“Ina Aumaia Mea e Sefulu Aʻi a Outou Mea Uma Lava i le Fale e Tuu ai Mea”

“Ia outou tofotofo mai ai ia te aʻu i lenei mea, . . . pe ou te le toina pupuni o le lagi mo outou.”—MALAKI 3:10.

1. (a) I lona lima o senituri T.L.M., o le ā le valaaulia na avatu e Ieova i ona tagata? (e) I le uluai senituri T.A., o le ā na iʻu i ai le afio mai o Ieova i le malumalu mo le faamasinoga?

I LONA lima o senituri T.L.M., sa lē faamaoni ai tagata Isaraelu ia Ieova. Sa latou taofia ona avatu o sefuluaʻi, ma na latou avatu manu lē talafeagai i le malumalu e fai ai taulaga. Ae peitai, na folafola atu e Ieova faapea, afai latou te avatu mea e sefulu aʻi a latou mea uma i le fale e teu ai mea, ona ia sasaa atu lea o le manuia seia matuā silisili ona tele. (Malaki 3:8-10) I le pe tusa ma le 500 tausaga mulimuli ane i ai, na afio mai ai Ieova e ala ia Iesu o Lana sāvali o le feagaiga, i le malumalu i Ierusalema mo le faamasinoga. (Malaki 3:1) Sa iloa ai le faatamala o le nuu o Isaraelu, a o i latou taitoatasi na toe foi atu ia Ieova, sa matuā faamanuiaina. (Malaki 3:7) Sa faauuina i latou e avea ma atalii faaleagaga o Ieova, o se foafoaga fou, ‘le Isaraelu a le Atua.’—Kalatia 6:16; Roma 3:25, 26.

2. O anafea le faataunuuga lona lua o le Malaki 3:1-10, ma o le ā ua valaaulia i tatou e faia e tusa ai ma lenei mea?

² I le toetoe lava 1,900 tausaga talu ona mavae o lenei mea, na faapaleina ai Iesu e avea ma Tupu o le Malo faalelagi o le Atua i le 1914, ma sa tatau loa ona faia le faataunuuga lona lua o upu sa faagaeeina e le Atua i le Malaki 3:1-10. E tusa ai ma lenei mea fiafia na tupu, ua valaauina ai Kerisiano i aso nei ina ia aumaia mea e sefulu aʻi a latou mea uma i le fale e teu ai mea. Afai tatou te faia faapea, o le a faapena foi ona tatou olioli i faamanuiaga e matuā silisili ona tele.

3. O ai le sāvali na sauniaina le ala mo Ieova (a) i le uluai senituri? (e) a o leʻi pa le taua muamua a le lalolagi?

³ E faatatau i lona afio mai i le malumalu, na fetalai mai Ieova: “Faauta! Ou te auina atu laʻu sāvali, na te sauni le ala i oʻu luma.” (Malaki 3:1, NW) I le faataunuuga o lenei mea i le uluai senituri, na alu atu ai Ioane le Papatiso i Isaraelu e talaʻi le salamō mai agasala. (Mareko 1:2, 3) Pe sa iai ea se galuega sa sauniunia mo lenei afio faalua mai o Ieova i lona malumalu? Ioe. I le faitau sefulu tausaga a o leʻi pa le taua muamua a le lalolagi, na aliaʻi mai ai Tagata Aʻoga o le Tusi Paia i le lalolagi i le aʻoaʻoina o aʻoaʻoga mamā faale-Tusi Paia, ma faaalialia ai aʻoaʻoga pepelo e lē faapaiaina ai le Atua, e pei o le Tolutasi ma le afi i hele. Sa latou lapataia foi tagata e uiga i le oo mai o le iʻuga o Taimi o Nuu Ese i le 1914. E toatele na tali atu i nei tagata o ē faasusulu atu le malamalama o le upu moni.—Salamo 43:3; Mataio 5:14, 16.

