Le Motu o Tagata e Toatele o Loo Tuuina Atu le Auaunaga Paia
“Ua latou tuuina atu foi i a te ia le auaunaga paia i le ao ma le po i lona malumalu.”—FAAALIGA 7:15, NW.
1. O le ā le malamalamaga manino faaleagaga na ausia i le 1935?
I A ME 31, 1935, na iai se olioli tele i sui usufono i le tauaofiaga o Molimau a Ieova i Washington, D.C. O i inā, o le taimi muamua lea na matuā iloa manino ai le motu o tagata e toatele o le Faaaliga 7:9, e fesootai atu i isi vaega uma o le Tusi Paia e tusa ai ma mea na amata ona tutupu.
2. O le ā na aliali mai ai na iloa e se aofaiga faatuputupulaia e faapea sa leʻi valaauliaina i latou e le Atua i le ola faalelagi?
2 Pe tusa ma le ono vaiaso a o leʻi oo i lea taimi, i le faamanatuina o le Talisuaga Afiafi a le Alii e faapotopotoga o Molimau a Ieova, o le 10,681 o ē na auai, (i se fua faatatau e 1 mai le toʻa 6) sa leʻi aʻai ma feinu i le areto ma le uaina faafaatusa, ma o le 3,688 o i latou ia sa maelega i le talaʻia o le Malo o le Atua. Aisea na lē tagofia ai e i latou le areto ma le uaina? Ona e faavae i mea ua latou aʻoaʻoina mai i le Tusi Paia, na latou iloa ai e faapea, e leʻi valaauliaina i latou e le Atua i le ola faalelagi ae e mafai ona faia sa latou vaega i sauniuniga alofa a Ieova i se isi vala. O lea i lena tauaofiaga, ina ua fesili atu le failauga e faapea: “Faamolemole o i latou uma lava o ē e faamoemoe e ola e faavavau i le lalolagi, seʻi tutū mai i luga,” o le ā le mea na tupu? E faitau afe na tutū i luga, na sosoo ai ma le patipati faaumiumi a le aofia.
3. Ina ua manino le malamalamaga i le motu o tagata e toatele, aisea na faaoo atu ai e lea mea se uunaiga fou mo le faiva i le fanua, ma na faapefea le lagona o Molimau e faatatau i ai?
3 O le mea na aʻoaʻoina e sui usufono i le tauaofiaga na avatu ai se uunaiga fou i la latou faiva. Na latou talisapaia ai e faapea, o le taimi nei, a o leʻi oo mai le iuga o le faiga tuai o mea, ua lē na o ni afe ae o se motu o tagata e toatele o le a tuuina atu i ai le avanoa ina ia latou ulu atu i fuafuaga a Ieova mo le faasaoina o ola, ma se faamoemoe e ola e faavavau i le lalolagi parataiso. Maeu se feau faamafanafana loto na faaooina atu i ē na naunau i le upu moni! Na iloa e Molimau a Ieova e iai se galuega tele e ao ona faia—se galuega e maua ai le olioli. I tausaga mulimuli ane ai, na toe manatua ai e John Booth, o lē na avea ma se tasi o le Vaega Pule e faapea: “Na aumaia e lena fonotaga le tele o mea e olioli ai.”
4. (a) O le ā le tele ua oo atu i ai le aoaoina o le motu o tagata e toatele talu mai le 1935? (e) O le ā le auala ua faamaonia ai e le motu o tagata e toatele e ola lo latou faatuatua?
4 I tausaga na sosoo mai ai, na matuā faatoateleina ai le faitau aofai o Molimau a Ieova. E ui i sauaga matautia e tele na faaoo atu i a i latou i le Taua Lona Lua a le Lalolagi, ae na toeitiiti lava a faatoluina le toatele i totonu o le vaitaimi e sefulu tausaga. Ma o le ʻau talaʻi e 56,153 o ē na tuuina atu se molimau i le lautele i le 1935, na faateleina i le 4,900,000, o ē talaʻia le Malo i le 1994 i atunuu e sili atu i le 230. O le toatele o i latou nei o loo faamoemoe atu ma le naunautai ina ia aofia ai i a i latou o le a alofagia e Ieova ma avatu i ai le ola lelei atoatoa i luga o se lalolagi parataiso. Pe a faatusatusa atu i le lafu mamoe itiiti, ua avea moni lava i latou o se motu o tagata e toatele. E lē o i latou o ni tagata e fai mai e faatuatua ae latou te lē faatinoina. (Iakopo 1:22; 2:14-17) E auai uma i latou i le tufaina atu o le tala lelei i isi e faatatau i le Malo o le Atua. Pe o oe o se tasi o lea vaega fiafia? O le avea ma se Molimau maelega, o se faailoga tāua lea e iloa ai, ae e tele foi nisi mea e aofia ai.
