“Ua ma Maua le Mesia”!

“Ua . . . uluai maua [e Aneterea] lona lava uso o Simona, ona fai atu lea ia te ia, Ua ma maua le Mesia, (o lona uiga o le Keriso.)”—IOANE 1:41.

1. O le ā na molimau i ai Ioane le Papatiso e uiga ia Iesu le Nasareta, ma o le ā le faaiʻuga na faia e Aneterea e uiga ia te ia?

SA UMI se taimi o vaavaai totoʻa Aneterea i le tagata Iutaia na taʻua o Iesu le Nasareta. E leʻi foliga mai o ia o se tupu, po o se tagata atamai, po o se aʻoaʻo (rapi). E leʻi ofu o ia i ni ofu mamalu tautupu, e leʻi sinā ona lauao, e lē galemulemu ona lima e lē paʻepaʻe foi lona paʻu. Sa avea Iesu ma taulealea—e tusa ma le 30 tausaga le matua—e mafiafia ma malō paʻu o ona lima ma lona paʻu lanu enaena malosi o foliga o se tagata e galue malosi i ona lima. O lea, atonu sa leʻi maofa ai Aneterea i le iloaina o ia o se kamuta. Ae peitai, na faapea mai Ioane le Papatiso e uiga i lenei tagata: “Faauta i le Tamai mamoe a le Atua.” I le aso muamua atu, na fai ai e Ioane se faamatalaga sa sili ona maofa ai: “O ia lava le Alo o le Atua.” Pe moni lenei mea? Sa faaalu e Aneterea sina taimi i lena aso e faalogologo ai ia Iesu. Tatou te lē iloa po o le ā na fai atu ai Iesu; tatou te lē iloa foi o ana upu na suia ai le olaga o Aneterea. Sa ia faanatinati atu e saili i lona uso o Simona, ma alaga atu, “Ua ma maua le Mesia”!—Ioane 1:34-41.

2. Aiseā e tāua ai le iloiloina o faamaoniga e iloa ai po o Iesu o le Mesia na folafolaina?

² O Aneterea ma Simona (o lē na toe faaigoa e Iesu ia Peteru) na avea mulimuli ane ma aposetolo o Iesu. Ina ua mavae le sili atu i le lua tausaga o avea ma ona soʻo, ona faapea atu lea o Peteru ia Iesu: “O oe o le Keriso [le Mesia], o le Alo o le Atua soifua.” (Mataio 16:16) I le faaiʻuga, sa faamaonia e aposetolo ma soʻo faamaoni le naunau ina ia lamatia o latou ola ona o lena talitonuga. I aso nei, e faitau miliona tagata loto faamaoni ua faapena foi ona tuutoina atu i latou. Ae i luga o ā faamaoniga? I lo mea uma, o faamaoniga, ua faia ai se eseesega i le va o le faatuatua ma le talitonugofie. (Tagai i le Eperu 11:1.) O lea, seʻi o tatou talanoaina ni faamaoniga masani se tolu e faamaonia ai e moni lava o Iesu o le Mesia.

Le Gafa o Iesu

3. O le ā ua auiliili mai e Evagelia a Mataio ma Luka e uiga i le gafa o Iesu?

³ O le gafa o Iesu o le uluai faamaoniga lena ua aumaia i Tusitusiga Kerisiano Eleni e lagolagoina ai lona tulaga faa-Mesia. Na valoia e le Tusi Paia faapea o le a ui mai le Mesia i le gafa o le aiga o le Tupu o Tavita. (Salamo 132:11, 12; Isaia 11:1, 10) O loo amata le Evagelia a Mataio e faapea: “O le tusi i le gafa o Iesu Keriso, o le atalii o Tavita, o le atalii ia o Aperaamo.” Ua lagolagoina e Mataio lenei faamatalaga malosi e ala i le toe suʻe i tua i le tupuga mai o Iesu i le gafa o lona tamā fai, o Iosefa. (Mataio 1:1-16) Ua toe suʻe i tua e le Evagelia a Luka le gafa o Iesu mai lona tinā faaletino o Maria, i tuā lava ia Tavita ma Aperaamo e oo ia Atamu. (Luka 3:23-38)a I lea, ua matuā faamaumauina ai e tusitala o le Evagelia faamaoniga o a la faamatalaga faapea sa avea Iesu ma suli o Tavita, i le uiga faaletulafono ma le tulaga masani.

