O Ieova, o Lē Faia Mea Ofoofogia

“E sili oe, o loo e fai foi [mea ofoofogia]; o le Atua oe, na o oe lava.”—SALAMO 86:10.

1, 2. (a) Ua faapefea ona āfaina le lalolagi i mea ua faia e tagata? (e) O fea atonu tatou te maua ai se faamoemoe mo ni mea e sili ona lelei?

ATONU e faasausili le tagata i aso nei faapea, o mea ua ia faia e ofoofogia—o mea faaeletise, faiga tau fesootaiga, o vitiō, o taavale afi, femalagaiga i vaalele tetele, atoa ma faiga faakomepiuta. O na mea ua avea ai le lalolagi o se nuu e tasi. Ae pagā se nuu! Na i lo o le filemu, tamaoaiga, ma le tele o mea mo tagata uma, ua pagatia tagata i taua faamasaa toto, solitulafono, faiga faatupu faalavelave, polusione, faamaʻi, atoa ma le mativa. Ma e ui ina faaitiitia le aofaiga o meatau faaniukelea o loo faataapeapeina i le lalolagi, ae e mafai lava ona faaumatia atoatoa ai le lalolagi o tagata. O loo faaauau pea ona avea pisinisi e faatau ai auupega mo le fasiotia o tagata po o fale e gaosi ai meatau, ma pisinisi e sili ona telē i le lalolagi. Ua atili ai ona mauoa ē mauoloa, ae matitiva masaesae ai ē matitiva. Pe mafai ea e se tasi ona maua se vaifofo?

² Ioe! Auā o loo iai se Tasi ua ia faamautinoaina mai le faasaoina, “o le ua sili i lea tagata sili,” o Ieova le Atua. (Failauga 5:8) Na ia faagaeeina le tusiaina o salamo, ia ua saunia ai le tele o faamafanafanaga, atoa ma fautuaga atamai mo taimi o puapuaga. E aofia ai le Salamo e 86, lea o loo faaaogāina ai le ulutala faigofie: “O le tatalo a Tavita.” O se tatalo e mafai ona faataʻitaʻi i ai sau lava tatalo.

Na Puapuagatia ae Faamaoni

3. I aso nei, o le ā le faaaʻoaʻoga faalaeiau ua saunia e Tavita mo i tatou?

³ Sa tusia e Tavita lenei salamo a o puapuagatia o ia. I aso nei, o i tatou o ē o loo ola i “aso e gata ai” o le faiga o mea a Satani, po o “aso faigata,” ua fesagaʻi foi ma na lava tofotofoga. (2 Timoteo 3:1; tagai foi i le Mataio 24:9-13.) E pei o i tatou, sa mafatia Tavita i popolega ma ootiaga ona o faafitauli na aafia ai o ia. Peitai sa lē taitai ona ia faatagaina na tofotofoga e faavaivaia ai lona faalagolago ma le faamaoni i Lē na Foafoaina o ia. Na ia alaga faapea: “Ieova e, ia liliu mai ou fofoga, ia e faafofoga mai ia te au; auā ua puapuagaina ma ua mativa lava aʻu. Ia e leoleoina lou agaga, auā ua amio Atua lava au; o oe na, loʻu Atua e, ia e faaola mai i lau auauna o le ua faatuatua ia te oe.”—Salamo 86:1, 2.

4. E ao faapefea ona tatou faailoa atu lo tatou mautinoa?

⁴ E pei ona sa iai ia Tavita, e mafai foi ona tatou mautinoa, o le a liliu mai fofoga o Ieova “le Atua e ana le faamafanafanaga uma” i lenei lalolagi, ma faafofoga mai i a tatou tatalo ma le loto maulalo. (2 Korinito 1:3, 4) O le talitonu aʻiaʻi i lo tatou Atua, e mafai ai ona tatou mulimuli atu i le fautuaga a Tavita e faapea: “Ia e [lafo] atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia [tautevateva, NW].”—Salamo 55:22.