ʻTutū i Luma o le Nofoālii’
5. O le ā ua faailoa mai e le mea moni e faapea, o loo “tutū i latou [le motu o tagata e toatele] i luma o le nofoālii”?
5 I le vaaiga na avatu i le aposetolo o Ioane, na ia vaaia ai “o loo tutū i latou i luma o le nofoālii ma luma o le Tamai Mamoe.” (Faaaliga 7:9) O lo latou tutū i luma o le nofoālii o le Atua e pei ona faamatala mai i lea manatu autū, ua faaalia ai lo latou talia atoatoa o le pule aoao a Ieova. E tele ni mea ua aofia ai i inei. Mo se faaaoaoga: (1) Ua latou iloa e i a Ieova le aiā e filifili ai mo ana auauna le mea e lelei ma le mea e leaga. (Kenese 2:16, 17; Isaia 5:20, 21) (2) Latou te faalogo atu i a Ieova a o fetalai atu i a i latou e ala i lana Afioga. (Teuteronome 6:1-3; 2 Peteru 1:19-21) (3) Latou te talisapaia le tāua o le gauai atu i a i latou ua faatuatuaina atu i ai e Ieova le tausiga. (1 Korinito 11:3; Efeso 5:22, 23; 6:1-3; Eperu 13:17) (4) E ui ina e lē lelei atoatoa i latou, ae latou te taumafai ma le filigā ina ia gauai atu i le taitaiga faatiokarate, e lē ma le tomumu, ae gauai gofie mai le loto. (Faataoto 3:1; Iakopo 3:17, 18) Ua tutū i latou i luma o le nofoālii ina ia tuuina atu le auaunaga paia i a Ieova, o lē latou te matuā faaaloalo ma alolofa tele i ai. Mo lenei motu o tagata e toatele, o lo latou “tutū” i luma o le nofoālii ua aliali mai ai e talileleia i latou e Lē o tietie i le nofoālii. (Faatusatusa i le Faaaliga 6:16, 17.) Talileleia e faavae i le ā?
“Oofu i Ofu Sisina”
6. (a) O le ā le uiga o le “oofu i ofu sisina” o le motu o tagata e toatele? (e) E faapefea e le motu o tagata e toatele ona maua se tulaga amiotonu i luma o Ieova? (i) O le ā le tele ua aafia ai ola o le motu o tagata e toatele ona o le faatuatua i le toto faamaligiina o Keriso?
6 Ua fai mai le faamatalaga a le aposetolo o Ioane e uiga i mea na ia vaaia e faapea, o lenei motu o tagata e toatele ua “oofu i ofu sisina.” O nā ofu sisina ua faaatagia ai lo latou tulaga mamā, tulaga amiotonu i luma o Ieova. Na faapefea ona latou maua lea tulaga? Ua uma ona tatou matauina i le vaaiga a Ioane e faapea, o loo tutū i latou i “luma o le Tamai Mamoe.” Ua latou iloa lelei o Iesu Keriso o le “Tamai mamoe a le Atua, na te aveesea le agasala a le lalolagi.” (Ioane 1:29) Na faalogo Ioane i se tasi o toeaina na ia iloa i le vaaiga o loo tu faataaliolio i le nofoālii o le Atua, o ia faamatala mai e faapea: “Ua ta foi o latou ofu, ma ua faasinasinaina o latou ofu i le toto o le Tamai mamoe. O le mea lea ua latou i luma ai o le nofoālii o le Atua.” (Faaaliga 7:14, 15) I se uiga faafaatusa, ua taina ō latou ofu e ala i le faaalia o le faatuatua i le toto faasaoola o Keriso. E lē o tau ina talia i ō latou mafaufau aʻoaʻoga a le Tusi Paia e faatatau i le togiola. O le talisapaia o le togiola e aafia ai le ituaiga o tagata i totonu e iai i latou; o lea, latou te faaalia ai le faatuatua mai “le loto.” (Roma 10:9, 10) Ua tele ai se āuga o lenei togiola i mea latou te faia i ō latou olaga. Ona o lo latou faatuatua, ua latou tuuina atu ai i latou i a Ieova e faavae i le taulaga a Keriso, faatinoina lena tuuina atu e ala i le faatofuina i le vai, ola moni e talafeagai ai ma lo latou tuuina atu, ma olioli ai i se faiā lelei ma le Atua. Maeu se faaeaga lelei—o se faaeaga e ao ona leoleoina ma le faaeteete!—2 Korinito 5:14, 15.
