O Le Soifuaga o Iesu ma Lana Faiva

O Apoapoaiga Faamavae

UA UMA le talisuaga mo le faamanatuga, ae o loo iai pea Iesu ma ona aposetolo i le potu i le fogafale i luga. E ui lava ua toeitiiti ona lē iai lea o Iesu, peitai e tele mea sa tatau ona fai atu ai o ia. “Aua le atuatuvale o outou loto,” ua ia faamafanafana atu ai ia te i latou. “Ia outou faatuatua i le Atua.” Ae tele isi mea atili sa manaomia. Ua ia faaopoopo atu: “Ia faatuatua mai foi ia te au.”

“E tele mea e nonofo ai i le maota o loʻu Tamā,” ua faaauau atu ai Iesu. “Ou te alu e sauni se mea e nonofo ai outou . . . ina ia i ai outou i le mea ou te i ai aʻu. Ua outou iloa le mea ou te alu i ai, ua outou iloa foi le ala.” Sa leʻi manatunatu le au aposetolo faapea o loo fetalai atu Iesu e uiga i lona afio ese atu i le lagi, o lea na fesili atu ai Toma: “Le Alii e, matou te le iloa le mea e te maliu atu i ai, matou te mafaia faapefea ona iloa o le ala?”

“O aʻu nei le ala, ma le upu moni, ma le ola,” ua tali atu ai Iesu. Ioe, e na o le talia lava o ia ma faaaʻoaʻo i auala o lona soifuaga e mafai ai e se tasi ona ulu atu i le fale faalelagi o le Tamā ona, e pei ona fetalai Iesu: “E le alu atu lava se tasi i le Tamā, pe a le ui mai ia te au.”

“Le Alii e, ia e faailoa mai le Tamā ia te i matou,” ua talosaga atu ai Filipo, “ona gata ai lea o matou manao.” E foliga mai sa manao Filipo ina ia saunia e Iesu se faaaliga vaaia o le Atua, e pei o lea sa tuuina atu i taimi anamua i vaaiga ia Mose, Elia, ma Isaia. Ae o le mea moni, o loo maua e le au aposetolo se mea e sili mamao atu ona lelei na i lo lena ituaiga o vaaiga, e pei ona silafia ai e Iesu: “Filipo e, ua loa lava ona ou i ai ia te outou, a e te lei iloa ea aʻu? O le ua vaai mai ia te au, ua vaai o ia i le Tamā.”

Ua matuā faaatagia lelei lava e Iesu le peresona o lona Tamā o lea o le ola ai ma faataʻitaʻi ia te ia, o le iʻuga, o le a pei lava ua vaai moni i le Tamā. Peitai, e sili le Tamā i le Atalii, e pei ona faailoa atu ai e Iesu: “O upu ou te tautala atu ai ia te outou, ou te le tautala fua na o aʻu.” Ua tuuina atu ma le tonu e Iesu le viiga uma o ana aʻoaʻoga i lona Tamā faalelagi.

Maeu le faalaeiauina ai sa tatau ona iai mo le au aposetolo e faalogo atu ia Iesu ua ia taʻu atu nei ia i latou: “O lē talitonu mai ia te au, e faia lava e ia o galuega ou te faia; e fai foi e ia mea e sili i ia mea”! E lē o le uiga o le fetalaiga a Iesu faapea o le a faia e lona au soʻo ni vavega mamana e sili atu na i lo o mea na ia faia. E leai, ae sa uiga o ia faapea o le a latou tauaveina le faiva mo se taimi e sili atu ona umi, i se oganuu e sili atu ona tele, ma i tagata e sili atu ona toatele.

O le a lē tuulafoaia e Iesu ona soʻo ina ua mavae lona afio ese atu. “O mea uma foi tou te ole atu ai i loʻu igoa,” ua ia folafola atu ai, “ou te faia lava.” E lē gata i lea, ua fetalai atu o ia: “Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; o le Agaga lea e tupu mai ai le upu moni.” Mulimuli ane, ina ua mavae lona afio atu i le lagi, ona liligi mai ai lea e Iesu o le agaga paia i luga o lona au soʻo, o le tasi lea fesoasoani.

