O le Soifuaga o Iesu ma Lana Faiva

Olioli i se Faiā Vavalalata

MULIMULI ane ina ua uma le talisuaga o le faamanatuga, sa faalaeiau atu ai e Iesu ona aposetolo i se talanoaga mafana moni vavalalata e leʻi fuafuaina. Atonu po o le mavae o le tulua o po ma ao. Ona uunai atu lea o Iesu: “Tutū ia i luga, ina tatou o ese ia.” Ae peitai, a o latou leʻi ō ese atu, na uunaia Iesu e lona alofa mo i latou, ona faaauau ai pea lea ona tautala atu, ua saunia ai se tala faatusa faagaee loto.

“O aʻu nei o le vine moni, a o loʻu Tamā o lē galue vine ia,” ua ia amata ai. Na totō e Lē Galue Vine Sili, o Ieova le Atua, le vine faafaatusa lenei ina ua ia faauuina Iesu i le agaga paia i lona papatisoga i le tau e afu ai mea i le 29 T.A. Ae ua faaauau pea ona faaalia e Iesu faapea o le vine ua faaatagia ai nisi mea e ese ma sili atu na i lo ia, i lona fetalai atu:

“O la uma lava o ia te au e le fua, e aveeseina e ia; a o la uma e fua, e teuteu e ia, ina ia fua mai ai atili. . . . Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te au. O aʻu nei o le vine, o la outou.”

I le Penetekoso, o le 51 ai lea o aso mulimuli ane, na avea ai le au aposetolo ma isi, o lālā o le vine ina ua liligiina ifo le agaga paia ia i latou. Mulimuli ane, ona avea ai lea o tagata e 144,000 ma lālā o le vine faafaatusa. O nei lālā, faatasi ai ma le vine, o Iesu Keriso, ua faia aʻe ai e i latou nei se vine faafaatusa ua fuaina mai fua o le Malo o le Atua.

Ua faamatala atu e Iesu le ki i le fuaina mai o fua: “O lē tumau ia te au, ma aʻu ia te ia, o ia lava e fua tele mai; auā e le mafaia e outou ona fai o se mea e tasi pe a aʻu le i ai.” Ae peitai, afai e lē taulau i se tagata ona fuaina mai fua, ua fetalai ai Iesu, “ona lafoaiina lea o ia i tua pei o le la laau, ma faapopoina, ona faapotopotoina ai lea e tagata, ma lafo i le afi, ua susunu ai.” I le isi itu, ua folafola atu e Iesu: “Afai tou te tumau ia te au, a tumau foi aʻu upu ia te outou, o mea uma lava tou te mananao i ai, tou te ole atu ai, ona faia lea mo outou.”

Ua faaauau e Iesu ona faaali atu i ona aposetolo le mea e viia ai le Tamā, o lona uiga, “pe a outou fua tele mai; ona fai ai lea outou moʻu soo.” O le fua e finagalo le Atua e maua mai i lālā o lo latou faaalia lea o uiga e pei o Keriso, ae maise lava le alofa. E lē gata i lea, talu ai sa avea Keriso o lē folafola o le Malo o le Atua, ua aofia ai foi la i le fua o loo moomia la latou galuega o le faia o soʻo e pei ona sa ia faia.

“Ia tumau pea outou i loʻu alofa,” ua uunai atu ai nei Iesu. Ae peitai, e faapefea ona faia faapea e ona aposetolo? “Afai tou te tausia aʻu poloaiga,” ua ia fetalai atu ai, “ona tumau lea o outou i loʻu alofa.” I le faaauau pea, ua faamatala ai e Iesu: “O laʻu poloaiga lenei, ia outou fealofani, pei ona ou alofa atu ia te outou. E le sili lava le alofa o se tasi i lenei alofa, ia tuuina atu e se tasi lona ola e sui aʻi ana uo.”

