Tauaofiaga Tumu i le Fiafia na Faaauilumaina ai Aʻoaʻoga mai le Atua
I ASO nei, ua masani le lalolagi ma se mau faamatalaga ua sasao aʻe. I televise ma leitio, i tusi ma faamatalaga mai masini komepiuta, ua toetoe lava lē gata le tele o faamatalaga i le poto tau i so o se mataupu. Ae o loo tumau pea ona mamai tagata ma maliliu. O le solitulafono, le fia ʻai, ma le mativa, ua iai i le lalolagi atoa, ma ua matuā aafia le toatele o tagata i le maʻi tau i faalogona sa leʻi faapea ona iai muamua. Ua lē taulau i so o se poto ua maua, ona faasaʻoina mataupu. Aisea? Talu ai ona ua lē amanaia e tagata le poto o le Atua.
Maeu la le fetaui o le filifilia o “Aʻoaʻoga Mai le Atua” e fai ma matua o tauaofiaga talu ai nei a Molimau a Ieova! Sa faamanatu mai e le polokalama ia i latou sa auai e faapea, e na o le aʻoaʻoga lava o loo maua mai i le afioga a le Atua, le Tusi Paia, ua iai se aogā moni e faasaoina ai ola.
Na amataina le uluai tauaofiaga i le aso Tofi, ia Iuni 3, i Uniondale, i Niu Ioka, i Amerika. Mai i lena taimi ma faasolo mai ai, na faia ai le polokalama i aai eseese mai lea atunuu i lea atunuu, seʻi oo atu i konetineta o Aferika ma Amerika i Saute.
Le Aoauli o le Aso Muamua
E tofu lava le aso ma lona matua, sa faamamafaina ai se vala o le aʻoaʻoga mai le Atua. Mo se faaaoaoga, o le polokalama o le aso muamua, sa faavae aʻe i le matua, “Iloaina o le Aʻoaʻoga e Mai le Atua.” (Ioane 7:17) Sa lelei ona atiina aʻe lenei manatu a o faagasolo le aso.
Ina ua uma le pese ma le tatalo, ona tatalaina loa lea e le taitaifono le polokalama i le lauga o lona matua, “Ua Aofaga Potopoto i Tatou e Aʻoaʻoga Mai le Atua.” Na ia faaalia e faapea, ua aofaga potopoto tagata o Ieova e ala i le aʻoaʻoina o Ona ala, ma savavali i Ona ala. (Mika 4:1-5) O aʻoaʻoga mai le Atua sa faamalosia ai lo latou autasi. Sa faalaeiauina i latou sa auai i le tauaofiaga ina ia olioli i la latou auaufaatasiga faaleuso.—Salamo 133:1-3.
I le aoauli lava, sa talanoaina ai sauniga masani a le faapotopotoga i se lauga faasolo o lona matua “Sauniga e Faatonu ai i Tatou i Ala o Ieova.” Na faamanatu mai e le failauga muamua i le au usufono e faapea, pe a tatou feiloai faatasi, tatou te āva ai ia Ieova ma i lea e maua ai Lana faamanuiaga. Ona sosoo ai lea ma le failauga na ia faailoaina mai le manaomia ona faia o se vaega i sauniga. I le faia faapea, ua tatou vivii ai ia Ieova i le lautele, faataitaia ai lo tatou faatuatua, ma faamalosia ai le faatuatua o isi. O le failauga lona tolu o le lauga faasolo na ia faaalia le manaomia ona faatinoina o mea ua tatou aʻoaʻoina i sauniga. E tatau ona avea i tatou ma “e anaana i le upu, a e aua le na ona faalogologo i ai.”—Iakopo 1:22.
