Lipoti a Ē Faalauiloa le Malo
Faaaloalo mo le Paia o le Ola
UA FAAALIA i le Tusi Paia e faapea, o le toto e tāua i le silafaga a le Atua, ma na te lē faatagaina le faaaogaseseina. (Levitiko 17:14; Galuega 15:19, 20, 28, 29) Ona o nei taiala mai le Tusi Paia, ua lē talia ai e Molimau a Ieova ni tuigā toto.
Ina ia fesoasoani i fomai ma tagata faigaluega o le falemai e malamalama i le tulaga faalelotu o Molimau a Ieova e uiga i lenei mataupu, ma talisapaia faapea e talia e Molimau so o se togafitiga e ese mai le toto e ofo atu ia i latou, ua saunia ai e le Sosaiete o le Olo Matamata komiti o le Hospital Liaison Committees (HLC) (Komiti o le Fesootaiga mo le Faamautuina ma le Faamalamalamaina i Fomai) i atunuu eseese. E asiasi atu sui o nei komiti i falemai e talanoa ma ē faia togafitiga. Talu ai nei i aai e 12 o Polani, e silia i le 200 fonotaga na faia ai, e aofia ai le sili atu i le 500 fomai e faia togafitiga, e patino i ulu o falemai faapitoa po o vaega eseese o falemai. O loo mulimuli mai se tala i se mea na tupu i le taimi a o faia se tasi o asiasiga faapena:
“Sa sili ona manuia se fono sa faia i le Cardio-Surgical Clinic i Zabrze. Talu mai le 1986, na faia ai e se vaega o fomai i le itu e vaaia ai gasegase ni taotoga o o tatou uso e aunoa ma le toto. E 40 foi taotoga faapena sa faia talu ai nei e aunoa ma le toto. O loo sauni le vaega o fomai e togafitia gasegase mai vaega uma lava o Polani ma mai isi foi atunuu. Ina ua mavae le 50 minute o le fonotaga, ona faailoa atu lea e le pule lagolago o le falemai sui o le (HLC) i se vaega o tagata mamai ma faapea atu: ‘O i latou nei o Molimau a Ieova. Latou te galulue felagolagomai ma la matou matagaluega, ma fesoasoani mai ia i matou. E lē na o o latou lava tagata talitonu, ae ua faapena foi ona aogā i isi tagata mamai la latou fesoasoani. Faafetai atu i Molimau a Ieova, ua matou mautinoa nei e mafai ona faia togafitiga o le fatu e aunoa ma le faaaogāina o le toto.
“‘Mo se faaaoaoga, na matou faia le taotoga o lenei fafine, [ma faasino atu i se tasi o ana maʻi] e aunoa ma le faaaogāina o le toto, ma o le a teʻa o ia i lona aiga i le Aso Gafua. Ou te fiafia tele e faailoa atu faapea, ua faaitiitia lo matou faaaogāina o le toto i le taimi nei na i lo o le taimi muamua ona e matautia. O loo iai faatasi ma le siama o le HIV ma le ate fefete ma e faaumiumi ona faataotolia.
“ʻO aʻu o se Katoliko, ae i lo matou aiga, ua masani ai ona matou onosaia le tele o manatu o isi. I se tasi aso, na matou savalivali ai ma laʻu fanau e latalata i le fale taalo e taʻua o le Slaski Stadium. Talu ai nei lava na lafoaia ai lenei fale taalo ua lē toe faaaogāina, ae peitai na matou matauina i lea taimi, ua matuā telē lava le suiga o le fale na i lo o le mea na matou vāai muamua i ai. Na ou fesili atu i se tasi o tagata faigaluega pe na faapefea ona iai lea suiga. Na tali mai o ia, na toeitiiti lava tiai e le pule le fale e lē toe fia faafouina, ae peitai, na faaaogāina e Molimau a Ieova e mau totogi ai, ma latou toe faafouina.
“ʻO lea la, e mafai e i tatou uma lava ona aʻoaʻoina le tele o mea mai nei tagata. Ou te manatu, i lenei vaega o le falemai, e ao ona tatou faapalepale i manatu o isi tagata.’ Ona ia faasino atu lea i se tasi o Molimau o lē o le a faia sona taotoga i nai aso ma faapea atu: ‘O le tamaitai lenei o se Molimau a Ieova, ma o le a faia lona taotoga e aunoa ma le toto.’”
E lē taumafai Molimau a Ieova e faamalosia o latou talitonuga i isi, ae latou te mulimuli i le faaaoaoga a le au aposetolo, ma ‘anaana i le Atua i lo o le anaana i tagata.’ (Galuega 5:29) E aofia ai i lenei anaana le faaaloalo mo le toto. Latou te talisapaia pe a faaaloalo mai isi i o latou talitonuga faalelotu, e uiga i lenei mataupu.