Sa Inoino Keriso i le Solitulafono—Ae ā Oe?
“Ua e fiafia i le amiotonu, a ua e ʻinoʻino i le [solitulafono]; o le mea lea, ua faauuina ai oe e le Atua, o lou lava Atua i le suāuu o le olioli e sili i e tou te faatasi.”—EPERU 1:9.
1. E lē gata i le alofa i le amiotonu, ae o le ā le isi mea e manaomia uma lava mai auauna moni a Ieova le Atua?
O AUAUNA moni a Ieova, latou te alolofa atu ia te ia ma o latou loto atoa, ola atoa, manatu atoa, ma o latou malosi atoa. (Mareko 12:30) Latou te mananao e faafiafiaina le finagalo o Ieova e ala i le tausisi i le faamaoni. (Faataoto 27:11) Ina ia faia lena mea, e lē gata ina e tatau ona latou alolofa i le amiotonu, ae e tatau foi ona latou inoino i le solitulafono. E mautinoa, sa faia faapena e lo latou Faaaʻoaʻo, o Iesu Keriso. Sa taʻua e uiga ia te ia: “Ua e fiafia i le amiotonu, a ua e ʻinoʻino i le [solitulafono].”—Eperu 1:9.
2. O le ā e aofia ai i le solitulafono?
2 O le ā la le solitulafono? O le agasala lea, e pei ona faaalia e le aposetolo o Ioane, ina ua ia tusia e faapea: “O i latou uma lava o e fai le agasala, ua latou soli foi i tulafono; o le agasala o le solitulafono lava lea.” (1 Ioane 3:4) O se tagata solitulafono e “lē o taofia po o pulea e le tulafono.” (Webster’s Ninth New Collegiate Dictionary) O le solitulafono, e aofia ai mea uma lava e leaga, e inosia, e lē mamā, e iʻuvale, ma e lē faamaoni. Ua faaalia i se vaaiga i le lalolagi, le faatupulaia o le solitulafono i aso nei na i lo muamua. E lē tau fesiligia ua tatou ola nei i “aso faigata” sa valoia mai e le aposetolo o Paulo i le 2 Timoteo 3:1-5. Ona o nei mau solitulafono uma, maeu le lelei o le poloaiina o i tatou ina ia inoino i mea leaga uma lava! Mo se faataʻitaʻiga, ua faatonuina i tatou e faapea: “Outou e ua alolofa atu ia Ieova, ia outou ʻinoʻino i mea leaga.” (Salamo 97:10) E faapena foi ona tatou faitau ai: “Ia outou ʻinoʻino i le leaga, a e loto atu i le lelei.”—Amosa 5:15.
E Tolu Ituaiga o Inoino
3-5. O ā auala e tolu o loo faaaogāina ai le upu “ʻinoʻino” i le Afioga a le Atua?
3 O le ā le uiga o le inoino? I le Tusi Paia, o loo faaaogāina ai le upu “ʻinoʻino” i ni auala eseese se tolu. O loo iai le inoino e mafua ona o le loto tigā, ma e sailiili i se mea e faamanuʻaina ai lē na mafua ai. E tatau i Kerisiano ona alofia lena ituaiga o inoino. O le ituaiga lena sa uunaia ai Kaino e fasiotia lona uso amiotonu o Apelu. (1 Ioane 3:12) O le ituaiga inoino foi lena sa faaalia e taʻitaʻi lotu ia Iesu Keriso.—Mataio 26:3, 4.
4 E lē gata i lena, o loo faaaogāina le upu “ʻinoʻino” i le Tusi Paia i le uiga faapea, ia itiiti le alofa. Mo se faaaʻoaʻoga, na fetalai Iesu e faapea: “Afai e sau se tasi ia te au, a e le ʻinoʻino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia moʻu soo.” (Luka 14:26) E manino, sa na ona faapea mai Iesu, ia faaitiiti le alofa mo i latou na, na i lo o lo tatou alofa mo ia. Sa ʻinoino Iakopo ia Lea,’ ae o le mea moni sa itiiti lona alofa ia te ia na i lo o lona alofa mo Rasela.—Kenese 29:30, 31.
