Auauna Faamaoni ia Ieova
“E te faamaoni oe [Ieova] i lē ua faamaoni.”—2 SAMUELU 22:26, NW.
1. E faapefea ona gaoioi Ieova ia i latou o ē faamaoni ia te ia?
E LĒ mafai ona toe totogi atu ia Ieova mo mea uma ua ia faia mo ona tagata. (Salamo 116:12) Maeu le matagofie o ana meaalofa faaleagaga ma ana meaalofa faaletino ma lona alofa! Sa iloa foi e le Tupu o Isaraelu anamua o Tavita faapea, sa gaoioi foi ma le faamaoni le Atua ia i latou o ē faamaoni ia te ia. Na taʻua faapena e Tavita i se pese na ia fatuina “i le aso na laveaiina ai o ia e Ieova ai lima o e na ita ia te ia uma lava, atoa ma le lima [o le Tupu] o Saulo.”—2 Samuelu 22:1.
2. O ā ni manatu na faailoa mai i le pese a Tavita, o loo faamauina i 2 Samuelu mataupu e 22?
2 Na amata e Tavita lana pese (e tali tutusa ma le Salamo 18) i le viia o Ieova o ‘Lē na Saunia se mea e sao ai’ e tali mai ai i tatalo. (2 Samuelu 22:2-7) Mai lona malumalu faalelagi, na laveaiina ai e le Atua lana auauna faamaoni mai fili malolosi. (2Sa 22 Fuaiupu 8-19) O lea, na tauia ai Tavita ona o lona tausisia pea o se ala saʻo ma tausi i ala o Ieova. (2Sa 22 Fuaiupu 20-27) Na sosoo ai ma galuega na faia i le malosi mai ia Ieova. (2Sa 22 Fuaiupu 28-43) Mulimuli ane, na taʻua ai e Tavita le laveaiina mai ē suesue masei i le aiga ma mai fili i isi nuu, ma na ia faafetai atu ia Ieova “o le olataga o ia i lana tupu; e agalelei o ia i le na ia faauuina.” (2Sa 22 Fuaiupu 44-51) E mafai ona laveaiina foi i tatou e Ieova pe afai tatou te tuliloa se auala saʻo ma faalagolago ia te ia mo le malosi.
Le Uiga o le Faamaoni
3. E tusa ai ma le manatu faale-Tusi Paia, o le ā lona uiga ia faamaoni?
3 O le pese a Tavita i le laveaiina, ua aumaia ai ia i tatou lenei faamafanafanaga mautinoa: “E te faamaoni oe [Ieova le Atua] i lē ua faamaoni.” (2 Samuelu 22:26, NW) O le upu e faamatala ai le upu Eperu cha·sidhʹ e faauiga i “lē ua faamaoni,” po o “se tasi e alofa ma agalelei.” (Salamo 18:25, faamatalaga i lalo) O le nauna cheʹsedh o loo maua ai le manatu faapea o le agalelei, e faapipii atu ma le alofa o ia i se mea seia oo ina faataunuuina lona fuafuaga e uiga i lena mea. Ua faaalia e Ieova lena ituaiga o agalelei mo ana auauna, e pei foi ona latou faailoa atu ia te ia. O lenei faamaoni e amiotonu, ma paia ua faasino i le ‘alofa ma le agalelei’ ma le ‘alofa faamaoni.’ (Kenese 20:13; 21:23) I le Tusi Paia Eleni, o le “faamaoni” ua faaalia ai le manatu o le paia ma le migao, lea ua faaalia i le nauna o le ho·si·oʹtes ma upu faamatala o le hoʹsi·os. O lea faamaoni e aofia ai le faatuatuaina ma le tuutoina atu, ma le faia ia atoatoa ma le faaeteete tiute uma i le Atua. Ina ia faamaoni ia Ieova, o lona uiga, ia pipii mau atu ia te ia faatasi ma se alofa faamaoni e matuā malosi e pei o se mea faapipii e sili ona malosi.
