E Ui Ina Faia i le Efuefu, ia Agaʻi Pea i Luma!

“Auā ua silafia lava e ia le mea na fai aʻi i tatou; ua manatu ia o le efuefu lava i tatou.”—SALAMO 103:14.

1. Pe ua saʻo ea le Tusi Paia i se tulaga faasaienitisi i le faapea mai ua faia le tagata i le efuefu? Faamatala.

I SE uiga faaletino, o i tatou o le efuefu. “Ona faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola; ona avea ai lea o le tagata ma tagata ola.” (Kenese 2:7) O lenei faamatalaga faigofie o le foafoaina o le tagata ua talafeagai lelei ma mea moni faasaienitisi. O elemeni uma o loo faia aʻe ai le tino o le tagata e maua foi i le “efuefu o le eleele.” Na faapea mai se tamaloa e suesue i vailaau, o le tino o se tagata matua o loo iai le 65 pasene o le okesene, 18 pasene o le kaponi, 10 pasene o le haitorosene, 3 pasene o le naitorosene, 1.5 pasene o le calcium, ma le 1 le pasene o le phosphorus, o le isi vaega o totoe o loo faia aʻe i isi elemeni. E faalētāua pe ua saʻo atoatoa nei faatatauga. E tumau pea le mea moni: “O i tatou o le efuefu”!

2. O le ā le tali atu ona o le auala na faia ai e le Atua le tagata ua fuaina mai i a te oe, ma aisea?

² O ai se isi e pei o Ieova o Lē e mafai ona foafoaina se meafaiola e sili ona lavelave i le faaaogaina na o le efuefu? E lelei atoatoa galuega a le Atua e aunoa ma se tauleagaina, o lea o lana filifiliga e fai le tagata mai le efuefu e lē tatau ona faitioina. O le mea moni, ona na faia e Lē Sili na Foafoaina Mea le tagata mai le efuefu o le eleele i se auala e maofa ai ma matagofie, ua faateleina ai lo tatou talisapaia o Lona mana e lē gata mai, tomai, ma le atamai e aogā.—Teuteronome 32:4, ma le faaopoopoga o i lalo; Salamo 139:14.

Le Suiga o Tulaga

3, 4. (a) I le foafoaina o le tagata mai le efuefu, o le ā le mea e leʻi fuafuaina e le Atua? (e) O le ā na faasino i ai Tavita i le Salamo 103:14, ma ua faapefea ona fesoasoani mai le manatu autū o le mataupu i a i tatou e faia sea faaiuga?

³ E iai tapulaa o meaola ua faia mai i le efuefu. Peitai, e leʻi fuafuaina lava e le Atua ina ia fai ma ni avega mamafa po o le taofiofia ai foi o i latou. E leʻi faia nei tapulaa ma mea e lotovaivai ai po o le lē fiafia ai. Ae e pei ona faaalia mai i manatu autū o upu a Tavita o i le Salamo 103:14 e faapea, o tapulaa o loo i le tagata e mafai ona mafua ai le lotovaivai ma iu ai i le lē fiafia. Aisea? Ina ua lē usiusitai Atamu ma Eva i le Atua, ona la faaoo mai ai lea o se suiga o tulaga mo lo la aiga i le lumanai. Ona tulai mai ai lea o se uiga fou o le faia i le efuefu.a

⁴ Sa leʻi tautala Tavita e faatatau i tapulaa e ono iai i tagata lelei atoatoa na faia mai i le efuefu, ae e faatatau i vaivaiga faaletagata e mafua mai ona o le lē lelei atoatoa ua tuufaasolo mai. A na fai o lea, semanū e lē mafai ona ia faapea mai e uiga i a Ieova: “O lē faamagaloina au amio leaga uma lava; o lē faamaloloina ou maʻi atoa uma; o lē faaolaina mai lou ola ai le tuugamau; [o lē] e lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga.” (Salamo 103:2-4, 10) E ui ina faia mai i le eleele, ae semanū e lē taitai lava ona sese ma agasala le tagata, pe ana tumau i le faamaoni ma manaomia ai se faamagaloga; faapena foi ona lē oo i ai ni faamaʻi e manaomia ai se faamalologa. E sili i na mea uma, semanū e lē oo ifo i le tuugamau, ma e na o le pau le ala e toe ola mai ai, o le toetu.

