Le Fiafiaga Moni i le Auaunaga ia Ieova
“[E fiafia] le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua.”—SALAMO 146:5.
1, 2. O le ā ua taʻua e faatatau i le uiga o le fiafiaga, ma o le ā le uiga o le fiafiaga mo le toatele o tagata i aso nei?
O LE ā ea le fiafiaga? E tele senituri o taumafai ē e saunia lomifefiloi, o faifilosofia, ma aʻoaʻo faifeau e faamatalaina lona uiga. Peitai ua lē mafai ona latou saunia se faamatalaga e ioe i ai tagata uma. Ua taʻutino mai e le Encyclopædia Britannica e faapea: “‘O le fiafiaga’ o se tasi lea o upu e matuā faigata ona faamatalaina.” E foliga mai e eseese le faauigaina o le fiafiaga i tagata eseese, e faalagolago i la latou vaaiga i le olaga.
2 Mo le toatele o tagata, e faalagolago lo latou fiafiaga i le soifua malōlōina, i mea faitino e maua, ma ni uō lelei. E ui i lea, o loo iai tagata ua latou mauaina na mea uma ae e lē o fiafia. Ae mo tane ma fafine ua tuuina atu ia Ieova le Atua, ua saunia e le Tusi Paia se manatu e uiga i le fiafiaga e matuā ese lava mai le manatu o tagata lautele.
Se Manatu Ese e Uiga i le Fiafiaga
3, 4. (a) O ai sa fetalai i ai Iesu e fiafia? (e) O le ā e mafai ona matauina e uiga i mea e mauaina ai le fiafiaga na taʻua e Iesu?
3 I lana Lauga i luga o le Mauga, sa leʻi fetalai ai Iesu faapea, e faalagolago le fiafiaga i le soifua malōlōina, i mea faitino e maua, ma isi mea faapena. Ae na ia fetalai faapea, e matuā fiafia lava i latou o ē ‘naunau i o latou manaoga faaleagaga’ ma i latou o ē “fia aai ma fia inu i le amiotonu.” E fesootai ma na mea e lua e manaomia mo le fiafiaga moni, le fetalaiga uigaese a Iesu e faapea: “Amuia ē faanoanoa; auā e faamafanafanaina i latou.” (Mataio 5:3-6) E manino lava, sa leʻi fetalai atu Iesu e faapea, o le a faafuaseʻi lava ona fiafia tagata pe a maliu sē pele ia i latou. Na i lo lena, sa ia fetalai atu e uiga ia i latou o ē faanoanoa ona o lo latou tulaga agasala ma ona āuga leaga.
4 Sa tautala le aposetolo o Paulo e uiga i le foafoaga faaletagata o loo oi ona o le agasala e faapea, e ala i le faamoemoe, o le a ‘faasaoloto mai ai nai le pologa i le iʻuvale.’ (Roma 8:21, 22) O ē latou te taliaina le sauniuniga a Ieova mo le totogia o agasala e ala i le taulaga togiola a Keriso, ma latou faia le finagalo o le Atua, o loo matuā faamafanafanaina lava ma o loo faafiafiaina. (Roma 4:6-8) I le Lauga i luga o le Mauga, na fetalai ai foi Iesu e faapea, e fiafia “ē agamalu,” o “ē alolofa atu,” o “ē loto mamā,” atoa ma “ē faatupuina le filemu.” Na ia aumaia le faamautinoga e faapea, e tusa lava pe sauaina, ae e lē mafai ona aveesea ai le fiafiaga o na tagata agamalu. (Mataio 5:5-11) O se mea lelei le matauina e faapea, o na mea e faagaeeina ai le fiafiaga, o loo fua tutusa ai le tulaga o ē mauoa ma ē matitiva.
Le Faavae mo le Fiafiaga Moni
5. O le ā le faavae mo le fiafiaga o auauna tuuina atu a Ieova?
5 E lē mafai ona maua i le tamaoaiga faaletino, le puna o le fiafiaga moni. Na faapea mai le Tupu poto o Solomona: “O le faamanuia a Ieova, o lea e faatamaoaigaina aʻi, na te le faaopoopo i ai se tiga.” (Faataoto 10:22) Mo foafoaga o ē latou te amanaia le pule silisiliese aoao a Ieova, e matuā fesootai lava le fiafiaga ma le faamanuiaga a le Atua. E matuā fiafia lava se tagata tuuina atu o lē ua mauaina ma ua oo i ai faamanuiaga a Ieova. I se vaaiga faale-Tusi Paia, o le fiafiaga, e aofia ai le lagona o le loto malie, le faamalieina, atoa ma le faataunuuina o ni mea i le auaunaga ia Ieova.
