Toaaga i Galuega e Oti ai po o le Auaunaga a Ieova?

“E FAAMALIE atu, o aʻu lea e tele aʻu feau e fai.” O se tasi lenei o teteega e fetaiai ma Molimau a Ieova a o latou talaʻi atu i le lautele le tala lelei o le Malo. (Mataio 24:14) Ma i nisi taimi, o le faapea mai, “E tele aʻu feau e fai” ua na o se faamolemolega, ae o le mea moni e toatele tagata o loo tele mea e fai. Ua matuā aafia atoa i latou ona o le “popole i mea o le olaga nei”—o omiga i le tau sailia o mea e ola ai, totogiina o pili, le ō atu i galuega ma le toe foi mai, tausia o fanau, teuina o le fale, ma le taavale, ma isi lava mea faitino.—Mataio 13:22.

Ae peitai, a o foliga mai e tele mea e fai a tagata, ae e toaitiiti lava o loo faia ni galuega fuatele pe maua mai ai ni aogā. E pei lava ona tusia e le tagata poto o Solomona: “Auā se ā se mea ua maua e le tagata i ana galuega [mamafa] uma ma le taumafai o lona loto, ua tiga ai o ia i lalo o le la? auā o ona aso uma o faanoanoaga ia, o le mea tiga foi lana galuega; e le mapu foi lona loto i le po. O le mea faatauvaa foi lea.”—Failauga 2:22, 23.

Ua taʻua foi e le Tusi Paia na galuega iʻuvale o “galuega e oti ai.” (Eperu 9:14) Po o pulea lou olaga e na galuega? E ao ona avea lenei mea o se popolega tele ia te oe i le avea o se Kerisiano, talu ai ona o le Atua o le a “taui taitasi atu i tagata e tusa ma a latou galuega.” (Salamo 62:12) Ma talu ai “ua itiiti ona aso ua totoe,” ua ao ai ona tatou manatu mamafa ina ia tatou lē faamāumauina le taimi i galuega e oti ai. (1 Korinito 7:29) Ae o ā galuega e oti ai? E ao faapefea ona tatou manatu i ai? Ma e mafai faapefea ona tatou mautinoa o loo tatou toaaga i le faia o galuega e tāua moni?

Iloaina o Galuega e Oti Ai

I le Eperu 6:1, 2 (NW), na tusi mai ai Paulo: “O le mea lea, ua tatou tuua ai le mataupu faavae a Keriso, inā tatou agaʻi atu ia i le taʻumatuaina, aua neʻi toe tuua le faavae o le salamō mai galuega e oti ai, ma le faatuatua i le Atua, o le aʻoaʻo atu e uiga i le papatisoga ma le faaee o lima, ma le toe faatutūina o ē ua oti ma le faamasinoga e faavavau.” Ia matau faapea o “le mataupu faavae” sa aofia ai “le salamō mai galuega e oti ai.” Ona o ni Kerisiano, ua uma ona salamō le au faitau a Paulo mai galuega e oti ai. Faapefea?

A o leʻi talia Keriso, o nisi i le uluai senituri sa matuā faasaga i le faia “o galuega e oti ai,” o “le faitaaga, o le amio leaga, o le matāitu, o le ifo i tupua, o le fai togafiti faataulaitu,” ma isi amioga leaga. (Kalatia 5:19-21) O le lē taofia o na galuega e ono taʻitaʻiina atu ai i lo latou oti faaleagaga. E ui i lea, ona o le alofa tunoa, ua liliu ese ai na Kerisiano mai o latou ala e faaumatia ai, ua salamō, ma “ua taeele [mamā].” O lea, ua latou olioli ai i se tulaga mamā i luma o Ieova.—1 Korinito 6:9-11.

E ui i lea, e lē o Kerisiano uma e manaomia ona salamō mai galuega po o amioga lē mamā. O le tusi a Paulo, sa muamua lava ona faasino atu i tagata Iutaia talitonu, o le toatele o ē e lē taumatea sa matuā pipii atu pea i le Tulafono faa-Mose ae latou te leʻi talia Keriso. O ā la galuega e oti ai ia na latou salamō mai ai? E mautinoa lava sa leai se mea e sese ai lo latou mulimuli atu i faiga ma aiaiga manaomia a le Tulafono. Pe sa “paia, . . . tonu ma ua lelei,” le Tulafono, a ea? (Roma 7:12) Ioe, ae i le Roma 10:2, 3, na faapea mai ai Paulo e faatatau i tagata Iutaia: “Auā ou te molimau ia te i latou, ua latou maelega i la le Atua, a e le tusa ma le poto. Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou lē usiusitai ai i le amiotonu mai le Atua.”

