Vaaiga Mai le Nuu o le Folafolaga

Sa Ia Saunia Mea mo Isaraelu i Sinai

SEʻI vaai faalemafaufau i le faitau miliona—o tane, fafine, ma tamaiti—o āga atu i le “vao e tele ma le matautia, e i ai gata uogo ma akarava, o le nuu naumati foi, e le o i ai se vai”!

O na fetalaiga a Ieova o loo maua i le Teuteronome 8:15 ua aumaia ai i o tatou mafaufau le mea sa foliga mai o se malaga mataʻutia sa fotuai mai i luma o tagata Isaraelu a o latou ō ese atu mai Aikupito ma savavali atu i le vaomatua o Sinai. O se tasi o faafitauli tele: O ai o le a na saunia ni meaʻai ma vai ia lava?

Sa avea tagata Isaraelu ma maumausolo i tuā i le laufanua maulalo o le Naila, ae sa leʻi matitiva i latou. Sa faaalia i ata na vali i puipui o loa anamua ituaiga eseese o vine, meleni, ma isi lava fualaau ʻaina, faapea ma iʻa ma manu tataa e pei o moa ma pato ma isi mea faapena sa mafai ona maua ai le matalasi o ʻaiga susua eseese. O lea la, maeu le saʻo o le faia o ni faitioga moomoo a le nuu i le vao e faapea: “O ai ea e fafaga ia te i tatou i manu? Ua tatou manatu i iʻa na tatou saʻoloto ona aai ai i Aikupito; o [kukama] foi, ma meleni, ma liki, ma aniani, ma kalika.”—Numera 11:4, 5; 20:5.

Ina ua sopoia atu e le fanauga a Isaraelu le Sami Ulaula, sa leʻi pine ae vavala atu ia te i latou le mea moni e uiga ia Sinai. Latou te leʻi uia le auala umi laulelei sa masani ona uia e tagata faatauoa agaʻi i matu, ae na liliu agaʻi i le faatausiusiuga o le penisula tafatolu. E oo atu i le taimi na latou malaga ai pe tusa ma le 50 maila [80 km] le loloto o le vao na latou savalia, ae foliga sa latou matuā manaomia tele lava se vai. Sa lē mafai ona latou inumia le vai na latou maua, ona o le oona ma sa ono mafai ona maua ai ni faamaʻi. Ona latou alalaga lea, “Se a se mea a matou inu ai?” Sa faalaa ane le Atua, ma faamagaloina le vai.—Esoto 15:22-25.

Mātau le vaaiga i le solo a kamela o loo i luga. E mafai ona e talisapaia le fesili e uiga i le pe na faapefea ona mafai e le fanauga a Isaraelu ona faaauau pea i le malaga i le vao e oo atu i le Mauga o Sinai. Pe sa faapefea ona latou maua pea le lava o vai—ma meaʻai—mo i latou lava faapea foi ma lafu mamoe ma lafu povi na sa latou manaomia e fai ma a latou meaʻai ina ia ola ai i latou?—Esoto 12:38.

Sa latou malaga mamao atu lava i saute ma sa leʻi pine ae maua vai e faafouina ai ma meaʻai i Ailima. (Esoto 15:27) Ae peitai, e lē o inā e faataunuu i ai. Sa latou āga atu “i le mauga o le Atua [moni],” le Mauga o Sinai. (Esoto 3:1; 18:5; 19:2; 24:12-18) Sa tusa lena ma le 75 maila [120 km] le mamao—o ni maila o se laueleele matūtū ma le gaoā.

A o agaʻi atu lenei vaega tele i le Mauga o Sinai, na latou faalatalata atu—ma e foliga mai na malōlō i latou i le fanua telē sa taʻua o Feiran. O sona vaega itiiti lena e iloa atu i le isi itulau.a E faasolo atu i le vaomatua, ma agaʻi atu ai i le Sami Ulaula (le Fagaloa o Suesa). Maeu se faafouina na latou maua ai i inā!

Ona atonu e masani lava ona fetaui le vao o Sinai ma le faamatalaga “le vao e tele ma le matautia,” sa ono mafai ai e le fanauga a Isaraelu ona olioli i le paolo o pama tetele ma isi laau i le fanua o Feiran. Sa latou maua ai le tele o fua o niupiu suamalie e lava e saunia ai meaʻai mo i latou i lena mea, faapea foi ma ni mea e mafai ona latou o ma ave.

Sa mafaia nei mea uma ona o le vai mai le eleele sa puna aʻe mai le fanua o Feiran. Seʻi manatu i se lagona o le a oo ia te oe pe afai sa e i se toafa i se vaomatua ma faafuaseʻi ai lava ona e maua se vai manino e te inu ai! Ua faaatagia ai i lenei mea faapea, e oo lava i Sinai, e iai nofoaga e mafai ona maua ai le vai. O nisi taimi e mafai foi ona ʻeli ai se vai ʻeli matuā loloto. E ono faia ai foi se galuega o le asu aʻe o vai i pakete po o fagu ua tutumu i lenei suavai matuā tāua, ae maise lava pe a manaomia ona faainu o lafu mamoe ma lafu povi. I aso nei, o tagata Bedouin i Sinai e tosina atu tele i vai ʻeli e mafai ai ona latou asu aʻe le vai mo i latou lava ma a latou kamela.—Faatusatusa i le Kenese 24:11-20; 26:18-22.

Ioe, e ui lava i nisi taimi sa latou muimui ai pe a foliga mai e matua telē lava se mea o latou manaomia, ae sa maua lava e le fanauga a Isaraelu vai ma meaʻai. I nisi taimi, sa saunia ai faavavega e Ieova mea faapena. (Esoto 16:11-18, 31; 17:2-6) I nisi taimi, e foliga mai, sa ia taʻitaʻiina i latou “i se mapusaga” o inā o le a mafai ai ona faamalie o latou manaoga e ala i le aumaia ia i latou o mea e masani ona latou manaomia. (Numera 10:33-36) I taimi uma lava, sa ia tuuina atu ai i o latou luma le anoanoai o mea na sa faatalitali mai mo ē faamaoni i le Nuu o le Folafolaga.—Teuteronome 11:10-15.

[Faaopoopoga i lalo]

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 24, 25]

Pictorial Archive (Near Eastern History) Est.

[Ē Ana le Ata i le itulau 25]

Pictorial Archive (Near Eastern History) Est.