Ia Masani Lelei ma Ieova

5. (a) Ua faapefea i nisi faaliliuga sa faia ma le faaeteete ona suia ai mea sese a tusiupu o tagata Iutaia? (e) O le ā le auala o loo viiviia ai Ieova i le salamo e 85 ma le 86? (Tagai i faamaumauga i lalo.)

⁵ I le Salamo e 86, o loo faaaogā faasefulutasi ai e Tavita le faaupuga “Ieova e.” Maeu le naunautai o le tatalo a Tavita, ma e maeu le vavalalata o lana masaniga ma Ieova! I se taimi mulimuli, sa avea lena masani i le faaaogāina o le suafa o le Atua o se mea e inosia e tusiupu o tagata Iutaia, ae tausolomua ai lava le au Soferete. Sa amata ona latou soona popole i manatu sese e uiga i le faaaogāseseina o lena suafa. I le faagaloina o le mea moni faapea, na foafoaina le tagata i le faatusa o le Atua, sa latou mumusu ai e faaee atu i le Atua, uiga o loo faaalia foi e tagata. O lea, e faafitu mai le faasefulutasi o mea o loo aliaʻi mai ai le suafa o le Atua i lenei salamo e tasi i tusitusiga Eperu, ua latou suia ai le suafa YHWH (Ieova) i le taʻu ’Adho-nai΄ (Alii). E mafai ona tatou loto faafetai ona ua toe faafoisia le suafa o le Atua i lona tulaga saʻo i le Afioga a le Atua e le New World Translation of the Holy Scriptures, atoa ma le tele o isi faaliliuga sa faia ma le faaeteete. O le iʻuga, ua faamamafaina ai la tatou faiā ma Ieova e pei ona tatau ai.a

6. I ā auala e mafai ai ona tatou faaalia, e tāua ia i tatou le suafa o Ieova?

⁶ Ua fai mai atili le tatalo a Tavita: “[Ieova] e, ia e alofa mai ia te au; auā ou te valaau atu ia te oe i aso uma lava. Ia e faafiafia mai le loto o lau auauna; auā ua faanaunau atu loʻu loto ia te oe, [Ieova] e.” (Salamo 86:3, 4) Ia mātau, sa valaau atu pea Tavita ia Ieova “i aso uma lava.” O le mea moni, sa masani foi ona ia tatalo i le po, a o taasē o ia i le vaomatua. (Salamo 63:6, 7) E faapena foi i aso nei, ua matuā aioi atu ma le leo tetele nisi o Molimau ia Ieova pe a faamataʻuina i le toso faamalosia po o isi faiga sauā. I nisi taimi, sa latou maofa ai ona o se iʻuga fiafia.b E tāua tele ia i tatou le suafa o Ieova, e pei foi ona sa iai ia ‘Iesu Keriso, le atalii o Tavita,’ a o iai o ia i le lalolagi. Sa aʻoaʻoina e Iesu ona soʻo ina ia tatalo mo le faapaiaina o le suafa o Ieova, ma na ia faailoa atu foi ia te i latou le uiga o lena suafa.—Mataio 1:1; 6:9; Ioane 17:6, 25, 26.

7. O ā ni faaaʻoaʻoga o le faafiafiaina e Ieova o loto o ana auauna, ma e ao faapefea ona tatou tali atu i ai?

⁷ Na tuuina atu e Tavita lona ola, lona tagata atoa ia Ieova. Ua ia faalaeiauina i tatou ina ia faia faapena, i le Salamo 37:5: “Ia e tuuina atu lou ala ia Ieova, ma faatuatua ia te ia, ona faia lava lea e ia.” I lea, o le a taliaina ai la tatou olega ia Ieova ina ia faafiafiaina e ia o tatou loto. E toatele auauna a Ieova o ē tausisi i le faamaoni ua faaauau pea ona maua le olioli tele i lana auaunaga—e ui i faigata, sauāga, ma maʻi tigā. O loo faaauau pea ona faamuamua e o tatou uso i nofoaga o loo faia ai taua i Aferika, e pei o Angola, Liperia, Mozambique, ma Zaire, le auaunaga a Ieova i o latou olaga.c Ua ia faapogaia moni lava i latou ina ia olioli i se seleselega tele faaleagaga. E pei ona latou tutumau, e tatau foi ona tatou faia faapena. (Roma 5:3-5) Ma a o tatou tutumau ai, ua faamautinoa mai ia i tatou: “O le faaaliga ua tuuina mo ona aso ua tuupoina, a e tautala mai pe a oo i le iuga, . . . e le faatuai mai.” (Sapakuka 2:3) Faatasi ma le mautinoa ma le faalagolago atoatoa ia Ieova, talosia ia faaauau foi ona tatou ‘tautatala atu seia oo i le iʻuga.’