4. Ua faapefea ona faaalia le faamaoni o Ieova?
4 E tele auala ua faaalia ai le faamaoni o Ieova. Mo se faaaʻoaʻoga, na te faia iʻuga faafaamasinoga i ē amio leaga ona o lona alofa moni i ona tagata, atoa ai ma le faamaoni i le faia o le faamasinoga tonu, ma le amiotonu. (Faaaliga 15:3, 4; 16:5) O le faamaoni i lana feagaiga ma Aperaamo na uunaia ai o ia e onosai i le fanauga a Isaraelu. (2 Tupu 13:23) O i latou e faamaoni i le Atua e mafai ona faalagolago atu i lana fesoasoani e oo lava i le iʻuga o lo latou ala faamaoni, ma e mafai foi ona mautinoa o le a ia manatua i latou. (Salamo 37:27, 28; 97:10) Sa faamalosia Iesu i le iloa faapea, ona o ia o ‘lē faamaoni,’ sili a le Atua, o le a lē tuua ai pea lona ola i Seoli.—Salamo 16:10; Galuega 2:25, 27, LF.
5. Ona e faamaoni Ieova, o le ā o ia manaomia mai ana auauna, ma o le ā le fesili ua aogā ona talanoaina?
5 Ona o le faamaoni o Ieova le Atua, na te manaomia ai foi la le faamaoni atu o ana auauna ia te ia. (Efeso 4:24) Mo se faaaʻoaʻoga, e tatau i tagata ona faamaoni ina ia agavaa ai e avea ma toeaina i le faapotopotoga. (Tito 1:8) O ā vala e ao ona uunaia ai tagata o Ieova e auauna ma le faamaoni ia te ia?
E Talisapaia Mea na Aʻoaʻoina
6. O le ā so tatou lagona i mea faale-Tusi Paia ua tatou aʻoaʻoina, ma o le ā e ao ona tatou manatua e uiga i lena poto?
6 O le loto faafetai mo mea faale-Tusi Paia ua tatou aʻoaʻoina, e ao ona faagaeetia ai i tatou e auauna faamaoni ia Ieova. Sa uunaia e le aposetolo o Paulo Timoteo: “Ia e tumau i mea ua aʻoaʻoina ai oe, ma ua mautinoa ia te oe, ina ua e iloa o ia, na aʻoaʻo atu ia te oe; talu foi ina o e tama itiiti, ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.” (2 Timoteo 3:14, 15) Ia manatua o lena poto e sau mai le Atua e ala “i le auauna faamaoni ma le mafaufau.”—Mataio 24:45-47.
7. O le ā le lagona e ao ona iai i toeaina e uiga i meaʻai faaleagaga ua saunia e le Atua e ala i le auauna faamaoni?
7 E ao ona faapitoa lava i toeaina tofia ona talisapaia meaʻai lelei faaleagaga ua saunia e le Atua e ala i le auauna faamaoni. I tausaga ua mavae, e toaitiiti ni toeaina sa lē iai lena talisapaia. Sa mātauina e se tasi fafine faapea, o nei tane “sa faitio i mataupu na aumaia i Le Olomatamata, sa lē mananao e talia faapea . . . o le auala lea o le upu moni a le Atua, ae sa taumafai pea e taaʻina isi i auala o o latou mafaufauga.” Ae peitai, sa lē taitai ona taumafai toeaina faamaoni e taaʻina nisi ina ia teena so o se meaʻai faaleagaga ua saunia e le Atua e ala i le auauna faamaoni.
8. O le ā e iʻu i ai pe afai tatou te lē talisapaia atoatoa nisi o manatu faale-Tusi Paia na tuuina mai e le auauna faamaoni ma le mafaufau?
8 Ona o ni Molimau tuuina atu a Ieova, e tatau ai ia i tatou uma lava ona faamaoni ia te ia ma lana faalapotopotoga. E ao ona aua lava neʻi o tatou mafaufau e liliu ese mai le malamalama ofoofogia o le Atua ae tuliloa se auala aposetate e taʻitaʻiina atu ai i le oti faaleagaga i le taimi nei ma mulimuli ane ai faaumatia. (Ieremia 17:13) Ae faapefea pe afai e faigata ona tatou talia pe talisapaia atoatoa se manatu faale-Tusi Paia ua aumaia e le auauna faamaoni? Ona tatou faailoa atu lea ma le loto maulalo i lē na tatou aʻoaʻoina mai ai le upu moni, ma tatalo mo le atamai e feagai ai ma lenei tofotofoga seia oo ina faailoa mai i nisi lomiga e faamanino mai ai ia mataupu.—Iakopo 1:5-8.
Ia Talisapaia le Auuso Faa-Kerisiano
9. Ua faapefea ona faaalia i le 1 Ioane 1:3-6 faapea e tatau i Kerisiano ona iai le agaga o le fia mafuta faatasi ma uso?
