Le Faatulagaga Alofa a Ieova i Aiga
“O le mea lea ou te tootuli ai i le Tamā . . . o ia ua faaigoaina ai le aiga uma o i le lagi atoa ma le lalolagi.”—EFESO 3:14, 15.
1, 2. (a) O le ā le fuafuaga na foafoaina ai e Ieova le aiga? (e) O le ā le vaega a aiga i aso nei i faatulagaga a Ieova?
O IEOVA na foafoaina le aiga. E ala i le aiga, na ia faia ai mea e sili atu na i lo o le na ona faamalieina ai o le manaoga faaletagata mo se aumea, se lagolagosua, po o se faalogona vavalalata. (Kenese 2:18) Na avea le aiga ma auala e faataunuuina ai le fuafuaga mamalu a le Atua ina ia faatumu le lalolagi. Sa ia taʻu atu i le uluai ulugalii faaipoipo e faapea: “Ia fanafanau ia, ma ia uluola, ma ia tumu ai le lalolagi, ia faatoilalo i ai.” (Kenese 1:28) O le siomaga mafana ma mea e tausia ai le aiga, o le a faamaonia le aogā mo le anoanoai o le a fananau mai ia Atamu ma Eva ma a la fanau
2 Ae peitai, na filifilia e lena uluai ulugalii le auala o le lē usiusitai—faatasi ma ni iʻuga e faafanoina ai mo i laua ma a la fanau. (Roma 5:12) I lea, ua see ese ai le olaga faaleaiga i aso nei mai le tulaga na finagalo ai le Atua ia iai. Peitai, o loo tumau pea ona iai le aiga i se tulaga tāua i le faatulagaga a Ieova, e avea ma vaega autū o le sosaiete faa-Kerisiano. Ae e lē faapea ai ua lē talisapaia le galuega lelei ua faia e le toatele o Kerisiano e leʻi faaipoipo ia o loo tatou faatasi. Na i lo lea, tatou te amanaia le sao tele ua faia e aiga mo le lelei faaleagaga o le faalapotopotoga Kerisiano o se vaega atoa. E faia aʻe i aiga malolosi ni faapotopotoga malolosi. E mafai faapefea la ona malolosi lou aiga i le feagai ai ma omiga i aso nei? Ina ia taliina lena fesili, seʻi tatou iloiloina po o ā fa a le Tusi Paia e faatatau i le faatulagaga faaleaiga.
Le Aiga i Taimi o le Tusi Paia
3. O ā vaega sa faia e le tane ma le avā i aiga o tamā faatuatua?
3 Na teena uma ma le lē fiafia e Atamu ma Eva le faatulagaga a le Atua e uiga i le tulaga ulu. Ae o tagata faatuatua anamua e pei o Noa, Aperaamo, Isaako, ma Iakopo na latou faatinoina saʻo o latou tulaga, o ni ulu o aiga. (Eperu 7:4) O le aiga o se tamā faatuatua, sa pei o se pulega itiiti, e avea le tamā ma taʻitaʻi faalelotu, o se faiaʻoga, ma o se faamasino. (Kenese 8:20; 18:19) Sa faia foi e avā se vaega tāua, e auauna ai e lē pei o ni pologa, ae o ni pule lagolago i le aiga.
