‘Apoapoai atu e Faavae i le Alofa’

PE TUSA o le 60-61 T.A., na tuua ai Roma e se pologa na sola ese ma na ia amataina se malaga e tusa ma le 900 maila [1,400 km] i lona aiga i Kolose, o se aai i saute sisifo o Asia Itiiti. Sa ia aveina se feau sa tusia mo lona matai, na tusia e le aposetolo o Paulo. I aso nei, o lena tusi ua avea ma vaega o le Tusi Paia, ma o loo tauaveina ai le igoa o lē na ia talia le tusi, o Filemoni.

O le tusi ia Filemoni, o se tusi sili ona tomai i le uunaia o manatu. O lea la, o le mea e sili ona tāua, ona o loo iai nisi o lesona aogā mo Kerisiano i aso nei, o le tasi, o le tāua o le feapoapoaiai e faavae i le alofa faa-Kerisiano. Seʻi o tatou vaai totoʻa la i lenei tusi puupuu ae malosi.

O Sē na Sola Ese ua Toe Foi

O Filemoni o se Kerisiano, o se sui alofagia o le faapotopotoga i Kolose. (Filemoni 4, 5) Ioe, sa faaaogā e le faapotopotoga i inā lona fale e avea ma nofoaga o sauniga! (Fuaiupu 2) E lē gata i lea, sa masani totino Filemoni ma le aposetolo o Paulo; atonu pe sa avea le aposetolo ma auala o lona avea ma Kerisiano. E moni, ua faaalia e Paulo faapea e leʻi talaʻi totino o ia i Kolose. (Kolose 2:1) Ae peitai, e lua tausaga sa ia faaaluina i Efeso, e talaʻi atu ai i se mamao faapena o lea, “na faalogo ai i le afioga a le Alii o Iesu o i latou uma lava e ua nonofo i Asia [e aofia ai ma Kolose].” (Galuega 19:10) Sa aofia ai atonu ma Filemoni ia i latou na faalogo ma talia.

Ae peitai, i le pei o le toatele o tagata mauoa faaletino i lena vaitaimi, sa avea ai Filemoni o sē e fai ni ana pologa. I aso anamua, sa lē o se tulaga paʻū maulalo le avea ma pologa. I le lotolotoi o tagata Iutaia, o le faatauina atu o se tasi po o nisi o le aiga e fai ma pologa, sa o se auala na talia e toe totogi ai aitalafu. (Levitiko 25:39, 40) Fai mai le The International Standard Bible Encyclopedia e uiga i le vaitaimi o Roma: “E anoanoai tagata na faatauina atu i latou lava e fai ma pologa ona o mafuaaga eseese, ae na i lo o mea uma lava, o le manaoga lea ia ulu atu i se olaga sa faigofie ma sili atu ona malu puipuia na i lo o le ola e avea o se tagata mativa, tagata saoloto, ina ia maua ni galuega faapitoa, ma ia maua ni tulaga maualuluga. . . . E toatele tagata e lē o ni tagātanuu Roma na faatauina atu i latou lava o ni pologa i tagātanuu Roma ma le faamoemoe moni faapea o le a gauai atu ma le faaeteete i le tulafono a Roma, ona o le manatu e oo ina avea i latou ma tagātanuu Roma pe a oo ina faasaolotoina i latou.”

E ui i lea, na mapuna aʻe se faafitauli, ina ua tuua e se tasi o pologa a Filemoni e igoa ia Onosemo lona matai ma sola i Roma, atonu sa ia gaoia ni tupe mai ia Filemoni ina ia faatupeina ai lana solaaga. (Fuaiupu 18) I Roma, na faafesootai atu ai e Onosemo le aposetolo o Paulo, o lē o loo avea ma pagota i inā.

O se pologa sa “le aogā” muamua o lē na fesolasolataʻi ua avea nei ma Kerisiano. Ua tuuina atu o ia lava i le vaaiga a Paulo ma faia ni auaunaga aogā i le aposetolo o loo faafalepuipuiina. E lē o se mea e ofo ai ona sa talia Onosemo i le “alofa mutimutivale” (NW) o Paulo ma avea ai “o le uso pele” ia Paulo!—Fuaiupu 11, 12, 16.

Sa manao Paulo la te nonofo pea ma Onosemo, ae sa ia Filemoni aiā faaletulafono e avea ai ma pule o Onosemo. O lea, ua iai ia Onesemo le tiute tauave e toe foi atu ai e auauna i lona matai faaletulafono. O le a faapefea la ona talia o ia e Filemoni? Pe o le a ia tapā ma le ita le aiā e tuuina atu ai se faasalaga ogoogo? Po o le a ia luʻia le faamaoni o le faapea mai o Onosemo o se uso Kerisiano?

