Filemu o le Mafaufau i se Sosaiete Fia Tauva

NA FAUTUAINA e Iesu Keriso ona soʻo e faapea, “Afai e fia muamua se tasi, e avea o ia ma mulimuli i tagata uma, ma auauna a tagata uma.” Sa fefinauai le au aposetolo po o ai e sili ia i latou. Sa latou iloa e inoino Iesu i lena ituaiga o agaga. Na te leʻi uunaia ona soʻo e faasagatau le tasi i le isi faapea o le auala lea e agaigai ai i luma faaleagaga.—Mareko 9:33-37.

A o leʻi afio mai i le lalolagi, sa faia se sao o Iesu Keriso i le foafoaina o le uluai ulugalii, ma na silafia ai le auala na faia ai i laua. (Kolose 1:15, 16) Sa foafoaina uluai tagata ma le tomai e agaigai ai i luma e aunoa ma le faia o ni tauvaga faalēalofa ma isi. Sa lē manaomia ona fetauai tagata ia i latou lava e filifili ai po o ai lo latou ulu, latou te leʻi tauva foi ma manu i se tauiviga mo le faasaoina.—Kenese 1:26; 2:20-24; 1 Korinito 11:3.

Amataga o le Agaga Fia Tauva

Na faapefea la ona avea se agaga faalēalofa o le fia tauva ma malosi e pulea le sosaiete o tagata? O le uluai fasioti tagata i le talafaasolopito o tagata, ua faaataata mai ai. O se agaga fia tauva o Kaino, le atalii ulumatua o le uluai ulugalii, na iu ai i le mala. Na fasiotia e Kaino lona uso o Apelu, auā na fiafia le Atua i le taulaga a Apelu, ae sa lē fiafia i le taulaga a Kaino. Ma ua faapea mai le Tusi Paia, o Kaino “na i loo leaga, na fasioti foi i lona lava uso.”—1 Ioane 3:12; Kenese 4:4-8.

Ioe, o lē o loo leaga, o Satani le Tiapolo, o le amataga ma o lē o faatupuina le agaga o le fia tauva. E ui lava sa avea o ia o se atalii agelu o le Atua, ma maua faaeaga maualuluga, ae sa tuinanau pea o ia. (Faatusatusa i le Esekielu 28:14, 15.) O lona faaseseina o Eva, sa ia faailoa mai ai lona lava tuinanauga. Na ia faapea mai, o le ʻaina e Eva o le fua faasaina, ‘o le a avea ai o ia e pei o le Atua.’ (Kenese 3:4, 5) O le mea moni, o Satani lea na manao e avea o ia e pei o le Atua, ua losilosi atu ia Ieova. O le agaga fia tauva i le Atua na uunaia ai o ia e fouvale.—Iakopo 1:14, 15.

O le agaga lenei, e pipisi. I lalo o taaʻiga a Satani, na leiloa ai le filemu mai le Atua mo le uluai fuafuaga faaleaiga. (Kenese 3:6, 16) Talu mai lava lana fouvalega faasaga i le Atua, ua pulea ai e Satani le Tiapolo tagata, i le faaolaolaina o se agaga fia tauva, ma oo ai lava ina faaseseina tane ma fafine e talitonu faapea, o tauvaga faalēalofa, o le ki lea i le manuia. Ae peitai, ua faamatala mai e le Tusi Paia e faapea: “Auā o le mea e i ai le mataua ma le misa, o i ai le feavauai ma mea leaga uma.” (Iakopo 3:14-16) Ma i lea, ua aveesea ai e Satani mai i tagata le fiafia ma le filemu o le mafaufau.

Manuia e Aunoa ma le Tauva

I le eseese ma faaʻoleʻolega a Satani, ua aumaia i le Tusi Paia ni faaaoaoga o le taulau manuia e ese mai le fia tauva. O le faaaoao sili o Iesu Keriso. E ui lava sa pei o le Atua, ae sa leʻi manatu o ia faapea e tutusa ma le Atua, sa faapei o se pologa ma afio mai i le lalolagi. E sili atu i lena, na ia faamaulaloina o ia ma na usiusitai e oo lava i lona maliu i luga o le satauro. O lenei uiga usiusitai, sa auliuligia ma se agaga losilosi vale, ma na iu ai i lona mauaina o le finagalo malie o le Atua. “O le mea lava lea ua matuā faaeaina ai o ia e le Atua, ma foaiina atu ia te ia o le suafa e silisili i suafa uma lava.” (Filipi 2:5-9) O le ā se manuia sili e ono mafai ona maua e so o se foafoaga faiola? Sa ia faafiafia lona Tamā i se tulaga sa lē mafaia e se isi lava foafoaga faiola ona faia, ma sa ia faia lenei mea e aunoa ma se agaga losilosi vale po o o le fia tauva.—Faataoto 27:11.