5 Ma o loo iai le uiga o le upu “ʻinoʻino,” o lea e faapitoa ona tatou manatu i ai i inei. O lona uiga o le iai lea o se faalogona o le matuā lē fiafia po o le matuā toatamaʻi i se tasi, po o se mea ua tatou alofia le toe faia ai o so o sa tatou vaega faatasi ma lena tagata po o lena mea. O loo taʻua lea i le Salamo e 139 e faapea, o le “matuā ʻinoʻino.” Fai mai Tavita i inā: “Ieova e, ou te le ʻinoʻino ea ia te i latou o e [matuā] ʻinoʻino ia te oe? ma e o laga atu ia te oe, ou te le matuā ʻinoʻino ea i ai? Ou te ʻinoʻino lava ia te i latou ma le matuā ʻinoʻino tele; ua fai i latou moʻu fili.”—Salamo 139:21, 22.
Le Pogai e Ao ai ona Tatou Inoino i le Solitulafono
6, 7. (a) O le ā le pogai autū, e ao ai ona tatou inoino i le solitulafono? (e) O le ā le mafuaaga malosi lona lua e inoino ai i le solitulafono?
6 Aiseā e ao ai ona tatou inoino i le solitulafono? O se tasi o mafuaaga, ina ia mafai ai ona faaaloalogia i tatou lava ma maua ai se loto fuatiaifo lelei. Na pau lava lea o le auala e mafai ai ona tatou maua se faiā lelei ma lo tatou Tamā faalelagi, e amiotonu ma alofa, o Ieova. Ua faataatia e Tavita se faaaʻoaʻoga lelei i lenei itu, e pei ona matauina i le faitauina o le Salamo 26. Mo se faaaʻoaʻoga, na ia faapea mai: “Ua ou ʻinoʻino i le faapotopotoga o e fai mea leaga; ou te le nofo foi faatasi ma tagata amio leaga.” (Salamo 26:5) O lo tatou alofa mo le Atua ma le amiotonu, e ao ona uunaia ai i tatou ina ia mauaina le maʻemaʻeā tonu—ioe, le inoino—mo mea uma e soli ai le tulafono e tusa ai ma lona finagalo, e aofia ai gaoioiga lē taupulea a i latou o ē e lē usiusitai ma inoino ia Ieova. E lē gata i lena, e ao ona tatou inoino i le solitulafono ona e aumaia ai le faalumaina i le suafa o le Atua.
7 O le isi mafuaaga e ao ai i tagata o Ieova ona inoino i le solitulafono, ona e matuā mataʻutia lava ma e faaleagaina ai. O le ā le iʻuga o le lūlū i la le tino, po o le lūlūina o le solitulafono? Na lapatai mai Paulo e faapea: “Aua neʻi faaseseina outou, e le ulagia le Atua auā o le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.” (Kalatia 6:7, 8) O lea, e ao ona tatou mananao ina ia augapiu ma sa tatou vaega e fai e fesootai ma le solitulafono. O le mea moni, e manaomia ona tatou inoino i solitulafono uma lava, mo lo tatou lava lelei ma le filemu o le mafaufau.
I Latou e Inoino i le Solitulafono
8. O ai ua na faataatia le faaaʻoaʻoga autū o le inoino i le solitulafono, e pei ona faaalia i ā mau?
8 Ua faataatia e le Atua se faaaʻoaʻoga silisili mo ana foafoaga atamamai uma, e uiga i le inoino i le solitulafono. E tonu lona toasa i le solitulafono, ma ua faapea mai lana Afioga: “O mea nei e ono ua inosia e Ieova; o lona fitu foi ua matuā inosia lava e ia; o mata faasiasia, o le laulaufaiva pepelo, ma lima e sasaa le toto o le ua le sala, o le loto e manatunatu i togafiti leaga, o vae e tele vavave ona taufetuli i le leaga, o le molimau pepelo, na te tautala i mea pepelo; ma le na te faatupu maseiga i uso.” Tatou te faitau ai foi e faapea: “O le mataʻu ia Ieova, o le ʻinoʻino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ʻinoʻino i ai.” (Faataoto 6:16-19; 8:13) E sili atu i lena, ua faailoa mai ia i tatou e faapea: “O aʻu o Ieova, ou te fiafia i le faamasinoga, ou te ʻinoʻino i mea ua faoa faaletaupulea.”—Isaia 61:8.
