E Mafai ona E Maua Faamafanafanaga i Taimi o Mafatiaga

E AO faapefea ona tatou manatu i faalogona o mafatiaga? Afai ua tuuina atu i tatou ia Ieova, pe e ao ona tatou vaai i na faalogona faapea o ni mea e ese, ona o lo tatou faamoemoe ofooofogia ma a tatou alaga manuia faaleagaga? Po o le iai o na faalogona ua uiga ai faapea ua lē talafeagai i tatou i le itu faaleagaga mo le galuega a le Atua?

“O Elia o se tagata sa iai foi faalogona e pei o i tatou,” e pei ona na tusi mai ai le soʻo o Iakopo. (Iakopo 5:17, NW) E ui lava ina sa faaaogā e Ieova Elia i se auala uigaese, ae sa lagona foi e lena perofeta faamaoni le mafatia. I se tasi taimi na alaga ai Elia: “Ieova e, soia; ia e ave ese loʻu ola, auā e le sili ona lelei o aʻu i oʻu tamā.” (1 Tupu 19:4) Na oo foi i mafatiaga le tagata tausisi i le faamaoni o Iopu, le fafine faamaoni o Hana, ma isi auauna faamaoni a Ieova. E oo lava i le faisalamo amioatua o Tavita na tatalo e faapea: “Ua faateleina [mafatiaga] o loʻu loto; ia e aveeeseina aʻu i mea ou te [mafatia] ai.”—Salamo 25:17.

O le faaaogāina e Ieova o tagata i lana auaunaga e lē faapea ua matuā saoloto ai i latou mai mafatiaga. O loo iai pea ia i latou uiga ma faalogona vaivai faaletagata, ma e ono oo foi i ni mafatiaga pe a i lalo o tofotofoga. (Galuega 14:15) Ae peitai, e sili ona lelei fesoasoani e maua e auauna a le Atua na i lo o isi i le feagai ai ma faalogona mafatia. Seʻi o tatou talanoaina ni nai faaaʻoaʻoga faale-Tusi Paia ina ia iloa ai po o le ā na fesoasoani i nisi tagata e foia o latou tulaga faigata faalemafaufau ma lagona mafatia na oo ia i latou.

Maua e le Aposetolo sa Mafatia Faamafanafanaga

Sa iloa e le aposetolo o Paulo le uiga o le mafatia. Na faapea mai o ia: “Auā na matou o mai i Maketonia sa leai se mapu i o matou tino, . . . o taua i fafo, o i totonu o mataʻu. A o le Atua o le na te faamafanafanaina e ua faamaulaloina, na ia faamafanafana mai ia te i matou i le oo mai o Tito.” (2 Korinito 7:5, 6) O mafatiaga o Paulo sa mafua ona o nisi o tulaga na tutupu i lena taimi na tiga ai o ia. Sa iai “taua i fafo”—sauaga ogoogo na lamatia ai le ola lava ia. (Faatusatusa i le 2 Korinito 1:8.) E lē gata i lea, sa iai ‘le mataʻu i totonu,’ ona o popolega e uiga i faapotopotoga, e pei o lena sa i Korinito.

I ni nai masina muamua atu, na tusia ai e Paulo lana uluai tusi i Kerisiano i Korinito. I lea tusi, sa ia taʻusalaina ai nisi o tulaga sili ona leaga i le faapotopotoga, ma e foliga mai sa popole o ia i le po o ā uiga o le a faaalia e uso i Korinito e faatatau i lana tusi. Ae peitai, sa faamafanafanaina Paulo ina ua sau Tito mai Korinito ma se lipoti fiafia e uiga i la latou tali mai. E faapena foi ona atonu e faaaogā e Ieova se tasi o ana auauna i aso nei e aumaia ia i tatou se tala lelei ma faaitiitia ai lo tatou loto mafatia.

Le Manatu i Tofiga mai le Atua

O nisi Kerisiano atonu e ala ona mafatia ona o la latou faiva. E moni, ua manatu nisi o auauna a Ieova faapea, o tofiga mai le Atua, ua tele nauā mea e manaomia mai ia i latou mo le faataunuuina. Mo se faataʻitaʻiga, sa lagona e Mose le lē fetaui o ia e fai ma sui o le Atua mo le fanauga a Isaraelu i Aikupito. Faatasi ma isi mea, na faapea mai o ia e lē o ia o se tagata e iloa fai se lauga. (Esoto 3:11; 4:10) Ae faatasi ma le faatuatua i le Atua ma i le avea o Arona ma fofoga mo ia, na mafai ai e Mose ona faataunuuina lona tofiga.