Ona sosoo ai lea ma se talanoaga manaia o le usuina o viiga ia Ieova. O le pese mai le loto o se isi lea vaega tāua o la tatou tapuaiga. Ona sosoo ai lea ma le lauga autū, “Manumalo Aʻoaʻoga Mai le Atua.” Maeu se matua e silisili ona lelei! Na taʻua e le failauga e faapea: “O Ieova o le Puna e silisili ona lelei o aʻoaʻoga e mafai ona maua e so o se tasi.” Ina ua uma sina talanoaga puupuu e uiga i le ofoofogia o le faiai o le tagata, ona ia faapea mai lea: “E ao ona tatou faaaogāina atoatoa le malosi o o tatou mafaufau e taliaina ai aʻoaʻoga mai le Atua. Auā ua na o lena lava, e iu ai i le mauaina o le atamai moni.” Maeu le moni!
Le Taeao o le Aso Lona Lua
“Ia Viia Pea Aʻoaʻoga Mai le Atua, lo Tatou Faaola” o le matua lena o le aso lona lua o le tauaofiaga. (Tito 2:10) O lenei mataupu silisili na aumaia i lumamea i le lauga “Feteenai Aʻoaʻoga Mai le Atua ma Aʻoaʻoga a Temoni.” Ioe, e iai aʻoaʻoga a temoni. (1 Timoteo 4:1) E pei ona faamatalaina mai e le failauga, ua manumalo aʻoaʻoga mai le Atua i le “poto” o Satani, e ala i le faaalialia o aʻoaʻoga pepelo ma auala faatogafiti poto a le Tiapolo. Ona o lenei mea, ua lē o toe avea ai le 4,500,000 o Kerisiano loto lelei ma pologa a le pouliuli a Satani.—Ioane 8:32.
E manaomia pea ona tatou teteeina Satani. Na faamamafa mai lenei mea i le lauga “O Ē Tetee Atu Ea i le Agaga o le Lalolagi?” O le agaga o lenei lalolagi e oti ai. Na te faamalosia tagata e faia amioga lē mamā, se manatu fouvale e uiga i le pule, ma se faanaunauga o le manao tele i meafaitino. E ao i se Kerisiano ona iloilo pea lava pea ia lava. Po o tumau pea ana tapulaa maualuluga pe a oo i tulaga o mea e matamata i ai, ma mea e faalogologo i ai, po o mea foi e faitau ai? Na faalaeiau mai le failauga e faapea: “Matou te faamālō atu ia te outou uso e ma tuafafine, atoa ma le au talavou mo taumafaiga naunautai ua uma ona outou faamalolosi e faia e tusa ai o lenei tulaga.”—1 Ioane 2:15-17.
E iai se vala e faigata ai ona teena le agaga o lenei lalolagi. O le ā lena mea? O i tatou uma lava e lē lelei atoatoa. E moni, na maliu Iesu mo a tatou agasala, ae e tatau pea ona tatou tau faasaga i le faanaunauga e faia le agasala. O le manatu lena na talanoaina i le lauga “Faatoilaloina le Pule a le Agasala o i le Tino Augavale.” Na taʻua e le failauga mai i isi o mea e faapea, e mafai ona tatou manumalo i la tatou tauiviga ma le agasala, pe afai e faaofuina i tatou i le tagata fou, ma alofia so o se mea e faagaee aʻe ai o tatou faanaunauga agasala.
“Ia Avea Aʻoaʻoga e Ola ai ma Auala o Lou Olaga” o le matua lena o le isi lauga na sosoo ai. O nisi ua ova le manatu tele e uiga i lo latou soifua maloloina. Ae o le mea moni, o le soifua maloloina faaleagaga e sili atu ona tāua. Na faamamafa e le failauga le manaomia ona manatu mamafa i a tatou avega tauave e uiga i le tulaga lea, ma sa ia aumaia faapitoa ai upu faalaeiau mo fafine Kerisiano. Na ia faapea mai: “Tatou te matuā talisapaia tuafāfine matutua ma ē talavou o ē e paleni lelei i lo latou maelega mo le faiva, ma i le tausia o a latou lava avega tauave totino.” Ioe, tatou te faafetai uma lava ia Ieova mo aʻoaʻoga mamā, ua mafai ai ona faaesea i tatou mai le lalolagi.