6. O le ā e manaomia i tagata o Ieova ina ia latou matuā fiafia ai lava?
6 E faalagolago le fiafiaga moni i se faiā tonu ma Ieova. Ua faavae lea i le alofa mo le Atua ma le faamaoni ia te ia. E ioe ma le loto atoa auauna tuuina atu a Ieova i upu a Paulo e faapea: “E leai so tatou e ola mo ia lava, . . . tatou te ola mo [Ieova], . . . o tagata lava o [Ieova] i tatou.” (Roma 14:7, 8) O le mea lea, e lē mafai ai ona maua o le fiafiaga moni seʻi vaganā ua usiusitai ia Ieova ma gauai atu ma le fiafia i lona finagalo. Na fetalai Iesu e faapea: ‘E fiafia i latou o ē faalogologo i le afioga a le Atua ma tausi i ai.’—Luka 11:28.
Mea Eseese e Maua ai le Fiafiaga
7, 8. (a) E mafai faapefea ona faavasegaina mea e maua ai le fiafiaga? (e) O le ā e mafai ona taʻua e uiga i le faaipoipoga ma le fanautama?
7 E mafai ona taʻua mea e maua ai le fiafiaga o loo i luga, o ni “mea faavae,” po o ni “mea tumau,” ona e tāua tele na mea mo auauna tuuina atu a Ieova i taimi uma. E faaopoopo atu i ai, o loo iai foi mea e mafai ona taʻua o mea fesuisuiai, po o ni mea e mafai ona maua ai le fiafiaga i se tasi taimi ae e itiiti pe leai foi se fiafiaga e maua ai i se isi taimi. I vaitaimi o augātamā faatuatua, ma tua atu o le Faa-Kerisiano, sa manatu ai i le faaipoipoga ma le fanautama, o se mea e matuā manaomia lava mo le fiafiaga. Ua atagia mai lenei itu, i le faatagi atu a Rasela ia Iakopo e faapea: “Au mai ia ni tama ia te au, a leai ona ou oti ai lea.” (Kenese 30:1) Sa talafeagai lelei lena manatu e uiga i le fanautama ma le fuafuaga a Ieova mo lena vaitaimi.—Kenese 13:14-16; 22:17.
8 Sa manatu i le faaipoipoga ma le fanautama o ni faamanuiaga mai le Atua mo tagata o Ieova i ona po anamua. Peitai, na oo ia i latou puapuaga ona o na mea, atoa ma isi tulaga i vaitaimi e sili ona faigata i lo latou talafaasolopito. (Faatusatusa le Salamo 127, 128 ma le Ieremia 6:12; 11:22; Auega 2:19; 4:4, 5.) O lea la, e foliga mai ai o le faaipoipoga ma le fanautama, e lē o ni mea e maua ai le fiafiaga e faavavau.
Fiafiaga e Aunoa ma le Faaipoipoga i Taimi ua Mavae
9. Aiseā na viiviia ai le afafine o Iefata i lea tausaga ma lea tausaga?
9 E toatele auauna a le Atua ua mauaina le fiafiaga e aunoa ma le faaipoipoga. Ona o le faaaloalo mo le tautoga a lona tamā, na tumau ai pea le afafine o Iefata i le nofofua. Sa fetagisi o ia ma ana uo teine mo sina taimi ona o lona nofo taupou. Peitai, maeu le olioli na ia maua i le auaunaga faataimi atoa i le maota o Ieova, atonu i le lotolotoi o “[auauna] fafine e na faapotopoto ane i le faitotoa o le fale ie o le faapotopotoga”! (Esoto 38:8) O le mea lea, na viiviia ai o ia i lea tausaga ma lea tausaga.—Faamasino 11:37-40.
10. O le ā sa manaomia e Ieova mai ia Ieremia, ma pe e foliga mai ea, na iʻu lena i lona mauaina ai o se olaga lē fiafia?
