Faatumauina o le Sootaga Lelei i le Va o Toeaina ma Auauna o le Faiva

E LEʻI umi lava talu ona mavae le Penetekoso i le 33 T.A., na tulai mai ai se manaoga faanatinati i le faapotopotoga Kerisiano fou faatoa faavaeina. Na faavaeina se fuafuaga auā le tausia o fafine ua oti a latou tane. Peitai ina ua mavae sina taimi, “ua tupu ai le muimui o Elenisi ia Eperu, auā ua galo o latou fafine ua oti a latou tane i le tufatufaina o mea i aso fai soo.”—Galuega 6:1.

Na faalogo i ai le au aposetolo i nei muimuiga. “Ona talaʻiina lea e le toatinoagafulu ma le toalua o le toatele o le au soo, ua faapea atu, E le tatau ona matou tuua o le afioga a le Atua, a e tufatufa i oloa. O lenei, le au uso e, ina filifili ia ni o outou se toafitu e taʻuleleia, e tutumu i le Agaga Paia ma le poto, ia matou tofia i latou i lenei faiva.”—Galuega 6:2, 3.

Ua faataitaia e lenei mea le tāua o le mataupu silisili o le faamaopoopoga lelei i le faapotopotoga Kerisiano. O isi tane maufaatuatuaina ua faaaogā e vaaia mataupu e masani ai o le olaga, a o isi e vaaia mataupu tāua faaleagaga. E iai se ata muamua o lenei mea. I Isaraelu anamua, na tofia ai Arona ma ē na tupuga mai i a te ia ina ia avea ma ositaulaga e osia taulaga i le Atua. E ui i lea, na tuu atu e Ieova sa Levī e fesoasoani atu i a i latou e ala i le ‘tausia o mea uma o i le fale fetafai.’ (Numera 3:5-10) Ua faapena foi ona fesoasoani auauna o le faiva i ovasia i aso nei.

Vaega a Toeaina ma Auauna o le Faiva

Ua faaalia mai e le Tusi Paia agavaa tāua mo toeaina ma auauna o le faiva. (1 Timoteo 3:1-10, 12, 13; Tito 1:6-9) E lē tauva i latou ae e galulue mo le sini e tasi—o le atiina aʻe lea o le faapotopotoga. (Faatusatusa i le Efeso 4:11-13.) Peitai ane, e iai pea ni eseesega i ituaiga o galuega latou te faia i le faapotopotoga. Ua faapea mai le 1 Peteru 5:2 i ovasia: “Ia outou leoleo i le lafu mamoe a le Atua o ia te outou, ia tausi i ai ma le loto, a e le o le faatauanauina; aua foi neʻi faia ma le fia fai oloa, a o le loto fiafia.” Latou te tala atu i le Atua i auala o latou faia ai lenei tiute paia.—Eperu 13:17.

E faapefea auauna o le faiva? E lē o fai mai le Tusi Paia e ao ona tutusa ma toeaina lo latou tomai e aʻoaʻo atu. E fai si ese o ō latou tiute mai i toeaina. I le uluai seneturi T.A., e mautinoa sa tele mea faaletino e manaomia ona uaʻi atu i ai, o faasologa, mea o le olaga nei e ao ona faia, atonu e aofia foi le faatauina o mea auā le toe tusia o le Tusi Paia po o le faia foi o lea lava galuega o le toe tusia.

I aso nei, ua faaauau ona faia e auauna o le faiva galuega eseese tāua i le faapotopotoga, e pei o le vaaia o faamaumauga o tupe o le faapotopotoga ma oganuu, faasoaina atu o tusi ma mekasini, ma le vaaia o le Maota o le Malo. O nisi o auauna o le faiva o ē e iai le tomai e mafai foi ona faaaogā i le aʻoaʻo atu, i nisi taimi i le aʻoaʻo atu i Suesuega Tautusi a le Faapotopotoga, faia o vaega i Sauniga o le Auaunaga, ma le tuuina atu o lauga lautele.