Na faaiuina le polokalama o le taeao i le lauga “Faaalia e Aʻoaʻoga Mai le Atua le Fuafuaga o le Olaga.” Na faapea mai le failauga: “E iai lava le taimi, e toetoe lava o tagata uma o le a tau mānatu, ‘Po o le ā le fuafuaga o le olaga?’” Faatasi ma ni mafuaaga malolosi, na ia faamaonia ai e faapea, e na o le Tusi Paia lava e aumaia ai se tali moni i lena fesili. Ia ona faaalia lea e le failauga e faapea, o folafolaga uigā ofoofogia a le Atua, ua aumaia ai ia i tatou se fuafuaga o le olaga. Atonu o loo manatu faapea le toatele o le aofia, ‘O le mea moni lava lenei o loo fia faalogo i ai tagata i laʻu oganuu.’ E faapena foi le manatu o le Vaega Pule. Na tatalaina ai se polosiua fou ua faaulutalaina What Is the Purpose of Life? i le faaiuga o le lauga lea. Maeu se olioli o tagata uma sa iai! Sa maua le avanoa ina ua malōlō i le aoauli e vaavaai ai i le lomiga fou.
Le Aoauli o le Aso Lona Lua
O le lauga muamua i le aoauli, sa matuā faamafanafana loto lona matua e faapea, “Lafo Atu ia Ieova Mea Uma E te Popole Ai.” E tele mea e mafua ai le popole; peitai, fai mai le Afioga a le Atua e ao ona lafo atu mea uma tatou te popole ai ia te ia. (1 Peteru 5:6, 7) E moni, o nisi faafitauli e faaauau pea, ma i lenei tulaga, na faalaeiau mai ai le failauga e faapea: ʻIa onosai. Faatalitali ia Ieova. Ia talitonu ma le mausali e faapea, o le mulimuli i le Tusi Paia, o le auala silisili lava lea. Afai e tuu atu pea o tatou loto ia Ieova, o le a tatou olioli i “le filemu mai le Atua” (NW) e silisili i mea uma e manatu i ai.’—Filipi 4:6, 7.
O isi lauga e fa e sosoo ai, na faaalia ai le faatatauina o aʻoaʻoga mai le Atua i totonu o olaga faaleaiga. O le lauga muamua, “Ia Avea le Faaipoipoga o se Faatasiga Tumau,” na faamanatu mai ai i le au usufono e faapea, i fofoga o Ieova, o le faaipoipoga e lē o se fuafuaga e manatu i ai faapea e toe faamatuu atu, e pei ona manatu i ai le toatele o le lalolagi. Ae peitai, ina ia manuia se faaipoipoga, e tatau ona tatou mulimuli i le taitaiga a Ieova. Na ia faia i tatou. O le mea lea, ua iai i lana Afioga faagaeeina le fautuaga e silisili ona talafeagai mo le faaipoipoga.
O le lauga “Galue Malosi mo le Faaolataga o Lou Aiga” na talanoaina ai luʻi o le tausiaina o se aiga i nei taimi faigata. (2 Timoteo 3:1) E aʻoaʻo e mātua a latou fanau ina ia faatumauina pea e i latou i latou lava ma o latou siomaga ia mamā faaletino, ia amio lelei, le faiga o galuega, ma ia lima foai ma manatu mo isi. Ae o le mea e sili ona tāua, e tatau ona aʻoaʻoina e mātua a latou fanau ina ia avea o ni auauna tuutoina atu a Ieova.—Faataoto 22:6.
Na sosoo ai ma le talanoaga “Mātua e, e Manaomia e a Outou Fanau se Uai atu Faapitoa,” na faamanatu atu e le failauga i le au usufono le manaomia ona faamālō i fanau, a o mataala e vaavaaia o latou vaivaiga. E tatau faapitoa lava i mātua ona mataala mo ni faanaunauga agaʻi i le lē faamaoni, le manao tele i mea faitino, po o le manatu faapito.
