Aumaia le Olioli e le Saolotoga Mai le Atua
“O le [olioli] ia Ieova o lo outou malosi lea.”—NEEMIA 8:10.
1. O le ā le olioli, ma aiseā e mafai ai ona oo ia i latou ua tuuina atu i le Atua?
UA FAATUMUINA e Ieova loto o ona tagata i le olioli. O lenei tulaga o le fiafiaga sili po o le faaeaina, o le iʻuga lea o le mauaina po o le faatalitalia o ni mea lelei. E mafai ona oo lena faalogona i tagata ua tuuina atu i le Atua ona o le olioli o se fua lea o lona agaga paia, po o lona malosi galue. (Kalatia 5:22, 23) O lea, e tusa lava pe tatou te āfaina i ni tofotofoga mataʻutia, e mafai ona tatou olioli o ni auauna a Ieova, o ē ua taʻitaʻia e lona agaga.
2. Aiseā na olioli ai tagata Iutaia i se faatasiga faapitoa i ona po o Esera?
2 I se faatasiga faapitoa i le senituri lona lima T.L.M., na faaaogā ai e tagata Iutaia lo latou saolotoga na foaiina mai e le Atua e faia ai se Tausamiga olioli o Fale apitaga i Ierusalema. Ina ua maeʻa ona faitauina ma faamatala atu e Esera ma isi o sā Levī le Tulafono a le Atua ia i latou, ‘ona ō ai lea o le nuu ua aai ma inu ma tufaina atu tufaaga ma faaauau ai i le olioli tele, auā sa latou malamalama i upu na faailoa atu ia i latou.’—Neemia 8:5-12.
O le Olioli ia Ieova o lo Tatou Malosi Lea
3. I lalo o ā tulaga e mafai ai ona avea “le olioli ia Ieova” ma o tatou malosi?
3 A o faagasolo lena tausamiga, sa iloatino ai e tagata Iutaia le moni o upu nei: “O le [olioli] ia Ieova o lo outou malosi lea.” (Neemia 8:10) E avea foi lenei olioli ma o tatou malosi, pe afai o loo tatou tumau mausalī i le saolotoga na foaiina mai e le Atua o ni Molimau tuuina atu, ma papatisoina a Ieova. E toaitiiti nisi o i tatou ua oo ina faauuina e le agaga paia ma ua avea ma tama fai i le aiga o le Atua o ni suli faalelagi e aufaatasi ma Keriso. (Roma 8:15-23) O le toatele anoanoai o i tatou i aso nei ua iai le faamoemoe o le ola i se parataiso faalelalolagi. (Luka 23:43) Maeu se olioli e ao ona tatou iai!
4. Aiseā ua mafai ai e Kerisiano ona tumau i mafatiaga ma sauaga?
4 E ui ina ua ia i tatou ni faamoemoe matagofie, ae e lē faigofie ona tutumau i mafatiaga ma puapuaga. Peitai, e mafai ona tatou faia faapea, ona ua aumaia ia i tatou e le Atua lona agaga paia. Ona o lea, ua tatou maua ai le olioli ma le talitonuga faapea e leai se mea e mafai ona aveesea mai ia i tatou lo tatou faamoemoe po o le alofa o le Atua. E sili atu i lena, e mafai ona tatou mautinoa o le a avea Ieova ma o tatou malosi pe afai tatou te alolofa ia te ia ma o tatou loto atoa, solu, malosi, ma le mafaufau.—Luka 10:27.
5. O fea atonu tatou te maua ai ni mafuaaga mo le olioli?
5 Ua olioli tagata o Ieova i faamanuiaga faaʻoaina ma ua ia i latou mafuaaga e tele e olioli ai. O loo taʻua nisi o mafuaaga mo le olioli i le tusi a Paulo i tagata Kalatia. Ae o isi mafuaaga o loo faailoa mai i isi vaega o le Tusi Paia. O le a faafiafiaina o tatou agaga i le iloiloina o na faamanuiaga olioli.
