Le Motu o Tagata e Toatele o Ē Tapuai Faamaoni—O Fea e Ō Mai ai i Latou?

“Faauta foi i le motu o tagata e toatele mai atu nuu uma, ma aiga, ma nuu, ma gagana eseese, . . . o loo tutū i latou i luma o le nofoālii ma luma o le Tamai Mamoe.”—FAAALIGA 7:9.

1. Aisea ua avea ai vaaiga faavaloaga o i le Faaaliga ma mea e sili ona tatou naunau atu i ai i aso nei?

I LE taufaaiuiuga o le uluai senituri T.A., na vaaia ai e le aposetolo o Ioane faaaliga o mea ofoofogia e fesootai atu i fuafuaga a Ieova. O nisi o mea na ia vaaia i le faaaliga o loo faataunuuina i le taimi nei lava. O isi o le a faataunuuina i le lumanai ua lalata tele mai. O nei mea uma ua taulai atu i le faataunuuga mataina o le fuafuaga sili o le faapaiaina o le suafa o Ieova i luma o foafoaga uma. (Esekielu 38:23; Faaaliga 4:11; 5:13) E lē gata i lea, e aofia ai le faamoemoe i le ola mo i tatou uma taitoatasi. Ua mafai faapefea lena mea?

2. (a) O le ā na vaaia e le aposetolo o Ioane i lana vaaiga lona fa? (e) O ā fesili e tusa ai ma lenei vaaiga o le a tatou talanoaina?

² I le lona fa o vaega o le faasologa o vaaiga o le Faaaliga, na vaaia ai e Ioane agelu o taofia matagi o le faaumatiaga seia faamaufaailogaina “auauna a lo tatou Atua” i ō latou muaulu. Ona ia vaaia ai lea o se mea e sili atu ona faagaeetia ai—“le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi,” o loo autasi i le tapuai atu i a Ieova ma avatu le viiga i lona Alo. Na faailoa atu i a Ioane i latou nei, o tagata na sao mai le puapuaga tele. (Faaaliga 7:1-17) O ai i latou ua faamatalaina faapea o “auauna a lo tatou Atua”? Ma o ai o le a faia aʻe ai le “motu o tagata e toatele” o ē faasaoina mai i le puapuaga tele? Pe o le a avea ea oe ma se tasi o i latou ia?

O Ai “Auauna a Lo Tatou Atua”?

3. (a) I le Ioane 10:1-18, na faapefea ona faataitaia mai e Iesu lana faiā i ōna soo? (e) O le ā na faaavanoa atu e Iesu e mafai ona maua e āna mamoe e ala i lona maliu faataulagaina?

³ Pe tusa ma le fa o masina a o leʻi maliu o ia, na fetalai ai Iesu e uiga i a te ia lava o le “leoleo mamoe lelei,” ma o ōna soo o ni “mamoe,” o ē o le a foaiina atu i ai lona ola. Na ia taʻua faapitoa mamoe na ia mauaina ua iai i totonu o se lotoā mamoe faafaatusa, ma mulimuli ane tuuina atu i ai lana tausiga faapitoa. (Ioane 10:1-18)a Na foaiina atu ma le alofa e Iesu lona ola mo ana mamoe, ua saunia ai le tau mo le togiola na manaomia ina ia mafai ai ona faasaolotoina i latou mai le agasala ma le oti.

4. O ai i latou na muai aoaoina e avea ma mamoe e tusa ai ma lenei fetalaiga a Iesu?

⁴ E ui i lea, a o leʻi faia lea mea, na aoaoina totino mai ai e Iesu, le Leoleo Mamoe Lelei ni soo. O uluai soo na faafeiloai atu i a te ia e Ioane le Papatiso, o le “leoleo faitotoa” lea i le tala faatusa a Iesu. Sa sailia e Iesu ni tagata o ē o le a tali lelei atu i le avanoa e avea ai ma vaega tuufaatasia o le ‘fanau a Aperaamo.’ (Kenese 22:18; Kalatia 3:16, 29) Na ia faatupuina aʻe i ō latou loto le talisapaia mo le Malo i le lagi, ma na ia faamautinoa atu i a i latou o le a alu e sauni se nofoaga mo i latou i le fale o lona Tamā faalelagi. (Mataio 13:44-46; Ioane 14:2, 3) Ua talafeagai ai la ona ia fetalai e faapea: “Na afua mai i ona po o Ioane le papatiso, ua oo i nei ona po, ua taufaoa ai le malo o le lagi, o loo ua avea faamalosi foi e i latou o taufao.” (Mataio 11:12) O i latou nei na mulimuli i a te ia ina ia maua lea faamoemoe na faamaonia lo latou iai i totonu o le lotoā mamoe lea na fetalai i ai Iesu.