Sa faapitoa lava ona faalogologo ma le faaeteete le au usufono talavou i le lauga “Talavou e—O Aʻoaʻoga a Ai o Tou Utagiaina?” Ua faigata mea mo talavou Kerisiano i aso nei. E faigofie tele ona ō faatasi ma le lalolagi, peitai, e taitaiina atu ai i le oti. O lea, o le filifili e pipii atu i aʻoaʻoga mai le Atua, e manaomia ai le lototele mo se tagata talavou, e aumaia ai faamanuiaga sili i le taimi nei, ma le ola e faavavau i le lumanai.—1 Timoteo 4:8.
Na faaiuina le aso lona lua i le tala faamafanafana loto Talavou o Ē o loo Manatuaina Nei Lē na Foafoaina i Latou. I le faatomuaga o le lauga, na taʻua ai e le faatonu o le tala tagata talavou i le faalapotopotoga a le Atua “o se ʻau o tagata faatiokarate o loo auai ma le faamaoni i le tuutoina atu o le auaunaga ia Ieova le Atua, ma lana Tupu faauuina faalelagi, o Keriso Iesu.” Na ia faaopoopo mai: “O le mea moni, o o tatou tagata talavou o loo faataunuuina se mea lelei!” Na faaalia i le tala e faapea, afai e lelei ona toleniina e se matua se tamaitiiti, o lona uiga o le a aogā mo le tamaitiiti pe a tuputupu aʻe ma auauna ia lava ia Ieova.
Taeao o le Aso Lona Tolu
O le matua mo le aso lona tolu “Ia Aʻoaʻo atu pea i Tagata o Atunuu Uma.” (Mataio 28:19, 20) E lē taumatea sa faatalitalia e le au usufono le fautuaga talafeagai mo nei taimi e uiga i le galuega talaʻi, ma sa lē faanoanoa ai i latou. O se lauga faasolo o lona matua “Ia Faataunuuina ma le Olioli Lo Tatou Tofiga o le Talaʻi ma Aʻoaʻo Atu” na faamalosia ai lo latou maumauai ina ia faaauau pea ona auai i le galuega o le molimau atu. O le lauga amata na talanoaina ai uluai asiasiga; o le lauga lona lua e faatatau i toe asiga; ma le lauga lona tolu, e faatatau i suesuega faale-Tusi Paia. Na valaauliaina misionare uma i le lalolagi aoao, ina ia foi atu i o latou aiga, ma auai ai i se tauaofiaga ma o latou aiga ma uo. I nisi o vaipanoa na faia ai se vaega a misionare i lenei polokalama. O se fiafiaga le mauaina o nisi o faamatalaga i le manuia ua latou maua i o latou tofiga. O le isi lauga na sosoo ai, “Faaooina atu o le Tala Lelei i Tagata Uma” na talanoaina ai le aogā o le molimau atu lē fuafuaina.
Na faaiuina le polokalama o le taeao i le lauga o le papatisoga, e masani lava o se vala matilatila lea i tauaofiaga tetele o Molimau a Ieova. Mai i lea tauaofiaga i lea tauaofiaga, e tutū ai i luma o le aofia atoa se vaega toatele o ē fou ua tuuina atu, ma tali atu ma le mautinoa i le ioe mo fesili e lua o loo faasino tonu ia i latou. Ona papatisoina loa lea o i latou i luma o le lautele. Maeu se faamaoniga malosi o iuga ofoofogia o le aʻoaʻoga mai le Atua!
