O le iʻuga ua valoia mai o lenei faiga o mea faatiapolo o le a lē oo mai a o leʻi tuuina atu le molimau o le Malo i le lalolagi atoa e avea o se iʻuga matagofie i le gaoioiga a soʻo o Iesu Keriso, o Molimau a Ieova. (Mataio 24:14) Ua tuuina atu nei le molimau o le Malo mo le tolu kuata o le senituri, ma e pei ona faaalia e ala i atinaʻe a malo o le lalolagi ua faia i o tatou taimi, o lena iʻuga na valoia ua tatau ona lata mai. I le iʻuga, o le faaeaga faamamaluina o le auai i le faiva mamalu, le pulega paia, ua tatau ona latalata i lona faataunuuga atoatoa. (Mataio, mataupu 24, 25; Mareko, mataupu 13; Luka, mataupu 21) O lo tatou faaeaga o le auai i le avatua o se molimau i le lalolagi aoao e uiga i le Malo ua faavaeina, o le mea moni o se oloa mamalu ua sili ona faamaualugaina e Molimau a Ieova, i le avea o ni soʻo o lona Alo faanofotupuina o Iesu Keriso. Ua latou faanaunau faamaoni ina ia taofi mau i ai seia faaiʻuina le molimau atu i le Malo, ma seia faapaleina e le Atua e Ona le Malosi Uma lava o Ieova, le tulaga faalevateatea i lana lava molimau totino i lana pule silisili ese i le vateatea.—Sefanaia 3:8.
O ā Au Tali?
◻ Aiseā ua avea ai le faiva a Molimau a Ieova o se faiva mamalu?
◻ Aiseā ua punitia ai le tala lelei i le toatele i aso nei?
◻ O le ā “lenei oa i ipu omea”?
◻ Aiseā ua faaaogā ai e le Atua ipu omea mataʻetaʻe mo lana auaunaga tautele?
◻ Ua faapefea ona faatāuaina e tagata o Ieova “lenei oa,” ma aiseā?
[Ata i le itulau 17]
O le mamalu o le Atua ua atagia mai i le fofoga o Iesu Keriso, le Mose Sili. Ua faaeaina Molimau a Ieova e puea le malamalama mamalu o le Atua mai le Tusi Paia ma faaatagia atu i isi