I se taimi ona lē toe faalagolago lea o Mose ia Arona. I le amataga, sa faapena foi ona iloa e nisi faapea e faigata le faiva faa-Kerisiano, ae ina ua aʻoaʻoina i latou sa oo ina avea o ni faievagelia tomai. Mo se faaaʻoaʻoga, e toatele Molimau a Ieova talavou ua oo ina matutua ma avea ma tagata talaʻi faataimi atoa i le avea ma paeonia ma misionare. O se mea e faamafanafanaina ai le iloa faapea e mafai pea lava ona faalagolago ia Ieova ina ia faaagavaaina ni faifeau Kerisiano ma avatu ia i latou le malosi e faataunuu ai o latou tofiga mai le Atua.—Sakaria 4:6; 2 Korinito 2:14-17; Filipi 4:13.

Faamafanafanaina pe a Mafatia i Faanoanoaga

Atonu ua vaivai o tatou loto ona o le faanoanoa faapea, e lē o sili atu ni mea o tatou faia i le auaunaga a le Atua. O se uso o lē na lē toe talaʻi mo ni tausaga, na amata ona faatoʻā toe auai i le faiva i le fanua. E leʻi pine mulimuli ane, ae maʻi tigaina lava o ia, ma ua faataotolia i le moega. Na faapea mai le uso loto mafatia: “Muamua, ina o mafai ona ou talaʻi ma le tiotio, sa ou teena tiute tauave. I le taimi nei, ua ou manao ia ou aasa, ae ua ou lē mafaia.”

Pe lē atamai ea ona faia le mea sili ona lelei tatou te mafaia i le taimi nei, na i lo o le faaalu o le malosi o faalogona ootia e mafaufau ai i mea na tutupu i aso ua mavae? O ʻafa uso faaletino o Iesu o Iakopo ma Iuta, sa leʻi avea o ni tagata talitonu seia mavae lona maliu ma lona toetu. Afai sa iai ni o la faanoanoaga ona o lenei mea, sa leʻi taofia ai i laua mai le avea o ni auauna a le Atua ma oo foi ina avea o ni tusitala o le Tusi Paia.

Aua Lava Neʻi Tuulafoaiina le Tatalo

Pe a mafatia, e ao i tagata o le Atua ona tatalo faatauanau. O le mea moni, o loo i le Tusi Paia le tele o tatalo na faia i taimi o mafatiaga. (1 Samuelu 1:4-20; Salamo 42:8) Atonu e manatu nisi faapea: ‘Ua ou matuā mafatia lava ua lē mafai ona ou tatalo.’ Ae aiseā la e le manatunatu ai ia Iona? A o iai i totonu o le manava o le iʻa, na ia faapea mai: “Na ou manatua Ieova ina o vaivai o loʻu loto i totonu ia te au; na oo atu foi laʻu tatalo ia te oe i lou malumalu paia. . . . A o aʻu, ou te faitaulaga ia te oe ma le upu faafetai; ou te faia le mea na ou tauto ai. Mai ia Ieova le olataga.” (Iona 2:4-9) Ioe, sa tatalo Iona, ma na faamafanafanaina o ia e le Atua ma faaolaina o ia.

E ui lava ina sa paeonia mo le tele o tausaga se tuafafine i Suetena, ae sa faafuaseʻi lava ona ia te ia le loto vaivai e peiseai ua leai sona aogā e ui lava ina sa matuā tauia lana faiva. Sa ia taʻu atu ia Ieova lona loto vaivai i le tatalo. I ni nai aso mulimuli ane, na ia maua mai ai se telefoni mai se uso i le ofisa o le lala o le Sosaiete o le Olo Matamata. Sa ia fesili mai ai pe mafai ona fesoasoani le tuafafine i inā mo se aso se tasi i le vaiaso e tusa ma le toe faatelēina o le fale Peteli. Na faapea mai mulimuli ane lenei tuafafine: “O le siomaga i Peteli ma le maua o le avanoa e vaai ai i le galuega o le faatelēina ma faia ai se sao, na aumaia ai ia te aʻu le malosi faaopoopo na ou manaomia.”