Aoauli o le Aso Lona Tolu
O le polokalama o le aoauli na amataina i se talanoaga loloto mai le Tusi Paia. Ua masani Molimau a Ieova ma upu o loo i le Mataio mataupu e 24, ma le Luka mataupu e 21. Pe sa manatu ea nisi e faapea e leai se mea fou o le a taʻua e uiga i nei mataupu o le Tusi Paia? Pagā lo latou sese! O lauga “O le ā le Faailoga o Lou Faatasi Mai?” ma le “Fetalai mai ia te i Matou pe Oo Afea ia Mea?” na taitaiina atu ai le au usufono i se talanoaga mataina na taulai atu i vaega o mataupu na e lua, ma tuuina mai faamalamalamaga fou ua iai nei o nisi o fuaiupu. Sa faia ni talanoaga olaola ina ua uma le vaega lea, a o faatusatusa e le au usufono a latou faamaumauga ina ia iloa po o latou malamalama i manatu autū. E mautinoa, o le a taliina le tele o fesili pe a lomia nei faamatalaga i Le Olomatamata.
Na faaauau le matua o le suesueina o le Tusi Paia i le lauga, “O Tali Talafeagai i Au Fesili i le Tusi Paia.” Ona taulai atu lea o le polokalama i se mataupu ese. O le tausaga e 1993 na faailogaina ai le 50 tausaga o le Aʻoga Tusi Paia o le Olomatamata i Kiliata. O le lauga “Limasefulu Tausaga o Toleniga ma Galuega Faamisionare i Kiliata” na faaalia ai i le au usufono le mea ua faataunuuina talu mai lena vaitaimi. Afai o loo iai ni misionare o loo auai a o faia le lauga “O Mea ua Faataunuuina e le Galuega Faaevagelia i le Lalolagi Aoao,” na valaaulia i latou ina ia faamatala mai i le aofia nisi o mea na tutupu ia i latou. O se matuā fiafiaga sili le faalogo atu i faamatalaga a misionare!
O le lauga na sosoo ai, “Le Pogai e Mataala ai Pea Molimau a Ieova,” o le isi lesona lea o le talafaasolopito. Na faaalia ai e faapea, sa mataala pea Kerisiano mai le uluai senituri T.A. seʻi oo mai i le taimi nei. Na taitaiina atu ai i se isi mea na faateia ai. I le amataga lava o le lauga na sosoo ai, o lona matua “O loo Toaaga Ē Folafolaina le Malo i le Lalolagi Uma,” na sii ai i luga e le failauga se lomiga telē (pe a fetaui lelei ma le gagana a lea lava atunuu) ma faapea mai: “E fiafia e faasilasila atu e faapea, ua tatalaina nei i le asō lenei tusi fou, o lona matua, Jehovah’s Witnesses—Proclaimers of God’s Kingdom.” O loo i le tusi se faamaumauga auiliili o le talaaga o Molimau a Ieova i ona po nei. O loo taʻu mai ai se tala faagaeeloto o le tumau, maumauai, ma le manuia, ua aumaia ai faamaoniga malolosi o loo galue le agaga o Ieova i luga o ana auauna.
Le Taeao o le Aso Lona Fa
Ua oo mai le aso mulimuli o le tauaofiaga. O le matua o le aso, “Ia Aogā ia i Tatou Aʻoaʻoga Mai le Atua,” na folafolaina mai ai se taualuga matagofie i le polokalama. (Isaia 48:17) I le taeao, na uai atoatoa atu ai le faalogo a le au usufono i se lauga faasolo o lauga malolosi e tolu. O le matua o le lauga faasolo, “Le Feau Lapatai Faagaeeina a Ieremia—Mo Aso ua Mavae ma Aso Nei,” na talanoaina i le lauga faasolo fuaiupu taitasi o le Ieremia mataupu e 23, 24, ma le Ieremia 25. Maeu se feau malosi o loo i nei mataupu! Atonu sa gatete tagata Isaraelu lē faatuatua i aso o Ieremia i nei lapataiga manino, ma le faagaeeina mai le Atua. Sa sili atu ona gatete le lalolagi atoa ina ua faataunuuina na lapataiga. Po ua ese ea tulaga o mea i aso nei? E matuā leai lava. O loo talaʻia ma le loto tetele e Molimau a Ieova feau faafaamasinoga a le Atua. O le mea moni, o le a oo ina fesagai lenei faiga aoao o mea ma gaoioiga faafaamasinoga a Ieova. O lona uiga, o le faaumatiaga atoatoa mo le lalolagi a Satani.