4, 5. (a) Pe sa fesiligia ea e tagata sa tupulaga ma Iesu lona tupuga mai ia Tavita, ma aiseā e matua tāua ai lenei mea? (e) Ua faapefea ona lagolagoina le gafa o Iesu e molimau e lē faale-Tusi Paia?

⁴ E oo lava i tagata aupito sili ona tetee e lē mananao e talitonu i le tulaga faa-Mesia o Iesu, e lē mafai ona latou faafitia le avea o Iesu ma atalii o Tavita. Aiseā? O loo iai mafuaaga e lua. Muamua, o lenei faamatalaga sa faalauaitele i Ierusalema mo le faitau sefulu o tausaga a o leʻi faaumatia le aai i le 70 T.A. (Faatusatusa i le Mataio 21:9; Galuega 4:27; 5:27, 28.) Afai sa sese lea faamatalaga, so o se tasi lava la o i latou o ē tetee ia Iesu—ma e toatele i latou—sa ono mafai ona faamaonia le sese o Iesu i le na o le iloiloina o lona gafa i tala o gafa o loo i fale mataaga mo tagata lautele.b Ae e leai se faamaumauga i talafaasolopito e uiga i so o se tasi na ia luʻia le tupuga mai o Iesu mai le Tupu o Tavita. E mautinoa, sa leai se isi na tetee i lea faamatalaga. E lē taumatea na kopi saʻo mai lava e Mataio ma Luka na o igoa tatau ina ia faamaonia ai a la faamatalaga mai i tusi mo gafa o le atunuu.

⁵ O lona lua, ua faamautinoa mai e faamatalaga e lē faale-Tusi Paia le talia e le lautele o le gafa o Iesu. Mo se faataʻitaʻiga, ua faamaumauina i le Talmud se rapi sa iai i lona fa o senituri faapea na ia matuā faitioina mamafa Maria, le tinā o Iesu ona o le ‘faia o le talitane ma tagata kamuta’; ae ua finau mai lena lava faamatalaga e faapea “o ia [Maria] na tupuga mai ai aloalii ma tupu.” O se faaaʻoaʻoga na muamua atu, o se tusitala o le senituri lona lua o Hegesippus. Na ia faamatalaina faapea, ina ua manao le Kaisara Roma o Domitian e faaumatia so o se tagata lava e tupuga mai ia Tavita, sa faailoa atu loa e nisi o fili o Kerisiano anamua atalii o le atalii o Iuta, le ʻafa uso o Iesu, faapea e “sau mai le aiga o Tavita.” Afai sa lauiloa Iuta e tupuga mai ia Tavita, pe sa lē faapena foi la Iesu? E mautinoa lava sa faapena!—Kalatia 1:19; Iuta 1.

Valoaga e Uiga i le Mesia

6. O le ā le tele o valoaga e faatatau i le Mesia o i Tusitusiga Paia Eperu?

⁶ O se isi faamaoniga e iloa ai o Iesu o le Mesia, o le faataunuuga lea o valoaga. E tele anoanoai valoaga e faatatau i le Mesia o loo i Tusitusiga Paia Eperu. I lana tusi The Life and Times of Jesus the Messiah, na tuufaatasia ai e Alfred Edersheim ni fuaitau e 456 i Tusi Paia Eperu na sa manatu i ai rapi o aso anamua faapea o ni faamatalaga e uiga i le Mesia. Ae peitai, sa tele lava manatu sese sa iai i na aʻoaʻo tulafono e uiga i le Mesia; o le tele lava o faamatalaga sa latou faasino mai, e matuā lē faatatau lava i le Mesia. Ae o loo tumau pea ona iai ni nai faitau luasefulu o valoaga e iloa ai Iesu o le Mesia.—Faatusatusa i le Faaaliga 19:10.