Pe a galulue i se sootaga lelei toeaina ma auauna o le faiva, ona tausia loa lea o manaoga a le faapotopotoga—i se tulaga paleni—i le faaleagaga ma le faale-faalapotopotoga. Ona fiafia ai lea o sui o le faapotopotoga, malolosi, ma fua mai faaleagaga. Manatua upu na tusi atu ai Pauro i ē faauuina i Efeso: “E mai ia te ia ona tupu o le tino uma lava, o loo o faatatauina ma faasooina i ua uma lava e fesoasoani i ai, e tusa ma le galuega i le fua o itu tino taitasi, i iu ina atiina ae le tino e ia ia ia i le alofa.” —Efeso 4:16.

E ao i toeaina ma auauna o le faiva ona taumafai e atiae se sootaga lelei, o lona uiga, malilie faatasi, gatasitasi, soosoo tauau, ma le autasi. Peitai, o lea sootaga lelei e lē faafuasei ona maua. E ao ona galueina ma puipuia ma le faaeteete.

Mea e Mafai ona Faia e Toeaina

O le laasaga tāua o le iloa lea e lē pei le faiā a le toeaina ma le auauna o le faiva e pei o se matai i sana pologa po o se pule i le galuega i sana tagata faigaluega. O le mea o iai se sootaga lelei moni, e manatu toeaina i auauna o le faiva o uso a auauna a le Atua. (Faatusatusa i le 1 Korinito 3:6-9.) Ua faapea mai le Roma 12:10: “Ia tausolomua ona ava o le tasi i le tasi.” O lea, e lē fai e toeaina ni faiga e aliali atu ai le manatu faatauvaa i auauna o le faiva po o le fia pule. Latou te faalaeiau, na i lo faamalepe o taumafaiga lelei. O le faia lelei o auauna o le faiva e ono aliali mai ai o latou uiga lelei ma e fesoasoani i a i latou e olioli ai i a latou galuega i le faapotopotoga.

E ao foi i toeaina ona manatua lelei, o la latou galuega o le leoleoina lea o le lafu a le Atua o latou vaaia, e aofia ai uso o tautua o ni auauna o le faiva. E moni o na tane mautofiga ua faatalitalia e avea ma Kerisiano taumatuaina. E ui i lea, e pei lava o le isi vaega tele o le lafu, latou te manaomia se uai totino atu mai lea taimi i lea taimi. E ao i toeaina ona matuā naunau atu i lo latou tuputupu aʻe faaleagaga.

Mo se faaaoaoga, ina ua feiloai Pauro ma le taulealea talavou o Timoteo, na vave lava ona ia iloa le ono aogā o Timoteo, ma “manao . . . la te o ma ia.” (Galuega 16:3) Na tautua Timoteo o se aumea faimalaga faatasi ma Pauro, ma o le iuga na ia maua ai le toleniga tāua. Ioe, i tausaga mulimuli ane, na mafai ai ona tusi atu Pauro i Kerisiano i Korinito e faapea: “O le mea lea ua ou auina atu ai Timoteo ia te outou, o loʻu atalii pele lea ma le faamaoni i le Alii, o le na te faamanatuina outou i laʻu amio i le galuega a Keriso”!—1 Korinito 4:17.

Toeaina e, pe ua outou faaaogā atoatoa ea le lelei e maua mai i auauna o le faiva o i la outou faapotopotoga? Po o outou fesoasoani i a i latou ia agai i luma i le tuu atu lea i ai o fesoasoani totino i le lauga atu i le lautele ma sailiiliga i le Tusi Paia? Pe ua e valaaulia i latou e agavaa ina ia ō atu faatasi ma oe i ni asiasiga faaleoleo mamoe? Pe tou te galulue ma i latou i le faiva i le fanua? I le faataoto a Iesu i taleni, na fai atu ai le matai i ana auauna faamaoni: “Ua lelei ia, le auauna lelei e, ma le faamaoni”! (Mataio 25:23) Po o faapea ea lou agalelei i le viia ma le faamālo i auauna o le faiva o ē faia a latou tofiga i se auala lelei? (Faatusatusa i le Faataoto 3:27.) Afai e leai, po o le a lē lagona ea e i latou faapea e lē o talisapaia la latou galuega?