9, 10. Na faaalia faapefea e Iesu, sa ia inoino i le solitulafono?
9 Sa faataʻitaʻi Iesu Keriso i lona Tamā i le inoino i le solitulafono. O lea ua tatou faitau ai e faapea: “Ua e fiafia i le amiotonu, a ua e ʻinoʻino i le [solitulafono]; o le mea lea, ua faauuina ai oe e le Atua, o lou lava Atua i le suāuu o le olioli e sili i e tou te faatasi.” (Eperu 1:9) Ua faataatia e Iesu se faaaʻoaʻoga mo i tatou e uiga i lenei ituaiga o inoino. Na ia faaalia lona inoino i le solitulafono e ala i le faaalialia o i latou o ē sa faia ma le loto i ai—o taʻitaʻi ia o lotu sese. Sa ia taʻusalaina soo i latou o ni tagata pepelo. (Mataio, mataupu e 23) I se isi o mea na tupu, na fetalai atu ai Iesu ia te i latou: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā.” (Ioane 8:44) Sa ia faaalia lona inoino i le solitulafono e oo atu lava i le faaaogāina o le malosi faaletino, i ni taimi se lua mo le faamamāina o le malumalu mai tagata lotu e pepelo ma matapeapea.—Mataio 21:12, 13; Ioane 2:13-17.
10 Na faaalia foi e Iesu lona inoino i le solitulafono ma le agasala, e ala i le vavaeese atoatoa mai ai. O le mea lena, sa matuā talafeagai ai ona ia fesili atu i ē sa tetee ia te ia: “O ai ea so outou na te faailoa mai saʻu agasala?” (Ioane 8:46) Sa avea Iesu o sē e “paia, e agamalu, e leai sona leaga, e taumamao ma ē agasala.” (Eperu 7:26) I le faamautinoaina o lena mea, na tusia ai e Peteru e uiga ia Iesu e faapea, o lē “na le agasala lava, na le iloa foi se pepelo i lona fofoga.”—1 Peteru 2:22.
11. O ā faaaʻoaʻoga faale-Tusi Paia o ia i tatou e uiga i tagata lē lelei atoatoa sa inoino i le solitulafono?
11 E ui i lea, sa avea Iesu o se tagata lelei atoatoa. Po o ia i tatou ea ni faaaʻoaʻoga faale-Tusi Paia o ni tagata lē lelei atoatoa o ē sa inoino moni lava i le solitulafono? O le mea moni o loo iai! Mo se faaaʻoaʻoga, sa faaalia e Mose ma ana aumea sā Levī le inoino tele i ifoga i tupua, e ala lea i le fasiotia o ē ifo i tupua e tusa ma le 3,000 ona o le poloaiga a Ieova. (Esoto 32:27, 28) Sa faaalia foi e Fineaso le inoino tele i le solitulafono ina ua ia fasiotia tagata faitaaga e toalua i le tao.—Numera 25:7, 8.
Faaalia le Inoino i le Solitulafono
12. (a) E mafai faapefea ona tatou faaalia lo tatou inoino i le solitulafono? (e) O ā nisi o ala aogā e alofia ai manatu e uiga i le solitulafono?
12 I o tatou aso, e mafai faapefea ona tatou faaalia lo tatou inoino i le solitulafono? E ala lea i le puleaina o o tatou manatu, a tatou upu, ma a tatou gaoioiga. E manaomia ona tatou atiina aʻe le uiga o le manatunatu i mea e faalaeiauina ai, pe afai e lē o gaoioi o tatou mafaufau i se galuega o loo fai. Afai e na ona tatou taotooto i le po a o loo ala pea o tatou mafaufau, atonu e iʻu ai i ni mafaufauga sese, e pei o le mafaufau pea i ni tulaga faanoanoa po o le tuʻinanau foi i le matalasi o feusuaiga. Ia aua lava neʻi iai se avanoa mo na mea, ae ia fai ma masani le auai i mafaufauga aogā. Mo se faaaʻoaʻoga, taumafai e tauloto ni mau, o amuia e iva, ma fua e iva o le agaga. (Mataio 5:3-12; Kalatia 5:22, 23) Pe mafai ona e taʻu maia igoa o le au aposetolo e toʻa 12? O e silafia ea Tulafono e Sefulu? O ai faapotopotoga e fitu o loo taʻu mai i le Faaaliga? O le manatuaina pea o pese o le Malo, o le a fesoasoani foi lea ia i tatou ina ia tausisi ai pea o tatou mafaufau i mea moni, mea e manatu mamafa i ai, mea tonu, mea mamā, mea matagofie, mea e logoleleia, o amioga lelei, ma mea e viia ai.—Filipi 4:8.
