Ia Pipii Mau ia Ieova

“Ia finafinau i le tatalo.”—ROMA 12:12.

1. O le ā le finagalo o Ieova e uiga i tatalo, ma o le ā le faalaeiauga na aumaia e le aposetolo o Paulo e uiga i le faia o tatalo?

O IEOVA ‘o le Atua na te aumaia le faamoemoe’ i ona tagata faamaoni uma lava. Ona o ia o le “faafofoga tatalo,” ua ia faafofoga ai i a latou faatoga mo se fesoasoani ina ia maua ai le faamoemoe olioli ua ia faataatia mai i o latou luma. (Roma 15:13; Salamo 65:2) Ma e ala i lana Afioga, le Tusi Paia, ua ia faalaeiauina ai ana auauna uma lava e faalatalata atu ia te ia i so o se taimi latou te mananao ai. O loo iai pea o ia, ma o loo faanaunau e talia mea e sili ona faapopoleina ai i latou. O le mea moni, ua ia faalaeiauina i latou ina “ia finafinau i le tatalo” ma ia “tatalo e le aunoa.”a (Roma 12:12; 1 Tesalonia 5:17) E finagalo Ieova ina ia lē aunoa ona valaau atu Kerisiano uma ia te ia i le tatalo, ia sasaa atu o latou loto ia te ia ma ia faia faapea e ala i le suafa o lona Alo pele, o Iesu Keriso.—Ioane 14:6, 13, 14.

2, 3. (a) Aiseā na apoapoai mai ai le Atua ia i tatou ina ia “finafinau i le tatalo”? (e) O le ā le faamautinoaga ua ia i tatou faapea e finagalo le Atua ia i tatou e tatalo?

² Aiseā ua aumaia ai e le Atua ia i tatou lenei apoapoaiga? Auā e mafai ona matuā faalavelavea i tatou i omiga ma avega tauave o le olaga e faapea ai ona galo ia i tatou ona tatalo. Pe atonu foi e osofaia i tatou i faafitauli ma faapogaia ai i tatou e faamuta lo tatou olioli i le faamoemoe ma lē toe tatalo ai. I le manatu atu i nei mea, tatou te manaomia ai ni faamanatu e faapea ona faalaeiau ai i tatou ina ia tatalo ma ia matuā pipii mau ai i le puna o le fesoasoani ma faamafanafanaga, o Ieova lo tatou Atua.

³ Na tusia e le soʻo o Iakopo: “Ia outou faalatalata atu i le Atua, ona faalatalata mai lea o ia ia te outou.” (Iakopo 4:8) Ioe, e lē o maualuga tele pe o mamao ese le Atua ua lē mafai ai ona faafofogaina a tatou olega ia te ia, e ui lava i lo tatou tulaga lē lelei atoatoa faaletagata. (Galuega 17:27) E lē gata i lena, e lē faalotolotolua ma e lē faapea ua lē manatu mamafa mai o ia. Fai mai le faisalamo: “O fofoga o Ieova o loo faasaga i e amiotonu, e liliu mai foi ona taliga i a latou alaga [mo le fesoasoani].”—Salamo 34:15; 1 Peteru 3:12.

4. E mafai faapefea ona faatusaina le uaʻi mai o Ieova i tatalo?

⁴ Ioe, ua faalaeiauina e Ieova tatalo. E mafai ona tatou faatusaina lenei i se faatasiga o loo talanoa faatasi ai ni tagata se toatele. O loo e iai foi i inā, e faalogologo i tala a isi. O lau vaega, e pei oe o sē e mataʻitūina. Ae teʻi ane ua liliu atu se tasi ia te oe, ma taʻu atu lou igoa, ma taulai atu ana upu ia te oe. Ua puʻeina ai e lenei mea lou uaʻi atu i se auala faapitoa. I se tulaga faapena, ua uaʻi mai ai pea le Atua i ona tagata, i so o se mea atonu latou te iai. (2 Nofoaiga a Tupu 16:9; Faataoto 15:3) O lea, ua ia faafofogaina ai a tatou upu, puipuia ma naunau mai ia i tatou a o ia silasila mai. Peitai, a tatou valaau atu i le suafa o le Atua i le tatalo, ona uaʻi mai ai lea o ia, ma ua taulai mai nei o ia i se auala iloga. E ala i lona mana, ua mafai ai foi e Ieova ona iloa ma malamalama i olega lēleoa ua ofoina atu e le tagata mai totonu o le nofoaga lilo o lona loto ma le mafaufau. Ua faamautinoaina i tatou e le Atua faapea o le a ia matuā faalatalata mai ia i latou uma o ē valaau atu ma le loto faamaoni i lona suafa ma saili e pipii mau atu ia te ia.—Salamo 145:18.

