Ia Atiina aʻe le Agamalu

“Ia iloa lo outou agamalu e tagata uma lava; ua lata mai le Alii.”—FILIPI 4:5.

1. Aisea ua faigata ai le faaalia o le agamalu i le lalolagi o iai nei?

“O LE tagata agamalu”—na taʻua e se tagata fai nusipepa i Egelani o Sir Alan Patrick Herbert e faapea, e lē taitai ona iai se tagata faapea o soifua. E moni, atonu e iai taimi e foliga mai ai ua lē o toe iai lava ni tagata agamalu o soifua i lenei lalolagi feʻainaʻi. Ua valoia e le Tusi Paia e faapea o aso faigata, i “aso e gata ai,” o le a avea tagata ma ē “faasaua,” “faafefeteina,” ma e “tuumavaega”—i nisi faaupuga, ua leai se agamalu. (2 Timoteo 3:1-5) E ui i lea, e faatāuaina tele e Kerisiano moni le agamalu, ua latou iloa lelei o se tasi lea o uiga o le poto mai le Atua. (Iakopo 3:17) E leai so tatou lagona e faapea e lē mafai ona faaalia le agamalu i se lalolagi ua lē o iai le agamalu. Na i lo lea, tatou te taliaina ma le mautinoa le luitau o i fautuaga faagaeeina a le aposetolo o Pauro o loo i le Filipi 4:5 e faapea: “Ia iloa lo outou agamalu e tagata uma lava.”

2. E mafai faapefea i upu a le aposetolo o Pauro o i le Filipi 4:5 ona fesoasoani ia i tatou ina ia fuafua pe faamata o tatou agamalu?

² Seʻi mātau mai pe faapefea i upu a Pauro ona fesoasoani e tofoina ai i tatou pe faamata o agamalu. Ua lē o se mataupu e faatatau i lo tatou manatu ia i tatou lava; ae e faatatau i manatu o isi ia i tatou, o le ā moni lava lo tatou vaavaa. Ua faaupu faapea e le faaliliuga a Phillips lenei fuaiupu: “E iai sona talaaga e agamalu.” E ono fesili ifo le tagata lava ia, ‘O faapefea loʻu tulaga moni i le vaaiga a tagata lautele? Pe o iai ea soʻu talaaga o se tagata e agamalu, gauai, ma faapelepele? Po o i le isi itu, po o lauiloa ea aʻu o se tagata e pulepule tutū, soonafai, po o le faaulumalō?’

3. (a) O le ā ua uiga i ai le upu Eleni ua faaliliuina o le “agamalu,” ma aisea ua aogā tele ai lenei uiga? (e) Atonu e mafai faapefea e se Kerisiano ona aʻoaʻoina ina ia maua atili le agamalu?

³ O lo tatou talaaga moni e tusa ai ma lenei vala, o le a faaatagia atu ai po o le ā le tele o tatou faataitai ai ia Iesu Keriso. (1 Korinito 11:1) Na faaatagia atu ma le atoatoa ona lelei e Iesu le faaaoaoga silisili a lona Tamā o le agamalu a o iai i le lalolagi. (Ioane 14:9) O le mea moni, ina ua tusi Pauro i inei e faatatau i le “agamalu ma le alofa [“lē gaoiā ma le agalelei” NW] o Keriso,” o le upu Eleni na ia faaaogā i inei mo le agalelei o le (e·pi·ei·kiʹas), o le isi o ona uiga o le “agamalu” po o le “gauai,” i se uiga moni. (2 Korinito 10:1) Ua faaupuina e le Expositor’s Bible Commentary lenei mea “o se tasi o upu e sili i le faamatalaina o uiga o i le Feagaiga Fou.” Ua faamatala ai se uiga e matagofie tele, o lea na faaupu ai e se tasi tagata poto lea upu e faapea o le “agamalu matagofie.” O lea la, seʻi o tatou talanoaina ni ala se tolu na faatinoina ai e Iesu le agamalu, e pei o lona Tamā o Ieova. Atonu o le a aʻoaʻoina ai i tatou i le faatuputeleina o lo tatou agamalu.—1 Peteru 2:21.