7, 8. O le ā le fesoasoani ua faia e le faalapotopotoga a Ieova i le motu o tagata e toatele ina ia tausia ai le lē faaleagaina o ō latou ofu?
7 Ona o le naunau alofa mo lo latou lelei e faavavau, ua faaauau ai pea ona faasino mai e le faalapotopotoga a Ieova ia uiga ma amio e ono mafai ona pisia pe faaleagaina ai ofu e iloa tino ai se tasi, ina ia tusa ai lava po o ā taʻutinoga o fai atu, ae o le a lē talafeagai ai lea tagata ma le faamatalaga faavaloaga o i le Faaaliga 7:9, 10. (1 Peteru 1:15, 16) I le toe faatāuaina o le mea na uluai lomia i le Watchtower, i le 1941 ma faasolo mai ai, na faaalia mai ai pea e faapea, o le a matuā sese ma lē talafeagai ona talaʻi i isi, ae a oo i le taimi e lē o talaʻi ai, ona auai lea i le faia o amioga e pei o le faitaaga ma le mulilua. (1 Tesalonia 4:3; Eperu 13:4) I le 1947, sa faamamafa mai ai e faapea o tapulaa faa-Kerisiano a Ieova mo faaipoipoga, e faatatauina lona aogā i atunuu uma lava; e tusa lava po o ā aganuu o faatagaina e isi atunuu, ae o i latou e tumau pea ona faia le tele o avā, o le a lē mafai ona avea o ni Molimau a Ieova.—Mataio 19:4-6; Tito 1:5, 6.
8 I le 1973, na faaalia ai i Molimau a Ieova i le lalolagi aoao e faapea, o i latou uma lava e ao ona taofia atoatoa mai le faia o se mea e mautinoa e faaleagaina ai e pei o le faaaogaina sese o le tapaa, e tusa lava po o fea o iai i latou—e lē gata i le Maota o le Malo po o le auaunaga i le fanua, ae faapea foi i galuega po o nisi vaega tu ese e lē o iloa atu ai e le lautele. (2 Korinito 7:1) I le 1987 i tauaofiaga itumalo a Molimau a Ieova, na fautuaina ai ma le malosi talavou e faapea ina ia tausia pea se tulaga mamā i luma o le Atua, e ao ona leoleo maluina i latou mai le ola i se olaga faauigalua. (Salamo 26:1, 4) Ua lē mapu ona lapatai mai pea Le Olomatamata e faatatau i nisi o vala o le agaga o le lalolagi, auā “o lenei lava le toaga i lotu e lelei ma le faamaoni i luma o le Atua le Tamā,” e aofia ai le tausia o se tasi ia aua “neʻi pisia mai o ia i le lalolagi.”—Iakopo 1:27.
9. O ai moni lava o le a tutū i se tulaga talileleia i luma o le nofoālii o le Atua pe a mavae atu le puapuaga tele?
9 O i latou e uunaia e lo latou faatuatua ina ia ola i se auala e tausia ai lo latou mamā tau amio ma le faaleagaga, o i latou ia o le a tumau pea ona “tutū i luma o le nofoālii” o ni auauna ua talileleia e le Atua pe a mavae atu le puapuaga tele. O tagata nei e lē gata ina amataina se olaga faa-Kerisiano, ae ua latou tutumau foi i ai ma le faamaoni.—Efeso 4:24.
