“Peitai e Moni e Taavili!”

“UA AʻOAʻO e le Tusi Paia pe faapefea ona alu i le lagi, ae lē o le faapefea ona alu le lagi,” na fai mai ai le saienitisi Italia o lona 16 o senituri ma o lē na ia mauaina e taavili le lalolagi o Galileo Galilei. O talitonuga e pei o lena na tuuina ai o ia i se feteenaiga ma le Lotu Katoliko Roma, lena na faamataʻuina o ia i le faataugāina ma le faafalepuipuiina. I se 350 tausaga mulimuli ane, na toe tilofaia ai e le lotu ana faiga na fai ia Galileo. O le mea na tupu i aso o Galileo sa taʻua o se “fetaiaiga i le va o le poto masani po o suesuega faasaienisi ma manatu faavae tauaso.”

I aso nei, e mafai e tagata o saili mo le upu moni ona aʻoaʻo mai le mea na oo ia Galileo. Ae aiseā na tupu ai se fetaiaiga faapena? O se vaaiga i manatu faasaienisi na talia o ona aso ua saunia ai le tali.

I le ogatotonu o le senituri lona 16 sa manatu ai i le lalolagi faapea o le ogatotonu o le vateatea. Sa manatu i paneta faapea o loo faataamilo i ni faasologa lelei atoatoa. E ui lava e leʻi faamaonia i fuafuaga faasaienitisi, ae o nei manatu na talia i le faatuatua e avea o se mea moni ua faavaeina. E moni, o le faasaienisi faatasi ma ona “manatu faaanamua” sa lē eseese ma manatu faalotu.

I se lalolagi faapena, na fanau mai ai Galileo i se aiga faaaloalogia i Pisa i [Italia] i le 1564. Sa manao lona tamā ina ia suesue i mea tau vailaau, ae sa oo ina fiafia le tama fiailoa i le matematika. I le gasologa o taimi, i le avea o se polofesa o le faasaienisi, na ia iloa ai nisi o mataupu o aʻoaʻoga e uiga i le lē gaoioi. Ina ua faalogo o ia i faamatalaga a uluai fāʻata vaai mamao a Holani, sa matuā faaleleia ai le faia o lana lava fāʻata ma fausia ai lana lava mea faigaluega aupito silisili ona maoaʻe. Sa ia faatu agaʻi i le lagi ma lomia mea na ia iloa i lana uluai tusi, Sidereus Nuncius (Le Avefeau o le Vavaloloa), ua faailoa mai ai ni masina se fa o Iupita i lona tupulaga. I le 1611 na valaaulia mai ai o ia mai Roma, o i inā na ia tuuina atu ai mea na ia maua i le Collegio Romano (Kolisi Roma) o le au Jesuit. Sa latou faamamaluina o ia e ala i se fonotaga lea sa latou amanaia ai ana suesuega.

Aʻoaʻoga na Teena e le Lotu

O le mea e sili ona leaga, a o leʻi tuua e Galileo Roma, na faapogaia ai e le Katinale o Bellarmine, o se pule malosi o le ituaiga o Jesuit, se iloiloga i aʻoaʻoga a Galileo. Sa talitonu Galileo i le foafoaga faapea e pulea e tulafono na e mafai e tagata ona aʻoaʻoina e ala i suesuega. Sa tetee le Lotu Katoliko i lenei manatu.

E oo lava i nisi o tagata vaai fetu sa tetee i le manatu o Galileo. Sa latou talitonu faapea sa lē mafai e le fāʻata vaai mamao ona faaaofia le mea moni, ma o le fāʻata o se mea tau faasese. Sa oo lava ina faapea mai se tasi patele, o fetu na vaaia sa fausiaina i totonu o tioata o le fāʻata! Ina ua iloa e Galileo ni mauga i luga o le masina, e faamautinoa ai faapea o tino faalelagi e lē lapotopoto atoatoa, na tali mai i ai le patele o Clavius faapea o le masina sa tuu i totonu o se mea e pei o se tioata, ma o lea, e ui lava e mafai ona ati le vaai atu a se tasi i mauga, ae sa tumau pea ona avea o se polo lapotopoto lelei! Fai mai Galileo i lana tali atu, “O lenei mea, o se mafaufauga lava na faatupuina, ae lē o se mea moni.”