“E Nofo Sauni e Faamagalo atu”

4. Na faapefea ona faaalia e Iesu ia lava o lē e “nofo sauni e faamagalo atu”?

⁴ I le pei o lona Tamā, na faaalia e Iesu le agamalu e ala lea i lona “Nofo sauni e faamagalo” ma toe faamagalo atu i le tele o taimi. (Salamo 86:5, NW) Manatunatu i le taimi na faafitia faatolu ai e Peteru lana uo mafana o Iesu, i le po ina ua pueina o ia ma faamasinoina. Na uluai fetalai Iesu e faapea: “Ai se e faafiti foi ia te au i luma o tagata, ou te faafitia foi o ia i luma o loʻu Tama.” (Mataio 10:33) Pe sa pulepule tutū Iesu ma faatatau atu lenei tulafono ia Peteru? E leai; na asiasi totino atu Iesu ia Peteru ina ua faatuina aʻe o Ia, e lē taumatea ina ia faamafanafana atu ma faamatalaloto i lenei aposetolo loto nutimomoia ma ua salamō. (Luka 24:34; 1 Korinito 15:5) E leʻi leva talu mai lea mea, na faatagaina ai e Iesu ia Peteru ina ia maua ni tiute tauave tāua. (Galuega 2:1-41) Ua matuā faatinoina ai i inei le matagofie o le agamalu! Pe ua lē avea ea lenei mea o se faamafanafanaloto pe a manatu atu faapea ua tofia e Ieova ia Iesu o le Faamasino i tagata uma?—Isaia 11:1-4; Ioane 5:22.

5. (a) O le ā le talaaga faavae e tatau ona iai i le va o toeaina ma mamoe? (e) O ā mataupu atonu e autaluina e toeaina a o leʻi faafoeina se mataupu taufaamasinoga, ma aisea?

⁵ Pe a galulue toeaina o ni faamasino i le faapotopotoga, latou te taumafai e mulimulitui i le faaaoaoga agamalu a Iesu. Latou te lē mananao e matataʻu mamoe ia i latou faapei o ni faaoosala. Na i lo lea, latou te taumafai e faaaoao ia Iesu ina ia mafai e mamoe ona iai ni lagona malupuipuia a o faatasi ma i latou o ni leoleo mamoe agaalofa. I mataupu taufaamasinoga, latou te faia taumafaiga uma lava ina ia maua le agamalu, ma nofo sauni e faamagalo atu. A o leʻi tauaaoina mataupu faapea, o nisi toeaina ua latou iloa le aogā o le autaluina o le mataupu o loo i le Olomatamata o Novema 1, 1992, i mataupu, “O Ieova, o le ‘Faamasino o le Lalolagi Uma,’ e lē Faailoga Tagata” ma le “Toeaina, Ia Faamasino ma le Amiotonu.” I le faia faapea e mafai ai ona latou manatua le aotelega o ala e fai ai faamasinoga a Ieova: “E mausalī i tulaga e manaomia ai, e alofa mutimutivale i tulaga e tatau i ai.” Ua lē o se mea sese le mafuli atu i le faaalia o le alofa mutimutivale i iuga tau faamasinoga pe afai e iai se faavae tatau e ao ona faia ai faapea. (Mataio 12:7) O se sese matuiā le soonafai po o le leai o se alofa mutimutivale. (Esekielu 34:4) E mafai la e toeaina ona alofia le sese e ala lea i le gaoioi e sailiili le ala e sili ona faaalia ai le agalelei, ma le alofa mutimutivale e tatau ai e faavae i le faamasinotonu.—Faatusatusa i le Mataio 23:23; Iakopo 2:13.

Ia Fetuutuunai Pe a Tulai mai ua Suia Tulaga

6. Na faapefea ona faaalia e Iesu le agamalu i le feagai ai ma le fafine Nuuese o lē na ulutinoina lana tama teine e temoni?

