Olioli i a Ieova!

“Ia outou olioli i le Alii e le aunoa; ou te toe fai atu, ia outou olioli.”—FILIPI 4:4.

1. Aisea atonu tatou te tau mafaufau ai pe o le ā na uiga i ai upu a Pauro ina ua ia faapea mai, e ao i Kerisiano ona olioli e lē aunoa?

I ASO nei, atonu ua seāseā iai ni mafuaaga e olioli ai. O le tagata ua faia mai le efuefu, e oo foi i Kerisiano moni, e fetaiai ma tulaga e faapogaia ai faanoanoaga—o le leai o ni galuega, faamaʻia o le olaga, le maliliu o ē e pele, faafitauli i uiga totino, po o teteega mai aiga lē talitonu po o ē na avea muamua ma uo. O lea la, e faapefea ona tatou malamalama i timaiga a Pauro: “Ia outou olioli . . . e le aunoa”? Pe a tagaʻi atu i tulaga faalēmanuia ma tofotofoga e tatau i a i tatou uma ona onosaia, pe e mafai ona olioli pea? O le talanoaina o manatu autū o nei upu, o le a fesoasoani e faamanino ai lenei mataupu.

Olioli—Aisea ma e Faapefea?

2, 3. O le ā le tāua o le olioli, e pei ona faataitaia mai i mea na tutupu i a Iesu ma tagata o Isaraelu anamua?

² “Ia outou olioli i le Alii e le aunoa; ou te fai atu, ia outou olioli.” Atonu e toe fafagu mai e lenei mea i a i tatou upu na tuuina atu i tagata Isaraelu pe ā ma le 24 senituri ua mavae e faapea: “Auā o le fiafia ia Ieova o lo outou malosi lea,” pe e tusa ai ma le faaliliuga a Moffatt: “O le olioli i Lē Faavavau o lou malosi lea.” (Neemia 8:10) E aumaia e le olioli le malosi ma e pei o se ʻolo malosi e sola i ai se tasi mo le faamafanafanaga ma le puipuiga. Na fesoasoani tele foi le olioli i le tagata lelei atoatoa o Iesu ia onosai ai. “Na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.” (Eperu 12:2) Ma le manino lava, o le mafai ona olioli a o feagai ma faafitauli e tāua mo le faaolataga.

³ A o leʻi ulufale atu i le Nuu o le Folafolaga, na poloaia tagata Isaraelu e faapea: “Ia e olioli foi i mea lelei uma lava ua foaiina mai e Ieova lou Atua ia te oe ma lou aiga, o oe, ma lo sa Levī, ma le tagata ese o ia te oe.” E matuia iuga o le lē taulau ona auauna i a Ieova ma le olioli. “E maua mai oe i nei malaia uma, e tuliloa ia ia te oe, ma oo lava ia te oe, seia faaumatia oe . . . Auā ua e le auauna ia Ieova lou Atua ma le olioli, ma le fiafia o le loto, ona o le tele o mea uma.”—Teuteronome 26:11; 28:45-47.

4. Aisea atonu e lē taulau ai ona tatou olioli?

⁴ O lea, o se mea tatau mo le vaega totoe faauuina o aso nei ma a latou aumea o “isi mamoe” ona olioli! (Ioane 10:16) I le toe taʻua faalua e Pauro o lana fautuaga, i lona faapea mai, “ou te toe fai atu, ia outou olioli,” ua faatāua mai ai le olioli i mea lelei uma ua faia e Ieova mo i tatou. Pe o faapea ea i tatou? Po o matuā aafia i faasologa o le olaga i aso taitasi ma i nisi taimi ua galo ai i a i tatou le anoanoai o mafuaaga e ao ai ona tatou olioli? Po o faulalai ea le tele o faafitauli ua faapea ona puaoa ai la tatou vaai i le Malo ma ana faamanuiaga? Pe tatou te faataga isi mea—le solia o tulafono a le Atua, le lē amanaiaina o mataupu silisili faaleatua, po o le faatalale i tiute tauave faa-Kerisiano—e aveesea ai le olioli mai i a i tatou?