Sa faaalia e le anoanoai o agelu faamaoni lenei lava uiga. E ui lava o Iesu sa avea ma ulu i agelu uma, na maulalo ifo teisi o ia i lo o i latou ina ua afio mai i le lalolagi, ae sa latou auauna ma le loto malilie mo ona manaoga. E manino lava la, sa leʻi faatagaina ni o latou manatu e faaaogā sese ai lenei avanoa ma taumafai ai e suia faamalosi o ia i le avea o le Agelu Sili.—Mataio 4:11; 1 Tesalonia 4:16; Eperu 2:7.

Ua iloatino foi le leʻi iai o ni o latou uiga fia tauva, pe a tatou talanoaina le auala na latou tali atu ai i le fuafuaga a le Atua ina ia faaeaina nisi o tagata lē lelei atoatoa i se olaga faalelagi e lē mafai ona oti, ma i lea tulaga, o le a avea ai i latou ma “faamasino i agelu.” (1 Korinito 6:3) E anoanoai le tamaoaiga o le poto masani o agelu i le auaunaga ia Ieova, ma e sili mamao atu foi ona tele lo latou tomai e faataunuu ai mea lelei na i lo o tagata lē lelei atoatoa. Ae o loo auauna fiafia pea agelu mo ē faauuina o i le lalolagi, e lē taitai ona lotoleaga i ni mea o le a maua e i latou na. (Eperu 1:14) O o latou uiga lelei, e lē fia tauva, ua mafai ai ona latou faaauau pea i le auaunaga i luma o le nofoalii o le Alii Pule Silisili Ese o Ieova.

Ia, seʻi manatu i auauna faamaoni a le Atua i aso anamua o ē o le a toe faatutuina mai i le lalolagi. O Aperaamo, sa o se faaaoaoga mataina o le faatuatua, ma na taʻua o ia “ma tamā o e faatuatua uma lava.” (Roma 4:9, 11) Sa faataatia e Iopu se faaaoaoga tutasi o le tumau. (Iakopo 5:11) O Mose, “na matuā agamalu lava . . . e sili lava i tagata uma o i le lalolagi,” na ia taitaiina le nuu o Isaraelu i le saolotoga. (Numera 12:3) O ai i tagata lē lelei atoatoa na faataatia se faaaoaoga e sili ona lelei o le faatuatua, tumau, ma le loto maulalo na i lo o nei tagata? Ae peitai, ua iai i latou i le faasologa mo ē ulu atu i le nofoaga faalelalolagi o le Malo o le Atua. (Mataio 25:34; Eperu 11:13-16) O le a faatulagaina foi i latou e pei o Ioane le Papatiso, e maulalo ifo i “lē aupito itiiti i le malo o le lagi.” (Mataio 11:11) Po o le a faitio mai ea i latou ma tausisi mai faapea, o lo latou faatuatua, tumau po o le agamalu, e tutusa lelei pe sili mamao atu foi ia i latou na ua tuuina atu i ai le ola faalelagi? Ma le mautinoa lava, e leai! O le a avea i latou ma tagatanuu faalelalolagi fiafia o le malo o le Atua.

I aso nei foi, o se mea fiafia le siomia e tagata e leai ni uiga fia tauva. O Yasuo, lea na taʻua i le uluai mataupu, sa matuā tele ana aitalafu ona o le manao tele i le oa ma leiloa uma ai ana mea totino. Na lafoaia o ia e ana “uo”. A o amata ona suesueina e lana avā le Tusi Paia ma Molimau a Ieova, sa alu atu o ia i a latou sauniga ona ua salamō i mafatiaga na ia faia i lona aiga. Mulimuli ane, na ia lafoaia le fia tauva ma avea ai o se tasi o Molimau a Ieova. Ua fiafia nei o ia ona ua siomia e uo Kerisiano, o ē e naunau e fesoasoani atu ia te ia i taimi o mafatiaga.

Le Auala e Tausia ai le Filemu o le Mafaufau

E lē faigofie pea ona tausia le filemu o le mafaufau i se sosaiete lē alofa ma le fia tauva. E lelei mo i tatou ona mātau e faapea, e tausalaina e le Tusi Paia “le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua,” e faapea, “o galuega a le tino” ua taofia ai tagata mai le ulufale atu i le Malo o le Atua. O nei galuega uma e fesootai ma le agaga fia tauva. E lē lētioa ona faalaeiau atu le aposetolo o Pauro i tagata Kalatia e faapea: “Aua neʻi avea i tatou ma ē mitamita vale, aua neʻi feluiai, aua neʻi felosiai.”—Kalatia 5:19-21, 26.

I lenei manatu autū, na faailoa mai ai i le tusi a Pauro le ki e mafai ai ona faafesagaia tauvaga mitamita vale. Na ia faapea mai: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia; e le faatulafonoina mea faapena.” (Kalatia 5:22, 23) E fesoasoani fua o le agaga ia i tatou e liaiina ese ai mai i o tatou mafaufau le felosiai. Seʻi manatu i le uiga o le alofa e fai ma faaaoaoga. Ua faamatala mai e Pauro e faapea: “E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie.” (1 Korinito 13:4-7) O le atiina aʻe o le alofa, e mafai ai ona tatou liaiina ese le loto leaga, o se uunaiga malosi i le agaga o le fia tauva. Ua fesoasoani foi isi fua o le agaga ia i tatou e faamamā ese ai mai o tatou loto ma mafaufau ni faailoga o loo opea ai o le agaga faalēalofa o le fia tauva. Ioe, ona o le pulea totino, o le a lē pine ae mafai ai ona faatoilaloina so o se uunaiga e fia tauva i isi e tusa lava po o ā iuga!—Faataoto 17:27.