⁶ I le pei o Ieova, na faamaonia e Iesu e faapea, e vave ona suia ona ala po o le fetuunai e faatatau atu i tulaga fou e tulai mai. I se tasi o mea na tupu, sa augani atu ai se fafine o Nuuese ia te ia ina ia faamālōlō lana tama teine ua ulutinoina e temoni. I le taimi muamua, e tolu ni ala eseese na faailoa atu ai e Iesu o le a lē fesoasoani o ia i lenei fafine—muamua, e ala lea i lona lē tali atu ia te ia, lona lua, i lona tautino atu lea e leʻi auina mai o ia mo tagata o Nuuese, ae mo tagata Iutaia; ma o le lona tolu, e ala lea i lona faia o se talafaatusa na faamanino ai ma le agalelei lea lava manatu. Peitai ane, sa oleole atu pea le fafine e ui lava i nei mea uma, ua faapea ona aliali atu ai e moni sa tele lona faatuatua. I le amanaiaina o lenei tulaga mataina, na silafia loa e Iesu e lē tatau ona popona i le tausia pea o se tulafono masani; peitai i le taimi lea ua tatau loa ona fetuutuunai e tusa ai ma mataupu silisili e sili atu ona lelei.a O lea, na faia ai e Iesu le mea tonu lava lea na ia faailoa atu i le fafine na te lē faia. Na ia faamālōlōina le tama teine a le fafine!—Mataio 15:21-28.

7. O ā auala e ono mafai e mātua ona faaalia ai le agamalu, ma aisea?

⁷ Pe ua tele ina iloa i tatou o ni tagata faapea, tatou te fiafia e fetuutuunai pe a talafeagai ai? E manaomia e matua ona faaalia soo lea ituaiga o agamalu. Talu ai ona e maʻoti le eseesega o tamaiti, o auala mo le tausia aʻe e aogā mo le isi tamaitiiti, atonu e lē fetaui ma talafeagai mo le isi. E lē gata i lea, a o tutupu aʻe tamaiti, e suia foi ō latou manaoga. Pe ua lē tatau ea ona toe fetuunai le taimi po o le itula o le sā a mātua, le itula o loo faatalitalia e mātua ua tatau ona iai i le fale tamaiti? Pe e lē o manaomia ea ona fetuunai le suesuega ina ia faia i se tulaga tiotio ma maua mai ai aogā? Pe afai ua soona tali faasaʻeā atu se mātua i se masei laititi, pe faamata e lotomalie o ia (le tamā po o le tinā) e faaalia le lotomaulalo ma toe faaleleia le mataupu? O mātua e faapea le gauai, latou te lē faaonoono atu ia latou fanau ma o le a latou lē lafoaia ai foi Ieova.—Efeso 6:4.

8. E ono mafai faapefea e toeaina o le faapotopotoga ona taimua i le fetuutuunai atu lea e faatatau i manaoga e tulai mai i le oganuu?

⁸ O toeaina foi e manaomia ona latou fetuutuunai pe a tulai mai ni suiga po o ni tulaga fou, i le taimi e tasi latou te lē faagutugutulua i tulafono mautinoa a le Atua. I le faafoeina o le vaaiga o le galuega talaʻi, pe o e mataalia ea i suiga o tulai mai i le oganuu? E suia vala o le olaga o ola ai tagata o tuaoi, atonu ua lelei loa le faia o le talaʻiga i afiafi, i magaala, po o le talaʻi atu e faaaogā ai le telefoni. O le faatatau atu i tulaga faapea, e fesoasoani lea ia i tatou e faamaeʻaina la tatou sāvali o le talaʻi atu i se auala e sili ona aogā. (Mataio 28:19, 20; 1 Korinito 9:26) Sa fai ma masani a Pauro le fetuutuunai ina ia talafeagai ma ituaiga uma o tagata i lana faiva. Pe tatou te faia foi le mea lava lea e tasi, e fai ma faaaoaoga, e ala lea i le suesue ina ia lava lo tatou silafia e faatatau i lotu ma aganuu a atunuu o tatou nonofo ai ina ia mafai ona fesoasoani atu ai i tagata?—1 Korinito 9:19-23.