Le Agalelei o Ieova

8. O le ā le vavalalata e ao ona iai i tatou ma Ieova, ma ua faapefea ona ia faaalia mai lona agalelei?

⁸ Ua fai atu atili Tavita i se olega e tumu i lagona ootia: “[Ieova] e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe. Ieova e, ia e faafofoga mai i laʻu tatalo; ma e liliu mai i le leo o laʻu aioi. O le aso e puapuagaina ai aʻu, ou te valaau atu ai ia te oe; auā e te tali mai ia te au.” (Salamo 86:5-7) O le taʻua pea lava pea o—“Ieova e,” tatou te nenee ai ona o le vavalalata o lenei faaupuga! Atonu ua atiina aʻe pea lenei vavalalata e ala i le tatalo. Na tatalo Tavita i se isi taimi e faapea: “Aua e te manatua aʻu agasala ina ou taulealea, ma oʻu solitulafono; a e tusa ma lou alofa ia e manatua mai aʻu, Ieova e, ona o lou agalelei.” (Salamo 25:7) O Ieova o ia o le faaaʻoaʻoga silisili o le agalelei—i le saunia o le togiola ia Iesu, i le faaalia o le alofa faamagalo i tagata agasala ua salamō, ma le faatotōina ifo o le alofa ma le agalelei i ana Molimau faamaoni ma le talisapaia.—Salamo 100:3-5; Malaki 3:10.

9. O le ā le faamautinoga e ao ona manatu mamafa i ai tagata agasala ua salamō?

⁹ Pe ao ea ona tatou faanoanoa i mea sese ua mavae? Afai ua tatou faasaʻosaʻoina nei ala o o tatou vae, o le a faatumauina la i tatou pe afai tatou te manatua le faamautinoaga a le aposetolo o Peteru i ē salamō e faapea, o le a oo mai “tausaga e filemu” ai mai ia Ieova. (Galuega 3:19) Seʻi o tatou faalatalata atu ia ia Ieova i le tatalo, e ala i Lē na togiolaina i tatou, o Iesu, o lē na faapea mai ma le alofa: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga.” A o tatalo atu Molimau faamaoni ia Ieova i aso nei i le suafa tāua o Iesu, latou te maua moni ai lava le malōlōga.—Mataio 11:28, 29; Ioane 15:16.

10. O le ā le tulaga silisili ua avatu e le tusi o Salamo i le alofa ma le agalelei o Ieova?

¹⁰ E sili atu i le faaselau ona faasino atu e le tusi o Salamo i le “alofa ma le agalelei” o Ieova. E mautinoa le fau ma soloi o lena alofa ma le agalelei! I ona uluai fuaiupu e fa, o loo augani atu ai le Salamo e 118 i auauna a le Atua ina ia faafetai atu ia Ieova, e ala i le taʻua faafa e faapea, “auā e faavavau lava lona alofa [ma le agalelei].” E faaluasefuluono ona faamamafa e le Salamo e 136 lona uiga tausaafia o le “alofa [ma le agalelei].” Po o ā lava auala tatou te sese ai—ma e pei ona faapea mai le Iakopo 3:2, “o mea e tele e sese ai i tatou”—talosia ia tatou nofo sauni pea e sailia le faamagaloga a Ieova, i le mautinoa o lona alofa faamagalo ma lona alofa ma le agalelei. O lona alofa ma le agalelei, o se faailoaga lea o lona alofa faamaoni ia i tatou. Afai tatou te faamaoni e faaauau ona faia le finagalo o le Atua, o le a ia faaalia mai la lona alofa faamaoni e ala i le faamalosia o i tatou ina ia faafetaiaia tofotofoga uma.—1 Korinito 10:13.

