O Taui o Iopu—Se Puna o Faamoemoega

“Ua sili foi ona faamanuia e Ieova o le gataaga o Iopu i lona amataga.”—IOPU 42:12.

1. O le ā e faia e Ieova mo ona tagata, e tusa lava pe matuā faavaivaia i latou e ni tofotofoga?

O IEOVA o ia “na te tauia mai o e matuā saili ia te ia.” (Eperu 11:6) Ua ia faalaeiauina foi ona tagata tuutoina ina ia molimau atu ma le loto tetele, e tusa lava pe faavaivaia i latou e tofotofoga e toetoe oo atu ai i le oti. (Iopu 26:5; Faaaliga 11:3, 7, 11) Ua faamaonia le moni o lena mea i le tulaga o Iopu, o lē sa puapuagatia. E ui ina leaga le faiga o ia e le ʻau faamafanafana pepelo e toatolu, ae sa ia leʻi gūgū ai ona o se mataʻu i tagata. Na i lo lea, sa ia molimau atu ma le lototele.

2. E ui lava ina latou mafatia i sauaga ma faigata, ae ua faapefea ona sao mai Molimau a Ieova mai ō latou tofotofoga?

² E toatele Molimau a Ieova i aso nei ua mafatia i na sauaga ma faigata matuitui, ma ua toetoe lava oo atu ai i latou i le oti. (2 Korinito 11:23) Peitai, i le pei o Iopu, ua latou faaalia atu le alofa i le Atua ma faia le amiotonu. (Esekielu 14:14, 20) O lo latou sao mai foi i ō latou tofotofoga, ua latou filifili ai e faafiafia Ieova, ua faamalosia e molimau atu ma le aasa, ma ua tumu i le faamoemoe moni.

Ua Molimau atu ma le Lototele Iopu

3. O le ā le ituaiga o molimau na avatu e Iopu i lana tautalaga faaiu?

³ I lana tautalaga faaiu, na toe avatu ai e Iopu se isi molimau e sili atu na i lo lea ua uma ona ia avatua. Na matuā sāō ai lana ʻau faamafanafana pepelo. I ni ana faatalasua ʻanoʻanoa, na ia faapea atu ai: “Ua faapefea ea ona e fesoasoani i le ua leai sona malosi?” (Iopu 26:2) Sa matuā viivii atu Iopu i a Ieova, o lē ona le malosi o loo faatautauina ai lo tatou lalolagi i le vanimonimo e aunoa ma se tautaulaga, ma ʻofuʻofuina vai i ona ao i luga aʻe o le lalolagi. (Iopu 26:7-9) Peitai, na taʻua e Iopu, o na mea ofoofogia ‘ua na o ni mea aupito iti ia o ala o Ieova.’—Iopu 26:14.

4. O le ā na taʻua e Iopu e uiga i le faamaoni, ma aisea na mafai ai ona ia fai atu faapena?

⁴ Sa mautinoa e Iopu lona lē sala, o lea na ia faapea atu ai: “Seia oo lava i loʻu oti ou te le faateaina lava laʻu amio sao [“faamaoni,” NW].” (Iopu 27:5) I le lē tutusa ma moliaga sese ia na saputu atu i a te ia, na te leʻi faia se mea e māfua ai ona oo ia mea na tutupu i a te ia. Na iloa e Iopu e lē faafofoga Ieova i tatalo a i latou e tetee i a te ia, ae o le a ia tauia ē tausia le faamaoni. Atonu o se mea lelei lenei e faamanatu mai ai i a i tatou, le lē o toe mamao ona pa mai lea o Amaketo ma tafiesea uma ai ē amioleaga mai ā latou puleaga, ma o le a lē mafai ona latou sosola ese mai le aao o le Atua. O le a tausia pea e tagata o le Atua lo latou faamaoni seia oo atu lava i lena taimi.—Iopu 27:11-23.

5. Na faapefea ona faamatalaina e Iopu le atamai moni?

⁵ Seʻi vaai faalemafaufau i le faalogologo atu a le toatolu o ē sa iai le poto faasalemausau a o taʻua e Iopu le faaaogā e le tagata o ona tomai e saili ai i auro, o ario, ma isi oa i le laueleele ma le sami. Peitai na ia faapea atu: “A maua le poto e sili lea i penina.” (Iopu 28:18) Sa lē mafai e le ʻau faamafanafana pepelo a Iopu ona faatauina le atamai moni. E puna mai i Lē na Foafoaina matagi, o timuga, o uila, ma faititili. Ioe, o le “mataʻu [ma le faaaloalo] i le Alii [“Ieova,” NW], o le poto lava lea; o le ʻalo ese i le amio leaga, o le mafaufau lea.”—Iopu 28:28.