Ioe, sa sese le talitonuga o tagata Iutaia faapea e ala i lo latou mulimuli ma le matuā faaeteete i le Tulafono, o le a mafai ai ona maua lo latou faaolataga. Ae na faamatala atu e Paulo e faapea, “e le taʻuamiotonuina se tagata i galuega o le tulafono, a o le faatuatua ia Iesu Keriso.” (Kalatia 2:16) Ina ua uma ona saunia le togiola e Keriso, sa lē toe aogā ai galuega o le Tulafono—e tusa lava po o le ā le faaaloalogia ma mamalu—o galuega ia e oti ai ma ua lē toe aogā i so o se mea e maua ai le faaolataga. O lea, na saili ai e tagata Iutaia loto faamaoni le finagalo malie o le Atua e ala i le salamō mai galuega e oti ai ma i le papatisoina o i latou e faaalia ai lo latou salamō.—Galuega 2:38.

O le ā ua tatou aʻoaʻoina mai lenei mea? O galuega e oti ai e mafai ona aofia ai e sili atu na i lo amioga leaga po o amioga lē mamā; e aofia i na mea so o se galuega e oti ai faaleagaga, o galuega e lē aogā ma lē fua mai. Ae pe lē o Kerisiano uma ea ua salamō mai na galuega e oti ai a o leʻi papatisoina i latou? E moni, ae o nisi Kerisiano i le uluai senituri na mulimuli ane toe see atu i le faia o amioga lē mamā. (1 Korinito 5:1) Ma i le lotolotoi o Kerisiano Iutaia, sa iai le tuʻinanau e toe foi atu i le faia o galuega e oti ai o le Tulafono faa-Mose. Sa tatau ona toe faamanatu atu e Paulo ia i latou na ina ia aua neʻi toe foi atu e faia galuega e oti ai.—Kalatia 4:21; 5:1.

Leoleo Mai i Galuega e Oti Ai

O le mea lea, e tatau ai i tagata o Ieova i aso nei ona faaeteete ina ia aua neʻi toe see atu i le faaʻoleʻole o galuega e oti ai. Ua osofaia i tatou mai itu uma lava e omiga ina ia tatou faia amioga lē mamā, ina ia lē faamaoni, ma ia auai i faiga leaga faaleituaiga. O se mea faanoanoa, ona e faitau afe Kerisiano i tausaga taitasi e lolo atu i na omiga, ma o na tagata lē salamō, ua faateʻaeseina mai le faapotopotoga Kerisiano. O lea, ia sili atu na i lo muamua ona tatau i se Kerisiano ona utagia le fautuaga a Paulo i le Efeso 4:22-24: “Ia outou to ese le tagata tuai o loo ua leaga, e tusa ma le amioga faaanamua, e tusa ma le tuʻinanau e faasese ai; a ia toe fuataiina manao o outou loto, ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni.”

E moni, o tagata Efeso na tusi atu i ai Paulo, ua uma ona oofu i le tagata fou i se tulaga sili ona telē. Ae sa fesoasoani atu Paulo ia i latou ia talisapaia faapea, o le faia faapea sa avea o se faasologa faifai pea! A aunoa ma ni taumafaiga faifai pea, e ono mafai ona taʻitaʻiina atu ai i tua se Kerisiano i galuega e oti ai, e ala i tuʻinanau sese e tupu mai pea e avea ma taaʻiga iʻuvale. Ua moni lava lea ia i tatou i aso nei. E tatau ona tatou tauivi ma le maumauai ina ia oofu i le tagata fou, ae aua neʻi faatagaina e pisipisia i so o se uiga o o tatou olaga tuai sa iai. E tatau ona tatou tetee—inoino—i so o se ituaiga o galuega leaga a le tino. O lea ua apoapoai mai ai le faisalamo: “O outou o e alolofa atu ia Ieova, ia outou ʻinoʻino i mea leaga.”—Salamo 97:10.