Ae peitai, ina ia mafai ona atiina aʻe nei uiga, e tatau ona tatou faatagaina le agaga o le Atua e galue ia i tatou. E mafai ona tatou faalototeleina lenei galuega mamā a le agaga paia e ala i le finafinau i le tatalo, ma talosaga atu mo le agaga o le Atua e fesoasoani ia i tatou. (Luka 11:13) I le tali mai i a tatou tatalo, o le ā o le a tuuina mai e le Atua ia i tatou? Ua tali mai le Tusi Paia: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7.

Na iloa tino lenei mea i le tulaga o aposetolo o Iesu. E ui lava ina ua uma ona faatuina e Iesu le Talisuaga Afiafi a le Alii, i lona po mulimuli ma le au aposetolo, ae sa fefinauai pea lava i le po o ai o i latou e sili. (Luka 22:24-27) I taimi eseese, sa taumafai ai Iesu e fesoasoani atu ia i latou ina ia faasaʻosaʻoina o latou mafaufauga, ae sa mauaa pea ia i latou lenei uiga o le fia tauva. (Mareko 9:34-37; 10:35-45; Ioane 13:12-17) Ae peitai, i le taimi lava na latou maua ai le agaga paia pe tusa ma le 50 aso talu ona mavae lena finauga, na suia ai o latou uiga. Sa leai se finauga po o ai o le a fai ma fofoga fetalai i le motu o tagata fia iloa sa faapotopoto ai i lena aso Penetekoso.—Galuega 2:14-21.

Sa lē faatagaina so o se tagata e pule i luga o le faapotopotoga Kerisiano. Ina ua manaomia ona foia se faafitauli e uiga i le peritome, o Iakopo, o lē sa leʻi avea ma soʻo o Iesu i lena taimi o lona maliu, sa ia taitaia lena sauniga tāua. E leai se faailoga o se finauga na faia po o ai o le a taimua i lena feiloaiga a le vaega pule o le faapotopotoga Kerisiano. Maeu se suiga mai le taimi na aafia ai le au aposetolo i se agaga fia tauva! Faatasi ma le fesoasoani a le agaga paia, na latou toe manatua ai aʻoaʻoga a Iesu ma amata ona maua le uiga o ana lesona.—Ioane 14:26.

E mafai foi ona moni lena mea ia i tatou. Ona o le fesoasoani a le agaga paia, e mafai ai ona tatou foia le tagitagi mai pea o se uunaiga fia tauva i isi ina ia agaigai ai i luma i le faatoilaloina o i latou. Na i lo o lea, e mafai ona tatou maua le filemu o le mafaufau lea o loo silisili i mea uma e manatu i ai. Ua faamautinoa mai e le Tusi Paia ia i tatou e faapea, o le pogai o tauvaga lē alofa, o Satani le Tiapolo, o le a lē pine ae lafo i le to e lē gata, ma lē toe gaoioi ai. (Faaaliga 20:1-3) O le a lē toe iai ni felosiaiga i le va o tuaoi. Po o le iuga o le a avea o se sosaiete e lē agaigai i luma? E matuā leai lava! O le a siitia tagata i le lelei atoatoa, e lē ala i ni a latou lava tauvaga, ae e ala i le faatatauina o le taulaga togiola a Iesu ia i latou lava.—1 Ioane 2:1, 2.

O Keinosuke, lea na uluai taʻua, o lē na tofo i se tasi taimi i le mamalu o le manuia faalelalolagi, i le faatuina o se matatia i le faatauina atu o se aofaiga tele o taavale, na matuā vaivai o ia i le mafaufau ma le tino, ma na iu ai ina faamavae o ia mai lana galuega. Ua faapea mai o ia: “Ua faatumuina nei loʻu olaga i le olioli moni.” Sa oo ina ia iloa le pogai na manuia moni ai le soifuaga o Iesu. Ua ia maua nei le faafouina i so o se mea e mafai ona ia faia i le faapotopotoga a le Atua i le lalolagi aoao. Ua saunia ai nei o ia mo le lalolagi fou, lea o le a aunoa ma ni tauvaga. E mafai foi ona e vaai i se uluai vaaiga o lenei sosaiete o le lalolagi fou e ala i lou asiasi atu i se tasi o Maota o le Malo i lou vaipanoa ma auaufaatasi ma Molimau a Ieova.

[Ata i le itulau 7]

O le filemu ma le felagolagomai, o le a olioli ai le sosaiete faaletagata i le lalolagi fou a le Atua