“Ua i ai foi Lau Pama i O Latou Lima”
10. O le ā le tāua o lau pama na vaaia e Ioane o i lima o le motu o tagata e toatele?
10 O se tasi o vala mataina ua matauina e le aposetolo o Ioane i le motu o tagata e toatele e faapea, “ua i ai foi lau pama i o latou lima.” O le ā le tāua o lena mea? E mautinoa o na lau pama na toe fafagu atu ai i a Ioane le tausamiga faa-Iutaia i fale apitaga i le kalena faa-Eperu, sa faia pe a uma le seleselega i le tau vevela. Ina ia tusa ai ma le Tulafono, o lau pama faapena foi ma lālā o isi laau, na faaaogaina e fai ai fale apitaga e nonofo ai a o faia le tausamiga. (Levitiko 23:39-40; Neemia 8:14-18) Na talotaloina foi e ē e tapuai i le malumalu i le taimi e usuina ai Salamo (Hallel) (Salamo 113-118). O le talotaloina o lau pama e le motu o tagata e toatele, atonu e faamanatu atu ai foi i a Ioane le mea na tupu a o tietie atu Iesu i le tamai asini i Ierusalema, a o talotalo atu e se motu o tagata e toatele lau pama ma alalaga atu e faapea: “Ia manuia lē afio mai i le suafa o le Alii o le Tupu o Isaraelu.” (Ioane 12:12, 13) O lea la, o le talotaloina o lau pama ua faailoa ai le olioli o le motu o tagata e toatele e alagaina le Malo o Ieova ma lana Tupu faauuina.
11. Aisea ua maua moni ai e auauna a le Atua le olioli e auauna atu ai i a Ieova?
11 O le agaga olioli lea ua faapea ona faaalia e le motu o tagata e toatele i le taimi nei, a o auauna atu i a Ieova. E lē faapea o le a lē feagai i latou ma ni faigata, po o le lē oo foi i a i latou o ni faanoanoaga po o ni tigā. Ae o le lotomalie e maua mai i le auauna atu ma faafiafia Ieova, e fesoasoani e faafetaiaia ai na mea. O lea, na faamatala ai e se misionare o lē sa auauna ma lana tane mo le 45 tausaga i Kuatemala e faatatau i tulaga tau amatamata na la iai, o le faigata o le galuega ma lamatiaga i feoaiga, na avea ma mea ua masani ai le olaga a o la taumafai e oo atu i nuu o tagata Initia ma le feau o le Malo. Na faaiu mai faapea lana faamatalaga: “O le vaitaimi lea sa sili ai ona fiafia lo maʻua olaga.” E ui ina sa lagona āuga o le tino matua ma maʻi, ae o nisi o upu na aofia i ana toe upu i ana tusitusiga o lona olaga e faapea: “Sa avea o se olaga lelei ma matuā tauia.” Ua faapena le lagona o Molimau a Ieova i la latou faiva i le lalolagi atoa.
“Auaunaga Paia i le Ao ma le Po”
12. E tusa lava po o le ao po o le po, o le ā ua mataulia mai e Ieova i le lalolagi?
12 O nei tagata tapuai ma le olioli ua latou tuuina atu i a Ieova le “auaunaga paia i le ao ma le po i lona malumalu.” (Faaaliga 7:15, NW) E faitau miliona o loo auai i lenei auaunaga paia i le lalolagi atoa. A oo i le po i nisi o atunuu, ona momoe ai lea o tagata o lena vaipanoa, ae o isi atunuu o loo i luga ai le la, o loo galulue mamafa ai Molimau a Ieova i le molimau atu. A o faaauau ona taavili le lalolagi, i le ao ma le po, o loo latou usuina atu ai viiga o Ieova. (Salamo 86:9) Peitai o le auaunaga i le ao ma le po e pei ona faatatau i ai le Faaaliga 7:15, e iai atili sona faatatauga totino.
