Pe Mafai ona Ogatasi le Muai Tuupoina ma le Alofa o le Atua?

“UA MATOU faamatalaina le muai tuupoina e faapea, o se fuafuaga e faavavau a le Atua, ua ia filifilia ai le mea ua ia finagalo e faia i tagata taitoatasi. Auā e lē tutusa tulaga na ia faia ai i latou uma, ae na muai tofia nisi i le ola e faavavau a o isi i le faaumatiaga e faavavau.”

O le auala lena na faamatalaina ai e se tagata Porotesano Toefuataiina e igoa i a John Calvin ōna manatu e uiga i le muai tuupoina, i le tusi Institutes of the Christian Religion. O lenei aʻoaʻoga, e faavae i le manatu e faapea, o le Atua, na te silafia mea uma lava, e lē mafai la i gaoioiga a āna foafoaga faiola ona fesiligia ai ana fuafuaga, pe faamalosia ai o ia e faia ni suiga.

Ae po o le mea moni lena o faaalia mai i le Tusi Paia e uiga i le Atua? O le mea e sili ona tāua, po o ogatusa lena faamatalaga ma uiga o le Atua, ae maise lava i lona uiga aupito sili—o le alofa?

Se Atua e Mafai ona Valoia le Lumanai

E mafai e le Atua ona valoia le lumanai. Ua ia faamatalaina o ia lava o “Lē o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu laʻu pule, ou te faia foi mea uma ou te loto i ai.” (Isaia 46:10) I le faagasologa o le talafaasolopito o le tagata, na faia ai e le Atua ina ia faamauina ana valoaga e faaalia ai, e mafai ona ia silafia le lumanai ma valoia mea e tutupu a o leʻi oo mai.

I lea, i aso o Pelesara, le tupu o Papelonia, ina ua faia e le perofeta o Tanielu se miti e uiga i ni manufeai se lua, na suitulaga le tasi i le isi, na faailoa atu e Ieova i a te ia le uiga o le miti: “O le mamoe poʻa na e iloa ua i ai nifo e lua, o tupu ia o Metai ma Peresia. O le ʻoti taufulufulu[a] foi, o le tupu lea o Iavana [Eleni].” (Tanielu 8:20, 21) E manino lava sa faatinoina e le Atua lona uluai silafia o le lumanai e ala i le faailoaina mai o le faasologa o malo malolosi o le lalolagi. O le malo sa pule i lena vaitaimi na tuuina mai ai le faaaliga, o le Emepaea o Papelonia, o le a suia e Metai ma Peresia, ona sosoo ai lea ma Eleni.

E mafai foi ona faatatau valoaga i se tagata e toatasi. Mo se faataitaiga, na faalauiloa mai e le perofeta o Mika e faapea, o le Mesia, o le a fanau mai i Peteleema. (Mika 5:2) E tusa ai ma lenei tulaga, na toe faatinoina ai e le Atua lona uluai silafia o le lumanai. Ae peitai, o lenei mea, na faasilasilaina mai faatasi ma se fuafuaga patino—le faailoaina mai lea o le Mesia. E lē o tautonuina ai la i lenei mea le faalauaiteleina atu o se aʻoaʻoga i se iuga tuupoina e faapea e aofia ai tagata taitoatasi uma.

Na i lo o lea, ua faaalia e le Tusi Paia, e iai tulaga e filifili ai le Atua na te lē muai silafiaina le taunuuga. E pei o le taimi a o leʻi faaumatia Sotoma ma Komoro, na ia faalauiloa atu e faapea: “O le mea lea ou te alu ifo ai, ia iloa po ua faia lava e i latou e pei o le alaga ua oo mai ai ia te au; afai foi ua leai, ou te iloa lava.” (Kenese 18:21) Ua faaalia manino i lenei mau i a i tatou e faapea, sa leʻi muai silafiaina e le Atua le tele o le amioleaga na iai i na aai, ae na te leʻi suesueina le mataupu.

E moni, e mafai e le Atua ona muai silafia nisi o mea e tutupu, ae i le tele lava o tulaga, na te filifilia ai e lē faaaogaina lona silafia o le lumanai. Ona o le Atua e ona le malosi uma lava, e saoloto ai o ia e faatinoina ōna tomai i le mea e finagalo i ai o ia, ae lē tusa ai ma le manao o tagata lē lelei atoatoa.

Le Atua o Lē e Mafai ona Faasaʻoina Mea

I le pei o Calvin, ua faapea mai nisi tagata, na muai silafia lava e le Atua o le a paʻū le tagata i le agasala, a o leʻi faia lana foafoaga ma ua uma foi ona ia tuupoina ʻē ua filifilia’ a o leʻi oo i lena paʻū. Ae afai e moni lena mea, pe e lē o se pepelo la mo le Atua le ofoina atu i a Atamu ma Eva o le faamoemoe i le ola e faavavau, ae ua na silafia lelei o le a lē mafai ona la mauaina? E lē gata i lea, e leai lava se mea o faafitia ai e le Tusi Paia le tuuina atu i le uluai ulugalii o le filifiliga saoloto: po o le mulimuli i taiala mai le Atua ma ola ai e faavavau, po o le teena o na taiala, ma oti ai.—Kenese, mataupu e 2.