6. Aisea na toe taʻutaʻu ai e Iopu lona olaga i le taimi muamua?

⁶ E ui lava i ona mafatiaga, ae na leʻi taofia ai e Iopu lona auauna atu i a Ieova. Na i lo le fulitua i Lē Silisili ona Maualuga, sa toe taʻutaʻu e lenei tagata faamaoni taimi muamua ia sa la “faauo [ai] ma le Atua.” (Iopu 29:4) Sa leʻi fia faaalialia Iopu ina ua ia toe taʻua le taimi sa ia ‘laveaia ai ē puapuagatia, a o ia faia le amiotonu, ma avea o ia ma tamā i ē matitiva.’ (Iopu 29:12-16) Ae sa ia taʻua mai mea moni na tutupu i lona olaga a o avea ma auauna faamaoni a Ieova. Pe ua e faia ea se talaaga lelei faapena? O le mea moni, sa faaalialia mai foi i lumamea e Iopu le sese o tuuaiga ia na faia e le ʻau taufaasese faasausili e toatolu.

7. O le ā le ituaiga o tagata sa iai Iopu?

⁷ Sa ulagia Iopu e taulelea ‘o ē e mautinoa e lē tuufaatasia e Iopu ō latou tamā ma ulī o lana lafu mamoe.’ Sa latou inosia o ia ma tuufeanu i ai. E ui lava i le matuā matuitui o ona puapuaga, ae sa lē faaalia se manatu mamafa i a Iopu. (Iopu 30:1, 10, 30) Peitai, ona o lona tuutoina atu atoatoa i a Ieova, sa ia maua ai se loto fuatiaifo mamā ma mafai ai ona ia faapea atu: “Ia fuatia aʻu e ia i le fua faatautau tusa, ia silafia ai e le Atua ua sao [“faamaoni,” NW] laʻu amio.” (Iopu 31:6) O Iopu sa lē o se tagata mulilua po o sē e faufau leaga, ma sa lē solomuli o ia i le fesoasoani atu i ē matitiva. E ui lava sa mauoa, ae lē taitai ai ona ia faalagolago atu i le tamaoaiga faaletino. E lē gata i lea, sa leʻi auai Iopu i ifogā tupua, i le tuutoina atu i mea e leai ni ola, e pei o le masina. (Iopu 31:26-28) I lona faatuatua i le Atua, sa ia faataatia ai se faaaoaoga lelei o sē tausia le faamaoni. E ui lava i ona mafatiaga uma ma le oo atu i a te ia o le ʻau faamafanafana pepelo, ae na matuā malosi le tetee atu a Iopu ma avatu ai se molimau mataina. I le faaiuiuga o ana upu, sa ia faalagolago atu ai i le Atua o lona Faamasino lea ma Lē na te Aumaia le Taui mo ia.—Iopu 31:35-40.

Ua Tautala Eliu

8. O ai Eliu, ma na faapefea ona ia faaalia le faaaloalo ma le lototele?

⁸ Sa faalogologo ane i ai le talavou o Eliu, o lē e tupuga mai i a Pusa le atalii o Nakori, ma o ia o sē tāu atu i a Aperaamo le uo a Ieova. (Isaia 41:8) Sa faaaloalo Eliu i tane matutua, i lona faalogologo atu i itu uma e lua o le finauga. Peitai, na ia tautala atu ma le lototele e faatatau i mea ia sa latou sese ai. Mo se faataitaiga, na ita o ia i a Iopu “ina ua taʻuamiotonuina e ia o ia, a e le o le Atua.” Ae na sili ona toatamai Eliu i le au faamafanafana pepelo. O ā latou faamatalaga sa foliga e faamamaluina ai le Atua, ae o le mea moni lava sa faalumaina ai o ia, e ala i le lagolagoina o le itu a Satani i le finauga. Ina ua ‘faatumulia i upu’ ma le uunaiga a le agaga paia, sa avea ai Eliu o se molimau e lē faaituau a Ieova.—Iopu 32:2, 18, 21.

