Fesili mai le Au Faitau

Pe sa faatutuliina ma faagūgūina Sakaria le tamā o Ioane le Papatiso, e pei ona foliga mai o loo faaalia i le Luka 1:62?

Sa faia e nisi se faaiʻuga faapea sa oo ina tutuli foi Sakaria. Ua tatou faitau ai i le faamatalaga a le Tusi Paia: “O le a faaigoa e i latou ia te ia i le igoa o lona tamā, o Sakaria. Ona fai atu lea o lona tinā, ua faapea atu, Aua; e igoa lava o ia ia Ioane. Ona latou fai mai lea ia te ia, E leai se tasi o lou aiga e igoa i lea igoa. Ua latou genogeno atu i lona tamā, pe se a lona loto i sona igoa. Ona fai ane lea o ia i se papatusi e au mai, ona tusi ai lea e ia, ua faapea, O Ioane lona igoa.”—Luka 1:59-63.

E leai lava se mea o taʻu patino mai ai i lenei faamatalaga faapea, sa tutuli Sakaria mo se vaitaimi.

Muamua lava, na folafola mai e le agelu o Kaperielu ia Sakaria o le a fanau mai lona atalii o lē o le a igoa ia Ioane. Sa faigata ia Sakaria ua toeaina ona talitonu i lena mea. Ona tali atu lea o le agelu: “Faauta foi, e gūgū oe, e te le magagana seia oo i le aso e fai ai nei mea, auā ua e le talitonu mai i aʻu upu, o mea ia e taunuu lava pe a oo i ona po.” (Luka 1:13, 18-20) Na faapea mai le agelu o le a aafia le tautala a Sakaria ae lē o lana faalogo.

Ua faapea atili mai le faamatalaga: “Ua alu ia i fafo [mai le malumalu], a ua le magagana ia te i latou [tagata o loo faatali]; ua latou iloa ai ua na vaaia se faaaliga i le malumalu; a o ia ua genogeno atu ia te i latou, ua gūgū pea ia.” (Luka 1:22) O le upu Eleni i inei ua tutusa ma le “gūgū” ua aumaia ai le manatu, ua faaseganui ona tautala, pe lē lelei le faalogo, po o mea uma e lua. (Luka 7:22) Ae faapefea Sakaria? Ia, manatu i le mea na tupu ina ua faamalōlōina o ia. “Ona matala loa lea o lona leo ma lona laulaufaiva, ona tautala lea o ia, ma faafetai i le Atua.” (Luka 1:64) O lena mea ua taʻitaʻiina atu ai ma le talafeagai i le manatu faapea, e na o le malosi e tautala ai o Sakaria lea na toe faaleleia.

Aiseā la na fesili atu ai isi ia Sakaria e ala i lo “latou genogeno atu . . . pe se a lona loto i sona [le tama] igoa”? O nisi tagata faaliliu ua oo lava ina latou faasino atu faapea “i le gagana o tāga” po o le “faaaogāina o tāga.”

O Sakaria o lē sa gūgū talu mai le taimi o le faasilasilaga a le agelu, sa masani lava ona ia faaaogāina tāga, o se ituaiga o gagana, e faaalia ai o ia. Mo se faaaʻoaʻoga, sa ia “genogeno atu” pea ia i latou o i le malumalu. (Luka 1:21, 22) Ina ua ia fesili mulimuli atu mo se papatusi, atonu sa ia faaaogāina ni tāga. (Luka 1:63) O le mea lea, sa tatau ai ia i latou o lona nuu ma lona aiga ona faaaogā foi tāga i le taimi na gūgū ai o ia.

Ae peitai, o loo iai foi se isi faamatalaga e faamalamalama ai tāga o loo taʻua i le Luka 1:62. Na seʻi faatoʻā uma lava ona faaalia le manatu o Elisapeta faatatau i le igoa o lana tama. O lea, ina ia lē faatautee ia te ia, atonu sa na ona latou faia o se laasaga tatau o le fia maua lea o le faaiʻuga a lana tane. Sa mafai ona latou faia o lena mea e ala i le na ona geno atu po o le faia o se tāga. O le mea moni latou te leʻi tusia la latou fesili mo Sakaria e faitau i ai, atonu o se faailoga lea e iloa ai faapea sa ia lagonaina mai upu a lana avā. I lea, atonu e na o sina geno atu po se faailoilo atu e tasi atonu sa ia maua ai le uiga faapea, ‘Ia, ua lelei, o lea ua matou faalogo uma atu lava (e faapea foi ma oe, Sakaria) i lana fautuaga, ae o le ā sau faaiʻuga e uiga i le igoa o le tama?’

Ma mulimuli ane, na faafuaseʻi ai lava ona tupu se isi vavega, ua toe faafoisia mai ai le tulaga sa iai muamua. “Ona matala loa lea o lona leo ma lona laulaufaiva, ona tautala lea o ia, ma faafetai i le Atua.” (Luka 1:64) E lē manaomia ona taʻua fua lana faalogo pe afai e leʻi aafia.