9 O le talisapaia mai le loto mo le agaga o le fia mafuta faatasi ma uso o loo iai i totonu o lo tatou auuso faa-Kerisiano, ua saunia ai se isi faamalosiau ina ia auauna faamaoni ia Ieova. O le mea moni, e lē mafai ona malosi faaleagaga la tatou faiā ma le Atua ma Keriso pe a aunoa ma lenei agaga. Sa taʻu atu e le aposetolo o Ioane i Kerisiano faauuina: “O le mea na matou vaavaai i ai ma faalogologo i ai, matou te taʻu atu ai ia te outou, ina ia outou mafuta [“auaufaatasi,” Diaglott] faatasi ma i matou; o loo matou mafuta faatasi foi o i le Tamā lea atoa ma lona Alo o Iesu Keriso. . . . Afai tatou te fai atu, ua tatou mafuta faatasi ma ia, a e savavali i tatou i le pouliuli, ua tatou pepelo ai, ua tatou le faia foi le upu moni.” (1 Ioane 1:3-6) O lenei mataupu silisili e faatatau i Kerisiano uma lava, e tusa lava po o lo latou faamoemoe e faalelagi pe faalelalolagi.
10. E ui lava e foliga mai sa faigata tele ia Evotia ma Sunetui ona foia se faafitauli totino, ae na faapefea ona manatu Paulo i nei fafine?
10 E manaomia se taumafaiga ina ia tausia ai se agaga o le mafuta faatasi. Mo se faataʻitaʻiga, atonu sa faigata i fafine Kerisiano o Evotia ma Sunetui ona la foia se faafitauli na iai i lo la va. O lea na apoapoai atu ai Paulo ia i laua ina “ia tasi lo la manatu i le Alii.” Na ia faaopoopo mai: “Ou te faatoga atu foi ia te oe, loʻu fesoasoani faamaoni, ia e fesoasoani ia te i laua o e na finau faatasi ma aʻu i le tala lelei, atoa ma Kelemene ma nisi uma o e na galulue faatasi ma aʻu, ua i le tusi o le ola o latou igoa.” (Filipi 4:2, 3) Sa galulue faatasi na fafine amioatua ma Paulo atoa ma isi “i le tala lelei,” ma sa ia faamautinoaina faapea sa iai i latou faatasi ‘ma ē o tusia o latou igoa i le tusi o le ola.’
11. Afai e fetaiai se Kerisiano ma se faafitauli faaleagaga, o le ā e tatau ona teu i le mafaufau?
11 E lē tau faapipiiina e Kerisiano ni pine e faailoa atu ai ni faaeaga ua latou maua i totonu o le faalapotopotoga a Ieova ma le auala na latou auauna ai ma le faamaoni ia te ia. Ae afai e iai ni o latou faafitauli faaleagaga, pagā se lē alofa pe afai o le a faaleamanaia le tele o tausaga o la latou auaunaga faamaoni ia Ieova! E faapena foi lē na taʻua o le “fesoasoani faamaoni” o ia o se uso faamaoni sa naunau e fesoasoani atu i isi. Afai o oe o se toeaina, po o oe ea o se “fesoasoani faamaoni,” e te nofo sauni ina ia avatu se fesoasoani i se auala alofa mutimutivale? Tau ina ia manatua e i tatou uma lava mea lelei na faia e uso talitonu, e pei ona faia e le Atua, ma fesoasoani ma le alofa ia te i latou i le aveina o a latou avega—Kalatia 6:2; Eperu 6:10.
E Leai se Isi Mea e Ō i Ai
12. Ina ua ‘ō ese le toatele o le au soʻo’ ona o faamatalaga a Iesu, o le ā le tulaga na faia e Peteru?
12 O le a uunaia i tatou e auauna faamaoni ia Ieova ma lana faalapotopotoga, pe afai tatou te manatua e leai lava se isi mea e ō i ai mo le ola e faavavau. Ina ua faapogaia e faamatalaga a Iesu ‘le toatele o le au soʻo e toe foi i mea tuai na latou faia,’ ona ia fesili atu lea i lona au aposetolo: “Pe tou te fia o ese foi?” Ona tali mai lea o Peteru: “Le Alii e, a matou o ea ia te ai? o ia te oe upu o le ola e faavavau. Ua matou talitonu, ma ua matou iloa o oe o le Keriso [“o Lē Paia Oe a le Atua,” NW].”—Ioane 6:66-69.
