Le Meaalofa a Ieova o le Agaga Paia

“E le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?”—LUKA 11:13.

1, 2. (a) O le ā le folafolaga sa faia e Iesu e uiga i le agaga paia, ma aiseā e avea ai lenei o se faamafanafanaga moni? (e) O le ā le agaga paia?

I LE tau e afu ai mea o le tausaga e 32 T.A. a o talaʻi e Iesu le tala lelei i Iutaia, na ia fetalai atu ai i ona soʻo e uiga i le aaofoai o Ieova. Sa ia faaaogāina nisi o faataoto malolosi ona ia saunoa lea i se folafolaga ofoofogia, e faapea: “O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?”—Luka 11:13.

² Maeu le faamafanafana loto o na upu! A o tatou onosaia le lavelave o aso e gata ai o lenei lalolagi, fesagai ma le lotoa o Satani ma ana temoni, ma tau faasaga i o tatou lava vaivaiga agasala, o se matuā faamafanafana loto lava le iloaina faapea, o le a faamalosia i tatou e le Atua e ala i lona agaga. O le mea moni, e lē taitai mafai ona tutumau ma le faamaoni pe a aunoa ma lena fesoasoani. Ua e tofo ea i le malosi o lena agaga, le malosi galue o le Atua lava ia? Pe o e malamalama ea i le tele e mafai ai ona ia fesoasoani ia te oe? O e faaaogāina atoatoa ea?

Le Mana o le Agaga Paia

3, 4. Ia aumai se faataʻitaʻiga o le mana o le agaga paia.

³ Ia manatunatu muamua i le mana o le agaga paia. Toe mafaufau i tua i le tausaga e 1954. O le taimi lena na pa ai se pomu haitoresene i luga o le Atumotu o Bikini i le Pasefika i Saute. I le taimi lava na uma ai ona pa le pomu, na fusia ai lena atumotu matagofie i se afi lapotopoto ma faataapeapeina ai i se pa e tutusa lona malosi ma le pa o tane e 15 miliona o pomu o le TNT. O fea na aumai ai lena malosi uma e faaleagaina ai? O le iʻuga lena o le suiga i le malosi (energy) o sina vaega itiiti o le uranium ma haitoresene ia o loo faia aʻe ai le ogatotonu o le pomu. E ui i lea, ae ā pe ana faapea e mafai e saienitisi ona faia le tuufaafeagai o le mea na latou faataunuuina i Bikini? Seʻi faapea e mafai ona latou tuufaatasia lena malosi mumū uma ma faaliliuina ai i nai pauna o le uranium ma le haitoresene. Maeu se iʻuga o le a oo i ai! E ui i lea, sa faia e Ieova se mea e tutusa ma lena, ae i se fua e sili atu ona telē ina ua “faia e [ia] le lagi ma le lalolagi i le amataga.”—Kenese 1:1.

⁴ Ua iai ia Ieova le tele o le malosi uigaese. (Isaia 40:26) I le foafoaga, atonu sa ia faaaogāina ai se vaega o lenei malosi ina ua ia saunia mea uma lava o loo faia aʻe ai le lagi ma le lalolagi. O le ā sa ia faaaogāina i lenei galuega faalefoafoaga? O le agaga paia. Tatou te faitau ai: “O le afioga a Ieova na faia ai le lagi; ma ʻau uma o i ai, na faia i le mānava [agaga, NW] a lona fofoga.” (Salamo 33:6) Ma e faitauina faapea le tala a le Kenese e uiga i le foafoaga: “Na fegaoioiai foi le Agaga o le Atua i le fogātai.” (Kenese 1:2) Maeu se mana matuā malosi, o le agaga paia!

Galuega Faavavega

5. I ā auala maualuluga o loo gaoioi ai le agaga paia?

⁵ O loo gaoioi pea le agaga paia i ni auala e sili ona maualuluga. Na te taʻitaʻia ma faatonutonuina le faalapotopotoga faalelagi a Ieova. (Esekielu 1:20, 21) I le pei o le malosi na sau mai le pomu haitoresene, e mafai ona faaaogāina i se auala faatamaʻia ina ia faaoo atu ai le faamasinoga i fili o Ieova, peitai, e mafai foi ona gaoioi i isi auala e faagaeetia ai i tatou e maofa.—Isaia 11:15; 30:27, 28; 40:7, 8; 2 Tesalonia 2:8.