4. O le ā le finauga e manaomia ona faaleleia i le vaitaimi o le aso o le Alii?

⁴ Na amata i le tausaga e 1914 le vaitaimi ua taʻua e le Tusi Paia o “le aso o le Alii.” (Faaaliga 1:10) Na tutupu ai mea iloga i lena aso, e aofia ai le faailoaina mai o “le auauna faamaoni ma le mafaufau” ma le tofia o lena auauna e pule “i mea uma [a le Matai].” (Mataio 24:45-47) I tuā i le 1914, e faitau afe lotu na faapea mai o i latou o Kerisiano. O lē fea vaega o le a faailoaina mai e le Matai o Iesu Keriso, e fai ma ana auauna faamaoni ma le mafaufau? E tatau ona taliina lena fesili pe a afio mai Ieova i le malumalu.

Ua Afio Mai i le Malumalu Faaleagaga

5, 6. (a) O lē fea malumalu na afio mai i ai Ieova mo le faamasinoga? (e) O le ā le faamasinoga na maua e Kerisinetoma mai ia Ieova?

⁵ O lē fea la malumalu na afio mai i ai o ia? E manino lava e leʻi afio mai i se malumalu faaletino i Ierusalema. O le malumalu mulimuli lava o na malumalu, na faaumatia i tuā i le 70 T.A. Ae peitai, e iai se malumalu sili o Ieova na faaatagia e lena malumalu i Ierusalema. Sa tautala Paulo e uiga i lenei malumalu sili ma na ia faaalia ai faapea e moni lava, maeu le matuā sili o lenei malumalu, i lona nofoaga paia i le lagi, ma lona lotoā i inei i le lalolagi. (Eperu 9:11, 12, 24; 10:19, 20) O le malumalu sili faaleagaga lenei na afio mai i ai Ieova mo se galuega faafaamasinoga.—Faatusatusa i le Faaaliga 11:1; 15:8.

⁶ O anafea na tupu ai lenei mea? E tusa ai ma se faamaoniga maumaututū ua mafai ona maua, i le 1918.a O le ā na iʻu i ai? Mo Kerisinetoma, na silafia ai e Ieova se faalapotopotoga ua toto o latou lima, o se faiga iʻuvale faalelotu ua faia ia lava ma fafine talitane i lenei lalolagi, i le aufaatasia o ia ma tagata mauoa ae faasauāina ē matitiva, ua ia aʻoaʻoina aʻoaʻoga faapaupau na i lo o le faatinoina o le tapuaiga mamā. (Iakopo 1:27; 4:4) E ala ia Malaki, na lapatai mai ai Ieova: “E vave foi ona fai o aʻu ma molimau i e fai togafiti faataulāitu, ma ē mulilulua, ma ē tauto pepelo, ma ē faasaua i le taui o le auauna tauia, o le fafine ua oti lana tane, ma le ua mātuaoti.” (Malaki 3:5) Na faia na mea uma e Kerisinetoma, ma sa sili atu ona leaga. I le 1919 na iloa manino ai faapea ua faasalaina o ia e Ieova i le faaumatia faatasi ma le isi vaega o Papelonia Tele, le laumua o lotu sese i le lalolagi aoao. Mai lena taimi ma faasolo mai ai, na oo atu ai le valaau i ē loto saʻo: “Loʻu nuu e, ia outou o ese ia te ia.”—Faaaliga 18:1, 4.

7. O ai na faailoa mai e Iesu e avea ma ana auauna faamaoni ma le mafaufau?

⁷ O ai la le auauna faamaoni ma le mafaufau? I le uluai senituri, sa amata i sina vaega toaitiiti o ē na tali mai i le galuega o le molimau atu a Ioane le Papatiso, ma Iesu, le sāvali o le feagaiga. I lo tatou senituri, o se vaega toaitiiti lea o le faitau afe na tali atu i se galuega faapena a Tagata Aʻoga o le Tusi Paia i le faagasologa o tausaga seia oo atu i le 1914, a o leʻi pa le Taua Muamua a le Lalolagi. O i latou nei o ē na tumau i tofotofoga matuitui i le taimi o le taua muamua a le lalolagi, ae sa latou faaalia faapea sa loto tasi i latou ma Ieova.

Le Galuega o le Faamamāina

8, 9. I tuā i le 1918, i ā auala na manaomia ona faamamāina ai le auauna faamaoni ma le mafaufau, ma o le ā le folafolaga na faia e Ieova e faatatau i lenei mea?