O le mapuna aʻe o le naunau o Galileo e faitau i le “Tusi o le Natura,” e pei ona ia taʻua ai le suesueina o le foafoaga, na taʻitaʻiina atu ai o ia i le galuega a le tagata vaai fetu mai Polani e igoa ia Nicolaus Copernicus. I le 1543, na lomia ai e Copernicus se tusi e finau atu ai faapea o le lalolagi e faataamilo i le la. Sa faamaninoina mai e Galileo lenei mea. Ae peitai, o lenei mea na tetee ai Galileo faasaga i le faasaienisi, faapolotiki, ma faiga faavae a lotu o ona aso.

A o faaaogāina e le Lotu Katoliko suesuega tau i fetu a Copernicus mo le faataatitiaina o aso, e pei o le Eseta, ae sa leʻi talia aloaiaina manatu o Copernicus. Sa lagolagoina e le vaega maualuga a le lotu le aʻoaʻoga a Aristotle faapea o le lalolagi sa avea o le ogatotonu o le vateatea. Ae peitai, na luʻia e manatu fou o Galileo lo latou talaaga ma lo latou malosi.

E ui lava sa galulue saienitisi taitoatasi i Europa atoa ina ia faamautinoa le faiga faa-Copernican, sa latou malilie ina ia talanoaina i le na o le va o saienitisi lava latou. O le faavae lena na tiaʻi ai loa e le Lotu Katoliko e leʻi toe amanaia. Sa leʻi tusia e Galileo i le gagana Latina ae i le gagana lautele Italia ma i lea ua lauiloa ai mea na ia maua. Sa lagona e taʻitaʻi lotu faapea ua ia luʻia e lē gata ia i latou ae faapea foi le Afioga a le Atua.

E Lē o se Fausaga Faa-Saienisi

O le mea moni, o le mauaina o mea moni e uiga i le vateatea e lē o se luʻia moni lea o le Afioga a le Atua. Ua iloa e tagata aʻoga o lena Afioga faapea o le Tusi Paia e lē o se tusi faasaienisi, e ui lava e saʻo lelei pe a ia pāʻia mataupu faasaienisi. Sa tusia lea Afioga mo le agaʻi i luma faaleagaga o ē talitonu, ae lē ina ia aʻoaʻoina ai i latou i ni mataupu tau i le tino [physics] ma isi lava faasaienisi masani. (2 Timoteo 3:16, 17) Sa ioe i ai Galileo. Sa ia fautuaina faapea e lua ituaiga o gagana: o faaupuga maʻoti faasaienitisi, ma upu masani o le gagana lautele a tusitala faagaeeina. Na ia tusi: “O se mea manaomia tele i le Tusi Paia . . . ona faamanino nei mea auā le malamalamaga o tagata lautele, ina ia faamatala le tele o mea e foliga mai e eseese (ai le uiga o upu) mai le upu moni aʻiaʻi.”

E iai ni faaaʻoaʻoga o lenei mea i le tele lava o mau eseese o le Tusi Paia. O le tasi o le Iopu 38:6, o i inā o loo tautala ai le Tusi Paia e uiga i le lalolagi e foliga mai e iai ni ona “faavae” ma se “maa tulimanu.” Ua faaaogā sese e nisi lenei mea e fai ma faamaoniga faapea ua faamauina le lalolagi. O na faaupuga e lē o uiga i se faamatalaga faasaienisi o le lalolagi, ae na i lo lea, o loo faasino i se faatusatusaga faasolo o le foafoaga o le lalolagi i le faavaeina o se fale, e avea ai Ieova o lona Mātaisau.