6. Sa faapefea ona lagolagoina e le agaga paia Mose ma le fanauga a Isaraelu i a latou feutanaiga ma Aikupito?

⁶ E fai ma faaaʻoaʻoga, e tusa o le 1513 T.L.M., na auina atu ai e Ieova Mose i luma o Farao o Aikupito e talosaga mo se saolotoga o le fanauga a Isaraelu. Mo le 40 tausaga muamua atu, sa avea ai Mose o se leoleo mamoe i Mitiana, o lea, aiseā e ao ai fua ona faalogo Farao i se leoleo mamoe? Ona sa faaaogā e Mose le suafa o le Atua moni e toatasi, o Ieova. Ina ia faamaonia lenei mea, sa faamalosia e Ieova o ia ina ia faia ni vavega. Ona o le matuā ofoofogia tele o ia vavega, na oo ai foi ina uunaia faitaulaga o Aikupito e taʻutino mai: “O le aao lenei o le Atua.”a (Esoto 8:19) Sa aumaia e Ieova mala e sefulu i luga o Aikupito, ma o le mala mulimuli o ia mala sa uunaia ai Farao ina ia tuu atu tagata o le Atua e ō ese mai Aikupito. Ina ua tuliloaina ma le loto maaa i latou e Farao ma lana autau, sa faasaoina tagata Isaraelu ina ua tatalaina faavavega se auala i le Sami Ulaula. Sa mulimuli atu le autau a Aikupito e tuliloa i latou ma malelemo ai i le sami.—Isaia 63:11-14; Hakai 2:4, 5.

7. (a) O ā nisi o mafuaaga na mafua ai ona galueaiina e le agaga paia vavega? (e) E ui ina e lē o toe tutupu ni vavega sa faagaeeina e le agaga paia, ae aiseā ua avea ai lo latou faamaumauina i le Tusi Paia o se faamafanafana loto?

⁷ Ioe, sa galueaiina e Ieova e ala i lona agaga ni vavega malolosi mo tagata Isaraelu i ona po o Mose, atoa foi ma isi taimi. O le ā na mafua ai na vavega? Sa latou faalauteleina fuafuaga a Ieova, faalauiloaina ai lona suafa, ma faaalia ai lona mana. Ma i nisi taimi, e pei ona tupu ia Mose, sa latou matuā faamaonia ai faapea sa iai i se tagata le lagolagosua a Ieova. (Esoto 4:1-9; 9:14-16) Peitai, o vavega na faia e le agaga paia, sa seāseā lava toe tutupu i le gasologa mai o talafaasolopito.b E aliali mai, o le toatele o tagata na ola i ona po o le Tusi Paia, latou te leʻi vāʻai lava i se vavega, ma i aso nei ua lē toe tutupu ai. Ae peitai, a o tatou tauivi i aso nei ma faafitauli atonu e foliga mai e faigata ona foia, pe lē o se faamafanafana loto ea le iloa faapea afai tatou te ole atu ia Ieova i le faatuatua, o le a ia aumaia ia i tatou le agaga lava lea e tasi sa fesoasoani ia Mose i luma o Farao ma tatalaina ai se ala mo tagata Isaraelu i le Sami Ulaula?—Mataio 17:20.

Tusitusiga Faagaeeina

8. O le ā le matafaioi a le agaga paia i le aumaia o Tulafono e Sefulu?

⁸ Ina ua mavae lo latou laveaiina mai Aikupito, sa taʻitaʻia atu e Mose tagata Isaraelu i le Mauga o Sinai, lea na osia ai e Ieova se feagaiga ma i latou ma avatu ai ia i latou lana Tulafono. O se vaega autū o lena Tulafono na avatu e ala ia Mose, o Tulafono e Sefulu, ia na tusia ona uluai kopi i papa maa. E faapefea? E ala i le agaga paia. Ua faapea mai le Tusi Paia: “Ua uma atu ana [Ieova] fetalaiga ia Mose i le mauga o Sinai, ona avatu ai lea e ia ia te ia o papa e lua o le tulafono, o papa maa lava na tusia e le aao o le Atua.”—Esoto 31:18; 34:1.