Ua toe o ni nai itula, ona faataʻitaʻia loa lea e Iesu lenei alofa silisili e ala i le foaiina atu o lona soifua e sui aʻi ona aposetolo, faapea ma isi uma o ē o le a faaalia le faatuatua ia te ia. E ao i lana faaaʻoaʻoga ona uunaia ai ona soʻo ina ia iai lea lava alofa faataulagaina totino o le tasi i le isi. O le a mataulia ai i latou i lenei alofa, e pei ona sa muai taʻua e Iesu: “O le mea lea e iloa ai e tagata uma lava o oʻu soo outou, pe afai ua outou fealofani.”

I le faailoaina atu o ana uo, ua fetalai Iesu: “O aʻu uo outou, pe afai tou te faia mea uma lava ou te fai atu ai ia te outou. Ou te le toe taʻua outou o auauna, auā e le iloa e le auauna mea e faia e lona alii; a ua ou taʻua outou o uo, auā ua ou faailoa atu ia te outou mea uma na ou faalogo ai i loʻu Tamā.”

Maeu se faiā tautele ia maua—o le avea ma uo mafana vavalalata a Iesu! Ae ina ia faaauau ona olioli i lenei faiā, e tatau i ona soʻo ona tumau i le ‘fuaina mai pea o ni fua.’ Afai latou te faia faapea, ua fetalai Iesu, “[o le a] foaiina atu ia te outou e le Tamā mea uma lava tou te ole atu ai ia te ia i loʻu igoa.” E mautinoa, o se taui sili lea mo le fuaina mai o fua o le Malo!

Ina ua uma ona toe uunai atu foi i le au aposetolo ina ia “fealofani,” ona faamatala atu lea e Iesu faapea o le a ʻinoʻino mai le lalolagi ia i latou. Ae, na ia faamafanafana ia i latou: “Afai e ʻinoʻino mai le lalolagi ia te outou, ua outou iloa ua muamua ona ʻinoʻino mai ia te au, i lona ʻinoʻino ia te outou.” Ona sosoo ai lea ma le faaalia e Iesu o le pogai e ʻinoʻino ai le lalolagi i ona soʻo, i le faapea atu: “A e le ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi ia te outou.”

I le faamalamalamaina atu atili o le mafuaaga o le ʻinoʻino o le lalolagi, ua faaauau Iesu: “A e faia e i latou ia mea uma ia te outou ona o loʻu igoa, auā e lei iloa e i latou o ia [Ieova le Atua] ua auina mai aʻu.” O le iʻuga, o galuega faavavega a Iesu ua matuā taʻusalaina ai i latou o ē ʻinoʻino ia te ia, e pei ona ia matauina: “Ana aʻu lei faia ia te i latou o galuega e lei faia lava e se tasi, po ua leai sa latou agasala; a o lenei, ua latou vaai mai, ma latou ʻinoʻino mai ia te au atoa ma loʻu Tamā.” O lea, e pei ona fetalai Iesu, ua faataunuuina le mau: “Ua latou ʻinoʻino mai fua lava ia te au.”

E pei ona sa ia muai faia, ua toe faamafanafana atu Iesu ia i latou i le folafola atu i ai o le a auina atu le fesoasoani, le agaga paia, o le mana galue malosi lea o le Atua. “O ia lava e molimau ia te au. Tou te molimau foi.” Ioane 14:31–15:27; 13:3, 35; Kalatia 6:16; Salamo 35:19; 69:4.

▪ O anafea na totō ai e Ieova le vine faafaatusa, ma o anafea ma faapefea ona avea isi ma vaega o le vine?

▪ E fia lālā o le vine faafaatusa na mulimuli ane iai?

▪ O le ā le fua o loo finagalo le Atua e maua mai i lālā?

▪ E mafai faapefea ona avea i tatou o uo a Iesu?

▪ Aiseā e ʻinoʻino ai le lalolagi i soʻo o Iesu?