13. O le inoino i le solitulafono, o le a uunaia ai i tatou e inoino i ā ituaiga o tala?
13 E lē gata i lena, tatou te faaalia lo tatou inoino i le solitulafono e ala i le alofia o tala leaga uma. O le toatele o tagata o le lalolagi, e fiafia e talanoa ma faalogologo i tala mālie ae leaga, peitai e lē tatau i Kerisiano ona lolo atu e na ona faalogologo ia te i latou. Na i lo o lena, e ao ona tatou savavali ese ma ia alofia le auai i so o se talanoaga o loo mafuli atu i na tulaga maualalalo. Afai e lē mafai ona tatou savavali ese, e mafai ona tau ina tatou faaalia atu i o tatou foliga, tatou te inoino i talanoaga faapena. E manaomia ona tatou utagiaina lenei fautuaga lelei: “Aua neʻi alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.” (Efeso 4:29) E lē tatau ona tatou faaleagaina i tatou lava e ala i le tautala i mea e lē mamā po o le faalogologo foi i ai.
14. O le ā le puipuiga o le a saunia e le inoino i le solitulafono e uiga i faiga faapisinisi ma galuega?
14 E tatau foi i lo tatou inoino i le solitulafono, ona faasagatau atu i gaoioiga uma a le agasala. O le a fesoasoani ia i tatou le inoino i le solitulafono, ina ia alofia ai le mailei o le faalotolotolua i lenei itu. E lē faia pea lava e Kerisiano moni le agasala. (Faatusatusa i le 1 Ioane 5:18.) Mo se faaaʻoaʻoga, e tatau ona tatou inoino i faiga faapisinisi uma e lē faamaoni. I aso nei, e toatele Molimau a Ieova ua oo i ai omiga ina ia faia ni mea e lē faamaoni mo o latou pule, peitai ua latou teena le faia faapea. Ua loto malilie Kerisiano ina ia tutuliese mai a latou galuega, na i lo o le faia o se mea e faaleagaina ai o latou loto fuatiaifo ua aʻoaʻoina i le Tusi Paia. E sili atu i lena, tatou te mananao foi e faailoa atu lo tatou inoino i le solitulafono, e ala i le lē solia o tulafono o le auala, ma i le lē pepelo i taimi e tatau ai ona totogi atu a tatou lafoga ma tiute o mea felauai.—Galuega 23:1; Eperu 13:18.
Inoino i Feusuaiga Lē Mamā
15. O ā fuafuaga lelei ua faataunuuina ona o le foafoaina o tagata faatasi ma uiga malolosi mo se paaga?
15 I le avea ma Kerisiano, e tatau ona tatou inoino patino lava i mea leaga uma e aofia ai feusuaiga lē mamā. E ala i le foafoaina o le fanau a tagata faatasi ma uiga malolosi mo se paaga, ua faataunuuina ai e le Atua ni fuafuaga lelei se lua. Sa ia faamautinoaina ai, o le a lē mavae atu le aiga faaletagata, ma sa ia faia foi se sauniuniga alofa e sili atu, ina ia maua ai le fiafiaga. E oo lava i tagata o ē e matitiva, e leʻi aʻoaʻoina, pe vaivai i nisi o itu, e mafai lava ona latou maua le fiafiaga tele i le faiā faalefaaipoipoga. Peitai, ua faataatia e Ieova ni tuaoi ina ia mafai ai ona olioli i totonu o lenei faiā. O na tapulaa e faavae mai le Atua, e tatau ona faaaloalogia.—Kenese 2:24; Eperu 13:4.