7. O ā nisi o valoaga na faataunuuina e Iesu i le vaitaimi na soifua ai o ia i le lalolagi?

⁷ E aofia ai i na valoaga: le aai na ia fanau ai (Mika 5:2; Luka 2:4-11); le mala o le anoanoai o tamaiti na fasiotia ina ua mavae lona fanau mai (Ieremia 31:15; Mataio 2:16-18); e valaauina o ia nai Aikupito (Hosea 11:1; Mataio 2:15); o le a auaufaatasi tupu o le lalolagi e fasioti ia te ia (Salamo 2:1, 2; Galuega 4:25-28); o lona faalataina i tupe siliva e 30 (Sakaria 11:12; Mataio 26:15); e oo lava i le auala na maliu ai o ia.—Salamo 22:16, faamatalaga i lalo; Ioane 19:18, 23; 20:25, 27.c

Sa Valoia Lona Afio Mai

8. (a) O le ā le valoaga ua faamautinoa mai ai le taimi o le a afio mai ai le Mesia? (e) O ā vala autū e lua e tatau ona iloa ina ia malamalama ai i lenei valoaga?

⁸ Seʻi o tatou tulimataʻia na o se valoaga e tasi. I le Tanielu 9:25, na taʻu atu ai i tagata Iutaia le taimi o le a afio mai ai le Mesia. Ua faitauina faapea: “Ia e iloa foi ma e manatunatu, e afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii [“Taʻitaʻi,” NW], e fitu vaiasosa ma vaiasosa e onogafulu ma le lua.” I le uluai tepa i lenei valoaga, e foliga mai e lua ni ona uiga. Ae i se uiga lautele o loo fai mai ai ia i tatou ina ia saili atu e tau o ni faamatalaga se lua: o le taimi e amata ai ma le umi o le vaitaimi. O se faataʻitaʻiga, afai e iai sau faafanua o faasino atu ai ia te oe le mea o loo tanu ai se oa pe tusa ma le 50 pou i le itu i sasae o le vaiʻeli i le paka o loo i le taulaga,” atonu e te matuā iso i lenei faasinoga—ae maise lava pe afai e te lē iloa po o fea e tu ai lenei vaiʻeli, ma po o le ā foi le umi o se ‘pou.’ Pe e te lē muai sailia ea na mea moni e lua ina ia mafai ai ona e iloa le mea o tanu ai le oa? Ioe, e faapena tonu lava le valoaga a Tanielu, ma o lea tatou te fia iloaina se taimi amata ma fuaina ai le vaitaimi o loo mulimuli mai.

9, 10. (a) O le ā le taimi tonu na amata ai vaiaso e 69 pe a fuaina? (e) O le ā le umi o vaiasosa e 69, ma e mafai faapefea ona tatou iloa lenei mea?

⁹ Muamua, tatou te manaomia le taimi na amataina ai, le aso na ‘oo atu ai le poloaiga ina ia toe faia ma atiina aʻe Ierusalema.’ Ona sosoo ai lea ma lo tatou fia iloa o le umi mai lena taimi e amata ai, atoa ma le umi o lenei taimi e 69 (7 faaopoopo 62) vaiasosa. E lē faigata ona maua nei faamatalaga. Ua taʻu manino mai lava e Neemia ia i tatou faapea na oo atu le poloaiga ina ia toe faia pa o Ierusalema, ma ia toe faafoisia le aai, i le “lua o sefulu o tausaga o Aretaseta le tupu.” (Neemia 2:1, 5, 7, 8) Ua maua ai la la tatou taimi amata, o le 455 T.L.M.d

