E Faaaogāina e Ieova le “Valea” e Faaolaina ai Ē Talitonu

“Auā o le poto [atamai, “NW”] o le Atua, ina ua le iloa e le lalolagi i lo latou poto [atamai], ua finagalo ai le Atua ia faaolaina i le valea o le talaʻiga e ua faatuatua.”—1 KORINITO 1:21.

1. I le ā le auala ua faaaogā ai e Ieova le “valea,” ma tatou te iloa faapefea, ua lē iloa e le lalolagi le Atua i lona atamai?

EĀ? Pe o le a faaaogā e Ieova le valea? E lē o le uiga moni lena! Ae e mafai ona ia faaaogā le mea e foliga mai e valea i le lalolagi. Ua ia faia faapea ina ia mafai ai ona faaolaina tagata o ē ua iloa ma alolofa ia te ia. E lē mafai ona iloa le Atua i le atamai o le lalolagi. Sa faamanino mai e Iesu Keriso lenei mea ina ua ia ole atu i le tatalo: “Le Tamā amiotonu e, e lei iloa oe e le lalolagi.”—Ioane 17:25.

2. Ua faafoliga mai faapefea o ala o Ieova ma ala o le lalolagi e tutusa, ae o ā mea moni ua iloa e uiga i ai?

² Ua faaalia i upu a Iesu faapea, o ala o Ieova e ese mai ala o le lalolagi. Atonu e foliga mai i fafo o loo tulaga tutusa fuafuaga a le Atua ma fuafuaga a le lalolagi. E pei e foliga mai o loo iai le faamanuiaga a le Atua i fuafuaga a lenei lalolagi. Mo se faataʻitaʻiga, ua faapea mai le Tusi Paia, o le a faatūina e le Atua se pulega amiotonu o le a aumaia ai se olaga filemu, fiafia, ma le tamaoaiga i tagata i le lalolagi. (Isaia 9:6, 7; Mataio 6:10) Ua faapena foi ona folafola mai e le lalolagi lana fuafuaga e avatu i tagata le filemu, tamaoaiga, ma se pulega lelei e ala i le fuafuaga ua latou taʻua o se faiga fou o le lalolagi. Ae e lē tutusa fuafuaga a le Atua ma fuafuaga a le lalolagi. O le fuafuaga a Ieova, e mo le taʻumamāina ai o ia lava o le Pule Silisiliese aoao. O le a ia faataunuuina lea e ala i se pulega faalelagi, na te soloiesea pulega uma faalelalolagi. (Tanielu 2:44; Faaaliga 4:11; 12:10) O lea, e lē tutusa le silafaga a le Atua ma fuafuaga a lenei lalolagi. (Ioane 18:36; 1 Ioane 2:15-17) O le pogai lena ua tautala ai le Tusi Paia e uiga i ituaiga o atamai e lua—ʻle atamai o le Atua’ ma ‘le atamai o lenei lalolagi.’—1 Korinito 1:20, 21.

Le Pona Autū o le Atamai Faalelalolagi

3. E ui lava e foliga mai e malosi tele le atamai o le lalolagi, ae aiseā e lē mafai ai ona faamalieina tagata i le faiga fou o le lalolagi ua folafola mai e le tagata?

³ Ia i latou o ē e lē o taʻitaʻiina e le atamai o le Atua, e foliga mai e malosi ai tele taaʻiga a le atamai o le lalolagi. Ua iai aʻoaʻoga faafilosofia faalelalolagi e sili ona maualuluga ua taaʻina ai le mafaufau. E faitauafe faleaʻoga o aʻoaʻoga e sili ona maualuluga ua aumaia ai faamatalaga mai ē ua manatu i ai le toatele faapea o ē aupito sili ona tomai i tagata. Ua faatumuina faletusi tetele i le anoanoai o le poto masani na maua e tagata i suesuega mo le tele o senituri. Ae peitai, e ui lava i lenei mea, ae o se faiga fou o le lalolagi ua faailoa mai e taʻitaʻi o le lalolagi, o le a na o se pulega e faia e tagata lē lelei atoatoa, ua pisipisia i le agasala, ma le oti. I lea, o lena faiga fou o le a lē lelei atoatoa foi, e toe faia ai lava mea sese ia na fai i le taimi ua mavae, ma o le a lē taitai ona faamalieina ai manaoga o tagata uma.—Roma 3:10-12; 5:12.