Foia Mataupu i le Alofa

Sa uunaia lava Paulo e tusi atu ia Filemoni e faatatau ia Onosemo. Sa tusia e ia le tusi i lona lava lima, na te leʻi faaaogāina se failautusi e pei o lana lava lea masani. (Fuaiupu 19) Ia faaalu ni nai minute e faitau atoa ai le tusi puupuu ia Filemoni. O le a e matauina ai faapea, ina ua uma ona faailoa atu o ia lava ma ofo atu ia Filemoni ma lona aiga “le alofa tunoa ma le manuia,” ona faamālō atu lea o Paulo ia Filemoni ona o ‘lona alofa ma le faatuatua i le Alii o Iesu Keriso faapea foi le au paia uma.’—Fuaiupu 1-7.

Sa ono mafai e Paulo ona tapā lana pule faaaposetolo ma ‘poloaiina ai Filemoni ina ia faia le mea saʻo,’ ae na i lo o lea, sa ia ‘apoapoai atu e faavae i le alofa.’ Sa ia molimau i le mea moni faapea o Filemoni, ua avea moni lava ma uso Kerisiano, o le na faamaonia o ia lava sa aogā ia Paulo. Sa taʻutino atu e le aposetolo faapea: “Na ou loto ina ia taofi pea ia te ia [Onosemo] ma te nonofo ma aʻu, ina ia fai mou sui, na te auauna mai ia te au i oʻu noanoataga ona o le tala lelei.” Ae na faaauau Paulo, “ou te le fia faia se mea e tasi pe a le to mai sau pule, ina neʻi pei o se mea ua faatauanauina lou agalelei mai, a ia faia ma le loto.”—Fuaiupu 8-14.

I lea, na uunaia ai e Paulo Filemoni ina ia talia mai lē sa avea muamua ma ana pologa o se uso. “Ia e talia mai o ia [ma le agalelei] e pei o aʻu lava,” na tusi atu ai Paulo. E lē ina ia faasaolotoina Onosemo mai le avea ma pologa. Sa leʻi taumafai Paulo ina ia suia le tulafono mo le lautele i ona aso. (Faatusatusa i le Efeso 6:9; Kolose 4:1; 1 Timoteo 6:2.) Ae peitai, o le faiā a le pologa ma le matai e mautinoa o le a faamalosia e ala i le noataga faa-Kerisiano ua iai nei i le va o Filemoni ma Onosemo. O le a manatu ai Filemoni ia Onosemo “e sili i le pologa, o le uso pele ia.”—Fuaiupu 15-17.

Ae faapefea la ni aitalafu atonu na faia e Onosemo, atonu ona o le gaoia o ni mea? Sa toe aioi atu foi Paulo e tusa ma la la faiga uō ma Filemoni, i lona faapea atu: “A e afai na ia agaleaga ia te oe, po ua ia te ia sau mea, ia e tuu mai lea mea ia te au.” Sa faaalia e Paulo le mautinoa faapea o le a faaalia e Filemoni se agaga faamagalo, ma faia e sili atu i lo o le mea ua talosaga atu ai Paulo. Talu ai ona sa faamoemoe Paulo ua lē o toe umi ona faasaolotoina lea o ia, sa ia fuafuaina foi ina ia olioli i le agaga talimalo o Filemoni i le lumanai lata mai. Ina ua uma ona ia toe fai atu nisi moomooga alofa atili ma moomoo ai ina ia maua e Filemoni “le alofa tunoa o lo tatou Alii o Iesu Keriso,” ona faaiʻu ai lea e Paulo lana tusi.—Fuaiupu 18-25.

Lesona mo Kerisiano i Aso Nei

E anoanoai lesona aogā o loo maua i le tusi a Filemoni mo Kerisiano i aso nei. O le tasi o mea, o loo faamanatu mai ai ia i tatou le manaomia ona faamagalo, e tusa lava pe matuiā se sese o se uso talitonu ia i tatou. “Auā afai tou te faamagaloina atu tagata i a latou agasala,” na fetalai ai Iesu Keriso, “e faamagaloina foi outou e lo outou Tamā o i le lagi.”—Mataio 6:14.