5. Aisea ua lē faigata ai mo i tatou ona malamalama i upu a Tavita?

⁵ I le avea ma ē ua lē lelei atoatoa, ua oo uma lava i a i tatou mea ia na taʻua e Tavita. Ua tu mai pea i o tatou luma ō tatou tapulaa ona o le lē lelei atoatoa. E oo i a i tatou le faanoanoa i nisi taimi pe a foliga mai ua faaleagaina ai lo tatou faiā ma Ieova po o ō tatou uso Kerisiano. Tatou te faanoanoa ona o ō tatou lē lelei atoatoa ma omiga mai le lalolagi a Satani e masani ona tuua ai i tatou ua leai se faamoemoe. Talu ai o loo vave le agaʻi atu o le pule a Satani i lona mutaaga, o lea ua faafaulai atu e lana lalolagi le tele o omiga i tagata a lautele ae maise lava i Kerisiano.—Faaaliga 12:12.

6. Aisea atonu e lagona ai e nisi Kerisiano le lotovaivai, ma e faapefea ona ono faaaogā e Satani lenei ituaiga lagona?

⁶ Pe o e lagona ea le faasolosolo ina faigata ona ola i se olaga faa-Kerisiano? Ua maua ni tala mai nisi Kerisiano e faapea, o le leva ona iai i le upu moni, o le tele foi lena o le foliga mai ua lē lelei atoatoa. Peitai, e foliga mai, ona ua tele ina latou iloa o latou lava lē lelei atoatoa ma le leai o so latou tomai e sui ai i le auala o mananao ai, e tusa ma tulaga lelei atoatoa a Ieova. Peitai ane, o nei mea moni o āuga masani ia a o faaauau ona tuputupu aʻe Kerisiano i le poto ma le sapaitalia o tapulaa amiotonu a Ieova. E ui i lea, e tāua ona tatou lē faatagaina lenei iloa e faalotovaivaia ai i tatou ma pue vae ai e le Tiapolo. I le gasologa o senituri, ua taumafai pea o ia e faaaogā le lotovaivai ina ia taulau ai lona faamoemoe ma lafoai ai e auauna a Ieova le tapuaiga moni. E ui i lea, o le alofa moni i le Atua, faapena foi ma le “matuā ʻinoʻino tele” i le Tiapolo, ua puipuia ai le toatele mai le faia faapea.—Salamo 139:21, 22; Faataoto 27:11.

7. I le ā le itu atonu e pei ai i tatou o Iopu i nisi taimi?

⁷ E tumau pea ona iai nisi taimi e lagona ai e auauna a Ieova le lotovaivai. O le lē fiafia i mea ua tatou faataulauina e ono avea ma pogai. O tulaga faaletino po o ni faiā faalēmanuia ma tauaiga, o uō, po o ē faigaluega faatasi atonu o loo aofia ai. Na matuā tumu le tagata faamaoni o Iopu i le lotovaivai o lea na ia ōle atu ai i le Atua e faapea: “E! fia natia aʻu e oe i le tuugamau ma ia e faaliloina aʻu, seia mavae atu lou toasa; ia e atofaina mai se aso mo aʻu, ma ia e manatua mai ai aʻu.” O lea, afai na mafai e tulaga faigata ona omia ai Iopu, “o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga,” ina ia lagona le lotovaivai, e lē faateia ai la i tatou i le tupu o le mea lava lea e tasi i a i tatou.—Iopu 1:8, 13-19; 2:7-9, 11-13; 14:13.