Faatāuaina le Saolotoga Mai le Atua
6. Aiseā na uunaia ai e Paulo Kerisiano i Kalatia ina ia tumau?
6 Ona o ni Kerisiano, ua ia i tatou ai se faamanuiaga olioli o se tulaga talileleia i le Atua. Talu ai na faasaolotoina e Keriso ona soʻo mai le Tulafono faa-Mose, sa uunaia ai tagata Kalatia ina ia tumau ae aua le taofia i lena “amo o le pologa.” Ae ā i tatou? Afai tatou te taumafai e taʻuamiotonuina e ala i le tausia o le Tulafono, o le a vavaeese ai i tatou mai ia Keriso. Peitai, i le fesoasoani mai o le agaga o le Atua, ua tatou faatalitalia ai le faamoemoe mo ē amiotonu, e mafua mai i le faatuatua ua faagaoioia e ala i le alofa, ae lē mai le peritomeina faaletino po o isi galuega o le Tulafono.—Kalatia 5:1-6.
7. E ao faapefea ona tatou manatu i le auaunaga paia ia Ieova?
7 O se faamanuiaga le faaaogāina o lo tatou saolotoga na foaiina mai e le Atua e “auauna atu [ai] ia Ieova ma le [olioli].” (Salamo 100:2) O le mea moni, o se faaeaga e lē mafaatusalia le tuuina atu o le auaunaga paia ia “[Ieova] le Atua e ou le malosi uma lava,” o ia o le ‘Tupu e faavavau’! (Faaaliga 15:3) Afai e oo ane ia te oe le faalogona o le loto vaivai, atonu e aogā ona e iloa, ua tosina atu oe e le Atua ia te ia lava e ala ia Iesu Keriso, ma ua tuuina mai ia te oe se sao i ‘le galuega paia o le tala lelei a le Atua.’ (Roma 15:16; Ioane 6:44; 14:6) Maeu ni mafuaaga mo le olioli ma le loto faafetai i le Atua!
8. O le ā le mafuaaga o le olioli ua maua e tagata o le Atua, e uiga ia Papelonia Tele?
8 O se isi mafuaaga mo le olioli, ona o lo tatou saolotoga na foaiina mai e le Atua e sao ai mai Papelonia Tele, le emepaea o lotu sese i le lalolagi. (Faaaliga 18:2, 4, 5) E ui ina o loo “tietie i vai e tele” lenei fafine talitane faafaatusa faalelotu, o lona uiga o “nuu ia, ma motu o tagata, ma atu nuu, ma gagana eseese,” ae ua lē o tietie, pe taaʻina ma pulea faalelotu ai, auauna a Ieova. (Faaaliga 17:1, 15) O loo tatou olioli i le malamalama ofoofogia o le Atua, ae o ē o loo lagolagoina Papelonia Tele o loo iai i se pogisa faaleagaga. (1 Peteru 2:9) Ioe, atonu e faigata ona malamalama i nisi o “mea loloto . . . a le Atua.” (1 Korinito 2:10) Peitai, o tatalo mo le atamai ma le lagolagosua a le agaga paia, e fesoasoani lea ia i tatou ina ia malamalama ai i le upu moni faale-Tusi Paia, lea e faasaolotoina ai faaleagaga ē ua latou maua.—Ioane 8:31, 32; Iakopo 1:5-8.
9. Afai tatou te mananao e olioli i le faamanuiaga o le faaauau pea ona saoloto mai mea sese a lotu, o le ā e tatau ona tatou faia?
9 O loo tatou olioli i le faamanuiaga o le saoloto pea mai mea sese a lotu, peitai ina ia tausia lena saolotoga, e tatau ona tatou teena le faaaposetasi. Sa lelei ona taufetuli o tagata Kalatia i le tausinioga faa-Kerisiano, peitai sa taofia e nisi i latou lava mai le usiusitai i le upu moni. O lena uunaiga leaga e lē mai le Atua ma sa tatau ona teena. E pei ona faafefeteina e sina mea faafefete itiiti le paluga atoa, e mafai foi e aʻoaʻo pepelo po o le lolo atu i le faaaposetasi ona faaleagaina ai se faapotopotoga atoa. Sa talotalo Paulo ia lē gata ina peritomeina, ae ia vavaeeseina totoga faafanautama o ē na folafolaina le peritomeina, ia sa saili e faaliliuina le faatuatua o tagata Kalatia. O le mea moni e malolosi tele na upu! Ae e tatau ona faapea lo tatou mausalī i le teena o le faaaposetasi pe afai tatou te mananao e tausisi i lo tatou saolotoga na foaiina mai e le Atua e sao ai mai mea sese a lotu.—Kalatia 5:7-12.