⁸ Ae peitai, e oo lava i lenei vaega, sa manaomia ona faamamāina. O nisi o ē na faapipii atu i latou lava i na tagata, sa iʻu ina avea i latou ma fili o le lotu ma sa manaomia ai ona tafiesea i latou. (Filipi 3:18) O isi sa lē mananao e amoina avega tauave na aafia i le auaunaga ia Ieova, ma paʻūū ese ai i latou. (Eperu 2:1) E lē gata i lena, ae sa iai pea faiga faa-Papelonia sa manaomia ona tafiesea. Sa manaomia foi ona faamamāina le auauna faamaoni ma le mafaufau i se tulaga faalefaapotopotoga. O se tulaga saʻo o le solitū i lenei lalolagi, sa tatau foi ona aʻoaʻoina ma faatatauina. Ma a o faagasolo ina matuā sili atu ona iʻuvale le lalolagi, sa manaomia ona latou tau se taua malosi e aveesea ai amioga lē mamā, ma le lē mamā faaleagaga mai faapotopotoga.—Faatusatusa i le Iuta 3, 4.

⁹ Ioe, sa manaomia le faamamāina, ae sa folafola mai foi ma le alofa e Ieova e uiga ia Iesu ua faapaleina e faapea: “E nofo o ia, o lē tunu ma faamamā i le ario; na te faamamāina le fanauga a Levi, na te faateʻa ese foi le eleele ia te i latou e pei o le auro ma le ario; [“ona avea moni ai lea o i latou ia Ieova o tagata e avatu,” NW] le taulaga e fai i le amiotonu.” (Malaki 3:3) E amata mai i le 1918, ua faataunuuina ai e Ieova e ala i lenei sāvali o le feagaiga, lana folafolaga ma faamamāina ai ona tagata.

10. O le ā le ituaiga o taulaga na avatu e tagata o le Atua, ma o le ā le valaaulia na tuuina mai e Ieova ia i latou?

¹⁰ O uso faauuina o Keriso ma le motu o tagata e toatele o ē na mulimuli ane aufaatasi atu ia i latou i le auaunaga a Ieova, na latou maua uma aogā mai le gaoioiga a Ieova, o sē faaleleia ma faamamā i le auro ma le ario. (Faaaliga 7:9, 14, 15) I le avea o se faalapotopotoga, na latou ō mai ai, ma o loo ō mai pea e avatu le taulaga o meaalofa e fai i le amiotonu. Ma o a latou taulaga ua “mālie ai lea ia Ieova . . . e pei o aso o le vavau, e pei o tausaga anamua.” (Malaki 3:4) O i latou nei na valaaulia faavaloaga e Ieova faapea: “Ina aumaia mea e sefulu aʻi a outou mea uma lava i le fale e tuu ai mea; ina ia i ai mea e ʻai i loʻu fale; ma ia outou tofotofo mai ai ia te au i lenei mea, ua fetalai mai ai Ieova o ʻau; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.”—Malaki 3:10.

Taulaga ma Sefuluaʻi

11. Aiseā ua lē toe manaomia ai taulaga e tusa ma le faiga o le Tulafono faa-Mose?

¹¹ I aso o Malaki, na aumai ai e le nuu o le Atua taulaga ma sefuluaʻi faaletino, e pei o le saito, fua o laau, ma lafu manu. E oo foi i aso o Iesu, sa faia ai e tagata faamaoni o Isaraelu ni taulaga faaletino i le malumalu. Ae peitai, ona o le maliu o Iesu, na suia ai na mea uma. Na soloia le Tulafono, e aofia ai ma le poloaiga ina ia avatu taulaga patino ma sefuluaʻi faaletino. (Efeso 2:15) Sa faataunuuina e Iesu le ituaiga o taulaga faavaloaga ma sefuluaʻi sa ofoina atu i lalo o le Tulafono. (Efeso 5:2; Eperu 10:1, 2, 10) O le ā la le auala e mafai ai e Kerisiano ona ofoina atu taulaga ma sefuluaʻi?