9, 10. Sa faapefea ona gaoioi le agaga paia i le tusiaina o Tusitusiga Eperu, ma ua faapefea ona faamaonia lenei mai faamatalaga sa faaaogā e soʻo o Iesu?

⁹ E faaopoopo atu i Tulafono e Sefulu, na avatu e Ieova ia Isaraelu e ala i lona agaga, le faitau selau o tulafono ma poloaiga e taʻitaʻia ai olaga o tane ma fafine faamaoni. Ma e iai nisi tusitusiga faagaeeina o le a aumai. I senituri ina ua mavae ona po o Mose, sa taʻutino atu ai e Neemia i se tatalo i le lautele ia Ieova: “A e tele tausaga na e onosai ai ia te i latou [tagata Isaraelu], ma aoai ia te i latou e lou Agaga na i au perofeta.” (Neemia 9:5, 30) Sa faamaumauina le tele o valoaga faagaeeina na fofogaina atu e na perofeta. E lē gata i lena, sa uunaia e le agaga paia ni tane faamaoni e tusia i lalo talaaga faagaeeina ma pesega o viiga e sau mai le loto.

¹⁰ Sa taʻua e Paulo nei tusitusiga uma ina ua ia faapea mai: “O Tusi Paia uma lava e mai le Agaga o le Atua ia.” (2 Timoteo 3:16; 2 Samuelu 23:2; 2 Peteru 1:20, 21) O le mea moni, i le siiina mai o nei mau, sa masani ona faaaogā e soʻo o Iesu i le uluai senituri ni faaupuga e pei o le “sa . . . fetalai mai e le Agaga Paia i le fofoga o Tavita,” “ua lelei lava le upu na fetalai mai ai le Agaga Paia e le perofeta o Isaia,” pe tau ina “fetalai mai ai le Agaga Paia.” (Galuega 1:16; 4:25; 28:25, 26; Eperu 3:7) Maeu se faamanuiaga faapea, o le agaga paia lava lea e tasi na faatonutonuina le tusiaina o le Tusi Paia ua faapea foi ona faasaosaoina ina ia mafai ai ona taʻitaʻia ma faamafanafanaina i tatou i aso nei!—1 Peteru 1:25.

Faalagolago i le Agaga Paia

11. O le ā le gaoioiga a le agaga sa matauina e tusa ai ma le fausiaina o le fale fetafai?

¹¹ A o tolauapi tagata Isaraelu i auvae mauga o le Mauga o Sinai, sa faatonuina i latou e Ieova ina ia fausia se fale fetafai e avea ma autū o le tapuaiga moni. E mafai faapefea ona latou faataunuuina lenei mea? “Ona faapea atu lea o Mose i le fanauga a Isaraelu, Faauta, ua valaauina e Ieova i lona lava igoa o Pesaleli, o le atalii o Auri, o le atalii lea o Huro, o le itu aiga o Iuta; ua faatumuina foi o ia i le Agaga o le Atua i le poto, ma le faautauta, ma le iloa lelei, e fai ai galuega uma lava.” (Esoto 35:30, 31) Sa faamalosia e le agaga paia so o se tomai faaletino na iai ia Pesaleli, ma mafai ai ona ia pulea ma le manuia le faatuina aʻe o lena fausaga mataʻina.

12. Sa faapefea ona faamalosia e le agaga tagata taitoatasi i ni auala uigaese ina ua mavae ona po o Mose?

¹² I se taimi mulimuli ane, na faagaoioia ai le agaga o Ieova i luga o Samasoni, ma avatu ai ia te ia se malosi e sili atu i le malosi faaletagata ina ia mafai ai ona ia laveaiina Isaraelu mai tagata Filisitia. (Faamasino 14:5-7, 9; 15:14-16; 16:28-30) E mulimuli ane foi, na foaiina atu ai ia Solomona le atamai faapitoa e avea ai ma tupu o tagata filifilia o le Atua. (2 Nofoaiga a Tupu 1:12, 13) Sa ola fiafia Isaraelu i lalo o lana pulega, i se tulaga sa leʻi faapea ona iai muamua, ma o lona tulaga fiafia ua avea lea o se faaaʻoaʻoga mo faamanuiaga o le a olioli ai tagata o le Atua i lalo o le Pulega Faa-Meleniuma a le Solomona Sili, o Iesu Keriso.—1 Tupu 4:20, 25, 29-34; Isaia 2:3, 4; 11:1, 2; Mataio 12:42.