Auauna le Tasi i le Isi i le Alofa
10. O le ā la tatou avega tauave i le avea ma vaega o le auuso Kerisiano?
10 Ua aumaia i tatou e le saolotoga na foaiina mai e le Atua i se mafutaga faatasi ma se auuso alolofa, peitai e tatau ona faia la tatou vaega ina ia faaalia ai le alofa. Sa vaoia tagata Kalatia ia aua neʻi faaaogāina lo latou saolotoga e fai “ma togafiti a le tino” po o se faamolemolega mo le manatu faapito e lē alofa. Sa tatau ona latou auauna le tasi i le isi ona ua uunaia i le alofa. (Levitiko 19:18; Ioane 13:35) E tatau foi ia i tatou ona alofia le feūtaʻi ma le feʻainaʻi ia e mafai ai ona iʻu i lo tatou faatamaʻia o le tasi ma le isi. O le mea moni, o le a lē tupu lenei mea pe afai tatou te faaalia le alofa faaleuso.—Kalatia 5:13-15.
11. E mafai faapefea ona avea i tatou o se faamanuiaga i isi, ma e mafai faapefea ona latou faamanuiaina i tatou?
11 I le faaaogāina o lo tatou saolotoga na foaiina mai e le Atua e ōgatasi ma le taʻitaʻiga a le agaga o le Atua, o le a tatou faaalia ai le alofa ma avea ai o se faamanuiaga i isi. E ao ona avea ma masani le faatagaina o i tatou ina ia faatonutonuina ma taʻitaʻia e le agaga paia. Ona tatou lē lolo atu ai lea i le faamalieina ma le lē alofa o lo tatou tino agasala lea “e tetee atu i le Agaga [i ona tuʻinanauga].” Afai e taʻitaʻia i tatou e le agaga o le Atua, o le a tatou faaalia ai la le alofa ae lē ona ua tagisia e tulafono le gauai atu ma faaee atu ai ni faasalaga i ē amioleaga. Mo se faataʻitaʻiga, o le alofa—ua lē na o se tulafono—e taofia ai i tatou mai le faitatala e faaleagaina ai isi. (Levitiko 19:16) O le alofa e uunaia ai i tatou e tautatala ma gaoioi i ni auala agalelei. Ona o lo tatou faaalia o le fua o le agaga o le alofa, o le a faamanuia mai ai isi ia i tatou, pe talanoa faaviivii ai e uiga ia i tatou. (Faataoto 10:6) E sili atu i lena, o le a avea o se faamanuiaga ia i latou le mafuta faatasi ma i tatou.—Kalatia 5:16-18.
O ni Fua Ese
12. O ā nisi o faamanuiaga ua maua ona o le alofia o “galuega a le tino” agasala?
12 O le tele o faamanuiaga e fesootai ma lo tatou saolotoga na foaiina mai e le Atua, ua mafua ona o le alofia o “galuega a le tino” agasala. Ona o ni tagata o le Atua, ua masani ai ona tatou alofia le loto mafatia ona tatou te lē faia le faitaaga, amio lē mamā, ma amio lē pulea. E ala i le alofia o le ifo i tupua, ua tatou maua ai le olioli ona o le faafiafiaina o Ieova i lena itu. (1 Ioane 5:21) Talu ai tatou te lē faia faiga faataulaitu, ua tatou saoloto ai mai le pulea e temoni. Ua lē faaleagaina lo tatou auuso faa-Kerisiano e le feitagai, femisai, losilosi vale, lotoa, finau vale, fevaevaeaiga, maseiga, atoa ma le matauʻa. Ma ua lē leiloa foi lo tatou olioli ona o onaga ma poula. Na lapatai mai Paulo faapea o i latou e faia galuega a le tino, o le a lē fai le Malo o le Atua mo latou tofi. Peitai, ona ua tatou utagia ana upu, e mafai ai ona tatou pipii mau atu i le faamoemoe olioli o le Malo.—Kalatia 5:19-21.