4. Na faapefea ona suia le olaga faaleaiga i le Tulafono faa-Mose, ae o le ā le vaega na faaauau pea ona faia e mātua?
4 Ina ua avea Isaraelu ma nuu tele i le 1513 T.L.M., sa avea le tulafono faaleaiga o se lagolagosua i le Tulafono faalemalo lea na tuuina atu e ala ia Mose. (Esoto 24:3-8) O le pule e filifili ai mataupu e faatatau i le ola ma le oti, sa tuuina atu i lena taimi i faamasino tofia. (Esoto 18:13-26) O ositaulaga o le ituaiga o Levi sa gafa ma itu tau i le osia o taulaga mo le tapuaiga. (Levitiko 1:2-5) Ae peitai, sa faaauau pea e le tamā ona faia se vaega tāua. Sa apoapoai atu Mose i tamā: “Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.” (Teuteronome 6:6, 7) E matuā telē le taaʻiga na faia e tinā. Ua poloaiina talavou e le Faataoto 1:8: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā.” Ioe, i le faatulagaga o le pule a lana tane, sa mafai ai e se avā Eperu ona faia—ma faamalosia—le tulafono faaleaiga. Sa tatau ona faaaloalogia o ia e lana fanau e tusa lava po ua loomatua o ia.—Faataoto 23:22.
5. Na faamatala mai faapefea e le Tulafono faa-Mose le tulaga o fanau i totonu o le faatulagaga faaleaiga?
5 Sa faamatala manino mai foi e le Tulafono a le Atua le tulaga o fanau i totonu o le aiga. Na faapea mai le Teuteronome 5:16: “Ia e ava i lou tamā ma lou tinā, pei ona poloai mai ai o Ieova lou Atua ia te oe, ina ia faalevaleva ai ou aso, ina ia manuia ai foi oe i le nuu o le a foaiina mai e Ieova lou Atua ia te oe.” O le lē faaaloalo o se tasi i ona mātua, o se tetee sili ona matuiā lena i le Tulafono faa-Mose. (Esoto 21:15, 17) “Ai se tasi na te fetuu i lona tamā po o lona tinā,” fai mai le Tulafono, “e fasiotia lava o ia.” (Levitiko 20:9) O le fouvale o se tasi i ona mātua sa tutusa lava lea ma le fouvale i le Atua.
Le Vaega a Tane Kerisiano
6, 7. Aiseā na foliga mai ai o se suiga tele i le au faitau a Paulo o le uluai senituri, ana upu i le Efeso 5:23-29?
6 Ua saunia e le Faa-Kerisiano le tele o faamatalaga e uiga i le faatulagaga faaleaiga, ae maise lava le vaega a le tane. I fafo atu o le faapotopotoga Kerisiano, sa masani i tane o le uluai senituri ona faia ni faiga leaga ma le tetee i a latou avā. Sa teena aiā faavae a fafine ma le lē faaaloalo. Ua taʻua e le tusi The Expositor’s Bible e faapea: “Na faia e se tagata aʻoaʻoina Eleni se avā ina ia maua ai ni fanau. Sa lē mafaia e aiā a se avā ona taofia ai le tane mai ona faanaunauga mo feusuaiga. Sa leai se alofa i le feagaiga o le faaipoipoga. . . . Sa leai ni aiā a le fafine pologa. O lona tino sa pule ai lava lana tane.”
7 I siomaga faapena, na tusia ai e Paulo upu o loo i le Efeso 5:23-29: “Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino. . . . O outou tane, ia outou alolofa atu [pea] i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui; . . . O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai.” Sa pei o se mea fou i le au faitau o le uluai senituri nei upu. Fai mai le The Expositor’s Bible: “E leai lava se mea i le Faa-Kerisiano na foliga mai sa sili ona fou ma maʻoti, pe a faatusatusa atu i amioga iʻuvale i lena taimi, na i lo o le manatu faa-Kerisiano i le faaipoipoga. . . . Na tatalaina ai [e lena mea] se vaitaimi fou mo tagata.”
8, 9. O ā uiga lē lelei e faia i fafine, na masani ai tamaloloa, ma aiseā e tāua ai mo tane Kerisiano ona teena na manatu?