11. E mafai faapefea ona fesoasoani gaoioiga a toeaina ina ia aveesea ai ni faalogona agasala?

¹¹ Atonu e iai taimi e faatausuai ai i tatou e isi. Ona o le faaleagaina o faalogona, atoa ma le sauāina o le tino a o avea ma tamaiti, ua teu mau ai i nisi faalogona o le agasala po o le matuā lē aogā. Atonu e mafai e sea tagata ona valaau atu ia Ieova, i le mautinoa o le a ia tali mai. (Salamo 55:16, 17) Atonu e faaalia e se toeaina agalelei le naunau e ala i le fesoasoani atu i se tagata faapena, ina ia talia le mea moni faapea e lē o sona sese. Mulimuli ane ai, e mafai ona telefoni faaleuō atu i ai le toeaina mai lea taimi i lea taimi, ina ia fesoasoani ai i lena tagata seia oo lava ina mafai ona ia ‘tauaveina le avega.’—Kalatia 6:2, 5.

12. Ua faapefea ona faateteleina puapuaga, ae e mafai faapefea ona tatou faafetaiaia ma le manumalo?

¹² E tele isi tulaga mafatia e tatau ona onosaia e tagata o Ieova i aso nei. Mai i le Taua Muamua a le Lalolagi i le 1914, na amata ai ona aafia lenei lalolagi i ni mala tetele. E pei ona valoia e Iesu, o na mea “o le amataga ia o puapuaga.” Ua faateteleina puapuaga a o tatou lalata tele atu i “le faaiʻuga o le faiga o mea.” (Mataio 24:3, 8) Ua faasolo atu le ‘saasaa o ona po’ o le Tiapolo i lona tumutumuga faaiʻu. (Faaaliga 12:12) “E pei o se leona tagi,” i le sailia o sana meaʻai, ua faaaogāina ai e lena Fili sili, ia faiga taufaasese uma lava o loo iai, ina ia vavaeese ai i tatou mai le lafu a le Atua ma ia faaumatia ai i tatou. (1 Peteru 5:8) Peitai o le a ia lē manumalo! Auā, e pei o Tavita, ua taula atoatoa lo tatou faamoemoe i lo tatou Atua e toatasi, o Ieova.

13. E mafai faapefea i mātua ma a latou fanau ona faaavanoaina i latou lava mo le agalelei o Ieova?

¹³ E lē taumatea, sa totōina e Tavita i le loto o lona atalii o Solomona le manaoga ina ia faalagolago i le agalelei o Ieova. Ma sa mafai ai e Solomona ona aʻoaʻoina lona lava atalii e faapea: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto; ia e mataʻu ia Ieova, ia ʻalo ese i le leaga.” (Faataoto 3:5-7) E ao foi i mātua i aso nei ona aʻoaʻoina faapena a latou fanau iti, i le auala e tatalo ma faalagolago ai ia Ieova ma le auala e faafetaiaia ai faiga faalēalofa a le lalolagi—e pei o omiga mai aumea i aʻoga, ma faaosoosoga ina ia faia amioga lē mamā faaleituaiga. O le ola faatasi ma lau fanau i aso taitasi e tusa ai ma le upu moni, e mafai ona tāmau ai i o latou loto iti le alofa moni mo Ieova ma tatalo ai e faalagolago ia te ia.—Teuteronome 6:4-9; 11:18, 19.

Galuega e Lē Mafaatusalia a Ieova

14, 15. O ā nisi o galuega e lē mafaatusalia a Ieova?