E tāua foi fesootaiga i se faiā tau galuega e lelei sootaga. (Faatusatusa i le Faataoto 15:22.) E lē tatau ona tofia atu pe faamatuu mai ni tiute i se auala tuulafoai po o le lē fuafua lelei. E tatau i toeaina ona talanoaina faatasi ai ma le tatalo, pe faapefea ona faaaogā le tomai o le uso i se tulaga e sili ona lelei mo le faapotopotoga. (Faatusatusa i le Mataio 25:15.) Pe afai ua faia se tofiga, e ao ona faailoa ma le manino atu i le uso po o ā tonu mea e ao ona ia faia. Ua lapatai mai le Faataoto 11:l4, e faapea: “A leai sē pule, [“leai se taitaiga lelei,” NW] ua malaia le nuu.”

Ua le o se mea lelei le tau ina taʻu atu i se uso na te tauaveina faamaumauga o tupe, o mekasini, po o tusi e sui ai le isi auauna. O nisi taimi, o le auauna ua faatoʻā tofia o le a tuu atu i ai le tele o faamaumauga sese po o le lē atoatoa lelei o le tusia o faamaumauga. Pagā se faanoanoaga e oo i ai! Ua faatonu mai le 1 Korinito 14:40 e faapea: “Ia faia mea uma lava ma le matagofie ma le sauni lelei.” E ao i toeaina ona faia le faataimuaga i le aʻoaʻoina o uso, faamasani i latou i faatulagaga a le faapotopotoga ma faataatia e i latou lava le faataitaiga i le mulimuli atu lea i na faatulagaga. Mo se faaaoaoga, e ao i toeaina ona fuafua le sueina o tupe a le faapotopotoga pe a mavae le taʻi tolu masina. O le lē faia o lena fuafuaga tāua e ono oo atu ai i faafitauli ma faavaivaia ai le faaaloalo o auauna o le faiva e tusa ai ma faatonuga tau le faalapotopotoga.

E ā pe afai ua faatalale le uso i le tauaveina o se tofiga patino? Na i lo le toesea faafuasei o ia mai i lona tofiga, e ao i toeaina ona talanoa le mataupu faatasi ma ia. Atonu o le faafitauli ona e leʻi lava le toleniina o ia. Afai o le a faaauau pea ona iai ni faafitauli o le uso i le faafoeina o lana tofiga, atonu o le a sili ona lelei ana taumafaiga i se isi tofiga.

E mafai foi e toeaina ona faatupuina le sootaga lelei e ala lea i le faaalia o le loto maulalo. Ua faalaeiau mai le Filipi 2:3 e faapea: “Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi uma ia te ia.” E ao i toeaina ona gauai pe a faasino atu e le tautua o ia e nofo i se nofoa patino o i le maota, ae aua le mafaufau faapea o ia o le toeaina e lē ao ona usiusitai atu. Atonu o loo faia e le tautua lana vaega o le mulimuli atu lea i le fautuaga ia fesuisuiai vaega o le maota e nonofo ai, ae e ao foi ona manatua e leai se tulafono e ao ai i tagata uma ona faia o lea.a E tatau i se toeaina ona alofia le manatu faatauvaa i se faaiuga i mataupu ua tofia atu i se auauna o le faiva pe afai o se mea tatau.

Auauna o le Faiva e Galulue mo le Sootaga Lelei

Na faapea mai le aposetolo o Pauro: “O auauna foi o le faiva e ao ona manatu mamafa i latou.” (1 Timoteo 3:8, NW) O lo latou manatu mamafa i tofiga—o se vaega o la latou auaunaga paia—e tele sona sao i le taofiofia o ni fefinauaiga e ono tuputupu aʻe. Afai o oe o se auauna o le faiva, pe e te faatinoina au tiute ma le maelega? (Roma 12:7, 8) Pe ua e sogasoga ea ina ia e maua le tomai i le faafoeina o ou tiute? Pe mau faalagolagoina ma faatuatuaina oe? Pe e te faaalia se agaga naunau pe a faia tofiga? O se tasi o auauna o le faiva i se atunuu o Aferika na te faafoeina tofiga eseese e tolu i le faapotopotoga. O le ā lona manatu? Fai mai o ia, “O lona uiga o le faaopoopo mai lea o nisi galuega se tele, ma e te lē oti i le tele o galuega.” E mautinoa lava, o i latou o ē e foai atu i latou lava mo nei galuega, e maua e i latou le tele o le fiafiaga.—Galuega 20:35.