8 E lē o suia le fautuaga a le Tusi Paia mo tane i aso nei. E ui lava i talanoaga uma ua faia e fafine mo le saolotoga o fafine, ae o loo tumau pea ona manatu tamaloloa i fafine faapea ua na o ni mea mo le faamalieina o faanaunauga mo feusuaiga. O le talitonu i le tala fatu faapea e masani ona olioli fafine pe a pulea, taofiofia, po o le soona fai, ua faataumaoi ai e le toatele o tane a latou lava avā i le itu faaletino ma faalogona ootia. Pagā se lē alofa o se tane Kerisiano pe a pulea e mafaufauga faalelalolagi ma faataumaoi ai i lana avā! Na faapea mai se tasi fafine Kerisiano: “O laʻu tane o se auauna o le faiva, ma sa ia faia foi ni lauga lautele.” Peitai, ua ia faaalia, “O aʻu o se tasi o avā e fasi soo.” E manino lava, o na gaoioiga sa lē ōgatasi ma le faatulagaga a le Atua. O le mea na faia e lenei tamaloa e seāseā tupu; sa manaomia ona ia sailia se fesoasoani e foia ai lona loto ita pe afai sa ia faamoemoe ina ia maua le finagalo malie o le Atua.—Kalatia 5:19-21.
9 Ua poloaiina tane e le Atua ina ia alolofa atu i a latou avā e faapei o o latou lava tino. O le musu e faia faapea, o le fouvale lena i le faatulagaga a le Atua ma e mafai ona faavaivaia ai le faiā a se tasi ma le Atua. O loo manino lava upu a le aposetolo o Peteru e faapea: “Ia faapea outou tane, ia nonofo faatasi ma i latou [a outou avā] ma le poto, ia ava i le avā, auā o le ipu ia ua sili ona vaivai, . . . neʻi faalavelaveina a outou tatalo.” (1 Peteru 3:7) O le soona faia e se tasi o lana avā, o le a faaleagaina ai foi le tulaga faaleagaga o le avā ma le tulaga faaleagaga o lana fanau.
10. O ā nisi auala e mafai ai e tane ona faatino lo latou tulaga ulu i se uiga e pei o Keriso?
10 Tane e, o le a ola fiafia lou aiga i lalo o lou tulaga ulu pe afai e te faatinoina i le auala a Keriso. Sa lē inainā Keriso pe faitio. I le tuufeagai ai, sa mafai ona ia fetalai atu: “Ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga.” (Mataio 11:29) Pe mafai ona fai atu faapena lou aiga e uiga ia te oe? Sa faia e Keriso ona soʻo e pei o ni uō ma sa ia faatuatuaina i latou. (Ioane 15:15) Pe e te tuuina atu i lau avā lea lava faaaloalo? Ua faapea mai le Tusi Paia e uiga i se “avā amio lelei”: “Ua faatuatua ia te ia le loto o lana tane.” (Faataoto 31:10, 11) O le uiga o lena mea, o le faatagaina atu lea ia te ia o se saolotoga e faia ai filifiliga, ae e lē o le taofiofia o ia e ala i le tuuina atu o ni faasāsāaga. E lē gata i lea, sa faalototele e Iesu ona soʻo ina ia faaalia atu o latou faalogona ma manatu. (Mataio 9:28; 16:13-15) Pe faapena ona e faia i lau avā? Pe e te manatu ea i se mea saʻo ua ia lē malie ai o se luʻitau i lau pule? E ala i le amanaia o faalogona o lau avā na i lo o le faaleamanaiaina, o le a e atiina aʻe moni ai lona faaaloalo i lou tulaga ulu.
11. (a) E mafai faapefea e tamā ona tausia manaoga faaleagaga o a latou fanau? (e) Aiseā e ao ai i toeaina ma auauna o le faiva ona latou faataatia se faaaʻoaʻoga lelei i le tausia o o latou aiga?