9. Aisea e lē tatau ai i se toeaina ona maumauai i le faafoeina lea o faafitauli i auala masani e pei ona ia faia ai i taimi ua mavae?

⁹ A o agai atu ina sili ona faigata nei aso e gata ai, atonu e tatau foi i leoleo mamoe ona fetuutuunai e faatatau atu i le faigata ma le lavelave ma le faalemanuia o nisi o faafitauli o loo feagai nei ma le latou lafu. (2 Timoteo 3:1) Toeaina e, e lē o se vaitaimi lenei mo le pulepule tutū! E mautinoa lava o le a lē maumauai se toeaina i le auala e faafoeina ai faafitauli e pei ona faia i taimi ua mavae pe afai o lana auala ua lē o toe aogā, po ua ese foi ni mataupu ua lomia mai e le “auauna faamaoni ma le mafaufau” e talafeagai i ia mataupu. (Mataio 24:45; faatusatusa i le Failauga 7:10; 1 Korinito 7:31.) Na fesoasoani atu ma le faamaoni se tasi toeaina i se tuafafine lotomafatia o lē na manaomia tele e ia se tasi e faalogologo lelei atu ia te ia. Peitai ane, sa manatu le toeaina e lē matuiā tele le tulaga o le lotomafatia o le tuafafine, ma na ia tuuina atu ni vaifofo faigofie. Ona lomia mai loa lea e le Sosaiete o le Olo Matamata ni faamatalaga e faavae i le Tusi Paia e fetaui tonu ma le faafitauli o le tuafafine. Na faamautinoa e le toeaina lona toe talanoa atu i le tuafafine, i lea taimi na faaaogā ai le mataupu fou ma faaalia le tigā alofa i ona mafatiaga. (Faatusatusa i le 1 Tesalonia 5:14, 15.) Maeu se faataitaiga i na lelei o le agamalu!

10. (a) E tatau faapefea i toeaina ona faaalia atu se uiga gauai i le feagai ai o le tasi ma le isi faapea foi ma le tino o le autoeaina? (e) E ao faapefea ona silasila le tino o le autoeaina i ē e faaalia le lē agamalu?

¹⁰ E manaomia foi e toeaina ona faaalia le uiga gauai atu o le tasi i le isi. Pe a faatasitasi le tino o le au toeaina, maeu le tāua o le lē pulea malosi e se toeaina e toatasi o le faatasiga! (Luka 9:48) O le toeaina o loo faataimua e faapitoa lava le manaomia o le pulea lelei o ia e tusa ai ma lenei vala. Ma pe afai e ese mai ni manatu o se toeaina e toatasi pe toalua mai le mea ua ioe uma iai le tino o le au toeaina, e lē manaomia la ona faatautūtū pea i laua ia faia e tusa ai ma ō la manatu. Na i lo le faia faapea, e tatau ona gauai i laua pe afai e leai se mataupu silisili o le Tusi Paia o aafia ai, ma ia manatua lelei o le isi mea o loo manaomia mai i toeaina o le agamalu. (1 Timoteo 3:2, 3) I le isi itu, e tatau foi i le tino o le au toeaina ona manatua lelei sa aʻoaia e Pauro le faapotopotoga i Korinito ona o le ‘onosai pea i tagata lē agamalu’ o ē na faailoa atu i latou “o aposetolo pepelo.” (2 Korinito 11:5, 19, 20, NW) O lea e tatau ona naunau i latou e fautuaina se uso ā toeaina o sē e faaulumalo, ma lē agamalu lana amio, ae e tatau foi i toeaina ona faia i le agalelei ma le lē gaoiā.—Kalatia 6:1.

Agamalu i le Faatinoina o le Pule

11. O le ā le eseesega sa iai i le auala na faatino ai e taʻitaʻi lotu Iutaia i le vaitaimi o Iesu le pule ma le auala na faia ai e Iesu?

