Talia e le Au Faauu mai Kiliata le Meaalofa o le Auaunaga Faamisionare

IA MATI 1, 1992, na talia ai e sui e 22 o le vasega lona 92 o le Aʻoga Faale-Tusi Paia a le Olomatamata o Kiliata se meaalofa—o le meaalofa o le auaunaga faamisionare. Ina ua ia lauga atu i le vasega, na taʻua ai e Lloyd Barry mai le Vaega Pule e faapea: “Tau ina ia outou talia ma le olioli tele lena meaalofa ofoofogia, ma tau ina ia outou faaaogāina lena meaalofa e avatu ai le olioli i isi.”

E tusa ma le 4,662 malo valaaulia ma sui o le aiga Peteli sa faatasitasi i le Maota Fono i le Aai o Jersey, i New Jersey, mo le polokalama o le faauuga. O le isi 970 i isi vaega o le Sosaiete o le Olomatamata i Brooklyn, Wallkill, ma Patterson i Niu Ioka sa faafesootaia e ala i telefoni. Sa faalogologo lelei tagata uma a o avatua i le au faauu ni fautuaga faamavae na o le a fesoasoani ia i latou ina ia latou matuā faatāuaina le meaalofa o le auaunaga faamisionare ma ia faaaogā ma le atamai.

Sa tatalaina le polokalama i le usuina ma le matuā fiafia o le pese numera 155, “ʻWelcome One Another’!” Mulimuli ane, sa matuā faagaeetia foi tagata uma ina ua faia e Frederick W. Franz, le peresitene o le Aʻoga o Kiliata ua 98 tausaga le matua se tatalo na lagona uma i loto o tagata. Ona faafeiloaia ai lea e le taʻitaʻifono, o Carey Barber o le Vaega Pule, tagata uma i le polokalama o le faauuga ma na ia faapea mai: “Sa leʻi faapea muamua ona iai se manaoga e sili atu ona tele mo misionare i Kiliata na i lo o aso nei.” Mulimuli mai ai i ana faamatalaga, sa ia faailoa mai se faasologa o lauga pupuu e maua ai le fesoasoani.

Na muamua le lauga a Curtis Johnson o le Komiti o le Aiga Peteli, i le atiina aʻe o le matua “Ia Tausi Lelei Lau Faatoaga.” Sa taʻua ai e Uso o Johnson e faapea, pe a oo atu nei misionare fou i o latou tofiga, o le a tofu i latou taitoatasi ma se faatoaga faaleagaga e atiina aʻe. (1 Korinito 3:9) O tagata o Ieova i le lalolagi aoao, o se faatoaga faaleagaga o loo faatupuina le amiotonu ma le viiga i luma o nuu uma. (Isaia 61:11) ‘O le auala e te tausia ai lau faatoaga faaleagaga i le lumanai,’ na faamamafa mai ai e le failauga, ‘o le a matuā aafia ai lou taulau manuia i lou tofiga faamisionare.’ O le ā o le a fesoasoani ia i latou e tausia lelei a latou faatoaga faaleagaga? ‘E mafai ona avea Ieova ma pa puipui o lau faatoaga faaleagaga. Afai e te faanaunau e atiina aʻe galuega saʻo, ia tumau ona faalatalata atu ia te ia i le tatalo, ma ia galue ia ōgatasi ma au tatalo.’

Ona sosoo ai lea ma le lauga a Lloyd Barry i le matua “Ia Olioli i le Alii e Lē Aunoa.” (Filipi 4:4) Pe a mafaufau i le sili atu i le 25 tausaga o le poto masani i le auaunaga faamisionare i Iapani, sa ia aumaia ai ni fautuaga aogā e fesoasoani i le au faauu ina ia olioli i le meaalofa o le auaunaga faamisionare. Sa ia matauina faapea: ‘O le a outou iloa, o lo outou olioli i le auaunaga a le Atua, e fesoasoani ia te outou e foia le tele o faigata, ma atonu o ni faafitauli o le tino o le a outou fetaiai.’ (Faataoto 17:22) Sa ia faamanatu atu i le au faauu faapea atonu o le a latou fetaiai ma ni tulaga e matuā ese lava mai tulaga sa latou masani ai. Atonu o le a latou aʻoaʻoina se gagana fou. ‘E ao ona outou galulue mamafa i le aʻoaʻoina o le gagana. Ae a mafai loa ona outou talanoa lelei ma tagata i la latou gagana, o le a faaopoopo foi lenei i lo outou olioli.’