Ae pe na avea le agasala a Atamu ma Eva ma mea na lē taulau ai le fuafuaga a le Atua? E leai, auā, ina ua la agasala, na faalauiloa mai loa e le Atua e faapea, o le a ia saunia se “fanau” na te faaumatia Satani ma ōna sui, ma o le a ia toe faasaʻoina foi mea i le lalolagi. E pei lava ona lē mafai e ni nai iniseti ona taofia se faifaatoaga mai le fuaina mai o le anoanoai o fua lelei mai lana faatoaga, e faapena foi i le lē usiusitai o Atamu ma Eva ona lē mafai ona taofia ai le Atua mai le faia o le lalolagi e avea ma parataiso.—Kenese, mataupu e 3.

Na faaalia mulimuli ane e le Atua e faapea, o le a iai se pulega faalemalo o le a tuuina atu i sē e tupuga mai i le tupu o Tavita, ma o le a iai isi o le a aufaatasi ai i lenei Malo. O i latou nei, e taʻua “o le au paia a [L]ē Silisili ese.”—Tanielu 7:18; 2 Samuelu 7:12; 1 Nofoaiga a Tupu 17:11.a

Ua Valoia, ae Lē o le Muai Tuupoina

Ona o le mea moni faapea, sa leʻi filifili le Atua na te silafia po o lē fea auala o le a uia e tagata, sa leʻi taofia ai o ia mai le valoia o iuga o gaoioiga lelei po o gaoioiga leaga a le tagata. E lē mafai ona tuuaia se inisinia o lē na lapataia se avetaavale e uiga i le tulaga leaga o loo iai lana taavale, pe afai e tupu mai se faalavelave faafuasei, pe tuuaia foi ona o lona muai iloaina o lea tulaga. E faapena foi i le Atua, e lē mafai ona tuuaia e faapea ua uma ona ia tuupoina ni iuga faanoanoa o gaoioiga a tagata.

Sa faamaonia foi lena mea i fanau a le uluai ulugalii. A o leʻi fasiotia e Kaino lona uso, sa tuu atu e Ieova i a Kaino e faia se filifiliga. Po o le a ia pulea le agasala, po o le a pule le agasala i a te ia? E leai lava se mea o taʻua ai i le faamatalaga e faapea na uluai fuafua e Ieova o le a faia e Kaino se filifiliga leaga ma fasiotia lona uso.—Kenese 4:3-7.

Mulimuli ane, na lapataia e le Tulafono faa-Mose tagata Isaraelu e uiga i le mea o le a tupu pe afai e liliu ese mai i a Ieova, mo se faataitaiga, i lo latou faaipoipo atu lea i fafine o nuu faapaupau. O le mea na valoia na tupu moni lava. E mafai ona iloa lenei mea i le faaaoaoga a le tupu o Solomona, o lē na taaina i ōna tausaga mulimuli e ana avā mai nuu ese e faia le ifo i tupua. (1 Tupu 11:7, 8) Ioe, na lapataia e le Atua ona tagata, ae na te leʻi muai tuupoina po o ā ā latou gaoioiga taitoatasi o le a fai.

O Kerisiano filifilia po o ē ua tofia, ua faalaeiauina ina ia finafinau pe afai latou te mananao e maua le taui folafolaina o le pule faatasi ma Keriso i le lagi. (2 Peteru 1:10; Faaaliga 2:5, 10, 16; 3:11) E pei ona sa fesiligia e nisi aʻoaʻo o aso ua mavae, Aisea na tuuina mai ai na faamanatuga pe afai ua faaiuina le valaauina o ē ua filifilia?

Muai Tuupoina ma le Alofa o le Atua

Na tuuina atu i tagata le filifiliga saoloto, auā na faia i le “faatusa o le Atua.” (Kenese 1:27) Sa matuā manaomia lava le filifiliga saoloto pe afai e āva tagata ma auauna i le Atua i le alofa, ae lē pei o ni masini (robots) e muai fuafuaina ā latou gaoioiga uma. O le alofa na faaalia e foafoaga faiola atamamai saoloto, o le a mafai ai e le Atua ona faamaonia ni tuuaiga sese. Ua ia faapea mai: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—Faataoto 27:11.

Afai na muai tuupoina—pe na uluai faapolokalamaina auauna a le Atua—po ua lē fesiligia ai ea la le moni o lo latou alofa mo Lē na Faia i latou? Ma le isi, po ua lē feteenai foi la ma le lē faailoga tagata o le Atua, i lona muai filifilia o tagata ua tuupoina mo le mamalu ma le fiafiaga i le lagi, e aunoa ma le iloiloina o ō latou uiga lelei taitoatasi? E lē gata i lea, afai o le a muai filifilia na tagata mo le manuia, ae o isi ua tuupoina mo le faasalaga e faavavau, o le a faapena foi la ona lē lagona se loto faafetai faamaoni i le “filifiliga” po o “e ua tofiaina.”—Kenese 1:27; Iopu 1:8; Galuega 10:34, 35.