5. (a) O ai “auauna a lo tatou Atua” lea e faatatau atu i ai le Faaaliga 7:3-8? (e) O le ā ua faaalia ai o le a toatele isi o le a aufaatasi atu i le tapuaiga ma tagata o le Isaraelu faaleagaga?

⁵ I le Faaaliga 7:3-8, o i latou o ē agaʻi atu i luma ma le manuia i lena faamoemoe faalelagi, ua faasino foi i a i latou o “auauna a lo tatou Atua.” (Tagaʻi i le 1 Peteru 2:9, 16.) Pe o le 144,000 o taʻua ai i inā e na o Iutaia moni faaletino? Pe o i latou o i le lotoā mamoe faafaatusa o le tala faatusa a Iesu e na o Iutaia? E mautinoa lava e leai; o i latou o sui o le Isaraelu faaleagaga a le Atua, ua aufaatasi i latou uma ma Keriso i le fanau faaleagaga a Aperaamo. (Kalatia 3:28, 29; 6:16; Faaaliga 14:1, 3) O le mea moni, o le a mulimuli lava oo ane i le taimi e faaatoaina ai le numera ua faatulagaina. Ia ona ā lea? E pei ona valoiaina mai e le Tusi Paia, o isi—le motu o tagata e toatele—o le a aufaatasi ma nei tagata o Isaraelu faaleagaga i le tapuai atu i a Ieova.—Sakaria 8:23.

O “Isi Mamoe” —Pe o i Latou ea o Kerisiano Mai Nuu Ese?

6. O le ā le fuafuaga o faasino atu i ai le Ioane 10:16?

⁶ Ina ua uma ona taʻua le lotoā mamoe e tasi i le Ioane 10:7-15, ona faaofi mai ai lea e Iesu se isi vaega i totonu o le fuafuaga i le faapea mai: “Ua ia te au foi isi mamoe e le o i lenei lotoā; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” (Ioane 10:16) O ai i latou na o “isi mamoe”?

7, 8. (a) Aisea e sese ai le faavae aʻe o le manatu e faapea o isi mamoe, o Kerisiano mai Nuu Ese? (e) O ā mea moni e faatatau i le fuafuaga a le Atua mo le lalolagi, e tatau ona fesootai atu i lo tatou malamalamaga i le po o ai e faia aʻe ai isi mamoe?

⁷ Ua tele ina manatu le aufaiupu o Kerisinetoma e faapea, o isi mamoe, o Kerisiano mai Nuu Ese, ma o i latou o loo i le lotoā mamoe na muai taʻua, ua faatatau lea i tagata Iutaia, i latou ia sa i lalo o le feagaiga o le Tulafono, ma o vaega uma na e lua e ō uma i le lagi. Ae na fanau mai Iesu o se Iutaia, ma ona o lona tupuaga, sa iai o ia i lalo o le feagaiga o le Tulafono. (Kalatia 4:4) E lē gata i lea, o i latou e manatu o isi mamoe e faasino i Kerisiano mai Nuu Ese o ē o le a faamanuiaina i le ola faalelagi, ua lē taulau la ona manatu i le isi vala moni o le fuafuaga a le Atua. Ina ua foafoaina e Ieova le uluai ulugalii faaletagata ma tuu atu i laua i le faatoaga i Etena, na ia faamanino atu o lana fuafuaga, o le faatumulia lea o le lalolagi, ma avea le lalolagi atoa ma parataiso, ma e fai ai le tagata ma lē na te tausia ma olioli ai i le ola e faavavau—i le tuutuuga e āva ma usiusitai atu i Lē na Foafoaina i laua.—Kenese 1:26-28; 2:15-17; Isaia 45:18.