I le talanoaina o le matua “Ia Taulai atu Lau Vaai i le Taui,” na sosoo ai ona talanoaina e Eldor Timm o le Komiti o le Fale Gaosimea. O le ā le taui? O le ola e faavavau! Ina ia maua le taui e tatau ona taulai atu i ai la tatou vaai. Sa talanoaina e le failauga nisi o mea e tutusa ai, ma nisi o mea e eseese ai, i le va o Kerisiano o loo taufetuli i le tausinioga mo le ola, ma tagata tamomoʻe sa taufetuli i se tausinioga i le uluai senituri. I le pei o tagata tamomoʻe, e tatau i Kerisiano ona matuā toleni ma le naunautai, ia iloa aiaiga, ma ia aveese mai ia i latou isi mea mamafa e lē manaomia na e fai ma faalavelave. Ae i le lē pei o ni tagata tamomoʻe masani, o Kerisiano o loo i se tautuuga umi e mo le olaga atoa, ma o loo saili se taui, o le ola e faavavau. Na i lo o le iai i inā e avea o se tagata manumalo e toatasi, o i latou uma o ē o taufetuli i le tausinioga mo le olaga atoa seia oo i le tini, e maua le taui. Sa faaiʻu mai le Uso o Timm: ‘Ina ia maua le taui o le ola, e tatau ona tatou filemu ma Ieova, o Lē na te foai mai le taui. Ma ina ia filemu ma Ieova, e tatau foi ona tatou filemu ma o tatou uso.’

Na sosoo ai ma le lauga a Milton Henschel o le Vaega Pule i le matua “E Ala i le Faamafanafana Mai o Tusi, ua Tatou Maua ai le Faamoemoe.” (Roma 15:4) ‘Mo le lima masina mulimuli ua mavae,’ na amata ai le failauga, ‘sa tele ai a outou mea e fai i le Tusi Paia. Ua uma ona fausia se faiā matuā vavalalata. Ua outou maua se faamoemoe malosi. A o outou ō atu i o outou tofiga, faamolemole ia manatua le pogai ua matuā malosi ai lo outou faamoemoe. Talu ai ona sa outou nonofo vavalalata i le Tusi Paia.’ I le faaalia o se faaaʻoaʻoga mai le Tusi Paia na faagaee ai le faamoemoe, na faasino atu le failauga i le Faamasino mataupu e 6 e oo i le 8, lea o loo faamatala ai le auala na tofia ai Kitiona ina ia laveaiina Isaraelu mai le sauā o Mitiana. Ina ua uma ona talanoaina le faamatalaga ma lona uiga mo o tatou aso, ona ia faapea mai lea: ‘Pe a outou maua le avanoa e vavalalata ai ma le Tusi Paia ma manatunatu e uiga i nei mea, e faafouina ai outou. Tou te maua ai le lototele.’

Sa naunau tagata uma e fia faalogo po o ā fautuaga faamavae o le a tuuina mai e faiaʻoga pule e toalua mo tagata aʻoga. Na talanoa muamua Jack Redford i le matua “Ia Faia le Mea Saʻo.” Sa ia faamanatu atu i le au faauu faapea: ‘I Kiliata sa aʻoaʻoina atoatoa ai outou i le mea saʻo e tusa ai ma le Tusi Paia. O lenei la ua outou ō atu i mea e luʻia ai tofiga faamisionare. Ma matou te iloa atonu o le a outou fetaiai ma ni faafitauli faigata i le faagasologa o le auaunaga. E ui lava la i lenei mea, ma e ui i ou lava faalogona, ae matou te iloa e mafai ona outou faia le mea saʻo.’ O le ā o le a fesoasoani? O le mea e tasi, ia maua le vaaiga saʻo i isi. Na faapea mai le failauga: ‘Aua neʻi outou faatalitalia se lelei atoatoa mai le lē lelei atoatoa.’ O le maua o le vaaiga saʻo e uiga i tulaga e tofotofoina ai e mafai foi ona fesoasoani. ‘E iai uma o tatou lelei ma faalēlelei i le olaga,’ sa ia matauina ai. ‘E mafai e so o se tagata ona taulimaina lelei. Ae o le auala e te taulimaina ai mea faalēlelei o le a faia ai le filifiliga pe e te tumau i le auaunaga faamisionare.’—Iakopo 1:2-4.

Sa filifili e le lesitala o le aʻoga o Ulysses Glass, le matua “O le ā le Faamoemoe mo le Lumanai?” I se leo faatamā, sa ia faamalosiau ai i le au faauu ina ia tausia pea ona faasusulu atu lo latou faamoemoe. (Faataoto 13:12) ‘Atonu e faigata ona iloa le amataga o le leiloa o le faamoemoe,’ sa ia faamatala ai. ‘O tulaga e mafai ona faapogaia ai lo tatou manatu mamafa o i tatou ia i tatou lava na i lo o la tatou faiā ma le Atua. Atonu tatou te mamaʻi pe lagona foi ua leaga ona fai i tatou e isi. O nisi atonu e tele ni a latou mea faitino na i lo o i tatou pe maua foi iʻuga sili ona lelei i le faiva, ona oo ai lea ina pei ua tatou lotoleaga. Afai tatou te faatagaina na mea e pulea lemu i tatou, ona lē pine lava lea ae mou atu le moni o le faamoemoe o le Malo mai o tatou loto ma mafaufau, ma oo ai lava ina tatou lē tumau i le tausinioga mo le ola.’ O le ā e mafai ona faia? ‘E tatau ona faia se gaoioiga mautinoa pe afai tatou te mananao e toe faaolaolaina lo tatou faamoemoe. E tatau ona tatou faatumuina o tatou mafaufau ma loto i folafolaga mautinoa a le Atua ma tatou matuā uaʻi atoatoa atu o tatou mafaufau i le faaalia moni mai o le Malo o le Atua. Ma ia toe faafoisia a tatou fesootaiga ma Ieova, auā e mautinoa lava o lenei mea e maua ai le olioli.’