A tatou mafatia, e lelei ona tatou manatua faapea o le tatalo o le tasi lea o auala e tau ai ma mafatiaga. (Kolose 4:2) I le talia o a tatou tatalo, e mafai e Ieova ona tatala se faitotoa e taʻitaʻiina atu ai i se galuega sili i lana auaunaga, pe atonu foi o le a ia faamanuia la tatou faiva i se faatelega fua tele. (1 Korinito 16:8, 9) I so o se mea lava e tupu, “o le faamanuia a Ieova, o lea e faatamaoaiga aʻi; na te le faaopoopo i ai se tiga.” (Faataoto 10:22) O lenei mea e mautinoa le faagaeetia ai o o tatou agaga.

Po o Mafatia ona o ni Masalosaloga?

Mai lea taimi i lea taimi, atonu e iai ni masalosaloga i se tasi o auauna a Ieova. Afai e tupu lena mea ia i tatou, e lē tatau ona tatou faia loa se faaiʻuga faapea ua tatou lē maua le finagalo malie o le Atua. Sa leʻi teena e Iesu le aposetolo o Toma ona o le masalosalo i faamaoniga vaaia i le toe faatuina mai o lona Matai. Na i lo o lea, sa fesoasoani ma le alofa Iesu ia Toma ina ia manumalo i ona masalosaloga. Maeu le fiafia o Toma ina ua ia iloatino faapea ua toe soifua mai Iesu!—Ioane 20:24-29.

E ala i a latou aʻoaʻoga sese, a latou muimui, ma isi mea faapena, sa faapogaia ai e “tagata amio faalemataʻu” o ē na ō mai faaleiloga i totonu o le faapotopotoga Kerisiano i le uluai senituri, nisi ina ia mafatia ona o le masalosalo. O lea, na tusi atu ai le soʻo o Iuta: “Ia outou alolofa atu pea i nisi o iai masalosaloga; ia faaola ia i latou i le seʻi mai o i latou mai le afi.” (Iuta 3, 4, 16, 22, 23, NW) Ina ia faaauau pea ona maua le finagalo alofa mutimutivale o le Atua, sa manaomia ai e uso tapuai o Iuta—ae maise lava toeaina o le faapotopotoga—ona faaalia le alofa mutimutivale e tatau ai i ē o iai masalosaloga. (Iakopo 2:13) Sa lamatia lo latou ola e faavavau, ona sa iai i latou i se tulaga mataʻutia i “le afi” o le faaumatiaga e faavavau. (Faatusatusa i le Mataio 18:8, 9; 25:31-33, 41-46.) Ma maeu le olioli e maua pe a avatu ma le agalelei se fesoasoani i uso talitonu o iai masalosaloga ma oo ai ina malolosi faaleagaga!

Afai e avea tofotofoga ogoogo ma mea tatou te masalosalo ai po o faatasi le Atua ma i tatou, e manaomia la ona tatou patino i a tatou tatalo. I lalo o na tulaga, seʻi o tatou finafinau i le ole atu ia Ieova mo le atamai. E foai mai e ia ma le agalelei e aunoa ma le faalumaina ai o i tatou ona o le leai o se atamai e tatalo atu ai mo lea mea. E tatau ona tatou “ole atu [pea] ma le faatuatua, aua lava neʻi masalosalo,” auā o le tagata masalosalo “e tusa ia ma le peau o le sami ua sousou i le matagi ma felafolafoaiina” i itu uma. O tagata faapena e leai se mea latou te maua mai le Atua ona e lē o mautu se filifiliga, o loo “faaletumau” i tatalo ma o latou ala uma. (Iakopo 1:5-8) O lea, seʻi ia i tatou le faatuatua faapea o le a fesoasoani Ieova ia i tatou e vaai ma le saʻo i o tatou tofotofoga ma mafai ona tumau ai. E mafai e o tatou uso talitonu ona faamanatu mai mau ia i tatou po o le taimi foi o le suesuega faale-Tusi Paia. O mea tutupu e ala mai i sauniuniga a le Atua, e mafai ona fesoasoani ia i tatou e iloa le mea e ao ona tatou fai. E faia foi se sao o agelu i le taʻitaʻiina o i tatou, pe mafai foi ona tatou maua le taʻitaʻiga e ala i le agaga paia. (Eperu 1:14) O le mea sili lava, o le tatalo mo le atamai faatasi ma le faalagolago atoatoa i lo tatou Atua alofa.—Faataoto 3:5, 6.

Ia Manatua e Aumai e Ieova Faamafanafanaga

Sa faalagolago ma tatalo Paulo ia Ieova ma iloa o ia o le Puna o faamafanafanaga. Na tusi le aposetolo: “Ia faamanuina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava, ina ia matou mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i matou e le Atua.”—2 Korinito 1:3, 4.