4. O le ā o nofo toilalo ai le faiga fou o le lalolagi ua folafola mai, ma o le ā le iʻuga?

⁴ O se faiga fou o le lalolagi ua folafola mai e tagata, o le a lē gata ina taaʻina e vaivaiga faaletagata, ae faapea foi ma taaʻiga a foafoaga o agaga leaga—ioe, o Satani le Tiapolo ma ana temoni. Ua faatauasoina e Satani manatu o tagata ina ia latou lē talitonu i ‘le tala lelei mamalu e uiga i le Keriso.’ (2 Korinito 4:3, 4; Efeso 6:12) O le iʻuga, ua pagatia ai le lalolagi i lea mala ma lea mala. E fai taua ma faamasaa toto i lana taumafaiga malaia ina ia pulea ia lava e aunoa ma le fesoasoani mai le Atua ma e aunoa foi ma se manatu i le finagalo o le Atua. (Ieremia 10:23; Iakopo 3:15, 16) I lea, e pei ona fai mai le aposetolo o Paulo, “ua le iloa le Atua e le lalolagi i lo latou poto [“atamai,” NW].”—1 Korinito 1:21.

5. O le ā le pona autū o le atamai o lenei lalolagi?

⁵ O le ā la le pona autū o le poto o lenei lalolagi, e aofia ai ana fuafuaga mo se faiga fou o le lalolagi? Ona ua faaleamanaia e le lalolagi le mea e matuā lē tatau lava ona faaleamanaiaina—o le pule silisiliese lea a Ieova le Atua. Ua ia teena ma le faasausili le pule silisiliese a le Atua. Ua lafoai ma le iloa e le lalolagi Ieova mai a latou fuafuaga uma lava, ae e faalagolago i latou i o latou lava tomai ma a latou faufauga. (Faatusatusa i le Tanielu 4:31-34; Ioane 18:37.) Ua faamanino mai e le Tusi Paia faapea “o le mataʻu ia Ieova, o le amataga o le poto lea.” (Faataoto 9:10; Salamo 111:10) Peitai, e leʻi aʻoaʻoina lava e le lalolagi lenei mea autū e manaomia e le atamai. O lea la, afai e lē lagolagosua mai le Atua, e mafai la faapefea ona taulau lena lava mea?—Salamo 127:1.

Talaʻiga o le Malo—e Valea pe Aogā?

6, 7. (a) O le ā o loo talaʻia e i latou o ē o taʻitaʻiina e le atamai o le Atua, ae o le ā le manatu o le lalolagi ia i latou? (e) E tusa ma le atamai o ai o loo talaʻi atu ai taʻitaʻi lotu o Kerisinetoma, ma o le ā le iʻuga?

⁶ I le isi itu, o i latou o ē e iloa le Atua, latou te faaalia atu le atamai o le Atua ma filifili e taʻitaʻiina ai i latou. E pei ona valoia e Iesu, ua latou talaʻiina atu “lenei tala lelei o le malo i le atu laulau uma.” (Mataio 24:14; 28:19, 20) Po o aogā lena talaʻiga i aso nei, a o faatumuina lo tatou lalolagi i fetauaiga, le polusione, le mativa, ma mafatiaga o tagata? I tagata atamamai o le lalolagi, o lena talaʻiga e uiga i le Malo o le Atua, e foliga mai o se mea valea ia i latou, e leai se aogā. Ua latou manatu i le au talaʻi o le Malo o le Atua, e pei o ni tagata faasoesa ua fai ma faalavelave i le Setete, ma ua faatuai ai ona agaʻi i luma mo se pulega e sili ona lelei faapolotiki. I lenei manatu, ua lagolagoina ai i latou e taʻitaʻi lotu a Kerisinetoma, o ē o loo talaʻi e tusa ma le atamai o lenei lalolagi, ae latou te lē o taʻuina atu i tagata le mea e manaomia ona latou iloa e uiga i le lalolagi fou a le Atua ma le pulega a lona Malo, e ui ina sa avea lenei mea ma mataupu autū o aʻoaʻoga a Keriso.—Mataio 4:17; Mareko 1:14, 15.