O Karl Klein o le Vaega Pule na fofogaina atu le lauga o le faauuga. O lana matua “Aiseā e Loto Maulalo Ai?” Ma o le ā lau tali i lena fesili? ‘Auā o le mea saʻo ma tonu lena e ao ona faia, o le mea atamai ma le lelei e tatau ona faia,’ na ia faamatala ai i ana upu amata. Sa matuā faafiafiaina le aofia a o ia talanoaina ni faaaʻoaʻoga se fa o le loto maulalo e lelei ona tatou faaaʻoaʻo i ai: (1) O Ieova le Atua, o lē na mautinoa lona loto maulalo a o feutagai ma Aperaamo ma Mose (Kenese 18:22-33; Numera 14:11-21; Efeso 5:1); (2) O Iesu Keriso, o lē na ‘faamaulalo e ia ia te ia ma usiusitai seia oo lava ina maliu i luga o le satauro’ (Filipi 2:5-8; 1 Peteru 2:21); (3) O le aposetolo o Paulo, o lē na ‘fai ma pologa a le Alii ma le loto maulalo tele lava’ (Galuega 20:18, 19; 1 Korinito 11:1); ma lona (4) ‘O i latou o taʻimua ia i tatou,’ e pei o le uluai peresitene o le Sosaiete, le Uso o Russell, o lē na tusi mai faapea: “O le galuega ua fiafia le Alii e faaaogā ai o tatou tomai o le loto maulalo, ua tuuitiiti ai se galuega o le amataina na i lo o le toe fausiaina, faia o fetuutuunaiga ma le faamaopoopoina.” (Eperu 13:7) Sa faaauivi mai e le Uso o Klein nisi mafuaaga malolosi e loto maulalo ai. E mautinoa lava la, o le utagia o le fautuaga ina ia loto maulalo o le a fesoasoani i le au faauu ina ia faaaogā ma le atamai le meaalofa o le auaunaga faamisionare!

I le mulimuli i na faamatalaga, na tufa atu ai e le taʻitaʻifono faamanuiaga na maua mai vaega eseese o le lalolagi. Ona oo loa lea i le taimi mo le au faauu e maua ai o latou tusi pasi (diplomas). E fitu atunuu na ō mai ai i latou—Kanata, Finilani, Falani, Mauritius, Holani, Suetena, ma le Iunaite Setete. Ae o o latou tofiga faamisionare ua avatua ai i latou i atunuu e 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Take, ma Venesuela.

Ina ua uma sina malōlōga puupuu, ona amata ai lea o le polokalama o le afiafi i se suesuega o le otootoga puupuu o Le Olomatamata na taʻitaʻia e Joel Adams o le Komiti o le Matagaluega o le Auaunaga. Ina ua mavae lena, ona faamatalaina ai lea e le au faauu nisi o mea na tutupu i le faiva i le fanua na sa latou olioli ai i le vaitaimi a o faia le aʻoga. Na faaiʻu i le tala Aiseā e Faaaloalo ai i le Faasologa Faatiokarate? na saunia mo le faatonuina ai o le aofia atoa, e aofia ai ma le au faauu.

E moni lava, na ō atu lenei au faauu i o latou tofiga i nuuese faatasi ma fautuaga ma faalaeiauga na o le a fesoasoani ia i latou e faaaogā le meaalofa o le auaunaga faamisionare e avatu ai le olioli e lē gata ia i latou lava ae faapea foi ma isi.

[Siata i le itulau 22]

Faamaumauga o le Vasega

Aofai o atunuu o loo iai o latou sui: 7

Aofai o atunuu ua tofia i ai: 11

Aofai o tagata aʻoga: 22

Faatatauga o tausaga: 33.4

Faatatauga o tausaga i le upu moni: 16.7

Faatatauga o tausaga i le faiva taimiatoa: 11.8

[Ata i le itulau 23]

Vasega Faauu Lona 92 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai i luma agaʻi i tua ma o igoa e lisi mai le itu agavale i le taumatau.

(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.