13. O ā fua e fuaina mai e le agaga paia o Ieova?
13 Ua aumaia e le saolotoga na foaiina mai e le Atua le olioli ia i tatou ona ua faaalia e Kerisiano fua o le agaga o Ieova. Mai upu a Paulo i tagata Kalatia, e faigofie lava ona iloa ai faapea o galuega a le tino ua pei o ni vaotuitui i le eseesega ma fua matagofie o le agaga o le alofa, olioli, filemu, onosai, mataalofa, agalelei, faamaoni, agamalu, ma le lē gaoiā ua totōina i loto faaleatua. Ona ua tatou filifili e ola e tuufaafeagai ma tuʻinanauga o le tino agasala, tatou te mananao ai e taʻitaʻia e le agaga o le Atua ma ola ai e tusa ma lena agaga. Ua uunaia i tatou e le agaga ina ia loto maulalo ma toafilemu, ae lē ina ia ‘mitamita vale, feluʻiai, ma felosiai.’ E lētioa la ona fai ma olioli le mafuta faatasi ma i latou e faaalia fua o le agaga!—Kalatia 5:22-26.
Isi Mafuaaga mo le Olioli
14. O le ā le ofutau tatou te manaomia i la tatou taua faasaga i ʻau a agaga leaga?
14 Ua fesootai ma lo tatou saolotoga na foaiina mai e le Atua le faamanuiaga o le puipuia mai ia Satani ma ana temoni. Ina ia taulau i la tatou tauiviga faasaga i ʻau a agaga leaga, e tatau ai ona tatou oofu i le “ofutau atoatoa mai le Atua.” Tatou te manaomia le fusipaʻu o le faamaoni ma le ufifatafata o le amiotonu. E tatau ona faaseevaeina o tatou vae i le auupega o le tala lelei o le filemu. O le a manaomia foi, le talipupuni tele o le faatuatua, ina ia tineia ai ū fanafana mu a lē o loo leaga. E tatau ona tatou pulouina le puloutau o le olataga ma faaaogāina “le pelu a le Agaga,” le Afioga lea a le Atua. Ia tatou “tatalo [foi] i le Agaga i aso uma lava.” (Efeso 6:11-18) Afai tatou te ofuina le ofutau faaleagaga ma teena faiga faatemoni, e mafai ai ona tatou loto tetele ma olioli.—Faatusatusa i le Galuega 19:18-20.
15. O le ā le faamanuiaga olioli ua fai mo i tatou ona o lo tatou pulea o i tatou lava e ōgatasi ma le Afioga a le Atua?
15 Ua fai le olioli mo i tatou ona o loo ōgatasi a tatou amio ma le Afioga a le Atua, ma ona ua tatou saoloto mai le agasala o loo malaia ai le toatele o ē amioleaga. O loo ‘faaauau pea ona tatou taumafai ina ia maua se loto fuatiaifo lelei i le lē faia lea o se mea e faasagatau ai i le Atua atoa ma tagata.’ (Galuega 24:16) O lea, e lē manaomia ai ona tatou matataʻu i le faasalaga tauatua o le a oo mai i ē agasala ma le loto i ai, e lē salamō. (Mataio 12:22-32; Eperu 10:26-31) I le faatatauina o le fautuaga a le Faataoto 3:21-26, tatou te iloatino ai le faataunuuga o na upu: “Ia e taofi mau i le poto ma le mafaufau; e fai ia mea ma ola o lou agaga, ma mea matagofie i lou ua. Ona e savali ai lea ma le saogalemu i lou ala; e le tuʻia foi lou vae; a ē taoto e te le fefe; e te taoto lava, e malie foi au moe. Aua e te mataʻu i le fefe faafuasei, ma le malaia o e amio leaga, pe a oo mai. Auā o Ieova, e fai o ia mou faatuatuaga; na te leoleo foi i lou vae, neʻi maua.”