5. Aisea ua faafaigata ai e se tagata e lē agamalu ona ia maua le olioli?

⁵ “Ia iloa lo outou agamalu e tagata uma lava; ua lata mai le Alii.” (Filipi 4:5) O se tagata e lē agamalu, e lē o i a te ia le paleni lelei. Atonu e lē tausia e ia lona soifua maloloina lelei, ma tuu atu ai lona tino i faafitauli po o popolega e lē tatau ona oo i ai. Atonu e leʻi oo ina aʻoaʻoina o ia e talia ona tapulaa ma ola aʻe e talafeagai ai. Atonu e faatutu ni ona sini maualuluga ma taumafai e ausia e tusa lava po o le ā le afaina ai. Pe atonu foi na te faaaogā ona tapulaa e fai ma faamolemolega o le faifai malie po o le leai o se filigā. I nei uma tulaga, ua leai se paleni lelei; ma i le avea ma sē e lē agamalu, ua faigata ai ona ia maua le olioli.

6. (a) O le ā e ao ona iloa mai e uso Kerisiano i a i tatou, ma e na o afea lava o le a faapea ai? (e) E faapefea i upu a Pauro i le 2 Korinito 1:24 ma le Roma 14:4 ona fesoasoani i a i tatou ia agamalu?

⁶ E tusa lava pe manatu tagata tetee o i tatou o ni tagata e maelega valea, e tatau lava ona mafai ona iloa mai e ō tatou uso Kerisiano lo tatou agamalu i taimi uma lava. Ma o le a latou iloaina pe afai e paleni lelei i tatou ma aua tatou te faatalitalia ni lelei atoatoa mai i a i tatou lava po o isi. E sili i na mea uma, e tatau ona tatou alofia le tuu atu o ni avega mamafa i isi, o ni mea e lē o manaomia mai e le Afioga a le Atua. Na faapea mai le aposetolo o Pauro: “E leai foi so matou fia pule i lo outou faatuatua, a o fesoasoani i matou i lo outou olioli.” (2 Korinito 1:24) I le avea ma Faresaio muamua, na iloa lelei e Pauro o tulafono maʻoti na faavaea ma faasaina e ē sa fai ma pule na faavaivaia ai le olioli, a o fautuaga aogā na ofo atu e ē o galulue faatasi na faatuputeleina ai. O le mea moni faapea “ua lata mai le Alii,” e ao ona faamanatu mai ai i le tagata agamalu e lē tatau ona tatou ‘faamasino atu fua i le auauna a le tasi. Auā e tumau o ia pe paʻū i lona lava alii.’—Roma 14:4.

7, 8. Aisea e ao ai i Kerisiano ona faatalitalia e iai ni o latou faafitauli, peitai e mafai faapefea ona faatumauina lo latou olioli?

⁷ “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.” (Filipi 4:6) Ua oo mai i a i tatou i aso nei “aso faigata” ia na tusi faatatau i ai Pauro. (2 Timoteo 3:1-5) O lea e tatau i Kerisiano ona faatalitalia e feagai ma faafitauli. O upu a Pauro “ia outou olioli . . . e le aunoa,” e lē faapea ai o le a lē oo i Kerisiano faamaoni ni faalogona o le lē aogā po o le lotovaivai. I le tulaga o Pauro lava ia, na ia taʻutino mai le mea moni e faapea: “Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano.” (2 Korinito 4:8, 9) E ui i lea, o le olioli o se Kerisiano, e faaitiitia ma mulimuli ane manumalo mai ai i vaitaimi faalētumau o le popole ma le faanoanoa. Na te tuuina atu le malosi moomia ina ia faaauau ai ona agaʻi pea i luma, e lē taitai ona puaoa ai le vaai i le tele o mafuaaga mo le olioli.

⁸ Pe a tulai mai faafitauli, e tusa lava po o le ā le ituaiga, o le Kerisiano olioli, e aioi atu o ia ma le loto maulalo mo le fesoasoani a Ieova e ala i le tatalo. E lē lolo atu o ia i le mafatia i le popole. Pe a uma ona ia faia le mea na te mafaia e foia ai le faafitauli, ona ia tuu atu lea o iuga mulimuli i aao o Ieova e ogatusa ma le valaaulia e faapea: “Ia e tuuina atu ia Ieova o mea e te popole vale ai; o ia lava na te tausia oe.” I le taimi foi lava e tasi, e faafetai atu le Kerisiano i a Ieova mo lona agalelei.—Salamo 55:22; tagaʻi foi i le Mataio 6:25-34.

9. E mafai faapefea e le iloa o le upu moni ona maua ai le filemu o le mafaufau, ma o ā āuga lelei e aumaia i se Kerisiano?