Mulimuli ane, na taʻu atu e Keriso i ōna soo ina ia talaʻi le tala lelei i tagata uma lava. Ana faapea ua uma ona filifilia e le Atua i latou o le a faasaoina, po o le a lē faavaivaia ai ea e lenei mea le maelega ua faaalia e Kerisiano i le galuega faaevagelia? Po o le a faaleaogaina ai ea le galuega talaʻi?

O le alofa lē faailoga tagata mai le Atua, o le uunaiga aupito sili lea ona malosi e mafai ona faagaoioia ai tagata e toe faafoi atu le alofa i a te ia. O le faaaliga aupito sili o le alofa o le Atua, o le faataulagaina lea o lona Alo e fai ma sui o tagata agasala, lē lelei atoatoa. O le muai silafia e le Atua o le lumanai e faatatau i lona Alo, o se faaaoaoga tutasi, ae ua faamautinoa mai ai i a i tatou e faapea, o folafolaga i le toe faafoisiaina e faalagolago i a Iesu, o le mea moni, o le a faataunuuina lava. O lea, seʻi o tatou faatuatua ia i lena Alo ma faalatalata atu ai i le Atua. Seʻi ō tatou faaalia le talisapaia e ala i le talia o le valaau a le Atua, ina ia amata ai ona faia se faiā vavalalata ma Lē na Foafoaina i tatou. I aso nei, ua faalauaitele atu ai e le Atua lena valaau i a i latou uma o ē mananao e faatino la latou filifiliga saoloto ma faaalia lo latou alofa mo ia.

[Faaopoopoga i lalo]

[Pusa i le itulau 7]

MUAI TUUPOINA O SE VASEGA

“O ē na silafia e le Atua anamua, na ia muai tuupoina foi i latou anamua ia foliga i lona Alo, ina ia avea o ia ma ulumatua o le auuso e toatele. Ma o ē na muai tuupoina e ia anamua, na valaauina foi i latou e ia; o ē na valaauina e ia, na tauamiotonuina e ia; o ē na tauamiotonuina e ia, na faamamaluina foi i latou e ia.” (Roma 8:29, 30, New International Version) E mafai faapefea ona tatou malamalama i le faaupuga “muai tuupoina” na faaaogā e Paulo i nei fuaiupu?

O le uiga o upu a Paulo i inei, e lē o se finauga maumauai e lagolagoina ai le manatu e uiga i iuga muai tuupoina o tagata taitoatasi. I le amataga lava o lo tatou senituri, na faamatala ai e le Dictionnaire de théologie catholique manatu o Paulo i le (Roma, mataupu e 9-11) i le auala lenei: “Ua tele ina salalau atu i tagata aʻoga Katoliko le manatu e faapea, o le aʻoaʻoga moni i le muai tuupoina mo le ola e faavavau, e leʻi oo ina faasalalauina atu atoatoa.” Ua taʻua e lena lava tusi se faamatalaga a M. Lagrange e faapea: “O le fesili na uluai lāgā e Paulo, e lē o faatatau lava i se iuga o le muai tuupoina po o se tofiga anamua, ae ua na o se valaaulia mo tagata o Nuuese ina ia faapaiaina i le Faa-Kerisiano, ona ua ia teena le Atua, ona o le lē talitonu o tagata Iutaia. . . . E faapitoa lea i se vaega o Nuu Ese, o Iutaia, ae lē o patino i tagata taitoatasi.”—O upu faasisipa o ā matou.

Talu ai nei lava, na tuuina mai ai e le Jerusalem Bible lea lava faaiuga e faatatau i nei mataupu (9-11), i le faapea mai: “O lea la, o le autū o nei mataupu, e lē o le faafitauli i le iuga tuupoina o tagata taitoatasi i le mamalu, po o le faatuatuaga, ae e uiga i le vaega a tagata Isaraelu i le atiina aʻe o le talafaasolopito i le faaolataga, ua na o lena lava le faafitauli na lāgā i le faamatalaga i le F[eagaiga] T[uai].”

E tutusa lelei lava fuaiupu mulimuli i le Roma mataupu e 8 ma lea faamatalaga. I lea, o nei fuaiupu ua faamanatu mai ai ma le tonu i a i tatou e faapea, na muai silafia e le Atua le iai o se vasega, po o se vaega mai tagata o le a valaauina e pule faatasi ma Keriso, faapea ma mea e manaomia e ao ona latou ausia—ma na faia lenei mea e aunoa ma le muai tofiaina o tagata patino o ē o le a filifilia, auā o le a feteenai lena mea ma lona alofa ma lana faamasinoga tonu.