11 Afai o oe o se tamā, e manaomia foi ona e taʻimua i le tausia o manaoga faaleagaga, o faalogona, ma manaoga faaletino o lau fanau. E aofia ai i lena le faia o se faasologa lelei faaleagaga mo lou aiga: i le galulue faatasi ma i latou i le auaunaga i le fanua, le faia o se suesuega faale-Tusi Paia a le aiga, ma le talanoaina o le mau o le aso. E fiafia lava, ona ua faaalia i le Tusi Paia faapea, o se toeaina po o se auauna o le faiva e ao ona avea o “lē pule lelei i lona lava aiga.” O tane o loo auauna i nei matātā e ao ona avea o ni ulu o aiga e fai ma faaaʻoaʻo lelei. E ui lava atonu e mamafa ni avega tauave o latou faia i le faapotopotoga, ae e tatau lava ona faamuamua o latou aiga. Na faaalia e Paulo le pogai: “Auā afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?”—1 Timoteo 3:4, 5, 12.
Avā Kerisiano e Lagolagosua
12. O le ā le vaega a le avā e faia i le faatulagaga faa-Kerisiano?
12 Po o oe ea o se avā Kerisiano? E tatau la ona e faia se vaega matuā tāua i le faatulagaga faaleaiga. Ua apoapoaia avā Kerisiano ‘ina ia alolofa atu i a latou tane, ia alolofa i a latou fanau, ia faautauta i latou, ia mamā, ia galulue i o latou lava aiga, ia amio lelei, ia usiusitai atu i latou i a latou lava tane.’ (Tito 2:4, 5) E ao ai la ona e taumafai ina ia matuā avea oe ma avā e fai ma faaaʻoaʻoga lelei, ia tausia mamā ma ia matagofie le fale mo lou aiga. O galuega i le aiga e ono lagona ai le fiu i nisi taimi, ae e lē o se mea e taʻu faatauvaaina pe manatu māmā i ai. I le avea ma avā, ua e ‘pule ai i le aiga’ ma e mafai ona e olioli i le tele o le saolotoga e filifili ai e tusa ai ma lenei itu. (1 Timoteo 5:14) Mo se faaaʻoaʻoga, o le “avā amio lelei,” na te faatauina mai mea e tausi ai le aiga, e faia faamaumauga ma faatau mai fanua, ma oo lava i le saunia o tupe maua e ala i le faatūina o sina pisinisi laitiiti. E letioa ona viia o lana tane ia te ia! (Faataoto, mataupu e 31) E masani lava ona faia e ia o na mea, ona o taʻiala na tuuina atu e lana tane o lona ulu.
13. (a) Aiseā e ono faigata ai mo nisi fafine ona gauai atu? (e) Aiseā e aogā ai mo fafine Kerisiano ona gauai atu i a latou tane?
13 Ae peitai, o le gauai atu i lau tane, e lē masani ona faigofie. E lē o tane uma e tatau i ai le faaaloalo. Ma atonu ua e masani lelei pe a oo mai i le taulimaina o tupe, faia o fuafuaga, po o le faamaopoopoina foi. Atonu e iai foi sau galuega i aso faisoo ma maua se fesoasoani tele i tupe maua a le aiga. Pe i se isi itu, atonu sa e mafatia i pulega a ni tamaloloa i se taimi ua mavae ma ua faigata ai ona e toe gauai atu i se tamaloa. Ae peitai, o le faaalia o le “faaaloalo loloto,” po o le “mataʻu” i lau tane ua faaalia ai lou faaaloalo i le tulaga ulu o le Atua. (Efeso 5:33, Kingdom Interlinear; 1 Korinito 11:3) E sili foi ona tāua le gauai atu mo le manuia o lou aiga; e fesoasoani ai ia te oe ina ia alofia le aumaia o ni mafatiaga ma ni mea faigata e lē talafeagai i lau faaipoipoga.