⁷ Sa folasia i lumāmea e le tusitala o talafaasolopito o H. G. Wells lenei lē taulau o taʻitaʻi lotu o Kerisinetoma. Na ia tusia e faapea: “E matuā mataʻina lava le faalauiloaga maoaʻe na tuuina atu e Iesu i le aʻoaʻoina o le mea na ia taʻua o le Malo o le Lagi, ma ua matuā lē faatāuaina lava i faiga masani ma aʻoaʻoga a le tele o lotu Kerisiano.” Peitai, afai e mananao tagata o lenei tupulaga ina ia maua le ola, e tatau la ona latou muai faalogo e uiga i le Malo ua faavaeina o le Atua, ma ona o lea itu, e tatau ai i se tasi ona talaʻi atu le tala lelei e uiga i ai.—Roma 10:14, 15.

8. Aiseā ua avea ai le talaʻiina o le tala lelei o le mea e sili ona aogā e faia i aso nei, ae o le ā le gaoioiga o le a lē maua ai se aogā tumau?

⁸ O lea la, o le talaʻiina o le tala lelei a le Atua, o se mea aupito sili ona aogā e faia i aso nei. O le pogai, ona o le feau o le Malo, ua saunia ai se faamoemoe moni e faatumuina ai loto o tagata i le olioli i nei aso e gata ai, e ‘oo mai ai aso faigata.’ (2 Timoteo 3:1-5; Roma 12:12; Tito 2:13) A o lē mautonu ma puupuu le olaga i lenei lalolagi, ae o le ola i le lalolagi fou a le Atua o le a faavavau, e tumu i le olioli, e tamaoaiga, ma filemu i le lalolagi nei. (Salamo 37:3, 4, 11) E pei ona fetalai Iesu Keriso, “auā se a le aoga i le tagata pe afai na te maua le lalolagi uma, a e māumau lona ola? se a foi se mea e avatu e le tagata e togiola aʻi lona ola?” Afai e misia e se tagata le avanoa e ola ai i le lalolagi fou a le Atua, o le ā le aogā ia te ia o lenei lalolagi o loo mavae atu? O le olioli o lena tagata i mea faitino i le taimi nei, e lē aogā, o le ʻai a le matagi, ma e vave mavae ese atu.—Mataio 16:26; Failauga 1:14; Mareko 10:29, 30.

9. (a) Ina ua talosaga atu se tagata o lē na valaaulia e fai ma soʻo o Iesu ina ia toe tolopō, o le ā na fautuaina ai o ia e Iesu ina ia faia? (e) E ao faapefea ona aafia ai i tatou i le tali a Iesu?

⁹ Na faapea mai se tasi tagata na valaaulia e Iesu e avea mona soʻo: “Tuu mai ia ia te au, seʻi ou alu e muai tanu i loʻu tamā.” O le ā na fautuaina o ia e Iesu e fai? I le silafia faapea o le a tolopō e le tamaloa se galuega e sili ona tāua i le tau lava ina faatali seia iʻu le soifua o ona mātua, na tali atu ai Iesu: “Ina tuu pea ia i e ua oti e tanu i o latou tagata oti; a o oe, e te alu ma talaʻi atu le malo o le Atua.” (Luka 9:59, 60) O i latou e faaalia le atamai e ala i le usiusitai ia Keriso, e lē mafai ona liliu ese mai le faataunuuina o lo latou tofiga ina ia talaʻi le feau o le Malo. Ona o le atamai o le Atua ua mafai ai ona latou iloa o le a faafanoina lenei lalolagi ma ona taʻitaʻi. (1 Korinito 2:6; 1 Ioane 2:17) Ua iloa e i latou o lagolagoina le pule silisiliese a le Atua faapea e na o le pau lava le faamoemoe moni mo le fanau a tagata, o loo taatia atu lea i le fesoasoani ma le pulega a le Atua. (Sakaria 9:10) O lea, a o lē talitonu i latou o iai le atamai o lenei lalolagi i le Malo o le Atua, ma ē e lē mananao i lena pulega faalelagi, peitai o tagata o loo taʻitaʻiina e le atamai o le Atua latou te faia galuega e avatu ai aogā moni i o latou uso a tagata, i le sauniunia o i latou mo le ola e faavavau i le lalolagi fou ua folafolaina mai a Ieova.—Ioane 3:16; 2 Peteru 3:13.