Ua silafia e le Atua o faamafanafanaga uma, mafatiaga e oo i ana auauna ma finagalo ai o ia e avatu ia i latou se mapusaga. E tusa ai ma le popolega o Paulo e uiga i tagata Korinito, na maua le mapusaga e ala i lana aumea Kerisiano o Tito. O le tasi lenei o auala e mafai ona faamafanafanaina ai i tatou i aso nei. Pe a mafatia i tatou, ua ao la ia i tatou ona aloese mai le faaesea o i tatou mai uso Kerisiano. (Faataoto 18:1) O le auaufaatasi ma uso Kerisiano o le tasi lea o auala e faamafanafanaina ai i tatou e le Atua. Atonu ua tatou manatu faapea: ‘Ua ou matuā loto vaivai lava, ua lē lava ai soʻu malosi e aufaatasi atu ai ma aʻu uo Kerisiano.’ Ae peitai, e ao ona tatou tau ma na faalogona ma aua neʻi aveesea ai i tatou lava mai faamafanafanaga ua ofoina mai e uso talitonu.

Aua le Faavaivai!

Atonu e leʻi tofo nisi o i tatou i se tofotofoga na oo ai ni aafiaga faapena ua puapuagatia ai i tatou i le matuā loto mafatia. Ae o le loto vaivai ona o se maʻi, le maliu o se paaga faaipoipo, po o se isi lava tulaga e tofotofoina ai, e mafai ona aumaia ai faalogona mafatia. Afai e tupu mai lena mea, aua neʻi o tatou faia se faaiʻuga faapea, ua tatau foi ona tatou mamaʻi faaleagaga. O se tagata loto mafatia, atonu o loo agavaa lelei lava mo le auaunaga a le Atua, po o mafai lava foi ona fesoasoani i isi i le tulaga faaleagaga. Na uunaia e Paulo uso ina “ia faamafanafana i e loto iti,” ae aua le masalosalo faapea ai pe na latou faia se mea sese, ua mamaʻi ai faaleagaga. (1 Tesalonia 5:14) E ui o mafatiaga i nisi taimi e oo mai ona o le faia o se mea sese ma ua taʻusalaina ai, ae e lē o le tulaga lena e oo ia i latou o auauna i le Atua ma le loto mamā. O la latou tapuaiga atonu o loo tuuina atu i se tulaga sili ona faigata, e talia e Ieova. E alofa o ia ia i latou ma e fesoasoani o ia ia i latou i le fesoasoani ma le faamafanafanaga e manaomia.—Salamo 121:1-3.

O i latou o faia aʻe ai le vaega totoe o le Isaraelu faaleagaga, sa matuā mafatia ona o tofotofoga na oo ia i latou i le 1918. (Faatusatusa i le Kalatia 6:16.) Na toetoe a faaumatia la latou faalapotopotoga o le autalaʻi, o nisi o i latou na tuu i le falepuipui ona o tuuaʻiga sese, ma o le toatele o a latou aumea muamua na oo ina lē faamaoni, na avea o ni aposetate tetee. E lē gata i lea, sa lē malamalama le vaega totoe faamaoni i le pogai na faataga ai e le Atua lenei mea e tupu. Mo sina taimi, sa ‘latou lūlūina fatu ma loimata,’ ae leʻi faavaivai i latou. Sa latou auauna pea ia Ieova ma sa suesueina foi i latou. O le ā le iʻuga? Na latou ‘ō mai ma le alaga fiafia, o loo tauaveina a latou fusi saito.’ (Salamo 126:5, 6) Ua iloa ai e le vaega faauuina faapea ua faatagaina e le Atua na tofotofoga ina ia faamamāina ai i latou a o latou ō atu e faia le galuega o le seleselega faavaomalo o loo taatia mai i luma.

Afai tatou te loto vaivai ona ua oo ia i tatou ni tofotofoga eseese, e mafai ona tatou maua aogā mai mea na oo i le vaega totoe faauuina. Na i lo o le faavaivai, seʻi o tatou faaauau ona faia o le mea ua tonu, e tusa lava pe e tatau ona tatou faia faapea ma le tagi. I se taimi, o le a mafai ona tatou sao mai ai i o tatou tofotofoga, ma o le a tatou ‘ō mai ma le alaga fiafia.’ Ioe, o le olioli—o se fua o le agaga paia o le Atua—o le a avea ma a tatou mea totino pe afai tatou te tumau i o tatou tofotofoga. Mo i tatou, o le a mautinoa le faamaonia o le avea o Ieova “o le Atua o faamafanafanaga uma.”