16. Ua avea faapefea le tatalo ma mafuaaga o le olioli, ma o le ā le vaega ua faia e le agaga o Ieova i lenei itu?
16 O le isi mafuaaga mo le olioli, ona o lo tatou saolotoga na foaiina mai e le Atua e faalatalata atu ai ia Ieova i le tatalo faatasi ma le mautinoa o le a ia faafofoga mai ia i tatou. Ioe, ua taliina a tatou tatalo ona ua ia i tatou le “mataʻu [tatau] ia Ieova.” (Faataoto 1:7) E lē gata i lena, ua fesoasoania foi i tatou ina ia faatumauina i tatou lava i le alofa o le Atua e ala i le ‘tatalo faatasi ma le agaga paia.’ (Iuta 20, 21) Tatou te faia lenei mea e ala i le faaalia o se tulaga talileleia o le loto ia Ieova ma i le tatalo i lalo o le taʻitaʻiga a le agaga mo mea e ōgatasi ma lona finagalo ma lana Afioga, lea ua ia faaalia mai ia i tatou le auala e tatalo atu ai atoa ma mea e ole atu ai i le tatalo. (1 Ioane 5:13-15) Afai e matuā tofotofoina lava i tatou ma ua tatou lē iloa po o le ā e tatalo atu ai, ‘o le a faatasi mai la le agaga e fesoasoani mo lo tatou vaivaiga, e fautua mo mea tatou te oi ai e lē mafai ona faaleoina atu.’ E tali mai le Atua i tatalo faapena. (Roma 8:26, 27) O lea, seʻi tatou tatalo ai ia mo le agaga paia ma faatagaina lea e fuaina mai ia i tatou ona fua na e faapitoa ona manaomia ina ia faafetaiaia ai se tofotofoga patino. (Luka 11:13) O le a tatou faateleina foi lo tatou olioli pe afai tatou te suesueina faatasi ma le tatalo ma le tinoū le Afioga a le Atua ua faagaeeina e le agaga atoa ma lomiga faa-Kerisiano ua sauniunia i lalo o le taʻitaʻiga a le agaga.
Faamanuiaina i Fesoasoani ua Mauaina Pea
17. Ua faaalia faapefea i mea na tutupu ia Mose ma upu a Tavita faapea o loo iai Ieova i Ona tagata?
17 I le faaaogāina saʻo o lo tatou saolotoga na foaiina mai e le Atua, ua tatou maua ai le olioli i le iloaina o loo ia i tatou Ieova. Ina ua faapogaia e tulaga ogoogo Mose e tuua Aikupito, “na faamalosi o ia pei o sē iloa atu i le le o vaaia” ona o le faatuatua. (Eperu 11:27) Sa lē savali Mose na o ia; na ia iloa o loo faatasi Ieova ma ia. I se tulaga tutusa, na pepese ai atalii o Koru: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga. O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami; pe a taalili ma sousou ona suāsami, ma faagateteina ai mauga i lona maualuga.” (Salamo 46:1-3) Afai e te faatuatua faapena i le Atua, o le a lē mafai ona ia tuulafoaiina oe. E pei o la a Tavita: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) Maeu le olioli o loo iai i le iloaina faapea e matuā manatu tele mai le Atua i ana auauna!—1 Peteru 5:6, 7.
18. Aiseā ua maua ai e i latou o loo iai le olioli ia Ieova le saolotoga na foaiina mai e le Atua e sao ai mai le soona popole vale?
18 O le mauaina o le olioli o Ieova, ua ia i tatou ai le saolotoga na foaiina mai e le Atua e sao ai mai le soona popole vale. Na faapea mai Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le [filemu] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) O le filemu o le Atua o se toafilemu lea e lē mafaatusalia e tusa lava pe oo i ni tulaga e sili ona tofotofoina ai. Ona o lea, e tumau ai o tatou loto i le toafilemu—o se mea e lelei mo i tatou i le itu faaleagaga, faalogona ootia, atoa ma le faaletino. (Faataoto 14:30) E fesoasoani foi lea ia i tatou ina ia tausia ai le paleni faalemafaufau, auā ua tatou iloa e lē faatagaina e le Atua se mea e faaleagaina ai i tatou e faavavau. (Mataio 10:28) Ua avea lenei filemu e mafua mai i se faiā vavalalata ma le Atua e ala ia Keriso, o sa tatou mea totino, ona o lea ua tuuina atu i tatou ia Ieova ma gauai atu i le taʻitaʻiga a lona agaga, lea na te fuaina mai ni fua e pei o le olioli ma le filemu.
19. O le taulaʻi atu o o tatou loto i le ā, e fesoasoani ai ia i tatou ina ia olioli?
19 O le taulaʻi atu o o tatou loto i lo tatou saolotoga na foaiina mai e le Atua ma le faamoemoe o le Malo o le a fesoasoani lea ia i tatou ina ia olioli. Mo se faataʻitaʻiga, i nisi taimi e itiiti lava se mea e mafai ona fai i le lē lelei o le soifua malōlōina, peitai, e mafai ona tatou tatalo mo le atamai ma le malosi e faafetaiaia ai, ma e mafai foi ona maua le faamafanafanaga i le manatunatu e uiga i le soifua malōlōina faaleagaga o loo tatou olioli ai nei atoa ma faamalōlōga faaletino o le a iai i lalo o le pulega a le Malo. (Salamo 41:1-3; Isaia 33:24) E ui ina atonu e manaomia ona tatou onosai i le mativa i aso nei, ae o le a lē utiuti ai mea e manaomia mo le olaga i le lalolagi Parataiso ua matuā lalata tele mai. (Salamo 72:14, 16; Isaia 65:21-23) Ioe, o le a faatumauina i tatou e lo tatou Tamā faalelagi i le taimi lenei, ma faaatoatoaina ai lo tatou olioli i le iʻuga.—Salamo 145:14-21.