9. Na faapefea ona tau faaataata atu e Eliu le toe faafoisia o le ola o Iopu?

⁹ Na oo ina sili atu ona manatu mamafa Iopu i le faasilisilia o ia lava na i lo le Atua. O le mea moni lava sa faatavā atu o ia i le Atua. Peitai, a o lalata atu Iopu i le oti, sa iai sina tau faaataata atu i ai o le toe faafoisia o lona ola. Na faapefea? Na uunaia Eliu e taʻu atu, o loo fiafia Ieova i a Iopu i le feau lenei e faapea: “Laveai mai ia ia te ia, neʻi alu ifo i le lua; ua ou maua le togiola. E toe ola lelei ai lona tino e sili i le tama itiiti, e toe foi o ia i ona po o lona taulealea.”—Iopu 33:24, 25.

10. O le ā le tele sa tatau ona tofotofoina ai Iopu, ae o le ā e mafai ona tatou mautinoa, e tusa ai ma le 1 Korinito 10:13?

¹⁰ Na faasaʻoina Iopu e Eliu, ona o le faapea mai e leai se mea aogā e maua i le faafiafia o le Atua e ala i le tausisia o le faamaoni. Na faapea atu Eliu: “E mamao ma le Atua ona ia amio leaga, ma Le e ona le malosi uma lava ona ia amioletonu. Auā e taui atu e ia i le tagata lana lava galuega.” Na soona mateletele Iopu i lona faamamafaina o lana lava amiotonu, ae na ia faia faapea ma lona lē iloa ma le leai o sona mafaufau. Na fai atu atili Eliu: “Ia matuā suesueina [“tofotofoina,” NW] lava Iopu, ona o ana tali e pei o tagata amio leaga.” (Iopu 34:10, 11, 35, 36) I se tulaga tutusa, e faatoʻā mafai lava ona faamaonia atoatoa lo tatou faatuatua ma le faamaoni, pe afai e ‘matuā tofotofoina’ i tatou i nisi o mea. Peitai ane, o le a lē tuuina atu i tatou e lo tatou Tamā alofa faalelagi, e tofotofoina i ni mea e lē mafai ona tatou tatalia.—1 Korinito 10:13.

11. Pe a matuia le tofotofoina o i tatou, o le ā e ao ona tatou manatua?

¹¹ A o tautala pea Eliu, sa ia toe faaalia le soona faamamafa e Iopu o lana amiotonu. Sa tatau ona taulai atu manatu i Lē Sili na Faia i tatou. (Iopu 35:2, 6, 10) Na faapea atu Eliu, o le Atua “na te le faaola i le ua amio leaga; a e faia e ia le faamasinoga mo e ua puapuagatia.” (Iopu 36:6) E lē mafaia e se tasi ona faamasinoina ala o le Atua ma faapea atu ua lē amiotonu. E sili atu lona mamalu na i lo o se mea o loo tatou iloa, ma e lē masino foi ona faitau le umi o lona soifuaga. (Iopu 36:22-26) Pe a matuia le tofotofoina o i tatou, ia manatua, e amiotonu lo tatou Atua o lē soifua e faavavau, ma o le a ia tauia mai i tatou ona o ā tatou galuega faamaoni mo lona viiga.

12. O le ā ua faaalia atu i upu faaiu a Eliu e faatatau i le faasalaga faafaamasinoga a le Atua i ē amioleaga?

¹² A o tautala atu Eliu, ae taalili mai loa le asiosio. A o lalata mai lava, na amata ona gatete ma sapotuvale le tātā o lona fatu. Ona ia tautala ai lea i mea silisili ua faia e Ieova ma faapea atu: “Iopu e, faafofoga mai ia i lenei mea; ina tulai mai ia, ma mafaufau i vavega o le Atua.” I le pei o Iopu, e manaomia ona tatou manatunatu i vavega a le Atua ma lona mamalu matautia. Ua faapea atu Eliu: “A o Le e ona le malosi uma lava, tatou te le mafai ona iloa o ia; e silisili ese lona malosi ma lona faamasinoga, e sili foi lana amiotonu, na te le agaleaga. O le mea lea e matatau ai tagata ia te ia.” (Iopu 37:1, 14, 23, 24) O upu faaiu a Eliu, ua faamanatu mai ai i a i tatou e faapea, pe a oo mai le faasalaga faafaamasinoga a le Atua i ē amio leaga lea ua lata mai, o le a ia lē manatu māmā i le faamasinogatonu ma le amiotonu, ma o le a ia faasaoina i latou o loo matatau i a te ia i le avea o ni ē tapuai faaaloalo atu i a te ia. Maeu se faaeaga o le iai faatasi ma ē tausia le faamaoni, o ē o loo amanaiaina le avea o Ieova ma Pule Silisili Ese aoao! Ia onosai e pei ona sa faia e Iopu, ma ia aua lava neʻi faatagaina le Tiapolo e toso ese oe mai lou nofoaga faamanuiaina o loo e iai faatasi ma lenei vao o tagata fiafia.