13. Ua faapefea ona faalaeiauina i tatou i aso nei i le faamaumauga o le faamalosia e le agaga o Pesaleli, Samasoni, ma Solomona?

¹³ Maeu se faamanuiaga ona ua faaavanoa mai e Ieova lea lava agaga e tasi ia i tatou! A tatou lagona le vaivai e faataunuuina se tofiga pe auai i le galuega talaʻi, e mafai ona tatou ole atu ia Ieova e foai mai ia i tatou le agaga lava lea e tasi na ia foaiina atu ia Pesaleli. A tatou mafatia i maʻi pe onosai i sauaga, o le a faamalosia i tatou e le agaga lava lea e tasi na ia avatua ia Samasoni se malosi uigaese—e ui o le mea moni e lē aumaia faavavega. Ma pe a tatou fesagaʻi ma ni faafitauli faigata po o le faia o ni filifiliga tāua, e mafai ona tatou ole atu ia Ieova, o lē na foaiina atu ia Solomona le atamai uigaese, ina ia fesoasoani ai ia i tatou e gaoioi ma le atamai. Ona tatou faapea atu lea, e pei o Paulo: “Ou te mafaia mea uma lava i le faamalosi mai [o ia lē ua aumaia le malosi ia te aʻu].” (Filipi 4:13) Ma o le a faatatauina ia i tatou le folafolaga a Iakopo e faapea: “A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia.”—Iakopo 1:5.

14. O ai, i aso anamua ma aso nei, ua faamalosia e le agaga paia?

¹⁴ Sa iai foi le agaga o Ieova i luga o Mose i lana galuega o le faamasinoina o le nuu. Ina ua tofia isi e fesoasoani ia Mose, sa fetalai atu Ieova: “Ou te avea foi nisi o le agaga o loo ia te oe, ma ou tuuina atu ia te i latou; ona latou tauave ai lea faatasi ma oe le avega o le nuu, ina ia e le avea toatasi.” (Numera 11:17) O lea, sa lē gaoioi ai na tane i lo latou lava malosi. Sa lagolagoina i latou e le agaga paia. I nisi mea na tutupu mulimuli ane, ua tatou faitau ai faapea sa iai le agaga o Ieova i luga o isi tagata. (Faamasino 3:10, 11; 11:29) Ina ua faauuina e Samuelu Tavita e fai ma tupu o Isaraelu i le lumanai, ua faapea mai le faamaumauga: “Ona tago lea o Samuelu i le fagu nifo o suāuu, ua faauu aʻi ia te ia i luma o ona uso; ona osofia lea o Tavita e le Agaga o Ieova, na afua mai i lea lava aso.” (1 Samuelu 16:13) O i latou i aso nei o loo iai avega tauave mamafa—faaleaiga, faalefaapotopotoga, pe faalefaalapotopotoga—e mafai ona faamafanafanaina i le iloa faapea, o loo faamalosia pea e le agaga o le Atua ana auauna a o latou tausia a latou matafaioi.

15. I le ā le auala ua faamalosia ai e le agaga paia le faalapotopotoga a Ieova (a) i ona po o Hakai ma Sakaria? ma (e) i aso nei?