⁹ “O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:7) O le iloa o le upu moni o le Tusi Paia e faasaoloto ai le mafaufau o se Kerisiano mai le pepelo ma fesoasoani i a te ia e faatupu aʻe ai se ala o mafaufauga lelei. (2 Timoteo 1:13) Ua fesoasoani la i a te ia e alofia ai amioga sese po o le lē talafeagai e ono faaleagaina ai faiā lelei ma isi. Na i lo o le faagaulēmalie i faiga lē tonu ma le amioleaga, na te tuu atu lona faatuatuaga i a Ieova na te faaleleia faafitauli o tagata e ala mai i le Malo. E leoleoina lona loto e sea ituaiga o filemu o le mafaufau, e tausia ai le mamā o ona manatu, ma taitaia ai ona mafaufauga i ala o le amiotonu. O manatu mamā ma mafaufauga tonu, e iu ina fua mai ai le anoanoai o mafuaaga mo le olioli, e ui i faafitauli ma omiga o faapogaia e le lalolagi malaia.

10. O le olioli moni faatoʻā maua lava pe a tautala po o le mafaufau i le na o ā mea?

¹⁰ “Le au uso e, o le toe upu lenei; o mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.” (Filipi 4:8) E lē fiafia se Kerisiano e talanoa po o le mafaufau i mea leaga. E otometi ai lava i lea itu ona faateaese ai le tele o faafiafiaga ua faia e le lalolagi. E leai se tasi e mafai ona faatumauina le olioli faa-Kerisiano pe a ia faatumulia lona mafaufau ma le loto i le pepelo, o tausuaga e lē mamā, ma mataupu e lē amiotonu, e lē mamā, e palapalā, e inosia, ma matagā. I se faaupuga manino, e leai se tasi e mafai ona maua le olioli moni e ala i le fafagaina o lona mafaufau ma lona loto i mea leaga. I le lalolagi iuvale a Satani, maeu se faagaeetia o le iloa ua i Kerisiano le anoanoai o mea lelei e mafaufau ma talatalanoa i ai!

Le Anoanoai o Mafuaaga e Olioli Ai

11. (a) O le ā e lē ao ona manatu māmā i ai, ma aisea e lē tatau ai ona faia faapea? (e) O le ā le āuga na oo i se sui usufono ma lana avā ina ua auai i se tauaofiaga faavaomalo?

¹¹ Pe a taʻua mafuaaga e olioli ai, aua neʻi galo i a i tatou lo tatou auuso i le lalolagi atoa. (1 Peteru 2:17) A o faaalia e vaega faalemalo ma faaleatunuu le matuā inoino o le tasi i le isi, ae ua mafuta faatasi vavalalata tagata o le Atua i le alofa. Ua faapitoa ona aliali manino lo latou autasi i a latou tauaofiaga faavaomalo. I le tauaofiaga lea na faia i Kiev, Ukraine i le 1993, na tusi mai se sui usufono mai le Iunaite Setete o Amerika e faapea: “O loimata o le fiafia, o foliga pupula, le lē mapu o fusifusiga faaleaiga, ma faafeiloaiga sa tuuina atu i le malae o le tauaofiaga na faia e vaega e ala i le talotalo mai o faamalu ma solosolo felanulanuai, na matuā manino le iloa ai o le autasi faatiokarate. Na faatumulia o matou loto i le mitamita i mea ua faataunuuina faavavega e Ieova i le auuso i le lalolagi aoao. Ua matuā faagaeetia ai i maʻua ma laʻu avā i lenei mea, ma ua faaopoopo mai ai se uiga fou i lo ma faatuatua.”

12. Ua faapefea ona vaaia e ō tatou mata le faataunuuina o le Isaia 60:22?

¹² Maeu se faalaeiau i le faatuatua o Kerisiano i aso nei i le vaai tino o ō latou mata i faataunuuga o valoaga a le Tusi Paia! Seʻi manatunatu e fai ma faaaoaoga upu ua i le Isaia 60:22: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” I le fanau mai o le Malo i le 1914, sa na o le 5,100—o le toaitiiti—sa fai se sao uigā i le talaʻiga. Ae i le lima tausaga ua tuanai atu, o le telē o le auuso i le lalolagi aoao ua faatupulaia i se aofaiga faatatau i lona saoasaoa e 5,628 Molimau fou e papatisoina i vaiaso taitasi! I le 1993, na ausia ai se tumutumuga e 4,709,889 faifeau na faia sa latou sao. Seʻi tagaʻi faalemafaufau i ai! O le uiga o lenei mea “o le toaitiiti” na iai i le 1914 ua toeitiiti lava a atoa le “toaafe” i se uiga moni faaletino!

13. (a) O le ā ua tupu talu mai le 1914? (e) Ua tausia faapefea e Molimau a Ieova le mataupu silisili o loo i upu a Pauro i le 2 Korinito 9:7?