⁸ Ina ua agasala Atamu, sa lē tuulafoaia ai le fuafuaga a Ieova. Na faia ma le alofa e le Atua sauniuniga mo le fanau a Atamu ina ia latou maua le avanoa e olioli ai i le mea na lē taulau ona talisapaia e Atamu. Na valoia e Ieova o le a na faatuina aʻe sē laveai, se fanau, e ala mai i a te ia lea, o le a manuia ai atunuu uma lava o le lalolagi. (Kenese 3:15; 22:18) E lē o le uiga o lena folafolaga na faapea, o tagata lelei uma lava o i le lalolagi o le a aveina aʻe i le lagi. Na aʻoaʻo e Iesu ona soo ina ia tatalo e faapea: “Ia oo mai lou malo, ia faia lou finagalo i le lalolagi e pei ona faia i le lagi.” (Mataio 6:9, 10) E leʻi leva talu ona ia taʻua le tala faatusa lea na faamauina i le Ioane 10:1-16, na fetalai atu ai Iesu i ona soo e faapea, e na o le “lafu mamoe itiiti” ua finagalo i ai lona Tamā e foaiina atu i ai le Malo. (Luka 12:32, 33) O lea, pe a tatou faitau i le tala faatusa a Iesu e uiga i a te ia o le Leoleo Mamoe Lelei, o lē e foaiina atu lona ola e sui aʻi mamoe, o le a avea ai la o se mea sese le tuuesea mai i lea ata le toatele o i latou o ē ua aumaia e Iesu i lalo o lana tausiga alofa, o i latou o le a avea ma tagatanuu i le lalolagi o lona Malo faalelagi.—Ioane 3:16.

9. I tuā i le 1884, o le ā le malamalamaga sa iai i Tagata Aʻoga o le Tusi Paia e faatatau i ē o faia aʻe ai isi mamoe?

⁹ I tuā i le 1884, na faailoa mai ai e le Watch Tower isi mamoe e faapea o tagata o le a tuuina atu i ai le avanoa e ola ai i lenei lalolagi i lalo o tulaga o le a faataunuuina ai le uluai fuafuaga a le Atua. Na iloa e na uluai Tagata Aʻoga o le Tusi Paia e faapea, o nisi o isi mamoe o tagata na ola ma ua maliliu a o leʻi oo i le taimi o le faiva a Iesu i le lalolagi. Peitai ane, sa iai nisi o auiliiliga sa lē saʻo lo latou malamalamaga i ai. Mo se faataitaiga, na latou manatu e faapea o le aoaoina o isi mamoe o le a faia pe a uma ona maua uma e le vaega faauuina lo latou taui faalelagi. Ae na latou iloa ma le mautinoa, o isi mamoe, sa lē o Kerisiano mai Nuu Ese. O le avanoa e avea ai ma se tasi o isi mamoe ua tatalaina atu i tagata Iutaia faapea ma tagata o Nuu Ese, ma i tagata mai atunuu uma lava ma lanu eseese.—Faatusatusa i le Galuega 10:34, 35.

10. Ina ia mafai ona avea i tatou ma ē ua silasila moni i ai Iesu o isi mamoe, o le ā e ao ona taʻua moni e faatatau i a i tatou?