Ua Tali mai Ieova i a Iopu

13, 14. (a) E uiga i le ā na amata ai ona fesili atu Ieova i a Iopu? (e) O ā manatu e mafai ona aʻoaʻoina mai isi fesili na fesili atu ai Ieova i a Iopu?

¹³ Maeu se faateia atonu na i a Iopu ina ua fetalai ane Ieova i a te ia e ala i se asiosio! O lena asiosio o se galuega a le Atua, e lē tutusa ma le matagi malosi lea na faaaogā e Satani e talepe ai i lalo le fale ma fasiotia ai le fanau a Iopu. Na lē magagana Iopu a o fesiligia e le Atua e faapea: “O ifea sa e i ai ina o ou faavaeina le lalolagi? . . . O ai ea foi na na tuuina ifo lona maa tulimanu; ina o pepese faatasi fetu o le taeao, ma alalaga fiafia atalii uma o le Atua.” (Iopu 38:4, 6, 7) Na tasoo atu e Ieova ana fesili i a Iopu e uiga i le sami, o ao o loo ufitia ai, le malamalama o le vaveao, o faitotoa o le oti, o le ao ma le po, ma faaputuga o fetu. Na lē iloa e Iopu sana tala e fai ina ua fesiligia: “Ua e iloa ea tulafono i le lagi?”—Iopu 38:33.

¹⁴ O isi fesili na faaalia ai, a o leʻi foafoaina le tagata, ma tuuina atu i ai le pule i iʻa, i manu felelei, i manu vaefa, ma mea fetolofi, sa tausia i latou e le Atua—e aunoa ma se fesoasoani po o se fautuaga mai se tagata. O isi fesili atili a Ieova na taʻua ai meafaiola e pei o le rema (wild bull), le iaena (ostrich), ma le solofanua. Na fesiligia Iopu: “O lau upu ea e lele maualuga ai le aeto, ma fai ai lona ofaga i le mea maualuga?” (Iopu 39:27) E matuā leai lava! Seʻi vaai faalemafaufau i le tali atu a Iopu ina ua fesiligia o ia e le Atua: “O lē finau ma Le e ona le malosi uma lava, na te aoai mai ea?” E lelētioa ona faapea atu Iopu: “Faauta, ua faatauvaa lava aʻu, se a se mea ou te tali atu ai ia te oe? ou te tuu ae loʻu lima i loʻu gutu.” (Iopu 40:2, 4) Talu ai e saʻo pea lava Ieova, afai la o le a tofotofoina i tatou i se taimi e faitio atu i a te ia, e ao ona tatou ‘tuu aʻe ō tatou lima e pupuni ai ō tatou gutu.’ O fesili a le Atua na faamamaluina ai foi lona silisiliesee, lona mamalu, ma lona malosi, e pei ona faaalia mai i le foafoaga.

Pemota ma le Leviatana

15. O le ā le manu vaefa e tele ina faatusa i ai le Pemota, ma o ā ni faamatalaga e uiga i ai?

¹⁵ Ona sosoo ai lea ma le taʻua e Ieova o le Pemota, lea e tele ina faatusa i le puaasami. (Iopu 40:15-24) E mataina i le laulauā o lona tino, e sili ona mamafa, ma mafiafia lona paʻu, ma o lenei manu vaefa e mau latalata i le vai ‘e ʻai o ia i le mutia.’ O lona malosi e i ona ogavae ma uaua o sooga i lona manava. O ponaivi o ona vae e malolosi e pei o “ʻapa memea.” E lē popole le Pemota i ni tafega tele o vaitafe, ae faigofie lava ona aau atu e fetaiai ma tafega.

16. (a) O le faamatalaga e uiga i le Leviatana ua fetaui lelei i le ā le meaola, ma o ā nisi o mea moni e faatatau i ai? (e) O le malosi o le Pemota ma le Leviatana, ua mafai ona fautuaina mai ai le ā e faatatau i le faataunuuina o tofiga i le auaunaga a Ieova?