13. Ua faapefea ona faailoa mai e le Tusi Paia le uiga o le auauna i le “ao ma le po”?
13 O tagata taitoatasi e faia aʻe ai le motu o tagata e toatele ua latou tuuina atu le auaunaga paia i le ao ma le po. Po o le uiga ea la o lenei mea, o so o se mea lava o latou faia e manatu i ai o le auaunaga paia? E moni, e tusa lava po o le ā o latou faia, ae aʻoaʻoina i latou e faia i se auala e viia ai Ieova. (1 Korinito 10:31; Kolose 3:23) Peitai, o le “auaunaga paia,” e faatatau patino lava i na o mea e fesootai tuusao ma le tapuaiga a se tasi i le Atua. O le auai i se galuega i le “ao ma le po,” e faatatau lea i le faia e lē aunoa po o le faaauau pea, e aofia ai ma taumafaiga maelega.—Faatusatusa i le Iosua 1:8; Luka 2:37; Galuega 20:31; 2 Tesalonia 3:8.
14. O le ā ua avea ai la tatou auaunaga totino i le fanua ma mea ua talafeagai i ai le faaupuga faapea o loo auauna i le “ao ma le po”?
14 A o latou auauna atu i le lotoā faalelalolagi o le malumalu faaleagaga sili o Ieova, o i latou o faia aʻe ai le motu o tagata e toatele, e taumafai e auai e lē aunoa ma fai ma masani le auai i le faiva i le fanua. E toatele ua fai ma ō latou sini le faia o se vaega i le faiva i le fanua i vaiaso taitasi. O isi ua faamalolosi ina ia avea ma paeonia sauatoa po o le paeonia lagolago. E masani ona ō atu i latou nei i le taeaopo e molimau atu i fetaulaiga o ala ma faleoloa. Ina ia talia le manao o ē naunau fiafia, ua faia ai e isi Molimau suesuega faale-Tusi Paia i le leva o le po. Latou te molimau atu pe a ō e faatau, pe a faimalaga, i le taimi o malologa i le aoauli, ma e ala i le faaaogaina o le telefoni.
15. E ese ai mai le faiva i le fanua, o le ā ua aofia ai i la tatou auaunaga paia?
15 O le faia o se sao i sauniga a le faapotopotoga o se tasi foi lea o vaega o la latou auaunaga paia; e faapena foi ma galuega o aofia ai i le fausia ma le tausia o nofoaga o fonotaga faa-Kerisiano. Ua aofia ai foi taumafaiga faaleagaga ma le faaletino e faalaeiau ma fesoasoani ai i uso ma tuafāfine Kerisiano, ina ia faatumauina pea le faia o se sao i le auaunaga i a Ieova. E aofia ai galuega a ā tatou Komiti Faufautua i Falemai (Hospital Liaison Committees). O vala eseese o le auaunaga i Peteli, faapena foi ma le auaunaga tauofo i ā tatou tauaofiaga, o vaega uma na o le auaunaga paia. E moni, pe afai o le a aafia gaoioiga uma o lo tatou olaga i la tatou faiā ma Ieova, ona faatumulia ai lea i le auaunaga paia. E pei ona fai mai le mau, e tuuina atu e tagata o Ieova le “auaunaga paia i le ao ma le po,” ma ua latou maua le tele o le olioli i le faia faapea.—Galuega 20:35; 1 Timoteo 1:11.
ʻMai Aiga, ma Nuu, ma Gagana Eseese’
16. Ua faapefea ona faamaonia o le motu o tagata e toatele e “mai atu nuu uma”?
16 E mai atu nuu uma lava, ua ō mai ai le motu o tagata e toatele. E lē manatu faapito le Atua, ma o le sauniuniga o le togiola ua saunia e ala mai i a Iesu Keriso, ua lava lona aogā e faaaofia ai i latou uma lava. Ina ua faatoʻā faamautinoaina faale-Tusi Paia le motu o tagata e toatele i tuā i le 1935, sa galulue ma le tiotio ai Molimau a Ieova i atunuu e 115. I tausaga e amata mai i le 1990, na oo atu ai le sailia o ē pei ni mamoe i le sili atu ma le faaluaina le tele o atunuu.—Mareko 13:10.
