Agaʻi i Luma i le Sini!
Mea Tāua mai le Tusi o Filipi
SA MANAO le aposetolo o Paulo i Kerisiano i Filipi ina ia agaʻi pea i luma i le sini mo le taui o le ola e faavavau. I lea, na ia tusi atu ai ia i latou pe ā ma le 60 po o le 61 T.A., i le taimi o lona uluai faafalepuipuiina i Roma. Sa auina atu lana tusi i se faapotopotoga na ia faavaeina pe ā ma le sefulu ni tausaga muamua atu i Filipi, o se aai na faavaeina e Filipo o Masetona (le tamā o Alesana le Sili). E oo mai i le uluai senituri T.A., ua avea o le “aai laumua o le itumalo o Maketonia,” lea ua avea nei o se vaega o Eleni i matu ma Iokasalavia i saute.—Galuega 16:11, 12, NW.
Sa matitiva tagata talitonu i Filipi ae sa limafoai. E sili atu i le faatasi na latou auina atu ai se mea e tusa ai ma manaoga o Paulo. (Filipi 4:14-17) Ae i lana tusi sa sili atu na i lo o se tusi faafetai. Sa avatu ai foi ni faalaeiauga, faailoa atu ai le alofa, ma saunia ai fautuaga.
Ua Iloatino Uiga Faa-Kerisiano
Na amata lava le tusi a Paulo i le faaalia o lona alofa mo tagata talitonu i Filipi. (1:1-30) Sa ia faafetai ia Ieova mo a latou meaalofa e faaauiluma ai le tala lelei ma tatalo faapea ia faateleina lo latou alofa. Sa fiafia Paulo faapea o le faafalepuipuiina o ia na faapogaia ai i latou ina ia faaalia ‘le lototele e sili atu e tautala ai i le afioga a le Atua ma le lē mataʻu.’ Sa faanaunau o ia ina ia faatasi ma Keriso peitai sa ia lagona e mafai ona ia auauna atu ia i latou. Sa manao foi Paulo ia i latou ina ia “finau faatasi mo le faatuatua ua i le tala lelei.”
Na sosoo ai ma le fautuaga i uiga ma amioga. (2:1-30) Sa faalaeiauina tagata Filipi ina ia faaalia le naunau totino i isi ma ia faaalia le loto maulalo e pei o Keriso. Sa “pupula ia te i latou . . . faapei o mea e faamalamalama aʻi le lalolagi” ma na uunaia i latou ina ia tausisia ona ‘taofi mau i le upu o le ola.’ Sa faamoemoe Paulo e auina atu Timoteo ia i latou ma sa faamautinoa atu faapea o ia lava foi o le a vave ona alu atu. Ina ia faamautinoa atu ia i latou e uiga ia Epaferoti, o lē sa maʻi tele, na auina atu ai e Paulo ia i latou lenei auauna faamaoni.
Ia Agaʻi Pea i Luma i le Sini
Na sosoo ai ma le faailoa atu e le aposetolo i tagata Filipi po o fea e tuu i ai lo latou mautinoa a o latou agaʻi i luma i le sini. (3:1-21) Na tatau ona tuu ia Iesu Keriso, ae lē i le tino pe i le peritomeina e pei ona sa faia e nisi. Sa manatu Paulo e teena ona faamaoniga faaletino ona o le “silisili ese o le poto i la Keriso.” O le aposetolo sa “tausisi atu i le faailoga, ia maua ai le taui na valaauina ai mai lugā e le Atua ia Keriso Iesu” ma na faalaeiauina foi tagata Filipi ina ia iai lea lava uiga e tasi o manatu.
O le faatatauina o le fautuaga faaiʻu a Paulo o le a fesoasoani i tagata Filipi e tausia ai pea i mafaufau le sini ma le taui. (4:1-23) Sa ia uunaia tagata Filipi ina ia tuu atu o latou popolega i le Atua i le tatalo ma faatumuina o latou mafaufau i manatu e atoatoa ona mamā. Sa toe faamalo atu foi Paulo ia i latou mo le limafoai ma faaiʻu atu i alofaaga ma moomooga faapea ia faatasi le alofa tunoa o le Alii o Iesu Keriso i le agaga ua latou faaalia.
O le tusi a Paulo i tagata Filipi ua siitia ai le limafoai, alofa ma le loto maulalo. Ua faalaeiauina ai le mautinoa ia Keriso ma tatalo ma le loto i le Atua. Ma o upu a Paulo e mautinoa lava le fesoasoani i Molimau a Ieova ina ia agaʻi ai pea i luma i le sini mo le taui o le ola e faavavau.
[Pusa/Ata i le itulau 22]
Agaʻi i le Sini: “Ou te faagalogalo i mea ua tuanai, ou te momoʻe punou aʻi foi i mea o lumanai,” na tusi ai Paulo, “ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu.” (Filipi 3:13, 14) Sa faamalosi e le aposetolo ia lava e pei o se tasi o loo tamoʻe i se tausinioga. Na te leʻi faamaumauina se taimi ma taumafaiga e tepa ai i tua ae sa tamoʻe punou aʻi agaʻi i lona sini—e pei o se tagata tamoʻe o loo tauivi ina ia oo atu i le tini. Mo Paulo ma isi Kerisiano faauuina, o le taui o le ola faalelagi e ala i le toe faatutūina pe a uma se auaunaga faalelalolagi o le faamaoni i le Atua. E tusa lava pe o o tatou faamoemoega e faalelagi pe faalelalolagi, ae seʻi o tatou tausia pea le faamaoni ia Ieova ma tamomoʻe punouaʻi agaʻi i le sini i le avea o ana Molimau.—2 Timoteo 4:7.