12. O ā ituaiga o taulaga faaleagaga ma faataulagaina ua faia e Kerisiano?

¹² Mo i latou, e manino lava, o na taulaga o ni taulaga faaleagaga. (Faatusatusa i le Filipi 2:17; 2 Timoteo 4:6.) Mo se faaaʻoaʻoga, sa tautala Paulo e uiga i le galuega talaʻi o se taulaga ina ua ia faapea mai: “O ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.” Sa ia faasino atu i se isi ituaiga o taulaga faaleagaga ina ua ia timai mai: “Aua le galo ia te outou ona agalelei ma alolofa atu; auā o taulaga faapena e fiafia ai le Atua.” (Eperu 13:15, 16) Pe a faamalosiau atu mātua i a latou fanau ina ia ulu atu i le auaunaga faapaeonia, e mafai ona faapea ua latou ofoina atu i latou ia Ieova, e pei lava ona ofoina atu e Iefata lona afafine e fai ai “le taulaga mu” i le Atua, o lē na avatua ia te ia le manumalo.—Faamasino 11:30, 31, 39.

13. Aiseā e lē manaomia ai ona avatu e Kerisiano se sefuluaʻi faaletino mai a latou tupe maua?

¹³ Ae faapefea la sefuluaʻi? Po o se matafaioi ea a Kerisiano le tuuesea o mea e sefulu aʻi a latou mea faitino uma e maua ma avatu i le faalapotopotoga a Ieova, pe a faatusatusa atu i mea o faia e nisi lotu a Kerisinetoma? E leai, e lē manaomia lena mea. E leai se mau o le Tusi Paia o taʻua ai se tulafono faapena mo Kerisiano. Ina o aoina e Paulo meaalofa tauofo mo ē matitiva i Iutaia, na te leʻi taʻu patino atu se aofaiga o mea e ao ona avatu. Na i lo o lea, na ia faapea atu: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto malie [“fiafia,” NW].” (2 Korinito 9:7) I le tautala e uiga ia i latou o i le faiva faapitoa, na faaalia e Paulo faapea, a o tausia lelei nisi e ala i meaalofa tauofo, ae sa nofo sauni o ia e galue ma tausi ai ia lava. (Galuega 18:3, 4; 1 Korinito 9:13-15) Sa leʻi iai ni sefuluaʻi na tofia faapitoa mo lea fuafuaga.

14. (a) Aiseā e lē faaatagiaina ai e le sefuluaʻi lo tatou avatua o mea uma ia Ieova? (e) O le ā e faaatagiaina ai le sefuluaʻi?

¹⁴ E manino lava la, mo Kerisiano, o le sefuluaʻi e faaatagia ai pe fai ma sui o se mea. Talu ai ona o le vaega lona sefulu po o le numera sefulu ua masani ona faaatagia ai le numera atoatoa faalelalolagi i le Tusi Paia, po ua faaatagia ai la e le sufuluaʻi lo tatou avatua o a tatou mea uma ia Ieova? E leai. Pe a tatou tuuina atu o tatou ola ia Ieova ma faatinoina lea i le papatisoga i le vai, o le taimi lena ua tatou avatua ai a tatou mea uma ia te ia. Mai le taimi o lo tatou tuuina atu, e leai se mea na ia i tatou e faapea e leʻi maua e Ieova. Ae peitai, ua faataga e Ieova tagata taitoatasi e foai atu a latou mea faitino. O lea, o le sefuluaʻi, e faatagaina ai se vaega o a tatou mea ua tatou avatua ia Ieova, pe faaaogāina foi i le auaunaga ia Ieova, o se faamaoniga o lo tatou alofa ia te ia, atoa ma lo tatou iloa o le mea moni faapea, o ia e ona i tatou. O le sefuluaʻi i aso nei, e lē tatau ona tau o se tasi vaesefulu o mea. I nisi tulaga, atonu o le a itiiti. I isi, atonu o le a sili atu. E aumai e le tagata e tusa ma le mea e lagona e lona loto foai ma pe a tusa ai ma lona tulaga.

15, 16. O le ā e aofia ai i la tatou sefuluaʻi faaleagaga?