8. Aisea e mafai ai ona avea le lotovaivai i nisi taimi ma faailoga lelei?

⁸ Maeu le faamafanafana loto o le iloa e silasila Ieova i loto ma na te lē faagaloina faanaunauga lelei! Na te lē lafoaia lava i latou o ē e taumafai atoatoa ma le faamaoni e faamalie o ia. O le lotovaivai i nisi taimi, o le mea moni o se faailoga lelei, e aliali mai ai tatou te lē o manatu māmā i la tatou auaunaga i a Ieova. Silasila i ai mai i le itu lenei, o lē e lē o tauivi ma le lotovaivai, atonu e lē o iloa ona vaivaiga faaleagaga e pei o isi i a i latou lava. Ia manatua: “O lē manatu o loo o tu ia, ina faaeteete ia neʻi paū.”—1 Korinito 10:12; 1 Samuelu 16:7; 1 Tupu 8:39; 1 Nofoaiga a Tupu 28:9.

Na Faia Foi i Latou i le Efuefu

9, 10. (a) O le faatuatua o ai e lelei mo Kerisiano ona faaaoao i ai? (e) Na faapefea ona tali atu Mose i lona tofiga?

⁹ Ua faamauina i le Eperu mataupu e 11 ni molimau a Ieova o ē na faaalia le faatuatua malosi a o leʻi oo i le vaitaimi o Kerisiano. Ua faapea foi ona faia e Kerisiano o le uluai senituri ma i latou i aso nei. E tāua lesona e mafai ona aʻoaʻoina mai i a i latou. (Faatusatusa i le Eperu 13:7.) Mo se faataitaiga, o ai e sili aʻe sona faatuatua e pei o Mose e lelei mo Kerisiano ona faataitai i ai? Na valaaulia o ia ina ia faailoa atu le feau faafaamasinoga i le taʻitaʻi faalemalo sa sili atu ona malosi i ona taimi, le Farao o Aikupito. I aso nei, e tatau foi i Molimau a Ieova ona faalauiloa atu le feau faafaamasinoga tali tutusa i lotu sese ma isi faalapotopotoga e tetee i le Malo ua faavaeina o Keriso.—Faaaliga 16:1-15.

¹⁰ O le faataunuuina o lenei poloaiga e lē o se tofiga faigofie, e pei ona faaalia e Mose. Na ia fesili atu: “O ai ea aʻu nei, ou te alu atu ai ia Farao, ma aʻu aumaia le fanauga a Isaraelu mai Aikupito?” E mafai ona tatou malamalama i ona faalogona lē agavaa. Sa popole foi o ia po o le ā le tali a tagata Isaraelu ma faapea atu: “Faauta, latou te le talia mai aʻu, latou te le faalogo mai foi i laʻu upu.” Ona faamatala atu lea e Ieova i a Mose pe faapefea ona faamaonia ua ia faatagaina o ia, ae na iai foi i a Mose se tasi faafitauli. Na ia fai atu: “Le Alii e, o aʻu o le tagata e le iloa fai lauga, talu anamua, ma ona po nei ua e fetalai mai ai i lau auauna; ua le matala loʻu gutu.”—Esoto 3:11; 4:1, 10.

11. I le pei o Mose, atonu tatou te tali atu faapefea i a tatou tiute tauave faatiokarate, ae i le faaalia o le faatuatua, o le ā o le a mafai ona tatou mautinoa i ai?

¹¹ E iai taimi atonu tatou te lagona ai e pei o Mose. E ui ina iloa a tatou tiutefai faatiokarate, atonu tatou te tau mānatu po o le a faapefea ona faataunuuina uma na mea. ‘O ai aʻu o le a tatau ai ona ou feiloai atu i tagata, o isi e maualuluga tulaga tau i le va fealoai, tau tamaoaiga, po o le tulaga foi tau aʻoaʻoga, ma taumafai e aʻoaʻo atu i latou i ala o le Atua? O le a faapefea le tali mai a oʻu uso faaleagaga pe a fai aʻu tali i sauniga faa-Kerisiano, po o le faia o se lauga mai le pulelaa i le Aʻoga o le Faiva Faatiokarate? Pe o le a latou iloa mai ai loʻu lē agavaa?’ Ia manatua, sa faatasi Ieova ma Mose ma faaauupegaina o ia mo lona tofiga ona sa faatuatua o ia. (Esoto 3:12; 4:2-5, 11, 12) Pe afai tatou te faaaoao i le faatuatua o Mose, o le a faatasi Ieova ma i tatou ma faaauupegaina foi i tatou mo la tatou galuega.