¹⁴ I lona talitonuga loloto, ua faapea atu ai Tavita: “[Ieova] e, e leai lava so le vao atua e tusa ma oe; e leai foi se galuega e tusa ma au galuega.” (Salamo 86:8) E silisili, e maoaʻe, ma e sili atu le malualii o galuega a Ieova, na i lo o so o se mea e mafai ona mafaufauina e le tagata. E pei ona matauina puupuu e le faasaienisi i aso nei, o le vateatea aoao na foafoaina—i lona lautele, lona autasi, lona matagofie—ua faamaonia ai le sili mamao atu o lona ofoofogia na i lo o so o se mea na iloa e Tavita. E ui i lea, sa uunaia o ia e faapea mai: “Ua tala mai e le lagi le mamalu o le Atua; ua faaalia foi e le va nimonimo le galuega a ona aao.”—Salamo 19:1.

¹⁵ Ua matuā matagofie lava foi ona faaalia mai galuega a Ieova, i le auala na ia faatuina ma sauniunia ai le lalolagi, le saunia o ao ma po, o tau, o taimi e totō ai ma selesele ai, atoa ma le anoanoai o isi mea matagofie mo le fiafiaga o tagata i le lumanai. Ma e maeu foi le ofoofogia o le auala na foafoaina ai ma faaauupegaina ai i tatou lava, ina ia mafai ai ona tatou olioli i galuega a Ieova o loo siomia ai i tatou!—Kenese 2:7-9; 8:22; Salamo 139:14.

16. O le ā le faailoaga silisili o le agalelei o Ieova, ua iʻu ai i ā isi galuega e lē mafaatusalia?

¹⁶ Ina ua mavae le lē usiusitai o o tatou uluai mātua i le Atua, ma faapogaia ai puapuaga ua pagatia ai le lalolagi i aso nei, ona faia ai lea e Ieova o se galuega ofoofogia ona o lona alofa, i le auina mai o lona Alo i le lalolagi e folafola le Malo o le Atua, ma ia maliu e fai ma togiola mo tagata. Ma o le mea e sili ona ofo ai! Sa toe faaatuina mai e Ieova Keriso ina ia avea ma ana aumea o se Tupu tofia. (Mataio 20:28; Galuega 2:32, 34) Ua filifilia foi e le Atua mai tagata faamaoni se ‘foafoaga fou’ o le a pule faatasi ma Keriso e avea ma “lagi fou” ua fuafuaina e pule mai i se sosaiete o “le lalolagi fou” o le a faapea ona aofia ai le faitau miliona o tagata e toe faatutūina mai. (2 Korinito 5:17; Faaaliga 21:1, 5-7; 1 Korinito 15:22-26) Ona faapea lea ona agaʻi atu o galuega a Ieova i lona taunuuga mamalu! O le mea moni, e mafai ona tatou faapea atu: “Ieova e, . . . Ua tele lava lou agalelei ua teua e oe mo e ua matatau ia te oe.”—Salamo 31:17-19.

17. E faatatau i galuega a Ieova, ua faapefea ona faataunuu ai nei le Salamo 86:9?

¹⁷ Ua aofia ai i galuega a Ieova i aso nei le mea ua faamatalaina e Tavita i le Salamo 86:9: “O nuu uma na e faia latou te o mai, ma latou ifo atu i ou luma, [Ieova] e; ma latou faaneenee atu i lou suafa.” Ina ua maeʻa ona valaauina mai i tagata, le vaega totoe o lana foafoaga fou, le “lafu mamoe itiiti” o suli o le Malo, ona amata loa lea ona aoaoina e Ieova mai “atu nuu uma” o se “motu o tagata e toatele” o “isi mamoe,” e faitau miliona ua faaalia foi le faatuatua i le toto masaa o Iesu. Ua ia faia aʻe ia i latou ia se faalapotopotoga e sili ona malosi, ua na o lea le sosaiete i le lalolagi aoao o ē alolofa i le filemu i le lalolagi i aso nei. I le matauina o lenei mea, ua ifo atu ai le au agelu lava latou i luma o Ieova, ma folafola atu e faapea: “Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava.” Ua faapaiaina foi e le motu o tagata e toatele le suafa o Ieova, ma auauna atu ia te ia i le “ao ma le po,” faatasi ma le faamoemoe o le faasaoina atu i le iʻuga o lenei lalolagi ma ola ai e faavavau i se lalolagi parataiso.—Luka 12:32; Faaaliga 7:9-17; Ioane 10:16.