‘Le Valea i Ē a Malaia’

10. (a) Ina ua faaliliuina Saulo o Taso, o le ā le galuega na ia faia, ma sa faapefea ona ia manatu i lenei galuega? (e) O le ā na lauiloa ai tagata Eleni, ae na faapefea ona silasila le Atua i lo latou atamamai?

¹⁰ O Saulo o Taso, o lē na taʻua o Paulo le aposetolo a Iesu Keriso, sa ia faia lenei galuega faasaoola. Po o se mea talafeagai le manatu faapea, ina ua faaliliuina e Iesu Keriso Saulo, pe sa Ia tofia ai ea o ia i se galuega valea? E leʻi faapena le manatu o Paulo. (Filipi 2:16) I lena taimi, sa avea ai tagata Eleni ma tagata aupito sili ona atamamai i le lalolagi. Sa latou gugutu mai i a latou faifilosofia taʻutaʻua ma tagata atamamai. E ui ina sa tautala Paulo i le gagana a Eleni, ae e leʻi mulimuli o ia i filosofia ma aʻoaʻoga faa-Eleni. Aiseā? Auā o lena atamai o lenei lalolagi, o le valea lea i le Atua.a Sa saili e Paulo le atamai o le Atua, lea na uunaia ai o ia e talaʻi atu le tala lelei mai lea fale i lea fale. Na faataatia e le Tagata Talaʻi aupito sili, o Iesu Keriso, se faaaʻoaʻoga, ma na ia faatonuina Paulo ina ia faia lea lava galuega.—Luka 4:43; Galuega 20:20, 21; 26:15-20; 1 Korinito 9:16.

11. O le ā na fai mai ai Paulo e uiga i lona tofiga e talaʻi, ma le atamai o lenei lalolagi?

¹¹ Ua faapea mai Paulo e uiga i lona tofiga e talaʻi: “Auā e lei auina mai aʻu e Keriso e papatiso, a ia folafola atu le tala lelei, e le o le poto i upu, ina nei faaleaogaina le satauro o Keriso. Auā o le mataupu i le satauro [o le taulaga togiola a Iesu], o le valea lea i e o malaia; a o le mana o le Atua ia te i tatou ua faaolaina. Auā ua tusia, Ou te faaumatia le poto o e popoto, ma ou faaleaogaina le atamai o e atamamai. Po o ifea le tagata poto? Po o ifea le tusiupu? Po o ifea le filifiligā o lenei lalolagi? E le ua avea ea e le Atua le poto o lenei lalolagi ma valea? Auā o le poto o le Atua, ina ua le iloa le Atua e le lalolagi i lo latou poto, ua finagalo ai le Atua ia faaolaina i le valea o le talaʻiga e ua faatuatua.”—1 Korinito 1:17-21.

12. O le ā ua faataunuuina e Ieova e ala i “le valea o le mea ua talaʻiina,” ma o ā uiga o le a faaalia e i latou o ē mananao “i le atamai mai lugā”?

¹² O le tulaga uigaese e pei ona vaaia ai, o i latou ia ua taʻua e le lalolagi e vālea, o i latou na ua faaaogāina e Ieova e avea ma ona tagata talaʻi. Ioe, e ala i le valea o le faiva a na tagata talaʻi, ua faaolaina ai e le Atua i latou o ē ua talitonu. Ua faatulaga e Ieova mea ina ia lē mafai ai e le au talaʻi o lenei “valea” ona viiviia i latou lava, ma ia lē mafai ai foi e isi tagata ona viiviia ē na latou iloa mai ai le tala lelei. Ua faia faapea ina ia aua ‘neʻi mitamita se tagata e toatasi i luma o le Atua.’ (1 Korinito 1:28-31; 3:6, 7) E moni, ua faia e le tagata talaʻi se vaega tāua, ae o le feau ua tofia atu ia te ia e talaʻi, o le a avea lena ma faaolataga o se tagata pe afai e talitonu o ia i lena feau. O i latou e mananao i “le atamai mai lugā” o le a lē ʻinoʻino i le feau a le tagata talaʻi ona e foliga mai e valea ma maulalo o ia, e sauāina, ma e alu atu mai lea fale i lea fale. Na i lo lea, o ē loto maulalo, o le a latou faaaloalo i se tagata e folafola atu le Malo, faapea o ia o se tagata talaʻi na tofia e Ieova ma o loo sau i le suafa o le Atua. O le a latou matuā faatāuaina le feau ua aumaia e le tagata talaʻi e ala i upu a lona gutu ma e ala i lomiga.—Iakopo 3:17; 1 Tesalonia 2:13.

