Fuaina o Vaivaiga, Amioleaga, ma le Salamō

O LE agasala o se mea e inoino i ai Kerisiano—o le lē ausia lea o tapulaa amiotonu a Ieova. (Eperu 1:9) E faanoanoa ai, ona o i tatou uma lava e agasala mai lea taimi i lea taimi. O i tatou uma lava o loo tauivi ma vaivaiga tuufaasolo mai ma le lē lelei atoatoa. E ui i lea, o le tele lava o tulaga, pe afai tatou te taʻutaʻu atu ā tatou agasala i a Ieova ma tatou tauivi malosi ina ia ʻaua le toe faia, e mafai la ona tatou faalatalata atu i a te ia ma le loto fuatiaifo e mamā. (Roma 7:21-24; 1 Ioane 1:8, 9; 2:1, 2) Tatou te faafetaia ai Ieova ona, e faavae i le taulaga togiola, ua ia talia mai ai la tatou auaunaga paia e ui lava i ō tatou vaivaiga.

Pe afai e paʻū atu se tasi i se agasala matuia ona o vaivaiga o le tino, na te manaomia faanatinati lava se asiasiga faaleoleo mamoe e tusa ai ma fuafuaga ua faatulaga mai i le Iakopo 5:14-16: “Ua maʻi [faaleagaga] ea so outou? Ina aami atu ia i toeaina o le ekalesia . . . Afai foi ua agasala, e faamagaloina ia. O le mea lea ia fetaʻutaʻuai a outou agasala, ma tatalo le tasi mo le tasi ina ia faamaloloina outou.”

O lea, afai e se Kerisiano tuuina atu se agasala matuia, e iai se mea e sili atu e manaomia ona faia na i lo le tau ina faailoa totino atu i a Ieova. E ao i toeaina ona uia ni laasaga faapitoa, ona ua faamatauina ai le mamā po o le filemu o le faapotopotoga. (Mataio 18:15-17; 1 Korinito 5:9-11; 6:9, 10) E ao i toeaina ona fuafuaina: Pe ua salamō ea lea tagata? O le ā na taitaia atu ai i le faia o le agasala? Pe na mafua ea ona o se vaivaiga e lē masani ai na mapuna aʻe? Pe na avea ea ma agasala faifai pea? O le fuafuaina faapea e lē masani ona faigofie, po o le lē matuā manino mai foi, ma ua manaomia ai le tele o le faautautaga.

Ae faapefea la, pe afai ua mafua le agasala ona o le uia pea o se ala sese ma amioga leaga? Ona manino lea o le tiute tauave e faia e toeaina. Ina ua faatonuina atu le auala e taulimaina ai se mataupu matuia i le faapotopotoga i Korinito, na faapea atu le aposetolo o Paulo: “Ia faateaeseina e outou lena tagata amio leaga ia te outou.” (1 Korinito 5:13) O tagata amioleaga, e lē taliaina i le faapotopotoga Kerisiano.

Fuaina o Vaivaiga, Amioleaga, ma le Salamō

E mafai faapefea e toeaina ona iloa pe ua salamō se tasi?a E lē o se fesili faigofie lenei fesili. Mo se faaaoaoga, seʻi mafaufau i le tupu o Tavita. Na ia faia le mulilua, ma o lona taunuuga na oo ai i le avea ma fasioti tagata. Peitai ane, na faatagaina o ia e Ieova e ola pea. (2 Samuelu 11:2-24; 12:1-14) Ia, mafaufau i a Anania ma Safaira. Na la talapepelo e faavalea ai le au aposetolo, i le taumafai e faafoliga atu ma le faaʻoleʻole e agalelei, peitai ane, sa leʻi faapea. Sa matuia tele? Ioe. Pe tutusa le leaga ma le fasioti tagata ma le mulilua? E matuā eseese lava! Peitai, na faaumatia ai ola o Anania ma Safaira ona o lea.—Galuega 5:1-11.

Aisea ua eseese ai iuga o faamasinoga? Na paʻū atu Tavita i le faia o le agasala matuia ona o vaivaiga o le tino. Ina ua faailoa atu i a te ia lana mea na fai, sa salamō o ia, ma na faamagaloina o ia e Ieova—e ui lava na mamafa le aoaia o ia e tusa ma faigata i lona aiga. Na agasala Anania ma Safaira i lo la loto i le pepelo, i le taumafai e faaʻoleʻole i le faapotopotoga Kerisiano, ma o lea na ‘sese ai i le agaga paia ma le Atua.’ Ua faamaonia le amioleaga o ō laua loto. O lea, na mamafa ai iuga o ā la faamasinoga.