E pei ona faasino mai e se tusitala o olaga o tagata o L. Geymonat i lana tusi Galileo Galilei: “O ni aʻoaʻo e papaʻu mafaufau sa mananao e faatapulaa le faasaienisi e faavae i manatu faale-Tusi Paia, o le a leai se mea latou te mafaia ae ua na ona lafoai atu ma le lē mautonu i le Tusi Paia lava ia.” Ona o ni mafuaaga manatu faapito na faia ai e tagata ua maaa le mea tonu lava lena e tasi. Sa auina atu se tusi i le Ofisa Paia mo le suesueina o Galileo.

Ia Fapuari 19, 1616, sa taulima atu ai i aʻoaʻo Katoliko ni faamatalaga se lua e manaomia ona faamaonia: (1) “o le la, o le ogatotonu o le vateatea” ma lona (2) “o le lalolagi e lē o le ogatotonu lea o le vateatea.” Ia Fepuari 24 na latou faatatauina ai nei manatu o ni manatu valea ma le tetee. Sa faatonuina Galileo ina ia aua neʻi taofi mau pe aʻoaʻo na aʻoaʻoga.

Sa lē toe iai se leo o Galileo. E lē gata ua toe faasagatau le Lotu Katoliko ia te ia, ae sa leai foi se malosi i ana uo e avatu ai se fesoasoani. Sa na ona ia tuutoina atu o ia lava e faia ni suesuega. Ana lē seanoa le suiga o pope i le 1623, semanū tatou te lē toe faalogo lava ia te ia. Ae peitai, o le pope fou o Urban VIII, sa o se tagata poto ma o se lagolago o Galileo. Sa oo atu se tala ia Galileo faapea o le a lē teena e le pope se tusi fou. Na oo lava ina ia talanoa atu i le pope. Ona sa foliga mai na malie i ai le pope, sa amata loa e Galileo lea galuega.

E ui lava na lomia le uluai tusi a Galileo le Dialogue Concerning the Two Chief World Systems i lalo o le faatagaga a le lotu Katoliko i le 1632, sa leʻi pine ae mou atu le aasa o le pope. I le 70 o ona tausaga, na logoina ai Galileo ina ia tulai i luma o le Iloiloga a le Lotu mo le taimi lona lua. O le moliaga ona o le masalosalo e uiga i le tetee o le aʻoaʻoga, na manaomia ai faapea, o le pule a le lotu e lomia ma faasalalauina ai le tusi e tatau ona faamalamalama muamua, ma sa taofi ai faapea sa natia ma le faaʻoleʻole e Galileo le uluai faasaina o le tusi e ala i le aʻoaʻoina o aʻoaʻoga a Copernicus. Talu ai sa faatusatusaina e le tusi Dialogue faiga tau i le suesueina o paneta ma fetu, e aofia ai ma aʻoaʻoga a Copernicus, na mautinoa ai faapea na faaleaogāina ai i lea le sā.

Na tali atu Galileo faapea o lana tusi sa faitioina ai Copernicus. Sa o se puipuiga vaivai, auā i le tusi, o loo iai se tulaga sili na faatalitonuina ai Copernicus. E lē gata i lea, o upu a le pope sa mafai ona tautala mai ai le tagata e sili ona lē atamai i le faia o tala tausua i le tusi, o Simplicio, i lea na faatigā ai Pope Urban VIII.

Na Faasalaina Galileo ona o Ana Aʻoaʻoga Tetee

Sa moliaina ua solitulafono Galileo. O le taimi lea ua maʻi ma sa faamataʻuina i le faataugāina seʻi vaganā ua ia faamavae faalauaitele, ma sa ia faia faapea. Sa ia tootuli ma tauto: “Ua ou taʻutino atu . . . o sese ma tetee o mea ua taʻua . . . Ou te lē toe tautala lava . . . i na mea ina neʻi aumai ai aʻu i lalo o masalosaloga faapena.” O le mea e malie ai ona, fai mai le tala o le vavau, ina ua tulai i luga, sa ia po le eleele ma tomumumumu, “Eppur si muove! [Peitai e moni e taavili!]”