¹³ Talu mai le 1914, ua agaʻi atu le Tupu faa-Mesia e pule i ona lava fili. Ua lagolagoina lana pule e soo faaletagata loto naunau, o ē ua foai atu le taimi, le malosi, ma tupe ina ia faia ai le galuega talaʻi i le lalolagi aoao, faapena foi ma galuega o faugafale o faia nei. (Salamo 110:2, 3) Ua olioli Molimau a Ieova i le iloaina o loo faia meaalofa tau tupe e faamaeaina ai nei galuega, e ui ina e seāseā lava taʻua tupe i a latou sauniga.a (Faatusatusa i le 1 Nofoaiga a Tupu 29:9.) E lē tau faagaeeina Kerisiano moni e foai atu; latou te manatu o se faaeaga le lagolago i lo latou Tupu i le tele e mafai ona faatagaina ai i latou e o latou tulaga, e “taitoatasi ma foai e pei ona filifili i lona loto; aua ma le tiga, aua foi ma le faatauanauina.”—2 Korinito 9:7.

14. O ā tulaga ua manino ona aliali mai i tagata o le Atua talu mai le 1919, ua avatu ai i a i latou le ā le mafuaaga mo le olioli?

¹⁴ O le toe faafoisia o le tapuaiga moni lea na valoia i tagata o le Atua ua iu i le faia aʻe ai o se parataiso fou faaleagaga. Talu mai le 1919, ua agaʻi pea i luma le faalauteleina atu o ona tuaoi. (Salamo 14:7; Isaia 52:9, 10) O ā iuga? Ua maua ai e Kerisiano le “olioli ma le fiafia.” (Isaia 51:11) O iuga o fua lelei o le faamaoniga lea o mea e mafai ona faataunuuina e le agaga o Ieova e ala i ana auauna lē lelei atoatoa. O le viiga ma le mamalu e i a Ieova lea, ae o le ā se isi faaeaga sili e maua na i lo le avea ma sē e galulue ma le Atua? (1 Korinito 3:9) E tele le mana o Ieova e mafai ai ona faatautatala mai maa e faaoo atu ai le feau o le upu moni pe afai o le a tatau ai. E ui i lea, ua filifili o ia e lē faaaogaina lenei auala, ae peitai, ua uunaia tagata loto naunau na faia mai le efuefu e faataunuuina lona finagalo.—Luka 19:40.

15. (a) O ā mea o tutupu i ona po nei tatou te tulimataia ma le naunau? (e) O le ā le mea e tupu o loo tatou tepa taulai atu i ai ma le olioli?

¹⁵ I le faatumulia i le faagaeetia, o loo mataʻiina e auauna a Ieova mea o loo tutupu i le lalolagi auā o nei mea e fesootai ma valoaga tu maʻoti o le Tusi Paia. O loo taumafai malosi atunuu—ae ua lē taulau—ina ia maua se filemu tumau. O mea na tutupu ua faamalosia ai i latou e talo atu i Malo Aufaatasi ina ia faia sa latou faatatau i vaega o iai faafitauli i le lalolagi. (Faaaliga 13:15-17) I le taimi nei, o loo vaavaai atu pea tagata o le Atua i luma ma le naunau tele i le mea e sili ona olioli ai o le a tupu, lea ua sili ona lalata mai a o mavae atu lea aso ma lea aso. “Ia tatou fiafia ma olioli, ma tuu atu le viiga ia te ia; auā ua oo mai le tausamaaga o le Tamai Mamoe, o lona faletua foi ua saunia o ia e ia.”—Faaaliga 19:7.

Le Talaʻiga —O se Avega Mamafa po o se Olioli?

16. Faataitai le mafai ona aveesea le olioli mai se Kerisiano ona ua lē taulau ona ia faatino mea ua aʻoaʻoina ai.

¹⁶ “O mea foi ua aʻoaʻoina ai outou, ma outou talia, ma outou faalogo i ai, ma outou vaai mai ia te au, ia outou faia ia lava mea; ona ia te outou lea o le Atua e ona le manuia.” (Filipi 4:9) I le amioaʻi e tusa i mea ua latou aʻoaʻoina, e mafai ai e Kerisiano ona faatalitalia latou te maua faamanuiaga a le Atua. O se tasi o mea e sili ona tāua ua latou aʻoaʻoina o le tatau lea ona talaʻia o le tala lelei i isi. O le mea moni, o ai e mafai ona fiafia lona mafaufau pe e olioli pe afai o ia taofiofia faamatalaga e lē faailoa atu i tagata loto naunau faamaoni, ma e faalagolago o latou ola i le faalogo i ai?—Esekielu 3:17-21; 1 Korinito 9:16; 1 Timoteo 4:16.