Faapelepele i Lou Saolotoga Mai le Atua
20. E tusa ai ma le Salamo 100:1-5, e ao faapefea ona tatou ō atu i luma o Ieova?
20 I le avea ma tagata o Ieova, e mautinoa e ao ona tatou faapelepele i le saolotoga na foaiina mai e le Atua lea ua aumaia ai ia i tatou le olioli ma le tele o faamanuiaga. E lētioa ona uunaia i tatou e le Salamo 100:1-5 ina ia ō atu i luma o le Atua “ma le alaga [olioli].” E pule Ieova ia i tatou ma na te tausia i tatou e pei o se Leoleo mamoe alofa. Ioe, “o lona nuu i tatou, o le lafu mamoe ua ia fagaina.” O lona tulaga o Lē na Foafoaina Mea atoa ma ona uiga matagofie ua faagaeeina ai i tatou e ulu atu i lotoā o lona malumalu faatasi ma le viiga ma le faafetai. Ua uunaia i tatou e “faamanu atu i lona suafa,” ia talanoa faaviivii e uiga ia Ieova le Atua. E lē gata i lena, e mafai ona tatou faalagolago i taimi uma i lona alofa tunoa, po o lona alofa mutimutivale, mo i tatou. Ua faamaoni Ieova “i lea tupulaga ma lea tupulaga,” e lē fulitua i le faaalia o le alofa ia i latou o loo faia lona finagalo.
21. O le ā le faalaeiauga na ofoina mai i le uluai lomiga o lenei mekasini, ma o le ā e ao ona tatou faia e uiga i le saolotoga na foaiina mai e le Atua?
21 Ona o ni tagata lē lelei atoatoa, ua lē mafai ai ona tatou sosola ese mai tofotofoga uma i le taimi nei. Peitai, ona o le fesoasoani a le Atua, ua mafai ai ona tatou loto tetele ma olioli o ni Molimau a Ieova. I lenei itu, e aogā ai ona matauina upu nei o loo maua i le uluai lomiga o lenei mekasini i le faa-Peretania (Iulai 1879): “Ia loto tetele . . . oʻu uso e, po o tuafāfine Kerisiano, o ē o loo faataupepē e taufetuli i le ala vaapiapi. Aua neʻi tou popole i le ala gaoā; ua saogalemu uma lava ma faapaiaina i aao faamanuiaina o le Matai. Ia manatu i vaotuitui uma o se fugalaau; i papa maamaʻai uma o se maa tulimanu, e faanatinati ai outou agaʻi i le tini. . . . Ia taulaʻi pea la outou vaai i le taui.” O loo taulaʻi atu pea i le taui le vaai a le faitau miliona o loo auauna nei ia Ieova ma e anoanoai mafuaaga ua ia i latou e loto tetele ma olioli ai. Faatasi ma i latou, seʻi tumau ia i le saolotoga na foaiina mai e le Atua. Ia aua lava neʻi misia lona fuafuaga, ma ia tau ina avea pea le olioli ia Ieova ma ou malosi.
E Faapefea ona E Tali Atu?
◻ E mafai faapefea ona avea “le olioli ia Ieova” ma o tatou malosi?
◻ I se uiga faalelotu, o ā faamanuiaga ua aumaia e le saolotoga mai le Atua i tagata o Ieova?
◻ Aiseā e ao ai ona auauna le tasi i le isi i le alofa?
◻ O ā nisi o faamanuiaga ua maua ona o le saolotoga mai le Atua?
◻ E mafai faapefea ona tumau tagata o le Atua i le olioli?
[Ata i le itulau 23]
“Ia manatu i vaotuitui uma o se fugalaau; i papa maamaʻai uma o se maa tulimanu, e faanatinati ai outou agaʻi i le tini”