¹⁰ Ina ia talafeagai ma le faamatalaga na tuuina mai e Iesu e uiga i isi mamoe, e tatau ona avea ma tagata o ē e tusa lava po o le ā le lanu po o le ituaiga e tupuga mai ai, e tatau ona iloa o Iesu Keriso o le Leoleo Mamoe Lelei. O le ā ua aofia ai i lena mea? E tatau ona latou faaali atu le agamalu ma se loto gauai i le taitaiga, auā o uiga ia e masani ai mamoe. (Salamo 37:11) E pei foi ona tatau lea i le lafu mamoe itiiti, e ao ona latou “iloa lona [le leoleo mamoe lelei] leo,” ma ʻaua le tuuina atu i latou e taitaiseseina e isi o ē atonu e saili e faatosina i a i latou. (Ioane 10:4; 2 Ioane 9, 10) E tatau ona latou talisapaia le tāua o le mea na faia e Iesu i le tuuina atu o lona ola e sui ai ana mamoe, ma ia faaalia le faatuatua atoatoa i lea sauniuniga. (Galuega 4:12) E tatau ona latou “faalogo” i le leo o le Leoleo Mamoe Lelei, pe a augani mai o ia i a i latou e tuuina atu le auaunaga paia e tau lava na o Ieova, ina ia muai saili le Malo, ia vavae ese mai le lalolagi ma ia faaalia le alofa faataulagaina mo isi. (Mataio 4:10; 6:31-33; Ioane 15:12, 13, 19) Pe ua pei lou tagata e tusa ai ma faamatalaga a Iesu i a i latou ua silasila i ai o isi o ana mamoe? Pe e te manao e faapea? Maeu se faiā faaoaina ua tatalaina mai i a i latou uma o ē e avea moni ma isi mamoe a Iesu!

Faaaloalo i le Pule a le Malo

11. (a) I le faailoga o lona faatasi mai, o le ā na fetalai i ai Iesu e faatatau i mamoe ma ʻoti? (e) O ai uso ia e faasino i ai le fetalaiga a Iesu?

¹¹ I ni nai masina talu ona tuanai lona fetalai i le tala faatusa o taʻua i luga, ona toe oo atu ai lea o Iesu i Ierusalema. Ina o nofo i luga o le Mauga o Olive lea e iloa lelei atu ai le malumalu, na ia saunia ai mo ōna soo auiliiliga e faatatau ‘i le faailoga o lona faatasi mai ma le vaitaimi faaiuiu o le faiga o mea.’ (Mataio 24:3) Na ia toe taʻua ai foi le aoaoina mai o mamoe. O se tasi lenei o mea na ia fetalai i ai mai le tele o isi mea na ia taʻua: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.” I lenei faataoto, na faaalia ai e Iesu e faapea, o i latou na uai atu i ai le Tupu o le a faamasinoina e faavae i le auala na latou feagai ai ma ona “uso.” (Mataio 25:31-46) O ai nei uso? O i latou o Kerisiano fanauagagaina, o lea ua avea ai i latou ma “atalii o le Atua.” O Iesu o le Atalii ulumatua o le Atua. O lea, ua avea ai i latou ma uso o Keriso. O i latou “o le auauna a lo tatou Atua” na taʻua i le Faaaliga 7:3, o ē na filifilia mai tagata ina ia aufaatasi ma Keriso i le Malo faalelagi.—Roma 8:14-17.

12. Aisea e tāua tele ai le auala lea e feagai ai tagata ma uso o Iesu?

¹² E sili ona tāua le auala o feagai ai tagata ma nei suli o le Malo. Po o e vaai ea i a i latou e pei ona tagaʻi i ai Iesu Keriso, ma e pei foi ona silasila i ai Ieova? (Mataio 24:45-47; 2 Tesalonia 2:13) O le uiga faaalia o se tagata agaʻi i a i latou ia ua faauuina, e atagia atu ai foi ona uiga agaʻi i a Iesu Keriso, ma faapea foi i lona Tamā, Lē Pule i le Aoao o mea.—Mataio 10:40; 25:34-46.

13. O le ā le tele na oo i ai le malamalamaga o Tagata Aʻoga o le Tusi Paia i le 1884, e faatatau i le faataoto i mamoe ma ʻoti?

¹³ I le lomiga o Aokuso 1884, na faasino atu ai ma le saʻo e le Watch Tower e faapea, o “mamoe” i lenei faataoto, o i latou ia ua faatutu i ō latou luma le faamoemoe o le ola lelei atoatoa i le lalolagi. Sa malamalama foi i ai e faapea, o lea faataoto e tatau ona iai se faataunuuga i le taimi e pule mai ai Keriso i lona nofoalii mamalu faalelagi. Peitai, i lena taimi, sa leʻi manino so latou iloa po o afea o le a ia amataina ai le galuega o le vaevaeina o faamatalaina mai, ma po o le ā foi le umi o le a faia ai.