I na tulaga uma e lua, na faia e Ieova le faamasinoga, ma na saʻo lana faaiuga ona na te suesueina loto. (Faataoto 17:3) E lē mafai e toeaina o ni tagata ona faia faapea. O lea, e faapefea e toeaina ona iloaina pe o se agasala matuia e mafua mai ona o vaivaiga na i lo o le amioleaga?

O le mea moni, o agasala uma lava o amioleaga, ae e lē o tagata agasala uma e amioleaga. O le agasala lava e tasi atonu e foliga mai e mafua ona o vaivaiga o le tasi tagata, ae o le tasi e faia ona o le amioleaga. E moni o le agasala, e masani lava ona aofia ai ona o le vaivai ma le amioleaga o lē ua agasala. O se tasi o vala e fua aʻi, o le vaaiga lea a lē ua agasala i lana mea na fai, ma po o le ā le mea ua ia fuafua e fai i ai. Pe o ia faaalia ea se loto salamō? E manaomia e toeaina le faautauta ina ia mataulia ai lenei mea. E mafai faapefea ona latou maua lena faautaga? Na folafola atu e le aposetolo o Paulo i a Timoteo e faapea: “Ia e mafaufau i mea ou te fai atu na; ona foaiina atu ai lea e le Alii ia te oe le loto matala i mea uma.” (2 Timoteo 2:7) Afai e ‘mafaufau pea e lē aunoa’ toeaina i upu faagaeeina a Paulo ma isi tusitala o le Tusi Paia, ona latou maua ai lea o le faautauta o loo manaomia ina ia tonu ai le silasila i a i latou o ē agasala i le faapotopotoga. Ona atagia mai ai lea i ā latou faaiuga le finagalo o Ieova, ae e lē o ō latou lava manatu.—Faataoto 11:2; Mataio 18:18.

E faapefea ona faia o lenei mea? O le tasi o auala, o le iloiloina lea o faamatalaga a le Tusi Paia e faatatau i tagata amioleaga, ma tagaʻi i ai po ua talafeagai na faamatalaga ma lē o loo faamasinoina.

Faia o Tiute Tauave ma le Salamō

O uluai tagata na filifili e uia se ala amioleaga, o Atamu ma Eva. E ui lava ina lelei atoatoa ma iloa lelei le tulafono a Ieova, ae na la fouvale i le pule silisili a le Atua. Ina ua faailoa atu e Ieova i a i laua mea na la faia, o le auala na la tali atu ai, e aogā ona matauina—na tuuaia e Atamu ia Eva, ma na tuuaia e Eva ia le gata! (Kenese 3:12, 13) Seʻi faatusatusa lenei mea ma le tele o le loto maulalo o Tavita. Ina ua feagai o ia ma lana agasala mamafa, na ia taliaina tiute tauave ma aioi atu mo le faamagaloga, i le faapea atu: “Ua ou agasala lava ia Ieova.”—2 Samuelu 12:13; Salamo 51:4, 9, 10.

Toeaina e, ia outou iloiloina ma le totoʻa nei faaaoaoga e lua pe a faafoeina mataupu o agasala matuia, ae maise lava i tagata matutua. Po o lē ua agasala—o pei o ia o Tavita ina ua faamaonia lana agasala—ua taʻutino mai i lumāmea le talia o tuuaiga, ma vaai atu ma le salamō i a Ieova mo le fesoasoani ma le faamagaloga, po o ia taʻu faatauvaaina ea lana mea na fai, atonu o loo ia tuuaia le isi tagata? E moni, o le tagata ua agasala atonu e manao o ia ina ia ona faamatala mai mea na taʻitaʻia atu ai i lona faia faapea, ma atonu foi e iai tulaga, a lē o le taimi ua teʻa po o lea lava taimi, e manaomia ai e toeaina ona magafagafa i ai pe a faia se faaiuga i le pe faapefea ona fesoasoani atu i lea tagata. (Faatusatusa i le Hosea 4:14.) Ae peitai, e ao ona ia taliaina o ia ua agasala ma o ia e ana le tiute tauave i le va feagai ai ma Ieova. Ia manatua: “Ua latalata mai Ieova i e ua loto momomo; ua ia faaola foi i e ua loto nutimomoia.”—Salamo 34:18.

Faia Pea o le Mea Leaga

I le tusi o Salamo, e tele naua faamatalaga o loo faasino i tagata amioleaga. E mafai e mau faagaeeina e pei o na, ona fesoasoani atili i toeaina ina ia matauina po o le tagata e matuā amioleaga po ona o le vaivai. Mo se faaaoaoga, seʻi manatunatu i le tatalo faagaeeina a le tupu o Tavita: “Aua neʻi e tosina aʻu faatasi ma tagata amio leaga, ma e ua fai mea leaga; o e tautala faafifilemu i e latou te tuaoi, a e peitai o i o latou loto le leaga.” (Salamo 28:3) Mātau mai, o loo taʻua tagata amioleaga ma i latou o “e ua fai mea leaga.” O le tagata e agasala ona o vaivaiga o le tino, e foliga mai na te taofia le faia o lea mea i le taimi lava e toe oo atu ai i a te ia ni mafaufauga lelei. Ae a ‘faifai pea’ e se tasi le mea leaga ma ua amioai, e mafai ona avea lea o se faamaoniga o se loto e pupū atu i le amioleaga.