E faamālō atu, ona o le toatele o tagata o Ieova i aso nei ua latou utagia lenei fautuaga ma tumau i amioga mamā. E ui ina ua faaseseina nisi i galuega e lē matuā sese naʻuā, ae e iʻuvale ma lē fua mai. Mo se faaaʻoaʻoga, o nisi ua matuā aafia i suegā tupe po o faiga e maua ai mea faitino. Ae ua lapatai mai le Tusi Paia: “A o e mananao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai.” (1 Timoteo 6:9) I isi, o aʻoaʻoga faalelalolagi ua avea foi o se mailei. E moni, e manaomia se tulaga faatapulaa tau aʻoaʻoga atonu e tatau ina ia maua ai se galuega. Ae o le tuliloa o aʻoaʻoga faalelalolagi e māumau ai le taimi, ua faamanuʻalia ai e nisi i latou lava i le itu faaleagaga.

Ioe, e tele galuega atonu e leai se mea e sese ai. Ae o le mea moni, o galuega ia e oti ai pe afai e lē faaleleia ai o tatou olaga i le taimi nei pe tatou te maua ai foi le finagalo malie o Ieova le Atua. O galuega na e māumau ai le taimi ma le malosi, ae lē aumaia ai ni aogā faaleagaga, leai se faafouina tumau.—Faatusatusa i le Failauga 2:11.

E lē taumate o loo e tauivi malosi ina ia tele mea e fai i galuega aogā faaleagaga. E ui i lea, o le a fesoasoani lenei mea e suesue ifo ai oe lava e lē aunoa. Mai lea taimi i lea taimi, atonu e te fesili ifo ni fesili ia te oe lava faapea: ‘Po o aafia loʻu auai i le auaunaga ma sauniga ona o loʻu faia o se galuega e lē talafeagai?’ ‘Po o oʻu maua se taimi e faafiafia ai aʻu lava ae itiiti se taimi mo suesuega totino ma suesuega a le aiga?’ ‘Po o tele le taimi ma le malosi o oʻu faaaluina e vaaia ai mea faaletino ae ua lē taulau ai ona vaaia i latou o iai manaoga i le faapotopotoga, e pei o tagata mamaʻi ma ē matutua?’ O tali i nei fesili atonu o le a faaalia ai se manaoga i lau vaega ina ia avatu se faamuamua e sili i galuega faaleagaga.

Ia Tele Pea Mea e Fai i le Auaunaga a Ieova

E pei ona fai mai le 1 Korinito 15:58 (NW), e ‘tele mea e fai i le galuega a le Alii.’ O le mea aupito sili, o le talaʻiina o le Malo ma le galuega o le faia o soʻo. I le 2 Timoteo 4:5, na timaʻi mai ai Paulo: “Ia avea le talaʻiina o le Tala Lelei o se galuega i lou olaga, i se auaunaga maeʻaeʻa faifai pea.” (Jerusalem Bible) E tele foi mea e fai a toeaina ma auauna o le faiva i le vaaia o manaoga o le lafu. (1 Timoteo 3:1, 5, 13; 1 Peteru 5:2) Ua iai foi i ulu o aiga—o le toatele lava o ni mātua nofofua—avega tauave mamafa mo le tausia o o latou aiga ma fesoasoani atu i a latou fanau ia tutupu aʻe i la latou faiā ma le Atua. I nisi taimi, e avea ai na galuega o se mea e fiu ma lofituina ai. Ae na i lo o le oti ai, e aumaia ai le lotomalie moni!

O le faafitauli: E faapefea e se tasi ona maua le taimi e faataunuu ai nei galuega uma e tatau ma e aogā? O le pulea o oe lava ma le faamaopoopoina totino e aogā. I le 1 Korinito 9:26, 27, na tusi ai Paulo: “Ua . . . ou momoe e le ma le faaletonu; ua faapea foi ona ou tuʻi, e le pei o se tuʻi le matagi. A ua ou faatoilaloina loʻu nei tino, ma aʻu fai ai ma pologa, ina neʻi iu ina le faamaoni aʻu, o aʻu sa talaʻi atu i isi tagata.” O le tasi auala e faatatauina ai le mataupu silisili o lenei mau, o le suesueina i lea taimi ma lea taimi o lau masani totino ma auala o lou olaga. Atonu o le a e maua ai faapea e mafai ona taofia nisi o mea o faamāumau ai le taimi ma le malosi.