Tali atu e Tusa ma le Fuafuaga a le Atua

5. (a) O le ā ua faaalia e le fautuaga ia “finafinau i le tatalo” e uiga i a tatou tatalo? (e) E faapefea ona tali mai le Atua i tatalo?

⁵ O le fautuaga ina ia finafinau i le tatalo, ua faaalia ai faapea i nisi taimi, atonu e faatagaina ai i tatou e Ieova ina ia faaauau pea ona tatalo e uiga i se mataupu a o ia leʻi aumaia sana tali. Atonu foi e iʻu ai ina tatou vaivai e talosaga atu i le Atua mo lona finagalo malie po o le alofa ma le agalelei atonu ua matuā manaomia lava ae ua loa ona faatuai. O lea, ua fautuaina ai i tatou e Ieova le Atua ina ia aua neʻi mafuli atu i so o se tasi o na mea ae ia faaauau pea ona tatalo. E ao ona faaauau pea ona tatou ole atu ia te ia e uiga i o tatou popolega, ma mautinoa e faaaloalo o ia i a tatou tatalo ma o le a ia faataunuuina o tatou manaoga moni, ae lē na o mea atonu ua tatou faailoa atu. E lē taumatea ua faapaleniina e Ieova le Atua a tatou faatoga e tusa ma lana fuafuaga. Mo se faaaʻoaʻoga, atonu e aofia ai nisi i a tatou talosaga. E mafai ona tatou faatusaina le mataupu i se tamā o lē na talosaga i ai lona atalii mo se uila vilivae. O loo iloa e le tamā faapea afai na te faatauina se uila vilivae mo lona atalii lena, o le a manao foi le isi ona atalii i sana uila vilivae. Talu ai ona e itiiti tele le tasi atalii mo se uila vilivae, atonu e filifili ai le tamā e aua le faatauina mai i lena taimi patino. I se auala faapena, ina ia tusa ma lana fuafuaga ma le taimiga o mataupu, ua filifilia ai e lo tatou Tamā faalelagi le mea e matuā sili ona lelei mo i tatou atoa ma isi.—Salamo 84:8, 11; faatusatusa Sapakuka 2:3.

6. O le ā le faataoto na avatu e Iesu e uiga i tatalo, ma o le ā ua faaalia i le finafinau e tatalo?

⁶ E aogā foi ona matauina le faataoto na aumai e Iesu e uiga i le manaoga mo ona soʻo “ina ia tatalo soo e [lē aunoa], a e aua le faavaivai.” Talu ai ona e leʻi maua e se fafine ua oti lana tane le faamasinoga tonu, sa finafinau ai o ia i lana talosaga i se faamasino faaletagata seia oo ina mulimuli ane faia ia te ia le faamasinoga tonu. Na faaopoopo mai Iesu: “Pe le faia ea e le Atua le faamasinoga [tonu] mo e na ia filifilia”? (Luka 18:1-7, LF) O le finafinau i le tatalo e faaalia ai lo tatou faatuatua, lo tatou faalagolago ia Ieova, lo tatou naunau e pipii mau ia te ia ma faia a tatou faatoga, a ia tuu atu i ona aao le faataunuuga.—Eperu 11:6.