¹⁶ Na fesili atu foi le Atua i a Iopu: “E te mafaia ea ona sisi o leviatana i se mātau, pe taomi lona laulaufaiva i se maea?” O le faamatalaga e uiga i le Leviatana ua fetaui lelei i ai le korokotaila. (Iopu 41:1-34) E lē taitai ona lata i so o se tasi, ma e leai se tagata atamai e fia toa ma ia faatei i lena meaola. E lē mafai e ūfanafana ona tuli esea, e “ʻata foi i le apoapo o le tao.” O le osofai a le Leviatana e pupuna ai le moana e pei o se ulo o loo tunu ai se uu. O le mea moni e faapea, sa sili atu le malolosi o le Leviatana ma le Pemota na i lo o Iopu, na fesoasoani lea i a te ia ina ia loto maulalo ai. E ao foi ona tatou ioe ma le loto maulalo e faapea, e leai so tatou lava malosi. Tatou te manaomia le atamai ma le malosi e foaiina mai le Atua, ina ia sao mai ai i ʻona o tui o loo tafana mai e Satani, le Gata, ma ia faataunuuina ō tatou tofiga i le auaunaga a Ieova.—Filipi 4:13; Faaaliga 12:9.

17. (a) Na faapefea e Iopu ona ia “iloa atu le Atua”? (e) O le ā na faamaonia mai fesili ia na lē mafai e Iopu ona taliina, ma ua aogā faapefea lenei mea i a i tatou?

¹⁷ I le matuā loto maulalo lava, na iloa ai e Iopu le sese o lona manatu ma taʻutino atu ai sa ia tautala e aunoa ma se mafaufau. Ae na ia faaleo atu lona faatuatua e faapea na ia “iloa atu le Atua.” (Iopu 19:25-27) E mafai faapefea ona tupu lena mea, auā e leai se tagata e mafai ona vaai atu i a Ieova ma ola pea? (Esoto 33:20) O le mea moni, na vaaia e Iopu le faaalia mai o le mana mai le Atua, na ia faalogo i le afioga a le Atua, ma sa ia malamalama foi i le upu moni e uiga i a Ieova. O le mea lea na ‘inoino ai Iopu, ma salamō i le efuefu ma le lefulefu.’ (Iopu 42:1-6) O fesili e tele na lē mafai ona ia taliina, na faamaonia ai le silisiliesee o le Atua, ma faaalia ai le faatauvaa o le tagata, e oo lava i se tasi na tuutoina atu i a Ieova e pei o Iopu. Ua aogā lenei i a i tatou e iloa ai, e lē tatau ona faamuamuaina ō tatou manaoga, ae ia faamuamua le faapaiaina o le suafa o Ieova ma le faaeaina o lona silisiliesee. (Mataio 6:9, 10) E ao ona tatou muai manatu mamafa atu i le tausisia o le faamaoni i a Ieova ma le faamamaluina o lona suafa.

18. O le ā na manaomia ona faia e le ʻau faamafanafana pepelo a Iopu?

¹⁸ Ae faapefea le ʻau faamafanafana pepelo faafia amiotonu? Sa ono mafai e Ieova i lea lava taimi ona faaumatia Elifasa, o Pilitati, ma Sofara ona o lo latou lē taʻu atu o le upu moni e uiga i a te ia, e pei ona sa faia e Iopu. Na fetalai atu le Atua: “Ia outou ave ai povi poa taanoa e fitu, ma mamoe poa e fitu, ma outou o ane i laʻu auauna o Iopu; ia outou fai aʻi le taulaga mu mo outou; ona tatalo lea o laʻu auauna o Iopu mo outou.” Sa tatau i le toatolu lenei ona latou loto maulalo e usiusitai atu. Sa tatau i a Iopu o lē na tausia le faamaoni, ona tatalo e fai ma sui o nei tagata, ma sa taliaina e Ieova lana tatalo. (Iopu 42:7-9) Ae faapefea le avā a Iopu, o lē na uunaia o ia e faifai atu i le Atua ma oti ai? E foliga mai sa toe faia se la leleiga ma Iopu ona o le alofa mutimutivale o le Atua.