Mo se faaaʻoaʻoga, po o le tele o lou taimi ma lou malosi o faaalu i le matamata i le TV, faafiafiaga, faitau i tusi lē aogā po o mea e te fiafia i ai? E tusa ma se faamatalaga i le The New York Times, o le faatatauga o itula e faaalu e tagata matutua i le Iunaite Setete e matamata ai i TV, “e sili itiiti aʻe i le 30 itula i le vaiaso.” E mautinoa lava la, e tatau ona faaaogā tatau lena taimi! Na lipoti mai e le avā a se tasi ovasia faimalaga e faapea: “Toeitiiti lava mafai ona ou aveesea atoatoa mea uma e faamāumau ai le taimi, e pei o le matamata i le televise.” O le ā le iʻuga? Ua mafai ai ona ia faitauina atoa vaega e lua o le lomifefiloi faale-Tusi Paia o le Insight on the Scriptures!

Atonu e manaomia foi ona e manatunatu i le tele e mafai ai ona faafaigofie le auala o ola ai lou olaga. Na fai mai Solomona: “E lelei le moe a le [auauna], pe tele pe itiiti ana mea e ʻai; a o le maʻona o le mauoa e le mafai ai ona moe o ia.” (Failauga 5:12) Po o faaalu le tele o lou taimi ma le malosi e vaaia ai mea faitino e leai se aogā? O le mea moni, o le tele o mea ua ia i tatou, o le tele foi lea o mea tatou te vaaia, inisiua, toe faafou, ma puipuia. Pe lē atonu e mo lou lelei le aveesea o nisi o au mea faitino?

O le faia o se faasologa moni, o le isi lea auala e faaaogā lelei ai lou taimi. O le faia o lena faasologa o le a manatunatu ai i manaoga o se tasi mo se malōlōga po o se faafiafiaga. Ae e ao ona faamuamua faanaunauga faaleagaga. E ao ona faataatia ese se taimi e auai ai pea lava pea i sauniga a le faapotopotoga. Atonu foi o le a e muai filifilia po o ā aso po o afiafi e mafai ona tuutoina atu mo le galuega faaevagelia. Faatasi ma ni fuafuaga faaeteete ina ia faateleina lou sao i le auaunaga, atonu po o le auauna o se paeonia lagolago mai lea taimi i lea taimi. O lea la, ia mautinoa ua faia se faasologa o taimi mo suesuega totino ma suesuega faaleaiga, e aofia ai ma le sauniuni maeʻaeʻa mo sauniga. O le sauniuni o le a lē gata e tele ni mea e te maua mai ai e oe lava i sauniga, ae o le a e iai foi i se tulaga sili ona lelei e “taufaatupu ai le alofa ma galuega lelei” e ala i au tali.—Eperu 10:24.

O le sailia o se taimi mo suesuega atonu e manaomia ai ona faia ni faataulaga. Mo se faaaʻoaʻoga, o aiga Peteli i le lalolagi aoao e feala i le taeaopo ina ia talanoaina le mau o le aso. Pe mafai ona e faaavanoa sina taimi i taeao taitasi mo se suesuega totino? Na faapea mai le faisalamo: “Ua muamua i le tafa o ata, ona ou alaga atu mo se fesoasoani. Sa ou faatalitali i lau afioga.” (Salamo 119:147, NW) O le mea moni, o le ala i le taeaopo e manaomia ai le faia o se faasologa mo se taimi talafeagai e moe ai, ina ia mafai ona e amata le aso e sosoo ai a o malosi ma sa lava se malōlōga.

Aogā o le Tele o Mea e Fai i le Auaunaga a Ieova

O le “tele o mea e fai i le galuega a le Alii” e manaomia ai le faia o ni fuafuaga, aʻoaʻiga, ma le faataulagaina totino. Ae i le iʻuga, o le a mafai ona e olioli ai i aogā e lē mafaitaulia. O lea, ia tumau pea ona tele mea e fai, e lē i galuega iʻuvale e oti ai, e aumaia ai le gaogao ma le tiga, ae i le auaunaga a Ieova. Auā e ala i galuega na, o le a e faaalia ai lou faatuatua, maua le faamaoniga a le Atua, ma i le iʻuga, o le taui o le ola e faavavau!

[Ata i le itulau 28]

O le faia o se faasologa uigā e mafai ona fesoasoani i se Kerisiano e faaaogā ma le atamai ona taimi