10 Ona o le mataʻutia o ona po na soifua ai le perofeta o Ieremia, na finagalo ai le Atua ina ia aua neʻi faaipoipo o ia pe faia sana fanau. (Ieremia 16:1-4) Peitai, na iloa e Ieremia le moni o afioga a le Atua e faapea: “Amuia le tagata o lē faatuatua ia Ieova, o le ua fai Ieova mona faatuatuaga.” (Ieremia 17:7) Sa auauna ma le faamaoni Ieremia o se tagata nofofua i le Atua, i le gasologa atoa o lana auaunaga faaperofeta, e sili atu ma le 40 tausaga. E tusa ai ma lo tatou iloa, sa leʻi faaipoipo lava o ia pe sa faia foi sana fanau. Ae e ui i lea, o ai ea e mafai ona māsalomia pe na fiafia Ieremia, e pei o le vaega totoe faamaoni o tagata Iutaia o ē sa ‘alalaga fiafia ona o le agalelei o Ieova’?—Ieremia 31:12.
11. O ā nisi faaaʻoaʻoga faale-Tusi Paia o auauna faamaoni a Ieova o ē sa fiafia e ui ina sa lē faia ni a latou paaga faaipoipo?
11 E toatele foi isi tagata ua auauna ma le olioli ia Ieova e aunoa ma se paaga faaipoipo. Atonu sa avea i latou o ni ē nofofua, o ē ua maliliu a latou tane, po o ē ua maliliu a latou avā. E aofia ai ia i latou na le perofeta fafine o Ana; atonu o Toreka, po o Tapita; o le aposetolo o Paulo; ma le faaaʻoaʻoga silisili o i latou uma—o Iesu Keriso.
Nofofua ae Fiafia i Aso Nei
12. O le ā ua mafai ona faaavanoa i ai nisi o auauna fiafia ua tuuina atu a Ieova i aso nei, ma aiseā?
12 I aso nei, e faitau afe Molimau a Ieova o loo auauna ma le faamaoni i le Atua e aunoa ma se paaga faaipoipo. Ua mafai e nisi ona taliaina le valaau a Iesu e faapea: “Ai se tasi na te mafaia ona talia [le meaalofa o le nofofua], ina talia lea e ia.” Ua latou faia lenei mea “ona o le malo o le lagi.” (Mataio 19:11, 12) O lona uiga, ua latou faaaogāina tatau lo latou saolotoga mai le Atua, e ala i le tuutoina atu o le taimi tele ma le malosi e lagolagoina ai manaoga o le Malo. O le toatele o i latou o loo auauna faapaeonia, faamisionare, po o ni sui o le aiga Peteli i ofisa ulu o le Sosaiete o le Olo Matamata po o se tasi o ona lālā.
13. O ā faaaʻoaʻoga ua faaalia ai, e mafai e se Kerisiano ona nofofua ma fiafia?
13 Sa faaulutalaina e se tasi o tuafafine pele ua matua, le tala o lona olaga i upu nei, “Nofofua ae Fiafia o se Paeonia.” (Le Olomatamata faa-Peretania Me 1, 1985, itulau e 23-26) Na taʻua foi e se isi tuafafine nofofua o lē na faaaluina le sili atu ma le 50 tausaga e galue ai i Peteli: “Ua matuā faamalieina atoatoa aʻu i loʻu olaga ma laʻu galuega. Ua sili atu nei ona tele aʻu mea o loo faia i le galuega ua ou matuā naunau lava i ai na i lo muamua. E leai se mea o oʻu faanoanoa ai. O le a ou toe faia foi lena lava filifiliga.”—Le Olomatamata faa-Peretania o Iuni 15, 1982, itulau e 15.
14, 15. (a) E tusa ai ma le aposetolo o Paulo, o le ā e manaomia ina ia tumau ai i le nofofua? (e) Aiseā ua faapea mai ai Paulo “ua sili ona lelei” le tagata nofofua ma ua “sili lona fiafia”?