¹⁰ O lea la, e tusa ai ma nei vaiasosa e 69, faamata o ni vaiasosa moni e taʻi fitu aso i le vaiaso? E leai, auā e leʻi aliaʻi mai le Mesia i le sili atu i se tausaga ina ua mavae le 455 T.L.M. I lea, o le tele lava o tagata aʻoga o le Tusi Paia ma le tele o faaliliuga (e aofia ai le Tanakh faa-Iutaia i se faamatalaga i lalo e uiga i lenei mau), e ioe faapea o nei vaiasosa, “o tausaga.” O lenei manatu faapea e tusa le ‘vaiaso ma tausaga e fitu,’ po o le fitu tausaga, sa masani lelei ai lava tagata Iutaia anamua. E pei ona latou tausia o se sapati faalevaiaso i aso uma e taʻi fitu, sa faapena foi ona latou tausia se sapati faaletausaga i tausaga uma e taʻi fitu. (Esoto 20:8-11; 23:10, 11) O lea, o le 69 vaiasosa po o tausaga, e tutusa lea ma le 69 tausaga faatele i le 7 tausaga, e tutusa ma le 483 tausaga. Ua toe nei la o le faitauina. E amata mai i le 455 T.L.M. ona faitau le 483 tausaga, ma tatou oo atu ai i le tausaga e 29 T.A.—o le tausaga tonu lava lena na papatisoina ai Iesu ma avea ma ma·shiʹach, le Mesia!—Tagai i “Vaiasosa e Fitusefulu,” i le Insight on the Scriptures, Tusi 2, itulau 899.

11. E ono mafai faapefea ona tatou tali atu ia i latou o ē o faapea mai ua na o se auala faaonaponei lena e faamatalaina ai le valoaga a Tanielu?

¹¹ Atonu o le a tetee nisi faapea ua na o se auala faaonaponei lenei e faamatala ai le valoaga ina ia fetaui ma talafaasolopito. Afai o lena, aiseā la na faatalitalia ai e tagata i aso o Iesu le aliaʻi mai o le Mesia i lena taimi? O le tusitala Kerisiano o talafaasolopito o Luka, o tusitala o talafaasolopito mai Roma o Tacitus ma Suetonius, le tusitala o talafaasolopito Iutaia o Josephus, ma le fai filosofia mai Iutaia o Philo na soifua e latalata atu i lena taimi, na latou molimau uma lava i lenei tulaga na faatalitalia ai le Mesia. (Luka 3:15) Ua tausisi pea nisi tagata popoto i aso nei faapea, ona o mafatiaga mai le pulega a le malo o Roma na moomoo ai tagata Iutaia mo so latou pule, ma faatalitalia ai le Mesia i na aso. Aiseā la, na faatalitalia ai e tagata Iutaia le Mesia i lena taimi na i lo o le taimi o sauāga ogoogo na faia e tagata Eleni i senituri muamua atu? Aiseā na fai mai ai Tacitus faapea o ni “valoaga uigaese” na mafua ai ona faatalitalia e tagata Iutaia ni taʻitaʻi sili ona malolosi e ō mai mai i Iutaia ma “ia maua le pule aoao i le emepaea”? I lana tusi A History of Messianic Speculation in Israel, ua faailoa mai ai e Abba Hillel Silver e faapea, “o le Mesia, sa faatalitalia i le kuata lona lua o le uluai senituri T.A.,” e lē ona o sauāga a Roma, ae ona o le “gafa lauiloa o lena vaitaimi,” sa maua sona vaega mai le tusi a Tanielu.