¹⁵ O ā ua aofia ai i lenei sefuluaʻi faaleagaga? O se tasi o mea, o lo tatou avatua lea ia Ieova o lo tatou taimi ma lo tatou malosi. O le taimi tatou te faaalu i sauniga, e auai i fonotaga ma tauaofiaga, i le auaunaga i le fanua, o nei mea uma, o se mea ua avatua ia Ieova—o se vaega o la tatou sefuluaʻi. O le taimi ma le malosi tatou te faaaluina e asiasi atu ai i ē mamaʻi ma fesoasoani ai i isi—o se vaega foi lena o la tatou sefuluaʻi. O le fesoasoani i le fausiaina o Maota o le Malo ma auai i le galuega o le faaleleia ma le faamamāina o le maota ua faapena foi ona avea o se vaega o le sefuluaʻi.

¹⁶ O la tatou sefuluaʻi, e aofia ai foi ma a tatou meaalofa tauofo i tupe. Ona o le matuā faateleina o le faalapotopotoga a Ieova i tausaga na seʻi mavae atu, ua faateleina ai foi matafaioi tautupe. E manaomia ni Maota o le Malo, faatasi ai ma ni lālā fou ma ni maota fono fou, faatasi ma le faafouina ia matagofie o isi maota ua uma ona fausia. O le totogia o tupe faaalu mo i latou ua faaavanoaina mo lea auaunaga faapitoa—e masani lava ona faia ai ni faataulagaina totino—e faaaluina ai foi nisi tupe e sili ona tele. I le 1991 o tupe na faaalu i le tausia o misionare, ovasia faimalaga, ma paeonia faapito, e sili atu i le 40 miliona tālā Amerika, o nei tupe uma na maua i meaalofa tauofo.

17. O le ā lava e ao ona tatou avatua e fai ma a tatou sefuluaʻi faaleagaga?

¹⁷ Ae o le ā tonu lava e ao ona tatou avatu e fai ma a tatou sefuluaʻi faaleagaga? E lē o faatulaga maia e Ieova se pasene. Ae peitai, o se lagona o le tuuina atu, o le alofa moni mo Ieova ma uso, faapea foi ma se lagona faanatinati i le iloa faapea, o loo iai ola e fia faasaoina, ua faamalosia ai i tatou e avatua la tatou sefuluaʻi atoa faaleagaga. Ua uunaia ai i tatou e auauna ia Ieova i le tele tatou te mafaia ai. Afai tatou te taofiofi mamau ma aiūū e foai atu i tatou lava po o a tatou oa ia Ieova, e tusa lava lea ua tatou faoa mea a le Atua.—Faatusatusa i le Luka 21:1-4.

Faamanuiaina Seia Lē Toe Manaomia

18, 19. Ua faapefea ona faamanuiaina tagata o Ieova ona o le aumaia atoa o a latou sefuluaʻi?

¹⁸ Talu mai le 1919, na tali atu ai ma le lima foai tagata o Ieova i o latou taimi, malosi, ma tupe mo mea manaomia mo le galuega talaʻi. Na latou aumaia moni lava le sefuluaʻi atoa i le fale e teu ai mea. O le iʻuga, na faataunuuina e Ieova lana folafolaga ma liligi ifo ai lana faamanuiaga seia lē toe manaomia. Sa iloa lenei mea i le matuā faatuputeleina o lo latou faitau aofai. Mai i na o ni nai afe o ē faauuina na auauna ia Ieova ina ua ia afio mai i lona malumalu i le 1918, ua tupu aʻe ai seia oo mai i aso nei le vaega faauuina faatasi ma a latou aumea, o isi mamoe, ua sili atu i le fa miliona lo latou faitau aofai i atunuu eseese e 211. (Isaia 60:22) Ua faamanuiaina foi i latou nei i le faatuputeleina pea o le malamalama o le upu moni. Ua sili atu ona latou mautinoa le afioga faavaloaga. Ua matuā mausalī lo latou mautinoa o le faataunuuga o fuafuaga a Ieova. (2 Peteru 1:19) E moni, o i latou o se nuu “ua aʻoaʻoina e Ieova.”—Isaia 54:13.