¹⁵ E tusa ma le afe tausaga ina ua mavae ona po o Mose, na toe foi atu ai ni tagata faamaoni mai le fanauga a Isaraelu i Ierusalema mai Papelonia faatasi ma le poloaiga ina ia toe fausia le malumalu. (Esera 1:1-4; Ieremia 25:12; 29:14) Peitai, na aliaʻe ni toʻatugā, ma sa latou lotovaivai ai mo le tele o tausaga. Mulimuli ane, sa faatutūina e Ieova perofeta o Hakai ma Sakaria e faamalosia tagata Iutaia ina ia aua le faalagolago i lo latou lava malosi. Ae o le a faapefea ona faataunuuina le galuega? “E le o le fitafita, e le o le malosi, a o loʻu Agaga, ua fetalai mai ai Ieova o ʻau.” (Sakaria 4:6) Ma faatasi ma le fesoasoani a le agaga o le Atua, na fausia ai le malumalu. Ua faapena foi ona faataunuuina e tagata o le Atua i aso nei le tele o mea. Ua faalauteleina le talaʻiga o le tala lelei i le lalolagi atoa. E faitau miliona tagata ua aʻoaʻoina i le upu moni ma le amiotonu. Ua faamaopoopoina tauaofiaga. O loo fausiaina Maota o le Malo ma ofisa o lālā. O le tele o nei galuega o loo faia i lalo o teteega ogoogo. Peitai, ua lē faavaivai ai Molimau a Ieova, i lo latou iloa faapea o mea taitasi uma lava ua latou faataunuuina, e lē ona o se autau, po o se malosi faaletagata, ae e ala i le agaga o le Atua.

Le Agaga o le Atua i le Uluai Senituri

16. O ā mea sa oo i ai auauna a Ieova i tua atu o uluai Kerisiano faatasi ma le gaoioiga a le agaga o le Atua?

¹⁶ E pei ona tatou matauina, sa matuā iloa lelei e auauna a le Atua i tua atu o uluai Kerisiano le malosi o le agaga o le Atua. Sa latou faalagolago i ai e fesoasoani ia i latou ina ia faataunuuina avega mamafa ma ia faia le finagalo o le Atua. Na latou iloa foi faapea sa faagaeeina le Tulafono ma isi tusitusiga paia, sa tusia i lalo o le taʻitaʻiga a le agaga o Ieova, ma o lea, sa avea ai ma ‘Afioga a le Atua.’ (Salamo 119:105) E ui i lea, ae ā, ona po o Kerisiano?

17, 18. O ā nisi o faaaliga faavavega a le agaga i ona po o Kerisiano, ma o le ā lo latou aogā?

¹⁷ Sa matauina foi i le uluai senituri T.A. gaoioiga ofoofogia a le agaga o le Atua. Na iai valoaga sa faagaeeina e le agaga. (1 Korinito 14:1, 3) I le faataunuuga o le folafolaga a Iesu, faapea o le a faamanatu atu e le agaga paia i ona soʻo mea uma lava sa ia fetalai ai ma o le a aʻoaʻoina i latou i nisi o vala o le upu moni, na tusia ai le tele o tusi i lalo o le taʻitaʻiga a le agaga paia. (Ioane 14:26; 15:26, 27; 16:12, 13) Ma sa iai ni vavega, e pei ona o le a talanoaina atoatoa i la tatou mataupu o loo sosoo ai. O le mea moni, sa faatomuaina le uluai senituri i se vavega mataʻina. E tusa o le tausaga e 2 T.L.M., na fanau mai ai se pepe faapitoa, ma e fai ma faailoga, sa avea lona tinā talavou o se taupou. E faapefea ona tupu lena mea? E ala lea i le agaga paia. Ua faapea mai le faamaumauga: “Sa faapea ona fanau mai o Iesu Keriso. Sa fāufautane lona tinā o Maria ia Iosefa, ua iloa ua to o ia i le Agaga Paia, a o lei faatasi i laua.”—Mataio 1:18; Luka 1:35, 36.