12. E mafai faapefea e le faatuatua o Tavita ona faamalosiau i a i tatou pe a feagai ma le lotovaivai ona o agasala po o vaivaiga?

¹² So o se tasi lava e lotovaivai po o le lē fiafia ona o le agasala po o vaivaiga, e mafai ona pei o Tavita ina ua ia faapea mai: “Auā ua ou iloa e aʻu loʻu solitulafono; e le aunoa foi ona i ai i oʻu luma o laʻu agasala.” I lana aioiga i a Ieova, na toe faapea atu Tavita: “Ia ʻalo ou fofoga i aʻu agasala, ma ia e sōloi ese aʻu amio leaga uma.” Sa leʻi taitai lava ona ia faatagaina le lotovaivai e toesea ai lona faanaunau e auauna i a Ieova. “Aua e te lafoaiina aʻu i ou luma; aua foi e te aveeseina lou Agaga Paia ia te au.” Na mautinoa lava o Tavita o le “efuefu,” ae sa leʻi liliuese ai Ieova mai i a te ia, auā na faatuatua Tavita i le folafolaga a Ieova e lē inosia “le loto momomo ma le nutimomoia.”—Salamo 38:1-9; 51:3, 9, 11, 17.

13, 14. (a) Aisea e lē tatau ona avea ai i tatou ma soo o tagata? (e) Ua faapefea i faaaoaoga a Pauro ma Peteru ona faaalia ai na faia foi i laua i le efuefu?

¹³ E ui i lea, seʻi mātau, e ui ina tatou vāai i lenei “faapotopotoga [“molimau,” NW] o e matamata mai e faapea ona toatele” o se faalaeiauga, ina “ia tatou taufetuli ma le onosai i le ala tanu o i o tatou luma,” ae ua faatonuina i tatou ia aua neʻi avea ma ō latou soo. Ua poloaiina i tatou e mulimuli i tulagaaao o “Iesu o le na te taʻitaʻiina ma le faaatoatoaina le faatuatua,” ae lē o tagata agasala—e lē tatau foi ona faia faapea i aposetolo faamaoni o le uluai senituri.—Eperu 12:1, 2; 1 Peteru 2:21.

¹⁴ O aposetolo o Pauro ma Peteru, o ni pou tu i le faapotopotoga Kerisiano, na tausuai i nisi o taimi. Na tusi faapea Pauro: “Auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Aue o aʻu le tagata malaia!” (Roma 7:19, 24) Ma na taʻu atu e Peteru i le taimi o lona mautinoa nauā i a Iesu e faapea: “E ui lava ina tausuai o tagata uma ona o oe, ou te le tausuai lava aʻu.” Ina ua lapatai atu Iesu i a Peteru o le a na faafitia o Ia faatolu, na ʻaioso atu Peteru i ni upu tuufaafeagai i lona Matai i le mimita atu faapea: “E ui ina tā oti lava faatasi ma oe, ou te le faafiti lava ia te oe.” Mulimuli ane na ia faafiti i a Iesu, o se mea sese na ia tagi lotulotu ai. Ioe, o Pauro ma Peteru na faia i le efuefu.—Mataio 26:33-35.