17. Aisea e avea ai la tatou galuega talaʻi ma puna o le olioli?

¹⁷ Maeu le olioli o le mauaina o tagata o ē pei ni mamoe o naunau e fia aʻoaʻo ia iloa Ieova! E mautinoa, o i latou o loo auauna ma le manatu saʻo, o le a maua e i latou le auaunaga i le Malo o se puna o le olioli. E mafua lenei mea ona o le pogai autū o le avea ma Molimau a Ieova o le vivii atu lea i Lona suafa ma ia lagolagoina Lona tulaga o le Pule Silisili Ese. (1 Nofoaiga a Tupu 16:31) O le tagata na te iloa lelei lenei mea moni, o le a olioli pea o ia e tusa lava pe teena ma le faavalevalea e tagata le tala lelei o ia taʻuina atu. Ua ia iloa lelei e iai le aso o le a muta ai le talaʻi atu i ē e lē talitonu; ae faavavau pea ona vivii atu i le suafa o Ieova.

18. O le ā e uunaia ai se Kerisiano ina ia faia le finagalo o Ieova?

¹⁸ O le lotu moni e faagaee ai i latou o ē o loo faia ina ia faatino mea o manaomia e Ieova, e lē faapea ona e tatau lava ona fai, ae ona latou te mananao e fai. (Salamo 40:8; Ioane 4:34) E toatele tagata ua faigata ona malamalama i ai. Na taʻu atu e se tasi fafine i se Molimau na asiasi atu i a te ia e faapea: “E te iloa, e tatau ona ou faamālō atu i a te oe. E mautinoa lava, e lē taitai mafai ona ou alu e talaʻi laʻu lotu mai lea fale i lea fale e pei ona e faia nei.” I laumata ʻataʻata, na tali atu le Molimau i a te ia: “E mafai ona ou malamalama i ou faalogona. A o leʻi avea aʻu ma Molimau a Ieova, e lē mafai ona e faatauanauina aʻu ou te alu e talalotu i isi tagata. Peitai i le taimi nei, ua ou manao tele i ai.” Sa manatunatu le fafine mo se minute ona ia faaiu atu lea e faapea: “E manino mai e iai se mea lelei o faia e lau lotu i a te oe ae e lē o faapea laʻu lotu. Atonu e tatau ona ou tilofaia lena mea.”

19. Aisea ua avea ai le taimi lenei ma taimi sili e olioli ai?

¹⁹ O le mau o le tausaga 1994, o loo faailoa manino atu i totonu o a tatou Maota o Malo, ua faamanatu mai e lē aunoa i a i tatou e faapea: “Ia e faatuatua ia Ieova ma lou loto atoa.” (Faataoto 3:5) Pe e iai ea se isi mafuaaga sili o le olioli na i lo o le mafai ona tuu atu o lo tatou faatuatua i a Ieova, o lo tatou ʻolo malosi o lē tatou te sulufai i ai? Ua faamatala mai faapea e le Salamo 64:10: “E fiafia lē amiotonu ia Ieova, ma faalagolago ia te ia; ona mitamita ai lea o i latou uma ua loto saʻo.” E lē o le taimi lenei e taumalue solo ai po o le faavaivai ai. A o mavae atu masina taitasi, o le latalata atu foi lena o i tatou i le faataunuuga moni o mea ua loa o faanaunau auauna a Ieova e vaai i ai talu mai lava aso o Apelu. O le taimi lenei tatou te faatuatua ai i a Ieova ma o tatou loto atoa, i le iloaina o nei le taimi ua sili ona tele mafuaaga tatou te olioli ai!

[Faaopoopoga i lalo]

E Faapefea ona E Tali?

◻ E tusa ai ma le Neemia 8:10, aisea e ao ai ona tatou olioli?

◻ Ua faaalia faapefea i le Teuteronome 26:11 ma le 28:45-47 le tāua o le olioli?

◻ E mafai faapefea i le Filipi 4:4-9 ona fesoasoani i a i tatou ina ia olioli e lē aunoa?

◻ O le ā le mafuaaga ua aumaia e le mau o le tausaga 1994 mo i tatou e olioli ai?

[Ata i le itulau 16]

Olioli Molimau Rusia ma Siamani i le avea ma vaega o le auuso faavaomalo

[Ata i le itulau 17]

O le faalauiloa atu o le upu moni i isi o se mafuaaga mo le olioli