14. Na faapefea i le lauga i se tauaofiaga i le 1923 a Tagata Aʻoga o le Tusi Paia ona fesoasoani e faatāuaina po o afea e tatau ona faataunuu ai le faataoto faavaloaga a Iesu?

¹⁴ E ui i lea, i le 1923, i le lauga i se tauaofiaga, na faamanino ai e J. F. Rutherford, le peresitene o le Sosaiete o le Olo Matamata i lena taimi, le faataunuuga o le faataoto i mamoe ma ʻoti. Aisea? O se tasi o vala, ona ua faaalia i le faataoto e faapea o uso o le Tupu—o nisi o i latou—o le a iai pea i luga o le lalolagi. Ua na o ōna soo fanauagagaina lava, mai isi tagata, e mafai ona taʻua moni o ōna uso. (Eperu 2:10-12) O le a lē iai pea i latou nei i le lalolagi seia faaiuina le Meleniuma, ia maua ai le avanoa mo tagata e faia ai ni mea lelei mo i latou ia i le auala na faamatalaina ai e Iesu.—Faaaliga 20:6.

15. (a) O ā mea na tutupu na fesoasoani i Tagata Aʻoga o le Tusi Paia ina ia iloa manino ai mamoe o le faataoto a Iesu? (e) Ua faapefea ona tuuina atu e mamoe faamaoniga o lō latou talisapaia o le Malo?

¹⁵ I lena lauga i le 1923, sa faia ai se taumafaiga ina ia faailoa mai po ai i latou ua fetaui i ai le faamatalaga a le Alii e faatatau i mamoe ma ʻoti, peitai na iai isi mataupu na manaomia ona malamalama i ai a o leʻi mauaina le faamaninoga atoatoa o le faataoto. A o faagasolo mai tausaga, ma auauai ai ona faailoa mai e Ieova nei faamatalaga tāua i ana auauna. Na aofia ai i nei mea le malamalamaga manino i le 1927 e faapea, o le “auauna faamaoni ma le mafaufau,” o le tino atoa lea o Kerisiano faauuina i le agaga o i luga o le lalolagi; i le 1932, na faatāuaina ai le manaomia ona faailoa atu ma le lē fefe e le tagata lava ia lona aufaatasi vavalalata ma le faalapotopotoga o auauna faauuina a Ieova, e pei ona sa faia e Ionatapa i a Ieu. (Mataio 24:45; 2 Tupu 10:15) I lena taimi, e faavae mai le Faaaliga 22:17, na faalaeiauina ai faapitoa nei tagata pei ni mamoe ina ia auai i le faaooina atu o le feau o le Malo i isi. O lō latou talisapaia o le Malo Faa-Mesia o le a uunaia ai i latou e lē tau ina faalautele atu le agalelei faaletagata i ē faauuina a le Alii, ae ia tuuina atu ō latou ola i a Ieova e ala i a Keriso, ma ia aufaatasi vavalalata atu i ē faauuina, faia se vaega maelega i le galuega o loo faia e i latou. Po o e faia ea lena mea? O i latou o faia faapea, o le a fetalai i ai le Tupu: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi.” Ua i ō latou luma le faamoemoe sili o le ola e lelei atoatoa e faavavau i le lalolagi i le pulega a le Malo.—Mataio 25:34, 46.

Le “Motu o Tagata e Toatele”—O Fea o Agaʻi atu i ai i Latou?

16. (a) O le ā le faauigaga sese sa iai i uluai Tagata Aʻoga o le Tusi Paia e tusa ai ma le faailoga e iloa ai le motu o tagata e toatele, o le Faaaliga 7:9? (e) O anafea ma o le ā le faavae na toe faasaʻo ai la latou vaaiga?