15. E ui lava e moni na faia i tatou i le efuefu, o ā ni uunaiga ua i a i tatou ia agaʻi ai pea i luma?

¹⁵ Peitai e ui lava i o latou vaivaiga, o Mose, o Tavita, o Pauro, o Peteru, ma isi e pei o i latou, na manumalo mai na mea. Aisea? Ona sa malosi lo latou faatuatua i a Ieova, talitonu maumauai atu i a te ia, ma mafuta atu i a te ia e ui lava i masei. Na latou faalagolago atu i a te ia na te foai mai “le matuā tele o le mana.” Ma na te leʻi tuu atu i latou e paʻūū e aunoa ma le toe faatulai mai. Afai tatou te faatuatua pea, e mafai la ona tatou mautinoa pe a faia lo tatou faamasinoga, o le a talafeagai ai ma upu nei: “Auā e le amioletonu le Atua, na te le faagalogaloina la outou galuega ma le faamalosi i le alofa ua outou faaali mai ai i lona suafa.” Maeu se faaoso naunau ua aumaia i lenei mea i a i tatou ina ia tatou faamalolosi pea e ui lava i le mea moni sa faia i tatou i le efuefu!—2 Korinito 4:7; Eperu 6:10.

O le ā e Uiga i ai le Faia Mai le Efuefu mo i Tatou Taitoatasi?

16, 17. Pe a faamasinoina, ua faapefea ona faaaogā e Ieova le mataupu silisili ua faamatala mai i le Kalatia 6:4?

¹⁶ O mea ua tutupu, ua aʻoaʻoina ai le toatele o mātua ma faiaoga i le atamai o le faamasinoina o fanau po o tamaiti aʻoga e tusa ai ma tomai o tamaiti taitoatasi, ia lē faavae aʻe i le fefaatusatusai o tamaiti laiti po o uo i aʻoga. Ua talafeagai lenei ma se mataupu silisili ua i le Tusi Paia ua faapea ona taʻu atu i Kerisiano e mulimuli i ai: “Ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.”—Kalatia 6:4.

¹⁷ I le talafeagai ai ma lenei mataupu silisili, e ui lava ina feagai Ieova ma ona tagata i se vaega ua faamaopoopoina, na te faamasinoina foi i latou taitoatasi. Ua faapea mai le Roma 14:12: “E taitasi i tatou ma tala i lana amio i le Atua.” Ua silafia lelei e Ieova mea o loo faia ai ana auauna taitoatasi. Ua na silafia le auala o loo faia ai i latou i le foliga mai i le tino atoa foi ma le mafaufau, ō latou tomai, ō latou malosi ma vaivaiga na tupuga mai ma i latou, o avanoa o latou maua, e faapea foi ma lo latou faaaogaina o nei avanoa ina ia fua mai ai fua faa-Kerisiano. O fetalaiga a Iesu e faatatau i le fafine ua oti lana tane o lē na lafo ana tupe iti e lua i le mea e tuu i ai oa i le malumalu, ma lana tala faatusa o le saito na paʻū i le eleele lelei, o ni faaaoaoga faalaeiau mo Kerisiano o ē atonu e lagona le faavaivai ona o le faatusatusa ma le lē atamai o i latou lava i isi.—Mareko 4:20; 12:42-44.

18. (a) Aisea e ao ai ona tatou faanaunau ia iloa po o le ā le uiga o le faia i le efuefu mo i tatou taitoatasi? (e) Aisea e lē tatau ai ona tatou faanoanoa ona o se suesueina faamaoni o le tagata lava ia?

¹⁸ E tāua ona tatou faamautinoa pe o le ā e uiga i ai le faia mai le efuefu mo ō tatou lava tulaga taitoatasi ina ia mafai ona tatou auauna atu i se uiga atoatoa. (Faataoto 10:4; 12:24; 18:9; Roma 12:1) Seʻi vaganā lava ua tatou iloa atoatoa ō tatou lava vaivaiga ma masei ona faatoʻā mafai lea ona tatou mataalia i tulaga ma avanoa e manaomia ai ona faia se faaleleia atili. I le iloiloina o le tagata lava ia, tau ina ia aua lava neʻi o tatou faagaloina le mana o le agaga paia e fesoasoani i a i tatou e faaleleia atili ai. E ala mai i le agaga paia, na foafoaina ai le lalolagi aoao, na tusia ai le Tusi Paia, ma, i totonu o lenei lalolagi o loo mavae atu, ua fofoa mai ai se sosaiete o se lalolagi fou filemu. O lea o le agaga paia o le Atua ua mautinoa lava le tele o lona mana na te avatu ai i a i latou o ē e talosaga atu i ai, le atamai ma le malosi e manaomia ina ia tumau ai i le faamaoni.—Mika 3:8; Roma 15:13; Efeso 3:16.