Faailoaga Mai Lugā

12. Na faapefea ona faailoaina mai e Ieova faapea o Iesu o le Mesia?

¹² O lona tolu o faamaoniga o le tulaga faa-Mesia o Iesu, o le faamaoniga a le Atua lava ia. E tusa ai ma le Luka 3:21, 22, ina ua uma ona papatisoina Iesu, ona faauuina loa lea o ia i le mana aupito sili ona malosi i le vateatea uma, le agaga paia o Ieova le Atua lava ia. Ma o lona lava siufofoga, na faailoa mai ai e Ieova faapea ua ia faamaonia lona Atalii o Iesu. I isi aso mataʻina e lua, na fetalai tuusaʻo ifo ai Ieova mai le lagi ia Iesu, e faaalia ai Lana faamaoniga: i se tasi taimi i luma o aposetolo e toatolu o Iesu, ma le isi taimi, i luma o le motu o tagata o ē na matamata ane. (Mataio 17:1-5; Ioane 12:28, 29) E lē gata i lea, na aauina ifo agelu mai le lagi e faamautinoa mai le tulaga o Iesu o ia o le Keriso, po o le Mesia.—Luka 2:10, 11.

13, 14. Na faaalia faapefea e Ieova lana faamaoniga o le avea o Iesu ma Mesia?

¹³ Na faaalia e Ieova lona faamaonia o lē na ia faauuina, e ala i le faamalosia o ia e faataunuuina galuega mamana. Mo se faaaʻoaʻoga, na fetalai Iesu i valoaga na muai auiliili mai i talafaasolopito—o nisi o na tala ua oo mai lava i o tatou aso.e Sa ia faia foi vavega, e pei o le fāgaina o le motu o tagata na fia aai ma faamalōlō i maʻi. Na oo lava foi ina faatutūina e ia o ē na oti. Pe sa na ona fatuina ea e ona soʻo o ni tala e uiga i nei galuega mamana ina ua uma ona latou molimauina mea moni? Ia, na faia e Iesu le tele o ana vavega i luma o mata o molimau, i nisi taimi sa iai le faitauafe o tagata. E oo lava i fili o Iesu sa lē mafai ona latou faafitia lona faia moni lava o nei mea. (Mareko 6:2; Ioane 11:47) E lē gata foi i lea, afai sa manatu soʻo o Iesu e fatuina aʻe na tala, o lea, aiseā na latou faamatala saʻo mai ai e oo lava i mea na latou lē taulau ai? Pe na latou mananao moni ea e oti mo se talitonuga e faavae i na o ni tala faafagogo na fatuina e i latou lava? E leai. O vavega a Iesu o ni mea moni i talafaasolopito.

¹⁴ E tele mea sa aafia ai i le faamaoniga a le Atua e uiga i le avea o Iesu ma Mesia. E ala i le agaga paia sa ia faamautinoa ai ua tusia ma faamauina faamaoniga o le avea o Iesu ma Mesia, ma avea o se vaega o le tusi ua aupito sili ona faaliliuina i isi gagana ma ua sili foi ona faasalalauina atu i talafaasolopito uma lava.

Aiseā na Lē Talia ai e Tagata Iutaia Iesu?

15. (a) O le ā le tele o faamaoniga e iloa ai le avea o ia ma Mesia? (e) O ā faamoemoega o tagata Iutaia na taʻitaʻiina atu ai le toatele e teena Iesu o ia o le Mesia?