13, 14. (a) Aiseā na lē maua ai e faiga faalelotu a tagata Iutaia o le uluai senituri le finagalo malie o le Atua? (e) O le ā na fai mai ai se tasi Molimau ua leva ona auauna ia Ieova e uiga i le faalapotopotoga vaaia a Ieova?
13 O “upu o le ola e faavavau” sa leʻi maua i faiga faalelotu a Iutaia o le uluai senituri T.A. O lana agasala sili, o le teena lea o Iesu e avea ma Mesia. E leai lava se faiga faalelotu a Iutaia na faavaeina moni i Tusi Paia Eperu. Sa faafitia e le au Satukaio le iai o agelu ma sa lē talitonu i le toetu. E ui lava sa lē ioe faatasi ma i latou le au Faresaio i nei itu, ae sa latou agasala foi i lo latou faaleaogāina o le Afioga a le Atua i a latou uputuu e lē faale-Tusi Paia. (Mataio 15:1-11; Galuega 23:6-9) O nei uputuu sa faapologaina ai tagata Iutaia ma sa faigata ai ona talia e le toatele Iesu Keriso. (Kolose 2:8) Ona o le maelega i ‘uputuu a ona tamā’ na pogai ai ona matuā sauā Saulo (Paulo) i soʻo o Keriso ona o lona lē malamalama.—Kalatia 1:13, 14, 23.
14 Sa lē maua e le faiga faalelotu a Iutaia le finagalo malie o le Atua, ae sa faamanuia e Ieova le faalapotopotoga na faia aʻe i soʻo o lona Alo—ʻo se nuu e maelega i galuega lelei.’ (Tito 2:14) O loo iai pea lena faalapotopotoga, ma na faapea mai se Molimau a Ieova ua leva ona auauna e uiga i lea faalapotopotoga: “Afai na iai se mea e tasi sa sili ona tāua ia te aʻu, o le pipiimau atu lea i le faalapotopotoga vaaia a Ieova. O mea na tutupu muamua ia te aʻu, ua aʻoaʻo mai ai ia te aʻu le lē atamai o le faalagolago i manatu o tagata. Ina ua faia e loʻu mafaufau le faaiʻuga i lena manatu, na ou filifili ai loa e pipiimau atu i le faalapotopotoga faamaoni. Pe iai se isi auala e mafai ai e se tagata ona maua le finagalo malie ma le faamanuiaga a Ieova?” E leai se isi mea e ō i ai ina ia maua ai le finagalo malie o le Atua ma le ola e faavavau.
15. Aiseā e ao ai ona felagolagomai ma le faalapotopotoga vaaia a Ieova ma i latou o aveina avega tauave?
15 E ao ona uunaia i tatou e o tatou loto ina ia felagolagomai ma le faalapotopotoga a Ieova, auā ua tatou iloa, ua na o lea le faalapotopotoga o loo taʻitaʻiina e lona agaga ma o loo ia faalauiloa atu lona suafa ma ana fuafuaga. E moni, o i latou o loo tofusia ai i avega tauave e lē lelei atoatoa. (Roma 5:12) Ae na ‘matuā toasa Ieova’ ia Arona ma Miriama ina ua la vaavaai masei ia Mose ma galo ai ia i laua o Mose, na tofia atu i ai avega tauave mai le Atua ae lē o i laua. (Numera 12:7-9) I aso nei, e felagolagomai Kerisiano faamaoni ma ‘i latou o fai ma taʻitaʻi’ auā o le mea lena o loo finagalo i ai Ieova. (Eperu 13:7, 17) O le tino mai o lo tatou faamaoni, e aofia ai le auai e lē aunoa i sauniga faa-Kerisiano ma le faia o tali e ‘faatupu ai le alofa i isi faatasi ma galuega lelei.’—Eperu 10:24, 25.