16. O le ā lo tatou manatu e ao ona iai e uiga i faafiafiaga ma faiga tau feusuaiga lē mamā?
16 Afai tatou te inoino i le solitulafono, o le a tatou filigā la e alofia faiga faaleituaiga uma e lē mamā, atoa ma faafiafiaga matagā. O le mea lea tatou te lafoaia ai tusi, mekasini, ma nusipepa uma e māsalomia lo latou tulaga mamā. I se uiga tutusa, afai tatou te inoino i le solitulafono, o le a tatou lē matamata ai la i so o se ata e lē mamā, pe faaalia mai i le televise, po o ata tifaga, po o se faaaliga foi e faia i le pulelaa o se fale matamata. Afai tatou te iloa e lē mamā amioga o faaalia i se polokalama, e ao ona uunaia ai i tatou e tapē loa lava le televise, pe ao foi ona tatou maua le lototele e tuua ai le fale tifaga. O lo tatou inoino foi i le solitulafono, o le a puipuia ai i tatou mai musika uma e faageeina ai faalogona faaleituaiga i ona upu po o lona fātuga. O le a tatou lē saili ai e fia iloa ni mataupu e lē mamā, peitai, o le a ‘faatamameamea ai i le leaga, ae faatagata matua le mafaufau.’—1 Korinito 14:20.
17. O le ā le fautuaga ua aumaia e le Kolose 3:5 e mafai ona fesoasoani ia i tatou ina ia tumau ai i le mamā tau amio?
17 Ua matuā talafeagai ai la ona fautuaina i tatou e faapea: “O lenei, ia outou fasiotia o outou itu tino o i le lalolagi, o le faitaaga, o [amioga lē mamā, ma le tuʻinanau i feusuaiga].” (Kolose 3:5) E lē tau fesiligia lo tatou manaomia o ni taumafaiga malolosi, pe afai tatou te maumauai ina ia tausisi i le mamā tau amio. Fai mai le The Expositor’s Bible Commentary e uiga i le veape Eleni lea ua faaliliuina o le “fasiotia,” i le Kolose 3:5, e faapea: “E faaalia ai e lē tau ina tatou faatoilaloina po o le pulea o gaoioiga ma uiga leaga. Ae e ao ona tatou tafiesea, ia aveesea atoatoa le ala tuai o le olaga. Atonu e mafai ona faaalia lona malosi e ala i le ‘vavaeesea atoatoa.’ . . . Ua faaalia uma i le uiga o le veape, ma le faaaogāina o le upu se gaoioiga e faia ma le lototele ma le tigā ona o le maumauai totino.” O le mea lea e ao ai ona tatou alofia tusiata o loo faaalia ai feusuaiga faaleituaiga, ona ua pei na tusi o se faamaʻi mataʻutia, e pipisi, e iʻu ai i le oti, i le itu tau amio ma le faaleagaga. E faapena foi le manatu na faaalia e Keriso ina ua ia faapea mai e vavaeeseina se lima, se vae, pe oo foi i se mata, pe afai o loo fai lena ma mea tatou te tausuai ai.—Mareko 9:43-48.
Inoino i Lotu Sese ma le Faaaposetasi
18. E mafai faapefea ona tatou faaalia lo tatou inoino i solitulafono a lotu?
18 E pei foi la, ona faaalia e Iesu lona inoino i le solitulafono e ala i le faaalialia le au failotu tala pepelo, e faapena foi ona faaalia e Molimau a Ieova i aso nei lo latou inoino i solitulafono uma a le au failotu tala pepelo. E faapefea? E ala lea i le tufaina atu o lomiga faale-Tusi Paia, o loo folasia ai i lumamea le mea moni e uiga ia Papelonia Tele, o ia o se fafine talitane faalelotu. Afai tatou te inoino moni lava i solitulafono a lotu pepelo, o le a tatou taulamua la i le faaalialia o Papelonia Tele, le emepaea o lotu sese uma i le lalolagi. O le a tatou faia lena mea, mo le lelei o tagata loto faamaoni o ē ua ia faatauasoina ma taofiofia i noanoataga faaleagaga. Ona o lo tatou inoino moni lava i solitulafono a Papelonia Tele, o le a tatou matuā maelega ai e auai i vala uma lava o le faiva o le Malo.—Mataio 15:1-3, 7-9; Tito 2:13, 14; Faaaliga 18:1-5.