Le Silisiliese o Ieova

18. Ua faaalia faapefea e Ieova faapea o ia o le ‘Atua e toatasi’?

¹⁸ Ona sosoo ai lea ma le uaʻi atu o Tavita i le tulaga tau Atua o Ieova, e faapea: “E sili oe, o loo e fai foi [mea ofoofogia]; o le Atua oe, na o oe lava.” (Salamo 86:10) Mai lava i aso anamua, ua faaalia ai e Ieova faapea o ia, e moni, o le ‘Atua e toatasi.’ Sa avea le tagata sauā o Farao o Aikupito o lē na luʻia ma le loto maʻaa Mose e faapea: “O ai ea Ieova ou te faalogo ai i lana upu, ma ou tuuina atu Isaraelu e o? Ou te lei iloa Ieova.” Peitai sa leʻi mamao ae ona iloa loa le silisiliese o Ieova! Na faatoilaloina atua ma faataulaitu o Aikupito e le Atua e Ona le Malosi Uma lava, e ala i le faaooina atu o ni mala mataʻutia, i le fasiotia o atalii ulumatua a Aikupito, ma le faaumatiaina o Farao ma lana autau malosi i le Sami Ulaula. E moni lava, e leai se tasi e tusa ma Ieova i le vao atua!—Esoto 5:2; 15:11, 12.

19, 20. (a) O afea o le a sili atu ai ona faaleoina le pese o le Faaaliga 15:3, 4? (e) E mafai faapefea ona tatou auai i le galuega a Ieova e oo foi i le taimi nei?

¹⁹ Ona o ia o le Atua e toatasi, ua faasolo ai ina faia e Ieova mea ofoofogia e sauniuni ai mo le faasaoina o ona tagata tapuai o ē usiusitai, mai ia Aikupito o aso nei—le lalolagi a Satani. Ua ia folafolaina atu ana faamasinoga tauatua i le lalolagi uma e fai ma molimau, e ala i le tauiviga e sili ona tele o le talaʻiga i talafaasolopito uma, ma ua faataunuuina ai le valoaga a Iesu i le Mataio 24:14. Ua toeitiiti, ona oo mai lea o “le iʻuga,” lea o le a faaalia ai e Ieova lona silisiliese i se tulaga e lē mafaatusalia e ala i le tafiesea o amioga leaga uma i le lalolagi. (Salamo 145:20) Mulimuli ane, o le a faasolo ina matuā leo tetele le pese a Mose ma le pese a le Tamai mamoe e faapea: “[Ieova] e, le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le au paia e. [Ieova] e, o ai se le mataʻu ia te oe, ma vivii atu i lou suafa? auā ua na o oe e [faamaoni].”—Faaaliga 15:3, 4.

²⁰ Talosia ia tatou maelega e talanoa atu i isi e uiga i fuafuaga matagofie a le Atua. (Faatusatusa i le Galuega 2:11.) O le a faaauau pea ona faia e Ieova o mea silisili ma le ofoofogia i o tatou aso ma faasolo atu ai i le lumanai, e pei ona o le a faamatalaina i la tatou mataupu o loo sosoo ai.

[Faaopoopoga i lalo]

Po o E Manatua Ea?

◻ Aiseā e ao ai ona avea le tatalo i le Salamo 86 ma a tatou lava tatalo?

◻ E mafai faapefea ona tatou masani ma Ieova?

◻ Ua faaalia faapefea e Ieova lona agalelei ia i tatou?

◻ O ā nisi o galuega e lē mafaatusalia a Ieova?

◻ Ua faapefea ona silisiliese Ieova le ‘Atua e toatasi’?

[Ata i le itulau 12]

I le “lalolagi fou” o loo fotuai mai, o le a faaauau ona faamaonia ai e galuega ofoofogia a Ieova lona mamalu ma le agalelei