Ia Atiina Aʻe
16. O le faanaunauga e faia le ā mo isi e ao ona uunaia ai foi i tatou e auauna faamaoni ia Ieova?
16 O se faanaunauga ina ia atiina aʻe isi, e ao foi ona uunaia ai i tatou e auauna faamaoni ia Ieova. Na tusi atu Paulo i Korinito e faapea: “E faafefete le poto, a o le alofa e [“atiina aʻe ai,” NW].” (1 Korinito 8:1) Talu ai e iai se ituaiga o poto e faafefeteina ai ē latou te maua, atonu la sa faauiga ai e Paulo faapea, o le alofa e atiina aʻe ai i latou o faaalia lena uiga. Ua faapea mai se tusi a Polofesa e toalua o Weiss ma English: “O se tagata e iai le uiga o le alofa, e masani lava ona alofagia mai o ia. O le uiga o le faasalafa o le loto lelei ma le manatunatu i vala uma o le olaga . . . e matuā iloga lava ona aafia ai le tagata o lē na te faasalafa atu na faalogona, faapea foi ma le tagata na te talia mai, ma i lea ua faafiafiaina ai i laua uma.” O le faaalia o le alofa, tatou te atiina aʻe ai isi faapea foi ma i tatou lava, e pei ona faaalia i upu a Iesu: “E sili le manuia o le na te foai atu, i le manuia o le na te talia mai.”—Galuega 20:35.
17. O le ā e atiina aʻe ai le alofa, ma o le ā o le a na taofia ai i tatou mai le faia?
17 I le 1 Korinito 8:1 na faaaogā ai e Paulo le upu Eleni o le a·gaʹpe, e faailoa atu ai le alofa e faavae i mataupu silisili. E atiina aʻe ai, auā e onosai ma agalelei, e faapalepale ma tumau i mea uma, e lē taitai ona uma. O lenei alofa, na te aveesea faalogona e faaleagaina ai, e pei o le faamaualuga ma le loto leaga. (1 Korinito 13:4-8) O le alofa lena o le a na taofia i tatou mai le faitioina o o tatou uso, o ē e lē lelei atoatoa e pei foi o i tatou. O le a puipuia ai i tatou mai le pei o “tagata faalematau” o ē na ‘ō ane faaleiloga i’ totonu o uso Kerisiano i le uluai senituri. O nei tagata, na latou “taʻufaatauvaa i alii, ma upu leaga i e ua mamalu,” e mautinoa lo latou faia o upu leaga i na tagata o ni ovasia Kerisiano faauuina o ē na iai le mamalu na faaee atu ia i latou. (Iuta 3, 4, 8) Ona o le faamaoni ia Ieova, seʻi aua lava neʻi o tatou lolo atu i le tofotofoga e faia se mea faapena.
Ia Tetee atu i le Tiapolo!
18. O le ā e manao Satani e faia i tagata o Ieova, ae aiseā e lē mafai ai ona ia faia lena mea?
18 O le iloa faapea o loo manao Satani e faaumatia lo tatou autasi o ni tagata o le Atua, e ao ona faateleina ai lo tatou maumauai e auauna faamaoni ia Ieova. E manao foi Satani e faaumatia tagata uma o Ieova, ma ua fasiotia e auauna faalelalolagi a le Tiapolo i nisi taimi tagata tapuai faamaoni. Ae o le a lē faatagaina e le Atua Satani na te tafiesea i latou uma. Na maliu Iesu “ina ia faaumatia e ia i lona maliu o le ua i ai le malo e oti ai, o le tiapolo lea.” (Eperu 2:14) O le malosi o Satani e pule ai, na faatapulaaina lea talu mai ona lafoina ifo mai le lagi ina ua uma ona avea Keriso ma Tupu i le 1914. Ma i le taimi atofa a Ieova, o le a faaumatia ai Satani ma lana faalapotopotoga.
19. (a) O le ā le lapataiga na avatu e lenei mekasini i tausaga ua mavae e uiga i taumafaiga a Satani? (e) Ina ia alofia mailei a Satani, o ā mea e ao ona tatou faaeteete i ai i le feagai ai ma uso talitonu?
19 Na lapatai mai lenei mekasini i se tasi taimi: “Afai e mafai e Satani le Tiapolo ona faafenuminumiaʻi tagata o le Atua, e mafai foi la ona ia faapogaia i latou ina ia tauaimisa, po o le faaalia pe faatupuina foi se uiga manatu faapito e mafai ona faamuta ai le alofa mo le au uso, o le a faapena foi ona taulau o ia i le ʻaina po o le faaumatia o i latou.” (The Watch Tower, Me 1, 1921, itulau 134). Aua lava neʻi o tatou faatagaina le Tiapolo e aveesea lo tatou autasi, e lē taumatea i le faaseseina o i tatou e taufaaleaga pe tauaimisa foi o le tasi ma le isi. (Levitiko 19:16) Tau lava ina ia aua neʻi faaaogāina i tatou e Satani i lena auala faatogafiti poto tatou te faamanuʻalia ai i latou o loo auauna faamaoni ia Ieova po o le matuā faafaigata ai o le olaga mo i latou. (Faatusatusa i 2 Korinito 2:10, 11.) Na i lo lea, seʻi o tatou faatatauina upu a Peteru: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia; ia outou tetee atu ia te ia, ma ia mausali outou i le faatuatua.” (1 Peteru 5:8, 9) E ala i le tu mausalī e tetee atu ia Satani, e mafai ai ona tatou tausia lo tatou autasi ua faamanuiaina i le avea ma tagata o Ieova.—Salamo 133:1-3.