14 Ia matau le upu “filifiliga.” Na tusia faapea e Paulo: ‘O lē ua mau lona loto, e leai se mea na te manaomia, ua ia te ia foi le pule i lona lava loto ma ua filifili lona loto ina ia tausisi i lona nofo taupou, ua lelei lana mea ua fai. O lenei, o lē foi e tuuina atu lona taupou i le faaipoipoga, ua lelei lana mea ua fai, a o lē na te lē tuuina atu i le faaipoipoga, ua sili ona lelei lana mea ua fai.’ (1 Korinito 7:37, 38) Aiseā ua “sili [ai] ona lelei”? Fai mai le faamatalaga a Paulo: “Ou te loto ina ia outou saoloto mai popolega. Ua popole le tagata e leʻi faaipoipo i mea a le Alii, i se mea e fiafia mai i ai le Alii. . . . E lē gata i lena, ua popole le fafine e leʻi faaipoipo, ma lē e taupou i mea a le Alii, . . . A o laʻu lenei upu e fai atu ia te outou e aogā ia te outou lava; . . . ina ia matagofie ai; ina ia auauna lelei foi i le Alii ma le loto le fetosoaiina.”—1 Korinito 7:32-35, NW.
15 Pe e fesootai ea le fiafiaga ma le ‘auauna lelei i le Alii e aunoa ma le fetosoaiina’ faatasi ma le manatu ina ia ‘mauaina ai le faamaoniga a le Alii’? E foliga mai o le mea lena sa manatu i ai Paulo. Na ia taʻua ina ua tautala atu e uiga i se fafine Kerisiano ua oti lana tane e faapea: “Ua saʻoloto o ia e nofotane i le ua loto i ai, tau lava o le ua i le Alii. A e afai e nofo fua pea ia, e sili lona [fiafia], o laʻu taofi lea; o loʻu manatu foi ua ia te au le Agaga o le Atua.”—1 Korinito 7:39, 40.
Aogā o le lē Faaipoipo
16. O ā nisi aogā ua olioli ai Molimau a Ieova e leʻi faaipoipo?
16 Pe e nofofua se Kerisiano ona o sana lava filifiliga pe ona o ua lē maua ona o tulaga, ae o le lē faaipoipo e ō mai faatasi ma le tele o aogā totino. E masani lava ona tele atu taimi o tagata nofofua e suesue ai le Afioga a le Atua ma manatunatu loloto i ai. Afai latou te faaaogāina tatau lenei tulaga, o le a faalolotoina ai la lo latou itu faaleagaga. Ona o le leai o se paaga faaipoipo e faailoa i ai o latou faafitauli, ua aʻoaʻoina ai e le toatele, ina ia matuā faalagolago atili atu ia Ieova ma saili lana taʻitaʻiga i mea uma lava. (Salamo 37:5) O le a fesoasoani lea e mauaina ai se faiā vavalalata ma Ieova.
17, 18. (a) O ā avanoa mo se fanua faateleina o le auaunaga, o loo avanoa mo auauna a Ieova o ē e leʻi faaipoipo? (e) Ua faapefea ona faamatala e nisi o auauna a Ieova e leʻi faaipoipoina lo latou fiafiaga?
17 Ua iai i Kerisiano e leʻi faaipoipo ni avanoa mo se fanua faateleina o le auaunaga, e viivii atu ai ia Ieova. O le aʻoaʻoga faapitoa o loo faia nei i le Aʻoga mo le Aʻoaʻoina i le Faiva, e na o uso nofofua po o uso ua maliliu a latou avā e auai. Ua saoloto foi tuafāfine nofofua e aapa atu mo ni faaeaga i le auaunaga a le Atua. O le tuafafine matua na muai taʻua, sa ofo atu e galue i se atunuu i Aferika, sa avea o ia o se “fafine vaivai i le sili atu ma le 50 tausaga o lona soifuaga.” Ma sa nofo ai o ia i inā, e oo foi i taimi o faasāsāaga, ina ua tutuli uma ese misionare sa iai. O loo galue ai pea o ia i inā o se paeonia, e ui ina ua sili atu nei ma le 80 tausaga o lona soifuaga. Po o fiafia ea o ia? Na ia tusia i le tala o lona olaga e faapea: “Sa mafai ona ou faaaogāina le saolotoga ma le malosi faaopoopo na gafatia i le nofofua, e faaauau ai pea ona faia mea e tele i le faiva, ma o le mea lena ua ou mauaina ai le fiafiaga tele. . . . A o faasolo mai tausaga, na faalolotoina ai laʻu faiā ma Ieova. I le avea o aʻu ma fafine nofofua i se atunuu i Aferika, ou te vaavaai atu pea ia te ia o soʻu Lafitaga.”