E tele ni mea e mafai ona e faia e faaauiluma ai le sootaga lelei e ala lea i le galulue soosoo tauʻau ma toeaina. Ua faapea mai le Eperu 13:17, “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina i faia ma le olioli, a e aua ma le tiga; auā e le aoga lea ia te outou.” E moni, o toeaina, o tagata e lē lelei atoatoa, ma atonu e faigofie ona iloa ni o latou masei. E ui i lea, o se uiga faitio e faigofie lava ona fofoa mai ai le masalosalo. E mafai ona faaleaogaina ai lou olioli ma aafia leaga ai foi isi o le faapotopotoga. O lea ua aumaia ai e le aposetolo o Peteru lenei fautuaga: “Ia faapea o outou taulelea, ia usiusitai i toeaina; ia usiusitai outou uma lava o le tasi i le tasi . . . O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai.”—1 Peteru 5:5, 6.

O fautuaga ia e fetaui tele pe afai e te lagona ua faaleamanaia oe mo ni faaeaga o le auaunaga. Atonu ua e aapa atu “i le faiva o le epikopo,” ae e leʻi tofiaina lava. (1 Timoteo 3:1) O le manatu maulalo e mafai ona fesoasoani i a te oe ina ia faatumauina ai “se agaga faatalitali.” (Auega 3:24, NW) Na i lo le i ai o ni faalogona tigā i toeaina—e mautinoa lava o le a faatamaia ai le faiā—fesili atu i toeaina pe e iai ni vala o loo manaomia ona galue i ai e faaleleia. O lou naunau ma le faamaoni e talia fautuaga ma faaaogaina o le a manino lava le aliali mai o ni faamaoniga o lou agaʻi i luma faaleagaga.

O le loto maulalo tau Atua ma le faamaulalo e mafai ona fesoasoani i se auauna o le faiva ina ia tausia lona paleni lelei, pe afai e maoaʻe ni ona tomai po o le lelei foi o ana aʻoaʻoga ma le tulaga i le va fealoai. Atonu o le a avea o ni tofotofoga mo ia le taumafai lea e faasili aʻe o ia na i lo toeaina, po o le fia talā atu lea o ona tomai! Ua faamanatu mai i a i tatou e le Faataoto 11:2 e faapea: “O i ai le poto i e faamaulalo.” O se uso e faamaulalo e iloa e ia le mea e gata mai ai lona tomai. E naunau o ia e tautua lē paʻō i tua ma faaaogā lona tomai e lagolagosua atu ai i toeaina. E ono fesoasoani foi le faamaulalo i a te ia e iloa e faapea, atonu e tele se poto faalelalolagi o i a te ia, ae atonu o loo asa pea o ia i isi vala tāua i le poto faaleagaga ma le faautauta—o uiga atonu o loo lelei ai tele toeaina.—1 Korinito 1:26–2:13; Filipi 1:9.

E manino lava la, e tele se vaega tāua o faia e toeaina ma auauna o le faiva. E tele ni mea latou te faia faatasi auā le atiina aʻe o tagata uma o le faapotopotoga. Ina ia taunuu lea faamoemoe, e ao ona latou galulue faatasi i se sootaga lelei, “ma le loto maulalo lava ma le agamalu, ma le onosai, ia outou faapalepale le tasi i le tasi ma le alofa, ia taumafaia e outou ona taofi o le loto gatasi i la le Agaga i le noataga o le filemu.”—Efeso 4:2, 3.

[Faaopoopoga i lalo]

[Ata i le itulau 27]

E manatu toeaina i auauna o le faiva, e lē o ni ē e pule i ai, ae o ni uso a auauna a le Atua