O Taui ua Folafola mai Tatou te Maua ai le Faamoemoe

19. I le mea na faia i a Iopu, na faaalia ai faapefea e Ieova Lona silisiliesee na i lo le Tiapolo?

¹⁹ O le taimi lava na uma ai popolega o Iopu i ona mafatiaga ma ua toe faaauau i lana auaunaga i le Atua, ona suia lea e Ieova tulaga mo ia. Ina ua uma le tatalo sa faia e Iopu mo le vaega e toatolu, ona ‘faaee ai lea e le Atua o lona tafeaga’ ma avatu i a te ia ‘ua faaluaina mea, i mea uma na muai i a te ia.’ Sa faaalia e Ieova Lona silisiliesee na i lo le Tiapolo, i lona taofia lea o le faamaʻi aati a Satani ma faamaloloina faavavega Iopu. Na teteeina foi e le Atua ʻau a temoni ma saisaia i latou, e ala i le toe puipuia o Iopu e Ana ʻau o agelu.—Iopu 42:10; Salamo 34:7.

20. I ā auala na tauia ai ma faamanuiaina Iopu e Ieova?

²⁰ Na gasolosolo ane pea uso o Iopu, o ona tuafāfine, ma ana uo, latou te aai faatasi, sa latou faamafanafana i a te ia, ma faamatalaloto i ai ona o le mala sa faataga e Ieova ina ia oo i a te ia. Na tofu foi i latou taitoatasi ma le tupe ma le mama auro e tuuina atu i a Iopu. Na sili atu ona faamanuia e Ieova le gataaga o Iopu na i lo lona amataga, o lea na ia maua ai mamoe e 14,000, o kamela e 6,000, o povi e 2,000, ma asini fafine e 1,000. Na iai foi atalii e toafitu ma afafine e toatolu o Iopu, o le aofai foi lea o lana fanau sa iai muamua. O ona afafine—o Iemaima, o Kesia, ma Kerenapuka—o teine ia na silisili lo latou lalelei i le nuu, ma na avatu foi e Iopu i a i latou se tofi faatasi ma ō latou tuagane. (Iopu 42:11-15) E lē gata i lea, na ola Iopu mo le isi 140 tausaga, ma sa ia vaai foi i augatupulaga e fā a lana fanau. Ua faaiu mai le tala e faapea: “Ona oti lea o Iopu, ua toeaina, ma ua tuutuluʻi lona ola.” (Iopu 42:16, 17) O le faafualoaina o lona ola sa avea o se vavega a Ieova le Atua.

21. Ua faapefea ona aogā i a i tatou le tala a le Tusi Paia e uiga i a Iopu, ma o le ā e ao ona tatou filifili e faia?

²¹ O le tala a le Tusi Paia e uiga i a Iopu, ua atili ai ona tatou nofouta i mailei a Satani, ma ua aogā i a i tatou ina ia iloa le sootaga a le pule silisiliesee aoao, ma le faamaoni o le tagata. I le pei o Iopu, o ē uma lava e alolofa i le Atua o le a tofotofoina. Ae mafai ona tatou onosaia e pei ona sa faia e Iopu. Sa ia sao mai i ona tofotofoga ma lona faatuatua ma le faamoemoe, ma e tele foi ona taui na maua. Ona o i tatou o auauna a Ieova i aso nei, ua tatou maua ai foi le faatuatua moni ma le faamoemoe. Ma maeu se faamoemoega sili ua faataatitia mai mo i tatou taitoatasi e Lē Sili na te Aumaia le Taui! O le manatua pea o le taui faalelagi o le a uunaia ai ē faauuina ina ia auauna ma le faamaoni i le Atua i taimi o totoe o lo latou soifuaga i le lalolagi. E toatele i latou o loo iai le faamoemoe faalelalolagi o le a lē taitai ona maliliu, ae o i latou e maliliu, o le a tauia i le toetu i le Parataiso i le lalolagi faatasi ma Iopu. Ona ua teuina lena faamoemoe moni i le loto ma le mafaufau, seʻi faamaonia atu ia e i latou uma o ē alolofa i le Atua, le pepelo o Satani, e ala i le tutū mausali i le itu a Ieova, i le avea o ni ē tausia le faamaoni ma o ni ē lagolago malosi i lana pule silisiliesee aoao.

O le a Faapefea ona E Tali Mai?

◻ O ā nisi o manatu na faia e Iopu i lana tali faaiu atu i lana ʻau faamafanafana pepelo?

◻ Na faapefea ona faamaonia e Eliu le avea o ia o se molimau e lē faaituau a Ieova?

◻ O ā nisi o fesili a le Atua i a Iopu, ma o ā na aogā i ai na fesili?

◻ Ua faapefea ona aogā i a te oe le tala a le Tusi Paia e uiga i a Iopu?

[Ata i le itulau 18]

O fetalaiga a Ieova e faatatau i le Pemota ma le Leviatana na fesoasoani i a Iopu ina ia loto maulalo ai