19. E ao faapefea ona tatou manatu i aposetate, ma aiseā?
19 O le manaoga ina ia inoino i le solitulafono, e faatatau foi i galuega uma lava o loo faia e aposetate. O o tatou manatu i aposetate, e ao ona pei o lea sa ia Tavita, o lē na folafola mai: “Ieova e, ou te le ʻinoʻino ea ia te i latou o e ʻinoʻino ia te oe? ma e o laga atu ia te oe, ou te le matuā ʻinoʻino ea i ai? Ou te ʻinoʻino lava ia te i latou ma le matuā ʻinoʻino tele; ua fai i latou moʻu fili.” (Salamo 139:21, 22) Ua aufaatasi aposetate i aso nei, ma “le tagata o le agasala,” o faifeau ia o Kerisinetoma. (2 Tesalonia 2:3) I le avea ma Molimau faamaoni a Ieova, o le mea lea e matuā augapiu ai ma se mea tatou te aufaatasi ai ma i latou. Ona o le lē lelei atoatoa, e ono faigofie ai ona taaʻina o tatou loto e faitio e uiga i o tatou uso. O i latou taitoatasi o “le auauna faamaoni ma le mafaufau,” o ni tagata e lē lelei atoatoa. (Mataio 24:45-47) Peitai, o loo faamaoni ma faautauta lena vasega. E vaavaai vale aposetate i masei po o mea sese e faia e uso o loo taʻimua. E faalagolago lo tatou saogalemu i le alofiaina o togafiti faaaposetate e pei o se mea oona, auā o le mea moni lena.—Roma 16:17, 18.
20, 21. E mafai faapefea ona aoteleina mafuaaga mo le inoino i le solitulafono?
20 Ua tatou vaaia le faatumulia o le lalolagi i le solitulafono, lea e fesootai vavalalata ma le agasala. E lē lava le tau ina tatou alolofa i le amiotonu; e tatau foi ona tatou inoino i le solitulafono. Atonu sa manatu nisi o i latou o ē ua faateʻaeseina mai le faapotopotoga e faapea sa latou alolofa i le amiotonu, peitai, sa leʻi lava lo latou inoino i le solitulafono. Ua tatou vaaia foi le pogai e ao ai ona tatou inoino i le solitulafono. E lē mafai ona tatou mauaina se loto fuatiaifo lelei ma faaaloalogia i tatou lava, seʻi vaganā ua tatou inoino i ai. E lē gata i lena, o le solitulafono, o le lē faamaoni lea ia Ieova le Atua. Ma ona o le solitulafono, tatou te seleseleina ai ni fua e sili ona tigā—o le malaia, o le iʻuvale, ma le oti.
21 Ua tatou matauina foi le auala e faaalia ai lo tatou inoino i le solitulafono. Tatou te faaalia lea e ala i le matuā augapiu ma sa tatou vaega e faia i so o se ituaiga o lē le faamaoni, feusuaiga lē mamā, po o le faaaposetate. Talu ai ona tatou te mananao ina ia auai i le taʻumamāina o Ieova ma faanaunau e faafiafiaina lona finagalo, e tatau ai la ona lē gata ina tatou alolofa i le amiotonu ma faaauau pea ona toaaga i lana auaunaga, ae ia tatou inoino foi i le solitulafono, e pei ona sa faia e lo tatou Taʻitaʻi ma lo tatou Faatonu, o Iesu Keriso.
E Faapefea ona E Tali Mai?
◻ Ua faapefea ona faaaogā e le Tusi Paia le upu “ʻinoʻino”?
◻ O ā nisi mafuaaga lelei tatou te inoino ai i le solitulafono?
◻ O ā faaaʻoaʻoga lelei o ē sa inoino i le solitulafono?
◻ E mafai faapefea ona tatou faaalia lo tatou inoino i le solitulafono?
[Ata i le itulau 8]
Sa faamamāina e Iesu le malumalu ona o lona inoino i le solitulafono
[Ata i le itulau 10]
Afai tatou te inoino i le solitulafono, o le a tatou alofia ai la faafiafiaga tau feusuaiga lē mamā