Faaaʻoaʻoga o le Pipii Mau ia Ieova

7. E mafai faapefea ona tatou faataʻitaʻi i le faatuatua o Apelu i le pipii mau ia Ieova?

⁷ O loo tumu le Tusi Paia i tala e uiga i tatalo na faaleoina atu e auauna a le Atua. “Na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Ua faamalosia lo tatou faamoemoe e ala i lo tatou iloiloina o nisi o faaaʻoaʻoga a i latou o ē na pipii mau ia Ieova. Na ofoina atu e Apelu se taulaga e talileleia i le Atua, ma e ui ina leai se tatalo o taʻu mai ai, ae lē masalomia na ia faalatalata atu ia Ieova i le tatalo ina ia mafai ai ona talia lana taulaga. Ua faapea mai le Eperu 11:4: “O le faatuatua na avatu ai e Apelu i le Atua le taulaga e sili ona lelei i la Kaino; ona o lea ua taʻua ai o ia ua amiotonu.” Sa iloa e Apelu le folafolaga a le Atua o loo i le Kenese 3:15, ae a faatusatusa atu ma mea ua tatou iloa i le taimi nei, sa itiiti lava mea na ia iloa. E ui i lea, sa gaoioi Apelu e tusa ma le poto na ia maua. O lea, i aso nei, e leʻi oo ina lava le poto o nisi o ē fou i le upu moni a le Atua, peitai, ua latou tatalo ma faaaogāina le tele o le poto ua ia i latou, e pei ona sa faia e Apelu. Ioe, latou te gaoioi i le faatuatua.

8. Aiseā e mafai ai ona tatou mautinoa sa pipii mau Aperaamo ia Ieova, ma o le ā le fesili e ao ona tatou fesili ai ia i tatou lava?

⁸ O le isi auauna faamaoni a le Atua o Aperaamo, le “tamā o e faatuatua uma lava.” (Roma 4:11) I aso nei, e sili atu na i lo se isi lava taimi muamua, ua tatou manaomia ai le faatuatua malosi, ma e manaomia ona tatou tatalo i le faatuatua, e pei ona sa faia e Aperaamo. Fai mai le Kenese 12:8 e faapea, na ia faia se fata faitaulaga “ia Ieova . . . , ma ua valaau atu i le suafa o Ieova.” Sa iloa e Aperaamo le suafa o le Atua ma faaaogāina i tatalo. Mai lea taimi i lea taimi sa finafinau ai o ia ma le loto faamaoni i le tatalo, ma valaau atu “i le suafa o Ieova, o le Atua e faavavau.” (Kenese 13:4; 21:33) Na valaau atu Aperaamo i le Atua e ala i le faatuatua lea na lauiloa ai o ia. (Eperu 11:17-19) Sa fesoasoani le tatalo ia Aperaamo e faaauau ai pea ona matuā olioli i le faamoemoe o le Malo. Pe o tatou mulimuli ea i le faaaʻoaʻoga a Aperaamo o le finafinau i le tatalo?

9. (a) Aiseā e matuā aogā ai tatalo a Tavita i tagata o le Atua i aso nei? (e) O le ā e ono iʻu i ai lo tatou tatalo e pei ona sa faia e Tavita ina ia pipii mau ai ia Ieova?

⁹ Sa tulagaese Tavita e uiga i le finafinau i le tatalo, ma ua faataʻitaʻia i ana salamo mea e ao ona aofia ai i tatalo. Mo se faaaʻoaʻoga, e mafai ona tatalo ma le talafeagai auauna a le Atua mo mea e pei o le faaolataga po o le laveaiga (3:7, 8; 60:5), le taʻitaʻiga (25:4, 5), le puipuiga (17:8), le faamagaloina o agasala (25:7, 11, 18), ma se loto mamā (51:10). Ina ua lagona e Tavita le mafatia, sa tatalo o ia faapea: “Ia e faafiafia mai le loto o lau auauna.” (86:4) E mafai foi ona tatou tatalo faapena e faafiafia ai le loto, i le iloaina faapea e naunau Ieova ina ia tatou olioli i lo tatou faamoemoe. Sa pipii mau Tavita ia Ieova ma tatalo faapea: “Ua pipii atu lava loʻu loto ia te oe; o lou aao taumatau ua taofiina ai aʻu.” (63:8) Pe o le a tatou pipii mau atu ea ia Ieova, e pei ona sa faia e Tavita? Afai tatou te faia faapea, o le a ia fesoasoani foi ia i tatou.