¹⁹ Na valoia e Ieova se faamanuiaga atili e ala ia Malaki: “Ona fetautalatalai lea o e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.” (Malaki 3:16) Mai faalapotopotoga uma na faapea mai o i latou o Kerisiano, e na o Molimau a Ieova lava e mafaufau i lona suafa ma faalauiloa atu i nuu uma. (Salamo 34:3) Maeu lo latou fiafia i le faamautinoaina faapea o loo manatua e Ieova a latou galuega faamaoni!

20, 21 (a) O le ā le faiā faamanuiaina ua olioli ai Kerisiano moni? (e) E tusa ai ma le Faa-Kerisiano, o le ā le eseesega ua faagasolo ina sili ona manino mai?

²⁰ O le vaega totoe faauuina, o se nuu faapitoa o Ieova, ma le motu o tagata e toatele, ua lolofi mai ina ia aufaatasi ma i latou, i le seleseleina faatasi o faamanuiaga o le tapuaiga mamā. (Sakaria 8:23) Ua folafola mai e Ieova e ala ia Malaki e faapea: “E fai foi i latou maʻu oloa tāua, ua fetalai mai ai Ieova o ʻau, i le aso ua ou tofia; ou te alofa foi ia te i latou, e pei ona alofa o le tagata i lona atalii ua auauna ia te ia.” (Malaki 3:17) Maeu se faamanuiaga ona o le alofa o Ieova ia i latou!

²¹ Ioe, ua saga faateleina pea le faaalia mai o le eseesega i le va o Kerisiano moni ma Kerisiano pepelo. A o taumafai tagata o Ieova e tausia ana tapulaa, ae ua atili ai ona māgoto ifo Kerisinetoma i amioga lē mamā a lenei lalolagi. E moni, ua faamaonia le moni o afioga a Ieova: “Ona outou iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.”—Malaki 3:18.

22. O ā faamanuiaga e mautinoa lo tatou olioli ai pe afai e faaauau pea ona tatou aumai atoa le sefuluaʻi?

²² Ua lē pine ona oo mai lea o le aso e iloa ai Kerisiano pepelo. “Faauta, o le a oo mai le aso e mu ai pei se umu; ona fai ai lea ma tagutugutu o saito o e faamaualuluga uma, atoa ma e fai amio leaga uma; e susunuina foi i latou i le aso o le a oo mai, ua fetalai mai ai Ieova o ʻau.” (Malaki 4:1) Ua iloa e tagata o Ieova, o le a ia puipuia i latou i lena taimi, e pei ona ia puipuia lona nuu faaleagaga i tuā i le 70 T.A. (Malaki 4:2) Maeu lo latou fiafia e maua lena faamautinoaga! I lea, seia oo atu i lena taimi, talosia ia tatou taitoatasi ma faaalia lo tatou talisapaia ma le alofa mo Ieova e ala i le aumaia o le sefuluaʻi atoa i le fale e teu ai mea. Ona mafai lea ona tatou mautinoa faapea o le a ia faamanuia pea i tatou seia lē toe manaomia.

[Faaopoopoga i lalo]

Pe Mafai ona E Faamatalaina?

◻ I aso nei, o anafea na afio mai ai Ieova i le malumalu faatasi ma lana sāvali o le feagaiga?

◻ O ai le auauna faamaoni ma le mafaufau, ma o le ā le faamamāina na latou manaomia ina ua mavae le 1918?

◻ O le ā le ituaiga o taulaga faaleagaga o avatua e Kerisiano faamaoni ia Ieova?

◻ O le ā le sefuluaʻi ua valaaulia Kerisiano e aumaia i le fale e teu ai mea?

◻ O ā faamanuiaga ua olioli ai tagata o le Atua e ala i le ofoina atu o sefuluaʻi faaleagaga?

[Ata i le itulau 100]

O la tatou sefuluaʻi faaleagaga e aofia ai le ofoina atu o le malosi ma oa e fausia ai Maota o le Malo

[Ata i le itulau 101]

Ona o faamanuiaga a Ieova i ona tagata, ua tele ai ni fale e manaomia ona fausia, e aofia ai Maota o le Malo ma Maota Fono