Na taʻua e Tavita se isi uiga o le amioleaga i lena fuaiupu. E pei o Anania ma Safaira, e tautala mai le gutu o le tagata amioleaga i mea lelei, ae o loo tumu lona loto i mea leaga. Atonu o ia o se tagata e faaʻoleʻole—i le faapei o le ʻau Faresaio i ona po o Iesu, o ē na mautinoa lo latou faatagā faafoliga atu ‘e mataamiotonu i luma o tagata, a o totonu ua tutumu i le pepelo ma le amioleaga.’ (Mataio 23:28; Luka 11:39) E inosia e Ieova le taufaaʻoleʻole. (Faataoto 6:16-19) Pe afai la e taumafai se tagata taufaaʻoleʻole ina ia faafitia lana agasala matuia, e tusa lava po o loo talanoa ma le komiti faafaamasinoga, po o le taʻutino mai i se tulaga faalēfiafia na o mea ua uma ona iloa e isi, e musu e taʻutino mai mea uma, e mafai ona avea lea ma faamaoniga o se loto o loo pupū atu pea i le amioleaga.

Lē Amanaia ma le Faamaualuga Ieova

O isi mea ua iloa ai o le tagata e amioleaga, ua faatulaga mai lea i le Salamo e 10. Ua tatou faitau i ai e faapea: “O le faamaualuga o le tagata amio leaga ua ia matuā faasaua ai i e ua puapuagatia; . . . ua ʻinoʻino ia Ieova.” (Salamo 10:2, 3) O le ā la tatou vaaiga i se Kerisiano tuuina atu o lē e faamaualuga ma lē āva i a Ieova? E mautinoa lava e amioleaga na uiga ma na manatu. O le tagata e agasala ona o le vaivai, o le taimi lava na te iloa ai lana agasala po ua faailoa atu foi i a te ia, ona salamō loa lea ma taumafai malosi e suia lona olaga. (2 Korinito 7:10, 11) I se faaeseesega, pe afai e agasala se tagata e mafua ona o se lē āva i a Ieova, o le ā o le a taofia ai o ia mai le toe foi atu e faia pea lava pea le agasala? Afai e faamaualuga o ia, e ui lava ina fautuaina ma le loto agamalu, e mafai faapefea ona i a te ia le loto maulalo e manaomia e salamō moni ai ma le faamaoni?

Seʻi manatu i upu nei a Tavita mulimuli ane i le salamo lava lea e tasi e faapea: “Se a le mea ua ʻinoʻino ai i le Atua le ua amioleaga? Ua fai ifo lona loto, E te le suesuea.” (Salamo 10:13) I le faatulagaga o le faapotopotoga Kerisiano, e iloa e le tagata amioleaga le eseesega o le mea saʻo ma le mea sese, peitai e lē faatalatu o ia i le faia o le mea sese pe afai na te iloa o le a lē faasalaina ai o ia. Afai e lē faamataʻuina ina neʻi aliai mai, ona saoloto ai lava lea o ia e fai ona tuinanauga leaga. Pe afai o le a oo ina iloa ana agasala, o le a taupulepule loa o ia e alofia aoaiga, e matuā ese ma le tulaga o Tavita. O se tagata faapea, ua matuā lē āva lava i a Ieova. “E leai lava sona mataʻu i le Atua. . . . Na te le ʻinoʻino i le leaga.”—Salamo 36:1, 4.

Faaleagaina ai Isi

E masani lava, e sili atu i le toatasi le tagata e afaina i se agasala. Mo se faaaoaoga, o lē e mulilua, e agasala o ia i le Atua; ua ia faaaafia ai fua lana avā ma lana fanau; pe afai o le fafine o ia mulilua i ai ua faaipoipo, ona ia faaaafia ai fua foi lea o lona aiga; ma ua ia faaleagaina foi le igoa tauleleia o le faapotopotoga. O le ā lona manatu i na mea uma? Pe na te faaalia ea se faanoanoa mai le loto, faatasi ai ma le salamō moni? Pe o ia faaalia ea le agaga lea o faamatalaina i le Salamo 94 e faapea: “Ua latou soona tautala i upu faamaualuga, ua mitamita vale o i latou uma o e fai amio leaga. Ieova e, ua latou tuʻimomomoina lou nuu, ua latou faatigaina foi lou tofi. O le fafine ua oti lana tane atoa ma le tagata ese, ua latou fasiotia, ua latou fasiotia foi ma ē mātuaoti, ma ua faapea a latou, E le silasila mai e Ioa, e le manatua foi e le Atua o Iakopo’”?—Salamo 94:4-7.