¹¹ A o iai Iesu i le lalolagi, na matuā aliali manino atu lona agamalu i le auala na ia faatino ai lana pule mai le Atua. Pagā se eseesega mamao na iai o ia mai taʻitaʻi lotu o ona vaitaimi! Seʻi manatu i le mea lenei e fai ma faaaoaoga. Na faasaina e le tulafono a le Atua le faia o se galuega i le Sapati, e oo lava i le aoaoina mai o ni fafie. (Esoto 20:10; Numera 15:32-36) Na mananao taʻitaʻi lotu ina ia pulea atoatoa tagata e tusa ai ma le faatatauina o lena tulafono. O lea na latou faatulafonoina ai e i latou lava pe o le ā le mamafa o se mea e ono mafai e se tagata ona tauave i le Sapati. Na latou faatulafonoina e faapea: e sa ona tauaveina se mea e sili atu lo latou mamafa na i lo mati mago e lua. Na latou faasaina foi seevae e faamau i fao, ona sa manatu i latou o le mamafa o fao o i le seevae o le a mafai ai ona faaupuina faapea ua faia se galuega i le taimi e sii ai i luga! Ua taʻua e faapea, pe tusa ma le 39 tulafono na faia e le au aʻoaʻo tulafono e faaopoopo atu i tulafono a le Atua i le Sapati, ma latou faafaulai atu foi iai ma isi tulafono faaopoopo. I le isi itu, sa leʻi taumafai Iesu e pulea tagata i le faamāsiasia o i latou i le tuu atu i ai o le mau tulafono po o le faatutū o ni tulaga mausalī e faigata ona faatinoina.—Mataio 23:2-4; Ioane 7:47-49.

12. Aisea e mafai ai ona tatou fai atu sa leʻi maluelue le finagalo o Iesu e tusa ai ma tapulaa amiotonu a Ieova?

¹² Pe tatou te manatu ea la e faapea, sa leʻi tausia atoatoa e Iesu tulaga amiotonu a le Atua? E mautinoa lava na ia tausia! Na ia malamalama lelei o le a sili ona aogā tulafono pe a goto ifo i loto o tagata mataupu silisili o loo uiga i ai na tulafono. A o taumafai le au Faresaio e pulea tagata i le faafaulai atu i ai o tulafono, peitai na taumafai Iesu e pāʻia loto. E fai ma faataitaiga, na ia silafia lelei e leai lava se fetuunaiga e faia pe a faatatauina le tulafono a le Atua e tusa ai ma le “sosola ese. . .i le faitaaga.” (1 Korinito 6:18) O lea na lapatai e Iesu tagata e tusa ai ma mafaufauga e ono oo atu ai i le faia o amioga lē mamā. (Mataio 5:28) O aʻoaʻoga faapea e sili atu ona tele se atamai o iai ma le faautauta na i lo le faavaeina o tulafono maumaututū e tausisi atu i ai.

13. (a) Aisea e tatau ai i toeaina ona alofia le faia o ni tulafono ma ni poloaiga lē mafetuutuunaia? (e) O ā nisi o vala e tāua ai le amanaiaina o le loto fuatiaifo o tagata taitoatasi?

¹³ O uso mautofiga foi i aso nei e faapea foi ona naunau ina ia pāiʻa loto o tagata. O lea, latou te alofia ai le faavaeina o ni tulafono maumauai, lē mafetuutuunaia, po o le avea o ō latou lava lagona ma manatu e fai ma tulafono. (Faatusatusa i le Tanielu 6:7-16.) Mai i lea taimi i lea taimi, ua toe faamanatu mai ai ma le agalelei ni mataupu e faatatau i laei ma teuga, ma atonu ua ono ma talafeagai lelei e tusa ai ma manaoga ua tulai mai, ae e mafai ona faaleaogāina e se toeaina lona tulaga o le avea ma se tagata agamalu pe afai o le a inainā pe taumafai e faatulai atu foi ni tulafono e atagia ai teuga ma laei la e fiafia lava ia i ai. O le mea moni lava, e tatau i tagata uma o i le faapotopotoga ona alofia le taumafai e pulea isi.—Faatusatusa i le 2 Korinito 1:24; Filipi 2:12.