10. O ā manatu sese na iai i le faisalamo o Asafo i se tasi taimi, ae o le ā sa oo ina ia iloa?

¹⁰ Ina ia tatou pipii mau ia Ieova, e manaomia ona tatou alofia le losilosi i ē amioleaga ona o o latou olaga saoloto ma le pupū i mea faitino. Na manatu le faisalamo o Asafo i se tasi taimi faapea e leai se aogā e auauna ai ia Ieova, ona o loo “manuia i le olaga nei” ē amioleaga. Peitai, na ia iloa le sese o ona manatu auā o loo iai ē amioleaga “i mea maseesee.” Sa ia iloatino faapea e leai se mea e sili atu ona lelei na i lo le pipii mau ia Ieova, ma ia faaleoina ai ia lava i le Atua i lenei auala: “E le aunoa ona ta faatasi ma oe; na e taofiina loʻu lima taumatau. Auā faauta, e fano lava o e faamamao ma oe; . . . A o aʻu nei, ou te faalatalata atu i le Atua ou te lelei ai; ua ou faia le Alii o Ieova ma ou malu, ina ia ou taʻuina atu o au galuega uma.” (Salamo 73:12, 13, 18, 23, 27, 28) Na i lo le losilosi i olaga saoloto o ē amioleaga, o tagata e aunoa ma se faamoemoe, talosia ia tatou faataʻitaʻi ia Asafo i le pipii mau ia Ieova.

11. Aiseā ua avea ai Tanielu ma faaaʻoaʻoga lelei o le pipii mau ia Ieova, ma e mafai faapefea ona tatou faataʻitaʻi ia te ia?

¹¹ Sa matuā finafinau aʻiaʻi Tanielu i le tatalo, e oo lava ina ua fesagaʻi ma se tulaga mataʻutia o le iai i le lua o leona ona o le lē amanaia o faasasaaga a taʻitaʻi e uiga i tatalo. Peitai, na “auina mai e [Ieova] lana agelu, ua punitia ai gutu o leona,” ma laveaiina ai Tanielu. (Tanielu 6:7-10, 22, 27) Na matuā faamanuiaina lava Tanielu ona o lona finafinau i le tatalo. Pe tatou te finafinau foi e tatalo, ae maise lava pe a fesagaʻi ma teteega i la tatou talaʻiga o le Malo?

Lo Tatou Faaaʻoaʻo, o Iesu

12. (a) I le amataga o lana faiva, o le ā le faaaʻoaʻoga na faataatia e Iesu e uiga i le tatalo, ma e mafai faapefea ona aogā lenei i Kerisiano? (e) O le ā ua faaalia e le tatalo faaaʻoaʻo a Iesu e uiga i tatalo?

¹² Talu mai lava le amataga o lana faiva faalelalolagi, ua matauina ai le auai o Iesu i tatalo. Ua faataatia e lona taunapa e tatalo a o papatisoina, se faaaʻoaʻoga lelei mo i latou e papatisoina i le vai i aso nei. (Luka 3:21, 22) E mafai ona tatalo se tasi mo le fesoasoani a le Atua ina ia faataunuuina ai le mea ua faailogaina e le papatisoga i le vai. Sa fesoasoani foi Iesu i isi ina ia faalatalata atu ia Ieova i le tatalo. I se mea na tupu a o tatalo Iesu i se isi nofoaga, sa faapea atu se tasi o ona soʻo ia te ia ina ua maeʻa: “Le Alii e, ia e aʻoaʻo mai ia te i matou [pe faapefea ona] tatalo.” Ona faamatala atu lea e Iesu o le mea ua lauiloa nei o le tatalo faaaʻoaʻo, lea ua faaalia ai le faasologa o mataupu faapea e ao ona avatu le faamuamua i le suafa ma le fuafuaga a le Atua. (Luka 11:1-4) O lea, e manaomia ona tatou tausisi i mea moni ma paleni i a tatou tatalo, ia aua neʻi faagaloina “mea e sili ona tāua.” (Filipi 1:9, 10, NW) O le mea moni, e iai taimi e manaomia ai ona faailoa atu se manaoga faapitoa po o se faafitauli patino. E pei o Iesu, e mafai ona tatalo atu Kerisiano i le Atua mo le malosi e tauaveina ai nisi o tofiga pe ina ia faafetaiai ai ni tofotofoga patino po o mea mataʻutia. (Mataio 26:36-44) O le mea moni, e mafai i tatalo totino ona aofia ai vaega uma o le olaga.

13. Sa faapefea ona faaalia e Iesu le tāua o le tatalo mo isi?

¹³ E ala i lana faaaʻoaʻoga matagofie, na faaalia ai e Iesu le tāua o le tatalo mo isi. Sa ia silafia o le a inosia ma sāuaina ona soʻo, e pei foi ona oo ia te ia. (Ioane 15:18-20; 1 Peteru 5:9) O le mea lea, na ole atu ai o ia i le Atua, “e tausi ia te i latou [ona o lē o loo leaga].” (Ioane 17:9, 11, 15, 20) Ma i le iloaina o le tofotofoga faapitoa o loo fotuai mai luma mo Peteru, na ia fetalai atu ai ia te ia: “Ua ou faatoga mo oe, ina neʻi mavae lou faatuatua.” (Luka 22:32) Maeu le aogā pe afai tatou te faaauau foi ona tatalo mo o tatou uso, ma mafaufau i isi ae lē tau o o tatou lava faafitauli ma faanaunauga!—Filipi 2:4; Kolose 1:9, 10.