¹⁵ O lea la, i nei vaega uma e tolu o faamaoniga, ua aofia ai ma le faitau selau o mea moni o le olaga e iloa ai o Iesu o le Mesia. Po ua lava ea na mea? Seʻi tau ina manatu pe a talosaga atu mo se laisene ave taavale po o se pepa e mafai ai ona e faia ni aitalafu, ae taʻu atu ia te oe faapea e lē lava ni faamaoniga se tolu—e tatau ona e aumaia ni faamaoniga e faitau selau. Pagā le lē magafagafa! E mautinoa lava la, ua lava ma totoe faamaoniga o Iesu o loo i le Tusi Paia. Ae aiseā la na faafitia ai e tagata o Iesu lava ia, nei faamaoniga uma e faatatau ia te ia faapea o ia o le Mesia? Auā o faamaoniga, e ui lava ina tāua mo le faatuatua moni, ae e lē faamaonia ai le faatuatua. E faanoanoa lava, ona e toatele tagata e talitonu i mea e mananao lava latou e talitonu i ai, e ui lava i le anoanoai o faamaoniga. E faatatau i le Mesia, e toatele tagata Iutaia sa iai ni o latou manatu maʻoti e uiga i mea na latou mananao ai. Sa latou mananao i se Mesia faapolotiki, o lē o le a na faaiʻuina faiga sauā a Roma ma toe faafoisia ai Isaraelu i se mamalu faaletino e pei ona iai i ona po o Solomona. E faapefea la ona latou talia lenei atalii loto maulalo o se kamuta, lenei tagata Nasareta e lē fiafia i faiga faapolotiki po o oa? E faapefea ona avea o ia ma Mesia, ae maise lava na tigaina o ia ma maliu matagā i luga o le laau faaoosala?

16. Aiseā na tatau ai i soʻo o Iesu ona suia o latou lava faamoemoega e uiga i le Mesia?

¹⁶ Sa lē fiafia soʻo o Iesu lava ia ona o lona maliu. Ina ua mavae lona toetu ofoofogia, sa latou faamoemoe ma le mautinoa faapea o le a ia ‘toe faafoisia le malo ia Isaraelu’ i le taimi lava lena. (Galuega 1:6) Ae latou te leʻi teena ai Iesu e avea ma Mesia ona e leʻi taunuu lenei faamoemoega totino. Sa faaalia lo latou faatuatua ia te ia e faavae i le tele o faamaoniga na ia i latou, ma le faatuputeleina faasolosolo o lo latou malamalama; na manino lelei ai mea sa lilo. Sa oo ina latou iloa faapea e lē mafai e le Mesia ona faataunuuina mea uma na valoia e uiga ia te ia i se taimi puupuu, a o avea ma tagata i lenei lalolagi. Ioe, na tautala se tasi valoaga e uiga i lona afio mai i se tulaga maulalo, o loo tietie i le tamai asini, ae o le isi sa tautala i lona afio mai i ao ma le mamalu tele! E mafai faapefea ona moni nei valoaga uma? E mautinoa o le a afio faalua mai o ia.—Tanielu 7:13; Sakaria 9:9.

Le Mafuaaga na Maliu ai le Mesia

17. Na faamanino mai faapefea e le valoaga a Tanielu faapea e tatau ona maliu le Mesia, ma o le ā le mafuaaga e ao ai ona maliu o ia?

¹⁷ E lē gata i lea, o valoaga e faatatau i le Mesia ua faamanino mai ai faapea, e ao ona maliu le Mesia. Mo se faataʻitaʻiga, o le valoaga lava lena na valoia ai le taimi e afio mai ai le Mesia, o loo valoia i le isi mau lena e sosoo ai: “A mavae vaiasosa e onogafulu ma le lua, [lea e mulimuli mai i vaiasosa e fitu] ona fasiotia ai lea o le Mesia.” (Tanielu 9:26) O le upu Eperu ka·rathʹ lea e faaaogāina i inei mo le “fasiotia” e tutusa lava ma le upu sa faaaogā mo le faasalaga oti i lalo o le Tulafono Faa-Mose. E mautinoa lava la, e tatau ona maliu le Mesia. Aiseā? Ua aumai e le Tanielu 9 fuaiupu e 24 ia i tatou le tali: “E faaiu ai agasala; e fai ai foi le togiola mo agasala, ma faaooina mai ai le amiotonu e faavavau.” Sa iloa lelei lava e tagata Iutaia faapea e na o se taulaga lava, le oti e mafai ona togiola ai agasala.—Levitiko 17:11; faatusatusa i le Eperu 9:22.