14. Na faapefea ona faaalia e Iesu le agamalu e tusa ai ma mea na ia faatalitalia i isi?

¹⁴ Atonu e lelei foi i toeaina ona tilofaia i latou i se tasi o vala nei: ‘Pe o oʻu faaalia ea le agamalu e tusa ai ma mea o oʻu faatalitalia isi latou te faia?’ Sa mautinoa le faia faapea e Iesu. Na ia faaalia e lē aunoa i ona soo e faapea, e pau le mea o ia faatalitalia mai ia i latou o ā latou taumafaiga ia ma le loto atoa ma e tāua tele lea ia te ia. Na ia viiviia le fafine mativa ua oti lana tane ona o lana foai o tupe iti e lua e faatauvaa. (Mareko 12:42, 43) Na ia vaoia ona soo ina ua latou faitioina le meaalofa taugata a Maria, i lona fetalai atu: “Tuupea ia ia te ia. . .Ua faia e ia le mea ua ia mafaia.” (Mareko 14:6, 8) Sa agamalu foi o ia ina ua lē taulau ona onosai faatasi ma ia ona soo. Mo se faataitaiga, e ui lava ina sa augani atu o ia i ona soo e toatolu sa sili ona mafuta i ai e aua neʻi momoe ma mataala pea faatasi ma ia i lea po na faalataina ai o ia, ae na latou tuulafoai o ia e ala i le faatolu ona maua mai o momoe. Peitai, na ia fetalai atu ma le agaalofa: “Ua manao i ai le loto, a o le tino ua vaivai.”—Mareko 14:34-38.

15, 16. Aisea e tatau ai i toeaina ona faaeteete ina ia lē soonafai faamalosi le lafu po o le faamataʻu atu i ai? (e) Na faapefea e se tasi o tuafafine faamaoni ona iloa fetuutuunai mea na ia faatalitalia mai i isi?

¹⁵ E moni, na faalaeiau atu Iesu i ona soo ina ia ‘latou taumafai e faamalolosi.’ (Luka 13:24) Ae na te leʻi faatauanauina malosi i latou ina ia faia faapea. Na ia faagaeeina i latou, faataatia le faataitaiga, faataimua le ala, ma saili ina ia pāʻia o latou loto. Na ia tuu atu ma le mautinoa i le agaga o Ieova na te faataunuuina isi mea uma. E tatau foi i toeaina i aso nei ona faalaeiau i le lafu ina ia auauna ia Ieova ma le loto atoa, ae e tatau ona alofia le sasaina o i latou e ala i le faamāsiasiina po o le faaoo atu iai o ni faalogona faapea ua lē taulau i le fai atu e lē o taitai lava po ua lē aogā foi mea o latou faia nei mo le auaunaga ia Ieova. O se faiga faatauanau maumauai ina ia “faia nisi mea se tele, faia nisi mea se tele, faia ma nisi mea se tele!” atonu o le a faavaivaia ai loto o ē o loo faia mea uma i le tele e gata mai ai lo latou malosi. Pagā se faanoanoa e oo iai pe afai e fafau aʻe e se toeaina sona vaavaa o le “faafaigata ona faamalieina”—e eseese mamao ma le agamalu!—1 Peteru 2:18, NW.

¹⁶ E ao ia i tatou uma lava ona agamalu e tusa ai ma mea o tatou faatalitalia i isi. Na tusi mai se tasi tuafafine ina ua tuua e i laua ma lana tane le tofiga faamisionare ina ia tausia lona tinā ua gasegase e faapea: “Ua faigata tele nei taimi mo i matou le autalaʻi i inei i faapotopotoga. I le taimi sa iai i le auaunaga mo le matagaluega ma le itumalo, sa malutia mai le tele o na ituaiga o faafitauli, na faateia ma le tigā i maua ina ua oo mai. O se faaaoaoga, sa masani ona ou faapea ifo ia te aʻu lava ia, ‘Aisea e lē o ofoina ai e le tuafafine lale le lomiga saʻo mo lenei masina? Pe na te lē o faitauina ea le Faiva o le Malo?’ I le taimi nei, o lea ua ou iloa le mafuaaga. Mo isi, e na o le pau lava lena o le mea e mafai ona latou faia ina ia mafai ai ona latou ō atu [i le auaunaga].” Maeu le sili atu ona lelei o le faamālo atu i uso i mea e mafai ona latou faia na i lo mea e lē mafai ona latou faia!