13. (a) O le ā le vaaiga a tagata Iutaia ma tagata Eleni i le talaʻiga e uiga i le faasatauroina o Keriso? (e) Mai i ā vaega o tagata e leʻi toatele nisi na valaauina ai e avea ma soʻo o Iesu, ma aiseā?

¹³ I le faaauauina o lona talanoaina o ala o le Atua, ua faapea mai Paulo: “Auā o loo fai mai Iutaia i se faailoga, ma Eleni o loo saili i latou i le poto; a o i matou, ua matou talaʻi atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou. Auā o le valea o le Atua e sili lona atamai i tagata; o le mea vaivai foi a le Atua e sili lona malosi i tagata. Auā ua outou iloa lo outou valaauina, le au uso e; auā e le toatele o e popoto i la le tino, e le toatele faipule, e le toatele alii; a e peitai ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi.”—1 Korinito 1:22-27; faatusatusa i le Isaia 55:8, 9.

14. (a) Pe a fesiligia e uiga i ni o latou tusi faamaonia, o le ā le mea e faasino atu i ai e Molimau a Ieova? (e) Aiseā na musu ai Paulo e faafiafia tagata Eleni e ala i so o se faalialia o le atamai o le lalolagi?

¹⁴ Ina o iai Iesu i le lalolagi, na fesili atu ai tagata Iutaia mo se faailoga mai le lagi. (Mataio 12:38, 39; 16:1) Ae na musu Iesu e avatu i ai se faailoga. E faapena foi ona lē faalialia Molimau a Ieova i aso nei i le faailoa atu o ni faamaoniga tusia e fai ma faailoga. Na i lo lea, latou te faasino atu i lo latou tofiga e talaʻi le tala lelei, e pei ona faamauina i mau o le Tusi Paia e pei o le Isaia 61:1, 2; Mareko 13:10; ma le Faaaliga 22:17. Sa saili tagata Eleni anamua mo le atamai, o aʻoaʻoga maualuluga i mea a lenei lalolagi. A o aʻoaʻoina Paulo i lenei atamai o le lalolagi, sa musu o ia e faafiafiaina tagata Eleni e ala i lona fia faalialia o lena atamai. (Galuega 22:3) Sa tautala o ia ma tusitusi i le gagana lautele a tagata Eleni, na i lo o le gagana maotua a Eleni. Na taʻu atu e Paulo i tagata Korinito: “O aʻu nei foi, le au uso e, ou te lei alu atu ma le sili o le upu ma le poto, ina ua ou alu atu ia te outou i loʻu talaʻi atu ia te outou le mau a le Atua. . . . e lei sauni atu foi laʻu upu, ma laʻu talaʻiga i upu mālie o le poto o tagata, a e peitai o le faasino mai e le Agaga ma le mana; ina ia le i ai lo outou faatuatua i le poto o tagata, a o le mana o le Atua.”—1 Korinito 2:1-5.

15. O le ā ua faamanatu atu e Peteru i ē e faatauemu i le tala lelei, ma ua faapefea ona tali tutusa le tulaga i aso nei ma aso o Noa?