18 E aogā foi ona matauina, upu a se uso o lē sa galue i ofisa ulu o le Sosaiete o le Olo Matamata mo le faitau sefulu o tausaga. Sa fiafia o ia e ui ina sa leʻi faaipoipo lava, ma e ui foi ina sa ia te ia le faamoemoe faalelagi e leʻi faatalitalia e faaipoipo ai. Na ia tusia ina ua 79 tausaga o lona soifuaga e faapea: “Ou te talosaga atu i aso uma i lo tatou Tamā faalelagi i le tatalo mo le fesoasoani ma le atamai, ina ia tausia ai pea loʻu itu faaleagaga, atoa ma loʻu soifua malōlōina ma le malosi, ina ia mafai ai pea ona ou faia lona finagalo paia. O le mea moni, i tausaga e fasefulu ma le iva ua tuanai atu na ou auauna ai ia Ieova, sa ou olioli ai i se olaga fiafia e tauia ma le faamanuiaina. Ma, e faatasi ma le alofa tunoa o Ieova, o loo ou tepa taulai ai e faaauau pea ona auauna mo lona mamalu ma lona viiga ma mo le manuia o ona tagata. . . . Ua fesoasoani ia te aʻu [le] olioli ia Ieova, ina ia tauina ai pea le taua lelei o le faatuatua, ma tepa taulai atu ai i le taimi o le a aveesea ai fili o Ieova ia lē toe iai, ae faatumuina le lalolagi uma i lona mamalu.”—Numera 14:21; Neemia 8:10; Le Olomatamata faa-Peretania o Novema 15, 1968, itulau e 699-702.
O le ā e Faalagolago i ai le Fiafiaga Moni?
19. O le ā e faalagolago pea i ai lo tatou fiafiaga?
19 O la tatou faiā tautele ma Ieova, lana faamaoniga, ma lana faamanuiaga—o mea na o le a aumaia ai ia i tatou le fiafiaga moni e oo i le faavavau. Ona o lenei manatu talafeagai e uiga i mea e maua ai le fiafiaga moni, ua iloa ai foi e auauna faaipoipo a Ieova faapea, o a latou faaipoipoga, e lē o le mea sili lea ona tāua i o latou olaga. Ua latou utagia le fautuaga a le aposetolo o Paulo e faapea: “O laʻu lenei e fai atu ai, le au uso e, ua itiiti ona aso ua totoe; o lenei, o e ua fai avā, ia peiseai ua le fai avā.” (1 Korinito 7:29) E lē o lona uiga o lenei mea, ia faaleamanaia ai a latou avā. E faamuamua e tane Kerisiano taʻumatuaina, le auaunaga ia Ieova, ma e faapena foi i a latou avā o ē matataʻu i le Atua, alolofa, ma lagolagosua. O nisi lava foi o loo auauna faataimi atoa o ni uō a a latou tane.—Faataoto 31:10-12, 28; Mataio 6:33.
20. O le ā le vaaiga saʻo ua iai i le toatele o Kerisiano, e uiga i o latou faaeaga tau i a latou faaipoipoga?
20 O uso faaipoipo o ē o loo avea ma ovasia femalagaai, galulue tauofo i Peteli, toeaina i le faapotopotoga—o le mea moni, o Kerisiano faaipoipo uma lava o ē o loo faamuamuaina manaoga o le Malo—latou te lē o ‘faaaogāina atoatoa mea o lenei lalolagi’; ae o loo latou galulue e faafetaui o latou faaeaga tau faaipoipoga ma lo latou olaga tuuina atu i le auaunaga ia Ieova. (1 Korinito 7:31) E ui i lea, o loo latou fiafia. Aiseā? Auā o le mafuaaga autū mo lo latou fiafiaga, e lē o la latou faaipoipoga, ae o la latou auaunaga ia Ieova. Ma e toatele tane ma avā faamaoni—ioe, atoa foi ma a latou fanau—o loo fiafia, ona o le faia faapea.
21, 22. (a) E faavae i le Ieremia 9:23, 24, o le ā e ao ona faatumuina ai i tatou i le fiafia? (e) O ā mea e maua ai le fiafiaga ua taʻua i le Faataoto 3:13-18?