¹⁸ Ina ua tuputupu aʻe Iesu, sa ia tutuli esea temoni, faamalōlō i ē mamaʻi, e oo foi i le faatutūina o ē ua maliliu i le mana o le agaga paia. Sa faia foi e nisi o ona soʻo ni vavega ma ni galuega malolosi. O nei tomai faapitoa o ni meaalofa a le agaga. O le ā lo latou fuafuaga? E pei lava ona sa faia i uluai vavega, na faalauteleina ai fuafuaga a le Atua ma na faaalia ai lona mana. E sili atu i lena, sa faaalia ai le moni aʻiaʻi o le fetalaiga a Iesu faapea sa auina mai o ia mai le Atua; ma e mulimuli ane, na latou faamaonia ai faapea sa avea le faapotopotoga Kerisiano i le uluai senituri ma nuu filifilia o le Atua.—Mataio 11:2-6; Ioane 16:8; Galuega 2:22; 1 Korinito 12:4-11; Eperu 2:4; 1 Peteru 2:9.

19. Ua faapefea ona faamalosia lo tatou faatuatua e le tala a le Tusi Paia e uiga i vavega a Iesu ma ona aposetolo?

¹⁹ Peitai, sa faapea mai le aposetolo o Paulo, o na faaaliga faavavega o le agaga, e tusa lea ma le tulaga faatamameamea o le faapotopotoga ma o le a mavae atu, o lea, tatou te lē vaai ai i aso nei i na vavega o se gaoioiga a le agaga paia. (1 Korinito 13:8-11) Peitai, o vavega sa faia e Iesu ma ona aposetolo e sili atu na i lo o se tala mālie i le talafaasolopito. Latou te faamalosia lo tatou faatuatua i le folafolaga a le Atua faapea o le a lē toe iai le maʻi ma le oti i lalo o le pulega a Iesu i le lalolagi fou.—Isaia 25:6-8; 33:24; 65:20-24.

Aogā mai le Agaga Paia o le Atua

20, 21. E mafai faapefea ona tatou faaavanoaina i tatou lava i le meaalofa o le agaga paia?

²⁰ Maeu se mana e sili ona malosi o lenei agaga! Peitai, e mafai faapefea e Kerisiano i aso nei ona faaavanoaina i latou lava mo lena mana? Muamua, na fetalai Iesu faapea e ao ona tatou ole atu ina ia maua, o lea, aiseā e lē faia ai lena mea? Ia tatalo ia Ieova e foai mai ia te oe lenei meaalofa ofoofogia, e lē gata i taimi o puapuaga ae i taimi uma lava. E faaopoopo atu i ai, ia faitau le Tusi Paia ina ia mafai ai ona tautala atu le agaga paia ia te oe. (Faatusatusa i le Eperu 3:7.) Ia mafaufau loloto i mea ua e faitauina ma faatatauina ina ia mafai ai e le agaga paia ona taaʻina lou olaga. (Salamo 1:1-3) E lē gata i lena, ia auaumea—taitoatasi po o i faapotopotoga ma i fonotaga—ma isi o ē faalagolago i le agaga o le Atua. Maeu le matuā faamalosia e le agaga paia o i latou o ē faamanū atu i lo latou Atua “i faapotopotoga [toatele]”!—Salamo 68:26.

²¹ Pe lē o Ieova ea la o se Atua aaofoai? Ua ia fetalai mai, tau lava ina tatou ole atu mo le agaga paia ona ia foaiina mai lea ia i tatou. Pagā le valea o le faalagolago i lo tatou lava atamai ma le malosi, semanū o loo avanoa mai ia i tatou sea fesoasoani e sili ona malosi! Peitai, e iai isi mataupu e uiga i le agaga o le Atua o loo faapea ona aafia ai i tatou o ni Kerisiano, ma o le a talanoaina ia mea i le mataupu o loo sosoo ai.

[Faaopoopoga i lalo]

Pe Mafai ona E Taliina Fesili o loo Mulimuli Mai?

◻ Sa faapefea ona foafoaina e Ieova mea uma i le vateatea?

◻ O ā nisi o auala sa gaoioi ai le agaga paia i ona po o i latou sa i tua atu o uluai Kerisiano?

◻ Ua faapefea ona faamafanafanaina i tatou i aso nei i le iloaina o mea sa faataunuuina e le agaga paia i aso anamua?

◻ E mafai faapefea ona faaavanoaina i tatou lava i le meaalofa o le agaga paia?

[Ata i le itulau 10]

E mafai e le agaga lea na avatua ia Samasoni se malosi uigaese, ona aumaia foi ia i tatou se malosi mo mea uma lava