Na faaiuina le polokalama o le taeao o le aso Sa i se tala lona lua, Aua Neʻi Faaseseina Outou e Lē Ulagia le Atua. I se auala moni, na faaalia ai i le tala le auala e mafai ai e le aʻoaʻoga mai le Atua ona puipuia i tatou mai le ono taaina e ata vitio lē mamā ma musika, ma mai le vaivaiga o le faatupuina o feeseeseaiga i uso Kerisiano. I le faaiuga o le tala, na sii mai ai e le taitaifono nei upu faatupu manatu mai se tasi e iai i le tala e faapea: “Tatou te lē saoloto i taaʻiga a le lalolagi. Ae afai tatou te lē teena, o le a mafai ona faaleagaina mālie e le lalolagi o tatou mafaufauga. Ma pe tatou te tumau ma le faamaoni, pe e leai, e faalagolago lava i le mea o loo tatou luluina.” Maeu le moni!
Le Aoauli Faaiu
Na vave ona faasolo atu i lona faaiuga le tauaofiaga a o alo atu le failauga mo le tuuina mai o le lauga lautele, o lona matua, “Aʻoaʻoga Aogā mo o Tatou Aso Faigata.” I se auala manino ma le faasolosolo lelei, na ia faailoaina mai ai faafitauli autū ia o loo aafia ai i tatou i aso nei, ma taʻu mai nisi o auala e mafai ai e le aʻoaʻoga mai le Atua ona fesoasoani ia i tatou ina ia olioli i se olaga e sili ona lelei. Na ia faapea mai, afai tatou te mulimuli i aʻoaʻoga mai le Tusi Paia i le taimi nei, o le a mafai foi ona tatou mulimuli ai e oo i le faavavau i le lalolagi fou a Ieova.
Ina ua uma se aotelega o le suesuega o Le Olomatamata o le vaiaso, ona fai loa lea o le lauga faaiu. Na toe autalu faavavevave e le failauga manatu autū mai le polokalama o aso e fa, ma faamanatu mai i le au usufono e uiga i lomiga fou. Na ia faasilasilaina mai ai foi le lipine vitio lona lua o le faasologa o le The Bible—A Book of Fact and Prophecy ua lē o totoe mamao ona maua lea. O le mea moni, o lena lipine vitio, o lona matua o le The Bible—Mankind’s Oldest Modern Book, ua maua nei i le gagana Peretania. Na faaiuina i le faitauina mai o lipoti faamomoi loto mai nofoaga o loo faigata ai tulaga e pei o Bosnia ma Herzegovina. I le faaiuga, na faitau mai ai e le failauga upu o loo i le Failauga 12:13: “Seʻi tatou faalogo ia i le iuga o ia mea uma, Ia e mataʻu i le Atua, ma e anaana i ana poloaiga; auā o mea ia e tatau i tagata uma.”
Maeu se faamanatuga e sili ona manaia! Seʻi o tatou ola ia mo le aso o le a viia ai e tagata uma lo tatou Aʻoaʻo Sili, o Ieova, ma utagia lana aʻoaʻoga.
[Ata i le itulau 24, 25]
O tauaofiaga o “Aʻoaʻoga Mai le Atua” i Moscow ma Kiev, na iu i se olioli sili
[Ata i le itulau 26, 27]
1. E toatele na faatinoina lo latou tuuina atu i le Atua e ala i le papatisoga
2. Sa matuā fiafia se sui usufono ua 100 tausaga lona matua ina ua ia mauaina se lomiga fou
3, 4. Sa matuā talisapaia tele tala faatupu manatu
5. O misionare na faatalanoaina i tauaofiaga na latou faamatilatilaina mai aogā o aʻoaʻoga mai le Atua