O i latou o i tulaga pule i totonu o le faapotopotoga Kerisiano i aso nei, e mafai ona maua faapitoa aogā mai le tusi o Filemoni. O se mea e aogā ona matauina faapea, sa faamamao ese Paulo mai le faaaogāina o lana pule faaaposetolo e poloaiina ai Filemoni ina ia faia le mea tonu. E lē gata i lea, sa leʻi tapā faamalosi e Paulo faapea e tatau ona faatagaina Onosemo e nofo i Roma e auauna ia Paulo. Sa faaaloalo Paulo i aiā totino a isi. Sa ia talisapaia foi faapea, afai e faia i se pule faamalosi, atonu o le a iʻu ai i le usiusitai i ai, ae e sili ona lelei pe a faia e Filemoni ona o lona loto malie. O lea na ia talosaga atu ai e faavae i le alofa, ina ia aumaia ai se tali e sau mai le loto.

O le mea lea, e ao foi i toeaina Kerisiano i aso nei ona ʻaua neʻi “fia pule ia i latou o fanau a le Atua” (NW) e ala i le faaaogaseseina o la latou pule po o le faaaogāina o se auala pule sauā e feutagai ai ma le lafu. (1 Peteru 5:1-3) Na fetalai Iesu: “Ua outou iloa o alii o nuu ese ua aliitai i latou, o e ua sili foi ua pule ia te i latou; a e le faapea outou.” (Mataio 20:25, 26) E masani lava ona iloa e ovasia faapea, o sui o le lafu e sili atu ona tali lelei mai i talosaga e fai atu ma le alofa na i lo o faatonuga malosi. O i latou o puapuagatia i mafatiaga o le mafaufau latou te talisapaia ovasia o ē o le a faaavanoaina ma le galelei se taimi e faalogologo atu ai i o latou faafitauli ma avatu se fautuaga malamalama.

Ua faamanatu atili mai e le tusi a Paulo i toeaina le tāua o le faamālō atu ma le tomai e taulimaina ai. Na te amataina i le iloa faapea ‘o le alofa naunau o le au paia sa faamalosia e ala’ ia Filemoni. (Fuaiupu 7) O lenei faamalosiau faamaoni e lē taumatea na maua ai e Filemoni se faalogona sili ona lelei e talia ai. E faapena foi i aso nei, o se fautuaga po o se lapataiga e masani lava ona talia lelei faatasi ma se faamalosiau faamaoni ma le mafana. Ma o na fautuaga e ao ona maʻai ma ia tomai, ae ia agalelei foi, “ia faamāi i le masima” ia faia faapena ina ia sili ona fiafia i ai lē o faalogologo.—Kolose 4:6.

Sa faaalia atili e Paulo le mautinoa faapea, o le a faia e Filemoni le mea saʻo, i le faapea mai: “Ua ou tusi atu ia te oe, auā ou te faatuatua i lou gauai mai, ua ou iloa e te faia mea e sili lava i mea ou te fai atu ai.” (Fuaiupu 21) Le au toeaina e, pe tou te faaalia lea lava mautinoa i o outou uso Kerisiano? Pe lē fesoasoani ea lenei ia i latou e mananao ai e faia le mea ua saʻo?

E fiafia lava, ona e masani ona iloa e mātua faapea o le faaalia o le mautinoa i a latou fanau, ua maua ai foi se iʻuga lelei. I le iloa lelei o le tāua o le gauai mai le loto—se faanaunauga ina ia faia e sili atu na i lo o le na ona faafetaiaia o mea manaomia—ua mafai ai e mātua ona tuuina atu i a latou fanau sina faaaloaloga. O faatonuga po o talosaga a mātua e ao ona faia, pe a tatau ai, i se leo agalelei ma le alofa. E ao foi ona faaalia le manatu malamalama, ma avatu foʻi ni mafuaaga. E ao i mātua ona faamālō atu ma le mafana i a latou fanau pe a tatau ai ona avatua na faamalosiau ma aloese mai le soona faitioina o i latou, ae maise lava i luma o le lautele.

O le manatu foi lena i tane, e mafai ona faaalia uiga magafagafa ma le agalelei, ia nofo sauni pea e faaviivii atu i a latou avā. O lenei mea e avea ai le gauai atu o le avā o se mea fiafia e faia ma o se puna o faamalosiau ma le olioli!—Faataoto 31:28; Efeso 5:28.

E lē o taʻua le auala tonu na tali atu ai Filemoni i le tusi a Paulo. O lea la, e lē mafai ona tatou tau mānatu faalemafaufau faapea na tuu sese le talitonuga o Paulo ia te ia. Tau ina ia faapena foi i toeaina Kerisiano, mātua, ma tane i aso nei ona manuia i a latou feutagaiga, aua le faia faamalosi, pe faatonu ma le leo malosi, pe fai faamalosi, ae e ala i le ‘apoapoai atu e faavae i le alofa.’

[Ata i le itulau 23]

Na i lo o le tapā o lana pule faaaposetolo, sa apoapoai atu Paulo ia Filemoni e faavae i le alofa faa-Kerisiano