¹⁵ I nei aso e gata ai, ua faamanatu mai ai e le aposetolo o Peteru, i latou o ē faatauemu i le tala lelei e uiga i le lalolagi fou a le Atua o loo sau, ma le lalata tele mai o le iʻuga o lenei lalolagi e faapea, o le lalolagi i ona po o Noa “sa faaumatia . . . ina ua lofia i le vai.” (2 Peteru 3:3-7) I le fesagai ai ma lena iʻuga malaia, o le ā na faia e Noa? E toatele sa manatu ia te ia faapea ua na o se fau vaa. Ae ua faapea mai Peteru, ina ua aumaia e le Atua le Lolo i luga o lena lalolagi tuai, sa Ia “faasaoina . . . Noa lē talaʻi le amiotonu, o lona toavalu lea na faaolaina.” (2 Peteru 2:5) I lo latou atamai faalelalolagi, e lē taumatea sa faatauemu ai na tagata faalemataʻu i ona po a o leʻi oo i le Lolo, i le talaʻiga a Noa ma taʻua ai o ia faapea e valea, e lē moni mea na ia talaʻia, ma e lē aogā foi. I aso nei, o loo fesagai foi Kerisiano moni ma tulaga faapena, ona talu ai sa faatusa e Iesu lo tatou tupulaga i aso o Noa. Ae peitai e ui lava i le au faatauemu, ae o le talaʻiga o le tala lelei ua sili atu na i lo na o ni talanoaga. E pei lava o le talaʻiga na faia e Noa, o lona uiga o le faaolataga mo le tagata talaʻi ma i latou foi o ē faalogo ia te ia!—Mataio 24:37-39; 1 Timoteo 4:16.

‘Avea ma Ē Vālea ina ia Avea ma Ē Atamamai’

16. O le ā o le a tupu i le atamai o lenei lalolagi ia Amaketo, ma o ai o le a faasaoina atu i le lalolagi fou a le Atua?

¹⁶ Ua lē pine ona faaumatia uma lea e Ieova le Atua ia Amaketo “le poto o e popoto.” O le a ia faaleaogāina uma foi le “atamai o e atamamai” o ē ua valoia mai auala o le a aumai ai e la latou faiga fou o le lalolagi ni tulaga sili ona lelei mo tagata. O “le taua i le aso tele o le Atua e ona le malosi uma lava” o le a faatamaʻia ai finauga faaʻoleʻole uma, aʻoaʻoga faafilosofia, ma le atamai o lenei lalolagi. (1 Korinito 1:19; Faaaliga 16:14-16) O i latou o le a fasaoina i lena taua ma maua ai le ola e faavavau i le lalolagi fou a le Atua, ua na o i latou lava o ē usiusitai i le mea ua taʻua e lenei lalolagi e valea—ioe, o le tala lelei mamalu o le Malo o Ieova.

17. Ua faapefea ona avea Molimau a Ieova ma ē ‘valelea,’ ma o le ā ua maumauai le au talaʻi o le tala lelei a le Atua e faia?

¹⁷ O Molimau a Ieova, o loo taʻitaʻiina e lona agaga, e lē mamā i latou e talaʻi atu le mea ua taʻua e le lalolagi e valea. Na i lo o le taumafai e avea o ni ē atamamai o le lalolagi, ua avea i latou ma e ‘vālelea.’ E faapefea? E ala i le faia o le galuega talaʻi o le Malo ina ia atamamai ai i latou, e pei ona tusia e Paulo: “Afai ua ia te outou se tasi o manatu e poto [“atamai,” NW] ia i lenei lalolagi, ia avea ia ma vale, ina ia poto [atamai] ai o ia.” (1 Korinito 3:18-20) Ua iloa e le au talaʻi o le tala lelei a Ieova le tāua o la latou feau faasaoola, ma o le a faaauau pea ona lē mapu i latou i le talaʻiina atu, seia oo i le iʻuga o lenei lalolagi ma lona atamai i le taua o Amaketo. O le a lē pine ae taʻumamāina e Ieova le Atua lana pule silisiliese ma aumaia ai le ola e faavavau ia i latou uma ua talitonu i le taimi nei ma gaoioi ai e tusa ma “le valea o le mea ua talaʻiina.”

[Faaopoopoga i lalo]

O ā Au Tali?

◻ O ā ituaiga o atamai e lua o loo iai?

◻ O le ā le pona autū o le atamai o le lalolagi?

◻ Aiseā ua avea ai le talaʻiina o le tala lelei o se mea aupito sili ona aogā e faia?

◻ O le ā o le a lē pine ae tupu i le atamai uma o le lalolagi?

◻ Aiseā e lē mamā ai Molimau a Ieova e talaʻi le mea ua taʻua e le lalolagi e valea?

[Ata i le itulau 41]

Sa saili tagata Eleni i atamai faalelalolagi ae faapea o le talaʻiga a Paulo o se mea valea