17. Na faapefea ona faataatia e Iesu mo i tatou se faaaoaoga e tusa ai ma le agamalu?

¹⁷ Manatunatu i le faaaoaoga mulimuli a Iesu i le auala na faatino ai lana pule i se uiga agamalu. I le pei o lona Tamā, e lē puipuia ma le fuā e Iesu lana pule. Ua avea foi o ia ma se matai o le faasoa atu o le pule, i le tofiaina lea o lana vasega o le auauna faamaoni ina ia tausia “ana mea uma” o i le lalolagi. (Mataio 24:45-47) Ma e lē fefe o ia e faalogo atu i manatu mai isi. E masani ona fesili atu i lana aufaalogologo: “Pe ni a fa outou?” (Mataio 17:25; 18:12; 21:28; 22:42) E ao foi ona faapea i soo moni o Keriso i aso nei. E lē tatau ona avea sina pule ua ia i latou ma mafuaaga o le a lē naunau ai e faalogologo atu. Mātua e, faalogologo atu! Tane e, faalogologo atu! Toeaina e, faalogologo atu!

18. (a) Atonu e mafai faapefea ona tatou iloa pe o iai so tatou talaaga agamalu? (e) Atonu o le ā le mea tatou te filifilia e faia?

¹⁸ Ma le talafeagai ai, o i tatou uma taitoatasi e mananao e “iai se talaaga e agamalu.” (Filipi 4:5, Phillips) Peitai e faapefea ona tatou iloa e iai so tatou talaaga faapea? Ia, ina ua naunau Iesu e fia iloa po o le ā se tala a tagata ia te ia, sa ia fesili atu i ana aumea maufaatuatuaina. (Mataio 16:13) Aisea e lē mulimuli ai i lana faataitaiga? E mafai ona e fesili atu i se tasi o e talitonu i ai mo se tala faamaoni pe faamata e iai sou talaaga o le avea o se tagata e agamalu ma gauai. E mautinoa lava e tele ni mea e mafai e i tatou uma lava ona fai ina ia faaaoao atu i se tele e mafai ai i le faataitaiga a Iesu e atoatoa ona lelei o le agamalu! Ae maise lava pe afai o tatou faatinoina sina pule i isi, seia tatou mulimuli pea i faaaoaoga a Ieova ma Iesu o le faatinoina pea i taimi uma le agamalu, ia nofo sauni e faamagalo atu, liliu le tofa, po o le gauai atu pe a talafeagai ai. Ia mautinoa le avea o i tatou uma taitoatasi ma ē taumafai e “faaali atu le agamalu”!—Tito 3:2.

[Faaopoopoga i lalo]

O le ā Lau Tali?

◻ Aisea e tatau ai i Kerisiano ona mananao e agamalu?

◻ E mafai faapefea e toeaina ona faaaoao ia Iesu i le avea ma ē e nofosauni e faamagalo atu?

◻ Aisea e ao ai ona tatou taumafai ina ia pei o Iesu e fetuutuunai?

◻ E mafai faapefea ona tatou faatinoina le agamalu i ala o faia ai la tatou pule?

◻ E mafai faapefea ona tatou suesueina i tatou lava pe faamata o tatou agamalu moni?

[Ata i le itulau 15]

Na vave ona faamagalo e Iesu ia Peteru ina ua salamō o ia

[Ata i le itulau 16]

Ina ua faaalia e se fafine le tele o lona faatuatua, na silafia loa e Iesu e lē tatau ona popona i le tausia pea o se tulafono masani

[Ata i le itulau 18]

Matua e, faalogologo atu!

[Ata i le itulau 18]

Tane e, faalogologo atu!

[Ata i le itulau 18]

Toeaina e, faalogologo atu!