18. (a) Ua faaalia faapefea i le Isaia mataupu e 53 faapea e tatau ona puapuagatia ma maliu le Mesia? (e) O le ā le mea e foliga mai e lē fetaui ua lagā e lenei valoaga?

¹⁸ O loo tautala le Isaia mataupu e 53 e uiga i le Mesia e avea o se Auauna faapitoa a Ieova o lē o le a puapuagatia ma maliu e ufiufi ai agasala a isi. Ua faapea mai le fuaiupu e 5: “Ua manua o ia ona o a tatou solitulafono, ua momomo o ia ona o a tatou amio leaga.” Ina ua uma ona faailoa mai e le valoaga lava lea ia i tatou faapea e tatau ona fasiotia o lenei Mesia e avea “o se taulaga mo agasala,” ona faailoa mai ai foi lea e faapea o Ia lava lenei “o le a faalevalevaina ona aso, o le finagalo foi o Ieova e manuia lea ia te ia.” (Fuaiupu 10) Po ua lē fetaui ea lena manatu? E mafai faapefea ona maliu o le Mesia, ae toe “faalevalevaina ona aso”? E mafai faapefea ona ofoina atu o ia e fai ma taulaga ma mulimuli ane ai ona faia ‘le mea e fiafia i ai le finagalo o Ieova’? E mafai faapefea ona maliu moni o ia, ma tumau ai i le oti e aunoa ma le faataunuuina o valoaga aupito sili ona tāua e faatatau ia te ia, faapea o le a pule o ia e faavavau e fai ma Tupu, ma aumaia le filemu ma le fiafia i le lalolagi aoao?—Isaia 9:6, 7.

19. Ua faapefea i le toe faatūina o Iesu ona faaleleia ai valoaga na foliga mai e feteenai e uiga i le Mesia?

¹⁹ O lenei manatu e foliga mai e lē fetaui, sa foia i se vavega mataʻina e tasi. Na toe faatūina Iesu. E faitau afe tagata Iutaia loto faamaoni na molimau vaai tino i lenei mea moni ofoofogia na tupu. (1 Korinito 15:6) Na tusi mulimuli ane le aposetolo o Paulo e faapea: “O ia [Iesu Keriso] na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau, o loo faatalitali atu ai pea, seia avea i latou o e fai o ia mo latou fili ma mea e tu ai ona aao.” (Eperu 10:10, 12, 13) Ioe, ina ua uma ona toe faatūina o ia i le ola faalelagi, ma ina ua uma se vaitaimi na “faatalitali” ai, ona mulimuli ane lea faanofotupuina o ia e avea ma Tupu, ma gaoioi ai loa faasaga i fili o lona Tamā, o Ieova. I lona tulaga e avea o se Tupu faalelagi, na faaaafia ai e le Mesia o Iesu, olaga o tagata uma o loo ola i le taimi nei. I le ā le auala? O le a talanoaina i le isi a tatou mataupu o sosoo mai lenei mea.

[Faaopoopoga i lalo]

E Faapefea ona E Tali?

◻ Aiseā e suesue ai faamaoniga e iloa ai po o Iesu o le Mesia folafolaina?

◻ Ua faapefea ona lagolagoina e le gafa o Iesu lona tulaga faa-Mesia?

◻ Ua fesoasoani faapefea valoaga e faamaonia ai o Iesu o le Mesia?

◻ I ā auala na faailoa totino mai ai e Ieova Iesu o le Mesia?

◻ Aiseā na teena ai e le toatele o tagata Iutaia Iesu o le Mesia, ma aiseā e lē aogā ai na mafuaaga?

[Ata i le itulau 46]

Ua saunia e vavega taitasi mai le tele o vavega a Iesu se faamaoniga atili o lona tulaga faa-Mesia