O le iʻuga sa faafalepuipuiina ma faasalaina ai seia oo i lona maliu, ina ua mavae le iva tausaga mulimuli ane. Na faapea mai se tusi na ia tusia i le 1634: “E lē o ni oʻu manatu na amataina ai le taua, ae ona o le lotoleaga o le au Jesuits ia te aʻu.”

I le 1822 na soloiesea ai le faasasaaga o ana tusi. Ae sa taatia faapena seia oo i le 1979 ina ua toe iloiloina e Pope Ioane Paulo II le fesili ma talia ai faapea o Galileo “e tele mea na puapuagatia ai . . . i faiga a tagata ma faalapotopotoga a le Lotu.” I le nusipepa a le Vatikana, le L’Osservatore Romano, na tofia ai e Pope Ioane Paulo II Mario D’Addio o se sui lauiloa o le komisi faapitoa ina ia toe iloiloina le faasalaga o Galileo i le 1633, na faapea mai: “O le aʻoaʻoga ua taʻua o le aʻoaʻoga tetee pe sese a Galileo e leai se mea e foliga mai ai e iai se faavae, i le faalelotu po o lalo o le tulafono a le lotu.” E tusa ai ma le faamatalaga a D’Addio, na sopotapulaa le Iloiloga a le Lotu i le faia o lana pule—sa leʻi faaleagaina ai i aʻoaʻoga a Galileo so o se mataupu o le faatuatua. Na ioeina e le nusipepa a le Vatikana faapea o le faasalaga o Galileo i le faapea e tetee pe sese, sa leai se faavae.

O le ā ua tatou aʻoaʻoina mai le mea na oo ia Galileo? E ao ona iloa e se Kerisiano faapea o le Tusi Paia e lē o se tusi aʻoga faasaienisi. Pe a foliga mai e iai se feteenaiga i le va o le Tusi Paia ma le faasaienisi, e lē manaomia ona ia taumafai e faaleleia “feeseeseaiga” uma. I lo mea uma lava, o le faatuatua faa-Kerisiano e faavae i “le upu e uiga ia Keriso,” ae lē i luga o se pule faasaienisi. (Roma 10:17) E lē gata i lea, e tumau pea ona fesuisuiai le faasaienisi. O se aʻoaʻoga e foliga mai e feteenai ma le Tusi Paia ma ua lauiloa i lenei aso, atonu e iloa ane taeao e sese ma toe teena ai.

Ae, ina ua faasino atu i le tulaga o Galileo e faatinoina ai le taofia e le lotu o le faasaienisi, ua sili ai ona lelei mo saienitisi ona latou manatua faapea o mea na maua i suesuega a Galileo, sa lē talia e mea na faavaeina i iloiloga i ona aso. I le faaeseese atu i manatu o na ona po, sa leʻi taitai ona lē ōgatusa le Tusi Paia ma lena upu moni. Sa lē manaomia ona toe iloiloina pe suia le Afioga a le Atua. O le sese ona faamatalaina e le Lotu Katoliko o le Tusi Paia na faapogaia ai le faafitauli.

E ao ona faagaeetia tagata uma lava i le matuā sili ona ōgatasi ma le tulafono o le natura i le vateatea i le sili atu ona talisapaia ai o Lē na Foafoaina Mea, o Ieova le Atua. Na fesili Galileo: “Pe itiiti le mamalu o le Galuega a Lē na Foafoaina Mea, na i lo o le Afioga a Lē na Foafoaina Mea?” Ua tali mai le aposetolo: “O uiga lē vaaia o le [Atua] ua vaaia manino lava mai i le amataga o le foafoaina o le lalolagi, auā e mafai ona vaaia i le mafaufau e ala i mea na faia.”—Roma 1:20, NW.