19. O le ā e lē avea ai le faia o i tatou i le efuefu ma faamolemolega?

¹⁹ Maeu se faamafanafana loto o le iloa e manatua e Ieova o i tatou o le efuefu! Peitai, e lē tatau ona manatu ai e fai lea ma faamolemolega fetaui o le lē faaalia o se maelega po o le oo foi lava ina faia ai o mea sese. E matuā leai lava! O le silafia e Ieova o i tatou o le efuefu, o se faaalia mai lea o lona alofa agalelei. Ae tatou te lē mananao e avea i tatou ma tagata “faalematau . . . , ua liua e i latou le alofa tunoa o lo tatou Atua i le faamatāitu, ma ua latou faafiti i lo tatou Matai e toatasi ma lo tatou Alii, o Iesu Keriso.” (Iuta 4) O le faia i le efuefu ua lē o se faamolemolega lea e fai ai le amio faalematau. E taumafai se Kerisiano e tetee i faanaunauga sese, e faatoilaloina e ia lona tino e fai ma pologa, ina ia alofia ai le “faatiga i le Agaga Paia” o le Atua.—Efeso 4:30; 1 Korinito 9:27.

20. (a) O ā vala e lua ua ‘tele ai pea mea’ tatou te faia “i le galuega a le Alii”? (e) Aisea ua i a i tatou ai ni mafuaaga mo le mautinoa?

²⁰ I le taimi nei, a o faagasolo tausaga faaiu o le faiga o mea o le lalolagi a Satani, e lē o le taimi lenei e faifai malie ai—e lē faia faapea i mea e fesootai atu i le talaʻia o le Malo ma faapena foi ma le faatupuina aʻe atili o fua o le agaga o le Atua. O na vala uma ‘ua tele ai pea mea’ e mafai ona tatou faia. O le taimi lenei e ao ai ona tatou agaʻi i luma ma le faamalolosi, auā ua tatou “iloa e le se mea faaleaoga” lo tatou tautiga. (1 Korinito 15:58) O le a faatumauina i tatou e Ieova, auā ua faapea mai Tavita e uiga i a te ia: “Na te le tuuna e faavavau le amiotonu ia faagaeetia.” (Salamo 55:22) Maeu se olioli i le iloa e faapea ua faataga totino i tatou e Ieova ina ia faia se vaega i le galuega silisili ua tofia atu i tagata lē lelei atoatoa latou te faia—e ui lava ina faia i tatou i le efuefu!

[Faaopoopoga i lalo]

Pe Mafai ona E Faamatalaina?

◻ Ua faapefea ona eseese le Kenese 2:7 ma le Salamo 103:14 ina ua faasino atu i le faia o le tagata mai le efuefu?

◻ Aisea ua avea ai le mataupu e 11 o le tusi o Eperu ma faalaeiau i Kerisiano i aso nei?

◻ Aisea ua poto ai mo i tatou le faatatauina o le mataupu silisili ua faataatia mai i le Kalatia 6:4?

◻ E mafai faapefea i le Eperu 6:10 ma le 1 Korinito 15:58 ona fesoasoani e teena le lotovaivai?

[Ata i le itulau 10]

E faaaoao Kerisiano i le faatuatua o ō latou uso talitonu, ae latou te mulimuli i Lē Faaatoatoaina lo latou faatuatua, o Iesu