21 Na tusia e le perofeta o Ieremia e faapea: “O loo faapea ona fetalai mai o Ieova, Aua neʻi mitamita le tagata i lona poto, aua neʻi mitamita le tagata malosi i lona malosi, aua neʻi mitamita foi le mauoa i ana oloa; a o lē mitamita, ina mitamita ia o ia i lenei mea, ina ua mafaufau o ia, ma ua iloa aʻu, o aʻu lava o Ieova, o lē faia le alofa, ma le faamasinoga, ma le amiotonu i le lalolagi; auā o mea ia ou te fiafia i ai, o loo fetalai mai ai Ieova.”—Ieremia 9:23, 24.
22 Pe tatou te nofofua pe faaipoipo, e ao lava ona avea ma pogai silisili o lo tatou fiafiaga, lo tatou poto e uiga ia Ieova ma le faamautinoaga e faapea, ua tatou mauaina lana faamanuiaga ona o loo tatou faia lona finagalo. Tatou te fiafia foi ona ua tatou maua le malamalama i mea e aofia ai i mea e aogā moni, po o mea e finagalo malie i ai Ieova. Sa leʻi manatu le Tupu o Solomona o lē sa tele ana faaipoipoga e faapea, o le faaipoipoga e na o le pau lea o le ki i le fiafiaga. Na ia faapea mai: “[E fiafia] le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina; ma au mea faafiafia uma lava e le tusa ma ia. O loo i lona lima taumatau le ola tuluʻi; a o i lona lima tauagavale le oloa ma le viiga. O ona ala o ala matagofie; ma ona magāala uma o i ai le manuia. O ia o le laau o le ola i e tago atu ia te ia; [e fiafia] foi i latou o e taofi atu ia te ia.”—Faataoto 3:13-18.
23, 24. Aiseā e mafai ai ona tatou mautinoa, o le a fiafia auauna faamaoni uma lava a Ieova i le faiga fou o mea?
23 Tau lava ina ia maua e outou o ē ua faaipoipo le olioli e faavavau i le faia o le finagalo o le Atua. Ma tau foi ina ia tutumau pea o tatou uso ma tuafāfine pele o ē ua filifili e nofofua po ua lē maua ona o tulaga, i o latou tofotofoga uma lava ma maua ai le fiafiaga ma le loto malie e auauna atu ia Ieova i le taimi nei, atoa ma le faavavau. (Luka 18:29, 30; 2 Peteru 3:11-13) I le faiga fou a le Atua o loo fotuai mai, o le a tatalaina ai “tusi.” (Faaaliga 20:12) O ia tusi o le a iai poloaiga fou e faagaeeina ai, atoa ma tulafono e saosaolaumea i le fiafiaga o le fanau usiusitai a tagata.
24 E mautinoa la, e mafai ona tatou lagonaina le mautinoa ona o loo teuina mo i tatou e lo tatou ‘Atua fiafia’ mea lelei ofoofogia, e maua ai lo tatou fiafiaga atoatoa. (1 Timoteo 1:11) O le a faaauau pea e le Atua ona ‘faamafolaina mai lona aao ma faamalieina ai manaoga o meaola uma lava.’ (Salamo 145:16) E lētioa la a maua, ma o le a mauaina pea le fiafiaga moni i le auaunaga ia Ieova.
E Faapefea Ona E Tali Mai?
◻ O le ā le faavae mo le fiafiaga o auauna tuuina atu a Ieova?
◻ O ai nisi o auauna fiafia a Ieova sa leʻi faaipoipo i ona po o le Tusi Paia?
◻ Aiseā na fautuaina ai e Paulo le nofofua, ma sa faapefea ona iloa e nisi Kerisiano o se olaga fiafia lena?
◻ O le ā e faalagolago pea i ai lo tatou fiafiaga?
◻ Aiseā e ao ai ona tatou mautinoa, o le a fiafia ē uma lava e faamaoni i le faiga fou o mea?
[Ata i le itulau 16]
E toatele tuafāfine nofofua o loo auauna ma le fiafia ia Ieova o ni faifeau faataimi atoa
[Ata i le itulau 18]
O le auauna mo manaoga o Ieova, o le pogai autū lena o le fiafiaga