¹⁶ Mo se vaitaimi, na talitonu ai auauna a Ieova e faapea, o le motu o tagata e toatele o le Faaaliga 7:9, 10, sa ese mai i isi mamoe o i le Ioane 10:16 ma mamoe i le Mataio 25:33. Talu ai ua faapea mai le Tusi Paia o loo “tutū i luma o . . . le nofoālii,” sa manatu ai la faapea o le a iai i latou i le lagi, e lē o i ni nofoālii, e pule o ni suli faatasi ma Keriso, ae i se nofoaga faalētāua i luma o le nofoālii. Sa vaai i a i latou o ni Kerisiano e itiiti lo latou faamaoni, o ē sa lē faaalia se agaga faataulagaina moni. I le 1935 sa toe faasaʻoina ai lena vaaiga.b O se iloiloga o le Faaaliga 7:9 e tusa ai ma le malamalamaga o isi mau e pei o le Mataio 25:31, 32 na faamanino ai e faapea, o tagata i inei i luga o le lalolagi e mafai ona faapea o i “luma o le nofoālii.” Na faailoa mai ai foi e lē lua ni tulaga tau amiotonu a le Atua. O i latou uma o ē o le a maua lana faamaoniga e tatau ona faamaoni atu i a te ia.—Mataio 22:37, 38; Luka 16:10.

17, 18. (a) O le ā na māfua ai le faatelega tele talu mai le 1935, o i latou na tepa taulai atu mo le ola e faavavau i le lalolagi? (e) O le ā le galuega tāua o loo faia ai se vaega maelega a le motu o tagata e toatele?

¹⁷ Ua tele tausaga o talanoa atu tagata o Ieova e uiga i le folafolaga a le Atua e faatatau i le lalolagi. Ona o le mea na latou faatalitalia i tuā i le 1920 ma faasolo mai ai, na latou folafola atu ai e faapea, e “Faitau Miliona o loo Soifua Nei o le a Lē Taitai ona Maliliu.” Ae sa lē atoa ni miliona o ē na faatāuaina le sauniuniga a le Atua mo le ola i lena vaitaimi. O le toatele o ē na talia le upu moni, na faatupuina i ai e le agaga paia le faamoemoe mo le ola faalelagi. E ui i lea, na iai se mea iloga na tupu, ae maise lava ina ua tuanai atu le 1935. Sa leʻi faapea na faagaloina e le Watchtower le faamoemoe o le ola e faavavau i le lalolagi. E faitau sefulu tausaga o talanoa atu auauna a Ieova i lenei mea, ma na sailia i latou o ē e talafeagai i ai faamatalaga a le Tusi Paia. Peitai ane, i le taimi tatau a Ieova lava ia, na ia tagaʻi i ai ua faaalia mai e le motu o tagata e toatele i latou lava.

¹⁸ O faamaumauga o ē na auai, ua faaalia ai o le toatele o ē na faatasi atu i le Faamanatuga sa aai ma feinu i le areto ma le uaina faafaatusa. Ae i totonu o le 25 tausaga talu ona mavae atu le 1935, na oso maualuga ai le faitau aofai o ē na auai i le Faamanatuina o le maliu o Keriso i le selau taimi e toatele ai na i lo ē na aai ma feinu i le areto ma le uaina. O ai isi o i latou ia? O ē na faavae aʻe ai le motu o tagata e toatele. E manino lava la, ua oo mai le taimi a Ieova e aoaoina ai ma sauniunia i latou mo le faasaoina mai le puapuaga tele ua toe o se aga ona oo mai lea. E pei ona valoiaina, ua ō mai i latou “mai atu nuu uma, ma aiga, ma nuu, ma gagana eseese.” (Faaaliga 7:9) Ua latou auai ma le maelega i le galuega na valoia mai e Iesu ina ua ia fetalai e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:14.

[Faaopoopoga i lalo]

O le ā Lau Faamatalaga?

◻ Aisea ua faapitoa ai le faatāuaina o le vaaiga o i le Faaaliga mataupu e 7?

◻ Aisea ua lē faagata mai ai i Kerisiano mai Nuu Ese ia isi mamoe o loo i le Ioane 10:16?

◻ O le ā le mea moni e faatatau i a i latou e fetaui i ai faamatalaga a le Tusi Paia e faatatau i isi mamoe?

◻ Ua faapefea i le faataoto i mamoe ma ʻoti ona faamatilatila mai ai le tāua o le faaaloalo i le pule o le Malo?

◻ O le ā ua faailoa mai pe a oo i le taimi tonu a Ieova e aoaoina ai le motu o tagata e toatele o i le Faa-aliga 7:9?