14. O le ā atonu e faia e se avā pe afai e lē malie o ia i se faaiʻuga na faia e lana tane?
14 Po o le uiga ea la o lenei mea, e tatau ona e nofonofo pe afai e te iloa ua faia e lau tane se faaiʻuga e lē tusa ai ma tulaga e sili ona lelei o lou aiga? E lē faia pea faapena. Sa leʻi nofonofo le avā a Aperaamo o Sara ina ua ia iloa ua faamataʻuina le tulaga saogalemu o lana tama, o Isaako. (Kenese 21:8-10) Atonu o le a faapena foi ona e lagona le fia faaalia o ou faalogona i nisi taimi. Afai e faia lenei mea i se auala faaaloalo i le taimi “faatatauina,” o le a mafai foi la ona faalogo se tane Kerisiano e mataʻu i le Atua. (Faataoto 25:11) Ae afai e lē talia lau fautuaga ma e lē o matuā aafia ai le solia o mataupu silisili faale-Tusi Paia, po o le a lē avea ea lou tetee i manaoga o lau tane ma mea e faatoilaloina ai lava oe? Ia manatua, ‘o le fafine poto na te atiina aʻe lona fale, a o le fafine valea na te lepetia ai i ona lava lima.’ (Faataoto 14:1) O le tasi o auala e atiina aʻe ai lou fale po o le aiga, o le lagolagosua lea i le tulaga ulu o lau tane, i le faamālō i ana taumafaiga i le faapalepale lea i ana mea sese e aunoa ma le faaalia o lou ita.
15. O ā auala e mafai ai e se avā ona fai sona sao i le aʻoaʻia ma le toleniina o lana fanau?
15 O le isi auala e atiina aʻe ai lou fale po o le aiga, o le tofu sao uma lea i le aʻoaʻiina ma le toleniina o le fanau. Mo se faaaʻoaʻoga, e mafai ona fai lau vaega i le tausisi e faia e lē aunoa le suesuega faale-Tusi Paia a le aiga ma i le atiina aʻe. “Aua foi le mapu lou lima” pe a oo i le tufaina atu o upu moni a le Atua i lau fanau i so o se avanoa—pe a ō malaga pe na o le ō foi e fai faatauga ma i latou. (Failauga 11:6) Fesoasoani ia i latou e sauniuni a latou tali mo sauniga ma vaega i le Aʻoga o le Faiva Faatiokarate. Ia vaai totoʻa foi i a latou aumea. (1 Korinito 15:33) Pe a oo i mataupu o le tuuina atu o tapulaa ma aʻoaʻiga faaleatua, ia faailoa atu i lau fanau le lua te aufaatasi ma lau tane. Aua neʻi faatagaina i latou e fai se mea e te lua feteenai ai ma lau tane.
16. (a) O le ā le faaaʻoaʻoga faale-Tusi Paia ua iai mo le faalototeleina o mātua nofofua ma i latou ua uma ona faaipoipo i ē lē talitonu? (e) E ono mafai faapefea e isi i totonu o le faapotopotoga ona fesoasoani ia i latou na?
16 Afai o oe o se matua nofofua pe e lē talitonu lau paaga, atonu e tatau lava la ona e taʻimua i le tulaga faaleagaga. E ono faigata lenei mea ma e oo ai foi ina faavaivai i nisi taimi. Ae aua le fiu, ia taumafai pea. Sa taulau le tinā o Timoteo o Eunike i le aʻoaʻoina o ia i le Tusi Paia ‘talu ina o tamaitiiti,’ e ui lava sa ia faaipoipo i se tagata e lē talitonu. (2 Timoteo 1:5; 3:15) Ma e toatele foi ē o loo faatasi ma i tatou o loo olioli ona ua faapena foi ona taulau. Afai e te manaomia se fesoasoani e tusa ai ma lenei mea, ia faailoa atu ou manaoga i toeaina. Atonu e mafai ona latou faatulagaina mo se tasi e fesoasoani ia te oe i se auala e ō atu ai i sauniga ma le auaunaga i le fanua. Atonu e mafai ona latou faalototeleina isi ina ia faaaofia lou aiga i le faia o ni tafaoga ma ni faatasitasiga. Pe e mafai foi ona latou faatulagaina mo se tagata talaʻi agavaa e fesoasaoni ia te oe e amataina se suesuega faaleaiga.