17. O le ā ua faia e fesoasoani atu ai i ē mai i ‘ituaiga uma, tagata, ma gagana’ ina ia aofia ai i le motu o tagata e toatele?
17 I le sailia o ē e ono avea ma vaega o le motu o tagata e toatele, ua uaʻi atu ai Molimau a Ieova e lē gata i vaega tetele o atunuu, ae faapena foi i ituaiga o tagata ma gagana eseese o loo nonofo ai i na atunuu. Ina ia oo atu i nei tagata, ua lomia ai e Molimau lomiga faale-Tusi Paia e silia ma le 300 o gagana. Ua aofia ai i lenei mea le toleniina ma le faamautuina o ni ʻau faaliliu agavaa, le saunia o komepiuta ina ia mafai ai ona faagaoioia nei gagana uma lava, ma le faia ai o galuega o le lolomiina. I le faagasologa o le lima tausaga ua tuanai atu, e 36 gagana e tautatala ai tagata pe tusa ma le 98,000,000, ua faaopoopo atu i le lisi o gagana ua faaliliuina. E faaopoopo atu i ai, e taumafai Molimau e asiasi totino atu i nei tagata ina ia fesoasoani i a i latou ia malamalama i le Afioga a le Atua.—Mataio 28:19, 20.
“O Mai Nai le Puapuaga Tele”
18. (a) Pe a oo mai le puapuaga tele, o ai o le a malu puipuia? (e) O ā folafolaga fiafia o le a faia i lea taimi?
18 Pe a faamatuu atu e agelu matagi o le faaumatiaga ia o loo latou taofiofia e pei ona faasino i ai le Faaaliga 7:1, e lē gata o le a maua ai e “auauna a lo tatou Atua” ua faauuina le puipuiga alofa a Ieova, ae o le a faapena foi ma le motu o tagata e toatele o ē o loo auaufaatasi i a i latou i le tapuaiga moni. E pei ona sa taʻuina atu i le aposetolo o Ioane, o i latou ia o le motu o tagata e toatele, o le a “o mai nai le puapuaga tele” o ē ua faasaoina. Maeu se ʻalaga o le loto faafetai ma le viiga o le a iai a o latou folafola atu: “O i ai le faaolataga i lo tatou Atua, o le tietie i le nofoālii, atoa ma le Tamai Mamoe!” Ma o auauna faamaoni uma a le Atua o i le lagi o le a faaopoopo atu i ai ma ō latou leo i le faalauiloaina atu e faapea: “Amene! Ia i lo tatou Atua le faamanū, ma le viiga, ma le poto, ma le faafetai, ma le malosi e faavavau faavavau lava! Amene.”—Faaaliga 7:10-14.
19. O le ā le galuega fiafia o le a naunau ē faasaoina e faia ai so latou sao?
19 Maeu se taimi fiafia o le a iai! O i latou uma e faasaoina o le a avea ma auauna a le Atua moni e toatasi! O le olioli e silisili i mea uma lava o le auauna atu lea i a Ieova. O le a tele galuega e faia—galuega e olioli ai! O le a faaliliuina le lalolagi e avea ma Parataiso. E faitau afe miliona ē o maliliu o le a toe faatutuina mai ona aʻoaʻoina ai lea i ala o Ieova. Maeu se faaeaga olioli o le a iai i le faia ai o se vaega i lea mea!
O le ā Lau Faamatalaga?
◻ O ā āuga o mea na tutupu i le 1935 i le faiva i le fanua a Molimau a Ieova?
◻ O le ā ua faailoa mai e mea moni e faapea o loo “tutū i latou [le motu o tagata e toatele] i luma o le nofoālii”?
◻ E ao faapefea i le talisapaia o le toto o le Tamai Mamoe ona aafia ai le auala o tatou ola ai?
◻ O le ā le uiga tāua e faailoa mai e lo latou talotaloina o lau pama?
◻ O faapefea ona tuuina atu e le motu o tagata e toatele le auaunaga i le ao ma le po?
[Ata i le itulau 17]
O la latou auaunaga paia e atagia mai ai lo latou auai e lē aunoa, le filigā, ma taumafaiga faamaoni