Tatalo ma Faalagolago i le Atua
20, 21. E faapefea i le tatalo ma le faalagolago ia Ieova ona fesootai atu ma le auauna faamaoni ia te ia?
20 O le tatalo ma le faalagolago i le Atua, o le a fesoasoani ia i tatou e faaauau ai pea ona tatou auauna faamaoni ia Ieova. Pe a tatou iloa ua tali mai o ia i a tatou tatalo, ona matuā tosina atili ai lea o i tatou ia vavalalata ia te ia. O le tatalo faatasi ma le faalagolago ia Ieova le Atua, sa faamalosia ina ua tusi mai le aposetolo o Paulo: “O loʻu manao ia tatalo o tane i mea uma lava, o loo sisii i luga o lima [“faamaoni,” NW], ma ia le ita, ma ia le masalosalo.” (1 Timoteo 2:8) O se faataʻitaʻiga, maeu le tāua o le tatalo ma le faalagolago o toeaina i le Atua! O lena faaaliga o le faamaoni ia Ieova pe a faia ni feiloaiga e talanoaina ai mataupu faalefaapotopotoga, o le a fesoasoani e taofia ai ni fefinauaiga uumi ma le soona faapasae atu o le ita.
21 O le tatalo ma le faalagolago ia Ieova le Atua, o le a fesoasoani ia i tatou e tausia lelei ai faaeaga i lana auaunaga. Sa mafai e se tamaloa o lē na auauna faamaoni ia Ieova mo le faitau sefulu o tausaga ona faapea mai: “O lo tatou talia ma le lotomalie o so o se tofiga na tuuina mai e le Atua ia i tatou e ala i lana faalapotopotoga i le lalolagi aoao, ma o lo tatou tumau ma le lē faagaeetia i le faia o o tatou tiute tofia, e maua ai le faamaoniga fiafia mai le Atua i a tatou taumafaiga filigā. E tusa lava po o le galuega ua tofia atu e foliga mai o se galuega maulalo, ae masani lava ona iʻu ane faapea, ana lē seanoa lea auaunaga faamaoni, semanū e lē mafai ona faia isi galuega tāua uma lava. O lea, afai tatou te loto maulalo ma naunau moni e faapaiaina le suafa o Ieova ae e lē o o tatou lava igoa, e mautinoa lava la le mafai pea ona tatou ‘tutumau ma le lē faagaeetia, ma tele pea mea e fai i le galuega a Ieova.’”—1 Korinito 15:58.
22. E ao faapefea ona aafia lo tatou faamaoni ona o le tele o faamanuiaga a Ieova?
22 E ui lava po o ā mea o tatou faia i le auaunaga ia Ieova, a o le mea moni, e lē taitai mafai ona tatou toe totogi atu ia te ia mo mea na ia faia mo i tatou. Maeu lo tatou malupuipuia i le faalapotopotoga a le Atua, ona o le siomia o i latou, e uō a le Atua! (Iakopo 2:23) Ua faamanuia i tatou e Ieova i le autasi e puna mai i le alofa faaleuso ua matuā mauaʻa e lē mafai e Satani lava ia ona liaʻiina. O le mea lea, seʻi o tatou pipiimau atu ai ma le faamaoni i lo tatou Tamā faalelagi ma ia galulue faatasi i le avea ma ona tagata. I le taimi nei e oo i le faavavau, seʻi o tatou auauna ia ma le faamaoni ia Ieova.
E Faapefea ona E Tali?
◻ O le ā lona uiga, ia faamaoni?
◻ O ā nisi o vala e ao ona uunaia ai i tatou e auauna faamaoni ia Ieova?
◻ Aiseā e tatau ai ona tatou tetee atu i le Tiapolo?
◻ E mafai faapefea ona fesoasoani le tatalo ia i tatou e avea ai ma auauna faamaoni a Ieova?
[Ata i le itulau 91]
E lē faatagaina e auauna faamaoni a Ieova lo latou fili e pei se leona, le Tiapolo, e faaleagaina lo latou autasi