E foliga mai o agasala e tauaaoina i faapotopotoga o le a lē aofia ai le fasioti tagata. E ui i lea, o le agaga o faaalia i inei—o le agaga o le sauni e faaleaga fua i isi mo ni lelei totino—ma o le a manino ona aliae a o suesueina e toeaina se agasala. O lenei foi mea, o se faamaualuga, o le faailoga e iloa ai le tagata amioleaga. (Faataoto 21:4) E matuā eseese mamao lava ma le agaga o se Kerisiano moni, o lē e naunau e faataulagaina o ia mo ona uso.—Ioane 15:12, 13.

Faatatauina o Mataupu Silisili Mai le Atua

O nisi o nei taiala e lē o fuafuaina ina ia faavaea ai ni tulafono. Peitai ane, ua aumaia ai nisi o mea e silasila i ai Ieova e matuā leaga. Pe ua musu ea e talia tiute tauave o le mea sese na faia? Po o lē ua agasala na matuā teena ma le loto malosi ia fautuaga muamua i lea lava mataupu? Po ua maumauai i le fai ma amio le faia o le agasala matuia? Po o faaalia e lē o fai mea sese se matuā lē amanaia o tulafono a Ieova? Pe ua ia fuafuaina ni taumafaiga e nanā ai le mea sese, atonu i lea lava taimi ua faaleagaina ai foi ma isi? (Iuta 4) Po o nā ea taumafaiga o le a faifaitetele pe a oo ina aliai mai le mea sese? Pe o faaalia ea e lē o sese se matuā lē amanaia o le leaga ua ia faapogaia i isi ma le suafa o Ieova? Ae faapefea ona uiga? Ina ua uma ona tuuina atu ni fautuaga agalelei mai le Tusi Paia, pe o faamaualuga ea o ia ma fia sili? Pe e tau lē o iai se faanaunauga mai le loto ina ia alofia le toe faia o le mea sese? Pe afai e matauina e toeaina na mea e faailoa manino mai ai le leai o se salamō, atonu o la latou faaiuga e faapea, o le agasala ua faia, ua faamaonia o le amioleaga na i lo o se vaivaiga.

E tusa lava po o faia se iloiloga ma se tagata ua foliga mai e amioleaga tele ona faanaunauga, e lē faavaivai ai toeaina i le faalaeiau atu i a te ia ina ia faia le amiotonu. (Eperu 3:12) O tagata e amioleaga naua, atonu o le a salamō ma suia. Pe ana fai e lē o lea le tulaga, aisea la na augani atu ai Ieova i tagata Isaraelu e faapea: “Ia lafoai e le ua amio leaga lona ala, ma le tagata agasala ia lafoai e ia ona manatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina”? (Isaia 55:7) Atonu, i le taimi o faia ai le faamasinoga e le komiti, o le a mataulia ai e toeaina se suiga i lona loto e pei ona faaalia mai i uiga e iloa ai le salamō.

E oo foi i le taimi e faateaina ai se tagata, o le a augani atu ai toeaina, ona o ni leoleo mamoe, i a te ia ina ia salamō ma taumafai e toe foi mai mo le talileleia e Ieova. Manatua le tagata “amio leaga” i Korinito. E mautinoa na ia suia lona ala, ma na fautuaina mulimuli ane ai e Paulo lona toe faaeaina mai. (2 Korinito 2:7, 8) Manatu foi i le tupu o Manase. E mautinoa lava sa tumu o ia i le amioleaga, ae ina ua mulimuli ane salamō o ia, na talia e Ieova lona salamō.—2 Tupu 21:10-16; 2 Nofoaiga a Tupu 33:9, 13, 19.

E moni, e iai le agasala e lē mafai ona toe faamagaloina—o le agasala lea e faia faasaga i le agaga paia. (Eperu 10:26, 27) E na o Ieova lava na te fuaina po o ai ua faia lea ituaiga o agasala. E lē o iai i tagata se pule latou te faia ai faapea. O le tiute tauave a toeaina o le tausia lea o le faapotopotoga ia mamā, ma fesoasoani ina ia toe faafoisia lē ua agasala. Pe afai latou te faia ma le faautauta ma le loto maulalo, ia faailoa atu i ā latou faaiuga le atamai o Ieova, ona faamanuia ai lea e Ieova lenei vala o lo latou leoleoina o mamoe.

[Faaopoopoga i lalo]

[Ata i le itulau 29]

Na faaʻoleʻole Anania ma Safaira i le agaga paia ma faaalia ai le loto atu i le leaga