Tamaiti e Loto Talisapaia
17. (a) E mafai faapefea i talavou ona saosaolaumea mo le sologa lelei o le aiga? (e) O le ā le faaaʻoaʻoga na faataatia e Iesu e tusa ai ma lenei mataupu?
17 E mafai e talavou i le aiga ona saosaolaumea mo le lelei o le aiga e ala i le mulimuli i le fautuaga i le Efeso 6:1-3: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; o le uluai tulafono lea ua i ai le mea ua folafolaina; ina ia manuia ai oe, ma ia e nofo tuluʻi ai i luga o le laueleele.” O lou felagolagomai ma ou mātua, e faaalia ai lou faaaloalo ia Ieova. Sa lelei atoatoa Iesu Keriso ma sa ono faigofie ona oo ia te ia se manatu faapea, e lē o se mea tatau mo ia ona usiusitai atu i ni mātua lē lelei atoatoa. Peitai, sa ‘anaana pea o ia ia te i laua. . . . Ma sa tupu pea le poto ma le tino o Iesu, sa alofagia o ia e le Atua, atoa ma tagata.’—Luka 2:51, 52.
18, 19. (a) O le ā le uiga o le āva o se tasi i ona mātua? (e) E mafai faapefea ona avea le aiga ma nofoaga e malōlō ai?
18 Pe e lē ao ea la ona e āva faapena i ou mātua? O le “āva” i inei o lona uiga, o le iloa lelei lea o le pule tofia. (Faatusatusa i le 1 Peteru 2:17.) I le tele o tulaga, o lena āva e ao ona tuuina atu e tusa lava pe lē talitonu mātua o se tasi pe lē taulau foi ona la faataatia se faaaʻoaʻoga lelei. E ao ona sili atu ona e āva i ou mātua pe afai o i laua o ni Kerisiano o fai ma faaaʻoaʻoga lelei. Ia manatua foi, o aʻoaʻiga ma faasinoala o loo tuuina atu e ou mātua, e lē o fuafuaina e soona faasāsā ai fua oe ma le lē tusa. Na i lo o lea, ua faia e puipuia ai oe ina ia mafai ona e ‘ola ai pea.’—Faataoto 7:1, 2.
19 O lea, maeu se faatulagaga alofa, o le aiga! Pe afai e mulimuli uma ai tane, avā, ma fanau i tuutuuga a le Atua mo le olaga faaleaiga, o le a avea la le aiga o se lafitaga, o se nofoaga e malōlō ai. Ae ui i lea, atonu o le a mapuna aʻe ni faafitauli e aofia ai fesootaiga ma le aʻoaʻoina o se tamaitiiti. I le isi a tatou mataupu o sosoo mai, o le a talanoaina ai auala e mafai ai ona foia nisi o nei faafitauli.
Pe E te Manatua?
◻ O le ā le faaaʻoaʻoga na faataatia e tane, avā, ma fanau e matataʻu i le Atua i taimi o le Tusi Paia?
◻ O le ā le malamalama na faasusulu atu e le Faa-Kerisiano i le vaega a le tane?
◻ O le ā le tulaga e ao i le avā ona faia i le aiga Kerisiano?
◻ E mafai faapefea ona saosaolaumea talavou Kerisiano mo le lelei o le aiga?
[Ata i le itulau 55]
“E leai lava se mea i le Faa-Kerisiano na foliga mai sa sili ona fou ma maʻoti, pe a faatusatusa atu i amioga iʻuvale i lena taimi, na i lo o le manatu faa-Kerisiano i le faaipoipoga. . . . Na tatalaina ai [e lena mea] se vaitaimi fou mo tagata”
[Ata i le itulau 56]
E faamalosiau tane Kerisiano i a latou avā ina ia faaleo mai o latou faalogona, ma amanaia na faalogona