14. E faapefea ona tatou iloa sa matuā pipii mau Iesu ia Ieova i le gasologa atoa o lana faiva faalelalolagi, ma e mafai faapefea ona tatou faataʻitaʻi ia te ia?

¹⁴ I le faagasologa o lana faiva, sa finafinau ai Iesu e tatalo, ma matuā pipii mau ia Ieova. (Eperu 5:7-10) Ua sii mai e le aposetolo o Peteru i le Galuega 2:25-28, le Salamo 16:8 ma faatatauina i le Alii o Iesu Keriso e faapea: “Ua fai mai Tavita [e uiga] ia te ia, Na ou ilo atu [Ieova] i oʻu luma e le aunoa; auā o i loʻu itu taumatau o ia, ina neʻi faagaeetia aʻu.” E mafai foi ona tatou faia faapena. E mafai ona tatou tatalo ina ia faalatalata mai le Atua ia i tatou, ma e mafai ona tatou faaalia lo tatou faalagolago ia Ieova e ala i lo tatou manatunatu pea ia te ia. (Faatusatusa Salamo 110:5; Isaia 41:10, 13.) Ona tatou alofia ai lea o ituaiga uma lava o faafitauli, auā o le a lagolagoina i tatou e Ieova, ma o le a lē taitai ona tatou gatete ai.

15. (a) E faatatau i le ā e ao ai ona aua neʻi tatou lē taulau ona finafinau e tatalo? (e) O le ā le faaeteetega ua aumaia e uiga i lo tatou loto faafetai?

¹⁵ Tau ina ia aua lava neʻi lē taulau ona tatou faafetai atu ia Ieova mo lona agalelei uma ia i tatou, ioe, “le alofa tunoa o le Atua ua matuā tele,” lea e aofia ai lana meaalofa o lona Alo o se taulaga togiola mo a tatou agasala. (2 Korinito 9:14, 15; Mareko 10:45; Ioane 3:16; Roma 8:32; 1 Ioane 4:9, 10) O le mea moni, i le suafa o Iesu, ia “faafetai pea lava ona o mea uma i le Atua le Tamā.” (Efeso 5:19, 20; Kolose 4:2; 1 Tesalonia 5:18) E tatau ona tatou faaeteete ia aua neʻi galo lo tatou loto faafetai mo mea tatou te mafatia ai ona ua alu uma lo tatou taimi i mea tatou te lē o maua po o tatou faafitauli totino.

Lafo atu o Tatou Popolega ia Ieova

16. Pe a ōia i tatou i nisi o popolega, o le ā e ao ona tatou faia?

¹⁶ O le faifai pea ona tatalo e faaalia ai le loloto o lo tatou tuutoina. A tatou valaau atu i le Atua, e iai ona āuga lelei ia i tatou, e tusa lava pe leʻi aumaia se tali mai ia te ia. Afai e faatigā i o tatou mafaufau nisi o popolega, e mafai ona tatou pipii mau ia Ieova e ala i le mulimuli i le fautuaga: “Ia e tuuina atu ia Ieova o mea e te popole vale ai; o ia lava na te [faatumauina] oe.” (Salamo 55:22) E ala i le tuuina atu o o tatou popolega uma—o mea e faʻatu ai, o faanoanoaga, o mea e matataʻu ai, ma isi mea—i le Atua, ma le faatuatua atoatoa ia te ia, tatou te maua ai le toʻafilemu o le loto, ‘le filemu o le Atua o loo silisili lava i mea uma e manatu i ai.’—Filipi 4:4, 7; Salamo 68:19; Mareko 11:24; 1 Peteru 5:7.

