Fesili mai le Au faitau
Aiseā na auina atu ai e Noa se oreva mai le vaa, ona toe auina atu lea o se lupe?
E lē o aumaia e le Tusi Paia ni faamatalaga auiliili. Ae peitai, e foliga mai sa poto le auala na faia e Noa.
Mo le 40 ao ma le 40 po, sa lofia ai le laueleele i ni timuga, na faapogaia ai se lolo na oo lava ina ufitia ai tumutumu o mauga mo le lima masina. Ona “toa ai [lea o] le vaa i luga o mauga o Ararata.” (Kenese 7:6–8:4) I masina mulimuli ane, ua “mānu ai tumutumu o mauga,” o Noa na “ia tuu atu ai le oreva; ua lele atu o ia, ma fefoifoiai.”—Kenese 8:5, 7.
Aiseā na auina atu ai se oreva? O lenei manulele o se manu e malosi e lele, ma e mafai ona ola i ituaiga eseese e tele o meaʻai, e aofia ai ma tino oti. Atonu na auina atu e Noa le oreva i le fia iloa pe toe foi mai, po o le a lē toe foi mai i le vaa, atonu e ʻai mai mea na totoe o tino oti na aliali aʻe a o faasolo ina māui lemu le vai ma aliali aʻe le laueleele. Ae peitai, e leʻi alu ese atu ma nofo pea le oreva. Fai mai le Tusi Paia na toe foi mai, ae lē o fai mai na toe foi atu le oreva ia Noa. Atonu na toe foi mai ina ia malōlō i le vaa i le va o ana feleleaiga ina ia maua ai ni meaʻai o opeopea i luga o le vai o loo loloto pea.
Mulimuli ane ona filifili loa lea o Noa e auina atu se lupe. Ua tatou faitau ai e faapea: “A ua le maua e le lupe se mea e mapu ai ona vae, ona toe foi mai lea o ia ia te ia i le vaa.” (Kenese 8:9) Ua aumaia ai i lenei mea le manatu faapea i lana lava auala, sa mafai e le lupe ona auauna i lona fuafua po o ua māui vai o le lolo. Ua faaalia e lupe le matuā maufaatuatuaina tele e tagata. Sa ono mafai ona faatalitalia e Noa faapea o le a toe foi mai le lupe, e lē tau ina malōlō i le vaa, ae ia Noa lava ia.
Fai mai o lupe, e na o le laueleele matūtū e mafai ona malōlō ai, e iloa foi i latou e felelei maulalo i vanu, ma aai i fua o laau o le vao. (Esekielu 7:16) Ua matauina e le Grzimek’s Animal Life Encyclopedia e faapea: “E pei lava ona moni i lupe uma e aai i fua ma fatu o laau, e matuā faigata ona maua ni meaʻai pe a oo ina ufitia pea e le kiona [po o le vai] i luga o laau mo le sili atu i se aso, o le tele o a latou meaʻai masani, e maua i luga o le laueleele.” O lea, atonu na aumaia e le lupe ia Noa se faamaoniga e iloa ai faapea ua ia maua le eleele matūtū po o ni laau ua tutupu. O le uluai taimi na auina atu ai e Noa le lupe, sa toe foi atu lava na o ia i le vaa. O le taimi lona lua, na toe foi mai ai le lupe ma se lau olive. O le taimi lona tolu, sa leʻi toe foi mai, e faaalia ai ua saogalemu ma ua mafai ai e Noa ona tuua le vaa.—Kenese 8:8-12.
Ona atonu e manatu nisi i nei mea faapea o ni auiliiliga e lē tāua, ae o le mea moni, ona o le matuā patino o le faamatalaga a le Tusi Paia, e aunoa ma se isi taumafaiga faigata e aumaia ni faamalamalamaga atoatoa, ua faaalia ai le matuā faigofie lava ona talitonuina le Tusi Paia. Ua aumaia ai e lea ia i tatou se mafuaaga faaopoopo e talia ai le faamatalaga e moni, e lē o se mea na faia faatogafiti pe fafauina aʻe, ae e matuā saʻo moni lava. O le lē lava o auiliiliga maeʻaeʻa ma faamalamalamaga ua maua ai foi se manatu faapea, maeu ni mea fiafia e mafai ona vaavaai atu ai i luma Kerisiano faamaoni e fesili atu ai ia Noa pe a toe faatuina mai o ia ma mafai ona muai faamalamalama mai fesili i le pe aiseā ma na faapefea ona ia faia o lea mea ma lea mea.—Eperu 11:7, 39.