Ua latalata mai le maliu ese atu o Iesu, e pei ona ia fetalai ai: “E toe itiiti ona le vaai mai lea o le lalolagi ia te au.” O le a avea Iesu o se meafaiola agaga e lē mafai e se tagata ona vaai i ai. Ae ua toe folafola mai foi e Iesu i ona aposetolo faamaoni: “A e vaai mai pea outou ia te au; ou te ola aʻu, o le mea lea e ola ai outou.” Ioe, o le a lē gata ina faaali mai Iesu ia i latou i le tino faaletino pe a mavae lona toe faatuina aʻe, ae i le taimi tatau o le a ia toe faatutūina i latou i le ola faatasi ma ia i le lagi e avea o ni meafaiola agaga.

Ua taʻu atu nei e Iesu se tulafono faigofie: “O le ua ia te ia aʻu poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e loʻu Tamā; ou te alofa foi ia te ia, ma ou faaali ia te ia.”

I lenei mea, ua fesili atu ai Iuta o lē ua taʻua o Tataio: “Le Alii e, pe se a le mea o le a e faaali mai ai oe ia te i matou, a e le o le lalolagi?”

“Afai e alofa mai se tasi ia te au,” ua tali atu ai Iesu, “e tausia e ia laʻu upu; e alofa foi loʻu Tamā ia te ia . . . O le le alofa ia te au, e le tausia e ia aʻu upu.” I le lē pei o ona soʻo usiusitai, ua lē amanaia ai e le lalolagi aʻoaʻoga a Keriso. O lea na te lē faaalia o ia lava ia i latou.

I le taimi o lana faiva faalelalolagi, na aʻoaʻo ai e Iesu mea e tele i ona aposetolo. O le ā faapefea ona latou manatua na mea uma,ae maise lava talu ai, e oo i le taimi lea, sa leʻi taulau ona latou puea ni mea se tele? E fiafia lava, ona ua folafola mai e Iesu: “O le Fesoasoani, o le Agaga Paia lea, e auina mai e le Tamā i loʻu igoa, o ia lava na te aʻoaʻo ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.”

I le toe faamafanafanaina o i latou, ua fetalai atu Iesu: “Ou te tuuina atu ia te outou le manuia; o loʻu manuia ou te avatu ai ia te outou; . . . Aua le atuatuvale o outou loto, aua foi tou te matatau.” E moni, ua afio ese atu Iesu, ae ua ia faamatala mai: “Ana outou alofa mai ia te au, po ua outou olioili i loʻu fai atu, Ou te alu atu i le Tamā; auā e sili loʻu Tamā ia te au.”

Ua itiiti le taimi o totoe o Iesu faatasi ma i latou. “Ou te le toe tautala atu ia te outou i ni upu e tele,” ua fetalai atu ai o ia, “auā o le a sau le alii o lenei lalolagi, a e le maua e ia se mea ia te au.” O Satani le Tiapolo, o lē sa ulu atu ia Iuta ma taofia o ia, o le alii o le lalolagi. Ae e leai se vaivaiga agasala ia Iesu faapea sa mafai ai e Satani ona faia se faiga ina ia faaliliuese ai o ia mai le auauna atu i le Atua. Ioane 14:1-31; 13:27; Luka 22:3, 4; Esoto 24:10; 1 Tupu 19:9-13; Isaia 6:1-5.

▪ O fea o le a maliu atu iai Iesu, ma o le ā le tali ua maua mai e Toma e faatatau i le auala i inā?

▪ E ala i lana talosaga, o le ā sa foliga mai sa manao iai Filipo ina ia saunia e Iesu?

▪ Aiseā ua mafai ai e se tasi o lē ua vaai ia Iesu ona vaai foi i le Tamā?

▪ Ua faapefea ona faia e soʻo o Iesu galuega e sili na i lo o lea na ia faia?

▪ I le ā le uiga na lē maua ai e Satani se mea ia Iesu?