17. E mafai faapefea ona tatou maua le filemu o le Atua?

¹⁷ Pe faafuaseʻi ona oo mai lenei filemu o le Atua? E ui ina atonu tatou te vave maua sina malōlōga, ae o le mea na fetalai i ai Iesu e uiga i le tatalo mo le agaga paia, ua moni foi lea i inei: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina mai ai lea ia te outou.” (Luka 11:9-13) Ona o le agaga paia o le auala lea ua tatou lafoaia ese ai mea e faʻatu ai, e manaomia ai la ona tatou finafinau e talosaga atu mo le filemu o le Atua ma lana fesoasoani e uiga i o tatou popolega. E mafai ona tatou mautinoa faapea e ala i le faifai pea ona tatalo, o le a tatou maua ai le malōlōga manaomia ma le toʻafilemu o le loto.

18. O le ā e faia e Ieova mo i tatou pe afai tatou te lē iloa tonu le mea e tatalo atu ai i se tulaga patino?

¹⁸ Ae ā pe afai tatou te lē matuā iloatino le mea e tatalo atu ai? O le a tumau ai la ona lē faaleoina mea o loo ōia ai totonu o i tatou ona tatou te lē o malamalama atoatoa i lo tatou tulaga, pe tatou te lē iloa se mea e ofo atu ia Ieova. O i inei la e mafai ai ona fesoasoani mai le agaga paia ia i tatou. Na tusia e Paulo: “Auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona tatalaina.” (Roma 8:26) E faapefea? O loo iai i le Afioga a le Atua valoaga faagaeeina ma tatalo e tusa ma lo tatou tulaga. E pei ona iai, ua ia aumaia nei mea e fai ma fautua mo i tatou. Na te taliaina ia o ni mea tatou te tatalo atu ai pe afai tatou te iloa lo latou uiga i lo tatou tulaga, ma na te faataunuuina ia e tusa ma na mea.

Tatalo ma Faamoemoe e Faaauau Pea

19. Aiseā o le a faaauau ai pea e faavavau tatalo ma le faamoemoe?

¹⁹ O le a faaauau pea e faavavau tatalo i lo tatou Tamā faalelagi, ae maise lava e uiga i le faafetai atu mo le lalolagi fou atoa ma ona faamanuiaga uma. (Isaia 65:24; Faaaliga 21:5) O le a faaauau foi ona tatou olioli i le faamoemoe, auā i se isi itu, o le a tumau e faavavau le faamoemoe. (Faatusatusa 1 Korinito 13:13.) E lē mafai ona tatou vaai faalemafaufau i ni mea fou o le a aumaia e Ieova agaʻi i le lalolagi pe a lē toe auai o ia i lana lava aso Sapati e malōlō ai. (Kenese 2:2, 3) E oo i le faavavau, o le a ia saunia ni mea i le lumanai e maofa ai ona tagata, ma o loo taofia mai e le lumanai ni mea silisili mo i latou e faatatau i le faia o lona finagalo.

20. O le ā e ao ona avea ma a tatou filifiliga, ma aiseā?

²⁰ Ona o lena faamoemoe faamaniti tino o loo i o tatou luma, talosia ia tatou pipii mau uma atu lava ia Ieova e ala i le finafinau i le tatalo. Tau ina ia aua lava neʻi mavae lo tatou faafetai atu i lo tatou Tamā faalelagi mo o tatou faamanuiaga uma lava. I le taimi atofaina, o le a faataunuuina ai ma le olioli mea o loo tatou faatalitalia, e oo lava i tala atu o mea e mafai ona tatou manatu faalemafaufau i ai pe faatalitalia, auā e mafai e Ieova “ona faia o mea uma e faasilisili lava i mea tatou te ole atu ai ma mafaufau i ai.” (Efeso 3:20) O lea, i le manatu i lenei, seʻi tatou avatu ia le viiga ma le mamalu ma faafetai uma e faavavau ia Ieova lo tatou Atua, “Le faafofoga tatalo”!

[Faaopoopoga i lalo]

E Faapefea ona E Tali?

◻ Aiseā e manaomia ai ona tatou finafinau e tatalo?

◻ O le ā ua tatou aʻoaʻoina mai faaaʻoaʻoga o tatalo a ē na ola i tua atu o Kerisiano?

◻ O le ā ua tatou aʻoaʻoina mai le faaaʻoaʻoga a Iesu e uiga i tatalo?

◻ E mafai faapefea ona lafo atu o tatou popolega ia Ieova ma faatasi ma le ā le iʻuga?

[Ata i le itulau 17]

Sa finafinau Tanielu e tatalo e ui ina faamataʻuina e lafo i le lua o leona